| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
১০০. সীমোক্কন্তিকপেয্যালকথা
100. Sīmokkantikapeyyālakathā
১৭৭. আৰাসিকেনআগন্তুকপেয্যালে সব্বং ৰেদিতব্বন্তি সম্বন্ধো। ৰেদিতব্বাকারং সহ উপমায দস্সেন্তো আহ ‘‘যথা’’তিআদি। আগন্তুকেনআৰাসিকপেয্যালে পন আনেতব্বন্তি সম্বন্ধো। পুরিমপেয্যালেতি আৰাসিকেনআগন্তুকপেয্যালে। আগন্তুকেনআগন্তুকপেয্যালে পন যোজেতব্বোতি সম্বন্ধো। এত্থ চ পেয্যালন্তি সদিসনযস্স চ তংজাননঞাণস্স চ পাতব্বং রক্খনং পেয্যং, পেয্যং, পেয্যে ৰা, পেয্যায ৰা অলতি সমত্থেতীতি পেয্যালন্তি ৰচনত্থো কাতব্বো।
177. Āvāsikenaāgantukapeyyāle sabbaṃ veditabbanti sambandho. Veditabbākāraṃ saha upamāya dassento āha ‘‘yathā’’tiādi. Āgantukenaāvāsikapeyyāle pana ānetabbanti sambandho. Purimapeyyāleti āvāsikenaāgantukapeyyāle. Āgantukenaāgantukapeyyāle pana yojetabboti sambandho. Ettha ca peyyālanti sadisanayassa ca taṃjānanañāṇassa ca pātabbaṃ rakkhanaṃ peyyaṃ, peyyaṃ, peyye vā, peyyāya vā alati samatthetīti peyyālanti vacanattho kātabbo.
১৭৮. আৰাসিকানং চাতুদ্দসো হুত্ৰা কস্মা আগন্তুকানং পন্নরসোতি আহ ‘‘যেস’’ন্তিআদি । তত্থ যেসন্তি আগন্তুকানং। তিরোরট্ঠতোতি আৰাসিকানং রট্ঠস্স অঞ্ঞরট্ঠতো। তিরোজনপদতোতি একরট্ঠেপি অঞ্ঞজনপদতো। চাতুদ্দসিকং অকংসূতি সঞ্ঞানানত্তৰসেন চাতুদ্দসিকং অকংসু। অনুৰত্তিতব্বন্তি অনুমতিং ৰত্তিতব্বং। ন পটিক্কোসিতব্বন্তি ‘‘ন চাতুদ্দসো’’তি ৰত্ৰা ন ৰারিতব্বং। ন অকামাতি এত্থ কমুধাতু ইচ্ছত্থো, করণত্থে চ নিস্সক্কৰচনন্তি আহ ‘‘ন অনিচ্ছায দাতব্বা’’তি।
178. Āvāsikānaṃ cātuddaso hutvā kasmā āgantukānaṃ pannarasoti āha ‘‘yesa’’ntiādi . Tattha yesanti āgantukānaṃ. Tiroraṭṭhatoti āvāsikānaṃ raṭṭhassa aññaraṭṭhato. Tirojanapadatoti ekaraṭṭhepi aññajanapadato. Cātuddasikaṃ akaṃsūti saññānānattavasena cātuddasikaṃ akaṃsu. Anuvattitabbanti anumatiṃ vattitabbaṃ. Na paṭikkositabbanti ‘‘na cātuddaso’’ti vatvā na vāritabbaṃ. Na akāmāti ettha kamudhātu icchattho, karaṇatthe ca nissakkavacananti āha ‘‘na anicchāya dātabbā’’ti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১০০. সীমোক্কন্তিকপেয্যালং • 100. Sīmokkantikapeyyālaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / সীমোক্কন্তিকপেয্যালকথা • Sīmokkantikapeyyālakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সীমোক্কন্তিকপেয্যালকথাৰণ্ণনা • Sīmokkantikapeyyālakathāvaṇṇanā
