| Library / Tipiṭaka / तिपिटक • Tipiṭaka / पाचित्यादियोजनापाळि • Pācityādiyojanāpāḷi |
१००. सीमोक्कन्तिकपेय्यालकथा
100. Sīmokkantikapeyyālakathā
१७७. आवासिकेनआगन्तुकपेय्याले सब्बं वेदितब्बन्ति सम्बन्धो। वेदितब्बाकारं सह उपमाय दस्सेन्तो आह ‘‘यथा’’तिआदि। आगन्तुकेनआवासिकपेय्याले पन आनेतब्बन्ति सम्बन्धो। पुरिमपेय्यालेति आवासिकेनआगन्तुकपेय्याले। आगन्तुकेनआगन्तुकपेय्याले पन योजेतब्बोति सम्बन्धो। एत्थ च पेय्यालन्ति सदिसनयस्स च तंजाननञाणस्स च पातब्बं रक्खनं पेय्यं, पेय्यं, पेय्ये वा, पेय्याय वा अलति समत्थेतीति पेय्यालन्ति वचनत्थो कातब्बो।
177. Āvāsikenaāgantukapeyyāle sabbaṃ veditabbanti sambandho. Veditabbākāraṃ saha upamāya dassento āha ‘‘yathā’’tiādi. Āgantukenaāvāsikapeyyāle pana ānetabbanti sambandho. Purimapeyyāleti āvāsikenaāgantukapeyyāle. Āgantukenaāgantukapeyyāle pana yojetabboti sambandho. Ettha ca peyyālanti sadisanayassa ca taṃjānanañāṇassa ca pātabbaṃ rakkhanaṃ peyyaṃ, peyyaṃ, peyye vā, peyyāya vā alati samatthetīti peyyālanti vacanattho kātabbo.
१७८. आवासिकानं चातुद्दसो हुत्वा कस्मा आगन्तुकानं पन्नरसोति आह ‘‘येस’’न्तिआदि । तत्थ येसन्ति आगन्तुकानं। तिरोरट्ठतोति आवासिकानं रट्ठस्स अञ्ञरट्ठतो। तिरोजनपदतोति एकरट्ठेपि अञ्ञजनपदतो। चातुद्दसिकं अकंसूति सञ्ञानानत्तवसेन चातुद्दसिकं अकंसु। अनुवत्तितब्बन्ति अनुमतिं वत्तितब्बं। न पटिक्कोसितब्बन्ति ‘‘न चातुद्दसो’’ति वत्वा न वारितब्बं। न अकामाति एत्थ कमुधातु इच्छत्थो, करणत्थे च निस्सक्कवचनन्ति आह ‘‘न अनिच्छाय दातब्बा’’ति।
178. Āvāsikānaṃ cātuddaso hutvā kasmā āgantukānaṃ pannarasoti āha ‘‘yesa’’ntiādi . Tattha yesanti āgantukānaṃ. Tiroraṭṭhatoti āvāsikānaṃ raṭṭhassa aññaraṭṭhato. Tirojanapadatoti ekaraṭṭhepi aññajanapadato. Cātuddasikaṃ akaṃsūti saññānānattavasena cātuddasikaṃ akaṃsu. Anuvattitabbanti anumatiṃ vattitabbaṃ. Na paṭikkositabbanti ‘‘na cātuddaso’’ti vatvā na vāritabbaṃ. Na akāmāti ettha kamudhātu icchattho, karaṇatthe ca nissakkavacananti āha ‘‘na anicchāya dātabbā’’ti.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi / १००. सीमोक्कन्तिकपेय्यालं • 100. Sīmokkantikapeyyālaṃ
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / सीमोक्कन्तिकपेय्यालकथा • Sīmokkantikapeyyālakathā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / सीमोक्कन्तिकपेय्यालकथावण्णना • Sīmokkantikapeyyālakathāvaṇṇanā
