| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஸீமானுஜானநகதா²வண்ணனா
Sīmānujānanakathāvaṇṇanā
138. ‘‘புரத்தி²மாய தி³ஸாயா’’தி இத³ங் நித³ஸ்ஸனமத்தங். தஸ்ஸங் பன தி³ஸாயங் நிமித்தே அஸதி யத்த² அத்தி², ததோ பட்டா²ய பட²மங் ‘‘புரத்தி²மாய அனுதி³ஸாய, த³க்கி²ணாய தி³ஸாயா’’திஆதி³னா ஸமந்தா விஜ்ஜமானட்டா²னேஸு நிமித்தானி கித்தெத்வா புன ‘‘புரத்தி²மாய அனுதி³ஸாயா’’தி பட²மகித்திதங் கித்தேதுங் வட்டதி, தீஹி நிமித்தேஹி ஸிங்கா⁴டகஸண்டா²னாயபி ஸீமாய ஸம்மன்னிதப்³ப³தோ. திக்க²த்துங் ஸீமாமண்ட³லங் ஸம்ப³ந்த⁴ந்தேனாதி வினயத⁴ரேன ஸயங் ஏகஸ்மிங்யேவ டா²னே ட²த்வா கேவலங் நிமித்தகித்தனவசனேனேவ ஸீமாமண்ட³லங் ஸமந்தா நிமித்தேன நிமித்தங் ப³ந்த⁴ந்தேனாதி அத்தோ². தங் தங் நிமித்தட்டா²னங் அக³ந்த்வாபி ஹி கித்தேதுங் வட்டதி. தியோஜனபரமாய ஸீமாய ஸமந்ததோ திக்க²த்துங் அனுபரிக³மனஸ்ஸ ஏகதி³வஸேன து³க்கரத்தா வினயத⁴ரேன ஸயங் அதி³ட்ட²ம்பி புப்³பே³ பி⁴க்கூ²ஹி யதா²வவத்தி²தங் நிமித்தங் ‘‘பாஸாணோ ப⁴ந்தே’’திஆதி³னா கேனசி வுத்தானுஸாரேன ஸல்லக்கெ²த்வா ‘‘ஏஸோ பாஸாணோ நிமித்த’’ந்திஆதி³னா கித்தேதும்பி வட்டதி ஏவ.
138.‘‘Puratthimāyadisāyā’’ti idaṃ nidassanamattaṃ. Tassaṃ pana disāyaṃ nimitte asati yattha atthi, tato paṭṭhāya paṭhamaṃ ‘‘puratthimāya anudisāya, dakkhiṇāya disāyā’’tiādinā samantā vijjamānaṭṭhānesu nimittāni kittetvā puna ‘‘puratthimāya anudisāyā’’ti paṭhamakittitaṃ kittetuṃ vaṭṭati, tīhi nimittehi siṅghāṭakasaṇṭhānāyapi sīmāya sammannitabbato. Tikkhattuṃ sīmāmaṇḍalaṃ sambandhantenāti vinayadharena sayaṃ ekasmiṃyeva ṭhāne ṭhatvā kevalaṃ nimittakittanavacaneneva sīmāmaṇḍalaṃ samantā nimittena nimittaṃ bandhantenāti attho. Taṃ taṃ nimittaṭṭhānaṃ agantvāpi hi kittetuṃ vaṭṭati. Tiyojanaparamāya sīmāya samantato tikkhattuṃ anuparigamanassa ekadivasena dukkarattā vinayadharena sayaṃ adiṭṭhampi pubbe bhikkhūhi yathāvavatthitaṃ nimittaṃ ‘‘pāsāṇo bhante’’tiādinā kenaci vuttānusārena sallakkhetvā ‘‘eso pāsāṇo nimitta’’ntiādinā kittetumpi vaṭṭati eva.
ஸுத்³த⁴பங்ஸுபப்³ப³தோதி ந கேனசி கதோ ஸயங்ஜாதோவ வுத்தோ. ததா² ஸேஸாபி. இதரோபீதி ஸுத்³த⁴பங்ஸுபப்³ப³தாதி³கோபி பப்³ப³தோ. ஹத்தி²ப்பமாணதோதி எத்த² பூ⁴மிதோ உக்³க³தப்பதே³ஸேன ஹத்தி²ப்பமாணங் க³ஹேதப்³ப³ங். சதூஹி வா தீஹி வாதி ஸீமாபூ⁴மியங் சதூஸு, தீஸு வா தி³ஸாஸு டி²தேஹி. ஏகிஸ்ஸா ஏவ பன தி³ஸாய டி²தேஹி ததோ ப³ஹூஹிபி ஸம்மன்னிதுங் ந வட்டதி. த்³வீஹி பன த்³வீஸு தி³ஸாஸு டி²தேஹிபி ந வட்டதி. தஸ்மாதி யஸ்மா ஏகேன ந வட்டதி, தஸ்மா. தங் ப³ஹித்³தா⁴ கத்வாதி கித்திதனிமித்தஸ்ஸ அஸீமத்தா அந்தோஸீமாய கரணங் அயுத்தந்தி வுத்தங். தேனாஹ ‘‘ஸசே’’திஆதி³.
Suddhapaṃsupabbatoti na kenaci kato sayaṃjātova vutto. Tathā sesāpi. Itaropīti suddhapaṃsupabbatādikopi pabbato. Hatthippamāṇatoti ettha bhūmito uggatappadesena hatthippamāṇaṃ gahetabbaṃ. Catūhi vā tīhi vāti sīmābhūmiyaṃ catūsu, tīsu vā disāsu ṭhitehi. Ekissā eva pana disāya ṭhitehi tato bahūhipi sammannituṃ na vaṭṭati. Dvīhi pana dvīsu disāsu ṭhitehipi na vaṭṭati. Tasmāti yasmā ekena na vaṭṭati, tasmā. Taṃ bahiddhā katvāti kittitanimittassa asīmattā antosīmāya karaṇaṃ ayuttanti vuttaṃ. Tenāha ‘‘sace’’tiādi.
த்³வத்திங்ஸபலகு³ளபிண்ட³ப்பமாணதா ஸண்டா²னதோ க³ஹேதப்³பா³, ந துலக³ணனாவஸேன, பா⁴ரதோ பலபரிமாணஞ்ச மக³த⁴துலாய க³ஹேதப்³ப³ங். ஸா ச லோகியதுலாய த்³விகு³ணாதி வத³ந்தி. அதிமஹந்தோபீதி பூ⁴மிதோ ஹத்தி²ப்பமாணங் அனுக்³க³ந்த்வா ஹெட்டா²பூ⁴மியங் ஓதிண்ணக⁴னதோ அனேகயோஜனப்பமாணோபி. ஸசே ஹி ததோ ஹத்தி²ப்பமாணங் கூடங் உக்³க³ச்ச²தி, பப்³ப³தஸங்க்²யமேவ க³ச்ச²தி.
Dvattiṃsapalaguḷapiṇḍappamāṇatā saṇṭhānato gahetabbā, na tulagaṇanāvasena, bhārato palaparimāṇañca magadhatulāya gahetabbaṃ. Sā ca lokiyatulāya dviguṇāti vadanti. Atimahantopīti bhūmito hatthippamāṇaṃ anuggantvā heṭṭhābhūmiyaṃ otiṇṇaghanato anekayojanappamāṇopi. Sace hi tato hatthippamāṇaṃ kūṭaṃ uggacchati, pabbatasaṅkhyameva gacchati.
அந்தோஸாரானந்தி தஸ்மிங் க²ணே தருணதாய ஸாரே அவிஜ்ஜமானேபி பரிணாமேன ப⁴விஸ்ஸமானஸாரேபி ஸந்தா⁴ய வுத்தங். தாதி³ஸானஞ்ஹி ஸூசித³ண்ட³கப்பமாணபரிணாஹானங் சதுபஞ்சமத்தம்பி வனங் வட்டதி. அந்தோஸாரமிஸ்ஸகானந்தி அந்தோஸாரேஹி ருக்கே²ஹி ஸம்மிஸ்ஸானங். ஏதேன ச ஸாரருக்க²மிஸ்ஸம்பி வனங் வட்டதீதி த³ஸ்ஸேதி. சதுபஞ்சருக்க²மத்தம்பீதி ஸாரருக்கே² ஸந்தா⁴ய வுத்தங். வனமஜ்ஜே² விஹாரங் கரொந்தீதி ருக்க²க⁴டாய அந்தரே ருக்கே² அச்சி²ந்தி³த்வா வதிஆதீ³ஹி விஹாரபரிச்சே²த³ங் கத்வாவ அந்தோருக்க²ந்தரேஸு ஏவ பரிவேணபண்ணஸாலாதீ³னங் கரணவஸேன யதா² அந்தோவிஹாரம்பி வனமேவ ஹோதி, ஏவங் விஹாரங் கரொந்தீதி அத்தோ². யதி³ ஹி ஸப்³ப³ங் ருக்க²ங் சி²ந்தி³த்வா விஹாரங் கரெய்யுங், விஹாரஸ்ஸ அவனத்தா தங் பரிக்கி²பித்வா டி²தங் வனங் ஏகத்த² கித்தேதப்³ப³ங் ஸியா. இத⁴ பன அந்தோபி வனத்தா ‘‘வனங் ந கித்தேதப்³ப³’’ந்தி வுத்தங். ஸசே ஹி தங் கித்தெந்தி, ‘‘நிமித்தஸ்ஸ உபரி விஹாரோ ஹோதீ’’திஆதி³னா அனந்தரே வுத்ததோ³ஸங் ஆபஜ்ஜதி. ஏகதே³ஸந்தி வனேகதே³ஸங், ருக்க²விரஹிதட்டா²னே கதவிஹாரஸ்ஸ ஏகபஸ்ஸே டி²தவனஸ்ஸ ஏகதே³ஸந்தி அத்தோ².
Antosārānanti tasmiṃ khaṇe taruṇatāya sāre avijjamānepi pariṇāmena bhavissamānasārepi sandhāya vuttaṃ. Tādisānañhi sūcidaṇḍakappamāṇapariṇāhānaṃ catupañcamattampi vanaṃ vaṭṭati. Antosāramissakānanti antosārehi rukkhehi sammissānaṃ. Etena ca sārarukkhamissampi vanaṃ vaṭṭatīti dasseti. Catupañcarukkhamattampīti sārarukkhe sandhāya vuttaṃ. Vanamajjhe vihāraṃ karontīti rukkhaghaṭāya antare rukkhe acchinditvā vatiādīhi vihāraparicchedaṃ katvāva antorukkhantaresu eva pariveṇapaṇṇasālādīnaṃ karaṇavasena yathā antovihārampi vanameva hoti, evaṃ vihāraṃ karontīti attho. Yadi hi sabbaṃ rukkhaṃ chinditvā vihāraṃ kareyyuṃ, vihārassa avanattā taṃ parikkhipitvā ṭhitaṃ vanaṃ ekattha kittetabbaṃ siyā. Idha pana antopi vanattā ‘‘vanaṃ na kittetabba’’nti vuttaṃ. Sace hi taṃ kittenti, ‘‘nimittassa upari vihāro hotī’’tiādinā anantare vuttadosaṃ āpajjati. Ekadesanti vanekadesaṃ, rukkhavirahitaṭṭhāne katavihārassa ekapasse ṭhitavanassa ekadesanti attho.
ஸூசித³ண்ட³கப்பமாணோதி வங்ஸத³ண்ட³ப்பமாணோ. லேக²னித³ண்ட³ப்பமாணோதி கேசி. மாதிகாட்ட²கதா²யங் பன அவேப⁴ங்கி³யவினிச்ச²யே ‘‘யோ கோசி அட்ட²ங்கு³லஸூசித³ண்ட³கமத்தோபி வேளு…பே॰… க³ருப⁴ண்ட³’’ந்தி (கங்கா²॰ அட்ட²॰ து³ப்³ப³த்தஸிக்கா²பத³வண்ணனா) வுத்தத்தா தனுதரோ வேளுத³ண்டோ³தி ச ஸூசித³ண்டோ³தி ச க³ஹேதப்³ப³ங். வங்ஸனளகஸராவாதீ³ஸூதி வேளுபப்³பே³ வா நளபப்³பே³ வா கபல்லகாதி³மத்திகபா⁴ஜனேஸு வாதி அத்தோ². தங்க²ணம்பீதி தருணபோதகே அமிலாயித்வா விருஹனஜாதிகே ஸந்தா⁴ய வுத்தங். யே பன பரிணதா ஸமூலங் உத்³த⁴ரித்வா ரோபிதாபி சி²ன்னஸாகா² விய மிலாயித்வா சிரேன நவமூலங்குருப்பத்தியா ஜீவந்தி, மீயந்தியேவ வா, தாதி³ஸே கித்தேதுங் ந வட்டதி. ஏதந்தி நவமூலஸாகா²னிக்³க³மனங்.
Sūcidaṇḍakappamāṇoti vaṃsadaṇḍappamāṇo. Lekhanidaṇḍappamāṇoti keci. Mātikāṭṭhakathāyaṃ pana avebhaṅgiyavinicchaye ‘‘yo koci aṭṭhaṅgulasūcidaṇḍakamattopi veḷu…pe… garubhaṇḍa’’nti (kaṅkhā. aṭṭha. dubbattasikkhāpadavaṇṇanā) vuttattā tanutaro veḷudaṇḍoti ca sūcidaṇḍoti ca gahetabbaṃ. Vaṃsanaḷakasarāvādīsūti veḷupabbe vā naḷapabbe vā kapallakādimattikabhājanesu vāti attho. Taṅkhaṇampīti taruṇapotake amilāyitvā viruhanajātike sandhāya vuttaṃ. Ye pana pariṇatā samūlaṃ uddharitvā ropitāpi chinnasākhā viya milāyitvā cirena navamūlaṅkuruppattiyā jīvanti, mīyantiyeva vā, tādise kittetuṃ na vaṭṭati. Etanti navamūlasākhāniggamanaṃ.
மஜ்ஜே²தி ஸீமாய மஹாதி³ஸானங் அந்தோ. கோணந்தி ஸீமாய சதூஸு கோணேஸு த்³வின்னங் த்³வின்னங் மக்³கா³னங் ஸம்ப³ந்த⁴ட்டா²னங். பரபா⁴கே³ கித்தேதுங் வட்டதீதி தேஸங் சதுன்னங் கோணானங் ப³ஹி நிக்க²மித்வா டி²தேஸு மக்³கே³ஸு ஏகிஸ்ஸா தி³ஸாய ஏகங், அஞ்ஞிஸ்ஸா தி³ஸாய சாபரந்தி ஏவங் சத்தாரோபி மக்³கா³ சதூஸு தி³ஸாஸு கித்தேதுங் வட்டதீதி அதி⁴ப்பாயோ. ஏவங் பன கித்திதமத்தேன கத²ங் ஏகாப³த்³த⁴தா விக³ச்ச²தீதி விஞ்ஞாயதீதி. பரதோ க³தட்டா²னேபி ஏதே ஏவ தே சத்தாரோ மக்³கா³. ‘‘சதூஸு தி³ஸாஸு க³ச்ச²ந்தீ’’தி ஹி வுத்தங். தஸ்மா எத்த² காரணங் விசினிதப்³ப³ங்.
Majjheti sīmāya mahādisānaṃ anto. Koṇanti sīmāya catūsu koṇesu dvinnaṃ dvinnaṃ maggānaṃ sambandhaṭṭhānaṃ. Parabhāge kittetuṃ vaṭṭatīti tesaṃ catunnaṃ koṇānaṃ bahi nikkhamitvā ṭhitesu maggesu ekissā disāya ekaṃ, aññissā disāya cāparanti evaṃ cattāropi maggā catūsu disāsu kittetuṃ vaṭṭatīti adhippāyo. Evaṃ pana kittitamattena kathaṃ ekābaddhatā vigacchatīti viññāyatīti. Parato gataṭṭhānepi ete eva te cattāro maggā. ‘‘Catūsu disāsu gacchantī’’ti hi vuttaṃ. Tasmā ettha kāraṇaṃ vicinitabbaṃ.
‘‘உத்தரந்தியா பி⁴க்கு²னியா’’தி இத³ஞ்ச பாளியங் (பாசி॰ 692) பி⁴க்கு²னீனங் நதீ³பாரக³மனே நதி³லக்க²ணஸ்ஸ ஆக³தத்தா வுத்தங். பி⁴க்கூ²னங் அந்தரவாஸகதேமனமத்தம்பி வட்டதி ஏவ . ‘‘நதி³சதுக்கேபி ஏஸேவ நயோ’’தி இமினா ஏகத்த² கித்தெத்வா அஞ்ஞத்த² பரதோ க³தட்டா²னேபி கித்தேதுங் ந வட்டதீதி த³ஸ்ஸேதி. தேனேவ ச ‘‘அஸ்ஸம்மிஸ்ஸனதி³யோ சதஸ்ஸோபி கித்தேதுங் வட்டதீ’’தி அஸம்மிஸ்ஸ-க்³க³ஹணங் கதங். மூலேதி ஆதி³காலே. நதி³ங் பி⁴ந்தி³த்வாதி யதா² உத³கங் அனிச்ச²ந்தேஹி கஸ்ஸகேஹி மஹோகே⁴ நிவத்தேதுங் ந ஸக்கா, ஏவங் நதி³கூலங் பி⁴ந்தி³த்வா.
‘‘Uttarantiyā bhikkhuniyā’’ti idañca pāḷiyaṃ (pāci. 692) bhikkhunīnaṃ nadīpāragamane nadilakkhaṇassa āgatattā vuttaṃ. Bhikkhūnaṃ antaravāsakatemanamattampi vaṭṭati eva . ‘‘Nadicatukkepi eseva nayo’’ti iminā ekattha kittetvā aññattha parato gataṭṭhānepi kittetuṃ na vaṭṭatīti dasseti. Teneva ca ‘‘assammissanadiyo catassopi kittetuṃ vaṭṭatī’’ti asammissa-ggahaṇaṃ kataṃ. Mūleti ādikāle. Nadiṃ bhinditvāti yathā udakaṃ anicchantehi kassakehi mahoghe nivattetuṃ na sakkā, evaṃ nadikūlaṃ bhinditvā.
உக்கே²பிமந்தி தீ³க⁴ரஜ்ஜுனா குடேன உஸ்ஸிஞ்சனீயங்.
Ukkhepimanti dīgharajjunā kuṭena ussiñcanīyaṃ.
அஸம்மிஸ்ஸேஹீதி ஸப்³ப³தி³ஸாஸு டி²தபப்³ப³தேஹி ஏவ, பாஸாணாதீ³ஸு அஞ்ஞதரேஹி வா நிமித்தந்தராப்³யவஹிதேஹி. ஸம்மிஸ்ஸேஹீதி ஏகத்த² பப்³ப³தோ, அஞ்ஞத்த² பாஸாணோதி ஏவங் டி²தேஹி அட்ட²ஹிபி. ‘‘நிமித்தானங் ஸதேனாபீ’’தி இமினா ஏகிஸ்ஸாய ஏவ தி³ஸாய ப³ஹுனிமித்தானி ‘‘புரத்தி²மாய தி³ஸாய கிங் நிமித்தங்? பப்³ப³தோ ப⁴ந்தே. புன புரத்தி²மாய தி³ஸாய கிங் நிமித்தங்? பாஸாணோ ப⁴ந்தே’’திஆதி³னா கித்தேதுங் வட்டதீதி த³ஸ்ஸேதி. ஸிங்கா⁴டகஸண்டா²னாதி திகோணா. சதுரஸ்ஸாதி ஸமசதுரஸ்ஸா, முதி³ங்க³ஸண்டா²னா பன ஆயதசதுரஸ்ஸா. ஏககோடியங் ஸங்கோசிதா, தத³ஞ்ஞாய வித்தி²ண்ணா வா ஹோதீதி. ஸீமாய உபசாரங் ட²பெத்வாதி ஆயதிங் ப³ந்தி⁴தப்³பா³ய ஸீமாய நேஸங் விஹாரானங் பரிச்சே²த³தோ ப³ஹி ஸீமந்தரிகப்பஹோனகங் உபசாரங் ட²பெத்வா. ப³த்³தா⁴ ஸீமா யேஸு விஹாரேஸு, தே ப³த்³த⁴ஸீமா. பாடேக்கந்தி பச்சேகங். ப³த்³த⁴ஸீமாஸதி³ஸானீதி யதா² ப³த்³த⁴ஸீமாஸு டி²தா அஞ்ஞமஞ்ஞங் ச²ந்தா³தி³ங் அனபெக்கி²த்வா பச்சேகங் கம்மங் காதுங் லப⁴ந்தி, ஏவங் கா³மஸீமாஸு டி²தாபீதி த³ஸ்ஸேதி. ஆக³ந்தப்³ப³ந்தி ஸாமீசிமத்தவஸேன வுத்தங். தேனாஹ ‘‘ஆக³மனம்பீ’’திஆதி³.
Asammissehīti sabbadisāsu ṭhitapabbatehi eva, pāsāṇādīsu aññatarehi vā nimittantarābyavahitehi. Sammissehīti ekattha pabbato, aññattha pāsāṇoti evaṃ ṭhitehi aṭṭhahipi. ‘‘Nimittānaṃ satenāpī’’ti iminā ekissāya eva disāya bahunimittāni ‘‘puratthimāya disāya kiṃ nimittaṃ? Pabbato bhante. Puna puratthimāya disāya kiṃ nimittaṃ? Pāsāṇo bhante’’tiādinā kittetuṃ vaṭṭatīti dasseti. Siṅghāṭakasaṇṭhānāti tikoṇā. Caturassāti samacaturassā, mudiṅgasaṇṭhānā pana āyatacaturassā. Ekakoṭiyaṃ saṅkocitā, tadaññāya vitthiṇṇā vā hotīti. Sīmāya upacāraṃ ṭhapetvāti āyatiṃ bandhitabbāya sīmāya nesaṃ vihārānaṃ paricchedato bahi sīmantarikappahonakaṃ upacāraṃ ṭhapetvā. Baddhā sīmā yesu vihāresu, te baddhasīmā. Pāṭekkanti paccekaṃ. Baddhasīmāsadisānīti yathā baddhasīmāsu ṭhitā aññamaññaṃ chandādiṃ anapekkhitvā paccekaṃ kammaṃ kātuṃ labhanti, evaṃ gāmasīmāsu ṭhitāpīti dasseti. Āgantabbanti sāmīcimattavasena vuttaṃ. Tenāha ‘‘āgamanampī’’tiādi.
பப்³ப³ஜ்ஜூபஸம்பதா³தீ³னந்தி எத்த² ப⁴ண்டு³கம்மாபுச்ச²னங் ஸந்தா⁴ய பப்³ப³ஜ்ஜாக³ஹணங். ஏகவீஸதி பி⁴க்கூ²தி நிஸின்னே ஸந்தா⁴ய வுத்தங். இத³ஞ்ச கம்மாரஹேன ஸஹ அப்³பா⁴னகாரகானம்பி பஹோனகத்த²ங் வுத்தங். ‘‘நிமித்துபகா³ பாஸாணா ட²பேதப்³பா³’’தி இத³ங் யதா²ருசிதட்டா²னே ருக்க²னிமித்தாதீ³னங் து³ல்லப⁴தாய வட்³டி⁴த்வா உபி⁴ன்னங் ப³த்³த⁴ஸீமானங் ஸங்கரகரணதோ ச பாஸாணனிமித்தஸ்ஸ ச தத³பா⁴வதோ யத்த² கத்த²சி ஆனெத்வா ட²பேதுங் ஸுகரதாய ச வுத்தங். ததா² ஸீமந்தரிகபாஸாணா ட²பேதப்³பா³தி எத்தா²பி. சதுரங்கு³லப்பமாணாபீதி யதா² க²ந்த⁴ஸீமாபரிச்சே²த³தோ ப³ஹி நிமித்தபாஸாணானங் சதுரங்கு³லமத்தட்டா²னங் ஸமந்தா நிக³ச்ச²தி, அவஸேஸங் டா²னங் அந்தோக²ந்த⁴ஸீமாய ஹோதியேவ, ஏவங் தேஸுபி ட²பிதேஸு சதுரங்கு³லமத்தா ஸீமந்தரிகா ஹோதீதி த³ட்ட²ப்³ப³ங்.
Pabbajjūpasampadādīnanti ettha bhaṇḍukammāpucchanaṃ sandhāya pabbajjāgahaṇaṃ. Ekavīsati bhikkhūti nisinne sandhāya vuttaṃ. Idañca kammārahena saha abbhānakārakānampi pahonakatthaṃ vuttaṃ. ‘‘Nimittupagā pāsāṇā ṭhapetabbā’’ti idaṃ yathārucitaṭṭhāne rukkhanimittādīnaṃ dullabhatāya vaḍḍhitvā ubhinnaṃ baddhasīmānaṃ saṅkarakaraṇato ca pāsāṇanimittassa ca tadabhāvato yattha katthaci ānetvā ṭhapetuṃ sukaratāya ca vuttaṃ. Tathā sīmantarikapāsāṇā ṭhapetabbāti etthāpi. Caturaṅgulappamāṇāpīti yathā khandhasīmāparicchedato bahi nimittapāsāṇānaṃ caturaṅgulamattaṭṭhānaṃ samantā nigacchati, avasesaṃ ṭhānaṃ antokhandhasīmāya hotiyeva, evaṃ tesupi ṭhapitesu caturaṅgulamattā sīmantarikā hotīti daṭṭhabbaṃ.
ஸீமந்தரிகபாஸாணாதி ஸீமந்தரிகாய ட²பிதனிமித்தபாஸாணா. தே பன கித்தெந்தேன பத³க்கி²ணதோ அனுபரியாயந்தேனேவ கித்தேதப்³பா³. கத²ங்? க²ண்ட³ஸீமதோ ஹி பச்சி²மாய தி³ஸாய புரத்தா²பி⁴முகே²ன ட²த்வா ‘‘புரத்தி²மாய தி³ஸாய கிங் நிமித்த’’ந்தி தத்த² ஸப்³பா³னி நிமித்தானி அனுக்கமேன கித்தெத்வா ததா² உத்தராய தி³ஸாய த³க்கி²ணாபி⁴முகே²ன ட²த்வா ‘‘த³க்கி²ணாய தி³ஸாய கிங் நிமித்த’’ந்தி அனுக்கமேன கித்தெத்வா ததா² புரத்தி²மாய தி³ஸாய பச்சி²மாபி⁴முகே²ன ட²த்வா ‘‘பச்சி²மாய தி³ஸாய கிங் நிமித்த’’ந்தி அனுக்கமேன கித்தெத்வா ததா² த³க்கி²ணாய தி³ஸாய உத்தராபி⁴முகே²ன ட²த்வா ‘‘உத்தராய தி³ஸாய கிங் நிமித்த’’ந்தி தத்த² ஸப்³பா³னி நிமித்தானி அனுக்கமேன கித்தெத்வா புன பச்சி²மாய தி³ஸாய புரத்தா²பி⁴முகே²ன ட²த்வா புரிமகித்திதங் வுத்தனயேன புன கித்தேதப்³ப³ங். ஏவங் ப³ஹூனம்பி க²ண்ட³ஸீமானங் ஸீமந்தரிகபாஸாணா பச்சேகங் கித்தேதப்³பா³. ததோதி பச்சா². அவஸேஸனிமித்தானீதி மஹாஸீமாய பா³ஹிரந்தரேஸு அவஸேஸனிமித்தானி. உபி⁴ன்னம்பி ந கோபெந்தீதி உபி⁴ன்னம்பி கம்மங் ந கோபெந்தி.
Sīmantarikapāsāṇāti sīmantarikāya ṭhapitanimittapāsāṇā. Te pana kittentena padakkhiṇato anupariyāyanteneva kittetabbā. Kathaṃ? Khaṇḍasīmato hi pacchimāya disāya puratthābhimukhena ṭhatvā ‘‘puratthimāya disāya kiṃ nimitta’’nti tattha sabbāni nimittāni anukkamena kittetvā tathā uttarāya disāya dakkhiṇābhimukhena ṭhatvā ‘‘dakkhiṇāya disāya kiṃ nimitta’’nti anukkamena kittetvā tathā puratthimāya disāya pacchimābhimukhena ṭhatvā ‘‘pacchimāya disāya kiṃ nimitta’’nti anukkamena kittetvā tathā dakkhiṇāya disāya uttarābhimukhena ṭhatvā ‘‘uttarāya disāya kiṃ nimitta’’nti tattha sabbāni nimittāni anukkamena kittetvā puna pacchimāya disāya puratthābhimukhena ṭhatvā purimakittitaṃ vuttanayena puna kittetabbaṃ. Evaṃ bahūnampi khaṇḍasīmānaṃ sīmantarikapāsāṇā paccekaṃ kittetabbā. Tatoti pacchā. Avasesanimittānīti mahāsīmāya bāhirantaresu avasesanimittāni. Ubhinnampi na kopentīti ubhinnampi kammaṃ na kopenti.
குடிகே³ஹேதி பூ⁴மியங் கததிணகுடியங். உது³க்க²லந்தி உது³க்க²லாவாடஸதி³ஸகு²த்³த³காவாடங். நிமித்தங் ந காதப்³ப³ந்தி தங் ராஜிங் வா உது³க்க²லங் வா நிமித்தங் ந காதப்³ப³ங். இத³ஞ்ச யதா²வுத்தேஸு நிமித்தேஸு அனாக³தத்தேன ந வட்டதீதி ஸித்³த⁴ம்பி அவினஸ்ஸகஸஞ்ஞாய கோசி மோஹேன நிமித்தங் கரெய்யாதி தூ³ரதோபி விபத்திபரிஹாரத்த²ங் வுத்தங். ஏவங் உபரி ‘‘பி⁴த்திங் அகித்தெத்வா’’திஆதீ³ஸுபி ஸித்³த⁴மேவத்த²ங் புனப்புனங் கத²னே காரணங் வேதி³தப்³ப³ங். ஸீமாவிபத்தி ஹி உபஸம்பதா³தி³ஸப்³ப³கம்மவிபத்திமூலந்தி தஸ்ஸா ஸப்³ப³ங் த்³வாரங் ஸப்³ப³தா² பித³ஹனவஸேன வத்தப்³ப³ங். ஸப்³ப³ங் வத்வாவ இத⁴ ஆசரியா வினிச்ச²யங் ட²பேஸுந்தி த³ட்ட²ப்³ப³ங்.
Kuṭigeheti bhūmiyaṃ katatiṇakuṭiyaṃ. Udukkhalanti udukkhalāvāṭasadisakhuddakāvāṭaṃ. Nimittaṃ na kātabbanti taṃ rājiṃ vā udukkhalaṃ vā nimittaṃ na kātabbaṃ. Idañca yathāvuttesu nimittesu anāgatattena na vaṭṭatīti siddhampi avinassakasaññāya koci mohena nimittaṃ kareyyāti dūratopi vipattiparihāratthaṃ vuttaṃ. Evaṃ upari ‘‘bhittiṃ akittetvā’’tiādīsupi siddhamevatthaṃ punappunaṃ kathane kāraṇaṃ veditabbaṃ. Sīmāvipatti hi upasampadādisabbakammavipattimūlanti tassā sabbaṃ dvāraṃ sabbathā pidahanavasena vattabbaṃ. Sabbaṃ vatvāva idha ācariyā vinicchayaṃ ṭhapesunti daṭṭhabbaṃ.
பி⁴த்திந்தி இட்ட²கதா³ருமத்திகாமயங். ஸிலாமயாய பன பி⁴த்தியா நிமித்துபக³ங் ஏகங் பாஸாணங் தங்தங்தி³ஸாய கித்தேதுங் வட்டதி. அனேகஸிலாஹி சினிதங் ஸகலபி⁴த்திங் கித்தேதுங் ந வட்டதி ‘‘ஏஸோ பாஸாணோ நிமித்த’’ந்தி ஏகவசனேன வத்தப்³ப³தோ. அந்தோகுட்டமேவாதி எத்த² அந்தோகுட்டேபி நிமித்தானங் டி²தோகாஸதோ அந்தோ ஏவ ஸீமாதி க³ஹேதப்³ப³ங். பமுகே² நிமித்தபாஸாணே ட²பெத்வாதி க³ப்³பா⁴பி⁴முகே²பி ப³ஹிபமுகே² க³ப்³ப⁴வித்தா²ரப்பமாணே டா²னே பாஸாணே ட²பெத்வா ஸம்மன்னிதப்³பா³. ஏவஞ்ஹி க³ப்³ப⁴பமுகா²னங் அந்தரே டி²தகுட்டம்பி உபாதா³ய அந்தோ ச ப³ஹி ச சதுரஸ்ஸஸண்டா²னாவ ஸீமா ஹோதி. ப³ஹீதி ஸகலஸ்ஸ குடிகே³ஹஸ்ஸ ஸமந்ததோ ப³ஹி.
Bhittinti iṭṭhakadārumattikāmayaṃ. Silāmayāya pana bhittiyā nimittupagaṃ ekaṃ pāsāṇaṃ taṃtaṃdisāya kittetuṃ vaṭṭati. Anekasilāhi cinitaṃ sakalabhittiṃ kittetuṃ na vaṭṭati ‘‘eso pāsāṇo nimitta’’nti ekavacanena vattabbato. Antokuṭṭamevāti ettha antokuṭṭepi nimittānaṃ ṭhitokāsato anto eva sīmāti gahetabbaṃ. Pamukhe nimittapāsāṇe ṭhapetvāti gabbhābhimukhepi bahipamukhe gabbhavitthārappamāṇe ṭhāne pāsāṇe ṭhapetvā sammannitabbā. Evañhi gabbhapamukhānaṃ antare ṭhitakuṭṭampi upādāya anto ca bahi ca caturassasaṇṭhānāva sīmā hoti. Bahīti sakalassa kuṭigehassa samantato bahi.
அந்தோ ச ப³ஹி ச ஸீமா ஹோதீதி மஜ்ஜே² டி²தபி⁴த்தியா ஸஹ சதுரஸ்ஸஸீமா ஹோதி.
Antoca bahi ca sīmā hotīti majjhe ṭhitabhittiyā saha caturassasīmā hoti.
‘‘உபரிபாஸாதே³யேவ ஹோதீ’’தி இமினா க³ப்³ப⁴ஸ்ஸ ச பமுக²ஸ்ஸ ச அந்தரா டி²தபி⁴த்தியா ஏகத்தா தத்த² ச ஏகவீஸதியா பி⁴க்கூ²னங் ஓகாஸாபா⁴வேன ஹெட்டா² ந ஓதரதி, உபரிபி⁴த்தி பன ஸீமட்டா²வ ஹோதீதி த³ஸ்ஸேதி. ஹெட்டி²மதலே குட்டோதி ஹெட்டி²மதலே சதூஸு தி³ஸாஸு டி²தகுட்டோ. ஸசே ஹி த்³வீஸு, தீஸு வா தி³ஸாஸு ஏவ குட்டோ திட்டெ²ய்ய, ஹெட்டா² ந ஓதரதி. ஹெட்டா²பி ஓதரதீதி சதுன்னம்பி பி⁴த்தீனங் அந்தோ பி⁴த்தீஹி ஸஹ ஏகவீஸதியா பி⁴க்கூ²னங் பஹோனகத்தா வுத்தங். ஓதரமானா ச உபரிஸீமப்பமாணேன ஓதரதி, சதுன்னங் பன பி⁴த்தீனங் பா³ஹிரந்தரபரிச்சே²தே³ ஹெட்டா²பூ⁴மிபா⁴கே³ உத³கபரியந்தங் கத்வா ஓதரதி. ந பன பி⁴த்தீனங் ப³ஹி கேஸக்³க³மத்தம்பி டா²னங். பாஸாத³பி⁴த்திதோதி உபரிதலே பி⁴த்திதோ. ஓதரணானோதரணங் வுத்தனயேனேவ வேதி³தப்³ப³ந்தி உபரிஸீமப்பமாணஸ்ஸ அந்தோக³தா⁴னங் ஹெட்டி²மதலே சதூஸு தி³ஸாஸு குட்டானங் துலாருக்கே²ஹி ஏகஸம்ப³ந்த⁴தங் தத³ந்தோ பச்சி²மஸீமப்பமாணதாதி³ஞ்ச ஸந்தா⁴ய வுத்தங். கிஞ்சாபெத்த² நிய்யூஹகாத³யோ நிமித்தானங் டி²தோகாஸதாய ப³ஜ்ஜ²மானக்க²ணே ஸீமா ந ஹொந்தி, ப³த்³தா⁴ய பன ஸீமாய ஸீமட்டா²வ ஹொந்தீதி த³ட்ட²ப்³பா³. பரியந்தத²ம்பா⁴னந்தி நிமித்தக³தபாஸாணத்த²ம்பே⁴ ஸந்தா⁴ய வுத்தங். ‘‘உபரிமதலேன ஸம்ப³த்³தோ⁴ ஹோதீ’’தி இத³ங் குட்டானங் அந்தரா ஸீமட்டா²னங் த²ம்பா⁴னங் அபா⁴வதோ வுத்தங். யதி³ ஹி ப⁴வெய்யுங், குட்டே உபரிமதலேன அஸம்ப³ந்தே⁴பி ஸீமட்ட²த்த²ம்பா⁴னங் உபரி டி²தோ பாஸாதோ³ ஸீமட்டோ²வ ஹோதி.
‘‘Uparipāsādeyeva hotī’’ti iminā gabbhassa ca pamukhassa ca antarā ṭhitabhittiyā ekattā tattha ca ekavīsatiyā bhikkhūnaṃ okāsābhāvena heṭṭhā na otarati, uparibhitti pana sīmaṭṭhāva hotīti dasseti. Heṭṭhimatale kuṭṭoti heṭṭhimatale catūsu disāsu ṭhitakuṭṭo. Sace hi dvīsu, tīsu vā disāsu eva kuṭṭo tiṭṭheyya, heṭṭhā na otarati. Heṭṭhāpi otaratīti catunnampi bhittīnaṃ anto bhittīhi saha ekavīsatiyā bhikkhūnaṃ pahonakattā vuttaṃ. Otaramānā ca uparisīmappamāṇena otarati, catunnaṃ pana bhittīnaṃ bāhirantaraparicchede heṭṭhābhūmibhāge udakapariyantaṃ katvā otarati. Na pana bhittīnaṃ bahi kesaggamattampi ṭhānaṃ. Pāsādabhittitoti uparitale bhittito. Otaraṇānotaraṇaṃ vuttanayeneva veditabbanti uparisīmappamāṇassa antogadhānaṃ heṭṭhimatale catūsu disāsu kuṭṭānaṃ tulārukkhehi ekasambandhataṃ tadanto pacchimasīmappamāṇatādiñca sandhāya vuttaṃ. Kiñcāpettha niyyūhakādayo nimittānaṃ ṭhitokāsatāya bajjhamānakkhaṇe sīmā na honti, baddhāya pana sīmāya sīmaṭṭhāva hontīti daṭṭhabbā. Pariyantathambhānanti nimittagatapāsāṇatthambhe sandhāya vuttaṃ. ‘‘Uparimatalena sambaddho hotī’’ti idaṃ kuṭṭānaṃ antarā sīmaṭṭhānaṃ thambhānaṃ abhāvato vuttaṃ. Yadi hi bhaveyyuṃ, kuṭṭe uparimatalena asambandhepi sīmaṭṭhatthambhānaṃ upari ṭhito pāsādo sīmaṭṭhova hoti.
ஸசே பன ப³ஹூனங் த²ம்ப⁴பந்தீனங் உபரி கதபாஸாத³ஸ்ஸ ஹெட்டா² பத²வியங் ஸப்³ப³பா³ஹிராய த²ம்ப⁴பந்தியா அந்தோ நிமித்தபாஸாணே ட²பெத்வா ஸீமா ப³த்³தா⁴ ஹோதி, எத்த² கத²ந்தி? எத்தா²பி யங் தாவ ஸீமட்ட²த்த²ம்பே⁴ஹேவ தா⁴ரியமானானங் துலானங் உபரிமதலங், ஸப்³ப³ங் தங் ஸீமட்ட²மேவ, எத்த² விவாதோ³ நத்தி². யங் பன ஸீமட்ட²த்த²ம்ப⁴பந்தியா, அஸீமட்டா²ய பா³ஹிரத்த²ம்ப⁴பந்தியா ச ஸமது⁴ரங் தா⁴ரியமானானங் துலானங் உபரிமதலங், தத்த² உபட்³ட⁴ங் ஸீமாதி கேசி வத³ந்தி. ஸகலம்பி கா³மஸீமாதி அபரே. ப³த்³த⁴ஸீமா ஏவாதி அஞ்ஞே. தஸ்மா கம்மங் கரொந்தேஹி க³ருகே நிராஸங்கட்டா²னே ட²த்வா ஸப்³ப³ங் தங் ஆஸங்கட்டா²னங் ஸோதெ⁴த்வாவ கம்மங் காதப்³ப³ங், ஸன்னிட்டா²னகாரணங் வா க³வேஸித்வா தத³னுகு³ணங் காதப்³ப³ங்.
Sace pana bahūnaṃ thambhapantīnaṃ upari katapāsādassa heṭṭhā pathaviyaṃ sabbabāhirāya thambhapantiyā anto nimittapāsāṇe ṭhapetvā sīmā baddhā hoti, ettha kathanti? Etthāpi yaṃ tāva sīmaṭṭhatthambheheva dhāriyamānānaṃ tulānaṃ uparimatalaṃ, sabbaṃ taṃ sīmaṭṭhameva, ettha vivādo natthi. Yaṃ pana sīmaṭṭhatthambhapantiyā, asīmaṭṭhāya bāhiratthambhapantiyā ca samadhuraṃ dhāriyamānānaṃ tulānaṃ uparimatalaṃ, tattha upaḍḍhaṃ sīmāti keci vadanti. Sakalampi gāmasīmāti apare. Baddhasīmā evāti aññe. Tasmā kammaṃ karontehi garuke nirāsaṅkaṭṭhāne ṭhatvā sabbaṃ taṃ āsaṅkaṭṭhānaṃ sodhetvāva kammaṃ kātabbaṃ, sanniṭṭhānakāraṇaṃ vā gavesitvā tadanuguṇaṃ kātabbaṃ.
தாலமூலகபப்³ப³தேதி தாலக்க²ந்த⁴மூலஸதி³ஸே ஹெட்டா² தூ²லோ ஹுத்வா கமேன கிஸோ ஹுத்வா உக்³க³தோ ஹி தாலஸதி³ஸோ நாம ஹோதி. விதானஸண்டா²னோதி அஹிச்ச²த்தகஸண்டா²னோ. பணவஸண்டா²னோதி மஜ்ஜே² தனுகோ ஹெட்டா² ச உபரி ச வித்தி²ண்ணோ. ஹெட்டா² வா மஜ்ஜே² வாதி முதி³ங்க³ஸண்டா²னஸ்ஸ ஹெட்டா², பணவஸண்டா²னஸ்ஸ மஜ்ஜே².
Tālamūlakapabbateti tālakkhandhamūlasadise heṭṭhā thūlo hutvā kamena kiso hutvā uggato hi tālasadiso nāma hoti. Vitānasaṇṭhānoti ahicchattakasaṇṭhāno. Paṇavasaṇṭhānoti majjhe tanuko heṭṭhā ca upari ca vitthiṇṇo. Heṭṭhā vā majjhe vāti mudiṅgasaṇṭhānassa heṭṭhā, paṇavasaṇṭhānassa majjhe.
ஸப்பப²ணஸதி³ஸோ பப்³ப³தோதி ஸப்பப²ணோ விய கு²ஜ்ஜோ, மூலட்டா²னதோ அஞ்ஞத்த² அவனதஸீஸோதி அத்தோ². ஆகாஸபப்³பா⁴ரந்தி பி⁴த்தியா அபரிக்கி²த்தபப்³பா⁴ரங். ஸீமப்பமாணோதி அந்தோஆகாஸேன ஸத்³தி⁴ங் பச்சி²மஸீமப்பமாணோ. ‘‘ஸோ ச பாஸாணோ ஸீமட்டோ²’’தி இமினா ஈதி³ஸேஹி ஸுஸிரபாஸாணலேணகுட்டாதீ³ஹி பரிச்சி²ன்னே பூ⁴மிபா⁴கே³ ஏவ ஸீமா பதிட்டா²தி, ந அபரிச்சி²ன்னே. தே பன ஸீமட்ட²த்தா ஸீமா ஹொந்தி, ந ஸரூபேன ஸீமட்ட²மஞ்சாதி³ வியாதி த³ஸ்ஸேதி. ஸசே பன ஸோ ஸுஸிரபாஸாணோ பூ⁴மிங் அனாஹச்ச ஆகாஸக³தோவ ஓலம்ப³தி, ஸீமா ந ஓதரதி. ஸுஸிரபாஸாணா பன ஸயங் ஸீமாபடிப³த்³த⁴த்தா ஸீமா ஹொந்தி. கத²ங் பன பச்சி²மப்பமாணரஹிதேஹி ஏதேஹி ஸுஸிரபாஸாணாதீ³ஹி ஸீமா ந ஓதரதீதி இத³ங் ஸத்³தா⁴தப்³ப³ந்தி? அட்ட²கதா²பமாணதோ.
Sappaphaṇasadiso pabbatoti sappaphaṇo viya khujjo, mūlaṭṭhānato aññattha avanatasīsoti attho. Ākāsapabbhāranti bhittiyā aparikkhittapabbhāraṃ. Sīmappamāṇoti antoākāsena saddhiṃ pacchimasīmappamāṇo. ‘‘So ca pāsāṇo sīmaṭṭho’’ti iminā īdisehi susirapāsāṇaleṇakuṭṭādīhi paricchinne bhūmibhāge eva sīmā patiṭṭhāti, na aparicchinne. Te pana sīmaṭṭhattā sīmā honti, na sarūpena sīmaṭṭhamañcādi viyāti dasseti. Sace pana so susirapāsāṇo bhūmiṃ anāhacca ākāsagatova olambati, sīmā na otarati. Susirapāsāṇā pana sayaṃ sīmāpaṭibaddhattā sīmā honti. Kathaṃ pana pacchimappamāṇarahitehi etehi susirapāsāṇādīhi sīmā na otaratīti idaṃ saddhātabbanti? Aṭṭhakathāpamāṇato.
அபிசெத்த² ஸுஸிரபாஸாணபி⁴த்திஅனுஸாரேன மூஸிகாதீ³னங் விய ஸீமாய ஹெட்டி²மதலே ஓதரணகிச்சங் நத்தி². ஹெட்டா² பன பச்சி²மஸீமப்பமாணே ஆகாஸே த்³வங்கு³லமத்தப³ஹலேஹி பாஸாணபி⁴த்திஆதீ³ஹிபி உபரிமதலங் ஆஹச்ச டி²தேஹி ஸப்³ப³ஸோ, யேபு⁴ய்யேன வா பரிச்சி²ன்னே ஸதி உபரி ப³ஜ்ஜ²மானா ஸீமா தேஹி பாஸாணாதீ³ஹி அந்தரிதாய தப்பரிச்சி²ன்னாய ஹெட்டா²பூ⁴மியாபி உபரிமதலேன ஸத்³தி⁴ங் ஏகக்க²ணே பதிட்டா²தி நதி³பாரஸீமா விய நதி³அந்தரிதேஸு உபோ⁴ஸு தீரேஸு, லேணாதீ³ஸு அபனீதேஸுபி ஹெட்டா² ஓதிண்ணா ஸீமா யாவ ஸாஸனந்தரதா⁴னா ந விக³ச்ச²தி. பட²மங் பன உபரி ஸீமாய ப³த்³தா⁴ய பச்சா² லேணாதீ³ஸு கதேஸுபி ஹெட்டா²பூ⁴மியங் ஸீமா ஓதரதி ஏவ. கேசி தங் ந இச்ச²ந்தி. ஏவங் உப⁴யத்த² பதிட்டி²தா ச ஸா ஸீமா ஏகாவ ஹோதி கொ³த்தாதி³ஜாதி விய ப்³யத்திபே⁴தே³ஸூதி க³ஹேதப்³ப³ங். ஸப்³பா³ ஏவ ஹி ப³த்³த⁴ஸீமா, அப³த்³த⁴ஸீமா ச அத்தனோ அத்தனோ பகதினிஸ்ஸயபூ⁴தே கா³மாரஞ்ஞனதி³ஆதி³கே கெ²த்தே யதா²பரிச்சே²த³ங் ஸப்³ப³த்த² ஸாகல்யேன ஏகஸ்மிங் க²ணே ப்³யாபினீ பரமத்த²தோ அவிஜ்ஜமானாபி தே தே நிஸ்ஸயபூ⁴தே பரமத்த²த⁴ம்மே, தங் தங் கிரியாவிஸேஸம்பி வா உபாதா³ய லோகியேஹி, ஸாஸனிகேஹி ச யதா²ரஹங் ஏகத்தேன பஞ்ஞத்ததாய நிஸ்ஸயேகரூபா ஏவ. ததா² ஹி ஏகோ கா³மோ அரஞ்ஞங் நதீ³ ஜாதஸ்ஸரோ ஸமுத்³தோ³தி ஏவங் லோகே,
Apicettha susirapāsāṇabhittianusārena mūsikādīnaṃ viya sīmāya heṭṭhimatale otaraṇakiccaṃ natthi. Heṭṭhā pana pacchimasīmappamāṇe ākāse dvaṅgulamattabahalehi pāsāṇabhittiādīhipi uparimatalaṃ āhacca ṭhitehi sabbaso, yebhuyyena vā paricchinne sati upari bajjhamānā sīmā tehi pāsāṇādīhi antaritāya tapparicchinnāya heṭṭhābhūmiyāpi uparimatalena saddhiṃ ekakkhaṇe patiṭṭhāti nadipārasīmā viya nadiantaritesu ubhosu tīresu, leṇādīsu apanītesupi heṭṭhā otiṇṇā sīmā yāva sāsanantaradhānā na vigacchati. Paṭhamaṃ pana upari sīmāya baddhāya pacchā leṇādīsu katesupi heṭṭhābhūmiyaṃ sīmā otarati eva. Keci taṃ na icchanti. Evaṃ ubhayattha patiṭṭhitā ca sā sīmā ekāva hoti gottādijāti viya byattibhedesūti gahetabbaṃ. Sabbā eva hi baddhasīmā, abaddhasīmā ca attano attano pakatinissayabhūte gāmāraññanadiādike khette yathāparicchedaṃ sabbattha sākalyena ekasmiṃ khaṇe byāpinī paramatthato avijjamānāpi te te nissayabhūte paramatthadhamme, taṃ taṃ kiriyāvisesampi vā upādāya lokiyehi, sāsanikehi ca yathārahaṃ ekattena paññattatāya nissayekarūpā eva. Tathā hi eko gāmo araññaṃ nadī jātassaro samuddoti evaṃ loke,
‘‘ஸம்மதா ஸா ஸீமா ஸங்கே⁴ன (மஹாவ॰ 143). அகா³மகே சே, பி⁴க்க²வே, அரஞ்ஞே ஸமந்தா ஸத்தப்³ப⁴ந்தரா, அயங் தத்த² ஸமானஸங்வாஸா ஏகூபோஸதா². ஸமந்தா உத³குக்கே²பா, அயங் தத்த² ஸமானஸங்வாஸா ஏகூபோஸதா²’’தி (மஹாவ॰ 147) –
‘‘Sammatā sā sīmā saṅghena (mahāva. 143). Agāmake ce, bhikkhave, araññe samantā sattabbhantarā, ayaṃ tattha samānasaṃvāsā ekūposathā. Samantā udakukkhepā, ayaṃ tattha samānasaṃvāsā ekūposathā’’ti (mahāva. 147) –
ஆதி³னா ஸாஸனே ச ஏகவோஹாரோ தி³ஸ்ஸதி. ந ஹி பரமத்த²தோ ஏகஸ்ஸ அனேகத⁴ம்மேஸு ப்³யாபனமத்தி². கஸிணேகதே³ஸாதி³விகப்பாஸமானதாய ஏகத்தஹானிதோதி அயங் நோ மதி.
Ādinā sāsane ca ekavohāro dissati. Na hi paramatthato ekassa anekadhammesu byāpanamatthi. Kasiṇekadesādivikappāsamānatāya ekattahānitoti ayaṃ no mati.
அஸ்ஸ ஹெட்டா²தி ஸப்பப²ணபப்³ப³தஸ்ஸ ஹெட்டா² ஆகாஸபப்³பா⁴ரே. லேணஸ்ஸாதி லேணஞ்சே கதங், தஸ்ஸ லேணஸ்ஸாதி அத்தோ². தமேவ புன லேணங் பஞ்சஹி பகாரேஹி விகப்பெத்வா ஓதரணானோதரணவினிச்ச²யங் த³ஸ்ஸேதுங் ஆஹ ‘‘ஸசே பன ஹெட்டா²’’திஆதி³. தத்த² ‘‘ஹெட்டா²’’தி இமஸ்ஸ ‘‘லேணங் ஹோதீ’’தி இமினா ஸம்ப³ந்தோ⁴. ஹெட்டா² லேணஞ்ச ஏகஸ்மிங் பதே³ஸேதி ஆஹ ‘‘அந்தோ’’தி, பப்³ப³தஸ்ஸ அந்தோ, பப்³ப³தமூலேதி அத்தோ². தமேவ அந்தோ-ஸத்³த³ங் ஸீமாபரிச்சே²தே³ன விஸேஸேதுங் ‘‘உபரிமஸ்ஸ ஸீமாபரிச்சே²த³ஸ்ஸ பாரதோ’’தி வுத்தங் . பப்³ப³தபாத³ங் பன அபெக்கி²த்வா ‘‘ஓரதோ’’தி வத்தப்³பே³பி ஸீமானிஸ்ஸயங் பப்³ப³தக்³க³ங் ஸந்தா⁴ய ‘‘பாரதோ’’தி வுத்தந்தி த³ட்ட²ப்³ப³ங். தேனேவ ‘‘ப³ஹிலேண’’ந்தி எத்த² ப³ஹி-ஸத்³த³ங் விஸேஸெந்தோ ‘‘உபரிமஸ்ஸ ஸீமாபரிச்சே²த³ஸ்ஸ ஓரதோ’’தி ஆஹ. ப³ஹி ஸீமா ந ஓதரதீதி எத்த² ப³ஹீதி பப்³ப³தபாதே³ லேணங் ஸந்தா⁴ய வுத்தங், லேணஸ்ஸ ப³ஹிபூ⁴தே உபரிஸீமாபரிச்சே²த³ஸ்ஸ ஹெட்டா²பா⁴கே³ ஸீமா ந ஓதரதீதி அத்தோ². அந்தோ ஸீமாதி லேணஸ்ஸ ச பப்³ப³தபாத³ஸ்ஸ ச அந்தோ அத்தனோ ஓதரணாரஹட்டா²னே ந ஓதரதீதி அத்தோ². ‘‘ப³ஹி ஸீமா ந ஓதரதி, அந்தோ ஸீமா ந ஓதரதீ’’தி செத்த² அத்தனோ ஓதரணாரஹட்டா²னே லேணாபா⁴வேன ஸீமாய ஸப்³ப³தா² அனோதரணமேவ த³ஸ்ஸிதந்தி க³ஹேதப்³ப³ங். தத்தா²பி அனோதரந்தீ உபரி ஏவ ஹோதீதி. ‘‘ப³ஹி பதிதங் அஸீமா’’திஆதி³னா உபரிபாஸாதா³தீ³ஸு அதி²ரனிஸ்ஸயேஸு டி²தா ஸீமாபி தேஸங் வினாஸேன வினஸ்ஸதீதி த³ஸ்ஸிதந்தி த³ட்ட²ப்³ப³ங்.
Assa heṭṭhāti sappaphaṇapabbatassa heṭṭhā ākāsapabbhāre. Leṇassāti leṇañce kataṃ, tassa leṇassāti attho. Tameva puna leṇaṃ pañcahi pakārehi vikappetvā otaraṇānotaraṇavinicchayaṃ dassetuṃ āha ‘‘sace pana heṭṭhā’’tiādi. Tattha ‘‘heṭṭhā’’ti imassa ‘‘leṇaṃ hotī’’ti iminā sambandho. Heṭṭhā leṇañca ekasmiṃ padeseti āha ‘‘anto’’ti, pabbatassa anto, pabbatamūleti attho. Tameva anto-saddaṃ sīmāparicchedena visesetuṃ ‘‘uparimassa sīmāparicchedassa pārato’’ti vuttaṃ . Pabbatapādaṃ pana apekkhitvā ‘‘orato’’ti vattabbepi sīmānissayaṃ pabbataggaṃ sandhāya ‘‘pārato’’ti vuttanti daṭṭhabbaṃ. Teneva ‘‘bahileṇa’’nti ettha bahi-saddaṃ visesento ‘‘uparimassa sīmāparicchedassa orato’’ti āha. Bahi sīmā na otaratīti ettha bahīti pabbatapāde leṇaṃ sandhāya vuttaṃ, leṇassa bahibhūte uparisīmāparicchedassa heṭṭhābhāge sīmā na otaratīti attho. Anto sīmāti leṇassa ca pabbatapādassa ca anto attano otaraṇārahaṭṭhāne na otaratīti attho. ‘‘Bahi sīmā na otarati, anto sīmā na otaratī’’ti cettha attano otaraṇārahaṭṭhāne leṇābhāvena sīmāya sabbathā anotaraṇameva dassitanti gahetabbaṃ. Tatthāpi anotarantī upari eva hotīti. ‘‘Bahi patitaṃ asīmā’’tiādinā uparipāsādādīsu athiranissayesu ṭhitā sīmāpi tesaṃ vināsena vinassatīti dassitanti daṭṭhabbaṃ.
பொக்க²ரணிங் க²ணந்தி, ஸீமாயேவாதி எத்த² ஸசே ஹெட்டா² உமங்க³னதி³ஸீமப்பமாணதோ அனூனா பட²மமேவ ச பவத்தா ஹோதி. ஸீமா ச பச்சா² ப³த்³தா⁴ நதி³தோ உபரி ஏவ ஹோதி, நதி³ங் ஆஹச்ச பொக்க²ரணியா ச க²தாய ஸீமா வினஸ்ஸதீதி த³ட்ட²ப்³ப³ங். ஹெட்டா²பத²விதலேதி அந்தரா பூ⁴மிவிவரே.
Pokkharaṇiṃkhaṇanti, sīmāyevāti ettha sace heṭṭhā umaṅganadisīmappamāṇato anūnā paṭhamameva ca pavattā hoti. Sīmā ca pacchā baddhā nadito upari eva hoti, nadiṃ āhacca pokkharaṇiyā ca khatāya sīmā vinassatīti daṭṭhabbaṃ. Heṭṭhāpathavitaleti antarā bhūmivivare.
ஸீமாமாளகேதி க²ண்ட³ஸீமங்க³ணே. ‘‘வடருக்கோ²’’தி இத³ங் பாரோஹோபத்த²ம்பே⁴ன அதிதூ³ரம்பி க³ந்துங் ஸமத்த²ஸாகா²ஸமங்கி³தாய வுத்தங். ஸப்³ப³ருக்க²லதாதீ³னம்பி ஸம்ப³ந்தோ⁴ ந வட்டதி ஏவ. தேனேவ நாவாரஜ்ஜுஸேதுஸம்ப³ந்தோ⁴பி படிக்கி²த்தோ. ததோதி ஸாக²தோ. மஹாஸீமாய பத²விதலந்தி எத்த² ஆஸன்னதரம்பி கா³மஸீமங் அக்³க³ஹெத்வா ப³த்³த⁴ஸீமாய ஏவ க³ஹிதத்தா கா³மஸீமாப³த்³த⁴ஸீமானங் அஞ்ஞமஞ்ஞங் ருக்கா²தி³ஸம்ப³ந்தே⁴பி ஸம்பே⁴த³தோ³ஸோ நத்தி², அஞ்ஞமஞ்ஞங் நிஸ்ஸயனிஸ்ஸிதபா⁴வேன பவத்திதோதி க³ஹேதப்³ப³ங். யதி³ ஹி தாஸம்பி ஸம்ப³ந்த⁴தோ³ஸோ ப⁴வெய்ய, கத²ங் கா³மஸீமாய ப³த்³த⁴ஸீமா ஸம்மன்னிதப்³பா³ ஸியா? யஸ்ஸா ஹி ஸீமாய ஸத்³தி⁴ங் ஸம்ப³ந்தே⁴ தோ³ஸோ ப⁴வெய்ய, ஸா தத்த² ப³ந்தி⁴துமேவ ந வட்டதி, ப³த்³த⁴ஸீமாஉத³குக்கே²பஸீமாஸு ப³த்³த⁴ஸீமா விய, அத்தனோ நிஸ்ஸயபூ⁴தகா³மஸீமாதீ³ஸு உத³குக்கே²பஸீமா விய ச. தேனேவ ‘‘ஸசே பன ருக்க²ஸ்ஸ ஸாகா² வா ததோ நிக்க²ந்தபாரோஹோ வா ப³ஹினதி³தீரே விஹாரஸீமாய வா கா³மஸீமாய வா பதிட்டி²தோ’’திஆதி³னா (மஹாவ॰ அட்ட²॰ 147) உத³குக்கே²பஸீமாய அத்தனோ அனிஸ்ஸயபூ⁴தகா³மஸீமாதீ³ஹி ஏவ ஸம்ப³ந்த⁴தோ³ஸோ த³ஸ்ஸிதோ, ந நதி³ஸீமாயங். ஏவமிதா⁴பீதி த³ட்ட²ப்³ப³ங். அயஞ்சத்தோ² உபரி பாகடோ ப⁴விஸ்ஸதி. ஆஹச்சாதி பு²ஸித்வா.
Sīmāmāḷaketi khaṇḍasīmaṅgaṇe. ‘‘Vaṭarukkho’’ti idaṃ pārohopatthambhena atidūrampi gantuṃ samatthasākhāsamaṅgitāya vuttaṃ. Sabbarukkhalatādīnampi sambandho na vaṭṭati eva. Teneva nāvārajjusetusambandhopi paṭikkhitto. Tatoti sākhato. Mahāsīmāya pathavitalanti ettha āsannatarampi gāmasīmaṃ aggahetvā baddhasīmāya eva gahitattā gāmasīmābaddhasīmānaṃ aññamaññaṃ rukkhādisambandhepi sambhedadoso natthi, aññamaññaṃ nissayanissitabhāvena pavattitoti gahetabbaṃ. Yadi hi tāsampi sambandhadoso bhaveyya, kathaṃ gāmasīmāya baddhasīmā sammannitabbā siyā? Yassā hi sīmāya saddhiṃ sambandhe doso bhaveyya, sā tattha bandhitumeva na vaṭṭati, baddhasīmāudakukkhepasīmāsu baddhasīmā viya, attano nissayabhūtagāmasīmādīsu udakukkhepasīmā viya ca. Teneva ‘‘sace pana rukkhassa sākhā vā tato nikkhantapāroho vā bahinaditīre vihārasīmāya vā gāmasīmāya vā patiṭṭhito’’tiādinā (mahāva. aṭṭha. 147) udakukkhepasīmāya attano anissayabhūtagāmasīmādīhi eva sambandhadoso dassito, na nadisīmāyaṃ. Evamidhāpīti daṭṭhabbaṃ. Ayañcattho upari pākaṭo bhavissati. Āhaccāti phusitvā.
மஹாஸீமங் வா ஸோதெ⁴த்வாதி மஹாஸீமாக³தானங் ஸப்³பே³ஸங் பி⁴க்கூ²னங் ஹத்த²பாஸானயனப³ஹிகரணாதி³வஸேன ஸகலங் மஹாஸீமங் ஸோதெ⁴த்வா. ஏதேன ஸப்³ப³விபத்தியோ மோசெத்வா புப்³பே³ ஸுட்டு² ப³த்³தா⁴னம்பி த்³வின்னங் ப³த்³த⁴ஸீமானங் பச்சா² ருக்கா²தி³ஸம்ப³ந்தே⁴ன உப்பஜ்ஜனகோ ஈதி³ஸோ பாளிமுத்தகோ ஸம்பே⁴த³தோ³ஸோ அத்தீ²தி த³ஸ்ஸேதி. ஸோ ச ‘‘ந, பி⁴க்க²வே, ஸீமாய ஸீமா ஸம்பி⁴ந்தி³தப்³பா³’’திஆதி³னா ப³த்³த⁴ஸீமானங் அஞ்ஞமஞ்ஞங் ஸம்பே⁴த³ஜ்ஜொ²த்த²ரணங் படிக்கி²பித்வா ‘‘அனுஜானாமி, பி⁴க்க²வே, ஸீமங் ஸம்மன்னந்தேன ஸீமந்தரிகங் ட²பெத்வா ஸீமங் ஸம்மன்னிது’’ந்தி உபி⁴ன்னங் (மஹாவ॰ 148) ப³த்³த⁴ஸீமானமந்தரா ஸீமந்தரிகங் ட²பெத்வாவ ப³ந்தி⁴துங் அனுஜானந்தேன ஸம்பே⁴த³ஜ்ஜொ²த்த²ரணங் விய தாஸங் அஞ்ஞமஞ்ஞங் பு²ஸித்வா திட்ட²னவஸேன ப³ந்த⁴னம்பி ந வட்டதீதி ஸித்³த⁴த்தா ப³த்³தா⁴னம்பி தாஸங் பச்சா² அஞ்ஞமஞ்ஞங் ஏகருக்கா²தீ³ஹி பு²ஸித்வா டா²னம்பி ந வட்டதீதி ப⁴க³வதோ அதி⁴ப்பாயஞ்ஞூஹி ஸங்கீ³திகாரகேஹி நித்³தா⁴ரிதோ. ப³ந்த⁴னகாலே படிக்கி²த்தஸ்ஸ ஸம்ப³ந்த⁴தோ³ஸஸ்ஸ அனுலோமேன அகப்பியானுலோமத்தா.
Mahāsīmaṃ vā sodhetvāti mahāsīmāgatānaṃ sabbesaṃ bhikkhūnaṃ hatthapāsānayanabahikaraṇādivasena sakalaṃ mahāsīmaṃ sodhetvā. Etena sabbavipattiyo mocetvā pubbe suṭṭhu baddhānampi dvinnaṃ baddhasīmānaṃ pacchā rukkhādisambandhena uppajjanako īdiso pāḷimuttako sambhedadoso atthīti dasseti. So ca ‘‘na, bhikkhave, sīmāya sīmā sambhinditabbā’’tiādinā baddhasīmānaṃ aññamaññaṃ sambhedajjhottharaṇaṃ paṭikkhipitvā ‘‘anujānāmi, bhikkhave, sīmaṃ sammannantena sīmantarikaṃ ṭhapetvā sīmaṃ sammannitu’’nti ubhinnaṃ (mahāva. 148) baddhasīmānamantarā sīmantarikaṃ ṭhapetvāva bandhituṃ anujānantena sambhedajjhottharaṇaṃ viya tāsaṃ aññamaññaṃ phusitvā tiṭṭhanavasena bandhanampi na vaṭṭatīti siddhattā baddhānampi tāsaṃ pacchā aññamaññaṃ ekarukkhādīhi phusitvā ṭhānampi na vaṭṭatīti bhagavato adhippāyaññūhi saṅgītikārakehi niddhārito. Bandhanakāle paṭikkhittassa sambandhadosassa anulomena akappiyānulomattā.
அயங் பன ஸம்ப³ந்த⁴தோ³ஸோ – புப்³பே³ ஸுட்டு² ப³த்³தா⁴னங் பச்சா² ஸஞ்ஜாதத்தா ப³ஜ்ஜ²மானக்க²ணே விய அஸீமத்தங் காதுங் ந ஸக்கோதி. தஸ்மா ருக்கா²தி³ஸம்ப³ந்தே⁴ அபனீதமத்தே தா ஸீமா பாகதிகா ஹொந்தி. யதா² சாயங் பச்சா² ந வட்டதி, ஏவங் ப³ஜ்ஜ²மானக்க²ணேபி தாஸங் ருக்கா²தி³ஸம்ப³ந்தே⁴ ஸதி தா ப³ந்தி⁴துங் ந வட்டதீதி த³ட்ட²ப்³ப³ங்.
Ayaṃ pana sambandhadoso – pubbe suṭṭhu baddhānaṃ pacchā sañjātattā bajjhamānakkhaṇe viya asīmattaṃ kātuṃ na sakkoti. Tasmā rukkhādisambandhe apanītamatte tā sīmā pākatikā honti. Yathā cāyaṃ pacchā na vaṭṭati, evaṃ bajjhamānakkhaṇepi tāsaṃ rukkhādisambandhe sati tā bandhituṃ na vaṭṭatīti daṭṭhabbaṃ.
கேசி பன ‘‘மஹாஸீமங் வா ஸோதெ⁴த்வாதி எத்த² மஹாஸீமாக³தா பி⁴க்கூ² யதா² தங் ஸாக²ங் வா பாரோஹங் வா காயபடிப³த்³தே⁴ஹி ந பு²ஸந்தி, ஏவங் ஸோத⁴னமேவ இதா⁴தி⁴ப்பேதங், ந ஸகலஸீமாஸோத⁴ன’’ந்தி வத³ந்தி, தங் ந யுத்தங் அட்ட²கதா²ய விருஜ்ஜ²னதோ. ததா² ஹி ‘‘மஹாஸீமாய பத²விதலங் வா தத்த²ஜாதருக்கா²தீ³னி வா ஆஹச்ச திட்ட²தீ’’தி ஏவங் ஸாகா²பாரோஹானங் மஹாஸீமங் பு²ஸித்வா டா²னமேவ ஸம்ப³ந்த⁴தோ³ஸே காரணத்தேன வுத்தங், ந பன தத்த² டி²தபி⁴க்கூ²ஹி ஸாகா²தீ³னங் பு²ஸனங். யதி³ ஹி பி⁴க்கூ²னங் ஸாகா²தி³ பு²ஸித்வா டா²னமேவ காரணங் ஸியா, தஸ்ஸ ஸாக²ங் வா ததோ நிக்³க³தபாரோஹங் வா மஹாஸீமாய பவிட்ட²ங் தத்ரட்டோ² கோசி பி⁴க்கு² பு²ஸித்வா திட்ட²தீதி பி⁴க்கு²பு²ஸனமேவ வத்தப்³ப³ங் ஸியா. யஞ்ஹி தத்த² மஹாஸீமாஸோத⁴னே காரணங், ததே³வ தஸ்மிங் வாக்யே பதா⁴னதோ த³ஸ்ஸேதப்³ப³ங். ந ஹி ஆஹச்ச டி²தமேவ ஸாகா²தி³ங் பு²ஸித்வா டி²தோ பி⁴க்கு² ஸோதே⁴தப்³போ³ ஆகாஸட்ட²ஸாகா²தி³ங் பு²ஸித்வா டி²தஸ்ஸாபி ஸோதே⁴தப்³ப³தோ, கிங் நிரத்த²கேன ஆஹச்சட்டா²னவசனேன. ஆகாஸட்ட²ஸாகா²ஸு ச பி⁴க்கு²னோ பு²ஸனமேவ காரணத்தேன வுத்தங், ஸோத⁴னஞ்ச தஸ்ஸேவ பி⁴க்கு²ஸ்ஸ ஹத்த²பாஸானயனாதி³வஸேன ஸோத⁴னங் வுத்தங். இத⁴ பன ‘‘மஹாஸீமங் ஸோதெ⁴த்வா’’தி ஸகலஸீமாஸாதா⁴ரணவசனேன ஸோத⁴னங் வுத்தங்.
Keci pana ‘‘mahāsīmaṃ vā sodhetvāti ettha mahāsīmāgatā bhikkhū yathā taṃ sākhaṃ vā pārohaṃ vā kāyapaṭibaddhehi na phusanti, evaṃ sodhanameva idhādhippetaṃ, na sakalasīmāsodhana’’nti vadanti, taṃ na yuttaṃ aṭṭhakathāya virujjhanato. Tathā hi ‘‘mahāsīmāya pathavitalaṃ vā tatthajātarukkhādīni vā āhacca tiṭṭhatī’’ti evaṃ sākhāpārohānaṃ mahāsīmaṃ phusitvā ṭhānameva sambandhadose kāraṇattena vuttaṃ, na pana tattha ṭhitabhikkhūhi sākhādīnaṃ phusanaṃ. Yadi hi bhikkhūnaṃ sākhādi phusitvā ṭhānameva kāraṇaṃ siyā, tassa sākhaṃ vā tato niggatapārohaṃ vā mahāsīmāya paviṭṭhaṃ tatraṭṭho koci bhikkhu phusitvā tiṭṭhatīti bhikkhuphusanameva vattabbaṃ siyā. Yañhi tattha mahāsīmāsodhane kāraṇaṃ, tadeva tasmiṃ vākye padhānato dassetabbaṃ. Na hi āhacca ṭhitameva sākhādiṃ phusitvā ṭhito bhikkhu sodhetabbo ākāsaṭṭhasākhādiṃ phusitvā ṭhitassāpi sodhetabbato, kiṃ niratthakena āhaccaṭṭhānavacanena. Ākāsaṭṭhasākhāsu ca bhikkhuno phusanameva kāraṇattena vuttaṃ, sodhanañca tasseva bhikkhussa hatthapāsānayanādivasena sodhanaṃ vuttaṃ. Idha pana ‘‘mahāsīmaṃ sodhetvā’’ti sakalasīmāsādhāraṇavacanena sodhanaṃ vuttaṃ.
அபிச ஸாகா²தி³ங் பு²ஸித்வா டி²தபி⁴க்கு²மத்தஸோத⁴னே அபி⁴மதே ‘‘மஹாஸீமாய பத²விதல’’ந்தி விஸேஸஸீமோபாதா³னங் நிரத்த²கங் ஸியா யத்த² கத்த²சி அந்தமஸோ ஆகாஸேபி ட²த்வா ஸாகா²தி³ங் பு²ஸித்வா டி²தஸ்ஸ விஸோதே⁴தப்³ப³தோ. சி²ந்தி³த்வா ப³ஹிட்ட²கா காதப்³பா³தி தத்த² பதிட்டி²தபா⁴வவியோஜனவசனதோ ச விஸபா⁴க³ஸீமானங் பு²ஸனேனேவ ஸகலஸீமாஸோத⁴னஹேதுகோ அட்ட²கதா²ஸித்³தோ⁴யங் ஏகோ ஸம்ப³ந்த⁴தோ³ஸோ அத்தே²வாதி க³ஹேதப்³போ³. தேனேவ உத³குக்கே²பஸீமாகதா²யம்பி (மஹாவ॰ அட்ட²॰ 147) ‘‘விஹாரஸீமாய வா கா³மஸீமாய வா பதிட்டி²தோ’’தி ச ‘‘நதி³தீரே பன கா²ணுகங் கொட்டெத்வா தத்த² ப³த்³த⁴னாவாய ந வட்டதீ’’தி ச ‘‘ஸசே பன ஸேது வா ஸேதுபாதா³ வா ப³ஹிதீரே பதிட்டி²தா, கம்மங் காதுங் ந வட்டதீ’’தி ச ஏவங் விஸபா⁴கா³ஸு கா³மஸீமாஸு ஸாகா²தீ³னங் பு²ஸனமேவ ஸங்கரதோ³ஸகாரணத்தேன வுத்தங், ந பி⁴க்கு²பு²ஸனங். ததா² ஹி ‘‘அந்தோனதி³யங் ஜாதருக்கே² ப³ந்தி⁴த்வா கம்மங் காதப்³ப³’’ந்தி நதி³யங் நாவாப³ந்த⁴னங் அனுஞ்ஞாதங் உத³குக்கே²பனிஸ்ஸயத்தேன நதி³ஸீமாய ஸபா⁴க³த்தா. யதி³ ஹி பி⁴க்கூ²னங் பு²ஸனமேவ படிச்ச ஸப்³ப³த்த² ஸம்ப³ந்த⁴தோ³ஸோ வுத்தோ ஸியா, நதி³யம்பி ப³ந்த⁴னங் படிக்கி²பிதப்³ப³ங் ப⁴வெய்ய. தத்தா²பி ஹி பி⁴க்கு²பு²ஸனங் கம்மகோபகாரணங் ஹோதி, தஸ்மா ஸபா⁴க³ஸீமாஸு பவிஸித்வா பூ⁴மிஆதி³ங் பு²ஸித்வா வா அபு²ஸித்வா வா ஸாகா²தி³ம்ஹி டி²தே தங் ஸாகா²தி³ங் பு²ஸந்தோவ பி⁴க்கு² ஸோதே⁴தப்³போ³. விஸபா⁴க³ஸீமாஸு பன ஸாகா²தி³ம்ஹி பு²ஸித்வா டி²தே தங் ஸாகா²தி³ங் அபு²ஸந்தாபி ஸப்³பே³ பி⁴க்கூ² ஸோதே⁴தப்³பா³. அபு²ஸித்வா டி²தே பன தங் ஸாகா²தி³ங் பு²ஸந்தோவ பி⁴க்கு² ஸோதே⁴தப்³போ³தி நிட்ட²மெத்த² க³ந்தப்³ப³ங்.
Apica sākhādiṃ phusitvā ṭhitabhikkhumattasodhane abhimate ‘‘mahāsīmāya pathavitala’’nti visesasīmopādānaṃ niratthakaṃ siyā yattha katthaci antamaso ākāsepi ṭhatvā sākhādiṃ phusitvā ṭhitassa visodhetabbato. Chinditvābahiṭṭhakā kātabbāti tattha patiṭṭhitabhāvaviyojanavacanato ca visabhāgasīmānaṃ phusaneneva sakalasīmāsodhanahetuko aṭṭhakathāsiddhoyaṃ eko sambandhadoso atthevāti gahetabbo. Teneva udakukkhepasīmākathāyampi (mahāva. aṭṭha. 147) ‘‘vihārasīmāya vā gāmasīmāya vā patiṭṭhito’’ti ca ‘‘naditīre pana khāṇukaṃ koṭṭetvā tattha baddhanāvāya na vaṭṭatī’’ti ca ‘‘sace pana setu vā setupādā vā bahitīre patiṭṭhitā, kammaṃ kātuṃ na vaṭṭatī’’ti ca evaṃ visabhāgāsu gāmasīmāsu sākhādīnaṃ phusanameva saṅkaradosakāraṇattena vuttaṃ, na bhikkhuphusanaṃ. Tathā hi ‘‘antonadiyaṃ jātarukkhe bandhitvā kammaṃ kātabba’’nti nadiyaṃ nāvābandhanaṃ anuññātaṃ udakukkhepanissayattena nadisīmāya sabhāgattā. Yadi hi bhikkhūnaṃ phusanameva paṭicca sabbattha sambandhadoso vutto siyā, nadiyampi bandhanaṃ paṭikkhipitabbaṃ bhaveyya. Tatthāpi hi bhikkhuphusanaṃ kammakopakāraṇaṃ hoti, tasmā sabhāgasīmāsu pavisitvā bhūmiādiṃ phusitvā vā aphusitvā vā sākhādimhi ṭhite taṃ sākhādiṃ phusantova bhikkhu sodhetabbo. Visabhāgasīmāsu pana sākhādimhi phusitvā ṭhite taṃ sākhādiṃ aphusantāpi sabbe bhikkhū sodhetabbā. Aphusitvā ṭhite pana taṃ sākhādiṃ phusantova bhikkhu sodhetabboti niṭṭhamettha gantabbaṃ.
யங் பனெத்த² கேசி ‘‘ப³த்³த⁴ஸீமானங் த்³வின்னங் அஞ்ஞமஞ்ஞங் விய ப³த்³த⁴ஸீமாகா³மஸீமானம்பி தத³ஞ்ஞாஸம்பி ஸப்³பா³ஸங் ஸமானஸங்வாஸகஸீமானங் அஞ்ஞமஞ்ஞங் ருக்கா²தி³ஸம்ப³ந்தே⁴ ஸதி தது³ப⁴யம்பி ஏகஸீமங் விய ஸோதெ⁴த்வா ஏகத்தே²வ கம்மங் காதப்³ப³ங், அஞ்ஞத்த² கதங் கம்மங் விபஜ்ஜதி, நத்தெ²த்த² ஸபா⁴க³விஸபா⁴க³பே⁴தோ³’’தி வத³ந்தி, தங் தேஸங் மதிமத்தங், ஸபா⁴க³ஸீமானங் அஞ்ஞமஞ்ஞங் ஸம்பே⁴த³தோ³ஸாபா⁴வஸ்ஸ விஸபா⁴க³ஸீமானமேவ தப்³பா⁴வஸ்ஸ ஸுத்தஸுத்தானுலோமாதி³வினயனயேஹி ஸித்³த⁴த்தா. ததா² ஹி ‘‘அனுஜானாமி, பி⁴க்க²வே, ஸீமங் ஸம்மன்னிது’’ந்தி கா³மஸீமாயமேவ ப³த்³த⁴ஸீமங் ஸம்மன்னிதுங் அனுஞ்ஞாதங். தாஸங் நிஸ்ஸயனிஸ்ஸிதபா⁴வேன ஸபா⁴க³தா, ஸம்பே⁴த³ஜ்ஜொ²த்த²ரணாதி³தோ³ஸாபா⁴வோ ச ஸுத்ததோவ ஸித்³தோ⁴. ப³ந்த⁴னகாலே பன அனுஞ்ஞாதஸ்ஸ ஸம்ப³ந்த⁴ஸ்ஸ அனுலோமதோ பச்சா² ஸஞ்ஜாதருக்கா²தி³ஸம்ப³ந்தோ⁴பி தாஸங் வட்டதி ஏவ. ‘‘யங், பி⁴க்க²வே…பே॰… கப்பியங் அனுலோமேதி அகப்பியங் படிபா³ஹதி. தங் வோ கப்பதீ’’தி (மஹாவ॰ 305) வுத்தத்தா. ஏவங் தாவ ப³த்³த⁴ஸீமாகா³மஸீமானங் அஞ்ஞமஞ்ஞங் ஸபா⁴க³தா, ஸம்பே⁴தா³தி³தோ³ஸாபா⁴வோ ச ஸுத்தஸுத்தானுலோமதோ ஸித்³தோ⁴. இமினா ஏவ நயேன அரஞ்ஞஸீமாஸத்தப்³ப⁴ந்தரஸீமானங், நதி³ஆதி³உத³குக்கே²பஸீமானஞ்ச ஸுத்தஸுத்தானுலோமதோ அஞ்ஞமஞ்ஞங் ஸபா⁴க³தா, ஸம்பே⁴தா³தி³தோ³ஸாபா⁴வோ ச ஸித்³தோ⁴தி வேதி³தப்³போ³.
Yaṃ panettha keci ‘‘baddhasīmānaṃ dvinnaṃ aññamaññaṃ viya baddhasīmāgāmasīmānampi tadaññāsampi sabbāsaṃ samānasaṃvāsakasīmānaṃ aññamaññaṃ rukkhādisambandhe sati tadubhayampi ekasīmaṃ viya sodhetvā ekattheva kammaṃ kātabbaṃ, aññattha kataṃ kammaṃ vipajjati, natthettha sabhāgavisabhāgabhedo’’ti vadanti, taṃ tesaṃ matimattaṃ, sabhāgasīmānaṃ aññamaññaṃ sambhedadosābhāvassa visabhāgasīmānameva tabbhāvassa suttasuttānulomādivinayanayehi siddhattā. Tathā hi ‘‘anujānāmi, bhikkhave, sīmaṃ sammannitu’’nti gāmasīmāyameva baddhasīmaṃ sammannituṃ anuññātaṃ. Tāsaṃ nissayanissitabhāvena sabhāgatā, sambhedajjhottharaṇādidosābhāvo ca suttatova siddho. Bandhanakāle pana anuññātassa sambandhassa anulomato pacchā sañjātarukkhādisambandhopi tāsaṃ vaṭṭati eva. ‘‘Yaṃ, bhikkhave…pe… kappiyaṃ anulometi akappiyaṃ paṭibāhati. Taṃ vo kappatī’’ti (mahāva. 305) vuttattā. Evaṃ tāva baddhasīmāgāmasīmānaṃ aññamaññaṃ sabhāgatā, sambhedādidosābhāvo ca suttasuttānulomato siddho. Iminā eva nayena araññasīmāsattabbhantarasīmānaṃ, nadiādiudakukkhepasīmānañca suttasuttānulomato aññamaññaṃ sabhāgatā, sambhedādidosābhāvo ca siddhoti veditabbo.
ப³த்³த⁴ஸீமாய பன அஞ்ஞாய ப³த்³த⁴ஸீமாய, நதி³ஆதி³ஸீமாஸு ச ப³ந்தி⁴துங் படிக்கே²பஸித்³தி⁴தோ சேவ உத³குக்கே²பஸத்தப்³ப⁴ந்தரஸீமானங் நதி³ஆதீ³ஸு ஏவ காதுங் நியமனஸுத்தஸாமத்தி²யேன ப³த்³த⁴ஸீமாகா³மஸீமாதீ³ஸு கரணபடிக்கே²பஸித்³தி⁴தோ ச தாஸங் அஞ்ஞமஞ்ஞங் விஸபா⁴க³தா, உப்பத்திக்க²ணே, பச்சா² ச ருக்கா²தீ³ஹி ஸம்பே⁴தா³தி³தோ³ஸஸம்ப⁴வோ ச வுத்தனயேன ஸுத்தஸுத்தானுலோமதோ ச ஸிஜ்ஜ²ந்தி. தேனேவ அட்ட²கதா²யங் (மஹாவ॰ அட்ட²॰ 148) விஸபா⁴க³ஸீமானமேவ வடருக்கா²தி³வசனேஹி ஸம்ப³ந்த⁴தோ³ஸங் த³ஸ்ஸெத்வா ஸபா⁴கா³னங் ப³த்³த⁴ஸீமாகா³மஸீமாதீ³னங் ஸம்ப³ந்த⁴தோ³ஸோ ந த³ஸ்ஸிதோ, ந கேவலஞ்ச ந த³ஸ்ஸிதோ, அத² கோ² தாஸங் ஸபா⁴க³ஸீமானங் ருக்கா²தி³ஸம்ப³ந்தே⁴பி தோ³ஸாபா⁴வோ பாளிஅட்ட²கதா²ஸு ஞாபிதோ ஏவ. ததா² ஹி பாளியங் ‘‘பப்³ப³தனிமித்தங் பாஸாணனிமித்தங் வனநிமித்தங் ருக்க²னிமித்த’’ந்திஆதி³னா வட்³ட⁴னகனிமித்தானி அனுஞ்ஞாதானி. தேன நேஸங் ருக்கா²தீ³னங் நிமித்தானங் வட்³ட⁴னேபி ப³த்³த⁴ஸீமாகா³மஸீமானங் ஸங்கரதோ³ஸாபா⁴வோ ஞாபிதோவ ஹோதி. த்³வின்னங் பன ப³த்³த⁴ஸீமானங் ஈதி³ஸோ ஸம்ப³ந்தோ⁴ ந வட்டதி. வுத்தஞ்ஹி ‘‘ஏகருக்கோ²பி ச த்³வின்னங் ஸீமானங் நிமித்தங் ஹோதி, ஸோ பன வட்³ட⁴ந்தோ ஸீமாஸங்கரங் கரோதி, தஸ்மா ந காதப்³போ³’’தி ‘‘அனுஜானாமி, பி⁴க்க²வே, தியோஜனபரமங் ஸீமங் ஸம்மன்னிது’’ந்தி வசனதோபி சாயங் ஞாபிதோ. தியோஜனபரமாய ஹி ஸீமாய ஸமந்தா பரியந்தேஸு ருக்க²லதாகு³ம்பா³தீ³ஹி ப³த்³த⁴ஸீமாகா³மஸீமானங் நியமேன அஞ்ஞமஞ்ஞங் ஸம்ப³ந்த⁴ஸ்ஸ ஸம்ப⁴வதோ ‘‘ஈதி³ஸங் ஸம்ப³ந்த⁴னங் வினாஸெத்வாவ ஸீமா ஸம்மன்னிதப்³பா³’’தி அட்ட²கதா²யம்பி ந வுத்தங்.
Baddhasīmāya pana aññāya baddhasīmāya, nadiādisīmāsu ca bandhituṃ paṭikkhepasiddhito ceva udakukkhepasattabbhantarasīmānaṃ nadiādīsu eva kātuṃ niyamanasuttasāmatthiyena baddhasīmāgāmasīmādīsu karaṇapaṭikkhepasiddhito ca tāsaṃ aññamaññaṃ visabhāgatā, uppattikkhaṇe, pacchā ca rukkhādīhi sambhedādidosasambhavo ca vuttanayena suttasuttānulomato ca sijjhanti. Teneva aṭṭhakathāyaṃ (mahāva. aṭṭha. 148) visabhāgasīmānameva vaṭarukkhādivacanehi sambandhadosaṃ dassetvā sabhāgānaṃ baddhasīmāgāmasīmādīnaṃ sambandhadoso na dassito, na kevalañca na dassito, atha kho tāsaṃ sabhāgasīmānaṃ rukkhādisambandhepi dosābhāvo pāḷiaṭṭhakathāsu ñāpito eva. Tathā hi pāḷiyaṃ ‘‘pabbatanimittaṃ pāsāṇanimittaṃ vananimittaṃ rukkhanimitta’’ntiādinā vaḍḍhanakanimittāni anuññātāni. Tena nesaṃ rukkhādīnaṃ nimittānaṃ vaḍḍhanepi baddhasīmāgāmasīmānaṃ saṅkaradosābhāvo ñāpitova hoti. Dvinnaṃ pana baddhasīmānaṃ īdiso sambandho na vaṭṭati. Vuttañhi ‘‘ekarukkhopi ca dvinnaṃ sīmānaṃ nimittaṃ hoti, so pana vaḍḍhanto sīmāsaṅkaraṃ karoti, tasmā na kātabbo’’ti ‘‘anujānāmi, bhikkhave, tiyojanaparamaṃ sīmaṃ sammannitu’’nti vacanatopi cāyaṃ ñāpito. Tiyojanaparamāya hi sīmāya samantā pariyantesu rukkhalatāgumbādīhi baddhasīmāgāmasīmānaṃ niyamena aññamaññaṃ sambandhassa sambhavato ‘‘īdisaṃ sambandhanaṃ vināsetvāva sīmā sammannitabbā’’ti aṭṭhakathāyampi na vuttaṃ.
யதி³ செத்த² ருக்கா²தி³ஸம்ப³ந்தே⁴ன கம்மவிபத்தி ப⁴வெய்ய, அவஸ்ஸமேவ வத்தப்³ப³ங் ஸியா. விபத்திபரிஹாரத்த²ஞ்ஹி ஆசரியா நிராஸங்கட்டா²னேஸுபி ‘‘பி⁴த்திங் அகித்தெத்வா’’திஆதி³னா ஸித்³த⁴மேவத்த²ங் புனப்புனங் அவோசுங். இத⁴ பன ‘‘வனமஜ்ஜே² விஹாரங் கரொந்தி, வனங் ந கித்தேதப்³ப³’’ந்திஆதி³ருக்க²லதாதீ³ஹி நிரந்தரே வனமஜ்ஜே²பி ஸீமாப³ந்த⁴னமேவ அவோசுங். ததா² த²ம்பா⁴னங் உபரி கதபாஸாதா³தீ³ஸு ஹெட்டா² த²ம்பா⁴தீ³ஹி ஏகாப³த்³தே⁴ஸு உபரிமதலாதீ³ஸு ஸீமாப³ந்த⁴னங் ப³ஹுதா⁴ வுத்தங். தஸ்மா ப³த்³த⁴ஸீமாகா³மஸீமானங் ருக்கா²தி³ஸம்ப³ந்தோ⁴ தேஹி முக²தோவ விஹிதோ. அபிச கா³மஸீமானம்பி பாடேக்கங் ப³த்³த⁴ஸீமாஸதி³ஸதாய ஏகிஸ்ஸா கா³மஸீமாய கம்மங் கரொந்தேஹி த³ப்³ப³திணமத்தேனாபி ஸம்ப³ந்தா⁴ கா³மந்தரபரம்பரா அரஞ்ஞனதி³ஸமுத்³தா³ ச ஸோதே⁴தப்³பா³தி ஸகலதீ³பங் ஸோதெ⁴த்வாவ காதப்³ப³ங் ஸியா. ஏவங் பன அஸோதெ⁴த்வா பட²மமஹாஸங்கீ³திகாலதோ பபு⁴தி கதானங் உபஸம்பதா³தி³கம்மானங், ஸீமாஸம்முதீனஞ்ச விபஜ்ஜனதோ ஸப்³பே³ஸம்பி பி⁴க்கூ²னங் அனுபஸம்பன்னஸங்காபஸங்கோ³ ச து³ன்னிவாரோ ஹோதி. ந சேதங் யுத்தங். தஸ்மா வுத்தனயேனேவ விஸபா⁴க³ஸீமானமேவ ருக்கா²தீ³ஹி ஸம்ப³ந்த⁴தோ³ஸோ, ந ப³த்³த⁴ஸீமாகா³மஸீமாதீ³னங் ஸபா⁴க³ஸீமானந்தி க³ஹேதப்³ப³ங்.
Yadi cettha rukkhādisambandhena kammavipatti bhaveyya, avassameva vattabbaṃ siyā. Vipattiparihāratthañhi ācariyā nirāsaṅkaṭṭhānesupi ‘‘bhittiṃ akittetvā’’tiādinā siddhamevatthaṃ punappunaṃ avocuṃ. Idha pana ‘‘vanamajjhe vihāraṃ karonti, vanaṃ na kittetabba’’ntiādirukkhalatādīhi nirantare vanamajjhepi sīmābandhanameva avocuṃ. Tathā thambhānaṃ upari katapāsādādīsu heṭṭhā thambhādīhi ekābaddhesu uparimatalādīsu sīmābandhanaṃ bahudhā vuttaṃ. Tasmā baddhasīmāgāmasīmānaṃ rukkhādisambandho tehi mukhatova vihito. Apica gāmasīmānampi pāṭekkaṃ baddhasīmāsadisatāya ekissā gāmasīmāya kammaṃ karontehi dabbatiṇamattenāpi sambandhā gāmantaraparamparā araññanadisamuddā ca sodhetabbāti sakaladīpaṃ sodhetvāva kātabbaṃ siyā. Evaṃ pana asodhetvā paṭhamamahāsaṅgītikālato pabhuti katānaṃ upasampadādikammānaṃ, sīmāsammutīnañca vipajjanato sabbesampi bhikkhūnaṃ anupasampannasaṅkāpasaṅgo ca dunnivāro hoti. Na cetaṃ yuttaṃ. Tasmā vuttanayeneva visabhāgasīmānameva rukkhādīhi sambandhadoso, na baddhasīmāgāmasīmādīnaṃ sabhāgasīmānanti gahetabbaṃ.
மஹாஸீமாஸோத⁴னஸ்ஸ து³க்கரதாய க²ண்ட³ஸீமாயமேவ யேபு⁴ய்யேன ஸங்க⁴கம்மகரணந்தி ஆஹ ‘‘ஸீமாமாளகே’’திஆதி³ . மஹாஸங்க⁴ஸன்னிபாதே பன க²ண்ட³ஸீமாய அப்பஹோனகதாய மஹாஸீமாய கம்மே கரியமானேபி அயங் நயோ க³ஹேதப்³போ³வ.
Mahāsīmāsodhanassa dukkaratāya khaṇḍasīmāyameva yebhuyyena saṅghakammakaraṇanti āha ‘‘sīmāmāḷake’’tiādi . Mahāsaṅghasannipāte pana khaṇḍasīmāya appahonakatāya mahāsīmāya kamme kariyamānepi ayaṃ nayo gahetabbova.
‘‘உக்கி²பாபெத்வா’’தி இமினா காயபடிப³த்³தே⁴னபி ஸீமங் பு²ஸந்தோ ஸீமட்டோ²வ ஹோதீதி த³ஸ்ஸேதி. புரிமனயேபீதி க²ண்ட³ஸீமதோ மஹாஸீமங் பவிட்ட²ஸாகா²னயேபி. ஸீமட்ட²ருக்க²ஸாகா²ய நிஸின்னோ ஸீமட்டோ²வ ஹோதீதி ஆஹ ‘‘ஹத்த²பாஸமேவ ஆனேதப்³போ³’’தி. எத்த² ச ருக்க²ஸாகா²தீ³ஹி அஞ்ஞமஞ்ஞங் ஸம்ப³ந்தா⁴ஸு ஏதாஸு க²ந்த⁴ஸீமாயங் தயோ பி⁴க்கூ², மஹாஸீமாயங் த்³வேதி ஏவங் த்³வீஸு ஸீமாஸு ஸீமந்தரிகங் அபு²ஸித்வா, ஹத்த²பாஸஞ்ச அவிஜஹித்வா டி²தேஹி பஞ்சஹி பி⁴க்கூ²ஹி உபஸம்பதா³தி³கம்மங் காதுங் வட்டதீதி கேசி வத³ந்தி. தங் ந யுத்தங் ‘‘நானாஸீமாய டி²தசதுத்தோ² கம்மங் கரெய்ய, அகம்மங், ந ச கரணீய’’ந்திஆதி³ (மஹாவ॰ 389) வசனதோ. தேனேவெத்தா²பி மஹாஸீமங் ஸோதெ⁴த்வா மாளகஸீமாயமேவ கம்மகரணங் விஹிதங். அஞ்ஞதா² பி⁴ன்னஸீமட்ட²தாய தத்ரட்ட²ஸ்ஸ க³ணபூரகத்தாபா⁴வா கம்மகோபோவ ஹோதீதி.
‘‘Ukkhipāpetvā’’ti iminā kāyapaṭibaddhenapi sīmaṃ phusanto sīmaṭṭhova hotīti dasseti. Purimanayepīti khaṇḍasīmato mahāsīmaṃ paviṭṭhasākhānayepi. Sīmaṭṭharukkhasākhāya nisinno sīmaṭṭhova hotīti āha ‘‘hatthapāsameva ānetabbo’’ti. Ettha ca rukkhasākhādīhi aññamaññaṃ sambandhāsu etāsu khandhasīmāyaṃ tayo bhikkhū, mahāsīmāyaṃ dveti evaṃ dvīsu sīmāsu sīmantarikaṃ aphusitvā, hatthapāsañca avijahitvā ṭhitehi pañcahi bhikkhūhi upasampadādikammaṃ kātuṃ vaṭṭatīti keci vadanti. Taṃ na yuttaṃ ‘‘nānāsīmāya ṭhitacatuttho kammaṃ kareyya, akammaṃ, na ca karaṇīya’’ntiādi (mahāva. 389) vacanato. Tenevetthāpi mahāsīmaṃ sodhetvā māḷakasīmāyameva kammakaraṇaṃ vihitaṃ. Aññathā bhinnasīmaṭṭhatāya tatraṭṭhassa gaṇapūrakattābhāvā kammakopova hotīti.
யதி³ ஏவங் கத²ங் ச²ந்த³பாரிஸுத்³தி⁴ஆஹரணவஸேன மஹாஸீமாஸோத⁴னந்தி? தம்பி வினயஞ்ஞூ ந இச்ச²ந்தி, ஹத்த²பாஸானயனப³ஹிஸீமாகரணவஸேனேவ பனெத்த² ஸோத⁴னங் இச்ச²ந்தி, தி³ன்னஸ்ஸாபி ச²ந்த³ஸ்ஸ அனாக³மனேன மஹாஸீமட்டோ² கம்மங் கோபேதீதி. யதி³ சஸ்ஸ ச²ந்தா³தி³ நாக³ச்ச²தி, கத²ங் ஸோ கம்மங் கோபெஸ்ஸதீதி? த்³வின்னங் விஸபா⁴க³ஸீமானங் ஸம்ப³ந்த⁴தோ³ஸதோ. ஸோ ச ஸம்ப³ந்த⁴தோ³ஸோ அட்ட²கதா²வசனப்பமாணதோ. ந ஹி வினயே ஸப்³ப³த்த² யுத்தி ஸக்கா ஞாதுங் பு³த்³த⁴கோ³சரத்தாதி வேதி³தப்³ப³ங். கேசி பன ‘‘ஸசே த்³வேபி ஸீமாயோ பூரெத்வா நிரந்தரங் டி²தேஸு பி⁴க்கூ²ஸு கம்மங் கரொந்தேஸு ஏகிஸ்ஸா ஏவ ஸீமாய க³ணோ ச உபஸம்பதா³பெக்கோ² ச அனுஸ்ஸாவகோ ச ஏகதோ திட்ட²தி, கம்மங் ஸுகதமேவ ஹோதி. ஸசே பன கம்மாரஹோ வா அனுஸ்ஸாவகோ வா ஸீமந்தரட்டோ² ஹோதி, கம்மங் விபஜ்ஜதீ’’தி வத³ந்தி, தஞ்ச ப³த்³த⁴ஸீமாகா³மஸீமாதி³ஸபா⁴க³ஸீமாஸு ஏவ யுஜ்ஜதி, யாஸு அஞ்ஞமஞ்ஞங் ருக்கா²தி³ஸம்ப³ந்தே⁴ஸுபி தோ³ஸோ நத்தி². யாஸு பன அத்தி², ந தாஸு விஸபா⁴க³ஸீமாஸு ருக்கா²தி³ஸம்ப³ந்தே⁴ ஸதி ஏகத்த² டி²தோ இதரட்டா²னங் கம்மங் கோபேதி ஏவ அட்ட²கதா²யங் ஸாமஞ்ஞதோ ஸோத⁴னஸ்ஸ வுத்தத்தாதி அம்ஹாகங் க²ந்தி. வீமங்ஸித்வா க³ஹேதப்³ப³ங்.
Yadi evaṃ kathaṃ chandapārisuddhiāharaṇavasena mahāsīmāsodhananti? Tampi vinayaññū na icchanti, hatthapāsānayanabahisīmākaraṇavaseneva panettha sodhanaṃ icchanti, dinnassāpi chandassa anāgamanena mahāsīmaṭṭho kammaṃ kopetīti. Yadi cassa chandādi nāgacchati, kathaṃ so kammaṃ kopessatīti? Dvinnaṃ visabhāgasīmānaṃ sambandhadosato. So ca sambandhadoso aṭṭhakathāvacanappamāṇato. Na hi vinaye sabbattha yutti sakkā ñātuṃ buddhagocarattāti veditabbaṃ. Keci pana ‘‘sace dvepi sīmāyo pūretvā nirantaraṃ ṭhitesu bhikkhūsu kammaṃ karontesu ekissā eva sīmāya gaṇo ca upasampadāpekkho ca anussāvako ca ekato tiṭṭhati, kammaṃ sukatameva hoti. Sace pana kammāraho vā anussāvako vā sīmantaraṭṭho hoti, kammaṃ vipajjatī’’ti vadanti, tañca baddhasīmāgāmasīmādisabhāgasīmāsu eva yujjati, yāsu aññamaññaṃ rukkhādisambandhesupi doso natthi. Yāsu pana atthi, na tāsu visabhāgasīmāsu rukkhādisambandhe sati ekattha ṭhito itaraṭṭhānaṃ kammaṃ kopeti eva aṭṭhakathāyaṃ sāmaññato sodhanassa vuttattāti amhākaṃ khanti. Vīmaṃsitvā gahetabbaṃ.
ந ஓதரதீதி பணவஸண்டா²னபப்³ப³தாதீ³ஸு ஹெட்டா² பமாணரஹிதட்டா²னங் ந ஓதரதி. கிஞ்சாபி பனெத்த² ப³ஜ்ஜ²மானக்க²ணே உத்³த⁴ம்பி பமாணரஹிதங் பப்³ப³தாதீ³னி நாரோஹதி, ததா²பி தங் பச்சா² ஸீமட்ட²தாய ஸீமா ஹோதி. ஹெட்டா² பணவஸண்டா²னாதி³ பன உபரி ப³த்³தா⁴யபி ஸீமாய ஸீமாஸங்க்²யங் ந க³ச்ச²தி, தஸ்ஸ வஸேன ந ஓதரதீதி வுத்தங், இதரதா² ஓரோஹணாரோஹணானங் ஸாதா⁴ரணவஸேன ‘‘ந ஓதரதீ’’திஆதி³னா வத்தப்³ப³தோ. யங் கிஞ்சீதி நிட்டி²தஸீமாய உபரி ஜாதங் விஜ்ஜமானங் புப்³பே³ டி²தங், பச்சா² ஸஞ்ஜாதங், பவிட்ட²ஞ்ச யங்கிஞ்சி ஸவிஞ்ஞாணகாவிஞ்ஞாணகங் ஸப்³ப³ம்பீதி அத்தோ². அந்தோஸீமாய ஹி ஹத்தி²க்க²ந்தா⁴தி³ஸவிஞ்ஞாணகேஸு நிஸின்னோபி பி⁴க்கு² ஸீமட்டோ²வ ஹோதி. ‘‘ப³த்³த⁴ஸீமாயா’’தி இத³ஞ்ச பகரணவஸேன உபலக்க²ணதோ வுத்தங். அப³த்³த⁴ஸீமாஸுபி ஸப்³பா³ஸு டி²தங் தங் ஸீமாஸங்க்²யமேவ க³ச்ச²தி.
Na otaratīti paṇavasaṇṭhānapabbatādīsu heṭṭhā pamāṇarahitaṭṭhānaṃ na otarati. Kiñcāpi panettha bajjhamānakkhaṇe uddhampi pamāṇarahitaṃ pabbatādīni nārohati, tathāpi taṃ pacchā sīmaṭṭhatāya sīmā hoti. Heṭṭhā paṇavasaṇṭhānādi pana upari baddhāyapi sīmāya sīmāsaṅkhyaṃ na gacchati, tassa vasena na otaratīti vuttaṃ, itarathā orohaṇārohaṇānaṃ sādhāraṇavasena ‘‘na otaratī’’tiādinā vattabbato. Yaṃ kiñcīti niṭṭhitasīmāya upari jātaṃ vijjamānaṃ pubbe ṭhitaṃ, pacchā sañjātaṃ, paviṭṭhañca yaṃkiñci saviññāṇakāviññāṇakaṃ sabbampīti attho. Antosīmāya hi hatthikkhandhādisaviññāṇakesu nisinnopi bhikkhu sīmaṭṭhova hoti. ‘‘Baddhasīmāyā’’ti idañca pakaraṇavasena upalakkhaṇato vuttaṃ. Abaddhasīmāsupi sabbāsu ṭhitaṃ taṃ sīmāsaṅkhyameva gacchati.
ஏகஸம்ப³த்³தே⁴ன க³தந்தி ருக்க²லதாதி³தத்ரஜாதமேவ ஸந்தா⁴ய வுத்தங். தாதி³ஸம்பி ‘‘இதோ க³த’’ந்தி வத்தப்³ப³தங் அரஹதி. யங் பன ‘‘இதோ க³த’’ந்தி வா ‘‘ததோ ஆக³த’’ந்தி வா வத்துங் அஸக்குணெய்யங் உபோ⁴ஸு ப³த்³த⁴ஸீமாகா³மஸீமாஸு, உத³குக்கே²பனதி³ஆதீ³ஸு ச திரியங் பதிதரஜ்ஜுத³ண்டா³தி³, தத்த² கிங் காதப்³ப³ந்தி? எத்த² பன ப³த்³த⁴ஸீமாய பதிட்டி²தபா⁴கோ³ ப³த்³த⁴ஸீமா, அப³த்³த⁴கா³மஸீமாய பதிட்டி²தபா⁴கோ³ கா³மஸீமா தது³ப⁴யஸீமட்ட²பப்³ப³தாதி³ விய. ப³த்³த⁴ஸீமதோ உட்டி²தவடருக்க²ஸ்ஸ பாரோஹே, கா³மஸீமாய கா³மஸீமதோ உட்டி²தவடருக்க²ஸ்ஸ பாரோஹே ச ப³த்³த⁴ஸீமாய பதிட்டி²தேபி ஏஸேவ நயோ. மூலபதிட்டி²தகாலதோ ஹி பட்டா²ய ‘‘இதோ க³தங், ததோ ஆக³த’’ந்தி வத்துங் அஸக்குணெய்யதோ ஸோ பா⁴கோ³ யதா²பவிட்ட²ஸீமாஸங்க்²யமேவ க³ச்ச²தி, தேஸங் ருக்க²பாரோஹானங் அந்தரா பன ஆகாஸட்ட²ஸாகா² பூ⁴மியங் ஸீமாபரிச்சே²த³ப்பமாணேன தது³ப⁴யஸீமா ஹோதீதி கேசி வத³ந்தி. யஸ்மா பனஸ்ஸ ஸாகா²ய பாரோஹோ பவிட்ட²ஸீமாய பத²வியங் மூலேஹி பதிட்ட²ஹித்வாபி யாவ ஸாக²ங் வினா டா²துங் ந ஸக்கோதி, தாவ மூலஸீமட்ட²தங் ந விஜஹதி. யதா³ பன வினா டா²துங் ஸக்கோதி, ததா³பி பாரோஹமத்தமேவ பவிட்ட²ஸீமட்ட²தங் ஸமுபேதி. தஸ்மா ஸப்³போ³பி ஆகாஸட்ட²ஸாகா²பா⁴கோ³ புரிமஸீமட்ட²தங் ந விஜஹதி, ததோ ஆக³தபா⁴க³ஸ்ஸ அவிஜஹிதத்தாதி அம்ஹாகங் க²ந்தி. உத³குக்கே²பனதி³ஆதீ³ஸுபி ஏஸேவ நயோ. தத்த² ச விஸபா⁴க³ஸீமாய ஏவங் பவிட்டே² ஸகலஸீமாஸோத⁴னங், ஸபா⁴கா³ய பவிட்டே² பு²ஸித்வா டி²தமத்தபி⁴க்கு²ஸோத⁴னஞ்ச ஸப்³ப³ங் புப்³பே³ வுத்தனயமேவ.
Ekasambaddhena gatanti rukkhalatāditatrajātameva sandhāya vuttaṃ. Tādisampi ‘‘ito gata’’nti vattabbataṃ arahati. Yaṃ pana ‘‘ito gata’’nti vā ‘‘tato āgata’’nti vā vattuṃ asakkuṇeyyaṃ ubhosu baddhasīmāgāmasīmāsu, udakukkhepanadiādīsu ca tiriyaṃ patitarajjudaṇḍādi, tattha kiṃ kātabbanti? Ettha pana baddhasīmāya patiṭṭhitabhāgo baddhasīmā, abaddhagāmasīmāya patiṭṭhitabhāgo gāmasīmā tadubhayasīmaṭṭhapabbatādi viya. Baddhasīmato uṭṭhitavaṭarukkhassa pārohe, gāmasīmāya gāmasīmato uṭṭhitavaṭarukkhassa pārohe ca baddhasīmāya patiṭṭhitepi eseva nayo. Mūlapatiṭṭhitakālato hi paṭṭhāya ‘‘ito gataṃ, tato āgata’’nti vattuṃ asakkuṇeyyato so bhāgo yathāpaviṭṭhasīmāsaṅkhyameva gacchati, tesaṃ rukkhapārohānaṃ antarā pana ākāsaṭṭhasākhā bhūmiyaṃ sīmāparicchedappamāṇena tadubhayasīmā hotīti keci vadanti. Yasmā panassa sākhāya pāroho paviṭṭhasīmāya pathaviyaṃ mūlehi patiṭṭhahitvāpi yāva sākhaṃ vinā ṭhātuṃ na sakkoti, tāva mūlasīmaṭṭhataṃ na vijahati. Yadā pana vinā ṭhātuṃ sakkoti, tadāpi pārohamattameva paviṭṭhasīmaṭṭhataṃ samupeti. Tasmā sabbopi ākāsaṭṭhasākhābhāgo purimasīmaṭṭhataṃ na vijahati, tato āgatabhāgassa avijahitattāti amhākaṃ khanti. Udakukkhepanadiādīsupi eseva nayo. Tattha ca visabhāgasīmāya evaṃ paviṭṭhe sakalasīmāsodhanaṃ, sabhāgāya paviṭṭhe phusitvā ṭhitamattabhikkhusodhanañca sabbaṃ pubbe vuttanayameva.
140. பாரயதீதி அஜ்ஜொ²த்த²ரதி, நதி³யா உபோ⁴ஸு தீரேஸு பதிட்ட²மானா ஸீமா நதி³அஜ்ஜொ²த்த²ரா நாம ஹோதீதி ஆஹ ‘‘நதி³ங்அஜ்ஜொ²த்த²ரமான’’ந்தி. அந்தோனதி³யஞ்ஹி ஸீமா ந ஓதரதி. நதி³லக்க²ணே பன அஸதி ஓதரதி, ஸா ச ததா³ நதி³பாரஸீமா ந ஹோதீதி ஆஹ ‘‘நதி³யா லக்க²ணங் நதி³னிமித்தே வுத்தனயமேவா’’தி. அஸ்ஸாதி ப⁴வெய்ய. அவஸ்ஸங் லப்³ப⁴னெய்யா பன து⁴வனாவாவ ஹோதீதி ஸம்ப³ந்தோ⁴. ‘‘ந நாவாயா’’தி இமினா நாவங் வினாபி ஸீமா ப³த்³தா⁴ ஸுப³த்³தா⁴ ஏவ ஹோதி, ஆபத்திபரிஹாரத்தா² நாவாதி த³ஸ்ஸேதி.
140.Pārayatīti ajjhottharati, nadiyā ubhosu tīresu patiṭṭhamānā sīmā nadiajjhottharā nāma hotīti āha ‘‘nadiṃajjhottharamāna’’nti. Antonadiyañhi sīmā na otarati. Nadilakkhaṇe pana asati otarati, sā ca tadā nadipārasīmā na hotīti āha ‘‘nadiyā lakkhaṇaṃ nadinimitte vuttanayamevā’’ti. Assāti bhaveyya. Avassaṃ labbhaneyyā pana dhuvanāvāva hotīti sambandho. ‘‘Na nāvāyā’’ti iminā nāvaṃ vināpi sīmā baddhā subaddhā eva hoti, āpattiparihāratthā nāvāti dasseti.
ருக்க²ஸங்கா⁴டமயோதி அனேகருக்கே² ஏகதோ க⁴டெத்வா கதஸேது. ருக்க²ங் சி²ந்தி³த்வா கதோதி பாட²ஸேஸோ. ‘‘ஸப்³ப³னிமித்தானங் அந்தோ டி²தே பி⁴க்கூ² ஹத்த²பாஸக³தே கத்வா’’தி இத³ங் உபி⁴ன்னங் தீரானங் ஏககா³மகெ²த்தபா⁴வங் ஸந்தா⁴ய வுத்தங். பப்³ப³தஸண்டா²னாதி ஏகதோ உக்³க³ததீ³பஸிக²ரத்தா வுத்தங்.
Rukkhasaṅghāṭamayoti anekarukkhe ekato ghaṭetvā katasetu. Rukkhaṃ chinditvā katoti pāṭhaseso. ‘‘Sabbanimittānaṃ anto ṭhite bhikkhū hatthapāsagate katvā’’ti idaṃ ubhinnaṃ tīrānaṃ ekagāmakhettabhāvaṃ sandhāya vuttaṃ. Pabbatasaṇṭhānāti ekato uggatadīpasikharattā vuttaṃ.
ஸீமானுஜானநகதா²வண்ணனா நிட்டி²தா.
Sīmānujānanakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 71. ஸீமானுஜானநா • 71. Sīmānujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஸீமானுஜானநகதா² • Sīmānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸீமானுஜானநகதா²வண்ணனா • Sīmānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸீமானுஜானநகதா²வண்ணனா • Sīmānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 71. ஸீமானுஜானநகதா² • 71. Sīmānujānanakathā
