| Library / Tipiṭaka / திபிடக • Tipiṭaka / வினயஸங்க³ஹ-அட்ட²கதா² • Vinayasaṅgaha-aṭṭhakathā |
24. ஸீமாவினிச்ச²யகதா²
24. Sīmāvinicchayakathā
156. ஸீமாதி எத்த² (கங்கா²॰ அட்ட²॰ நிதா³னவண்ணனா) ஸீமா நாமேஸா ப³த்³த⁴ஸீமா அப³த்³த⁴ஸீமாதி து³விதா⁴ ஹோதி. தத்த² ஏகாத³ஸ விபத்திஸீமாயோ அதிக்கமித்வா திவித⁴ஸம்பத்தியுத்தா நிமித்தேன நிமித்தங் ப³ந்தி⁴த்வா ஸம்மதா ஸீமா ப³த்³த⁴ஸீமா நாம. அதிகு²த்³த³கா, அதிமஹதீ, க²ண்ட³னிமித்தா, சா²யானிமித்தா, அனிமித்தா, ப³ஹிஸீமே டி²தஸம்மதா, நதி³யா ஸம்மதா, ஸமுத்³தே³ ஸம்மதா, ஜாதஸ்ஸரே ஸம்மதா, ஸீமாய ஸீமங் ஸம்பி⁴ந்த³ந்தேன ஸம்மதா, ஸீமாய ஸீமங் அஜ்ஜொ²த்த²ரந்தேன ஸம்மதாதி இமேஹி ஏகாத³ஸஹி ஆகாரேஹி ஸீமதோ கம்மானி விபஜ்ஜந்தீதி வசனதோ ஏதா விபத்திஸீமாயோ நாம.
156.Sīmāti ettha (kaṅkhā. aṭṭha. nidānavaṇṇanā) sīmā nāmesā baddhasīmā abaddhasīmāti duvidhā hoti. Tattha ekādasa vipattisīmāyo atikkamitvā tividhasampattiyuttā nimittena nimittaṃ bandhitvā sammatā sīmā baddhasīmā nāma. Atikhuddakā, atimahatī, khaṇḍanimittā, chāyānimittā, animittā, bahisīme ṭhitasammatā, nadiyā sammatā, samudde sammatā, jātassare sammatā, sīmāya sīmaṃ sambhindantena sammatā, sīmāya sīmaṃ ajjhottharantena sammatāti imehi ekādasahi ākārehi sīmato kammāni vipajjantīti vacanato etā vipattisīmāyo nāma.
தத்த² அதிகு²த்³த³கா நாம யத்த² ஏகவீஸதி பி⁴க்கூ² நிஸீதி³துங் ந ஸக்கொந்தி. அதிமஹதீ நாம யா கேஸக்³க³மத்தேனபி தியோஜனங் அதிக்கமித்வா ஸம்மதா. க²ண்ட³னிமித்தா நாம அக⁴டிதனிமித்தா வுச்சதி. புரத்தி²மாய தி³ஸாய நிமித்தங் கித்தெத்வா அனுக்கமேன த³க்கி²ணாய தி³ஸாய பச்சி²மாய உத்தராய தி³ஸாய கித்தெத்வா புன புரத்தி²மாய தி³ஸாய புப்³ப³கித்திதங் படிகித்தெத்வா ட²பேதுங் வட்டதி, ஏவங் அக²ண்ட³னிமித்தா ஹோதி. ஸசே பன அனுக்கமேன ஆஹரித்வா உத்தராய தி³ஸாய நிமித்தங் கித்தெத்வா தத்தே²வ ட²பேதி, க²ண்ட³னிமித்தா ஹோதி. அபராபி க²ண்ட³னிமித்தா நாம யா அனிமித்துபக³ங் தசஸாரருக்க²ங் வா கா²ணுகங் வா பங்ஸுபுஞ்ஜங் வா வாலுகபுஞ்ஜங் வா அஞ்ஞதரங் அந்தரா ஏகனிமித்தங் கத்வா ஸம்மதா. சா²யானிமித்தா நாம பப்³ப³தசா²யாதீ³னங் யங் கிஞ்சி சா²யங் நிமித்தங் கத்வா ஸம்மதா. அனிமித்தா நாம ஸப்³பே³ன ஸப்³ப³ங் நிமித்தானி அகித்தெத்வா ஸம்மதா. ப³ஹிஸீமே டி²தஸம்மதா நாம நிமித்தானி கித்தெத்வா நிமித்தானங் ப³ஹி டி²தேன ஸம்மதா. நதி³யா, ஸமுத்³தே³, ஜாதஸ்ஸரே ஸம்மதா நாம ஏதேஸு நதி³ஆதீ³ஸு ஸம்மதா. ஸா ஹி ஏவங் ஸம்மதாபி ‘‘ஸப்³பா³, பி⁴க்க²வே, நதீ³ அஸீமா, ஸப்³போ³ ஸமுத்³தோ³ அஸீமோ, ஸப்³போ³ ஜாதஸ்ஸரோ அஸீமோ’’தி (மஹாவ॰ 147) வசனதோ அஸம்மதாவ ஹோதி. ஸீமாய ஸீமங் ஸம்பி⁴ந்த³ந்தேன ஸம்மதா (மஹாவ॰ அட்ட²॰ 148) நாம அத்தனோ ஸீமாய பரேஸங் ஸீமங் ஸம்பி⁴ந்த³ந்தேன ஸம்மதா. ஸசே ஹி போராணகஸ்ஸ விஹாரஸ்ஸ புரத்தி²மாய தி³ஸாய அம்போ³ சேவ ஜம்பு³ சாதி த்³வே ருக்கா² அஞ்ஞமஞ்ஞங் ஸங்ஸட்ட²விடபா ஹொந்தி, தேஸு அம்ப³ஸ்ஸ பச்சி²மதி³ஸாபா⁴கே³ ஜம்பு³, விஹாரஸீமா ச ஜம்பு³ங் அந்தோகத்வா அம்ப³ங் கித்தெத்வா ப³த்³தா⁴ ஹோதி. அத² பச்சா² தஸ்ஸ விஹாரஸ்ஸ புரத்தி²மாய தி³ஸாய விஹாரே கதே ஸீமங் ப³ந்த⁴ந்தா பி⁴க்கூ² தங் அம்ப³ங் அந்தோகத்வா ஜம்பு³ங் கித்தெத்வா ப³ந்த⁴ந்தி , ஸீமாய ஸீமங் ஸம்பி⁴ன்னா ஹோதி. தஸ்மா ஸசே பட²மதரங் கதஸ்ஸ விஹாரஸ்ஸ ஸீமா அஸம்மதா ஹோதி, ஸீமாய உபசாரோ ட²பேதப்³போ³. ஸசே ஸம்மதா ஹோதி, பச்சி²மகோடியா ஹத்த²மத்தா ஸீமந்தரிகா ட²பேதப்³பா³. குருந்தி³யங் ‘‘வித³த்தி²மத்தம்பி’’, மஹாபச்சரியங் ‘‘சதுரங்கு³லமத்தம்பி வட்டதீ’’தி வுத்தங். ஏகருக்கோ²பி ச த்³வின்னங் ஸீமானங் நிமித்தங் ஹோதி. ஸோ பன வட்³ட⁴ந்தோ ஸீமஸங்கரங் கரோதி, தஸ்மா ந காதப்³போ³. ஸீமாய ஸீமங் அஜ்ஜொ²த்த²ரந்தேன ஸம்மதா நாம அத்தனோ ஸீமாய பரேஸங் ஸீமங் அஜ்ஜொ²த்த²ரந்தேன ஸம்மதா. ஸசே ஹி பரேஸங் ப³த்³த⁴ஸீமங் ஸகலங் வா தஸ்ஸா பதே³ஸங் வா அந்தோகத்வா அத்தனோ ஸீமங் ஸம்மன்னந்தி, ஸீமாய ஸீமங் அஜ்ஜொ²த்த²ரிதா நாம ஹோதி. பி⁴க்கு²னீனங் பன ஸீமங் அஜ்ஜொ²த்த²ரித்வா அந்தோபி பி⁴க்கூ²னங் ஸீமங் ஸம்மன்னிதுங் வட்டதி. பி⁴க்கு²னீனம்பி பி⁴க்கூ²னங் ஸீமாய ஏஸேவ நயோ. ந ஹி தே அஞ்ஞமஞ்ஞஸ்ஸ கம்மே க³ணபூரகா ஹொந்தி, ந கம்மவாசங் வக்³க³ங் கரொந்தி. இதி இமா ஏகாத³ஸ விபத்திஸீமாயோ அதிக்கமித்வா ஸீமா ஸம்மன்னிதப்³பா³.
Tattha atikhuddakā nāma yattha ekavīsati bhikkhū nisīdituṃ na sakkonti. Atimahatī nāma yā kesaggamattenapi tiyojanaṃ atikkamitvā sammatā. Khaṇḍanimittā nāma aghaṭitanimittā vuccati. Puratthimāya disāya nimittaṃ kittetvā anukkamena dakkhiṇāya disāya pacchimāya uttarāya disāya kittetvā puna puratthimāya disāya pubbakittitaṃ paṭikittetvā ṭhapetuṃ vaṭṭati, evaṃ akhaṇḍanimittā hoti. Sace pana anukkamena āharitvā uttarāya disāya nimittaṃ kittetvā tattheva ṭhapeti, khaṇḍanimittā hoti. Aparāpi khaṇḍanimittā nāma yā animittupagaṃ tacasārarukkhaṃ vā khāṇukaṃ vā paṃsupuñjaṃ vā vālukapuñjaṃ vā aññataraṃ antarā ekanimittaṃ katvā sammatā. Chāyānimittā nāma pabbatachāyādīnaṃ yaṃ kiñci chāyaṃ nimittaṃ katvā sammatā. Animittā nāma sabbena sabbaṃ nimittāni akittetvā sammatā. Bahisīme ṭhitasammatā nāma nimittāni kittetvā nimittānaṃ bahi ṭhitena sammatā. Nadiyā, samudde, jātassare sammatā nāma etesu nadiādīsu sammatā. Sā hi evaṃ sammatāpi ‘‘sabbā, bhikkhave, nadī asīmā, sabbo samuddo asīmo, sabbo jātassaro asīmo’’ti (mahāva. 147) vacanato asammatāva hoti. Sīmāya sīmaṃ sambhindantena sammatā (mahāva. aṭṭha. 148) nāma attano sīmāya paresaṃ sīmaṃ sambhindantena sammatā. Sace hi porāṇakassa vihārassa puratthimāya disāya ambo ceva jambu cāti dve rukkhā aññamaññaṃ saṃsaṭṭhaviṭapā honti, tesu ambassa pacchimadisābhāge jambu, vihārasīmā ca jambuṃ antokatvā ambaṃ kittetvā baddhā hoti. Atha pacchā tassa vihārassa puratthimāya disāya vihāre kate sīmaṃ bandhantā bhikkhū taṃ ambaṃ antokatvā jambuṃ kittetvā bandhanti , sīmāya sīmaṃ sambhinnā hoti. Tasmā sace paṭhamataraṃ katassa vihārassa sīmā asammatā hoti, sīmāya upacāro ṭhapetabbo. Sace sammatā hoti, pacchimakoṭiyā hatthamattā sīmantarikā ṭhapetabbā. Kurundiyaṃ ‘‘vidatthimattampi’’, mahāpaccariyaṃ ‘‘caturaṅgulamattampi vaṭṭatī’’ti vuttaṃ. Ekarukkhopi ca dvinnaṃ sīmānaṃ nimittaṃ hoti. So pana vaḍḍhanto sīmasaṅkaraṃ karoti, tasmā na kātabbo. Sīmāya sīmaṃ ajjhottharantena sammatā nāma attano sīmāya paresaṃ sīmaṃ ajjhottharantena sammatā. Sace hi paresaṃ baddhasīmaṃ sakalaṃ vā tassā padesaṃ vā antokatvā attano sīmaṃ sammannanti, sīmāya sīmaṃ ajjhottharitā nāma hoti. Bhikkhunīnaṃ pana sīmaṃ ajjhottharitvā antopi bhikkhūnaṃ sīmaṃ sammannituṃ vaṭṭati. Bhikkhunīnampi bhikkhūnaṃ sīmāya eseva nayo. Na hi te aññamaññassa kamme gaṇapūrakā honti, na kammavācaṃ vaggaṃ karonti. Iti imā ekādasa vipattisīmāyo atikkamitvā sīmā sammannitabbā.
157. திவித⁴ஸம்பத்தியுத்தா நாம நிமித்தஸம்பத்தியா பரிஸஸம்பத்தியா கம்மவாசாஸம்பத்தியா ச யுத்தா. தத்த² நிமித்தஸம்பத்தியா யுத்தா நாம பப்³ப³தனிமித்தங் பாஸாணனிமித்தங் வனநிமித்தங் ருக்க²னிமித்தங் மக்³க³னிமித்தங் வம்மிகனிமித்தங் நதீ³னிமித்தங் உத³கனிமித்தந்தி ஏவங் வுத்தேஸு அட்ட²ஸு நிமித்தேஸு தஸ்மிங் தஸ்மிங் தி³ஸாபா⁴கே³ யதா²லத்³தா⁴னி நிமித்துபகா³னி நிமித்தானி ‘‘புரத்தி²மாய தி³ஸாய கிங் நிமித்தங். பப்³ப³தோ, ப⁴ந்தே. ஏஸோ பப்³ப³தோ நிமித்த’’ந்திஆதி³னா நயேன ஸம்மா கித்தெத்வா ஸம்மதா.
157.Tividhasampattiyuttā nāma nimittasampattiyā parisasampattiyā kammavācāsampattiyā ca yuttā. Tattha nimittasampattiyā yuttā nāma pabbatanimittaṃ pāsāṇanimittaṃ vananimittaṃ rukkhanimittaṃ magganimittaṃ vammikanimittaṃ nadīnimittaṃ udakanimittanti evaṃ vuttesu aṭṭhasu nimittesu tasmiṃ tasmiṃ disābhāge yathāladdhāni nimittupagāni nimittāni ‘‘puratthimāya disāya kiṃ nimittaṃ. Pabbato, bhante. Eso pabbato nimitta’’ntiādinā nayena sammā kittetvā sammatā.
தத்ராயங் வினிச்ச²யோ (மஹாவ॰ அட்ட²॰ 138) – வினயத⁴ரேன புச்சி²தப்³ப³ங் ‘‘புரத்தி²மாய தி³ஸாய கிங் நிமித்த’’ந்தி? ‘‘பப்³ப³தோ, ப⁴ந்தே’’தி. இத³ங் பன உபஸம்பன்னோ வா ஆசிக்க²து அனுபஸம்பன்னோ வா, வட்டதியேவ. புன வினயத⁴ரேன ‘‘ஏஸோ பப்³ப³தோ நிமித்த’’ந்தி ஏவங் நிமித்தங் கித்தேதப்³ப³ங், ‘‘ஏதங் பப்³ப³தங் நிமித்தங் கரோம, கரிஸ்ஸாம, நிமித்தங் கதோ, நிமித்தங் ஹோது, ஹோதி, ப⁴விஸ்ஸதீ’’தி ஏவங் பன கித்தேதுங் ந வட்டதி. பாஸாணாதீ³ஸுபி ஏஸேவ நயோ. புரத்தி²மாய தி³ஸாய, புரத்தி²மாய அனுதி³ஸாய, த³க்கி²ணாய தி³ஸாய, த³க்கி²ணாய அனுதி³ஸாய, பச்சி²மாய தி³ஸாய, பச்சி²மாய அனுதி³ஸாய, உத்தராய தி³ஸாய, உத்தராய அனுதி³ஸாய கிங் நிமித்தங்? உத³கங், ப⁴ந்தே. ஏதங் உத³கங் நிமித்தந்தி கித்தேதப்³ப³ங். எத்த² பன அட்ட²பெத்வா புன ‘‘புரத்தி²மாய தி³ஸாய கிங் நிமித்தங்? பப்³ப³தோ, ப⁴ந்தே. ஏஸோ பப்³ப³தோ நிமித்த’’ந்தி ஏவங் பட²மங் கித்திதனிமித்தங் கித்தெத்வாவ ட²பேதப்³ப³ங். ஏவஞ்ஹி நிமித்தேன நிமித்தங் க⁴டிதங் ஹோதி, நிமித்தானி ஸகிங் கித்திதானிபி கித்திதானேவ ஹொந்தி. அந்த⁴கட்ட²கதா²யங் பன ‘‘திக்க²த்துங் ஸீமமண்ட³லங் ப³ந்த⁴ந்தேன நிமித்தங் கித்தேதப்³ப³’’ந்தி வுத்தங்.
Tatrāyaṃ vinicchayo (mahāva. aṭṭha. 138) – vinayadharena pucchitabbaṃ ‘‘puratthimāya disāya kiṃ nimitta’’nti? ‘‘Pabbato, bhante’’ti. Idaṃ pana upasampanno vā ācikkhatu anupasampanno vā, vaṭṭatiyeva. Puna vinayadharena ‘‘eso pabbato nimitta’’nti evaṃ nimittaṃ kittetabbaṃ, ‘‘etaṃ pabbataṃ nimittaṃ karoma, karissāma, nimittaṃ kato, nimittaṃ hotu, hoti, bhavissatī’’ti evaṃ pana kittetuṃ na vaṭṭati. Pāsāṇādīsupi eseva nayo. Puratthimāya disāya, puratthimāya anudisāya, dakkhiṇāya disāya, dakkhiṇāya anudisāya, pacchimāya disāya, pacchimāya anudisāya, uttarāya disāya, uttarāya anudisāya kiṃ nimittaṃ? Udakaṃ, bhante. Etaṃ udakaṃ nimittanti kittetabbaṃ. Ettha pana aṭṭhapetvā puna ‘‘puratthimāya disāya kiṃ nimittaṃ? Pabbato, bhante. Eso pabbato nimitta’’nti evaṃ paṭhamaṃ kittitanimittaṃ kittetvāva ṭhapetabbaṃ. Evañhi nimittena nimittaṃ ghaṭitaṃ hoti, nimittāni sakiṃ kittitānipi kittitāneva honti. Andhakaṭṭhakathāyaṃ pana ‘‘tikkhattuṃ sīmamaṇḍalaṃ bandhantena nimittaṃ kittetabba’’nti vuttaṃ.
158. இதா³னி நிமித்துபகா³னி பப்³ப³தாதீ³னி வேதி³தப்³பா³னி – திவிதோ⁴ பப்³ப³தோ ஸுத்³த⁴பங்ஸுபப்³ப³தோ ஸுத்³த⁴பாஸாணபப்³ப³தோ உப⁴யமிஸ்ஸகோதி. ஸோ திவிதோ⁴பி வட்டதி, வாலிகராஸி பன ந வட்டதி. இதரோபி ஹத்தி²ப்பமாணதோ ஓமகதரோ ந வட்டதி, ஹத்தி²ப்பமாணதோ பட்டா²ய ஸினேருப்பமாணோபி வட்டதி. ஸசே சதூஸு தி³ஸாஸு சத்தாரோ தீஸு வா தயோ பப்³ப³தா ஹொந்தி , சதூஹி வா தீஹி வா பப்³ப³தனிமித்தேஹி ஸம்மன்னிதும்பி வட்டதி, த்³வீஹி பன நிமித்தேஹி ஏகேன வா ஸம்மன்னிதுங் ந வட்டதி. இதோ பரேஸு பாஸாணனிமித்தாதீ³ஸுபி ஏஸேவ நயோ. தஸ்மா பப்³ப³தனிமித்தங் கரொந்தேன புச்சி²தப்³ப³ங் ‘‘ஏகாப³த்³தோ⁴, ந ஏகாப³த்³தோ⁴’’தி. ஸசே ஏகாப³த்³தோ⁴ ஹோதி, ந காதப்³போ³. தஞ்ஹி சதூஸு வா அட்ட²ஸு வா தி³ஸாஸு கித்தெந்தேனபி ஏகமேவ நிமித்தங் கித்திதங் ஹோதி, தஸ்மா யோ ஏவங் சக்கஸண்டா²னேன விஹாரம்பி பரிக்கி²பித்வா டி²தோ பப்³ப³தோ, தங் ஏகதி³ஸாய கித்தெத்வா அஞ்ஞாஸு தி³ஸாஸு தங் ப³ஹித்³தா⁴ கத்வா அந்தோ அஞ்ஞானி நிமித்தானி கித்தேதப்³பா³னி. ஸசே பப்³ப³தஸ்ஸ ததியபா⁴க³ங் வா உபட்³ட⁴ங் வா அந்தோஸீமாய கத்துகாமா ஹொந்தி, பப்³ப³தங் அகித்தெத்வா யத்தகங் பதே³ஸங் அந்தோ கத்துகாமா, தஸ்ஸ பரதோ தஸ்மிங்யேவ பப்³ப³தே ஜாதருக்க²வம்மிகாதீ³ஸு அஞ்ஞதரங் நிமித்தங் கித்தேதப்³ப³ங். ஸசே ஏகயோஜனத்³வியோஜனப்பமாணங் ஸப்³ப³ங் பப்³ப³தங் அந்தோ கத்துகாமா ஹொந்தி, பப்³ப³தஸ்ஸ பரதோ பூ⁴மியங் ஜாதருக்க²வம்மிகாதீ³னி நிமித்தானி கித்தேதப்³பா³னி.
158. Idāni nimittupagāni pabbatādīni veditabbāni – tividho pabbato suddhapaṃsupabbato suddhapāsāṇapabbato ubhayamissakoti. So tividhopi vaṭṭati, vālikarāsi pana na vaṭṭati. Itaropi hatthippamāṇato omakataro na vaṭṭati, hatthippamāṇato paṭṭhāya sineruppamāṇopi vaṭṭati. Sace catūsu disāsu cattāro tīsu vā tayo pabbatā honti , catūhi vā tīhi vā pabbatanimittehi sammannitumpi vaṭṭati, dvīhi pana nimittehi ekena vā sammannituṃ na vaṭṭati. Ito paresu pāsāṇanimittādīsupi eseva nayo. Tasmā pabbatanimittaṃ karontena pucchitabbaṃ ‘‘ekābaddho, na ekābaddho’’ti. Sace ekābaddho hoti, na kātabbo. Tañhi catūsu vā aṭṭhasu vā disāsu kittentenapi ekameva nimittaṃ kittitaṃ hoti, tasmā yo evaṃ cakkasaṇṭhānena vihārampi parikkhipitvā ṭhito pabbato, taṃ ekadisāya kittetvā aññāsu disāsu taṃ bahiddhā katvā anto aññāni nimittāni kittetabbāni. Sace pabbatassa tatiyabhāgaṃ vā upaḍḍhaṃ vā antosīmāya kattukāmā honti, pabbataṃ akittetvā yattakaṃ padesaṃ anto kattukāmā, tassa parato tasmiṃyeva pabbate jātarukkhavammikādīsu aññataraṃ nimittaṃ kittetabbaṃ. Sace ekayojanadviyojanappamāṇaṃ sabbaṃ pabbataṃ anto kattukāmā honti, pabbatassa parato bhūmiyaṃ jātarukkhavammikādīni nimittāni kittetabbāni.
பாஸாணனிமித்தே அயகு³ளோபி பாஸாணஸங்க்²யமேவ க³ச்ச²தி, தஸ்மா யோ கோசி பாஸாணோ வட்டதி. பமாணதோ பன ஹத்தி²ப்பமாணோ பப்³ப³தஸங்க்²யங் க³தோ, தஸ்மா ஸோ ந வட்டதி, மஹாகோ³ணமஹாமஹிங்ஸப்பமாணோ பன வட்டதி. ஹெட்டி²மபரிச்சே²தே³ன த்³வத்திங்ஸபலகு³ளபிண்ட³ப்பமாணோ வட்டதி, ததோ கு²த்³த³கதரோ இட்ட²கா வா மஹந்தீபி ந வட்டதி, அனிமித்துபக³பாஸாணானங் ராஸிபி ந வட்டதி, பகே³வ பங்ஸுவாலுகராஸி. பூ⁴மிஸமோ க²லமண்ட³லஸதி³ஸோ பிட்டி²பாஸாணோ வா பூ⁴மிதோ கா²ணுகோ விய உட்டி²தபாஸாணோ வா ஹோதி, ஸோபி பமாணுபகோ³ சே, வட்டதி. பிட்டி²பாஸாணோ அதிமஹந்தோபி பாஸாணஸங்க்²யமேவ க³ச்ச²தி, தஸ்மா ஸசே மஹதோ பிட்டி²பாஸாணஸ்ஸ ஏகப்பதே³ஸங் அந்தோஸீமாய கத்துகாமா ஹொந்தி, தங் அகித்தெத்வா தஸ்ஸுபரி அஞ்ஞோ பாஸாணோ கித்தேதப்³போ³. ஸசே பிட்டி²பாஸாணுபரி விஹாரங் கரொந்தி, விஹாரமஜ்ஜே²ன வா பிட்டி²பாஸாணோ வினிவிஜ்ஜி²த்வா க³ச்ச²தி, ஏவரூபோ பிட்டி²பாஸாணோ ந வட்டதி. ஸசே ஹி தங் கித்தெந்தி, நிமித்தஸ்ஸ உபரி விஹாரோ ஹோதி, நிமித்தஞ்ச நாம ப³ஹிஸீமாய ஹோதி, விஹாரோபி ப³ஹிஸீமாயங் ஆபஜ்ஜதி. விஹாரங் பரிக்கி²பித்வா டி²தபிட்டி²பாஸாணோ ஏகத்த² கித்தெத்வா அஞ்ஞத்த² ந கித்தேதப்³போ³.
Pāsāṇanimitte ayaguḷopi pāsāṇasaṅkhyameva gacchati, tasmā yo koci pāsāṇo vaṭṭati. Pamāṇato pana hatthippamāṇo pabbatasaṅkhyaṃ gato, tasmā so na vaṭṭati, mahāgoṇamahāmahiṃsappamāṇo pana vaṭṭati. Heṭṭhimaparicchedena dvattiṃsapalaguḷapiṇḍappamāṇo vaṭṭati, tato khuddakataro iṭṭhakā vā mahantīpi na vaṭṭati, animittupagapāsāṇānaṃ rāsipi na vaṭṭati, pageva paṃsuvālukarāsi. Bhūmisamo khalamaṇḍalasadiso piṭṭhipāsāṇo vā bhūmito khāṇuko viya uṭṭhitapāsāṇo vā hoti, sopi pamāṇupago ce, vaṭṭati. Piṭṭhipāsāṇo atimahantopi pāsāṇasaṅkhyameva gacchati, tasmā sace mahato piṭṭhipāsāṇassa ekappadesaṃ antosīmāya kattukāmā honti, taṃ akittetvā tassupari añño pāsāṇo kittetabbo. Sace piṭṭhipāsāṇupari vihāraṃ karonti, vihāramajjhena vā piṭṭhipāsāṇo vinivijjhitvā gacchati, evarūpo piṭṭhipāsāṇo na vaṭṭati. Sace hi taṃ kittenti, nimittassa upari vihāro hoti, nimittañca nāma bahisīmāya hoti, vihāropi bahisīmāyaṃ āpajjati. Vihāraṃ parikkhipitvā ṭhitapiṭṭhipāsāṇo ekattha kittetvā aññattha na kittetabbo.
வனநிமித்தே திணவனங் வா தசஸாரதாலனாளிகேராதி³ருக்க²வனங் வா ந வட்டதி, அந்தோஸாரானங் பன ஸாகஸாலாதீ³னங் அந்தோஸாரமிஸ்ஸகானங் வா ருக்கா²னங் வனங் வட்டதி, தஞ்ச கோ² ஹெட்டி²மபரிச்சே²தே³ன சதுபஞ்சருக்க²மத்தம்பி, ததோ ஓரங் ந வட்டதி, பரங் யோஜனஸதிகம்பி வட்டதி. ஸசே பன வனமஜ்ஜே² விஹாரங் கரொந்தி, வனங் ந கித்தேதப்³ப³ங். ஏகதே³ஸங் அந்தோஸீமாய காதுகாமேஹிபி வனங் அகித்தெத்வா தத்த² ருக்க²பாஸாணாத³யோ கித்தேதப்³பா³. விஹாரங் பரிக்கி²பித்வா டி²தவனங் ஏகத்த² கித்தெத்வா அஞ்ஞத்த² ந கித்தேதப்³ப³ங்.
Vananimitte tiṇavanaṃ vā tacasāratālanāḷikerādirukkhavanaṃ vā na vaṭṭati, antosārānaṃ pana sākasālādīnaṃ antosāramissakānaṃ vā rukkhānaṃ vanaṃ vaṭṭati, tañca kho heṭṭhimaparicchedena catupañcarukkhamattampi, tato oraṃ na vaṭṭati, paraṃ yojanasatikampi vaṭṭati. Sace pana vanamajjhe vihāraṃ karonti, vanaṃ na kittetabbaṃ. Ekadesaṃ antosīmāya kātukāmehipi vanaṃ akittetvā tattha rukkhapāsāṇādayo kittetabbā. Vihāraṃ parikkhipitvā ṭhitavanaṃ ekattha kittetvā aññattha na kittetabbaṃ.
ருக்க²னிமித்தே தசஸாரோ தாலனாளிகேராதி³ருக்கோ² ந வட்டதி, அந்தோஸாரோ ஜீவமானகோ அந்தமஸோ உப்³பே³த⁴தோ அட்ட²ங்கு³லோ பரிணாஹதோ ஸூசித³ண்ட³கப்பமாணோபி வட்டதி. ததோ ஓரங் ந வட்டதி, பரங் த்³வாத³ஸயோஜனோ ஸுப்பதிட்டி²தனிக்³ரோதோ⁴பி வட்டதி. வங்ஸனளகஸராவாதீ³ஸு பீ³ஜங் ரோபெத்வா வட்³டா⁴பிதோ பமாணுபகோ³பி ந வட்டதி, ததோ அபனெத்வா பன தங் க²ணம்பி பூ⁴மியங் ரோபெத்வா கொட்ட²கங் கத்வா உத³கங் ஆஸிஞ்சித்வா கித்தேதுங் வட்டதி. நவமூலஸாகா²னிக்³க³மனங் அகாரணங், க²ந்த⁴ங் சி²ந்தி³த்வா ரோபிதே பன ஏதங் யுஜ்ஜதி. கித்தெந்தேன ச ‘‘ருக்கோ²’’திபி வத்துங் வட்டதி ‘‘ஸாகருக்கோ²’’திபி ‘‘ஸாலருக்கோ²’’திபி. ஏகாப³த்³த⁴ங் பன ஸுப்பதிட்டி²தனிக்³ரோத⁴ஸதி³ஸங் ஏகத்த² கித்தெத்வா அஞ்ஞத்த² கித்தேதுங் ந வட்டதி.
Rukkhanimitte tacasāro tālanāḷikerādirukkho na vaṭṭati, antosāro jīvamānako antamaso ubbedhato aṭṭhaṅgulo pariṇāhato sūcidaṇḍakappamāṇopi vaṭṭati. Tato oraṃ na vaṭṭati, paraṃ dvādasayojano suppatiṭṭhitanigrodhopi vaṭṭati. Vaṃsanaḷakasarāvādīsu bījaṃ ropetvā vaḍḍhāpito pamāṇupagopi na vaṭṭati, tato apanetvā pana taṃ khaṇampi bhūmiyaṃ ropetvā koṭṭhakaṃ katvā udakaṃ āsiñcitvā kittetuṃ vaṭṭati. Navamūlasākhāniggamanaṃ akāraṇaṃ, khandhaṃ chinditvā ropite pana etaṃ yujjati. Kittentena ca ‘‘rukkho’’tipi vattuṃ vaṭṭati ‘‘sākarukkho’’tipi ‘‘sālarukkho’’tipi. Ekābaddhaṃ pana suppatiṭṭhitanigrodhasadisaṃ ekattha kittetvā aññattha kittetuṃ na vaṭṭati.
மக்³க³னிமித்தே அரஞ்ஞகெ²த்தனதீ³தளாகமக்³கா³த³யோ ந வட்டந்தி, ஜங்க⁴மக்³கோ³ வா ஸகடமக்³கோ³ வா வட்டதி. யோ நிப்³பி³ஜ்ஜி²த்வா த்³வே தீணி கா³மந்தரானி க³ச்ச²தி, யோ பன ஜங்க⁴மக்³க³ஸகடமக்³க³தோ ஓக்கமித்வா புன ஸகடமக்³க³மேவ ஓதரதி, யே வா ஜங்க⁴மக்³க³ஸகடமக்³கா³ அவளஞ்ஜா, தே ந வட்டந்தி, ஜங்க⁴ஸத்த²ஸகடஸத்தே²ஹி வளஞ்ஜியமானாயேவ வட்டந்தி. ஸசே த்³வே மக்³கா³ நிக்க²மித்வா பச்சா² ஸகடது⁴ரமிவ ஏகீப⁴வந்தி, த்³வேதா⁴ பி⁴ன்னட்டா²னே வா ஸம்ப³ந்த⁴ட்டா²னே வா ஸகிங் கித்தெத்வா புன ந கித்தேதப்³பா³. ஏகாப³த்³த⁴னிமித்தஞ்ஹேதங் ஹோதி. ஸசே விஹாரங் பரிக்கி²பித்வா சத்தாரோ மக்³கா³ சதூஸு தி³ஸாஸு க³ச்ச²ந்தி, மஜ்ஜே² ஏகங் கித்தெத்வா அபரங் கித்தேதுங் ந வட்டதி. ஏகாப³த்³த⁴னிமித்தஞ்ஹேதங். கோணங் நிப்³பி³ஜ்ஜி²த்வா க³தங் பன பரபா⁴கே³ கித்தேதுங் வட்டதி. விஹாரமஜ்ஜே²ன நிப்³பி³ஜ்ஜி²த்வா க³தமக்³கோ³ பன ந கித்தேதப்³போ³, கித்திதே நிமித்தஸ்ஸ உபரி விஹாரோ ஹோதி. ஸசே ஸகடமக்³க³ஸ்ஸ அந்திமசக்கமக்³க³ங் நிமித்தங் கரொந்தி, மக்³கோ³ ப³ஹிஸீமாய ஹோதி, ஸசே பா³ஹிரசக்கமக்³க³ங் நிமித்தங் கரொந்தி, பா³ஹிரசக்கமக்³கோ³ ப³ஹிஸீமாய ஹோதி , ஸேஸங் அந்தோஸீமங் ப⁴ஜதி. மக்³க³ங் கித்தெந்தேன ‘‘மக்³கோ³ பந்தோ² பதோ² பஜ்ஜோ’’திஆதீ³ஸு த³ஸஸு யேன கேனசி நாமேன ச கித்தேதுங் வட்டதி, பரிகா²ஸண்டா²னேன விஹாரங் பரிக்கி²பித்வா க³தமக்³கோ³ ஏகத்த² கித்தெத்வா அஞ்ஞத்த² கித்தேதுங் ந வட்டதி.
Magganimitte araññakhettanadītaḷākamaggādayo na vaṭṭanti, jaṅghamaggo vā sakaṭamaggo vā vaṭṭati. Yo nibbijjhitvā dve tīṇi gāmantarāni gacchati, yo pana jaṅghamaggasakaṭamaggato okkamitvā puna sakaṭamaggameva otarati, ye vā jaṅghamaggasakaṭamaggā avaḷañjā, te na vaṭṭanti, jaṅghasatthasakaṭasatthehi vaḷañjiyamānāyeva vaṭṭanti. Sace dve maggā nikkhamitvā pacchā sakaṭadhuramiva ekībhavanti, dvedhā bhinnaṭṭhāne vā sambandhaṭṭhāne vā sakiṃ kittetvā puna na kittetabbā. Ekābaddhanimittañhetaṃ hoti. Sace vihāraṃ parikkhipitvā cattāro maggā catūsu disāsu gacchanti, majjhe ekaṃ kittetvā aparaṃ kittetuṃ na vaṭṭati. Ekābaddhanimittañhetaṃ. Koṇaṃ nibbijjhitvā gataṃ pana parabhāge kittetuṃ vaṭṭati. Vihāramajjhena nibbijjhitvā gatamaggo pana na kittetabbo, kittite nimittassa upari vihāro hoti. Sace sakaṭamaggassa antimacakkamaggaṃ nimittaṃ karonti, maggo bahisīmāya hoti, sace bāhiracakkamaggaṃ nimittaṃ karonti, bāhiracakkamaggo bahisīmāya hoti , sesaṃ antosīmaṃ bhajati. Maggaṃ kittentena ‘‘maggo pantho patho pajjo’’tiādīsu dasasu yena kenaci nāmena ca kittetuṃ vaṭṭati, parikhāsaṇṭhānena vihāraṃ parikkhipitvā gatamaggo ekattha kittetvā aññattha kittetuṃ na vaṭṭati.
வம்மிகனிமித்தே ஹெட்டி²மபரிச்சே²தே³ன தங் தி³வஸங் ஜாதோ அட்ட²ங்கு³லுப்³பே³தோ⁴ கோ³விஸாணப்பமாணோபி வம்மிகோ வட்டதி, ததோ ஓரங் ந வட்டதி. பரங் ஹிமவந்தபப்³ப³தஸதி³ஸோபி வட்டதி, விஹாரங் பரிக்கி²பித்வா டி²தங் பன ஏகாப³த்³த⁴ங் ஏகத்த² கித்தெத்வா அஞ்ஞத்த² கித்தேதுங் ந வட்டதி.
Vammikanimitte heṭṭhimaparicchedena taṃ divasaṃ jāto aṭṭhaṅgulubbedho govisāṇappamāṇopi vammiko vaṭṭati, tato oraṃ na vaṭṭati. Paraṃ himavantapabbatasadisopi vaṭṭati, vihāraṃ parikkhipitvā ṭhitaṃ pana ekābaddhaṃ ekattha kittetvā aññattha kittetuṃ na vaṭṭati.
நதீ³னிமித்தே யஸ்ஸா த⁴ம்மிகானங் ராஜூனங் காலே அன்வட்³ட⁴மாஸங் அனுத³ஸாஹங் அனுபஞ்சாஹந்தி ஏவங் தே³வே வஸ்ஸந்தே வலாஹகேஸு விக³தமத்தேஸு ஸோதங் பச்சி²ஜ்ஜதி, அயங் நதீ³ஸங்க்²யங் ந க³ச்ச²தி. யஸ்ஸா பன ஈதி³ஸே ஸுவுட்டி²காலே வஸ்ஸானஸ்ஸ சாதுமாஸே ஸோதங் ந பச்சி²ஜ்ஜதி, யத்த² தித்தே²ன வா அதித்தே²ன வா ஸிக்கா²கரணீயே ஆக³தலக்க²ணேன திமண்ட³லங் படிச்சா²தெ³த்வா அந்தரவாஸகங் அனுக்கி²பித்வா உத்தரந்தியா பி⁴க்கு²னியா ஏகங்கு³லத்³வங்கு³லமத்தம்பி அந்தரவாஸகோ தேமியதி, அயங் நதீ³ ஸீமங் ப³ந்த⁴ந்தானங் நிமித்தங் ஹோதி. பி⁴க்கு²னியா நதீ³பாரக³மனேபி உபோஸதா²தி³ஸங்க⁴கம்மகரணேபி நதீ³பாரஸீமாஸம்மன்னநேபி அயமேவ நதீ³. யா பன மக்³கோ³ விய ஸகடது⁴ரஸண்டா²னேன வா பரிகா²ஸண்டா²னேன வா விஹாரங் பரிக்கி²பித்வா க³தா, தங் ஏகத்த² கித்தெத்வா அஞ்ஞத்த² கித்தேதுங் ந வட்டதி. விஹாரஸ்ஸ சதூஸு தி³ஸாஸு அஞ்ஞமஞ்ஞங் வினிப்³பி³ஜ்ஜி²த்வா க³தே நதீ³சதுக்கேபி ஏஸேவ நயோ. அஸம்மிஸ்ஸா நதி³யோ பன சதஸ்ஸோபி கித்தேதுங் வட்டதி. ஸசே வதிங் கரொந்தோ விய ருக்க²பாதே³ நிக²ணித்வா வல்லிபலாலாதீ³ஹி நதீ³ஸோதங் ருந்த⁴ந்தி, உத³கங் அஜ்ஜொ²த்த²ரித்வா ஆவரணங் பவத்ததியேவ, நிமித்தங் காதுங் வட்டதி. யதா² பன உத³கங் ந பவத்ததி, ஏவங் ஸேதும்ஹி கதே அபவத்தமானா நதீ³னிமித்தங் காதுங் ந வட்டதி, பவத்தனட்டா²னே நதீ³னிமித்தங், அப்பவத்தனட்டா²னே உத³கனிமித்தங் காதுங் வட்டதி. யா பன து³ப்³பு³ட்டி²காலே வா கி³ம்ஹே வா நிருத³கபா⁴வேன ந பவத்ததி, ஸா வட்டதி. மஹானதி³தோ உத³கமாதிகங் நீஹரந்தி, ஸா குன்னதீ³ஸதி³ஸா ஹுத்வா தீணி ஸஸ்ஸானி ஸம்பாதெ³ந்தீ நிச்சங் பவத்ததி, கிஞ்சாபி பவத்ததி, நிமித்தங் காதுங் ந வட்டதி. யா பன மூலே மஹானதி³தோ நீஹதாபி காலந்தரேன தேனேவ நீஹதமக்³கே³ன நதி³ங் பி⁴ந்தி³த்வா ஸயங் க³ச்ச²தி, க³ச்ச²ந்தீ பரதோ ஸுஸுமாராதி³ஸமாகிண்ணா நாவாதீ³ஹி ஸஞ்சரிதப்³பா³ நதீ³ ஹோதி, தங் நிமித்தங் காதுங் வட்டதி.
Nadīnimitte yassā dhammikānaṃ rājūnaṃ kāle anvaḍḍhamāsaṃ anudasāhaṃ anupañcāhanti evaṃ deve vassante valāhakesu vigatamattesu sotaṃ pacchijjati, ayaṃ nadīsaṅkhyaṃ na gacchati. Yassā pana īdise suvuṭṭhikāle vassānassa cātumāse sotaṃ na pacchijjati, yattha titthena vā atitthena vā sikkhākaraṇīye āgatalakkhaṇena timaṇḍalaṃ paṭicchādetvā antaravāsakaṃ anukkhipitvā uttarantiyā bhikkhuniyā ekaṅguladvaṅgulamattampi antaravāsako temiyati, ayaṃ nadī sīmaṃ bandhantānaṃ nimittaṃ hoti. Bhikkhuniyā nadīpāragamanepi uposathādisaṅghakammakaraṇepi nadīpārasīmāsammannanepi ayameva nadī. Yā pana maggo viya sakaṭadhurasaṇṭhānena vā parikhāsaṇṭhānena vā vihāraṃ parikkhipitvā gatā, taṃ ekattha kittetvā aññattha kittetuṃ na vaṭṭati. Vihārassa catūsu disāsu aññamaññaṃ vinibbijjhitvā gate nadīcatukkepi eseva nayo. Asammissā nadiyo pana catassopi kittetuṃ vaṭṭati. Sace vatiṃ karonto viya rukkhapāde nikhaṇitvā vallipalālādīhi nadīsotaṃ rundhanti, udakaṃ ajjhottharitvā āvaraṇaṃ pavattatiyeva, nimittaṃ kātuṃ vaṭṭati. Yathā pana udakaṃ na pavattati, evaṃ setumhi kate apavattamānā nadīnimittaṃ kātuṃ na vaṭṭati, pavattanaṭṭhāne nadīnimittaṃ, appavattanaṭṭhāne udakanimittaṃ kātuṃ vaṭṭati. Yā pana dubbuṭṭhikāle vā gimhe vā nirudakabhāvena na pavattati, sā vaṭṭati. Mahānadito udakamātikaṃ nīharanti, sā kunnadīsadisā hutvā tīṇi sassāni sampādentī niccaṃ pavattati, kiñcāpi pavattati, nimittaṃ kātuṃ na vaṭṭati. Yā pana mūle mahānadito nīhatāpi kālantarena teneva nīhatamaggena nadiṃ bhinditvā sayaṃ gacchati, gacchantī parato susumārādisamākiṇṇā nāvādīhi sañcaritabbā nadī hoti, taṃ nimittaṃ kātuṃ vaṭṭati.
உத³கனிமித்தே நிருத³கட்டா²னே நாவாய வா சாடிஆதீ³ஸு வா உத³கங் பூரெத்வா உத³கனிமித்தங் கித்தேதுங் ந வட்டதி, பூ⁴மிக³தமேவ வட்டதி. தஞ்ச கோ² அப்பவத்தனஉத³கங் ஆவாடபொக்க²ரணீதளஆகஜாதஸ்ஸரலோணிஸமுத்³தா³தீ³ஸு டி²தங், அட்டி²தங் பன ஓக⁴னதீ³உத³கவாஹகமாதிகாதீ³ஸு உத³கங் ந வட்டதி . அந்த⁴கட்ட²கதா²யங் பன ‘‘க³ம்பீ⁴ரேஸு ஆவாடாதீ³ஸு உக்கே²பிமங் உத³கங் நிமித்தங் ந காதப்³ப³’’ந்தி வுத்தங், தங் து³வுத்தங், அத்தனோமதிமத்தமேவ. டி²தங் பன அந்தமஸோ ஸூகரக²தாயபி கா³மதா³ரகானங் கீளனவாபியம்பி தங் க²ணஞ்ஞேவ பத²வியங் ஆவாடங் கத்வா குடேஹி ஆஹரித்வா பூரிதஉத³கம்பி ஸசே யாவ கம்மவாசாபரியோஸானா திட்ட²தி, அப்பங் வா ஹோது ப³ஹுங் வா, வட்டதி. தஸ்மிங் பன டா²னே நிமித்தஸஞ்ஞாகரணத்த²ங் பாஸாணவாலிகாபங்ஸுஆதி³ராஸி வா பாஸாணத்த²ம்போ⁴ வா தா³ருத்த²ம்போ⁴ வா காதப்³போ³. தங் காதுங் காரேதுஞ்ச பி⁴க்கு²ஸ்ஸ வட்டதி, லாப⁴ஸீமாயங் பன ந வட்டதி. ஸமானஸங்வாஸகஸீமா கஸ்ஸசி பீளனங் ந கரோதி, கேவலங் பி⁴க்கூ²னங் வினயகம்மமேவ ஸாதே⁴தி, தஸ்மா எத்த² வட்டதி.
Udakanimitte nirudakaṭṭhāne nāvāya vā cāṭiādīsu vā udakaṃ pūretvā udakanimittaṃ kittetuṃ na vaṭṭati, bhūmigatameva vaṭṭati. Tañca kho appavattanaudakaṃ āvāṭapokkharaṇītaḷaākajātassaraloṇisamuddādīsu ṭhitaṃ, aṭṭhitaṃ pana oghanadīudakavāhakamātikādīsu udakaṃ na vaṭṭati . Andhakaṭṭhakathāyaṃ pana ‘‘gambhīresu āvāṭādīsu ukkhepimaṃ udakaṃ nimittaṃ na kātabba’’nti vuttaṃ, taṃ duvuttaṃ, attanomatimattameva. Ṭhitaṃ pana antamaso sūkarakhatāyapi gāmadārakānaṃ kīḷanavāpiyampi taṃ khaṇaññeva pathaviyaṃ āvāṭaṃ katvā kuṭehi āharitvā pūritaudakampi sace yāva kammavācāpariyosānā tiṭṭhati, appaṃ vā hotu bahuṃ vā, vaṭṭati. Tasmiṃ pana ṭhāne nimittasaññākaraṇatthaṃ pāsāṇavālikāpaṃsuādirāsi vā pāsāṇatthambho vā dārutthambho vā kātabbo. Taṃ kātuṃ kāretuñca bhikkhussa vaṭṭati, lābhasīmāyaṃ pana na vaṭṭati. Samānasaṃvāsakasīmā kassaci pīḷanaṃ na karoti, kevalaṃ bhikkhūnaṃ vinayakammameva sādheti, tasmā ettha vaṭṭati.
இமேஹி ச அட்ட²ஹி நிமித்தேஹி அஸம்மிஸ்ஸேஹிபி அஞ்ஞமஞ்ஞங் ஸம்மிஸ்ஸேஹிபி ஸீமா ஸம்மன்னிதுங் வட்டதியேவ. ஸா ஏவங் ஸம்மன்னித்வா ப³ஜ்ஜ²மானா ஏகேன த்³வீஹி வா நிமித்தேஹி அப³த்³தா⁴ ஹோதி, தீணி பன ஆதி³ங் கத்வா வுத்தப்பகாரானங் நிமித்தானங் ஸதேனபி ப³த்³தா⁴ ஹோதி. ஸா தீஹி ஸிங்கா⁴டகஸண்டா²னா ஹோதி, சதூஹி சதுரஸ்ஸா வா ஸிங்கா⁴டகஅட்³ட⁴சந்த³முதி³ங்கா³தி³ஸண்டா²னா வா, ததோ அதி⁴கேஹி நானாஸண்டா²னா. ஏவங் வுத்தனயேன நிமித்தானி கித்தெத்வா ஸம்மதா ‘‘நிமித்தஸம்பத்தியுத்தா’’தி வேதி³தப்³பா³.
Imehi ca aṭṭhahi nimittehi asammissehipi aññamaññaṃ sammissehipi sīmā sammannituṃ vaṭṭatiyeva. Sā evaṃ sammannitvā bajjhamānā ekena dvīhi vā nimittehi abaddhā hoti, tīṇi pana ādiṃ katvā vuttappakārānaṃ nimittānaṃ satenapi baddhā hoti. Sā tīhi siṅghāṭakasaṇṭhānā hoti, catūhi caturassā vā siṅghāṭakaaḍḍhacandamudiṅgādisaṇṭhānā vā, tato adhikehi nānāsaṇṭhānā. Evaṃ vuttanayena nimittāni kittetvā sammatā ‘‘nimittasampattiyuttā’’ti veditabbā.
159. பரிஸஸம்பத்தியுத்தா நாம ஸப்³ப³ந்திமேன பரிச்சே²தே³ன சதூஹி பி⁴க்கூ²ஹி ஸன்னிபதித்வா யாவதிகா தஸ்மிங் கா³மகெ²த்தே ப³த்³த⁴ஸீமங் வா நதீ³ஸமுத்³த³ஜாதஸ்ஸரே வா அனோக்கமித்வா டி²தா பி⁴க்கூ², தே ஸப்³பே³ ஹத்த²பாஸே வா கத்வா ச²ந்த³ங் வா ஆஹரித்வா ஸம்மதா.
159.Parisasampattiyuttā nāma sabbantimena paricchedena catūhi bhikkhūhi sannipatitvā yāvatikā tasmiṃ gāmakhette baddhasīmaṃ vā nadīsamuddajātassare vā anokkamitvā ṭhitā bhikkhū, te sabbe hatthapāse vā katvā chandaṃ vā āharitvā sammatā.
160. கம்மவாசாஸம்பத்தியுத்தா நாம –
160.Kammavācāsampattiyuttā nāma –
‘‘ஸுணாது மே, ப⁴ந்தே, ஸங்கோ⁴, யாவதா ஸமந்தா நிமித்தா கித்திதா, யதி³ ஸங்க⁴ஸ்ஸ பத்தகல்லங், ஸங்கோ⁴ ஏதேஹி நிமித்தேஹி ஸீமங் ஸம்மன்னெய்ய ஸமானஸங்வாஸங் ஏகூபோஸத²ங், ஏஸா ஞத்தி.
‘‘Suṇātu me, bhante, saṅgho, yāvatā samantā nimittā kittitā, yadi saṅghassa pattakallaṃ, saṅgho etehi nimittehi sīmaṃ sammanneyya samānasaṃvāsaṃ ekūposathaṃ, esā ñatti.
‘‘ஸுணாது மே, ப⁴ந்தே, ஸங்கோ⁴, யாவதா ஸமந்தா நிமித்தா கித்திதா, ஸங்கோ⁴ ஏதேஹி நிமித்தேஹி ஸீமங் ஸம்மன்னதி ஸமானஸங்வாஸங் ஏகூபோஸத²ங், யஸ்ஸாயஸ்மதோ க²மதி ஏதேஹி நிமித்தேஹி ஸீமாய ஸம்முதி ஸமானஸங்வாஸாய ஏகூபோஸதா²ய, ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho, yāvatā samantā nimittā kittitā, saṅgho etehi nimittehi sīmaṃ sammannati samānasaṃvāsaṃ ekūposathaṃ, yassāyasmato khamati etehi nimittehi sīmāya sammuti samānasaṃvāsāya ekūposathāya, so tuṇhassa. Yassa nakkhamati, so bhāseyya.
‘‘ஸம்மதா ஸீமா ஸங்கே⁴ன ஏதேஹி நிமித்தேஹி ஸமானஸங்வாஸா ஏகூபோஸதா², க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி (மஹாவ॰ 139) –
‘‘Sammatā sīmā saṅghena etehi nimittehi samānasaṃvāsā ekūposathā, khamati saṅghassa, tasmā tuṇhī, evametaṃ dhārayāmī’’ti (mahāva. 139) –
ஏவங் வுத்தாய பரிஸுத்³தா⁴ய ஞத்திது³தியகம்மவாசாய ஸம்மதா. கம்மவாசாபரியோஸானே நிமித்தானங் அந்தோ ஸீமா ஹோதி, நிமித்தானி ஸீமதோ ப³ஹி ஹொந்தி.
Evaṃ vuttāya parisuddhāya ñattidutiyakammavācāya sammatā. Kammavācāpariyosāne nimittānaṃ anto sīmā hoti, nimittāni sīmato bahi honti.
161. ஏவங் ப³த்³தா⁴ய ச ஸீமாய திசீவரேன விப்பவாஸஸுக²த்த²ங் த³ள்ஹீகம்மத்த²ஞ்ச அவிப்பவாஸஸம்முதி காதப்³பா³. ஸா பன ஏவங் கத்தப்³பா³ –
161. Evaṃ baddhāya ca sīmāya ticīvarena vippavāsasukhatthaṃ daḷhīkammatthañca avippavāsasammuti kātabbā. Sā pana evaṃ kattabbā –
‘‘ஸுணாது மே, ப⁴ந்தே, ஸங்கோ⁴, யா ஸா ஸங்கே⁴ன ஸீமா ஸம்மதா ஸமானஸங்வாஸா ஏகூபோஸதா², யதி³ ஸங்க⁴ஸ்ஸ பத்தகல்லங், ஸங்கோ⁴ தங் ஸீமங் திசீவரேன அவிப்பவாஸங் ஸம்மன்னெய்ய ட²பெத்வா கா³மஞ்ச கா³மூபசாரஞ்ச, ஏஸா ஞத்தி.
‘‘Suṇātu me, bhante, saṅgho, yā sā saṅghena sīmā sammatā samānasaṃvāsā ekūposathā, yadi saṅghassa pattakallaṃ, saṅgho taṃ sīmaṃ ticīvarena avippavāsaṃ sammanneyya ṭhapetvā gāmañca gāmūpacārañca, esā ñatti.
‘‘ஸுணாது மே, ப⁴ந்தே, ஸங்கோ⁴, யா ஸா ஸங்கே⁴ன ஸீமா ஸம்மதா ஸமானஸங்வாஸா ஏகூபோஸதா², ஸங்கோ⁴ தங் ஸீமங் திசீவரேன அவிப்பவாஸங் ஸம்மன்னதி ட²பெத்வா கா³மஞ்ச கா³மூபசாரஞ்ச, யஸ்ஸாயஸ்மதோ க²மதி ஏதிஸ்ஸா ஸீமாய திசீவரேன அவிப்பவாஸாய ஸம்முதி ட²பெத்வா கா³மஞ்ச கா³மூபசாரஞ்ச, ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho, yā sā saṅghena sīmā sammatā samānasaṃvāsā ekūposathā, saṅgho taṃ sīmaṃ ticīvarena avippavāsaṃ sammannati ṭhapetvā gāmañca gāmūpacārañca, yassāyasmato khamati etissā sīmāya ticīvarena avippavāsāya sammuti ṭhapetvā gāmañca gāmūpacārañca, so tuṇhassa. Yassa nakkhamati, so bhāseyya.
‘‘ஸம்மதா ஸா ஸீமா ஸங்கே⁴ன திசீவரேன அவிப்பவாஸா ட²பெத்வா கா³மஞ்ச கா³மூபசாரஞ்ச, க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி (மஹாவ॰ 143).
‘‘Sammatā sā sīmā saṅghena ticīvarena avippavāsā ṭhapetvā gāmañca gāmūpacārañca, khamati saṅghassa, tasmā tuṇhī, evametaṃ dhārayāmī’’ti (mahāva. 143).
எத்த² (மஹாவ॰ அட்ட²॰ 144) ச நிக³மனக³ரானம்பி கா³மேனேவ ஸங்க³ஹோ வேதி³தப்³போ³. கா³மூபசாரோதி பரிக்கி²த்தஸ்ஸ பரிக்கே²போ, அபரிக்கி²த்தஸ்ஸ பரிக்கே²போகாஸோ. இமேஸு பன கா³மகா³மூபசாரேஸு அதி⁴ட்டி²ததேசீவரிகோ பி⁴க்கு² பரிஹாரங் ந லப⁴தி. அயஞ்ஹி அவிப்பவாஸஸீமா ‘‘ட²பெத்வா கா³மஞ்ச கா³மூபசாரஞ்சா’’தி வுத்தத்தா கா³மஞ்ச கா³மூபசாரஞ்ச ந ஒத்த²ரதி, ஸமானஸங்வாஸகஸீமாவ ஒத்த²ரதி. ஸமானஸங்வாஸகஸீமா செத்த² அத்தனோ த⁴ம்மதாய க³ச்ச²தி, அவிப்பவாஸஸீமா பன யத்த² ஸமானஸங்வாஸகஸீமா, தத்தே²வ க³ச்ச²தி. ந ஹி தஸ்ஸா விஸுங் நிமித்தகித்தனங் அத்தி², தத்த² ஸசே அவிப்பவாஸாய ஸம்முதிகாலே கா³மோ அத்தி², தங் ஸா ந ஒத்த²ரதி . ஸசே பன ஸம்மதாய ஸீமாய பச்சா² கா³மோ நிவிஸதி, ஸோபி ஸீமஸங்க்²யங்யேவ க³ச்ச²தி. யதா² ச பச்சா² நிவிட்டோ², ஏவங் பட²மங் நிவிட்ட²ஸ்ஸ பச்சா² வட்³டி⁴தப்பதே³ஸோபி ஸீமஸங்க்²யமேவ க³ச்ச²தி. ஸசே ஸீமாஸம்முதிகாலே கே³ஹானி கதானி, ‘‘பவிஸிஸ்ஸாமா’’தி ஆலயோபி அத்தி², மனுஸ்ஸா பன அப்பவிட்டா², போராணககா³மங் வா ஸசே கே³ஹமேவ ச²ட்³டெ³த்வா அஞ்ஞத்த² க³தா, அகா³மோயேவ ஏஸ, ஸீமா ஒத்த²ரதி. ஸசே பன ஏகம்பி குலங் பவிட்ட²ங் வா அக³தங் வா அத்தி², கா³மோயேவ, ஸீமா ந ஒத்த²ரதி. அயமெத்த² ஸங்கே²போ.
Ettha (mahāva. aṭṭha. 144) ca nigamanagarānampi gāmeneva saṅgaho veditabbo. Gāmūpacāroti parikkhittassa parikkhepo, aparikkhittassa parikkhepokāso. Imesu pana gāmagāmūpacāresu adhiṭṭhitatecīvariko bhikkhu parihāraṃ na labhati. Ayañhi avippavāsasīmā ‘‘ṭhapetvā gāmañca gāmūpacārañcā’’ti vuttattā gāmañca gāmūpacārañca na ottharati, samānasaṃvāsakasīmāva ottharati. Samānasaṃvāsakasīmā cettha attano dhammatāya gacchati, avippavāsasīmā pana yattha samānasaṃvāsakasīmā, tattheva gacchati. Na hi tassā visuṃ nimittakittanaṃ atthi, tattha sace avippavāsāya sammutikāle gāmo atthi, taṃ sā na ottharati . Sace pana sammatāya sīmāya pacchā gāmo nivisati, sopi sīmasaṅkhyaṃyeva gacchati. Yathā ca pacchā niviṭṭho, evaṃ paṭhamaṃ niviṭṭhassa pacchā vaḍḍhitappadesopi sīmasaṅkhyameva gacchati. Sace sīmāsammutikāle gehāni katāni, ‘‘pavisissāmā’’ti ālayopi atthi, manussā pana appaviṭṭhā, porāṇakagāmaṃ vā sace gehameva chaḍḍetvā aññattha gatā, agāmoyeva esa, sīmā ottharati. Sace pana ekampi kulaṃ paviṭṭhaṃ vā agataṃ vā atthi, gāmoyeva, sīmā na ottharati. Ayamettha saṅkhepo.
162. அயங் பன வித்தா²ரோ (மஹாவ॰ அட்ட²॰ 138) ஸீமங் ப³ந்தி⁴துகாமேன ஹி ஸாமந்தவிஹாரேஸு பி⁴க்கூ² தஸ்ஸ தஸ்ஸ விஹாரஸ்ஸ ஸீமாபரிச்சே²த³ங் புச்சி²த்வா ப³த்³த⁴ஸீமவிஹாரானங் ஸீமாய ஸீமந்தரிகங், அப³த்³த⁴ஸீமவிஹாரானங் ஸீமாய உபசாரங் ட²பெத்வா தி³ஸாசாரிகபி⁴க்கூ²னங் நிஸ்ஸஞ்சாரஸமயே ஸசே ஏகஸ்மிங் கா³மகெ²த்தே ஸீமங் ப³ந்தி⁴துகாமா, யே தத்த² ப³த்³த⁴ஸீமவிஹாரா, தேஸு பி⁴க்கூ²னங் ‘‘மயங் அஜ்ஜ ஸீமங் ப³ந்தி⁴ஸ்ஸாம, தும்ஹே ஸகஸீமாய பரிச்சே²த³தோ மா நிக்க²மித்தா²’’தி பேஸேதப்³ப³ங். யே அப³த்³த⁴ஸீமவிஹாரா, தேஸு பி⁴க்கூ² ஏகஜ்ஜ²ங் ஸன்னிபாதேதப்³பா³, ச²ந்தா³ரஹானங் ச²ந்தோ³ ஆஹராபேதப்³போ³. ‘‘ஸசே அஞ்ஞானிபி கா³மகெ²த்தானி அந்தோகாதுகாமா, தேஸு கா³மேஸு யே பி⁴க்கூ² வஸந்தி, தேஹிபி ஆக³ந்தப்³ப³ங், அனாக³ச்ச²ந்தானங் ச²ந்தோ³ ஆஹரிதப்³போ³’’தி மஹாஸுமத்தே²ரோ ஆஹ. மஹாபது³மத்தே²ரோ பன ‘‘நானாகா³மகெ²த்தானி நாம பாடியேக்கங் ப³த்³த⁴ஸீமஸதி³ஸானி, ந ததோ ச²ந்த³பாரிஸுத்³தி⁴ ஆக³ச்ச²தி, அந்தோனிமித்தக³தேஹி பன பி⁴க்கூ²ஹி ஆக³ந்தப்³ப³’’ந்தி வத்வா புன ஆஹ ‘‘ஸமானஸங்வாஸகஸீமாஸம்மன்னநகாலே ஆக³மனம்பி அனாக³மனம்பி வட்டதி, அவிப்பவாஸஸீமாஸம்மன்னநகாலே பன அந்தோனிமித்தக³தேஹி ஆக³ந்தப்³ப³ங், அனாக³ச்ச²ந்தானங் ச²ந்தோ³ ஆஹரிதப்³போ³’’தி.
162. Ayaṃ pana vitthāro (mahāva. aṭṭha. 138) sīmaṃ bandhitukāmena hi sāmantavihāresu bhikkhū tassa tassa vihārassa sīmāparicchedaṃ pucchitvā baddhasīmavihārānaṃ sīmāya sīmantarikaṃ, abaddhasīmavihārānaṃ sīmāya upacāraṃ ṭhapetvā disācārikabhikkhūnaṃ nissañcārasamaye sace ekasmiṃ gāmakhette sīmaṃ bandhitukāmā, ye tattha baddhasīmavihārā, tesu bhikkhūnaṃ ‘‘mayaṃ ajja sīmaṃ bandhissāma, tumhe sakasīmāya paricchedato mā nikkhamitthā’’ti pesetabbaṃ. Ye abaddhasīmavihārā, tesu bhikkhū ekajjhaṃ sannipātetabbā, chandārahānaṃ chando āharāpetabbo. ‘‘Sace aññānipi gāmakhettāni antokātukāmā, tesu gāmesu ye bhikkhū vasanti, tehipi āgantabbaṃ, anāgacchantānaṃ chando āharitabbo’’ti mahāsumatthero āha. Mahāpadumatthero pana ‘‘nānāgāmakhettāni nāma pāṭiyekkaṃ baddhasīmasadisāni, na tato chandapārisuddhi āgacchati, antonimittagatehi pana bhikkhūhi āgantabba’’nti vatvā puna āha ‘‘samānasaṃvāsakasīmāsammannanakāle āgamanampi anāgamanampi vaṭṭati, avippavāsasīmāsammannanakāle pana antonimittagatehi āgantabbaṃ, anāgacchantānaṃ chando āharitabbo’’ti.
ஏவங் ஸன்னிபதிதேஸு பி⁴க்கூ²ஸு ச²ந்தா³ரஹானங் ச²ந்தே³ ஆஹடே தேஸு தேஸு மக்³கே³ஸு நதீ³தித்த²கா³மத்³வாராதீ³ஸு ச ஆக³ந்துகபி⁴க்கூ²னங் ஸீக⁴ங் ஸீக⁴ங் ஹத்த²பாஸனயனத்த²ஞ்சேவ ப³ஹிஸீமகரணத்த²ஞ்ச ஆராமிகே சேவ ஸமணுத்³தே³ஸே ச ட²பெத்வா பே⁴ரிஸஞ்ஞங் வா ஸங்க²ஸஞ்ஞங் வா கத்வா நிமித்தகித்தனானந்தரங் வுத்தாய ‘‘ஸுணாது மே ப⁴ந்தே ஸங்கோ⁴’’திஆதி³காய கம்மவாசாய ஸீமா ப³ந்தி⁴தப்³பா³. கம்மவாசாபரியோஸானேயேவ நிமித்தானி ப³ஹிகத்வா ஹெட்டா² பத²வீஸந்தா⁴ரகங் உத³கபரியந்தங் கத்வா ஸீமா க³தா ஹோதி.
Evaṃ sannipatitesu bhikkhūsu chandārahānaṃ chande āhaṭe tesu tesu maggesu nadītitthagāmadvārādīsu ca āgantukabhikkhūnaṃ sīghaṃ sīghaṃ hatthapāsanayanatthañceva bahisīmakaraṇatthañca ārāmike ceva samaṇuddese ca ṭhapetvā bherisaññaṃ vā saṅkhasaññaṃ vā katvā nimittakittanānantaraṃ vuttāya ‘‘suṇātu me bhante saṅgho’’tiādikāya kammavācāya sīmā bandhitabbā. Kammavācāpariyosāneyeva nimittāni bahikatvā heṭṭhā pathavīsandhārakaṃ udakapariyantaṃ katvā sīmā gatā hoti.
163. இமங் பன ஸமானஸங்வாஸகஸீமங் ஸம்மன்னந்தேஹி பப்³ப³ஜ்ஜூபஸம்பதா³தீ³னங் ஸங்க⁴கம்மானங் ஸுக²கரணத்த²ங் பட²மங் க²ண்ட³ஸீமா ப³ந்தி⁴தப்³பா³. தங் பன ப³ந்த⁴ந்தேஹி வத்தங் ஜானிதப்³ப³ங். ஸசே ஹி போ³தி⁴சேதியப⁴த்தஸாலாதீ³னி ஸப்³ப³வத்தூ²னி பதிட்டா²பெத்வா கதவிஹாரே ப³ந்த⁴ந்தி, விஹாரமஜ்ஜே² ப³ஹூனங் ஸமோஸரணட்டா²னே அப³ந்தி⁴த்வா விஹாரபச்சந்தே விவித்தோகாஸே ப³ந்தி⁴தப்³பா³. அகதவிஹாரே ப³ந்த⁴ந்தேஹி போ³தி⁴சேதியாதீ³னங் ஸப்³ப³வத்தூ²னங் டா²னங் ஸல்லக்கெ²த்வா யதா² பதிட்டி²தேஸு வத்தூ²ஸு விஹாரபச்சந்தே விவித்தோகாஸே ஹோதி, ஏவங் ப³ந்தி⁴தப்³பா³. ஸா ஹெட்டி²மபரிச்சே²தே³ன ஸசே ஏகவீஸதி பி⁴க்கூ² க³ண்ஹாதி, வட்டதி, ததோ ஓரங் ந வட்டதி, பரங் பி⁴க்கு²ஸஹஸ்ஸங் க³ண்ஹந்தீபி வட்டதி. தங் ப³ந்த⁴ந்தேஹி ஸீமமாளகஸ்ஸ ஸமந்தா நிமித்துபகா³ பாஸாணா ட²பேதப்³பா³, ந க²ண்ட³ஸீமாய டி²தேஹி மஹாஸீமா ப³ந்தி⁴தப்³பா³, ந மஹாஸீமாய டி²தேஹி க²ண்ட³ஸீமா, க²ண்ட³ஸீமாயமேவ பன ட²த்வா க²ண்ட³ஸீமா ப³ந்தி⁴தப்³பா³.
163. Imaṃ pana samānasaṃvāsakasīmaṃ sammannantehi pabbajjūpasampadādīnaṃ saṅghakammānaṃ sukhakaraṇatthaṃ paṭhamaṃ khaṇḍasīmā bandhitabbā. Taṃ pana bandhantehi vattaṃ jānitabbaṃ. Sace hi bodhicetiyabhattasālādīni sabbavatthūni patiṭṭhāpetvā katavihāre bandhanti, vihāramajjhe bahūnaṃ samosaraṇaṭṭhāne abandhitvā vihārapaccante vivittokāse bandhitabbā. Akatavihāre bandhantehi bodhicetiyādīnaṃ sabbavatthūnaṃ ṭhānaṃ sallakkhetvā yathā patiṭṭhitesu vatthūsu vihārapaccante vivittokāse hoti, evaṃ bandhitabbā. Sā heṭṭhimaparicchedena sace ekavīsati bhikkhū gaṇhāti, vaṭṭati, tato oraṃ na vaṭṭati, paraṃ bhikkhusahassaṃ gaṇhantīpi vaṭṭati. Taṃ bandhantehi sīmamāḷakassa samantā nimittupagā pāsāṇā ṭhapetabbā, na khaṇḍasīmāya ṭhitehi mahāsīmā bandhitabbā, na mahāsīmāya ṭhitehi khaṇḍasīmā, khaṇḍasīmāyameva pana ṭhatvā khaṇḍasīmā bandhitabbā.
தத்ராயங் ப³ந்த⁴னவிதி⁴ – ஸமந்தா ‘‘ஏஸோ பாஸாணோ நிமித்த’’ந்தி ஏவங் நிமித்தானி கித்தெத்வா கம்மவாசாய ஸீமா ஸம்மன்னிதப்³பா³. அத² தஸ்ஸா ஏவ த³ள்ஹீகம்மத்த²ங் அவிப்பவாஸகம்மவாசா காதப்³பா³. ஏவஞ்ஹி ‘‘ஸீமங் ஸமூஹனிஸ்ஸாமா’’தி ஆக³தா ஸமூஹனிதுங் ந ஸக்கி²ஸ்ஸந்தி. ஸீமங் ஸம்மன்னித்வா ப³ஹி ஸீமந்தரிகபாஸாணா ட²பேதப்³பா³. ஸீமந்தரிகா பச்சி²மகோடியா ஏகரதனப்பமாணா வட்டதி. ‘‘வித³த்தி²ப்பமாணாபி வட்டதீ’’தி குருந்தி³யங், ‘‘சதுரங்கு³லப்பமாணாபி வட்டதீ’’தி மஹாபச்சரியங் வுத்தங். ஸசே பன விஹாரோ மஹா ஹோதி, த்³வேபி திஸ்ஸோபி ததுத்தரிம்பி க²ண்ட³ஸீமாயோ ப³ந்தி⁴தப்³பா³.
Tatrāyaṃ bandhanavidhi – samantā ‘‘eso pāsāṇo nimitta’’nti evaṃ nimittāni kittetvā kammavācāya sīmā sammannitabbā. Atha tassā eva daḷhīkammatthaṃ avippavāsakammavācā kātabbā. Evañhi ‘‘sīmaṃ samūhanissāmā’’ti āgatā samūhanituṃ na sakkhissanti. Sīmaṃ sammannitvā bahi sīmantarikapāsāṇā ṭhapetabbā. Sīmantarikā pacchimakoṭiyā ekaratanappamāṇā vaṭṭati. ‘‘Vidatthippamāṇāpi vaṭṭatī’’ti kurundiyaṃ, ‘‘caturaṅgulappamāṇāpi vaṭṭatī’’ti mahāpaccariyaṃ vuttaṃ. Sace pana vihāro mahā hoti, dvepi tissopi tatuttarimpi khaṇḍasīmāyo bandhitabbā.
ஏவங் க²ண்ட³ஸீமங் ஸம்மன்னித்வா மஹாஸீமஸம்முதிகாலே க²ண்ட³ஸீமதோ நிக்க²மித்வா மஹாஸீமாயங் ட²த்வா ஸமந்தா அனுபரியாயந்தேஹி ஸீமந்தரிகபாஸாணா கித்தேதப்³பா³, ததோ அவஸேஸனிமித்தானி கித்தெத்வா ஹத்த²பாஸங் அவிஜஹந்தேஹி கம்மவாசாய ஸமானஸங்வாஸகஸீமங் ஸம்மன்னித்வா தஸ்ஸா த³ள்ஹீகம்மத்த²ங் அவிப்பவாஸகம்மவாசாபி காதப்³பா³. ஏவஞ்ஹி ‘‘ஸீமங் ஸமூஹனிஸ்ஸாமா’’தி ஆக³தா ஸமூஹனிதுங் ந ஸக்கி²ஸ்ஸந்தி. ஸசே பன க²ண்ட³ஸீமாய நிமித்தானி கித்தெத்வா ததோ ஸீமந்தரிகாய நிமித்தானி கித்தெத்வா மஹாஸீமாய நிமித்தானி கித்தெந்தி, ஏவங் தீஸு டா²னேஸு நிமித்தானி கித்தெத்வா யங் ஸீமங் இச்ச²ந்தி, தங் பட²மங் ப³ந்தி⁴துங் வட்டதி. ஏவங் ஸந்தேபி யதா²வுத்தனயேன க²ண்ட³ஸீமதோவ பட்டா²ய ப³ந்தி⁴தப்³பா³. ஏவங் ப³த்³தா⁴ஸு பன ஸீமாஸு க²ண்ட³ஸீமாய டி²தா பி⁴க்கூ² மஹாஸீமாய கம்மங் கரொந்தானங் ந கோபெந்தி, மஹாஸீமாய வா டி²தா க²ண்ட³ஸீமாய கரொந்தானங், ஸீமந்தரிகாய பன டி²தா உபி⁴ன்னம்பி ந கோபெந்தி. கா³மகெ²த்தே ட²த்வா கம்மங் கரொந்தானங் பன ஸீமந்தரிகாய டி²தா கோபெந்தி. ஸீமந்தரிகா ஹி கா³மகெ²த்தங் ப⁴ஜதி.
Evaṃ khaṇḍasīmaṃ sammannitvā mahāsīmasammutikāle khaṇḍasīmato nikkhamitvā mahāsīmāyaṃ ṭhatvā samantā anupariyāyantehi sīmantarikapāsāṇā kittetabbā, tato avasesanimittāni kittetvā hatthapāsaṃ avijahantehi kammavācāya samānasaṃvāsakasīmaṃ sammannitvā tassā daḷhīkammatthaṃ avippavāsakammavācāpi kātabbā. Evañhi ‘‘sīmaṃ samūhanissāmā’’ti āgatā samūhanituṃ na sakkhissanti. Sace pana khaṇḍasīmāya nimittāni kittetvā tato sīmantarikāya nimittāni kittetvā mahāsīmāya nimittāni kittenti, evaṃ tīsu ṭhānesu nimittāni kittetvā yaṃ sīmaṃ icchanti, taṃ paṭhamaṃ bandhituṃ vaṭṭati. Evaṃ santepi yathāvuttanayena khaṇḍasīmatova paṭṭhāya bandhitabbā. Evaṃ baddhāsu pana sīmāsu khaṇḍasīmāya ṭhitā bhikkhū mahāsīmāya kammaṃ karontānaṃ na kopenti, mahāsīmāya vā ṭhitā khaṇḍasīmāya karontānaṃ, sīmantarikāya pana ṭhitā ubhinnampi na kopenti. Gāmakhette ṭhatvā kammaṃ karontānaṃ pana sīmantarikāya ṭhitā kopenti. Sīmantarikā hi gāmakhettaṃ bhajati.
ஸீமா ச நாமேஸா ந கேவலா பத²வீதலேயேவ ப³த்³தா⁴ ப³த்³தா⁴ நாம ஹோதி, அத² கோ² பிட்டி²பாஸாணேபி குடிகே³ஹேபி லேணேபி பாஸாதே³பி பப்³ப³தமத்த²கேபி ப³த்³தா⁴ ப³த்³தா⁴யேவ ஹோதி. தத்த² பிட்டி²பாஸாணே ப³ந்த⁴ந்தேஹி பாஸாணபிட்டி²யங் ராஜிங் வா கொட்டெத்வா உது³க்க²லங் வா க²ணித்வா நிமித்தங் ந காதப்³ப³ங், நிமித்துபக³பாஸாணே ட²பெத்வா நிமித்தானி கித்தேதப்³பா³னி. கம்மவாசாபரியோஸானே ஸீமா பத²வீஸந்தா⁴ரகங் உத³கபரியந்தங் கத்வா ஓதரதி. நிமித்தபாஸாணா யதா²டா²னே ந திட்ட²ந்தி, தஸ்மா ஸமந்ததோ ராஜி வா உபட்டா²பேதப்³பா³, சதூஸு வா கோணேஸு பாஸாணா விஜ்ஜி²தப்³பா³, ‘‘அயங் ஸீமாபரிச்சே²தோ³’’தி வத்வா அக்க²ரானி வா சி²ந்தி³தப்³பா³னி. கேசி உஸூயகா ‘‘ஸீமங் ஜா²பெஸ்ஸாமா’’தி அக்³கி³ங் தெ³ந்தி, பாஸாணாவ ஜா²யந்தி, ந ஸீமா.
Sīmā ca nāmesā na kevalā pathavītaleyeva baddhā baddhā nāma hoti, atha kho piṭṭhipāsāṇepi kuṭigehepi leṇepi pāsādepi pabbatamatthakepi baddhā baddhāyeva hoti. Tattha piṭṭhipāsāṇe bandhantehi pāsāṇapiṭṭhiyaṃ rājiṃ vā koṭṭetvā udukkhalaṃ vā khaṇitvā nimittaṃ na kātabbaṃ, nimittupagapāsāṇe ṭhapetvā nimittāni kittetabbāni. Kammavācāpariyosāne sīmā pathavīsandhārakaṃ udakapariyantaṃ katvā otarati. Nimittapāsāṇā yathāṭhāne na tiṭṭhanti, tasmā samantato rāji vā upaṭṭhāpetabbā, catūsu vā koṇesu pāsāṇā vijjhitabbā, ‘‘ayaṃ sīmāparicchedo’’ti vatvā akkharāni vā chinditabbāni. Keci usūyakā ‘‘sīmaṃ jhāpessāmā’’ti aggiṃ denti, pāsāṇāva jhāyanti, na sīmā.
குடிகே³ஹேபி பி⁴த்திங் அகித்தெத்வா ஏகவீஸதியா பி⁴க்கூ²னங் ஓகாஸட்டா²னங் அந்தோகரித்வா பாஸாணனிமித்தானி ட²பெத்வா ஸீமா ஸம்மன்னிதப்³பா³, அந்தோகுட்டமேவ ஸீமா ஹோதி. ஸசே அந்தோகுட்டே ஏகவீஸதியா பி⁴க்கூ²னங் ஓகாஸோ நத்தி², பமுகே² நிமித்தபாஸாணே ட²பெத்வா ஸம்மன்னிதப்³பா³. ஸசே ஏவம்பி நப்பஹோதி, ப³ஹி நிப்³போ³த³கபதனட்டா²னேபி நிமித்தானி ட²பெத்வா ஸம்மன்னிதப்³பா³. ஏவங் ஸம்மதாய பன ஸப்³ப³ங் குடிகே³ஹங் ஸீமட்ட²மேவ ஹோதி.
Kuṭigehepi bhittiṃ akittetvā ekavīsatiyā bhikkhūnaṃ okāsaṭṭhānaṃ antokaritvā pāsāṇanimittāni ṭhapetvā sīmā sammannitabbā, antokuṭṭameva sīmā hoti. Sace antokuṭṭe ekavīsatiyā bhikkhūnaṃ okāso natthi, pamukhe nimittapāsāṇe ṭhapetvā sammannitabbā. Sace evampi nappahoti, bahi nibbodakapatanaṭṭhānepi nimittāni ṭhapetvā sammannitabbā. Evaṃ sammatāya pana sabbaṃ kuṭigehaṃ sīmaṭṭhameva hoti.
சதுபி⁴த்தியலேணேபி ப³ந்த⁴ந்தேஹி குட்டங் அகித்தெத்வா பாஸாணாவ கித்தேதப்³பா³, அந்தோ ஓகாஸே அஸதி பமுகே²பி நிமித்தானி ட²பேதப்³பா³னி, ஏவங் லேணஸ்ஸ அந்தோ ச ப³ஹி ச ஸீமா ஹோதி.
Catubhittiyaleṇepi bandhantehi kuṭṭaṃ akittetvā pāsāṇāva kittetabbā, anto okāse asati pamukhepi nimittāni ṭhapetabbāni, evaṃ leṇassa anto ca bahi ca sīmā hoti.
உபரிபாஸாதே³பி பி⁴த்திங் அகித்தெத்வா அந்தோபாஸாணே ட²பெத்வா ஸீமா ஸம்மன்னிதப்³பா³. ஸசே நப்பஹோதி, பமுகே²பி பாஸாணே ட²பெத்வா ஸம்மன்னிதப்³பா³. ஏவங் ஸம்மதா உபரிபாஸாதே³யேவ ஹோதி, ஹெட்டா² ந ஓதரதி. ஸசே பன ப³ஹூஸு த²ம்பே⁴ஸு துலானங் உபரி கதபாஸாத³ஸ்ஸ ஹெட்டி²மதலே குட்டோ யதா² நிமித்தானங் அந்தோ ஹோதி, ஏவங் உட்ட²ஹித்வா துலாருக்கே²ஹி ஏகஸம்ப³ந்தோ⁴ டி²தோ, ஹெட்டா²பி ஓதரதி, ஏகத²ம்ப⁴பாஸாத³ஸ்ஸ பன உபரிதலே ப³த்³தா⁴ ஸீமா. ஸசே த²ம்ப⁴மத்த²கே ஏகவீஸதியா பி⁴க்கூ²னங் ஓகாஸோ ஹோதி, ஹெட்டா² ஓதரதி. ஸசே பாஸாத³பி⁴த்திதோ நிக்³க³தேஸு நிய்யூஹகாதீ³ஸு பாஸாணே ட²பெத்வா ஸீமங் ப³ந்த⁴ந்தி, பாஸாத³பி⁴த்தி அந்தோஸீமாய ஹோதி. ஹெட்டா² பனஸ்ஸா ஓதரணானோதரணங் வுத்தனயேனேவ வேதி³தப்³ப³ங்.
Uparipāsādepi bhittiṃ akittetvā antopāsāṇe ṭhapetvā sīmā sammannitabbā. Sace nappahoti, pamukhepi pāsāṇe ṭhapetvā sammannitabbā. Evaṃ sammatā uparipāsādeyeva hoti, heṭṭhā na otarati. Sace pana bahūsu thambhesu tulānaṃ upari katapāsādassa heṭṭhimatale kuṭṭo yathā nimittānaṃ anto hoti, evaṃ uṭṭhahitvā tulārukkhehi ekasambandho ṭhito, heṭṭhāpi otarati, ekathambhapāsādassa pana uparitale baddhā sīmā. Sace thambhamatthake ekavīsatiyā bhikkhūnaṃ okāso hoti, heṭṭhā otarati. Sace pāsādabhittito niggatesu niyyūhakādīsu pāsāṇe ṭhapetvā sīmaṃ bandhanti, pāsādabhitti antosīmāya hoti. Heṭṭhā panassā otaraṇānotaraṇaṃ vuttanayeneva veditabbaṃ.
ஹெட்டா²பாஸாதே³ கித்தெந்தேஹிபி பி⁴த்தி ச ருக்க²த்த²ம்பா⁴ ச ந கித்தேதப்³பா³, பி⁴த்திலக்³கே³ பன பாஸாணத்த²ம்பே⁴ கித்தேதுங் வட்டதி. ஏவங் கித்திதா ஸீமா ஹெட்டா²பாஸாத³ஸ்ஸ பரியந்தத²ம்பா⁴னங் அந்தோயேவ ஹோதி. ஸசே பன ஹெட்டா²பாஸாத³ஸ்ஸ குட்டோ உபரிமதலேன ஸம்ப³த்³தோ⁴ ஹோதி, உபரிபாஸாத³ம்பி அபி⁴ருஹதி. ஸசே பாஸாத³ஸ்ஸ ப³ஹி நிப்³போ³த³கபதனட்டா²னே நிமித்தானி கரொந்தி, ஸப்³போ³ பாஸாதோ³ ஸீமட்டோ² ஹோதி.
Heṭṭhāpāsāde kittentehipi bhitti ca rukkhatthambhā ca na kittetabbā, bhittilagge pana pāsāṇatthambhe kittetuṃ vaṭṭati. Evaṃ kittitā sīmā heṭṭhāpāsādassa pariyantathambhānaṃ antoyeva hoti. Sace pana heṭṭhāpāsādassa kuṭṭo uparimatalena sambaddho hoti, uparipāsādampi abhiruhati. Sace pāsādassa bahi nibbodakapatanaṭṭhāne nimittāni karonti, sabbo pāsādo sīmaṭṭho hoti.
பப்³ப³தமத்த²கே தலங் ஹோதி ஏகவீஸதியா பி⁴க்கூ²னங் ஓகாஸாரஹங், தத்த² பிட்டி²பாஸாணே விய ஸீமங் ப³ந்த⁴ந்தி, ஹெட்டா²பப்³ப³தேபி தேனேவ பரிச்சே²தே³ன ஸீமா ஓதரதி. தாலமூலகபப்³ப³தேபி உபரி ஸீமா ப³த்³தா⁴ ஹெட்டா² ஓதரதேவ. யோ பன விதானஸண்டா²னோ ஹோதி, உபரி ஏகவீஸதியா பி⁴க்கூ²னங் ஓகாஸோ அத்தி², ஹெட்டா² நத்தி², தஸ்ஸுபரி ப³த்³தா⁴ ஸீமா ஹெட்டா² ந ஓதரதி. ஏவங் முதி³ங்க³ஸண்டா²னோ வா ஹோது பணவஸண்டா²னோ வா, யஸ்ஸ ஹெட்டா² வா மஜ்ஜே² வா ஸீமப்பமாணங் நத்தி², தஸ்ஸ உபரி ப³த்³தா⁴ ஸீமா ஹெட்டா² ந ஓதரதி. யஸ்ஸ பன த்³வே கூடானி ஆஸன்னே டி²தானி, ஏகஸ்ஸபி உபரி ஸீமப்பமாணங் நப்பஹோதி, தஸ்ஸ கூடந்தரங் சினித்வா வா பூரெத்வா வா ஏகாப³த்³த⁴ங் கத்வா உபரி ஸீமா ஸம்மன்னிதப்³பா³. ஏகோ ஸப்பப²ணஸதி³ஸோ பப்³ப³தோ, தஸ்ஸ உபரி ஸீமப்பமாணஸ்ஸ அத்தி²தாய ஸீமங் ப³ந்த⁴ந்தி, தஸ்ஸ சே ஹெட்டா² ஆகாஸபப்³பா⁴ரங் ஹோதி, ஸீமா ந ஓதரதி. ஸசே பனஸ்ஸ வேமஜ்ஜே² ஸீமப்பமாணோ ஸுஸிரபாஸாணோ ஹோதி, ஓதரதி, ஸோ ச பாஸாணோ ஸீமட்டோ²யேவ ஹோதி. அதா²பிஸ்ஸ ஹெட்டா²லேணஸ்ஸ குட்டோ அக்³க³கோடிங் ஆஹச்ச திட்ட²தி , ஓதரதி, ஹெட்டா² ச உபரி ச ஸீமாயேவ ஹோதி. ஸசே பன ஹெட்டா² உபரிமஸ்ஸ ஸீமாபரிச்சே²த³ஸ்ஸ பாரதோ அந்தோலேணங் ஹோதி, ப³ஹி ஸீமா ந ஓதரதி. அதா²பி உபரிமஸ்ஸ ஸீமாபரிச்சே²த³ஸ்ஸ ஓரதோ ப³ஹி லேணங் ஹோதி, அந்தோ ஸீமா ந ஓதரதி. அதா²பி உபரி ஸீமாபரிச்சே²தோ³ கு²த்³த³கோ, ஹெட்டா² லேணங் மஹந்தங் ஸீமாபரிச்சே²த³மதிக்கமித்வா டி²தங், ஸீமா உபரியேவ ஹோதி, ஹெட்டா² ந ஓதரதி. யதி³ பன லேணங் கு²த்³த³கங் ஸப்³ப³பச்சி²மஸீமாபரிமாணங், உபரி ஸீமா மஹதீ நங் அஜ்ஜொ²த்த²ரித்வா டி²தா, ஸீமா ஓதரதி. அத² லேணங் அதிகு²த்³த³கங் ஸீமப்பமாணங் ந ஹோதி, ஸீமா உபரியேவ ஹோதி, ஹெட்டா² ந ஓதரதி. ஸசே ததோ உபட்³ட⁴ங் பி⁴ஜ்ஜித்வா பததி, ஸீமப்பமாணங் சேபி ஹோதி, ப³ஹி பதிதங் அஸீமா. அபதிதங் பன யதி³ ஸீமப்பமாணங், ஸீமா ஹோதியேவ.
Pabbatamatthake talaṃ hoti ekavīsatiyā bhikkhūnaṃ okāsārahaṃ, tattha piṭṭhipāsāṇe viya sīmaṃ bandhanti, heṭṭhāpabbatepi teneva paricchedena sīmā otarati. Tālamūlakapabbatepi upari sīmā baddhā heṭṭhā otarateva. Yo pana vitānasaṇṭhāno hoti, upari ekavīsatiyā bhikkhūnaṃ okāso atthi, heṭṭhā natthi, tassupari baddhā sīmā heṭṭhā na otarati. Evaṃ mudiṅgasaṇṭhāno vā hotu paṇavasaṇṭhāno vā, yassa heṭṭhā vā majjhe vā sīmappamāṇaṃ natthi, tassa upari baddhā sīmā heṭṭhā na otarati. Yassa pana dve kūṭāni āsanne ṭhitāni, ekassapi upari sīmappamāṇaṃ nappahoti, tassa kūṭantaraṃ cinitvā vā pūretvā vā ekābaddhaṃ katvā upari sīmā sammannitabbā. Eko sappaphaṇasadiso pabbato, tassa upari sīmappamāṇassa atthitāya sīmaṃ bandhanti, tassa ce heṭṭhā ākāsapabbhāraṃ hoti, sīmā na otarati. Sace panassa vemajjhe sīmappamāṇo susirapāsāṇo hoti, otarati, so ca pāsāṇo sīmaṭṭhoyeva hoti. Athāpissa heṭṭhāleṇassa kuṭṭo aggakoṭiṃ āhacca tiṭṭhati , otarati, heṭṭhā ca upari ca sīmāyeva hoti. Sace pana heṭṭhā uparimassa sīmāparicchedassa pārato antoleṇaṃ hoti, bahi sīmā na otarati. Athāpi uparimassa sīmāparicchedassa orato bahi leṇaṃ hoti, anto sīmā na otarati. Athāpi upari sīmāparicchedo khuddako, heṭṭhā leṇaṃ mahantaṃ sīmāparicchedamatikkamitvā ṭhitaṃ, sīmā upariyeva hoti, heṭṭhā na otarati. Yadi pana leṇaṃ khuddakaṃ sabbapacchimasīmāparimāṇaṃ, upari sīmā mahatī naṃ ajjhottharitvā ṭhitā, sīmā otarati. Atha leṇaṃ atikhuddakaṃ sīmappamāṇaṃ na hoti, sīmā upariyeva hoti, heṭṭhā na otarati. Sace tato upaḍḍhaṃ bhijjitvā patati, sīmappamāṇaṃ cepi hoti, bahi patitaṃ asīmā. Apatitaṃ pana yadi sīmappamāṇaṃ, sīmā hotiyeva.
க²ண்ட³ஸீமா ச நீசவத்து²கா ஹோதி, தங் பூரெத்வா உச்சவத்து²கங் கரொந்தி, ஸீமாயேவ. ஸீமாய கே³ஹங் கரொந்தி, ஸீமட்ட²கமேவ ஹோதி. ஸீமாய பொக்க²ரணிங் க²ணந்தி, ஸீமாயேவ. ஓகோ⁴ ஸீமாமண்ட³லங் ஒத்த²ரித்வா க³ச்ச²தி, ஸீமாமாளகே அட்டங் ப³ந்தி⁴த்வா கம்மங் காதுங் வட்டதி. ஸீமாய ஹெட்டா² உமங்க³னதீ³ ஹோதி, இத்³தி⁴மா பி⁴க்கு² தத்த² நிஸீத³தி. ஸசே ஸா நதீ³ பட²மங் க³தா, ஸீமா பச்சா² ப³த்³தா⁴, கம்மங் ந கோபேதி. அத² பட²மங் ஸீமா ப³த்³தா⁴, பச்சா² நதீ³ க³தா, கம்மங் கோபேதி, ஹெட்டா²பத²வீதலே டி²தோ பன கோபேதியேவ.
Khaṇḍasīmā ca nīcavatthukā hoti, taṃ pūretvā uccavatthukaṃ karonti, sīmāyeva. Sīmāya gehaṃ karonti, sīmaṭṭhakameva hoti. Sīmāya pokkharaṇiṃ khaṇanti, sīmāyeva. Ogho sīmāmaṇḍalaṃ ottharitvā gacchati, sīmāmāḷake aṭṭaṃ bandhitvā kammaṃ kātuṃ vaṭṭati. Sīmāya heṭṭhā umaṅganadī hoti, iddhimā bhikkhu tattha nisīdati. Sace sā nadī paṭhamaṃ gatā, sīmā pacchā baddhā, kammaṃ na kopeti. Atha paṭhamaṃ sīmā baddhā, pacchā nadī gatā, kammaṃ kopeti, heṭṭhāpathavītale ṭhito pana kopetiyeva.
ஸீமாமாளகே வடருக்கோ² ஹோதி, தஸ்ஸ ஸாகா² வா ததோ நிக்³க³தபாரோஹோ வா மஹாஸீமாய பத²வீதலங் வா தத்த²ஜாதருக்கா²தீ³னி வா ஆஹச்ச திட்ட²தி, மஹாஸீமங் வா ஸோதெ⁴த்வா கம்மங் காதப்³ப³ங், தே வா ஸாகா²பாரோஹா சி²ந்தி³த்வா ப³ஹிட்ட²கா காதப்³பா³. அனாஹச்ச டி²தஸாகா²தீ³ஸு ஆருள்ஹபி⁴க்கூ² ஹத்த²பாஸங் ஆனேதப்³பா³. ஏவங் மஹாஸீமாய ஜாதருக்க²ஸ்ஸ ஸாகா² வா பாரோஹோ வா வுத்தனயேனேவ ஸீமாமாளகே பதிட்டா²தி, வுத்தனயேனேவ ஸீமங் ஸோதெ⁴த்வா வா கம்மங் காதப்³ப³ங், தே வா ஸாகா²பாரோஹா சி²ந்தி³த்வா ப³ஹிட்ட²கா காதப்³பா³. ஸசே மாளகே கம்மே கரியமானே கோசி பி⁴க்கு² மாளகஸ்ஸ அந்தோ பவிஸித்வா வேஹாஸங் டி²தஸாகா²ய நிஸீத³தி, பாதா³ வாஸ்ஸ பூ⁴மிக³தா ஹொந்தி, நிவாஸனபாருபனங் வா பூ⁴மிங் பு²ஸதி, கம்மங் காதுங் ந வட்டதி. பாதே³ பன நிவாஸனபாருபனஞ்ச உக்கி²பாபெத்வா காதுங் கம்மங் வட்டதி, இத³ஞ்ச லக்க²ணங் புரிமனயேபி வேதி³தப்³ப³ங். அயங் பன விஸேஸோ – தத்ர உக்கி²பாபெத்வா காதுங் ந வட்டதி, ஹத்த²பாஸமேவ ஆனேதப்³போ³. ஸசே அந்தோஸீமதோ பப்³ப³தோ அப்³பு⁴க்³க³ச்ச²தி, தத்ரட்டோ² பி⁴க்கு² ஹத்த²பாஸங் ஆனேதப்³போ³. இத்³தி⁴யா அந்தோபப்³ப³தங் பவிட்டே²பி ஏஸேவ நயோ. ப³ஜ்ஜ²மானா ஏவ ஹி ஸீமா பமாணரஹிதங் பதே³ஸங் ந ஓதரதி, ப³த்³தா⁴ய ஸீமாய ஜாதங் யங் கிஞ்சி யத்த² கத்த²சி ஏகஸம்ப³ந்தே⁴ன க³தங் ஸீமாஸங்க்²யமேவ க³ச்ச²தீதி.
Sīmāmāḷake vaṭarukkho hoti, tassa sākhā vā tato niggatapāroho vā mahāsīmāya pathavītalaṃ vā tatthajātarukkhādīni vā āhacca tiṭṭhati, mahāsīmaṃ vā sodhetvā kammaṃ kātabbaṃ, te vā sākhāpārohā chinditvā bahiṭṭhakā kātabbā. Anāhacca ṭhitasākhādīsu āruḷhabhikkhū hatthapāsaṃ ānetabbā. Evaṃ mahāsīmāya jātarukkhassa sākhā vā pāroho vā vuttanayeneva sīmāmāḷake patiṭṭhāti, vuttanayeneva sīmaṃ sodhetvā vā kammaṃ kātabbaṃ, te vā sākhāpārohā chinditvā bahiṭṭhakā kātabbā. Sace māḷake kamme kariyamāne koci bhikkhu māḷakassa anto pavisitvā vehāsaṃ ṭhitasākhāya nisīdati, pādā vāssa bhūmigatā honti, nivāsanapārupanaṃ vā bhūmiṃ phusati, kammaṃ kātuṃ na vaṭṭati. Pāde pana nivāsanapārupanañca ukkhipāpetvā kātuṃ kammaṃ vaṭṭati, idañca lakkhaṇaṃ purimanayepi veditabbaṃ. Ayaṃ pana viseso – tatra ukkhipāpetvā kātuṃ na vaṭṭati, hatthapāsameva ānetabbo. Sace antosīmato pabbato abbhuggacchati, tatraṭṭho bhikkhu hatthapāsaṃ ānetabbo. Iddhiyā antopabbataṃ paviṭṭhepi eseva nayo. Bajjhamānā eva hi sīmā pamāṇarahitaṃ padesaṃ na otarati, baddhāya sīmāya jātaṃ yaṃ kiñci yattha katthaci ekasambandhena gataṃ sīmāsaṅkhyameva gacchatīti.
தியோஜனபரமங் பன ஸீமங் ஸம்மன்னந்தேன மஜ்ஜே² ட²த்வா யதா² சதூஸுபி தி³ஸாஸு தி³யட்³ட⁴தி³யட்³ட⁴யோஜனங் ஹோதி, ஏவங் ஸம்மன்னிதப்³பா³. ஸசே பன மஜ்ஜே² ட²த்வா ஏகேகதி³ஸதோ தியோஜனங் கரொந்தி, ச²யோஜனங் ஹோதீதி ந வட்டதி. சதுரஸ்ஸங் வா திகோணங் வா ஸம்மன்னந்தேன யதா² கோணதோ கோணங் தியோஜனங் ஹோதி, ஏவங் ஸம்மன்னிதப்³பா³. ஸசே ஹி யேன கேனசி பரியந்தேன கேஸக்³க³மத்தம்பி தியோஜனங் அதிக்காமேதி, ஆபத்திஞ்ச ஆபஜ்ஜதி, ஸீமா ச அஸீமா ஹோதி.
Tiyojanaparamaṃ pana sīmaṃ sammannantena majjhe ṭhatvā yathā catūsupi disāsu diyaḍḍhadiyaḍḍhayojanaṃ hoti, evaṃ sammannitabbā. Sace pana majjhe ṭhatvā ekekadisato tiyojanaṃ karonti, chayojanaṃ hotīti na vaṭṭati. Caturassaṃ vā tikoṇaṃ vā sammannantena yathā koṇato koṇaṃ tiyojanaṃ hoti, evaṃ sammannitabbā. Sace hi yena kenaci pariyantena kesaggamattampi tiyojanaṃ atikkāmeti, āpattiñca āpajjati, sīmā ca asīmā hoti.
164. ‘‘ந, பி⁴க்க²வே, நதீ³பாரஸீமா ஸம்மன்னிதப்³பா³, யோ ஸம்மன்னெய்ய, ஆபத்தி து³க்கடஸ்ஸா’’தி (மஹாவ॰ 140) வசனதோ நதீ³பாரஸீமா ந ஸம்மன்னிதப்³பா³. யத்ர பன து⁴வனாவா வா து⁴வஸேது வா அபி⁴முக²தித்தே²யேவ அத்தி², ஏவரூபங் நதீ³பாரஸீமங் ஸம்மன்னிதுங் வட்டதி. ‘‘அனுஜானாமி, பி⁴க்க²வே, யத்த²ஸ்ஸ து⁴வனாவா வா து⁴வஸேது வா, ஏவரூபங் நதீ³பாரஸீமங் ஸம்மன்னிது’’ந்தி ஹி வுத்தங். ஸசே து⁴வனாவா வா து⁴வஸேது வா அபி⁴முக²தித்தே² நத்தி², ஈஸகங் உத்³த⁴ங் அபி⁴ருஹித்வா அதோ⁴ வா ஓரோஹித்வா அத்தி², ஏவம்பி வட்டதி. கரவிகதிஸ்ஸத்தே²ரோ பன ‘‘கா³வுதமத்தப்³ப⁴ந்தரேபி வட்டதீ’’தி ஆஹ.
164. ‘‘Na, bhikkhave, nadīpārasīmā sammannitabbā, yo sammanneyya, āpatti dukkaṭassā’’ti (mahāva. 140) vacanato nadīpārasīmā na sammannitabbā. Yatra pana dhuvanāvā vā dhuvasetu vā abhimukhatittheyeva atthi, evarūpaṃ nadīpārasīmaṃ sammannituṃ vaṭṭati. ‘‘Anujānāmi, bhikkhave, yatthassa dhuvanāvā vā dhuvasetu vā, evarūpaṃ nadīpārasīmaṃ sammannitu’’nti hi vuttaṃ. Sace dhuvanāvā vā dhuvasetu vā abhimukhatitthe natthi, īsakaṃ uddhaṃ abhiruhitvā adho vā orohitvā atthi, evampi vaṭṭati. Karavikatissatthero pana ‘‘gāvutamattabbhantarepi vaṭṭatī’’ti āha.
இமஞ்ச பன நதீ³பாரஸீமங் ஸம்மன்னந்தேன ஏகஸ்மிஞ்ச தீரே ட²த்வா உபரிஸோதே நதீ³தீரே நிமித்தங் கித்தெத்வா ததோ பட்டா²ய அத்தானங் பரிக்கி²பந்தேன யத்தகங் பரிச்சே²த³ங் இச்ச²தி, தஸ்ஸ பரியோஸானே அதோ⁴ஸோதேபி நதீ³தீரே நிமித்தங் கித்தெத்வா பரதீரே ஸம்முக²ட்டா²னே நதீ³தீரே நிமித்தங் கித்தேதப்³ப³ங். ததோ பட்டா²ய யத்தகங் பரிச்சே²த³ங் இச்ச²தி, தஸ்ஸ வஸேன யாவ உபரிஸோதே பட²மங் கித்திதனிமித்தஸ்ஸ ஸம்முகா² நதீ³தீரே நிமித்தங், தாவ கித்தெத்வா பச்சாஹரித்வா பட²மகித்திதனிமித்தேன ஸத்³தி⁴ங் க⁴டேதப்³ப³ங். அத² ஸப்³ப³னிமித்தானங் அந்தோ டி²தே பி⁴க்கூ² ஹத்த²பாஸக³தே கத்வா கம்மவாசாய ஸீமா ஸம்மன்னிதப்³பா³. நதி³யா டி²தா அனாக³தாபி கம்மங் ந கோபெந்தி, ஸம்முதிபரியோஸானே ட²பெத்வா நதி³ங் நிமித்தானங் அந்தோ பரதீரே ச ஓரிமதீரே ச ஏகஸீமா ஹோதி, நதீ³ பன ப³த்³த⁴ஸீமாஸங்க்²யங் ந க³ச்ச²தி. விஸுங் நதீ³ஸீமா ஏவ ஹி ஸா.
Imañca pana nadīpārasīmaṃ sammannantena ekasmiñca tīre ṭhatvā uparisote nadītīre nimittaṃ kittetvā tato paṭṭhāya attānaṃ parikkhipantena yattakaṃ paricchedaṃ icchati, tassa pariyosāne adhosotepi nadītīre nimittaṃ kittetvā paratīre sammukhaṭṭhāne nadītīre nimittaṃ kittetabbaṃ. Tato paṭṭhāya yattakaṃ paricchedaṃ icchati, tassa vasena yāva uparisote paṭhamaṃ kittitanimittassa sammukhā nadītīre nimittaṃ, tāva kittetvā paccāharitvā paṭhamakittitanimittena saddhiṃ ghaṭetabbaṃ. Atha sabbanimittānaṃ anto ṭhite bhikkhū hatthapāsagate katvā kammavācāya sīmā sammannitabbā. Nadiyā ṭhitā anāgatāpi kammaṃ na kopenti, sammutipariyosāne ṭhapetvā nadiṃ nimittānaṃ anto paratīre ca orimatīre ca ekasīmā hoti, nadī pana baddhasīmāsaṅkhyaṃ na gacchati. Visuṃ nadīsīmā eva hi sā.
ஸசே அந்தோனதி³யங் தீ³பகோ ஹோதி, தங் அந்தோஸீமாய காதுகாமேன புரிமனயேனேவ அத்தனா டி²ததீரே நிமித்தானி கித்தெத்வா தீ³பகஸ்ஸ ஓரிமந்தே ச பாரிமந்தே ச நிமித்தங் கித்தேதப்³ப³ங். அத² பரதீரே நதி³யா ஓரிமதீரே நிமித்தஸ்ஸ ஸம்முக²ட்டா²னே நிமித்தங் கித்தெத்வா ததோ பட்டா²ய புரிமனயேனேவ யாவ உபரிஸோதே பட²மங் கித்திதனிமித்தஸ்ஸ ஸம்முகா² நிமித்தங், தாவ கித்தேதப்³ப³ங். அத² தீ³பகஸ்ஸ பாரிமந்தே ச ஓரிமந்தே ச நிமித்தங் கித்தெத்வா பச்சாஹரித்வா பட²மங் கித்திதனிமித்தேன ஸத்³தி⁴ங் க⁴டேதப்³ப³ங். அத² த்³வீஸு தீரேஸு தீ³பகேஸு ச பி⁴க்கூ² ஸப்³பே³ ஹத்த²பாஸக³தே கத்வா கம்மவாசாய ஸீமா ஸம்மன்னிதப்³பா³, நதி³யங் டி²தா அனாக³ச்ச²ந்தாபி கம்மங் ந கோபெந்தி, ஸம்முதிபரியோஸானே ட²பெத்வா நதி³ங் நிமித்தானங் அந்தோ தீரத்³வயஞ்ச தீ³பகோ ச ஏகஸீமா ஹோதி, நதீ³ பன நதீ³ஸீமாயேவ.
Sace antonadiyaṃ dīpako hoti, taṃ antosīmāya kātukāmena purimanayeneva attanā ṭhitatīre nimittāni kittetvā dīpakassa orimante ca pārimante ca nimittaṃ kittetabbaṃ. Atha paratīre nadiyā orimatīre nimittassa sammukhaṭṭhāne nimittaṃ kittetvā tato paṭṭhāya purimanayeneva yāva uparisote paṭhamaṃ kittitanimittassa sammukhā nimittaṃ, tāva kittetabbaṃ. Atha dīpakassa pārimante ca orimante ca nimittaṃ kittetvā paccāharitvā paṭhamaṃ kittitanimittena saddhiṃ ghaṭetabbaṃ. Atha dvīsu tīresu dīpakesu ca bhikkhū sabbe hatthapāsagate katvā kammavācāya sīmā sammannitabbā, nadiyaṃ ṭhitā anāgacchantāpi kammaṃ na kopenti, sammutipariyosāne ṭhapetvā nadiṃ nimittānaṃ anto tīradvayañca dīpako ca ekasīmā hoti, nadī pana nadīsīmāyeva.
ஸசே பன தீ³பகோ விஹாரஸீமாபரிச்சே²த³தோ உத்³த⁴ங் வா அதோ⁴ வா அதி⁴கதரோ ஹோதி, அத² விஹாரஸீமாபரிச்சே²த³னிமித்தஸ்ஸ உஜுகமேவ ஸம்முகீ²பூ⁴தே தீ³பகஸ்ஸ ஓரிமந்தே நிமித்தங் கித்தெத்வா ததோ பட்டா²ய தீ³பகஸிக²ரங் பரிக்கி²பந்தேன புன தீ³பகஸ்ஸ ஓரிமந்தே நிமித்தஸம்முகே² பாரிமந்தே நிமித்தங் கித்தேதப்³ப³ங். ததோ பரங் புரிமனயேனேவ பரதீரே ஸம்முக²னிமித்தமாதி³ங் கத்வா பரதீரே நிமித்தானி ச தீ³பகஸ்ஸ பாரிமந்தஓரிமந்தே நிமித்தானி ச கித்தெத்வா பட²மகித்திதனிமித்தேன ஸத்³தி⁴ங் க⁴டனா காதப்³பா³. ஏவங் கித்தெத்வா ஸம்மதா ஸீமா பப்³ப³தஸண்டா²னா ஹோதி. ஸசே பன தீ³பகோ விஹாரஸீமாபரிச்சே²த³தோ உத்³த⁴ம்பி அதோ⁴பி அதி⁴கதரோ ஹோதி, புரிமனயேனேவ தீ³பகஸ்ஸ உபோ⁴பி ஸிக²ரானி பரிக்கி²பித்வா நிமித்தானி கித்தெந்தேன நிமித்தக⁴டனா காதப்³பா³. ஏவங் கித்தெத்வா ஸம்மதா ஸீமா முதி³ங்க³ஸண்டா²னா ஹோதி. ஸசே தீ³பகோ விஹாரஸீமாபரிச்சே²த³ஸ்ஸ அந்தோ கு²த்³த³கோ ஹோதி, ஸப்³ப³பட²மேன நயேன தீ³பகே நிமித்தானி கித்தேதப்³பா³னி. ஏவங் கித்தெத்வா ஸம்மதா ஸீமா பணவஸண்டா²னா ஹோதி. ஏவங் தாவ ஸீமாப³ந்த⁴னங் வேதி³தப்³ப³ங்.
Sace pana dīpako vihārasīmāparicchedato uddhaṃ vā adho vā adhikataro hoti, atha vihārasīmāparicchedanimittassa ujukameva sammukhībhūte dīpakassa orimante nimittaṃ kittetvā tato paṭṭhāya dīpakasikharaṃ parikkhipantena puna dīpakassa orimante nimittasammukhe pārimante nimittaṃ kittetabbaṃ. Tato paraṃ purimanayeneva paratīre sammukhanimittamādiṃ katvā paratīre nimittāni ca dīpakassa pārimantaorimante nimittāni ca kittetvā paṭhamakittitanimittena saddhiṃ ghaṭanā kātabbā. Evaṃ kittetvā sammatā sīmā pabbatasaṇṭhānā hoti. Sace pana dīpako vihārasīmāparicchedato uddhampi adhopi adhikataro hoti, purimanayeneva dīpakassa ubhopi sikharāni parikkhipitvā nimittāni kittentena nimittaghaṭanā kātabbā. Evaṃ kittetvā sammatā sīmā mudiṅgasaṇṭhānā hoti. Sace dīpako vihārasīmāparicchedassa anto khuddako hoti, sabbapaṭhamena nayena dīpake nimittāni kittetabbāni. Evaṃ kittetvā sammatā sīmā paṇavasaṇṭhānā hoti. Evaṃ tāva sīmābandhanaṃ veditabbaṃ.
165. ஏவங் ப³த்³தா⁴ பன ஸீமா கதா³ அஸீமா ஹோதீதி? யதா³ ஸங்கோ⁴ ஸீமங் ஸமூஹனதி, ததா³ அஸீமா ஹோதி. கத²ங் பனேஸா ஸமூஹனிதப்³பா³தி? ‘‘ஸீமங் , பி⁴க்க²வே, ஸம்மன்னந்தேன பட²மங் ஸமானஸங்வாஸஸீமா ஸம்மன்னிதப்³பா³, பச்சா² திசீவரேன அவிப்பவாஸோ ஸம்மன்னிதப்³போ³. ஸீமங், பி⁴க்க²வே, ஸமூஹனந்தேன பட²மங் திசீவரேன அவிப்பவாஸோ ஸமூஹந்தப்³போ³, பச்சா² ஸமானஸங்வாஸஸீமா ஸமூஹந்தப்³பா³’’தி வசனதோ பட²மங் அவிப்பவாஸோ ஸமூஹனிதப்³போ³, பச்சா² ஸீமா ஸமூஹனிதப்³பா³தி. கத²ங்? ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
165. Evaṃ baddhā pana sīmā kadā asīmā hotīti? Yadā saṅgho sīmaṃ samūhanati, tadā asīmā hoti. Kathaṃ panesā samūhanitabbāti? ‘‘Sīmaṃ , bhikkhave, sammannantena paṭhamaṃ samānasaṃvāsasīmā sammannitabbā, pacchā ticīvarena avippavāso sammannitabbo. Sīmaṃ, bhikkhave, samūhanantena paṭhamaṃ ticīvarena avippavāso samūhantabbo, pacchā samānasaṃvāsasīmā samūhantabbā’’ti vacanato paṭhamaṃ avippavāso samūhanitabbo, pacchā sīmā samūhanitabbāti. Kathaṃ? Byattena bhikkhunā paṭibalena saṅgho ñāpetabbo –
‘‘ஸுணாது மே, ப⁴ந்தே, ஸங்கோ⁴, யோ ஸோ ஸங்கே⁴ன திசீவரேன அவிப்பவாஸோ ஸம்மதோ, யதி³ ஸங்க⁴ஸ்ஸ பத்தகல்லங், ஸங்கோ⁴ தங் திசீவரேன அவிப்பவாஸங் ஸமூஹனெய்ய, ஏஸா ஞத்தி.
‘‘Suṇātu me, bhante, saṅgho, yo so saṅghena ticīvarena avippavāso sammato, yadi saṅghassa pattakallaṃ, saṅgho taṃ ticīvarena avippavāsaṃ samūhaneyya, esā ñatti.
‘‘ஸுணாது மே, ப⁴ந்தே, ஸங்கோ⁴, யோ ஸோ ஸங்கே⁴ன திசீவரேன அவிப்பவாஸோ ஸம்மதோ, ஸங்கோ⁴ தங் திசீரேன அவிப்பவாஸங் ஸமூஹனதி. யஸ்ஸாயஸ்மதோ க²மதி ஏதஸ்ஸ திசீவரேன அவிப்பவாஸஸ்ஸ ஸமுக்³கா⁴தோ, ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho, yo so saṅghena ticīvarena avippavāso sammato, saṅgho taṃ ticīrena avippavāsaṃ samūhanati. Yassāyasmato khamati etassa ticīvarena avippavāsassa samugghāto, so tuṇhassa. Yassa nakkhamati, so bhāseyya.
‘‘ஸமூஹதோ ஸோ ஸங்கே⁴ன திசீவரேன அவிப்பவாஸோ, க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி (மஹாவ॰ 145) –
‘‘Samūhato so saṅghena ticīvarena avippavāso, khamati saṅghassa, tasmā tuṇhī, evametaṃ dhārayāmī’’ti (mahāva. 145) –
ஏவங் தாவ அவிப்பவாஸோ ஸமூஹனிதப்³போ³.
Evaṃ tāva avippavāso samūhanitabbo.
‘‘ஸுணாது மே, ப⁴ந்தே, ஸங்கோ⁴, யா ஸா ஸங்கே⁴ன ஸீமா ஸம்மதா ஸமானஸங்வாஸா ஏகூபோஸதா², யதி³ ஸங்க⁴ஸ்ஸ பத்தகல்லங், ஸங்கோ⁴ தங் ஸீமங் ஸமூஹனெய்ய ஸமானஸங்வாஸங் ஏகூபோஸத²ங், ஏஸா ஞத்தி.
‘‘Suṇātu me, bhante, saṅgho, yā sā saṅghena sīmā sammatā samānasaṃvāsā ekūposathā, yadi saṅghassa pattakallaṃ, saṅgho taṃ sīmaṃ samūhaneyya samānasaṃvāsaṃ ekūposathaṃ, esā ñatti.
‘‘ஸுணாது மே, ப⁴ந்தே, ஸங்கோ⁴, யா ஸா ஸங்கே⁴ன ஸீமா ஸம்மதா ஸமானஸங்வாஸா ஏகூபோஸதா², ஸங்கோ⁴ தங் ஸீமங் ஸமூஹனதி ஸமானஸங்வாஸங் ஏகூபோஸத²ங். யஸ்ஸாயஸ்மதோ க²மதி ஏதிஸ்ஸா ஸீமாய ஸமானஸங்வாஸாய ஏகூபோஸதா²ய ஸமுக்³கா⁴தோ, ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho, yā sā saṅghena sīmā sammatā samānasaṃvāsā ekūposathā, saṅgho taṃ sīmaṃ samūhanati samānasaṃvāsaṃ ekūposathaṃ. Yassāyasmato khamati etissā sīmāya samānasaṃvāsāya ekūposathāya samugghāto, so tuṇhassa. Yassa nakkhamati, so bhāseyya.
‘‘ஸமூஹதா ஸா ஸீமா ஸங்கே⁴ன ஸமானஸங்வாஸா ஏகூபோஸதா², க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி (மஹாவ॰ 146) –
‘‘Samūhatā sā sīmā saṅghena samānasaṃvāsā ekūposathā, khamati saṅghassa, tasmā tuṇhī, evametaṃ dhārayāmī’’ti (mahāva. 146) –
ஏவங் ஸீமா ஸமூஹனிதப்³பா³.
Evaṃ sīmā samūhanitabbā.
ஸமூஹனந்தேன பன பி⁴க்கு²னா வத்தங் ஜானிதப்³ப³ங். தத்ரித³ங் வத்தங் (மஹாவ॰ அட்ட²॰ 144) – க²ண்ட³ஸீமாய ட²த்வா அவிப்பவாஸஸீமா ந ஸமூஹந்தப்³பா³, ததா² அவிப்பவாஸஸீமாய ட²த்வா க²ண்ட³ஸீமாபி. க²ண்ட³ஸீமாய பன டி²தேன க²ண்ட³ஸீமாவ ஸமூஹனிதப்³பா³, ததா² இதராய டி²தேன இதரா. ஸீமங் நாம த்³வீஹி காரணேஹி ஸமூஹனந்தி பகதியா கு²த்³த³கங் புன ஆவாஸவட்³ட⁴னத்தா²ய மஹதிங் வா காதுங், பகதியா மஹதிங் புன அஞ்ஞேஸங் விஹாரோகாஸதா³னத்தா²ய கு²த்³த³கங் வா காதுங். தத்த² ஸசே க²ண்ட³ஸீமஞ்ச அவிப்பவாஸஸீமஞ்ச ஜானந்தி, ஸமூஹனிதுஞ்சேவ ப³ந்தி⁴துஞ்ச ஸக்கி²ஸ்ஸந்தி. க²ண்ட³ஸீமங் பன ஜானந்தா அவிப்பவாஸங் அஜானந்தாபி ஸமூஹனிதுஞ்சேவ ப³ந்தி⁴துஞ்ச ஸக்கி²ஸ்ஸந்தி. க²ண்ட³ஸீமங் அஜானந்தா அவிப்பவாஸங்யேவ ஜானந்தா சேதியங்க³ணபோ³தி⁴யங்க³ணஉபஓஸதா²கா³ராதீ³ஸு நிராஸங்கட்டா²னேஸு ட²த்வா அப்பேவ நாம ஸமூஹனிதுங் ஸக்கி²ஸ்ஸந்தி, படிப³ந்தி⁴துங் பன ந ஸக்கி²ஸ்ஸந்தேவ. ஸசே ப³ந்தெ⁴ய்யுங், ஸீமாஸம்பே⁴த³ங் கத்வா விஹாரங் அவிஹாரங் கரெய்யுங், தஸ்மா ந ஸமூஹனிதப்³பா³. யே பன உபோ⁴பி ந ஜானந்தி, தே நேவ ஸமூஹனிதுங், ந ப³ந்தி⁴துங் ஸக்கி²ஸ்ஸந்தி. அயஞ்ஹி ஸீமா நாம கம்மவாசாய வா அஸீமா ஹோதி ஸாஸனந்தரதா⁴னேன வா, ந ச ஸக்கா ஸீமங் அஜானந்தேஹி கம்மவாசா காதுங், தஸ்மா ந ஸமூஹனிதப்³பா³, ஸாது⁴கங் பன ஞத்வாயேவ ஸமூஹனிதப்³பா³ சேவ ப³ந்தி⁴தப்³பா³ சாதி. அயங் தாவ ப³த்³த⁴ஸீமாய வினிச்ச²யோ.
Samūhanantena pana bhikkhunā vattaṃ jānitabbaṃ. Tatridaṃ vattaṃ (mahāva. aṭṭha. 144) – khaṇḍasīmāya ṭhatvā avippavāsasīmā na samūhantabbā, tathā avippavāsasīmāya ṭhatvā khaṇḍasīmāpi. Khaṇḍasīmāya pana ṭhitena khaṇḍasīmāva samūhanitabbā, tathā itarāya ṭhitena itarā. Sīmaṃ nāma dvīhi kāraṇehi samūhananti pakatiyā khuddakaṃ puna āvāsavaḍḍhanatthāya mahatiṃ vā kātuṃ, pakatiyā mahatiṃ puna aññesaṃ vihārokāsadānatthāya khuddakaṃ vā kātuṃ. Tattha sace khaṇḍasīmañca avippavāsasīmañca jānanti, samūhanituñceva bandhituñca sakkhissanti. Khaṇḍasīmaṃ pana jānantā avippavāsaṃ ajānantāpi samūhanituñceva bandhituñca sakkhissanti. Khaṇḍasīmaṃ ajānantā avippavāsaṃyeva jānantā cetiyaṅgaṇabodhiyaṅgaṇaupaosathāgārādīsu nirāsaṅkaṭṭhānesu ṭhatvā appeva nāma samūhanituṃ sakkhissanti, paṭibandhituṃ pana na sakkhissanteva. Sace bandheyyuṃ, sīmāsambhedaṃ katvā vihāraṃ avihāraṃ kareyyuṃ, tasmā na samūhanitabbā. Ye pana ubhopi na jānanti, te neva samūhanituṃ, na bandhituṃ sakkhissanti. Ayañhi sīmā nāma kammavācāya vā asīmā hoti sāsanantaradhānena vā, na ca sakkā sīmaṃ ajānantehi kammavācā kātuṃ, tasmā na samūhanitabbā, sādhukaṃ pana ñatvāyeva samūhanitabbā ceva bandhitabbā cāti. Ayaṃ tāva baddhasīmāya vinicchayo.
166. அப³த்³த⁴ஸீமா பன கா³மஸீமா ஸத்தப்³ப⁴ந்தரஸீமா உத³குக்கே²பஸீமாதி திவிதா⁴. தத்த² யாவதா ஏகங் கா³மகெ²த்தங், அயங் கா³மஸீமா நாம, கா³மக்³க³ஹணேன செத்த² (மஹாவ॰ அட்ட²॰ 147) நக³ரம்பி நிக³மம்பி க³ஹிதமேவ ஹோதி. தத்த² யத்தகே பதே³ஸே தஸ்ஸ தஸ்ஸ கா³மஸ்ஸ கா³மபோ⁴ஜகா ப³லிங் லப⁴ந்தி, ஸோ பதே³ஸோ அப்போ வா ஹோது மஹந்தோ வா, கா³மஸீமாத்வேவ ஸங்க்²யங் க³ச்ச²தி. நக³ரனிக³மஸீமாஸுபி ஏஸேவ நயோ. யம்பி ஏகஸ்மிங்யேவ கா³மகெ²த்தே ஏகங் பதே³ஸங் ‘‘அயங் விஸுங்கா³மோ ஹோதூ’’தி பரிச்சி²ந்தி³த்வா ராஜா கஸ்ஸசி தே³தி, ஸோபி விஸுங்கா³மஸீமா ஹோதியேவ, தஸ்மா ஸா ச இதரா ச பகதிகா³மனக³ரனிக³மஸீமா ப³த்³த⁴ஸீமாஸதி³ஸாயேவ ஹொந்தி, கேவலங் பன திசீவரவிப்பவாஸபரிஹாரங் ந லப⁴ந்தி.
166.Abaddhasīmā pana gāmasīmā sattabbhantarasīmā udakukkhepasīmāti tividhā. Tattha yāvatā ekaṃ gāmakhettaṃ, ayaṃ gāmasīmā nāma, gāmaggahaṇena cettha (mahāva. aṭṭha. 147) nagarampi nigamampi gahitameva hoti. Tattha yattake padese tassa tassa gāmassa gāmabhojakā baliṃ labhanti, so padeso appo vā hotu mahanto vā, gāmasīmātveva saṅkhyaṃ gacchati. Nagaranigamasīmāsupi eseva nayo. Yampi ekasmiṃyeva gāmakhette ekaṃ padesaṃ ‘‘ayaṃ visuṃgāmo hotū’’ti paricchinditvā rājā kassaci deti, sopi visuṃgāmasīmā hotiyeva, tasmā sā ca itarā ca pakatigāmanagaranigamasīmā baddhasīmāsadisāyeva honti, kevalaṃ pana ticīvaravippavāsaparihāraṃ na labhanti.
அகா³மகே பன அரஞ்ஞே ஸமந்தா ஸத்தப்³ப⁴ந்தரா ஸத்தப்³ப⁴ந்தரஸீமா நாம. தத்த² அகா³மகங் நாம அரஞ்ஞங் விஞ்ஜா²டவீஆதீ³ஸு வா ஸமுத்³த³மஜ்ஜே² வா மச்ச²ப³ந்தா⁴னங் அக³மனபதே² தீ³பகேஸு லப்³ப⁴தி. ஸமந்தா ஸத்தப்³ப⁴ந்தராதி மஜ்ஜே² டி²தானங் ஸப்³ப³தி³ஸாஸு ஸத்தப்³ப⁴ந்தரா வினிப்³பே³தே⁴ன சுத்³த³ஸ ஹொந்தி. தத்த² ஏகங் அப்³ப⁴ந்தரங் அட்ட²வீஸதிஹத்த²ப்பமாணங் ஹோதி. அயஞ்ச ஸீமா பரிஸவஸேன வட்³ட⁴தி , தஸ்மா ஸமந்தா பரிஸபரியந்ததோ பட்டா²ய அப்³ப⁴ந்தரபரிச்சே²தோ³ காதப்³போ³. ஸசே பன த்³வே ஸங்கா⁴ விஸுங் உபோஸத²ங் கரொந்தி, த்³வின்னங் ஸத்தப்³ப⁴ந்தரானங் அந்தரே அஞ்ஞமேகங் அப்³ப⁴ந்தரங் உபசாரத்தா²ய ட²பேதப்³ப³ங்.
Agāmake pana araññe samantā sattabbhantarā sattabbhantarasīmā nāma. Tattha agāmakaṃ nāma araññaṃ viñjhāṭavīādīsu vā samuddamajjhe vā macchabandhānaṃ agamanapathe dīpakesu labbhati. Samantā sattabbhantarāti majjhe ṭhitānaṃ sabbadisāsu sattabbhantarā vinibbedhena cuddasa honti. Tattha ekaṃ abbhantaraṃ aṭṭhavīsatihatthappamāṇaṃ hoti. Ayañca sīmā parisavasena vaḍḍhati , tasmā samantā parisapariyantato paṭṭhāya abbhantaraparicchedo kātabbo. Sace pana dve saṅghā visuṃ uposathaṃ karonti, dvinnaṃ sattabbhantarānaṃ antare aññamekaṃ abbhantaraṃ upacāratthāya ṭhapetabbaṃ.
167. யா பனேஸா ‘‘ஸப்³பா³, பி⁴க்க²வே, நதீ³ அஸீமா, ஸப்³போ³ ஸமுத்³தோ³ அஸீமோ, ஸப்³போ³ ஜாதஸ்ஸரோ அஸீமோ’’தி (மஹாவ॰ 147) ஏவங் நதீ³ஆதீ³னங் ப³த்³த⁴ஸீமபா⁴வங் படிக்கி²பித்வா புன ‘‘நதி³யா வா, பி⁴க்க²வே, ஸமுத்³தே³ வா ஜாதஸ்ஸரே வா யங் மஜ்ஜி²மஸ்ஸ புரிஸஸ்ஸ ஸமந்தா உத³குக்கே²பா, அயங் தத்த² ஸமானஸங்வாஸா ஏகூபோஸதா²’’தி (மஹாவ॰ 147) வுத்தா, அயங் உத³குக்கே²பஸீமா நாம. தத்த² நதீ³ நதீ³னிமித்தே வுத்தலக்க²ணாவ, ஸமுத்³தோ³பி பாகடோயேவ. யோ பன யேன கேனசி க²ணித்வா அகதோ ஸயங்ஜாதோ ஸொப்³போ⁴ ஸமந்ததோ ஆக³தேன உத³கேன பூரிதோ திட்ட²தி, யத்த² நதி³யங் வுத்தப்பகாரே வஸ்ஸகாலே உத³கங் ஸந்திட்ட²தி, அயங் ஜாதஸ்ஸரோ நாம. யோபி நதி³ங் வா ஸமுத்³த³ங் வா பி⁴ந்தி³த்வா நிக்க²ந்தஉத³கேன க²தோ ஸொப்³போ⁴ ஏதங் லக்க²ணங் பாபுணாதி, அயம்பி ஜாதஸ்ஸரோயேவ. ஏதேஸு நதீ³ஆதீ³ஸு யங் டா²னங் தா²மமஜ்ஜி²மஸ்ஸ புரிஸஸ்ஸ ஸமந்ததோ உத³குக்கே²பேன பரிச்சி²ன்னங், அயங் உத³குக்கே²பஸீமா நாம.
167. Yā panesā ‘‘sabbā, bhikkhave, nadī asīmā, sabbo samuddo asīmo, sabbo jātassaro asīmo’’ti (mahāva. 147) evaṃ nadīādīnaṃ baddhasīmabhāvaṃ paṭikkhipitvā puna ‘‘nadiyā vā, bhikkhave, samudde vā jātassare vā yaṃ majjhimassa purisassa samantā udakukkhepā, ayaṃ tattha samānasaṃvāsā ekūposathā’’ti (mahāva. 147) vuttā, ayaṃ udakukkhepasīmā nāma. Tattha nadī nadīnimitte vuttalakkhaṇāva, samuddopi pākaṭoyeva. Yo pana yena kenaci khaṇitvā akato sayaṃjāto sobbho samantato āgatena udakena pūrito tiṭṭhati, yattha nadiyaṃ vuttappakāre vassakāle udakaṃ santiṭṭhati, ayaṃ jātassaro nāma. Yopi nadiṃ vā samuddaṃ vā bhinditvā nikkhantaudakena khato sobbho etaṃ lakkhaṇaṃ pāpuṇāti, ayampi jātassaroyeva. Etesu nadīādīsu yaṃ ṭhānaṃ thāmamajjhimassa purisassa samantato udakukkhepena paricchinnaṃ, ayaṃ udakukkhepasīmā nāma.
கத²ங் பன உத³குக்கே²போ காதப்³போ³தி? யதா² அக்க²து⁴த்தா தா³ருகு³ளங் கி²பந்தி, ஏவங் உத³கங் வா வாலுகங் வா ஹத்தே²ன க³ஹெத்வா தா²மமஜ்ஜி²மேன புரிஸேன ஸப்³ப³தா²மேன கி²பிதப்³ப³ங். யத்த² ஏவங் கி²த்தங் உத³கங் வா வாலுகா வா பததி, அயமேகோ உத³குக்கே²போ, தஸ்ஸ அந்தோஹத்த²பாஸங் விஜஹித்வா டி²தோ கம்மங் கோபேதி. யாவ பரிஸா வட்³ட⁴தி, தாவ ஸீமாபி வட்³ட⁴தி, பரிஸபரியந்ததோ உத³குக்கே²போயேவ பமாணங், அயங் பன ஏதேஸங் நதீ³ஆதீ³னங் அந்தோயேவ லப்³ப⁴தி, ந ப³ஹி. தஸ்மா நதி³யா வா ஜாதஸ்ஸரே வா யத்தகங் பதே³ஸங் பகதிவஸ்ஸகாலே சதூஸு மாஸேஸு உத³கங் ஒத்த²ரதி, ஸமுத்³தே³ யஸ்மிங் பதே³ஸே பகதிவீசியோ ஓஸரித்வா ஸண்ட²ஹந்தி, ததோ பட்டா²ய கப்பியபூ⁴மி, தத்த² ட²த்வா உபோஸதா²தி³கம்மங் காதுங் வட்டதி, து³ப்³பு³ட்டி²காலே வா கி³ம்ஹே வா நதீ³ஜாதஸ்ஸரேஸு ஸுக்கே²ஸுபி ஸா ஏவ கப்பியபூ⁴மி. ஸசே பன ஸுக்கே² ஜாதஸ்ஸரே வாபிங் வா க²ணந்தி, வப்பங் வா கரொந்தி, தங் டா²னங் கா³மகெ²த்தங் ஹோதி. யா பனேஸா ‘‘கப்பியபூ⁴மீ’’தி வுத்தா, ததோ ப³ஹி உத³குக்கே²பஸீமா ந க³ச்ச²தி, அந்தோ க³ச்ச²தி, தஸ்மா தேஸங் அந்தோ பரிஸபரியந்ததோ பட்டா²ய ஸமந்தா உத³குக்கே²பபரிச்சே²தோ³ காதப்³போ³, அயமெத்த² ஸங்கே²போ.
Kathaṃ pana udakukkhepo kātabboti? Yathā akkhadhuttā dāruguḷaṃ khipanti, evaṃ udakaṃ vā vālukaṃ vā hatthena gahetvā thāmamajjhimena purisena sabbathāmena khipitabbaṃ. Yattha evaṃ khittaṃ udakaṃ vā vālukā vā patati, ayameko udakukkhepo, tassa antohatthapāsaṃ vijahitvā ṭhito kammaṃ kopeti. Yāva parisā vaḍḍhati, tāva sīmāpi vaḍḍhati, parisapariyantato udakukkhepoyeva pamāṇaṃ, ayaṃ pana etesaṃ nadīādīnaṃ antoyeva labbhati, na bahi. Tasmā nadiyā vā jātassare vā yattakaṃ padesaṃ pakativassakāle catūsu māsesu udakaṃ ottharati, samudde yasmiṃ padese pakativīciyo osaritvā saṇṭhahanti, tato paṭṭhāya kappiyabhūmi, tattha ṭhatvā uposathādikammaṃ kātuṃ vaṭṭati, dubbuṭṭhikāle vā gimhe vā nadījātassaresu sukkhesupi sā eva kappiyabhūmi. Sace pana sukkhe jātassare vāpiṃ vā khaṇanti, vappaṃ vā karonti, taṃ ṭhānaṃ gāmakhettaṃ hoti. Yā panesā ‘‘kappiyabhūmī’’ti vuttā, tato bahi udakukkhepasīmā na gacchati, anto gacchati, tasmā tesaṃ anto parisapariyantato paṭṭhāya samantā udakukkhepaparicchedo kātabbo, ayamettha saṅkhepo.
அயங் பன வித்தா²ரோ – ஸசே நதீ³ நாதிதீ³கா⁴ ஹோதி, பப⁴வதோ பட்டா²ய யாவ முக²த்³வாரா ஸப்³ப³த்த² ஸங்கோ⁴ நிஸீத³தி, உத³குக்கே²பஸீமாய கம்மங் நத்தி², ஸகலாபி நதீ³ ஏதேஸங்யேவ பி⁴க்கூ²னங் பஹோதி . யங் பன மஹாஸுமத்தே²ரேன வுத்தங் ‘‘யோஜனங் பவத்தமானாயேவ நதீ³, தத்ராபி உபரி அட்³ட⁴யோஜனங் பஹாய ஹெட்டா² அட்³ட⁴யோஜனே கம்மங் காதுங் வட்டதீ’’தி, தங் மஹாபது³மத்தே²ரேனேவ படிக்கி²த்தங். ப⁴க³வதா ஹி ‘‘திமண்ட³லங் படிச்சா²தெ³த்வா யத்த² கத்த²சி உத்தரந்தியா பி⁴க்கு²னியா அந்தரவாஸகோ தேமியதீ’’தி (பாசி॰ 692) இத³ங் நதி³யா பமாணங் வுத்தங், ந யோஜனங் வா அட்³ட⁴யோஜனங் வா, தஸ்மா யா இமஸ்ஸ ஸுத்தஸ்ஸ வஸேன புப்³பே³ வுத்தலக்க²ணா நதீ³, தஸ்ஸா பப⁴வதோ பட்டா²ய ஸங்க⁴கம்மங் காதுங் வட்டதி. ஸசே பனெத்த² ப³ஹூ பி⁴க்கூ² விஸுங் விஸுங் கம்மங் கரொந்தி, ஸப்³பே³ஹி அத்தனோ ச அஞ்ஞேஸஞ்ச உத³குக்கே²பபரிச்சே²த³ஸ்ஸ அந்தரா அஞ்ஞோ உத³குக்கே²போ ஸீமந்தரிகத்தா²ய ட²பேதப்³போ³, ததோ அதி⁴கங் வட்டதியேவ, ஊனங் பன ந வட்டதீதி வுத்தங். ஜாதஸ்ஸரஸமுத்³தே³பி ஏஸேவ நயோ.
Ayaṃ pana vitthāro – sace nadī nātidīghā hoti, pabhavato paṭṭhāya yāva mukhadvārā sabbattha saṅgho nisīdati, udakukkhepasīmāya kammaṃ natthi, sakalāpi nadī etesaṃyeva bhikkhūnaṃ pahoti . Yaṃ pana mahāsumattherena vuttaṃ ‘‘yojanaṃ pavattamānāyeva nadī, tatrāpi upari aḍḍhayojanaṃ pahāya heṭṭhā aḍḍhayojane kammaṃ kātuṃ vaṭṭatī’’ti, taṃ mahāpadumatthereneva paṭikkhittaṃ. Bhagavatā hi ‘‘timaṇḍalaṃ paṭicchādetvā yattha katthaci uttarantiyā bhikkhuniyā antaravāsako temiyatī’’ti (pāci. 692) idaṃ nadiyā pamāṇaṃ vuttaṃ, na yojanaṃ vā aḍḍhayojanaṃ vā, tasmā yā imassa suttassa vasena pubbe vuttalakkhaṇā nadī, tassā pabhavato paṭṭhāya saṅghakammaṃ kātuṃ vaṭṭati. Sace panettha bahū bhikkhū visuṃ visuṃ kammaṃ karonti, sabbehi attano ca aññesañca udakukkhepaparicchedassa antarā añño udakukkhepo sīmantarikatthāya ṭhapetabbo, tato adhikaṃ vaṭṭatiyeva, ūnaṃ pana na vaṭṭatīti vuttaṃ. Jātassarasamuddepi eseva nayo.
நதி³யா பன ‘‘கம்மங் கரிஸ்ஸாமா’’தி க³தேஹி ஸசே நதீ³ பரிபுண்ணா ஹோதி ஸமதித்திகா, உத³கஸாடிகங் நிவாஸெத்வா அந்தோனதி³யங்யேவ கம்மங் காதப்³ப³ங். ஸசே ந ஸக்கொந்தி, நாவாயபி ட²த்வா காதப்³ப³ங். க³ச்ச²ந்தியா பன நாவாய காதுங் ந வட்டதி. கஸ்மா? உத³குக்கே²பமத்தமேவ ஹி ஸீமா. தங் நாவா ஸீக⁴மேவ அதிக்கமதி, ஏவங் ஸதி அஞ்ஞிஸ்ஸா ஸீமாய ஞத்தி, அஞ்ஞிஸ்ஸா அனுஸாவனா ஹோதி, தஸ்மா நாவங் அரித்தேன வா ட²பெத்வா பாஸாணே வா லம்பெ³த்வா அந்தோனதி³யங் ஜாதருக்கே² வா ப³ந்தி⁴த்வா கம்மங் காதப்³ப³ங். அந்தோனதி³யங் ப³த்³த⁴அட்டகேபி அந்தோனதி³யங் ஜாதருக்கே²பி டி²தேஹி காதுங் வட்டதி. ஸசே பன ருக்க²ஸ்ஸ ஸாகா² வா ததோ நிக்க²ந்தபாரோஹோ வா ப³ஹினதீ³தீரே விஹாரஸீமாய வா கா³மஸீமாய வா பதிட்டி²தோ, ஸீமங் வா ஸோதெ⁴த்வா ஸாக²ங் வா சி²ந்தி³த்வா கம்மங் காதப்³ப³ங். ப³ஹினதீ³தீரே ஜாதருக்க²ஸ்ஸ அந்தோனதி³யங் பவிட்ட²ஸாகா²ய வா பாரோஹே வா நாவங் ப³ந்தி⁴த்வா கம்மங் காதுங் ந வட்டதி, கரொந்தேஹி ஸீமா வா ஸோதே⁴தப்³பா³, சி²ந்தி³த்வா வாஸ்ஸ ப³ஹிபதிட்டி²தபா⁴வோ நாஸேதப்³போ³. நதீ³தீரே பன கா²ணுகங் கொட்டெத்வா தத்த² ப³த்³த⁴னாவாய ந வட்டதியேவ. நதி³யங் ஸேதுங் கரொந்தி, ஸசே அந்தோனதி³யங்யேவ ஸேது ச ஸேதுபாதா³ ச ஹொந்தி, ஸேதும்ஹி டி²தேஹி கம்மங் காதுங் வட்டதி. ஸசே பன ஸேது வா ஸேதுபாதா³ வா ப³ஹிதீரே பதிட்டி²தா, கம்மங் காதுங் ந வட்டதி, ஸீமங் ஸோதெ⁴த்வா காதப்³ப³ங். அத² ஸேதுபாதா³ அந்தோ, ஸேது பன உபி⁴ன்னம்பி தீரானங் உபரிஆகாஸே டி²தோ, வட்டதி.
Nadiyā pana ‘‘kammaṃ karissāmā’’ti gatehi sace nadī paripuṇṇā hoti samatittikā, udakasāṭikaṃ nivāsetvā antonadiyaṃyeva kammaṃ kātabbaṃ. Sace na sakkonti, nāvāyapi ṭhatvā kātabbaṃ. Gacchantiyā pana nāvāya kātuṃ na vaṭṭati. Kasmā? Udakukkhepamattameva hi sīmā. Taṃ nāvā sīghameva atikkamati, evaṃ sati aññissā sīmāya ñatti, aññissā anusāvanā hoti, tasmā nāvaṃ arittena vā ṭhapetvā pāsāṇe vā lambetvā antonadiyaṃ jātarukkhe vā bandhitvā kammaṃ kātabbaṃ. Antonadiyaṃ baddhaaṭṭakepi antonadiyaṃ jātarukkhepi ṭhitehi kātuṃ vaṭṭati. Sace pana rukkhassa sākhā vā tato nikkhantapāroho vā bahinadītīre vihārasīmāya vā gāmasīmāya vā patiṭṭhito, sīmaṃ vā sodhetvā sākhaṃ vā chinditvā kammaṃ kātabbaṃ. Bahinadītīre jātarukkhassa antonadiyaṃ paviṭṭhasākhāya vā pārohe vā nāvaṃ bandhitvā kammaṃ kātuṃ na vaṭṭati, karontehi sīmā vā sodhetabbā, chinditvā vāssa bahipatiṭṭhitabhāvo nāsetabbo. Nadītīre pana khāṇukaṃ koṭṭetvā tattha baddhanāvāya na vaṭṭatiyeva. Nadiyaṃ setuṃ karonti, sace antonadiyaṃyeva setu ca setupādā ca honti, setumhi ṭhitehi kammaṃ kātuṃ vaṭṭati. Sace pana setu vā setupādā vā bahitīre patiṭṭhitā, kammaṃ kātuṃ na vaṭṭati, sīmaṃ sodhetvā kātabbaṃ. Atha setupādā anto, setu pana ubhinnampi tīrānaṃ upariākāse ṭhito, vaṭṭati.
அந்தோனதி³யங் பாஸாணோ வா தீ³பகோ வா ஹோதி, தத்த² யத்தகங் பதே³ஸங் புப்³பே³ வுத்தப்பகாரே பகதிவஸ்ஸகாலே வஸ்ஸானஸ்ஸ சதூஸு மாஸேஸு உத³கங் ஒத்த²ரதி, ஸோ நதீ³ஸங்க்²யமேவ க³ச்ச²தி. அதிவுட்டி²காலே ஓகே⁴ன ஒத்த²தோகாஸோ ந க³ஹேதப்³போ³. ஸோ ஹி கா³மஸீமாஸங்க்²யமேவ க³ச்ச²தி. நதி³தோ மாதிகங் நீஹரந்தா நதி³யங் ஆவரணங் கரொந்தி, தங் சே ஒத்த²ரித்வா வா வினிப்³பி³ஜ்ஜி²த்வா வா உத³கங் க³ச்ச²தி, ஸப்³ப³த்த² பவத்தனட்டா²னே கம்மங் காதுங் வட்டதி. ஸசே பன ஆவரணேன வா கொட்டகப³ந்த⁴னேன வா ஸோதங் பச்சி²ந்த³தி, உத³கங் நப்பவத்ததி, அப்பவத்தனட்டா²னே காதுங் ந வட்டதி, ஆவரணமத்தகேபி காதுங் ந வட்டதி. ஸசே கோசி ஆவரணப்பதே³ஸோ புப்³பே³ வுத்தபாஸாணதீ³பகப்பதே³ஸோ விய உத³கேன அஜ்ஜொ²த்த²ரீயதி, தத்த² வட்டதி. ஸோ ஹி நதீ³ஸங்க்²யமேவ க³ச்ச²தி. நதி³ங் வினாஸெத்வா தளாகங் கரொந்தி, ஹெட்டா² பாளிப³த்³தா⁴ உத³கங் ஆக³ந்த்வா தளாகங் பூரெத்வா திட்ட²தி, எத்த² கம்மங் காதுங் ந வட்டதி, உபரி பவத்தனட்டா²னே ஹெட்டா² ச ச²ட்³டி³தோத³கங் நதி³ங் ஓதரித்வா ஸந்த³னட்டா²னதோ பட்டா²ய வட்டதி. தே³வே அவஸ்ஸந்தே ஹேமந்தகி³ம்ஹேஸு வா ஸுக்க²னதி³யாபி வட்டதி, நதி³தோ நீஹடமாதிகாய ந வட்டதி. ஸசே ஸா காலந்தரேன பி⁴ஜ்ஜித்வா நதீ³ ஹோதி, வட்டதி. காசி நதீ³ உப்பதித்வா கா³மனிக³மஸீமங் ஒத்த²ரித்வா பவத்ததி, நதீ³யேவ ஹோதி, கம்மங் காதுங் வட்டதி. ஸசே பன விஹாரஸீமங் ஒத்த²ரதி, விஹாரஸீமாத்வேவ ஸங்க்²யங் க³ச்ச²தி.
Antonadiyaṃ pāsāṇo vā dīpako vā hoti, tattha yattakaṃ padesaṃ pubbe vuttappakāre pakativassakāle vassānassa catūsu māsesu udakaṃ ottharati, so nadīsaṅkhyameva gacchati. Ativuṭṭhikāle oghena otthatokāso na gahetabbo. So hi gāmasīmāsaṅkhyameva gacchati. Nadito mātikaṃ nīharantā nadiyaṃ āvaraṇaṃ karonti, taṃ ce ottharitvā vā vinibbijjhitvā vā udakaṃ gacchati, sabbattha pavattanaṭṭhāne kammaṃ kātuṃ vaṭṭati. Sace pana āvaraṇena vā koṭṭakabandhanena vā sotaṃ pacchindati, udakaṃ nappavattati, appavattanaṭṭhāne kātuṃ na vaṭṭati, āvaraṇamattakepi kātuṃ na vaṭṭati. Sace koci āvaraṇappadeso pubbe vuttapāsāṇadīpakappadeso viya udakena ajjhottharīyati, tattha vaṭṭati. So hi nadīsaṅkhyameva gacchati. Nadiṃ vināsetvā taḷākaṃ karonti, heṭṭhā pāḷibaddhā udakaṃ āgantvā taḷākaṃ pūretvā tiṭṭhati, ettha kammaṃ kātuṃ na vaṭṭati, upari pavattanaṭṭhāne heṭṭhā ca chaḍḍitodakaṃ nadiṃ otaritvā sandanaṭṭhānato paṭṭhāya vaṭṭati. Deve avassante hemantagimhesu vā sukkhanadiyāpi vaṭṭati, nadito nīhaṭamātikāya na vaṭṭati. Sace sā kālantarena bhijjitvā nadī hoti, vaṭṭati. Kāci nadī uppatitvā gāmanigamasīmaṃ ottharitvā pavattati, nadīyeva hoti, kammaṃ kātuṃ vaṭṭati. Sace pana vihārasīmaṃ ottharati, vihārasīmātveva saṅkhyaṃ gacchati.
ஸமுத்³தே³பி கம்மங் கரொந்தேஹி யங் பதே³ஸங் உத்³த⁴ங் வட்³ட⁴னஉத³கங் வா பகதிவீசி வா வேகே³ன ஆக³ந்த்வா ஒத்த²ரதி, தத்த² காதுங் ந வட்டதி. யஸ்மிங் பன பதே³ஸே பகதிவீசியோ ஓஸரித்வா ஸண்ட²ஹந்தி, ஸோ உத³கந்ததோ பட்டா²ய அந்தோ ஸமுத்³தோ³ நாம, தத்த² டி²தேஹி கம்மங் காதப்³ப³ங். ஸசே ஊமிவேகோ³ பா³த⁴தி, நாவாய வா அட்டகே வா ட²த்வா காதப்³ப³ங். தேஸு வினிச்ச²யோ நதி³யங் வுத்தனயேனேவ வேதி³தப்³போ³. ஸமுத்³தே³ பிட்டி²பாஸாணோ ஹோதி, தங் கதா³சி ஊமியோ ஆக³ந்த்வா ஒத்த²ரந்தி, கதா³சி ந ஒத்த²ரந்தி, தத்த² கம்மங் காதுங் ந வட்டதி. ஸோ ஹி கா³மஸீமாஸங்க்²யமேவ க³ச்ச²தி. ஸசே பன வீசீஸு ஆக³தாஸுபி அனாக³தாஸுபி பகதிஉத³கேனேவ ஒத்த²ரீயதி, வட்டதி. தீ³பகோ வா பப்³ப³தோ வா ஹோதி, ஸோ சே தூ³ரே ஹோதி மச்ச²ப³ந்தா⁴னங் அக³மனபதே², அரஞ்ஞஸீமாஸங்க்²யமேவ க³ச்ச²தி. தேஸங் க³மனபரியந்தஸ்ஸ ஓரதோ பன கா³மஸீமாஸங்க்²யங் க³ச்ச²தி, தத்த² கா³மஸீமங் அஸோதெ⁴த்வா கம்மங் காதுங் ந வட்டதி. ஸமுத்³தோ³ கா³மஸீமங் வா நிக³மஸீமங் வா ஒத்த²ரித்வா திட்ட²தி, ஸமுத்³தோ³வ ஹோதி, தத்த² கம்மங் காதுங் வட்டதி. ஸசே பன விஹாரஸீமங் ஒத்த²ரதி, விஹாரஸீமாத்வேவ ஸங்க்²யங் க³ச்ச²தி.
Samuddepi kammaṃ karontehi yaṃ padesaṃ uddhaṃ vaḍḍhanaudakaṃ vā pakativīci vā vegena āgantvā ottharati, tattha kātuṃ na vaṭṭati. Yasmiṃ pana padese pakativīciyo osaritvā saṇṭhahanti, so udakantato paṭṭhāya anto samuddo nāma, tattha ṭhitehi kammaṃ kātabbaṃ. Sace ūmivego bādhati, nāvāya vā aṭṭake vā ṭhatvā kātabbaṃ. Tesu vinicchayo nadiyaṃ vuttanayeneva veditabbo. Samudde piṭṭhipāsāṇo hoti, taṃ kadāci ūmiyo āgantvā ottharanti, kadāci na ottharanti, tattha kammaṃ kātuṃ na vaṭṭati. So hi gāmasīmāsaṅkhyameva gacchati. Sace pana vīcīsu āgatāsupi anāgatāsupi pakatiudakeneva ottharīyati, vaṭṭati. Dīpako vā pabbato vā hoti, so ce dūre hoti macchabandhānaṃ agamanapathe, araññasīmāsaṅkhyameva gacchati. Tesaṃ gamanapariyantassa orato pana gāmasīmāsaṅkhyaṃ gacchati, tattha gāmasīmaṃ asodhetvā kammaṃ kātuṃ na vaṭṭati. Samuddo gāmasīmaṃ vā nigamasīmaṃ vā ottharitvā tiṭṭhati, samuddova hoti, tattha kammaṃ kātuṃ vaṭṭati. Sace pana vihārasīmaṃ ottharati, vihārasīmātveva saṅkhyaṃ gacchati.
ஜாதஸ்ஸரே கம்மங் கரொந்தேஹி யத்த² புப்³பே³ வுத்தப்பகாரே வஸ்ஸகாலே வஸ்ஸே பச்சி²ன்னமத்தே பிவிதுங் வா ஹத்த²பாதே³ வா தோ⁴விதுங் உத³கங் ந ஹோதி, ஸுக்க²தி, அயங் ந ஜாதஸ்ஸரோ, கா³மகெ²த்தஸங்க்²யமேவ க³ச்ச²தி, தத்த² கம்மங் ந காதப்³ப³ங். யத்த² பன வுத்தப்பகாரே வஸ்ஸகாலே உத³கங் ஸந்திட்ட²தி, அயமேவ ஜாதஸ்ஸரோ. தஸ்ஸ யத்தகே பதே³ஸே வஸ்ஸானங் சாதுமாஸே உத³கங் திட்ட²தி, தத்த² கம்மங் காதுங் வட்டதி. ஸசே க³ம்பீ⁴ரங் உத³கங், அட்டகங் ப³ந்தி⁴த்வா தத்த² டி²தேஹிபி ஜாதஸ்ஸரஸ்ஸ அந்தோஜாதருக்க²ம்ஹி ப³த்³த⁴அட்டகேபி காதுங் வட்டதி. பிட்டி²பாஸாணதீ³பகேஸு பனெத்த² நதி³யங் வுத்தஸதி³ஸோவ வினிச்ச²யோ. ஸமவஸ்ஸதே³வகாலே பஹோனகஜாதஸ்ஸரோ பன சேபி து³ப்³பு³ட்டி²ககாலே வா கி³ம்ஹஹேமந்தேஸு வா ஸுக்க²தி, நிருத³கோ ஹோதி, தத்த² ஸங்க⁴கம்மங் காதுங் வட்டதி. யங் அந்த⁴கட்ட²கதா²யங் வுத்தங் ‘‘ஸப்³போ³ ஜாதஸ்ஸரோ ஸுக்கோ² அனோத³கோ கா³மகெ²த்தங்யேவ ப⁴ஜதீ’’தி, தங் ந க³ஹேதப்³ப³ங். ஸசே பனெத்த² உத³கத்தா²ய ஆவாடங் வா பொக்க²ரணீஆதீ³னி வா க²ணந்தி, தங் டா²னங் அஜாதஸ்ஸரோ ஹோதி, கா³மஸீமாஸங்க்²யங் க³ச்ச²தி. லாபு³திபுஸகாதி³வப்பே கதேபி ஏஸேவ நயோ. ஸசே பன நங் பூரெத்வா த²லங் வா கரொந்தி, ஏகஸ்மிங் தி³ஸாபா⁴கே³ பாளிங் ப³ந்தி⁴த்வா ஸப்³ப³மேவ நங் மஹாதளாகங் வா கரொந்தி, ஸப்³போ³பி அஜாதஸ்ஸரோ ஹோதி, கா³மஸீமாஸங்க்²யங் க³ச்ச²தி. லோணீபி ஜாதஸ்ஸரஸங்க்²யமேவ க³ச்ச²தி. வஸ்ஸிகே சத்தாரோ மாஸே உத³கட்டா²னோகாஸே கம்மங் காதுங் வட்டதீதி. அயங் அப³த்³த⁴ஸீமாய வினிச்ச²யோ.
Jātassare kammaṃ karontehi yattha pubbe vuttappakāre vassakāle vasse pacchinnamatte pivituṃ vā hatthapāde vā dhovituṃ udakaṃ na hoti, sukkhati, ayaṃ na jātassaro, gāmakhettasaṅkhyameva gacchati, tattha kammaṃ na kātabbaṃ. Yattha pana vuttappakāre vassakāle udakaṃ santiṭṭhati, ayameva jātassaro. Tassa yattake padese vassānaṃ cātumāse udakaṃ tiṭṭhati, tattha kammaṃ kātuṃ vaṭṭati. Sace gambhīraṃ udakaṃ, aṭṭakaṃ bandhitvā tattha ṭhitehipi jātassarassa antojātarukkhamhi baddhaaṭṭakepi kātuṃ vaṭṭati. Piṭṭhipāsāṇadīpakesu panettha nadiyaṃ vuttasadisova vinicchayo. Samavassadevakāle pahonakajātassaro pana cepi dubbuṭṭhikakāle vā gimhahemantesu vā sukkhati, nirudako hoti, tattha saṅghakammaṃ kātuṃ vaṭṭati. Yaṃ andhakaṭṭhakathāyaṃ vuttaṃ ‘‘sabbo jātassaro sukkho anodako gāmakhettaṃyeva bhajatī’’ti, taṃ na gahetabbaṃ. Sace panettha udakatthāya āvāṭaṃ vā pokkharaṇīādīni vā khaṇanti, taṃ ṭhānaṃ ajātassaro hoti, gāmasīmāsaṅkhyaṃ gacchati. Lābutipusakādivappe katepi eseva nayo. Sace pana naṃ pūretvā thalaṃ vā karonti, ekasmiṃ disābhāge pāḷiṃ bandhitvā sabbameva naṃ mahātaḷākaṃ vā karonti, sabbopi ajātassaro hoti, gāmasīmāsaṅkhyaṃ gacchati. Loṇīpi jātassarasaṅkhyameva gacchati. Vassike cattāro māse udakaṭṭhānokāse kammaṃ kātuṃ vaṭṭatīti. Ayaṃ abaddhasīmāya vinicchayo.
இதி பாளிமுத்தகவினயவினிச்ச²யஸங்க³ஹே
Iti pāḷimuttakavinayavinicchayasaṅgahe
ஸீமாவினிச்ச²யகதா² ஸமத்தா.
Sīmāvinicchayakathā samattā.
