| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
100. සීමොක්‌කන්‌තිකපෙය්‍යාලකථා
100. Sīmokkantikapeyyālakathā
177. ආවාසිකෙනආගන්‌තුකපෙය්‍යාලෙ සබ්‌බං වෙදිතබ්‌බන්‌ති සම්‌බන්‌ධො. වෙදිතබ්‌බාකාරං සහ උපමාය දස්‌සෙන්‌තො ආහ ‘‘යථා’’තිආදි. ආගන්‌තුකෙනආවාසිකපෙය්‍යාලෙ පන ආනෙතබ්‌බන්‌ති සම්‌බන්‌ධො. පුරිමපෙය්‍යාලෙති ආවාසිකෙනආගන්‌තුකපෙය්‍යාලෙ. ආගන්‌තුකෙනආගන්‌තුකපෙය්‍යාලෙ පන යොජෙතබ්‌බොති සම්‌බන්‌ධො. එත්‌ථ ච පෙය්‍යාලන්‌ති සදිසනයස්‌ස ච තංජානනඤාණස්‌ස ච පාතබ්‌බං රක්‌ඛනං පෙය්‍යං, පෙය්‍යං, පෙය්‍යෙ වා, පෙය්‍යාය වා අලති සමත්‌ථෙතීති පෙය්‍යාලන්‌ති වචනත්‌ථො කාතබ්‌බො.
177. Āvāsikenaāgantukapeyyāle sabbaṃ veditabbanti sambandho. Veditabbākāraṃ saha upamāya dassento āha ‘‘yathā’’tiādi. Āgantukenaāvāsikapeyyāle pana ānetabbanti sambandho. Purimapeyyāleti āvāsikenaāgantukapeyyāle. Āgantukenaāgantukapeyyāle pana yojetabboti sambandho. Ettha ca peyyālanti sadisanayassa ca taṃjānanañāṇassa ca pātabbaṃ rakkhanaṃ peyyaṃ, peyyaṃ, peyye vā, peyyāya vā alati samatthetīti peyyālanti vacanattho kātabbo.
178. ආවාසිකානං චාතුද්‌දසො හුත්‌වා කස්‌මා ආගන්‌තුකානං පන්‌නරසොති ආහ ‘‘යෙස’’න්‌තිආදි . තත්‌ථ යෙසන්‌ති ආගන්‌තුකානං. තිරොරට්‌ඨතොති ආවාසිකානං රට්‌ඨස්‌ස අඤ්‌ඤරට්‌ඨතො. තිරොජනපදතොති එකරට්‌ඨෙපි අඤ්‌ඤජනපදතො. චාතුද්‌දසිකං අකංසූති සඤ්‌ඤානානත්‌තවසෙන චාතුද්‌දසිකං අකංසු. අනුවත්‌තිතබ්‌බන්‌ති අනුමතිං වත්‌තිතබ්‌බං. න පටික්‌කොසිතබ්‌බන්‌ති ‘‘න චාතුද්‌දසො’’ති වත්‌වා න වාරිතබ්‌බං. න අකාමාති එත්‌ථ කමුධාතු ඉච්‌ඡත්‌ථො, කරණත්‌ථෙ ච නිස්‌සක්‌කවචනන්‌ති ආහ ‘‘න අනිච්‌ඡාය දාතබ්‌බා’’ති.
178. Āvāsikānaṃ cātuddaso hutvā kasmā āgantukānaṃ pannarasoti āha ‘‘yesa’’ntiādi . Tattha yesanti āgantukānaṃ. Tiroraṭṭhatoti āvāsikānaṃ raṭṭhassa aññaraṭṭhato. Tirojanapadatoti ekaraṭṭhepi aññajanapadato. Cātuddasikaṃ akaṃsūti saññānānattavasena cātuddasikaṃ akaṃsu. Anuvattitabbanti anumatiṃ vattitabbaṃ. Na paṭikkositabbanti ‘‘na cātuddaso’’ti vatvā na vāritabbaṃ. Na akāmāti ettha kamudhātu icchattho, karaṇatthe ca nissakkavacananti āha ‘‘na anicchāya dātabbā’’ti.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 100. සීමොක්‌කන්‌තිකපෙය්‍යාලං • 100. Sīmokkantikapeyyālaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / සීමොක්‌කන්‌තිකපෙය්‍යාලකථා • Sīmokkantikapeyyālakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / සීමොක්‌කන්‌තිකපෙය්‍යාලකථාවණ්‌ණනා • Sīmokkantikapeyyālakathāvaṇṇanā
