| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
75. සීමාසමූහනන
75. Sīmāsamūhanana
‘‘සීමං, භික්‌ඛවෙ, සම්‌මන්‌නන්‌තෙන පඨමං සමානසංවාසසීමා 1 සම්‌මන්‌නිතබ්‌බා , පච්‌ඡා තිචීවරෙන අවිප්‌පවාසො සම්‌මන්‌නිතබ්‌බො. සීමං, භික්‌ඛවෙ, සමූහනන්‌තෙන පඨමං තිචීවරෙන අවිප්‌පවාසො සමූහන්‌තබ්‌බො, පච්‌ඡා සමානසංවාසසීමා සමූහන්‌තබ්‌බා. එවඤ්‌ච පන, භික්‌ඛවෙ, තිචීවරෙන අවිප්‌පවාසො සමූහන්‌තබ්‌බො. බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
‘‘Sīmaṃ, bhikkhave, sammannantena paṭhamaṃ samānasaṃvāsasīmā 2 sammannitabbā , pacchā ticīvarena avippavāso sammannitabbo. Sīmaṃ, bhikkhave, samūhanantena paṭhamaṃ ticīvarena avippavāso samūhantabbo, pacchā samānasaṃvāsasīmā samūhantabbā. Evañca pana, bhikkhave, ticīvarena avippavāso samūhantabbo. Byattena bhikkhunā paṭibalena saṅgho ñāpetabbo –
145. ‘‘සුණාතු මෙ, භන්‌තෙ, සඞ්‌ඝො. යො සො සඞ්‌ඝෙන තිචීවරෙන අවිප්‌පවාසො සම්‌මතො, යදි සඞ්‌ඝස්‌ස පත්‌තකල්‌ලං, සඞ්‌ඝො තං තිචීවරෙන අවිප්‌පවාසං සමූහනෙය්‍ය. එසා ඤත්‌ති.
145. ‘‘Suṇātu me, bhante, saṅgho. Yo so saṅghena ticīvarena avippavāso sammato, yadi saṅghassa pattakallaṃ, saṅgho taṃ ticīvarena avippavāsaṃ samūhaneyya. Esā ñatti.
‘‘සුණාතු මෙ, භන්‌තෙ, සඞ්‌ඝො. යො සො සඞ්‌ඝෙන තිචීවරෙන අවිප්‌පවාසො සම්‌මතො, සඞ්‌ඝො තං තිචීවරෙන අවිප්‌පවාසං සමූහනති. යස්‌සායස්‌මතො ඛමති එතස්‌ස තිචීවරෙන අවිප්‌පවාසස්‌ස සමුග්‌ඝාතො, සො තුණ්‌හස්‌ස; යස්‌ස නක්‌ඛමති, සො භාසෙය්‍ය. සමූහතො සො සඞ්‌ඝෙන තිචීවරෙන අවිප්‌පවාසො. ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමී’’ති.
‘‘Suṇātu me, bhante, saṅgho. Yo so saṅghena ticīvarena avippavāso sammato, saṅgho taṃ ticīvarena avippavāsaṃ samūhanati. Yassāyasmato khamati etassa ticīvarena avippavāsassa samugghāto, so tuṇhassa; yassa nakkhamati, so bhāseyya. Samūhato so saṅghena ticīvarena avippavāso. Khamati saṅghassa, tasmā tuṇhī, evametaṃ dhārayāmī’’ti.
එවඤ්‌ච පන, භික්‌ඛවෙ, සීමා 3. බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
Evañca pana, bhikkhave, sīmā 4. Byattena bhikkhunā paṭibalena saṅgho ñāpetabbo –
146. ‘‘සුණාතු මෙ, භන්‌තෙ, සඞ්‌ඝො. යා සා සඞ්‌ඝෙන සීමා සම්‌මතා සමානසංවාසා එකුපොසථා , යදි සඞ්‌ඝස්‌ස පත්‌තකල්‌ලං, සඞ්‌ඝො තං සීමං සමූහනෙය්‍ය සමානසංවාසං එකුපොසථං. එසා ඤත්‌ති.
146. ‘‘Suṇātu me, bhante, saṅgho. Yā sā saṅghena sīmā sammatā samānasaṃvāsā ekuposathā , yadi saṅghassa pattakallaṃ, saṅgho taṃ sīmaṃ samūhaneyya samānasaṃvāsaṃ ekuposathaṃ. Esā ñatti.
‘‘සුණාතු මෙ, භන්‌තෙ, සඞ්‌ඝො. යා සා සඞ්‌ඝෙන සීමා සම්‌මතා සමානසංවාසා එකුපොසථා, සඞ්‌ඝො තං සීමං සමූහනති සමානසංවාසං එකුපොසථං. යස්‌සායස්‌මතො ඛමති එතිස්‌සා සීමාය සමානසංවාසාය එකුපොසථාය සමුග්‌ඝාතො, සො තුණ්‌හස්‌ස; යස්‌ස නක්‌ඛමති, සො භාසෙය්‍ය. සමූහතා සා සීමා සඞ්‌ඝෙන සමානසංවාසා එකුපොසථා. ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමී’’ති.
‘‘Suṇātu me, bhante, saṅgho. Yā sā saṅghena sīmā sammatā samānasaṃvāsā ekuposathā, saṅgho taṃ sīmaṃ samūhanati samānasaṃvāsaṃ ekuposathaṃ. Yassāyasmato khamati etissā sīmāya samānasaṃvāsāya ekuposathāya samugghāto, so tuṇhassa; yassa nakkhamati, so bhāseyya. Samūhatā sā sīmā saṅghena samānasaṃvāsā ekuposathā. Khamati saṅghassa, tasmā tuṇhī, evametaṃ dhārayāmī’’ti.
Footnotes:
Related texts:
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අවිප්‌පවාසසීමානුජානනකථාවණ්‌ණනා • Avippavāsasīmānujānanakathāvaṇṇanā
