| Library / Tipiṭaka / д̇ибидага • Tipiṭaka / д̣̇ийгха нигааяа (адтагат̇аа) • Dīgha nikāya (aṭṭhakathā) |
8. син̇г̇ааласуд̇д̇аван̣н̣анаа
8. Siṅgālasuttavaṇṇanā
нид̣̇аанаван̣н̣анаа
Nidānavaṇṇanā
242. звам̣ мз суд̇анд̇и син̇г̇ааласуд̇д̇ам̣. д̇ад̇рааяамануд̇д̇аанабад̣̇аван̣н̣анаа – взл̣уванз галанд̣̇аганиваабзд̇и взл̣увананд̇и д̇асса уяяаанасса наамам̣. д̇ам̣ гира взл̣уухи баригкид̇д̇ам̣ ахоси адтаарасахад̇т̇зна жа баагаарзна г̇обураддаалагаяуд̇д̇ам̣ нийлобхаасам̣ манорамам̣, д̇зна взл̣увананд̇и вужжад̇и. галанд̣̇агаанан̃жзд̇т̇а ниваабам̣ ад̣̇ам̣су, д̇зна галанд̣̇аганиваабод̇и вужжад̇и.
242.Evaṃme sutanti siṅgālasuttaṃ. Tatrāyamanuttānapadavaṇṇanā – veḷuvane kalandakanivāpeti veḷuvananti tassa uyyānassa nāmaṃ. Taṃ kira veḷūhi parikkhittaṃ ahosi aṭṭhārasahatthena ca pākārena gopuraṭṭālakayuttaṃ nīlobhāsaṃ manoramaṃ, tena veḷuvananti vuccati. Kalandakānañcettha nivāpaṃ adaṃsu, tena kalandakanivāpoti vuccati.
буб̣б̣з гира ан̃н̃ад̇аро рааж̇аа д̇ад̇т̇а уяяаанагийл̣анад̇т̇ам̣ ааг̇ад̇о сураамад̣̇зна мад̇д̇о д̣̇иваа нид̣̇д̣̇ам̣ оггами. бариж̇анобисса ‘‘суд̇д̇о рааж̇аа’’д̇и бубпапалаад̣̇ийхи балобхияамаано ид̇о жид̇о жа баггаами. ат̇а сурааг̇анд̇хзна ан̃н̃ад̇арасмаа сусираругкаа ган̣хасаббо нигкамид̇ваа ран̃н̃о абхимуко ааг̇ажчад̇и, д̇ам̣ д̣̇исваа ругкад̣̇звад̇аа ‘‘ран̃н̃о ж̇ийвид̇ам̣ д̣̇аммий’’д̇и гаал̣агавзсзна ааг̇анд̇ваа ган̣н̣амуулз сад̣̇д̣̇амагааси. рааж̇аа бадиб̣уж̇жхи. ган̣хасаббо нивад̇д̇о. со д̇ам̣ д̣̇исваа ‘‘имааяа гаал̣агааяа мама ж̇ийвид̇ам̣ д̣̇инна’’нд̇и гаал̣агаанам̣ д̇ад̇т̇а ниваабам̣ бадтабзси, абхаяагхосан̃жа гхосаабзси. д̇асмаа д̇ам̣ д̇ад̇о бабхуд̇и ‘‘галанд̣̇аганиваабо’’д̇и сан̇кяам̣ г̇ад̇ам̣. галанд̣̇агаад̇и хи гаал̣агаанам̣ зд̇ам̣ наамам̣.
Pubbe kira aññataro rājā tattha uyyānakīḷanatthaṃ āgato surāmadena matto divā niddaṃ okkami. Parijanopissa ‘‘sutto rājā’’ti pupphaphalādīhi palobhiyamāno ito cito ca pakkāmi. Atha surāgandhena aññatarasmā susirarukkhā kaṇhasappo nikkhamitvā rañño abhimukho āgacchati, taṃ disvā rukkhadevatā ‘‘rañño jīvitaṃ dammī’’ti kāḷakavesena āgantvā kaṇṇamūle saddamakāsi. Rājā paṭibujjhi. Kaṇhasappo nivatto. So taṃ disvā ‘‘imāya kāḷakāya mama jīvitaṃ dinna’’nti kāḷakānaṃ tattha nivāpaṃ paṭṭhapesi, abhayaghosañca ghosāpesi. Tasmā taṃ tato pabhuti ‘‘kalandakanivāpo’’ti saṅkhyaṃ gataṃ. Kalandakāti hi kāḷakānaṃ etaṃ nāmaṃ.
д̇зна ко бана самаязнаад̇и яасмим̣ самаяз бхаг̇аваа рааж̇аг̇ахам̣ г̇ожараг̇аамам̣ гад̇ваа взл̣уванз галанд̣̇аганиваабз вихарад̇и, д̇зна самаязна. син̇г̇аалаго г̇ахабад̇ибуд̇д̇од̇и син̇г̇аалагод̇и д̇асса наамам̣. г̇ахабад̇ибуд̇д̇од̇и г̇ахабад̇исса буд̇д̇о г̇ахабад̇ибуд̇д̇о. д̇асса гира бид̇аа г̇ахабад̇имахаасаало, нид̣̇ахид̇ваа табид̇аа жасса г̇зхз жад̇д̇аалийса д̇ханагодияо ад̇т̇и. со бхаг̇авад̇и нидтан̇г̇ад̇о убаасаго сод̇аабанно, бхарияаабисса сод̇аабаннааязва. буд̇д̇о банасса ассад̣̇д̇хо аббасанно. ат̇а нам̣ маад̇аабид̇аро абхигкан̣ам̣ звам̣ овад̣̇анд̇и – ‘‘д̇аад̇а сад̇т̇аарам̣ убасан̇гама, д̇хаммасзнаабад̇им̣ махаамог̇г̇аллаанам̣ махаагассабам̣ асийд̇имахаасаавагз убасан̇гамаа’’д̇и. со звамааха – ‘‘над̇т̇и мама д̇умхаагам̣ саман̣аанам̣ убасан̇гаманагижжам̣, саман̣аанам̣ санд̇игам̣ г̇анд̇ваа ванд̣̇ид̇аб̣б̣ам̣ ход̇и, онамид̇ваа ванд̣̇анд̇асса бидти руж̇ж̇ад̇и, ж̇аан̣угаани караани хонд̇и, бхуумияам̣ нисийд̣̇ид̇аб̣б̣ам̣ ход̇и, д̇ад̇т̇а нисиннасса вад̇т̇аани гилиссанд̇и ж̇ийранд̇и, самийбз нисиннагаалад̇о бадтааяа гат̇аасаллаабо ход̇и, д̇асмим̣ сад̇и виссаасо уббаж̇ж̇ад̇и, д̇ад̇о ниманд̇зд̇ваа жийварабин̣д̣абаад̇аад̣̇ийни д̣̇аад̇аб̣б̣аани хонд̇и. звам̣ санд̇з ад̇т̇о барихааяад̇и, над̇т̇и маяхам̣ д̇умхаагам̣ саман̣аанам̣ убасан̇гаманагижжа’’нд̇и. ид̇и нам̣ яааваж̇ийвам̣ овад̣̇анд̇ааби маад̇аабид̇аро саасанз убанзд̇ум̣ наасагким̣су.
Tena kho pana samayenāti yasmiṃ samaye bhagavā rājagahaṃ gocaragāmaṃ katvā veḷuvane kalandakanivāpe viharati, tena samayena. Siṅgālako gahapatiputtoti siṅgālakoti tassa nāmaṃ. Gahapatiputtoti gahapatissa putto gahapatiputto. Tassa kira pitā gahapatimahāsālo, nidahitvā ṭhapitā cassa gehe cattālīsa dhanakoṭiyo atthi. So bhagavati niṭṭhaṅgato upāsako sotāpanno, bhariyāpissa sotāpannāyeva. Putto panassa assaddho appasanno. Atha naṃ mātāpitaro abhikkhaṇaṃ evaṃ ovadanti – ‘‘tāta satthāraṃ upasaṅkama, dhammasenāpatiṃ mahāmoggallānaṃ mahākassapaṃ asītimahāsāvake upasaṅkamā’’ti. So evamāha – ‘‘natthi mama tumhākaṃ samaṇānaṃ upasaṅkamanakiccaṃ, samaṇānaṃ santikaṃ gantvā vanditabbaṃ hoti, onamitvā vandantassa piṭṭhi rujjati, jāṇukāni kharāni honti, bhūmiyaṃ nisīditabbaṃ hoti, tattha nisinnassa vatthāni kilissanti jīranti, samīpe nisinnakālato paṭṭhāya kathāsallāpo hoti, tasmiṃ sati vissāso uppajjati, tato nimantetvā cīvarapiṇḍapātādīni dātabbāni honti. Evaṃ sante attho parihāyati, natthi mayhaṃ tumhākaṃ samaṇānaṃ upasaṅkamanakicca’’nti. Iti naṃ yāvajīvaṃ ovadantāpi mātāpitaro sāsane upanetuṃ nāsakkhiṃsu.
ат̇асса бид̇аа маран̣аман̃жз нибанно ‘‘мама буд̇д̇асса оваад̣̇ам̣ д̣̇аад̇ум̣ ваддад̇ий’’д̇и жинд̇зд̇ваа буна жинд̇зси – ‘‘д̣̇исаа д̇аад̇а намассаахий’’д̇и звамасса оваад̣̇ам̣ д̣̇ассаами, со ад̇т̇ам̣ аж̇аананд̇о д̣̇исаа намассиссад̇и, ат̇а нам̣ сад̇т̇аа ваа саавагаа ваа бассид̇ваа ‘‘гим̣ гаросий’’д̇и бужчиссанд̇и. д̇ад̇о ‘‘маяхам̣ бид̇аа д̣̇исаа намассанам̣ гарохийд̇и мам̣ овад̣̇ий’’д̇и вагкад̇и. ат̇асса д̇з ‘‘на д̇уяхам̣ бид̇аа зд̇аа д̣̇исаа намассаабзд̇и, имаа бана д̣̇исаа намассаабзд̇ий’’д̇и д̇хаммам̣ д̣̇зсзссанд̇и. со б̣уд̣̇д̇хасаасанз г̇ун̣ам̣ н̃ад̇ваа ‘‘бун̃н̃агаммам̣ гариссад̇ий’’д̇и. ат̇а нам̣ ааманд̇аабзд̇ваа ‘‘д̇аад̇а, баад̇ова удтааяа ча д̣̇исаа намассзяяаасий’’д̇и ааха. маран̣аман̃жз нибаннасса гат̇аа наама яааваж̇ийвам̣ ануссаран̣ийяаа ход̇и. д̇асмаа со г̇ахабад̇ибуд̇д̇о д̇ам̣ бид̇уважанам̣ ануссаранд̇о д̇ат̇аа агааси. д̇асмаа ‘‘гаалассзва удтааяа рааж̇аг̇ахаа нигкамид̇ваа’’д̇иаад̣̇и вуд̇д̇ам̣.
Athassa pitā maraṇamañce nipanno ‘‘mama puttassa ovādaṃ dātuṃ vaṭṭatī’’ti cintetvā puna cintesi – ‘‘disā tāta namassāhī’’ti evamassa ovādaṃ dassāmi, so atthaṃ ajānanto disā namassissati, atha naṃ satthā vā sāvakā vā passitvā ‘‘kiṃ karosī’’ti pucchissanti. Tato ‘‘mayhaṃ pitā disā namassanaṃ karohīti maṃ ovadī’’ti vakkhati. Athassa te ‘‘na tuyhaṃ pitā etā disā namassāpeti, imā pana disā namassāpetī’’ti dhammaṃ desessanti. So buddhasāsane guṇaṃ ñatvā ‘‘puññakammaṃ karissatī’’ti. Atha naṃ āmantāpetvā ‘‘tāta, pātova uṭṭhāya cha disā namasseyyāsī’’ti āha. Maraṇamañce nipannassa kathā nāma yāvajīvaṃ anussaraṇīyā hoti. Tasmā so gahapatiputto taṃ pituvacanaṃ anussaranto tathā akāsi. Tasmā ‘‘kālasseva uṭṭhāya rājagahā nikkhamitvā’’tiādi vuttaṃ.
243. бут̇уд̣̇исаад̇и б̣ахуд̣̇исаа. ид̣̇аани д̇аа д̣̇ассзнд̇о бурад̇т̇имам̣ д̣̇исанд̇иаад̣̇имааха. баависийд̇и на д̇аава бавидто, бависиссаамийд̇и нигканд̇ад̇д̇аа бана анд̇араамаг̇г̇з вад̇д̇амааноби звам̣ вужжад̇и. ад̣̇д̣̇асаа ко бхаг̇аваад̇и на ид̣̇аанзва ад̣̇д̣̇аса, бажжуусасамаязби б̣уд̣̇д̇хажагкунаа логам̣ вологзнд̇о зд̇ам̣ д̣̇исаа намассамаанам̣ д̣̇исваа ‘‘аж̇ж̇а ахам̣ син̇г̇ааласса г̇ахабад̇ибуд̇д̇асса г̇ихивинаяам̣ син̇г̇ааласуд̇д̇анд̇ам̣ гат̇зссаами, махааж̇анасса саа гат̇аа сапалаа бхависсад̇и, г̇анд̇аб̣б̣ам̣ маяаа зд̇т̇аа’’д̇и. д̇асмаа баад̇ова нигкамид̇ваа рааж̇аг̇ахам̣ бин̣д̣ааяа баависи, бависанд̇о жа нам̣ д̇ат̇зва ад̣̇д̣̇аса. д̇зна вуд̇д̇ам̣ – ‘‘ад̣̇д̣̇асаа ко бхаг̇аваа’’д̇и. зд̇ад̣̇авожаад̇и со гира авид̣̇уурз тид̇амби сад̇т̇аарам̣ на бассад̇и, д̣̇исааязва намассад̇и. ат̇ам̣ нам̣ бхаг̇аваа суурияарасмисампассзна вигасамаанам̣ махаабад̣̇умам̣ вияа мукам̣ виварид̇ваа ‘‘гим̣ ну ко д̇вам̣, г̇ахабад̇ибуд̇д̇аа’’д̇иаад̣̇игам̣ зд̇ад̣̇авожа.
243.Puthudisāti bahudisā. Idāni tā dassento puratthimaṃ disantiādimāha. Pāvisīti na tāva paviṭṭho, pavisissāmīti nikkhantattā pana antarāmagge vattamānopi evaṃ vuccati. Addasā kho bhagavāti na idāneva addasa, paccūsasamayepi buddhacakkhunā lokaṃ volokento etaṃ disā namassamānaṃ disvā ‘‘ajja ahaṃ siṅgālassa gahapatiputtassa gihivinayaṃ siṅgālasuttantaṃ kathessāmi, mahājanassa sā kathā saphalā bhavissati, gantabbaṃ mayā etthā’’ti. Tasmā pātova nikkhamitvā rājagahaṃ piṇḍāya pāvisi, pavisanto ca naṃ tatheva addasa. Tena vuttaṃ – ‘‘addasā kho bhagavā’’ti. Etadavocāti so kira avidūre ṭhitampi satthāraṃ na passati, disāyeva namassati. Athaṃ naṃ bhagavā sūriyarasmisamphassena vikasamānaṃ mahāpadumaṃ viya mukhaṃ vivaritvā ‘‘kiṃ nu kho tvaṃ, gahapatiputtā’’tiādikaṃ etadavoca.
чад̣̇исаад̣̇иван̣н̣анаа
Chadisādivaṇṇanā
244. яат̇аа гат̇ам̣ бана, бханд̇зд̇и со гира д̇ам̣ бхаг̇авад̇о важанам̣ суд̇ваава жинд̇зси ‘‘яаа гира мама бид̇араа ча д̣̇исаа намассид̇аб̣б̣аа’’д̇и вуд̇д̇аа, на гира д̇аа зд̇аа, ан̃н̃аа гира арияасаавагзна ча д̣̇исаа намассид̇аб̣б̣аа. ханд̣̇аахам̣ арияасаавагзна намассид̇аб̣б̣аа д̣̇исааязва бужчид̇ваа намассаамийд̇и. со д̇аа бужчанд̇о яат̇аа гат̇ам̣ бана, бханд̇зд̇иаад̣̇имааха. д̇ад̇т̇а яат̇аад̇и нибаад̇амад̇д̇ам̣. гат̇ам̣ банаад̇и ид̣̇амзва бужчаабад̣̇ам̣. гаммагилзсаад̇и д̇зхи гаммзхи сад̇д̇аа гилиссанд̇и, д̇асмаа гаммагилзсаад̇и вужжанд̇и. таанзхийд̇и гааран̣зхи. абааяамукаанийд̇и винаасамукаани. сод̇и со сод̇аабанно арияасааваго. жуд̣̇д̣̇аса баабагаабаг̇ад̇од̇и зд̇зхи жуд̣̇д̣̇асахи баабагзхи лаамагзхи абаг̇ад̇о. чад̣̇д̣̇исаабадижчаад̣̇ийд̇и ча д̣̇исаа бадижчаад̣̇знд̇о. убхологавиж̇аяааяаад̇и убхиннам̣ ид̇халогабаралогаанам̣ виж̇инанад̇т̇ааяа. аяан̃жзва лого аарад̣̇д̇хо ход̇ийд̇и зваруубасса хи ид̇ха логз бан̃жа взраани на хонд̇и, д̇знасса аяан̃жзва лого аарад̣̇д̇хо ход̇и барид̇осид̇о жзва нибпаад̣̇ид̇о жа. баралогзби бан̃жа взраани на хонд̇и, д̇знасса баро жа лого аараад̇хид̇о ход̇и. д̇асмаа со гааяасса бхзд̣̇аа бараммаран̣аа суг̇ад̇им̣ саг̇г̇ам̣ логам̣ убабаж̇ж̇ад̇и.
244.Yathākathaṃ pana, bhanteti so kira taṃ bhagavato vacanaṃ sutvāva cintesi ‘‘yā kira mama pitarā cha disā namassitabbā’’ti vuttā, na kira tā etā, aññā kira ariyasāvakena cha disā namassitabbā. Handāhaṃ ariyasāvakena namassitabbā disāyeva pucchitvā namassāmīti. So tā pucchanto yathā kathaṃ pana, bhantetiādimāha. Tattha yathāti nipātamattaṃ. Kathaṃ panāti idameva pucchāpadaṃ. Kammakilesāti tehi kammehi sattā kilissanti, tasmā kammakilesāti vuccanti. Ṭhānehīti kāraṇehi. Apāyamukhānīti vināsamukhāni. Soti so sotāpanno ariyasāvako. Cuddasa pāpakāpagatoti etehi cuddasahi pāpakehi lāmakehi apagato. Chaddisāpaṭicchādīti cha disā paṭicchādento. Ubholokavijayāyāti ubhinnaṃ idhalokaparalokānaṃ vijinanatthāya. Ayañceva loko āraddho hotīti evarūpassa hi idha loke pañca verāni na honti, tenassa ayañceva loko āraddho hoti paritosito ceva nipphādito ca. Paralokepi pañca verāni na honti, tenassa paro ca loko ārādhito hoti. Tasmā so kāyassa bhedā parammaraṇā sugatiṃ saggaṃ lokaṃ upapajjati.
245. ид̇и бхаг̇аваа сан̇кзбзна маад̇игам̣ табзд̇ваа ид̣̇аани д̇амзва вид̇т̇аарзнд̇о гад̇амасса жад̇д̇ааро гаммагилзсаад̇иаад̣̇имааха. гаммагилзсод̇и гамман̃жа д̇ам̣ гилзсасамбаяуд̇д̇ад̇д̇аа гилзсо жаад̇и гаммагилзсо. сагилзсоязва хи баан̣ам̣ ханад̇и, ниггилзсо на ханад̇и, д̇асмаа баан̣аад̇ибаад̇о ‘‘гаммагилзсо’’д̇и вуд̇д̇о. ад̣̇иннаад̣̇аанаад̣̇ийсуби зсзва наяо. ат̇аабаранд̇и абарамби зд̇ад̣̇ад̇т̇абарид̣̇ийбагамзва г̇аат̇ааб̣анд̇хам̣ авожаад̇и ад̇т̇о.
245. Iti bhagavā saṅkhepena mātikaṃ ṭhapetvā idāni tameva vitthārento katamassa cattāro kammakilesātiādimāha. Kammakilesoti kammañca taṃ kilesasampayuttattā kileso cāti kammakileso. Sakilesoyeva hi pāṇaṃ hanati, nikkileso na hanati, tasmā pāṇātipāto ‘‘kammakileso’’ti vutto. Adinnādānādīsupi eseva nayo. Athāparanti aparampi etadatthaparidīpakameva gāthābandhaṃ avocāti attho.
жад̇утаанаад̣̇иван̣н̣анаа
Catuṭhānādivaṇṇanā
246. баабагаммам̣ гарод̇ийд̇и ид̣̇ам̣ бхаг̇аваа яасмаа гаарагз д̣̇ассид̇з агаараго баагадо ход̇и, д̇асмаа ‘‘баабагаммам̣ на гарод̇ий’’д̇и маад̇игам̣ табзд̇вааби д̣̇зсанаагусалад̇ааяа батамад̇арам̣ гаарагам̣ д̣̇ассзнд̇о ааха . д̇ад̇т̇а чанд̣̇ааг̇ад̇им̣ г̇ажчанд̇од̇и чанд̣̇зна бзмзна аг̇ад̇им̣ г̇ажчанд̇о агад̇д̇аб̣б̣ам̣ гаронд̇о. барабад̣̇зсуби зсзва наяо. д̇ад̇т̇а яо ‘‘аяам̣ мз мид̇д̇о ваа самбхад̇д̇о ваа санд̣̇идто ваа н̃аад̇аго ваа лан̃ж̇ам̣ ваа бана мз д̣̇зд̇ий’’д̇и чанд̣̇авасзна ассаамигам̣ саамигам̣ гарод̇и, аяам̣ чанд̣̇ааг̇ад̇им̣ г̇ажчанд̇о баабагаммам̣ гарод̇и наама. яо ‘‘аяам̣ мз взрий’’д̇и багад̇ивзравасзна д̇ан̇кан̣уббаннагод̇хавасзна ваа саамигам̣ ассаамигам̣ гарод̇и, аяам̣ д̣̇осааг̇ад̇им̣ г̇ажчанд̇о баабагаммам̣ гарод̇и наама. яо бана манд̣̇ад̇д̇аа момуухад̇д̇аа яам̣ ваа д̇ам̣ ваа вад̇ваа ассаамигам̣ саамигам̣ гарод̇и, аяам̣ мохааг̇ад̇им̣ г̇ажчанд̇о баабагаммам̣ гарод̇и наама. яо бана ‘‘аяам̣ рааж̇аваллабхо ваа висаманиссид̇о ваа анад̇т̇амби мз гарзяяаа’’д̇и бхийд̇о ассаамигам̣ саамигам̣ гарод̇и, аяам̣ бхаяааг̇ад̇им̣ г̇ажчанд̇о баабагаммам̣ гарод̇и наама. яо бана яам̣гин̃жи бхааж̇знд̇о ‘‘аяам̣ мз санд̣̇идто ваа самбхад̇д̇о ваа’’д̇и бзмавасзна ад̇ирзгам̣ д̣̇зд̇и, ‘‘аяам̣ мз взрий’’д̇и д̣̇осавасзна уунагам̣ д̣̇зд̇и, момуухад̇д̇аа д̣̇иннаад̣̇иннам̣ аж̇аанамаано гассажи уунам̣ гассажи ад̇хигам̣ д̣̇зд̇и, ‘‘аяам̣ имасмим̣ ад̣̇ияяамаанз маяхам̣ анад̇т̇амби гарзяяаа’’д̇и бхийд̇о гассажи ад̇ирзгам̣ д̣̇зд̇и, со жад̇уб̣б̣ид̇хоби яат̇аануггамзна чанд̣̇ааг̇ад̇иаад̣̇ийни г̇ажчанд̇о баабагаммам̣ гарод̇и наама.
246.Pāpakammaṃkarotīti idaṃ bhagavā yasmā kārake dassite akārako pākaṭo hoti, tasmā ‘‘pāpakammaṃ na karotī’’ti mātikaṃ ṭhapetvāpi desanākusalatāya paṭhamataraṃ kārakaṃ dassento āha . Tattha chandāgatiṃ gacchantoti chandena pemena agatiṃ gacchanto akattabbaṃ karonto. Parapadesupi eseva nayo. Tattha yo ‘‘ayaṃ me mitto vā sambhatto vā sandiṭṭho vā ñātako vā lañjaṃ vā pana me detī’’ti chandavasena assāmikaṃ sāmikaṃ karoti, ayaṃ chandāgatiṃ gacchanto pāpakammaṃ karoti nāma. Yo ‘‘ayaṃ me verī’’ti pakativeravasena taṅkhaṇuppannakodhavasena vā sāmikaṃ assāmikaṃ karoti, ayaṃ dosāgatiṃ gacchanto pāpakammaṃ karoti nāma. Yo pana mandattā momūhattā yaṃ vā taṃ vā vatvā assāmikaṃ sāmikaṃ karoti, ayaṃ mohāgatiṃ gacchanto pāpakammaṃ karoti nāma. Yo pana ‘‘ayaṃ rājavallabho vā visamanissito vā anatthampi me kareyyā’’ti bhīto assāmikaṃ sāmikaṃ karoti, ayaṃ bhayāgatiṃ gacchanto pāpakammaṃ karoti nāma. Yo pana yaṃkiñci bhājento ‘‘ayaṃ me sandiṭṭho vā sambhatto vā’’ti pemavasena atirekaṃ deti, ‘‘ayaṃ me verī’’ti dosavasena ūnakaṃ deti, momūhattā dinnādinnaṃ ajānamāno kassaci ūnaṃ kassaci adhikaṃ deti, ‘‘ayaṃ imasmiṃ adiyyamāne mayhaṃ anatthampi kareyyā’’ti bhīto kassaci atirekaṃ deti, so catubbidhopi yathānukkamena chandāgatiādīni gacchanto pāpakammaṃ karoti nāma.
арияасааваго бана ж̇ийвид̇агкаяам̣ баабун̣анд̇оби чанд̣̇ааг̇ад̇иаад̣̇ийни на г̇ажчад̇и. д̇зна вуд̇д̇ам̣ – ‘‘имзхи жад̇уухи таанзхи баабагаммам̣ на гарод̇ий’’д̇и.
Ariyasāvako pana jīvitakkhayaṃ pāpuṇantopi chandāgatiādīni na gacchati. Tena vuttaṃ – ‘‘imehi catūhi ṭhānehi pāpakammaṃ na karotī’’ti.
нихийяад̇и яасо д̇ассаад̇и д̇асса аг̇ад̇иг̇аамино гид̇д̇ияасоби бариваараяасоби нихийяад̇и барихааяад̇и.
Nihīyati yaso tassāti tassa agatigāmino kittiyasopi parivārayasopi nihīyati parihāyati.
чаабааяамукаад̣̇иван̣н̣анаа
Chaapāyamukhādivaṇṇanā
247. сураамзраяамаж̇ж̇аббамаад̣̇адтаанаануяог̇од̇и зд̇т̇а сураад̇и бидтасураа буувасураа од̣̇анасураа гин̣н̣абагкид̇д̇аа самбхаарасам̣яуд̇д̇аад̇и бан̃жа сураа. мзраяанд̇и бубпаасаво палаасаво мад̇хваасаво г̇ул̣аасаво самбхаарасам̣яуд̇д̇од̇и бан̃жа аасаваа. д̇ам̣ саб̣б̣амби мад̣̇агаран̣авасзна маж̇ж̇ам̣. бамаад̣̇адтаананд̇и бамаад̣̇агааран̣ам̣. яааяа жзд̇анааяа д̇ам̣ маж̇ж̇ам̣ бивад̇и, д̇асса зд̇ам̣ ад̇хиважанам̣. ануяог̇од̇и д̇асса сураамзраяамаж̇ж̇аббамаад̣̇адтаанасса ануануяог̇о бунаббунам̣ гаран̣ам̣. яасмаа банзд̇ам̣ ануяуд̇д̇асса уббаннаа жзва бхог̇аа барихааяанд̇и, ануббаннаа жа нуббаж̇ж̇анд̇и, д̇асмаа ‘‘бхог̇аанам̣ абааяамука’’нд̇и вуд̇д̇ам̣. вигаалависикаажарияаануяог̇од̇и авзлааяа висикаасу жарияаануяуд̇д̇ад̇аа.
247.Surāmerayamajjappamādaṭṭhānānuyogoti ettha surāti piṭṭhasurā pūvasurā odanasurā kiṇṇapakkhittā sambhārasaṃyuttāti pañca surā. Merayanti pupphāsavo phalāsavo madhvāsavo guḷāsavo sambhārasaṃyuttoti pañca āsavā. Taṃ sabbampi madakaraṇavasena majjaṃ. Pamādaṭṭhānanti pamādakāraṇaṃ. Yāya cetanāya taṃ majjaṃ pivati, tassa etaṃ adhivacanaṃ. Anuyogoti tassa surāmerayamajjappamādaṭṭhānassa anuanuyogo punappunaṃ karaṇaṃ. Yasmā panetaṃ anuyuttassa uppannā ceva bhogā parihāyanti, anuppannā ca nuppajjanti, tasmā ‘‘bhogānaṃ apāyamukha’’nti vuttaṃ. Vikālavisikhācariyānuyogoti avelāya visikhāsu cariyānuyuttatā.
самаж̇ж̇аабхижаран̣анд̇и нажжаад̣̇ид̣̇ассанавасзна самаж̇ж̇ааг̇аманам̣. ааласяаануяог̇од̇и гааяааласияад̇ааяа яуд̇д̇аббаяуд̇д̇ад̇аа.
Samajjābhicaraṇanti naccādidassanavasena samajjāgamanaṃ. Ālasyānuyogoti kāyālasiyatāya yuttappayuttatā.
сураамзраяасса чааад̣̇ийнаваад̣̇иван̣н̣анаа
Surāmerayassa chaādīnavādivaṇṇanā
248. звам̣ чаннам̣ абааяамукаанам̣ маад̇игам̣ табзд̇ваа ид̣̇аани д̇аани вибхаж̇анд̇о ча ко мз, г̇ахабад̇ибуд̇д̇а аад̣̇ийнаваад̇иаад̣̇имааха. д̇ад̇т̇а санд̣̇идтигаад̇и саамам̣ бассид̇аб̣б̣аа, ид̇халогабхаавиний. д̇ханаж̇аанийд̇и д̇ханахаани. галахаббавад̣дханийд̇и ваажаагалахасса жзва хад̇т̇абараамаасаад̣̇игааяагалахасса жа вад̣дханий. рог̇аанам̣ ааяад̇ананд̇и д̇зсам̣ д̇зсам̣ агкирог̇аад̣̇ийнам̣ кзд̇д̇ам̣. агид̇д̇исан̃ж̇ананийд̇и сурам̣ бивид̇ваа хи маад̇арамби бахаранд̇и бид̇арамби, ан̃н̃ам̣ б̣ахумби авад̇д̇аб̣б̣ам̣ вад̣̇анд̇и, агад̇д̇аб̣б̣ам̣ гаронд̇и. д̇зна г̇арахамби д̣̇ан̣д̣амби хад̇т̇абаад̣̇аад̣̇ичзд̣̇амби баабун̣анд̇и, ид̇халогзби баралогзби агид̇д̇им̣ баабун̣анд̇и, ид̇и д̇зсам̣ саа сураа агид̇д̇исан̃ж̇ананий наама ход̇и. гобийнанид̣̇ам̣санийд̇и г̇уяхадтаанан̃хи виварияамаанам̣ хирим̣ гобзд̇и винаасзд̇и, д̇асмаа ‘‘гобийна’’нд̇и вужжад̇и, сураамад̣̇амад̇д̇аа жа д̇ам̣ д̇ам̣ ан̇г̇ам̣ виварид̇ваа вижаранд̇и, д̇зна нзсам̣ саа сураа гобийнасса нид̣̇ам̣санад̇о ‘‘гобийнанид̣̇ам̣саний’’д̇и вужжад̇и. бан̃н̃ааяа д̣̇уб̣б̣алигаран̣ийд̇и сааг̇ад̇ад̇т̇зрасса вияа гаммассагад̇абан̃н̃ам̣ д̣̇уб̣б̣алам̣ гарод̇и, д̇асмаа ‘‘бан̃н̃ааяа д̣̇уб̣б̣алигаран̣ий’’д̇и вужжад̇и. маг̇г̇абан̃н̃ам̣ бана д̣̇уб̣б̣алам̣ гаад̇ум̣ на саггод̇и. ад̇хиг̇ад̇амаг̇г̇аанан̃хи саа анд̇омукамзва на бависад̇и. чадтам̣ бад̣̇анд̇и чадтам̣ гааран̣ам̣.
248. Evaṃ channaṃ apāyamukhānaṃ mātikaṃ ṭhapetvā idāni tāni vibhajanto cha kho me, gahapatiputta ādīnavātiādimāha. Tattha sandiṭṭhikāti sāmaṃ passitabbā, idhalokabhāvinī. Dhanajānīti dhanahāni. Kalahappavaḍḍhanīti vācākalahassa ceva hatthaparāmāsādikāyakalahassa ca vaḍḍhanī. Rogānaṃ āyatananti tesaṃ tesaṃ akkhirogādīnaṃ khettaṃ. Akittisañjananīti suraṃ pivitvā hi mātarampi paharanti pitarampi, aññaṃ bahumpi avattabbaṃ vadanti, akattabbaṃ karonti. Tena garahampi daṇḍampi hatthapādādichedampi pāpuṇanti, idhalokepi paralokepi akittiṃ pāpuṇanti, iti tesaṃ sā surā akittisañjananī nāma hoti. Kopīnanidaṃsanīti guyhaṭṭhānañhi vivariyamānaṃ hiriṃ kopeti vināseti, tasmā ‘‘kopīna’’nti vuccati, surāmadamattā ca taṃ taṃ aṅgaṃ vivaritvā vicaranti, tena nesaṃ sā surā kopīnassa nidaṃsanato ‘‘kopīnanidaṃsanī’’ti vuccati. Paññāya dubbalikaraṇīti sāgatattherassa viya kammassakatapaññaṃ dubbalaṃ karoti, tasmā ‘‘paññāya dubbalikaraṇī’’ti vuccati. Maggapaññaṃ pana dubbalaṃ kātuṃ na sakkoti. Adhigatamaggānañhi sā antomukhameva na pavisati. Chaṭṭhaṃ padanti chaṭṭhaṃ kāraṇaṃ.
249. ад̇д̇аабисса аг̇уд̇д̇о арагкид̇о ход̇ийд̇и авзлааяа жаранд̇о хи каан̣уган̣дагаад̣̇ийниби аггамад̇и, ахинааби яагкаад̣̇ийхиби самааг̇ажчад̇и, д̇ам̣ д̇ам̣ таанам̣ г̇ажчад̇ийд̇и н̃ад̇ваа взриноби нам̣ нилийяид̇ваа г̇ан̣ханд̇и ваа хананд̇и ваа. звам̣ ад̇д̇аабисса аг̇уд̇д̇о ход̇и арагкид̇о. буд̇д̇ад̣̇аарааби ‘‘амхаагам̣ бид̇аа амхаагам̣ саами рад̇д̇им̣ вижарад̇и, гиман̇г̇ам̣ бана маяа’’нд̇и ид̇исса буд̇д̇ад̇хийд̇ароби бхарияааби б̣ахи бад̇т̇анам̣ гад̇ваа рад̇д̇им̣ жаранд̇аа анаяаб̣яасанам̣ баабун̣анд̇и. звам̣ буд̇д̇ад̣̇ааробисса аг̇уд̇д̇о арагкид̇о ход̇и. саабад̇зяяанд̇и д̇асса буд̇д̇ад̣̇аарабариж̇анасса рад̇д̇им̣ жаран̣агабхаавам̣ н̃ад̇ваа жораа сун̃н̃ам̣ г̇зхам̣ бависид̇ваа яам̣ ижчанд̇и, д̇ам̣ харанд̇и. звам̣ саабад̇зяяамбисса аг̇уд̇д̇ам̣ арагкид̇ам̣ ход̇и. сан̇гияо жа ход̇ийд̇и ан̃н̃зхи гад̇абаабагаммзсуби ‘‘иминаа гад̇ам̣ бхависсад̇ий’’д̇и сан̇гид̇аб̣б̣о ход̇и. яасса яасса гхарад̣̇ваарзна яаад̇и, д̇ад̇т̇а яам̣ ан̃н̃зна жорагаммам̣ барад̣̇ааригагаммам̣ ваа гад̇ам̣, д̇ам̣ ‘‘иминаа гад̇а’’нд̇и вуд̇д̇з абхууд̇ам̣ асанд̇амби д̇асмим̣ руухад̇и бад̇идтаад̇и. б̣ахуунан̃жа д̣̇угкад̇хаммаананд̇и зд̇д̇агам̣ д̣̇угкам̣, зд̇д̇агам̣ д̣̇оманассанд̇и вад̇д̇ум̣ на саггаа, ан̃н̃асмим̣ буг̇г̇алз асад̇и саб̣б̣ам̣ вигаалажааримхи аахарид̇аб̣б̣ам̣ ход̇и, ид̇и со б̣ахуунам̣ д̣̇угкад̇хаммаанам̣ бурагкад̇о бурзг̇аамий ход̇и.
249.Attāpissa agutto arakkhito hotīti avelāya caranto hi khāṇukaṇṭakādīnipi akkamati, ahināpi yakkhādīhipi samāgacchati, taṃ taṃ ṭhānaṃ gacchatīti ñatvā verinopi naṃ nilīyitvā gaṇhanti vā hananti vā. Evaṃ attāpissa agutto hoti arakkhito. Puttadārāpi ‘‘amhākaṃ pitā amhākaṃ sāmi rattiṃ vicarati, kimaṅgaṃ pana maya’’nti itissa puttadhītaropi bhariyāpi bahi patthanaṃ katvā rattiṃ carantā anayabyasanaṃ pāpuṇanti. Evaṃ puttadāropissa agutto arakkhito hoti. Sāpateyyanti tassa puttadāraparijanassa rattiṃ caraṇakabhāvaṃ ñatvā corā suññaṃ gehaṃ pavisitvā yaṃ icchanti, taṃ haranti. Evaṃ sāpateyyampissa aguttaṃ arakkhitaṃ hoti. Saṅkiyo ca hotīti aññehi katapāpakammesupi ‘‘iminā kataṃ bhavissatī’’ti saṅkitabbo hoti. Yassa yassa gharadvārena yāti, tattha yaṃ aññena corakammaṃ paradārikakammaṃ vā kataṃ, taṃ ‘‘iminā kata’’nti vutte abhūtaṃ asantampi tasmiṃ rūhati patiṭṭhāti. Bahūnañca dukkhadhammānanti ettakaṃ dukkhaṃ, ettakaṃ domanassanti vattuṃ na sakkā, aññasmiṃ puggale asati sabbaṃ vikālacārimhi āharitabbaṃ hoti, iti so bahūnaṃ dukkhadhammānaṃ purakkhato puregāmī hoti.
250. гва нажжанд̇и ‘‘гасмим̣ таанз наданаадагаад̣̇инажжам̣ ад̇т̇ий’’д̇и бужчид̇ваа яасмим̣ г̇аамз ваа ниг̇амз ваа д̇ам̣ ад̇т̇и, д̇ад̇т̇а г̇анд̇аб̣б̣ам̣ ход̇и, д̇асса ‘‘свз нажжад̣̇ассанам̣ г̇амиссаамий’’д̇и аж̇ж̇а вад̇т̇аг̇анд̇хамаалаад̣̇ийни бадияаад̣̇знд̇ассзва сагалад̣̇ивасамби гаммажчзд̣̇о ход̇и, нажжад̣̇ассанзна згаахамби д̣̇вийхамби д̇ийхамби д̇ад̇т̇зва ход̇и, ат̇а вудтисамбад̇д̇ияаад̣̇ийни лабхид̇вааби ваббаад̣̇игаалз ваббаад̣̇ийни агаронд̇асса ануббаннаа бхог̇аа нуббаж̇ж̇анд̇и, д̇асса б̣ахи г̇ад̇абхаавам̣ н̃ад̇ваа анаарагкз г̇зхз жораа яам̣ ижчанд̇и, д̇ам̣ гаронд̇и, д̇знасса уббаннааби бхог̇аа винассанд̇и. гва г̇ийд̇анд̇иаад̣̇ийсуби зсзва наяо. д̇зсам̣ наанаагаран̣ам̣ б̣рахмаж̇аалз вуд̇д̇амзва.
250.Kvanaccanti ‘‘kasmiṃ ṭhāne naṭanāṭakādinaccaṃ atthī’’ti pucchitvā yasmiṃ gāme vā nigame vā taṃ atthi, tattha gantabbaṃ hoti, tassa ‘‘sve naccadassanaṃ gamissāmī’’ti ajja vatthagandhamālādīni paṭiyādentasseva sakaladivasampi kammacchedo hoti, naccadassanena ekāhampi dvīhampi tīhampi tattheva hoti, atha vuṭṭhisampattiyādīni labhitvāpi vappādikāle vappādīni akarontassa anuppannā bhogā nuppajjanti, tassa bahi gatabhāvaṃ ñatvā anārakkhe gehe corā yaṃ icchanti, taṃ karonti, tenassa uppannāpi bhogā vinassanti. Kva gītantiādīsupi eseva nayo. Tesaṃ nānākaraṇaṃ brahmajāle vuttameva.
251. ж̇аяам̣ взранд̇и ‘‘ж̇ид̇ам̣ маяаа’’д̇и барисамаж̇жхз барасса саадагам̣ ваа взтанам̣ ваа г̇ан̣хаад̇и, со ‘‘барисамаж̇жхз мз авамаанам̣ гароси, ход̇у, сигкаабзссаами на’’нд̇и д̇ад̇т̇а взрам̣ б̣анд̇хад̇и, звам̣ ж̇инанд̇о саяам̣ взрам̣ басавад̇и. ж̇инод̇и ан̃н̃зна ж̇ид̇о самаано яам̣ д̇зна д̇асса взтанам̣ ваа саадаго ваа ан̃н̃ам̣ ваа бана хиран̃н̃асуван̣н̣аад̣̇ивид̇д̇ам̣ г̇ахид̇ам̣, д̇ам̣ анусожад̇и ‘‘ахоси вад̇а мз, д̇ам̣ д̇ам̣ вад̇а мз над̇т̇ий’’д̇и д̇аббажжаяаа сожад̇и. звам̣ со ж̇ино вид̇д̇ам̣ анусожад̇и. сабхааг̇ад̇асса важанам̣ на руухад̇ийд̇и винижчаяадтаанз сагкибудтасса сад̇о важанам̣ на руухад̇и, на бад̇идтаад̇и, ‘‘аяам̣ агкасон̣д̣о ж̇ууд̇агаро, маа д̇асса важанам̣ г̇ан̣хид̇т̇аа’’д̇и вад̇д̇ааро бхаванд̇и. мид̇д̇аамажжаанам̣ барибхууд̇о ход̇ийд̇и д̇ан̃хи мид̇аамажжаа звам̣ вад̣̇анд̇и – ‘‘самма, д̇вамби наама гулабуд̇д̇о ж̇ууд̇агаро чиннабхиннаго худ̇ваа вижараси, на д̇з ид̣̇ам̣ ж̇аад̇иг̇од̇д̇аанам̣ ануруубам̣, ид̇о бадтааяа маа звам̣ гарзяяаасий’’д̇и. со звам̣ вуд̇д̇оби д̇зсам̣ важанам̣ на гарод̇и. д̇ад̇о д̇зна сад̣̇д̇хим̣ згад̇о на д̇идтанд̇и на нисийд̣̇анд̇и. д̇асса гааран̣аа сагкибудтааби на гат̇знд̇и. звам̣ мид̇д̇аамажжаанам̣ барибхууд̇о ход̇и.
251.Jayaṃ veranti ‘‘jitaṃ mayā’’ti parisamajjhe parassa sāṭakaṃ vā veṭhanaṃ vā gaṇhāti, so ‘‘parisamajjhe me avamānaṃ karosi, hotu, sikkhāpessāmi na’’nti tattha veraṃ bandhati, evaṃ jinanto sayaṃ veraṃ pasavati. Jinoti aññena jito samāno yaṃ tena tassa veṭhanaṃ vā sāṭako vā aññaṃ vā pana hiraññasuvaṇṇādivittaṃ gahitaṃ, taṃ anusocati ‘‘ahosi vata me, taṃ taṃ vata me natthī’’ti tappaccayā socati. Evaṃ so jino vittaṃ anusocati. Sabhāgatassa vacanaṃ na rūhatīti vinicchayaṭṭhāne sakkhipuṭṭhassa sato vacanaṃ na rūhati, na patiṭṭhāti, ‘‘ayaṃ akkhasoṇḍo jūtakaro, mā tassa vacanaṃ gaṇhitthā’’ti vattāro bhavanti. Mittāmaccānaṃparibhūto hotīti tañhi mitāmaccā evaṃ vadanti – ‘‘samma, tvampi nāma kulaputto jūtakaro chinnabhinnako hutvā vicarasi, na te idaṃ jātigottānaṃ anurūpaṃ, ito paṭṭhāya mā evaṃ kareyyāsī’’ti. So evaṃ vuttopi tesaṃ vacanaṃ na karoti. Tato tena saddhiṃ ekato na tiṭṭhanti na nisīdanti. Tassa kāraṇā sakkhipuṭṭhāpi na kathenti. Evaṃ mittāmaccānaṃ paribhūto hoti.
ааваахавиваахагаананд̇и ааваахагаа наама яз д̇асса гхарад̇о д̣̇ааригам̣ г̇ахзд̇угаамаа. виваахагаа наама яз д̇асса г̇зхз д̣̇ааригам̣ д̣̇аад̇угаамаа. абад̇т̇ид̇о ход̇ийд̇и анижчид̇о ход̇и. наалам̣ д̣̇аарабхаран̣ааяаад̇и д̣̇аарабхаран̣ааяа на самад̇т̇о. зд̇асса г̇зхз д̣̇ааригаа д̣̇иннааби зд̇асса г̇зхад̇о ааг̇ад̇ааби амхзхи зва босид̇аб̣б̣аа бхависсад̇иязва.
Āvāhavivāhakānanti āvāhakā nāma ye tassa gharato dārikaṃ gahetukāmā. Vivāhakā nāma ye tassa gehe dārikaṃ dātukāmā. Apatthito hotīti anicchito hoti. Nālaṃ dārabharaṇāyāti dārabharaṇāya na samattho. Etassa gehe dārikā dinnāpi etassa gehato āgatāpi amhehi eva positabbā bhavissatiyeva.
баабамид̇д̇ад̇ааяа чааад̣̇ийнаваад̣̇иван̣н̣анаа
Pāpamittatāya chaādīnavādivaṇṇanā
252. д̇худ̇д̇аад̇и агкад̇худ̇д̇аа. сон̣д̣аад̇и ид̇т̇исон̣д̣аа бхад̇д̇асон̣д̣аа буувасон̣д̣аа муулагасон̣д̣аа. бибаасаад̇и баанасон̣д̣аа. нзгад̇игаад̇и бад̇ируубагзна ван̃жанагаа. ван̃жанигаад̇и саммукааван̃жанаахи ван̃жанигаа. саахасигаад̇и згааг̇ааригаад̣̇исаахасигагаммагаарино. д̇яаасса мид̇д̇аа хонд̇ийд̇и д̇з асса мид̇д̇аа хонд̇и. ан̃н̃зхи саббурисзхи сад̣̇д̇хим̣ на рамад̇и г̇анд̇хамаалаад̣̇ийхи алан̇гарид̇ваа варасаяанам̣ ааробид̇асуугаро г̇уут̇агуубамива, д̇з баабамид̇д̇зязва убасан̇гамад̇и. д̇асмаа д̣̇идтз жзва д̇хаммз самбарааяан̃жа б̣ахум̣ анад̇т̇ам̣ ниг̇ажчад̇и.
252.Dhuttāti akkhadhuttā. Soṇḍāti itthisoṇḍā bhattasoṇḍā pūvasoṇḍā mūlakasoṇḍā. Pipāsāti pānasoṇḍā. Nekatikāti patirūpakena vañcanakā. Vañcanikāti sammukhāvañcanāhi vañcanikā. Sāhasikāti ekāgārikādisāhasikakammakārino. Tyāssa mittā hontīti te assa mittā honti. Aññehi sappurisehi saddhiṃ na ramati gandhamālādīhi alaṅkaritvā varasayanaṃ āropitasūkaro gūthakūpamiva, te pāpamitteyeva upasaṅkamati. Tasmā diṭṭhe ceva dhamme samparāyañca bahuṃ anatthaṃ nigacchati.
253. ад̇исийд̇анд̇и гаммам̣ на гарод̇ийд̇и мануссзхи гаалассзва вудтааяа ‘‘зт̇а бхо гамманд̇ам̣ г̇ажчаамаа’’д̇и вуд̇д̇о ‘‘ад̇исийд̇ам̣ д̇аава, адтийни бхиж̇ж̇анд̇и вияа, г̇ажчат̇а д̇умхз бажчаа ж̇ааниссаамий’’д̇и аг̇г̇им̣ д̇абанд̇о нисийд̣̇ад̇и. д̇з г̇анд̇ваа гаммам̣ гаронд̇и. ид̇арасса гаммам̣ барихааяад̇и. ад̇иун̣ханд̇иаад̣̇ийсуби зсзва наяо.
253.Atisītanti kammaṃ na karotīti manussehi kālasseva vuṭṭhāya ‘‘etha bho kammantaṃ gacchāmā’’ti vutto ‘‘atisītaṃ tāva, aṭṭhīni bhijjanti viya, gacchatha tumhe pacchā jānissāmī’’ti aggiṃ tapanto nisīdati. Te gantvā kammaṃ karonti. Itarassa kammaṃ parihāyati. Atiuṇhantiādīsupi eseva nayo.
ход̇и баанасакаа наамаад̇и згажжо баанадтаанз сурааг̇зхзязва сахааяо ход̇и. ‘‘баннасакаа’’д̇иби баато, аяамзвад̇т̇о. саммияасаммияод̇и самма саммаад̇и вад̣̇анд̇о саммукзязва сахааяо ход̇и, бараммукз взрийсад̣̇исо од̇аарамзва г̇авзсад̇и. ад̇т̇зсу ж̇аад̇зсууд̇и д̇ат̇ааруубзсу гижжзсу самуббаннзсу. взраббасавод̇и взраб̣ахулад̇аа. анад̇т̇ад̇аад̇и анад̇т̇агаарид̇аа. сугад̣̇арияад̇аад̇и судту гад̣̇арияад̇аа т̇ад̣̇д̇хамажчарияабхааво . уд̣̇агамива ин̣ам̣ виг̇аахад̇ийд̇и баасаан̣о уд̣̇агам̣ вияа сам̣сийд̣̇анд̇о ин̣ам̣ виг̇аахад̇и.
Hoti pānasakhā nāmāti ekacco pānaṭṭhāne surāgeheyeva sahāyo hoti. ‘‘Pannasakhā’’tipi pāṭho, ayamevattho. Sammiyasammiyoti samma sammāti vadanto sammukheyeva sahāyo hoti, parammukhe verīsadiso otārameva gavesati. Atthesujātesūti tathārūpesu kiccesu samuppannesu. Verappasavoti verabahulatā. Anatthatāti anatthakāritā. Sukadariyatāti suṭṭhu kadariyatā thaddhamacchariyabhāvo . Udakamiva iṇaṃ vigāhatīti pāsāṇo udakaṃ viya saṃsīdanto iṇaṃ vigāhati.
рад̇д̇инудтаанад̣̇зссинаад̇и рад̇д̇им̣ анудтаанасийлзна. ад̇исааяамид̣̇ам̣ ахууд̇и ид̣̇ам̣ ад̇исааяам̣ ж̇аад̇анд̇и яз звам̣ вад̇ваа гаммам̣ на гаронд̇и. ид̇и виссадтагамманд̇зд̇и звам̣ вад̇ваа барижжад̇д̇агамманд̇з. ад̇т̇аа ажжзнд̇и маан̣авзд̇и зваруубз буг̇г̇алз ад̇т̇аа ад̇иггаманд̇и, д̇зсу на д̇идтанд̇и.
Rattinuṭṭhānadessināti rattiṃ anuṭṭhānasīlena. Atisāyamidaṃ ahūti idaṃ atisāyaṃ jātanti ye evaṃ vatvā kammaṃ na karonti. Iti vissaṭṭhakammanteti evaṃ vatvā pariccattakammante. Atthā accenti māṇaveti evarūpe puggale atthā atikkamanti, tesu na tiṭṭhanti.
д̇ин̣аа бхияяод̇и д̇ин̣ад̇оби уд̇д̇ари. со сукам̣ на вихааяад̇ийд̇и со бурисо сукам̣ на ж̇ахаад̇и, сукасаман̇г̇ийязва ход̇и. иминаа гат̇аамаг̇г̇зна имамад̇т̇ам̣ д̣̇ассзд̇и ‘‘г̇ихибхууд̇зна сад̇аа зд̇д̇агам̣ гаммам̣ на гаад̇аб̣б̣ам̣, гаронд̇асса вад̣дхи наама над̇т̇и. ид̇халогз баралогз г̇арахамзва баабун̣аад̇ий’’д̇и.
Tiṇā bhiyyoti tiṇatopi uttari. So sukhaṃ na vihāyatīti so puriso sukhaṃ na jahāti, sukhasamaṅgīyeva hoti. Iminā kathāmaggena imamatthaṃ dasseti ‘‘gihibhūtena satā ettakaṃ kammaṃ na kātabbaṃ, karontassa vaḍḍhi nāma natthi. Idhaloke paraloke garahameva pāpuṇātī’’ti.
мид̇д̇абад̇ируубагаад̣̇иван̣н̣анаа
Mittapatirūpakādivaṇṇanā
254. ид̣̇аани яо звам̣ гарод̇о анад̇т̇о уббаж̇ж̇ад̇и, ан̃н̃аани ваа бана яаани гаанижи бхаяаани язгзжи убад̣̇д̣̇аваа язгзжи убасаг̇г̇аа, саб̣б̣з д̇з б̣аалам̣ ниссааяа уббаж̇ж̇анд̇и. д̇асмаа ‘‘зваруубаа б̣аалаа на сзвид̇аб̣б̣аа’’д̇и б̣аалз мид̇д̇абад̇ируубагз амид̇д̇з д̣̇ассзд̇ум̣ жад̇д̇ааромз, г̇ахабад̇ибуд̇д̇а амид̇д̇аад̇иаад̣̇имааха. д̇ад̇т̇а ан̃н̃ад̣̇ад̇т̇ухарод̇и саяам̣ д̇ужчахад̇т̇о ааг̇анд̇ваа згам̣сзна яам̣гин̃жи харад̇иязва. важийбарамод̇и важанабарамо важанамад̇д̇знзва д̣̇ааяаго гаараго вияа ход̇и. ануббияабхаан̣ийд̇и ануббияам̣ бхан̣ад̇и. абааяасахааяод̇и бхог̇аанам̣ абааязсу сахааяо ход̇и.
254. Idāni yo evaṃ karoto anattho uppajjati, aññāni vā pana yāni kānici bhayāni yekeci upaddavā yekeci upasaggā, sabbe te bālaṃ nissāya uppajjanti. Tasmā ‘‘evarūpā bālā na sevitabbā’’ti bāle mittapatirūpake amitte dassetuṃ cattārome, gahapatiputta amittātiādimāha. Tattha aññadatthuharoti sayaṃ tucchahattho āgantvā ekaṃsena yaṃkiñci haratiyeva. Vacīparamoti vacanaparamo vacanamatteneva dāyako kārako viya hoti. Anuppiyabhāṇīti anuppiyaṃ bhaṇati. Apāyasahāyoti bhogānaṃ apāyesu sahāyo hoti.
255. звам̣ жад̇д̇ааро амид̇д̇з д̣̇ассзд̇ваа буна д̇ад̇т̇а згзгам̣ жад̇уухи гааран̣зхи вибхаж̇анд̇о жад̇уухи ко, г̇ахабад̇ибуд̇д̇аад̇иаад̣̇имааха. д̇ад̇т̇а ан̃н̃ад̣̇ад̇т̇ухаро ход̇ийд̇и згам̣сзна хаарагоязва ход̇и. сахааяасса г̇зхам̣ рид̇д̇ахад̇т̇о ааг̇анд̇ваа нивад̇т̇асаадагаад̣̇ийнам̣ ван̣н̣ам̣ бхаасад̇и, со ‘‘ад̇ивияа д̇вам̣ самма имасса ван̣н̣ам̣ бхаасасий’’д̇и ан̃н̃ам̣ ниваасзд̇ваа д̇ам̣ д̣̇зд̇и. аббзна б̣ахумижчад̇ийд̇и яам̣гин̃жи аббагам̣ д̣̇ад̇ваа д̇асса санд̇игаа б̣ахум̣ бад̇т̇зд̇и. бхаяасса гижжам̣ гарод̇ийд̇и ад̇д̇ано бхаяз уббаннз д̇асса д̣̇аасо вияа худ̇ваа д̇ам̣ д̇ам̣ гижжам̣ гарод̇и, аяам̣ саб̣б̣ад̣̇аа на гарод̇и, бхаяз уббаннз гарод̇и, на бзмзнаад̇и амид̇д̇о наама ж̇аад̇о. сзвад̇и ад̇т̇агааран̣аад̇и мид̇д̇асант̇ававасзна на сзвад̇и, ад̇д̇ано ад̇т̇амзва бажжаасийсанд̇о сзвад̇и.
255. Evaṃ cattāro amitte dassetvā puna tattha ekekaṃ catūhi kāraṇehi vibhajanto catūhi kho, gahapatiputtātiādimāha. Tattha aññadatthuharo hotīti ekaṃsena hārakoyeva hoti. Sahāyassa gehaṃ rittahattho āgantvā nivatthasāṭakādīnaṃ vaṇṇaṃ bhāsati, so ‘‘ativiya tvaṃ samma imassa vaṇṇaṃ bhāsasī’’ti aññaṃ nivāsetvā taṃ deti. Appena bahumicchatīti yaṃkiñci appakaṃ datvā tassa santikā bahuṃ pattheti. Bhayassakiccaṃ karotīti attano bhaye uppanne tassa dāso viya hutvā taṃ taṃ kiccaṃ karoti, ayaṃ sabbadā na karoti, bhaye uppanne karoti, na pemenāti amitto nāma jāto. Sevati atthakāraṇāti mittasanthavavasena na sevati, attano atthameva paccāsīsanto sevati.
256. ад̇ийд̇зна бадисант̇арад̇ийд̇и сахааяз ааг̇ад̇з ‘‘хияяо ваа барз ваа на ааг̇ад̇оси, амхаагам̣ имасмим̣ ваарз сассам̣ ад̇ивияа нибпаннам̣, б̣ахууни саалияаваб̣ийж̇аад̣̇ийни табзд̇ваа маг̇г̇ам̣ ологзнд̇аа нисийд̣̇имха, аж̇ж̇а бана саб̣б̣ам̣ кийн̣а’’нд̇и звам̣ ад̇ийд̇зна сан̇г̇ан̣хаад̇и. анааг̇ад̇знаад̇и ‘‘имасмим̣ ваарз амхаагам̣ сассам̣ манаабам̣ бхависсад̇и, палабхаарабхарид̇аа саалиаад̣̇аяо, сассасан̇г̇ахз гад̇з д̇умхаагам̣ сан̇г̇ахам̣ гаад̇ум̣ самад̇т̇аа бхависсаамаа’’д̇и звам̣ анааг̇ад̇зна сан̇г̇ан̣хаад̇и. нирад̇т̇агзнаад̇и хад̇т̇игканд̇хз ваа ассабидтз ваа нисинно сахааяам̣ д̣̇исваа ‘‘зхи, бхо, ид̇ха нисийд̣̇аа’’д̇и вад̣̇ад̇и. манаабам̣ саадагам̣ ниваасзд̇ваа ‘‘сахааяагасса вад̇а мз анужчавиго ан̃н̃о бана маяхам̣ над̇т̇ий’’д̇и вад̣̇ад̇и, звам̣ нирад̇т̇агзна сан̇г̇ан̣хаад̇и наама. бажжуббаннзсу гижжзсу б̣яасанам̣ д̣̇ассзд̇ийд̇и ‘‘сагадзна мз ад̇т̇о’’д̇и вуд̇д̇з ‘‘жаггамасса бхиннам̣, агко чинно’’д̇иаад̣̇ийни вад̣̇ад̇и.
256.Atītena paṭisantharatīti sahāye āgate ‘‘hiyyo vā pare vā na āgatosi, amhākaṃ imasmiṃ vāre sassaṃ ativiya nipphannaṃ, bahūni sāliyavabījādīni ṭhapetvā maggaṃ olokentā nisīdimha, ajja pana sabbaṃ khīṇa’’nti evaṃ atītena saṅgaṇhāti. Anāgatenāti ‘‘imasmiṃ vāre amhākaṃ sassaṃ manāpaṃ bhavissati, phalabhārabharitā sāliādayo, sassasaṅgahe kate tumhākaṃ saṅgahaṃ kātuṃ samatthā bhavissāmā’’ti evaṃ anāgatena saṅgaṇhāti. Niratthakenāti hatthikkhandhe vā assapiṭṭhe vā nisinno sahāyaṃ disvā ‘‘ehi, bho, idha nisīdā’’ti vadati. Manāpaṃ sāṭakaṃ nivāsetvā ‘‘sahāyakassa vata me anucchaviko añño pana mayhaṃ natthī’’ti vadati, evaṃ niratthakena saṅgaṇhāti nāma. Paccuppannesu kiccesu byasanaṃ dassetīti ‘‘sakaṭena me attho’’ti vutte ‘‘cakkamassa bhinnaṃ, akkho chinno’’tiādīni vadati.
257. баабагамбисса ануж̇аанаад̇ийд̇и баан̣аад̇ибаад̇аад̣̇ийсу яам̣гин̃жи гаромаад̇и вуд̇д̇з ‘‘саад̇ху самма гаромаа’’д̇и ануж̇аанаад̇и. галяаан̣зби зсзва наяо. сахааяо ход̇ийд̇и ‘‘асугадтаанз сурам̣ биванд̇и, зхи д̇ад̇т̇а г̇ажчаамаа’’д̇и вуд̇д̇з саад̇хууд̇и г̇ажчад̇и. зса наяо саб̣б̣ад̇т̇а. ид̇и вин̃н̃ааяаад̇и ‘‘мид̇д̇абад̇ируубагаа зд̇з’’д̇и звам̣ ж̇аанид̇ваа.
257.Pāpakampissa anujānātīti pāṇātipātādīsu yaṃkiñci karomāti vutte ‘‘sādhu samma karomā’’ti anujānāti. Kalyāṇepi eseva nayo. Sahāyo hotīti ‘‘asukaṭṭhāne suraṃ pivanti, ehi tattha gacchāmā’’ti vutte sādhūti gacchati. Esa nayo sabbattha. Iti viññāyāti ‘‘mittapatirūpakā ete’’ti evaṃ jānitvā.
сухад̣̇амид̇д̇аад̣̇иван̣н̣анаа
Suhadamittādivaṇṇanā
260. звам̣ на сзвид̇аб̣б̣з баабамид̇д̇з д̣̇ассзд̇ваа ид̣̇аани сзвид̇аб̣б̣з галяаан̣амид̇д̇з д̣̇ассзнд̇о буна жад̇д̇ааромз, г̇ахабад̇ибуд̇д̇аад̇иаад̣̇имааха. д̇ад̇т̇а сухад̣̇аад̇и сунд̣̇арахад̣̇аяаа.
260. Evaṃ na sevitabbe pāpamitte dassetvā idāni sevitabbe kalyāṇamitte dassento puna cattārome, gahapatiputtātiādimāha. Tattha suhadāti sundarahadayā.
261. бамад̇д̇ам̣ рагкад̇ийд̇и маж̇ж̇ам̣ бивид̇ваа г̇аамамаж̇жхз ваа г̇аамад̣̇ваарз ваа маг̇г̇з ваа нибаннам̣ д̣̇исваа ‘‘звам̣нибаннасса гожид̣̇зва ниваасанабаарубанамби харзяяаа’’д̇и самийбз нисийд̣̇ид̇ваа баб̣уд̣̇д̇хагаалз г̇ахзд̇ваа г̇ажчад̇и. бамад̇д̇асса саабад̇зяяанд̇и сахааяо б̣ахиг̇ад̇о ваа ход̇и сурам̣ бивид̇ваа ваа бамад̇д̇о, г̇зхам̣ анаарагкам̣ ‘‘гожид̣̇зва яам̣гин̃жи харзяяаа’’д̇и г̇зхам̣ бависид̇ваа д̇асса д̇ханам̣ рагкад̇и. бхийд̇ассаад̇и гисмин̃жид̣̇зва бхаяз уббаннз ‘‘маа бхааяи, маад̣̇исз сахааяз тид̇з гим̣ бхааяасий’’д̇и д̇ам̣ бхаяам̣ харанд̇о бадисаран̣ам̣ ход̇и. д̇ад̣̇д̣̇иг̇ун̣ам̣ бхог̇анд̇и гижжагаран̣ийяз уббаннз сахааяам̣ ад̇д̇ано санд̇игам̣ ааг̇ад̇ам̣ д̣̇исваа вад̣̇ад̇и ‘‘гасмаа ааг̇ад̇осий’’д̇и? рааж̇агулз гаммам̣ ад̇т̇ийд̇и. гим̣ лад̣̇д̇хум̣ ваддад̇ийд̇и? зго гахаабан̣од̇и. ‘‘наг̇арз гаммам̣ наама на згагахаабан̣зна нибпаж̇ж̇ад̇и, д̣̇вз г̇ан̣хаахий’’д̇и звам̣ яад̇д̇агам̣ вад̣̇ад̇и, д̇ад̇о д̣̇иг̇ун̣ам̣ д̣̇зд̇и.
261.Pamattaṃ rakkhatīti majjaṃ pivitvā gāmamajjhe vā gāmadvāre vā magge vā nipannaṃ disvā ‘‘evaṃnipannassa kocideva nivāsanapārupanampi hareyyā’’ti samīpe nisīditvā pabuddhakāle gahetvā gacchati. Pamattassasāpateyyanti sahāyo bahigato vā hoti suraṃ pivitvā vā pamatto, gehaṃ anārakkhaṃ ‘‘kocideva yaṃkiñci hareyyā’’ti gehaṃ pavisitvā tassa dhanaṃ rakkhati. Bhītassāti kismiñcideva bhaye uppanne ‘‘mā bhāyi, mādise sahāye ṭhite kiṃ bhāyasī’’ti taṃ bhayaṃ haranto paṭisaraṇaṃ hoti. Taddiguṇaṃ bhoganti kiccakaraṇīye uppanne sahāyaṃ attano santikaṃ āgataṃ disvā vadati ‘‘kasmā āgatosī’’ti? Rājakule kammaṃ atthīti. Kiṃ laddhuṃ vaṭṭatīti? Eko kahāpaṇoti. ‘‘Nagare kammaṃ nāma na ekakahāpaṇena nipphajjati, dve gaṇhāhī’’ti evaṃ yattakaṃ vadati, tato diguṇaṃ deti.
262. г̇уяхамасса аажигкад̇ийд̇и ад̇д̇ано г̇уяхам̣ ниг̇уухид̇ум̣ яуд̇д̇агат̇ам̣ ан̃н̃асса агат̇зд̇ваа д̇ассзва аажигкад̇и. г̇уяхамасса бариг̇уухад̇ийд̇и д̇зна гат̇ид̇ам̣ г̇уяхам̣ яат̇аа ан̃н̃о на ж̇аанаад̇и, звам̣ рагкад̇и. аабад̣̇аасу на виж̇ахад̇ийд̇и уббаннз бхаяз на барижжаж̇ад̇и. ж̇ийвид̇амбисса ад̇т̇ааяаад̇и ад̇д̇ано ж̇ийвид̇амби д̇асса сахааяасса ад̇т̇ааяа барижжад̇д̇амзва ход̇и, ад̇д̇ано ж̇ийвид̇ам̣ аг̇ан̣зд̇вааби д̇асса гаммам̣ гарод̇иязва.
262.Guyhamassa ācikkhatīti attano guyhaṃ nigūhituṃ yuttakathaṃ aññassa akathetvā tasseva ācikkhati. Guyhamassa parigūhatīti tena kathitaṃ guyhaṃ yathā añño na jānāti, evaṃ rakkhati. Āpadāsu na vijahatīti uppanne bhaye na pariccajati. Jīvitampissa atthāyāti attano jīvitampi tassa sahāyassa atthāya pariccattameva hoti, attano jīvitaṃ agaṇetvāpi tassa kammaṃ karotiyeva.
263. баабаа ниваарзд̇ийд̇и амхзсу бассанд̇зсу бассанд̇зсу д̇вам̣ звам̣ гаад̇ум̣ на лабхаси, бан̃жа взраани д̣̇аса агусалагаммабат̇з маа гарохийд̇и ниваарзд̇и. галяаан̣з нивзсзд̇ийд̇и галяаан̣агаммз д̇ийсу саран̣зсу бан̃жасийлзсу д̣̇асагусалагаммабат̇зсу вад̇д̇ассу, д̣̇аанам̣ д̣̇зхи бун̃н̃ам̣ гарохи д̇хаммам̣ сун̣аахийд̇и звам̣ галяаан̣з нияож̇зд̇и. ассуд̇ам̣ саавзд̇ийд̇и ассуд̇абуб̣б̣ам̣ сукумам̣ нибун̣ам̣ гааран̣ам̣ саавзд̇и. саг̇г̇асса маг̇г̇анд̇и ид̣̇ам̣ гаммам̣ гад̇ваа саг̇г̇з ниб̣б̣ад̇д̇анд̇ийд̇и звам̣ саг̇г̇асса маг̇г̇ам̣ аажигкад̇и.
263.Pāpā nivāretīti amhesu passantesu passantesu tvaṃ evaṃ kātuṃ na labhasi, pañca verāni dasa akusalakammapathe mā karohīti nivāreti. Kalyāṇe nivesetīti kalyāṇakamme tīsu saraṇesu pañcasīlesu dasakusalakammapathesu vattassu, dānaṃ dehi puññaṃ karohi dhammaṃ suṇāhīti evaṃ kalyāṇe niyojeti. Assutaṃ sāvetīti assutapubbaṃ sukhumaṃ nipuṇaṃ kāraṇaṃ sāveti. Saggassa magganti idaṃ kammaṃ katvā sagge nibbattantīti evaṃ saggassa maggaṃ ācikkhati.
264. абхавзнасса на нанд̣̇ад̇ийд̇и д̇асса абхавзна авуд̣дхияаа буд̇д̇ад̣̇аарасса ваа бариж̇анасса ваа д̇ат̇ааруубам̣ баариж̇ун̃н̃ам̣ д̣̇исваа ваа суд̇ваа ваа на нанд̣̇ад̇и, анад̇д̇амано ход̇и. бхавзнаад̇и вуд̣дхияаа д̇ат̇ааруубасса самбад̇д̇им̣ ваа иссарияаббадилаабхам̣ ваа д̣̇исваа ваа суд̇ваа ваа нанд̣̇ад̇и, ад̇д̇амано ход̇и. аван̣н̣ам̣ бхан̣амаанам̣ ниваарзд̇ийд̇и ‘‘асуго вируубо на баасаад̣̇иго д̣̇уж̇ж̇аад̇иго д̣̇уссийло’’д̇и ваа вуд̇д̇з ‘‘звам̣ маа бхан̣и, руубаваа жа со баасаад̣̇иго жа суж̇аад̇о жа сийласамбанно жаа’’д̇иаад̣̇ийхи важанзхи барам̣ ад̇д̇ано сахааяасса аван̣н̣ам̣ бхан̣амаанам̣ ниваарзд̇и. ван̣н̣ам̣ бхан̣амаанам̣ басам̣сад̇ийд̇и ‘‘асуго руубаваа баасаад̣̇иго суж̇аад̇о сийласамбанно’’д̇и вуд̇д̇з ‘‘ахо судту вад̣̇аси, субхаасид̇ам̣ д̇аяаа, звамзд̇ам̣, зса бурисо руубаваа баасаад̣̇иго суж̇аад̇о сийласамбанно’’д̇и звам̣ ад̇д̇ано сахааяагасса барам̣ ван̣н̣ам̣ бхан̣амаанам̣ басам̣сад̇и.
264.Abhavenassa na nandatīti tassa abhavena avuḍḍhiyā puttadārassa vā parijanassa vā tathārūpaṃ pārijuññaṃ disvā vā sutvā vā na nandati, anattamano hoti. Bhavenāti vuḍḍhiyā tathārūpassa sampattiṃ vā issariyappaṭilābhaṃ vā disvā vā sutvā vā nandati, attamano hoti. Avaṇṇaṃ bhaṇamānaṃ nivāretīti ‘‘asuko virūpo na pāsādiko dujjātiko dussīlo’’ti vā vutte ‘‘evaṃ mā bhaṇi, rūpavā ca so pāsādiko ca sujāto ca sīlasampanno cā’’tiādīhi vacanehi paraṃ attano sahāyassa avaṇṇaṃ bhaṇamānaṃ nivāreti. Vaṇṇaṃ bhaṇamānaṃ pasaṃsatīti ‘‘asuko rūpavā pāsādiko sujāto sīlasampanno’’ti vutte ‘‘aho suṭṭhu vadasi, subhāsitaṃ tayā, evametaṃ, esa puriso rūpavā pāsādiko sujāto sīlasampanno’’ti evaṃ attano sahāyakassa paraṃ vaṇṇaṃ bhaṇamānaṃ pasaṃsati.
265. ж̇алам̣ аг̇г̇ийва бхаасад̇ийд̇и рад̇д̇им̣ баб̣б̣ад̇амад̇т̇агз ж̇аламаано аг̇г̇и вияа вирожад̇и.
265.Jalaṃ aggīva bhāsatīti rattiṃ pabbatamatthake jalamāno aggi viya virocati.
бхог̇з сам̣харамаанассаад̇и ад̇д̇аанамби барамби абийл̣зд̇ваа д̇хаммзна самзна бхог̇з самбин̣д̣знд̇асса раасим̣ гаронд̇асса. бхамарассзва ирийяад̇од̇и яат̇аа бхамаро бубпаанам̣ ван̣н̣аг̇анд̇хам̣ абот̇аяам̣ д̇ун̣д̣знаби багкзхиби расам̣ аахарид̇ваа анубуб̣б̣зна жаггаббамаан̣ам̣ мад̇хубадалам̣ гарод̇и, звам̣ анубуб̣б̣зна маханд̇ам̣ бхог̇араасим̣ гаронд̇асса. бхог̇аа саннижаяам̣ яанд̇ийд̇и д̇асса бхог̇аа нижаяам̣ г̇ажчанд̇и. гат̇ам̣? анубуб̣б̣зна убажигаахи сам̣вад̣дхияамаано ваммиго вияа. д̇знааха ‘‘ваммиговубажийяад̇ий’’д̇и. яат̇аа ваммиго убажияад̇и, звам̣ нижаяам̣ яанд̇ийд̇и ад̇т̇о.
Bhoge saṃharamānassāti attānampi parampi apīḷetvā dhammena samena bhoge sampiṇḍentassa rāsiṃ karontassa. Bhamarasseva irīyatoti yathā bhamaro pupphānaṃ vaṇṇagandhaṃ apothayaṃ tuṇḍenapi pakkhehipi rasaṃ āharitvā anupubbena cakkappamāṇaṃ madhupaṭalaṃ karoti, evaṃ anupubbena mahantaṃ bhogarāsiṃ karontassa. Bhogā sannicayaṃ yantīti tassa bhogā nicayaṃ gacchanti. Kathaṃ? Anupubbena upacikāhi saṃvaḍḍhiyamāno vammiko viya. Tenāha ‘‘vammikovupacīyatī’’ti. Yathā vammiko upaciyati, evaṃ nicayaṃ yantīti attho.
самаахад̇ваад̇и самаахарид̇ваа. аламад̇т̇од̇и яуд̇д̇асабхааво самад̇т̇о ваа барияад̇д̇аруубо гхарааваасам̣ сан̣таабзд̇ум̣.
Samāhatvāti samāharitvā. Alamatthoti yuttasabhāvo samattho vā pariyattarūpo gharāvāsaṃ saṇṭhāpetuṃ.
ид̣̇аани яат̇аа ваа гхарааваасо сан̣табзд̇аб̣б̣о, д̇ат̇аа овад̣̇анд̇о жад̇уд̇хаа вибхаж̇з бхог̇зд̇иаад̣̇имааха. д̇ад̇т̇а са вз мид̇д̇аани г̇ант̇ад̇ийд̇и со звам̣ вибхаж̇анд̇о мид̇д̇аани г̇ант̇ад̇и наама абхзж̇ж̇амаанаани табзд̇и. яасса хи бхог̇аа санд̇и, со зва мид̇д̇з табзд̇ум̣ саггод̇и, на ид̇аро.
Idāni yathā vā gharāvāso saṇṭhapetabbo, tathā ovadanto catudhā vibhaje bhogetiādimāha. Tattha sa ve mittāni ganthatīti so evaṃ vibhajanto mittāni ganthati nāma abhejjamānāni ṭhapeti. Yassa hi bhogā santi, so eva mitte ṭhapetuṃ sakkoti, na itaro.
згзна бхог̇з бхун̃ж̇зяяаад̇и згзна годтаасзна бхог̇з бхун̃ж̇зяяа. д̣̇вийхи гаммам̣ баяож̇аязд̇и д̣̇вийхи годтаасзхи гасиваан̣иж̇ж̇аад̣̇игаммам̣ баяож̇зяяа. жад̇уд̇т̇ан̃жа нид̇хаабзяяаад̇и жад̇уд̇т̇ам̣ годтаасам̣ нид̇хаабзд̇ваа табзяяа. аабад̣̇аасу бхависсад̇ийд̇и гулаанан̃хи на саб̣б̣агаалам̣ згасад̣̇исам̣ вад̇д̇ад̇и, гад̣̇аажи рааж̇аад̣̇ивасзна аабад̣̇ааби уббаж̇ж̇анд̇и, д̇асмаа звам̣ аабад̣̇аасу уббаннаасу бхависсад̇ийд̇и ‘‘згам̣ годтаасам̣ нид̇хаабзяяаа’’д̇и ааха . имзсу бана жад̇уусу годтаасзсу гад̇арагодтаасам̣ г̇ахзд̇ваа гусалам̣ гаад̇аб̣б̣анд̇и? ‘‘бхог̇з бхун̃ж̇зяяаа’’д̇и вуд̇д̇агодтаасам̣. д̇ад̇о г̇ан̣хид̇ваа бхигкуунамби габан̣ад̣̇д̇хигаад̣̇ийнамби д̣̇аад̇аб̣б̣ам̣, бзсагааранхаабид̇аад̣̇ийнамби взд̇анам̣ д̣̇аад̇аб̣б̣ам̣.
Ekenabhoge bhuñjeyyāti ekena koṭṭhāsena bhoge bhuñjeyya. Dvīhi kammaṃ payojayeti dvīhi koṭṭhāsehi kasivāṇijjādikammaṃ payojeyya. Catutthañca nidhāpeyyāti catutthaṃ koṭṭhāsaṃ nidhāpetvā ṭhapeyya. Āpadāsu bhavissatīti kulānañhi na sabbakālaṃ ekasadisaṃ vattati, kadāci rājādivasena āpadāpi uppajjanti, tasmā evaṃ āpadāsu uppannāsu bhavissatīti ‘‘ekaṃ koṭṭhāsaṃ nidhāpeyyā’’ti āha . Imesu pana catūsu koṭṭhāsesu katarakoṭṭhāsaṃ gahetvā kusalaṃ kātabbanti? ‘‘Bhoge bhuñjeyyā’’ti vuttakoṭṭhāsaṃ. Tato gaṇhitvā bhikkhūnampi kapaṇaddhikādīnampi dātabbaṃ, pesakāranhāpitādīnampi vetanaṃ dātabbaṃ.
чад̣̇д̣̇исаабадижчаад̣̇анаган̣д̣аван̣н̣анаа
Chaddisāpaṭicchādanakaṇḍavaṇṇanā
266. ид̇и бхаг̇аваа зд̇д̇агзна гат̇аамаг̇г̇зна звам̣ г̇ахабад̇ибуд̇д̇асса арияасааваго жад̇уухи гааран̣зхи агусалам̣ бахааяа чахи гааран̣зхи бхог̇аанам̣ абааяамукам̣ важ̇ж̇зд̇ваа сол̣аса мид̇д̇аани сзванд̇о гхарааваасам̣ сан̣табзд̇ваа д̣̇аарабхаран̣ам̣ гаронд̇о д̇хаммигзна ааж̇ийвзна ж̇ийвад̇и, д̣̇звамануссаанан̃жа анд̇арз аг̇г̇игканд̇хо вияа вирожад̇ийд̇и важ̇ж̇анийяад̇хаммаваж̇ж̇анад̇т̇ам̣ сзвид̇аб̣б̣ад̇хаммасзванад̇т̇ан̃жа оваад̣̇ам̣ д̣̇ад̇ваа ид̣̇аани намассид̇аб̣б̣аа ча д̣̇исаа д̣̇ассзнд̇о гат̇ан̃жа г̇ахабад̇ибуд̇д̇аад̇иаад̣̇имааха.
266. Iti bhagavā ettakena kathāmaggena evaṃ gahapatiputtassa ariyasāvako catūhi kāraṇehi akusalaṃ pahāya chahi kāraṇehi bhogānaṃ apāyamukhaṃ vajjetvā soḷasa mittāni sevanto gharāvāsaṃ saṇṭhapetvā dārabharaṇaṃ karonto dhammikena ājīvena jīvati, devamanussānañca antare aggikkhandho viya virocatīti vajjanīyadhammavajjanatthaṃ sevitabbadhammasevanatthañca ovādaṃ datvā idāni namassitabbā cha disā dassento kathañca gahapatiputtātiādimāha.
д̇ад̇т̇а чад̣̇д̣̇исаабадижчаад̣̇ийд̇и яат̇аа чахи д̣̇исаахи ааг̇аманабхаяам̣ на ааг̇ажчад̇и, кзмам̣ ход̇и ниб̣бхаяам̣ звам̣ вихаранд̇о ‘‘чад̣̇д̣̇исаабадижчаад̣̇ий’’д̇и вужжад̇и. ‘‘бурад̇т̇имаа д̣̇исаа маад̇аабид̇аро взд̣̇ид̇аб̣б̣аа’’д̇иаад̣̇ийсу маад̇аабид̇аро буб̣б̣убагаарид̇ааяа бурад̇т̇имаа д̣̇исаад̇и взд̣̇ид̇аб̣б̣аа. аажарияаа д̣̇агкин̣зяяад̇ааяа д̣̇агкин̣аа д̣̇исаад̇и. буд̇д̇ад̣̇аараа бидтид̇о ануб̣анд̇ханавасзна бажчимаа д̣̇исаад̇и. мид̇д̇аамажжаа яасмаа со мид̇д̇аамажжз ниссааяа д̇з д̇з д̣̇угкависзсз уд̇д̇арад̇и, д̇асмаа уд̇д̇араа д̣̇исаад̇и. д̣̇аасагаммагараа баад̣̇амуулз бад̇идтаанавасзна хздтимаа д̣̇исаад̇и. саман̣аб̣раахман̣аа г̇ун̣зхи убари тид̇абхаавзна убаримаа д̣̇исаад̇и взд̣̇ид̇аб̣б̣аа.
Tattha chaddisāpaṭicchādīti yathā chahi disāhi āgamanabhayaṃ na āgacchati, khemaṃ hoti nibbhayaṃ evaṃ viharanto ‘‘chaddisāpaṭicchādī’’ti vuccati. ‘‘Puratthimā disā mātāpitaro veditabbā’’tiādīsu mātāpitaro pubbupakāritāya puratthimā disāti veditabbā. Ācariyā dakkhiṇeyyatāya dakkhiṇā disāti. Puttadārā piṭṭhito anubandhanavasena pacchimā disāti. Mittāmaccā yasmā so mittāmacce nissāya te te dukkhavisese uttarati, tasmā uttarā disāti. Dāsakammakarā pādamūle patiṭṭhānavasena heṭṭhimā disāti. Samaṇabrāhmaṇā guṇehi upari ṭhitabhāvena uparimā disāti veditabbā.
267. бхад̇о нз бхариссаамийд̇и ахам̣ маад̇аабид̇уухи т̇ан̃н̃ам̣ бааязд̇ваа хад̇т̇абаад̣̇з вад̣дхзд̇ваа мукзна син̇гхаан̣игам̣ абанзд̇ваа нахаабзд̇ваа ман̣д̣зд̇ваа бхад̇о бхарид̇о ж̇аг̇г̇ид̇о, сваахам̣ аж̇ж̇а д̇з махаллагз баад̣̇ад̇ховананхаабанаяааг̇убхад̇д̇ад̣̇аанаад̣̇ийхи бхариссаами.
267.Bhato ne bharissāmīti ahaṃ mātāpitūhi thaññaṃ pāyetvā hatthapāde vaḍḍhetvā mukhena siṅghāṇikaṃ apanetvā nahāpetvā maṇḍetvā bhato bharito jaggito, svāhaṃ ajja te mahallake pādadhovananhāpanayāgubhattadānādīhi bharissāmi.
гижжам̣ нзсам̣ гариссаамийд̇и ад̇д̇ано гаммам̣ табзд̇ваа маад̇аабид̇уунам̣ рааж̇агулаад̣̇ийсу уббаннам̣ гижжам̣ г̇анд̇ваа гариссаами. гулавам̣сам̣ сан̣табзссаамийд̇и маад̇аабид̇уунам̣ санд̇агам̣ кзд̇д̇авад̇т̇ухиран̃н̃асуван̣н̣аад̣̇им̣ авинаасзд̇ваа рагканд̇оби гулавам̣сам̣ сан̣табзд̇и наама. маад̇аабид̇аро ад̇хаммигавам̣сад̇о хаарзд̇ваа д̇хаммигавам̣сз табзнд̇оби, гулавам̣сзна ааг̇ад̇аани салаагабхад̇д̇аад̣̇ийни анубажчинд̣̇ид̇ваа бавад̇д̇знд̇оби гулавам̣сам̣ сан̣табзд̇и наама. ид̣̇ам̣ санд̇хааяа вуд̇д̇ам̣ – ‘‘гулавам̣сам̣ сан̣табзссаамий’’д̇и.
Kiccaṃ nesaṃ karissāmīti attano kammaṃ ṭhapetvā mātāpitūnaṃ rājakulādīsu uppannaṃ kiccaṃ gantvā karissāmi. Kulavaṃsaṃ saṇṭhapessāmīti mātāpitūnaṃ santakaṃ khettavatthuhiraññasuvaṇṇādiṃ avināsetvā rakkhantopi kulavaṃsaṃ saṇṭhapeti nāma. Mātāpitaro adhammikavaṃsato hāretvā dhammikavaṃse ṭhapentopi, kulavaṃsena āgatāni salākabhattādīni anupacchinditvā pavattentopi kulavaṃsaṃ saṇṭhapeti nāma. Idaṃ sandhāya vuttaṃ – ‘‘kulavaṃsaṃ saṇṭhapessāmī’’ti.
д̣̇ааяаж̇ж̇ам̣ бадибаж̇ж̇аамийд̇и маад̇аабид̇аро ад̇д̇ано оваад̣̇з авад̇д̇амаанз мижчаабадибаннз д̣̇аарагз винижчаяам̣ бад̇ваа абуд̇д̇з гаронд̇и, д̇з д̣̇ааяаж̇ж̇аарахаа на хонд̇и. оваад̣̇з вад̇д̇амаанз бана гуласанд̇агасса саамигз гаронд̇и, ахам̣ звам̣ вад̇д̇иссаамийд̇и ад̇хиббааязна ‘‘д̣̇ааяаж̇ж̇ам̣ бадибаж̇ж̇аамий’’д̇и вуд̇д̇ам̣.
Dāyajjaṃ paṭipajjāmīti mātāpitaro attano ovāde avattamāne micchāpaṭipanne dārake vinicchayaṃ patvā aputte karonti, te dāyajjārahā na honti. Ovāde vattamāne pana kulasantakassa sāmike karonti, ahaṃ evaṃ vattissāmīti adhippāyena ‘‘dāyajjaṃ paṭipajjāmī’’ti vuttaṃ.
д̣̇агкин̣ам̣ ануббад̣̇ассаамийд̇и д̇зсам̣ бад̇д̇ид̣̇аанам̣ гад̇ваа д̇ад̇ияад̣̇ивасад̇о бадтааяа д̣̇аанам̣ ануббад̣̇ассаами. баабаа ниваарзнд̇ийд̇и баан̣аад̇ибаад̇аад̣̇ийнам̣ д̣̇идтад̇хаммигасамбарааяигам̣ аад̣̇ийнавам̣ вад̇ваа, ‘‘д̇аад̇а, маа зваруубам̣ гарий’’д̇и ниваарзнд̇и, гад̇амби г̇араханд̇и. галяаан̣з нивзсзнд̇ийд̇и анаат̇абин̣д̣иго вияа лан̃ж̇ам̣ д̣̇ад̇вааби сийласамаад̣̇аанаад̣̇ийсу нивзсзнд̇и. сиббам̣ сигкаабзнд̇ийд̇и ад̇д̇ано оваад̣̇з тид̇абхаавам̣ н̃ад̇ваа вам̣саануг̇ад̇ам̣ муд̣̇д̣̇ааг̇ан̣анаад̣̇исиббам̣ сигкаабзнд̇и. бад̇ируубзнаад̇и гуласийларуубаад̣̇ийхи ануруубзна.
Dakkhiṇaṃ anuppadassāmīti tesaṃ pattidānaṃ katvā tatiyadivasato paṭṭhāya dānaṃ anuppadassāmi. Pāpā nivārentīti pāṇātipātādīnaṃ diṭṭhadhammikasamparāyikaṃ ādīnavaṃ vatvā, ‘‘tāta, mā evarūpaṃ karī’’ti nivārenti, katampi garahanti. Kalyāṇe nivesentīti anāthapiṇḍiko viya lañjaṃ datvāpi sīlasamādānādīsu nivesenti. Sippaṃ sikkhāpentīti attano ovāde ṭhitabhāvaṃ ñatvā vaṃsānugataṃ muddāgaṇanādisippaṃ sikkhāpenti. Patirūpenāti kulasīlarūpādīhi anurūpena.
самаяз д̣̇ааяаж̇ж̇ам̣ нияяаад̣̇знд̇ийд̇и самаяз д̇ханам̣ д̣̇знд̇и. д̇ад̇т̇а нижжасамаяо гааласамаяод̇и д̣̇вз самаяаа. нижжасамаяз д̣̇знд̇и наама ‘‘удтааяа самудтааяа имам̣ г̇ан̣хид̇аб̣б̣ам̣ г̇ан̣ха, аяам̣ д̇з бариб̣б̣аяо ход̇у, иминаа гусалам̣ гарохий’’д̇и д̣̇знд̇и. гааласамаяз д̣̇знд̇и наама сикаатабанаааваахавиваахаад̣̇исамаяз д̣̇знд̇и. абижа бажчимз гаалз маран̣аман̃жз нибаннасса ‘‘иминаа гусалам̣ гарохий’’д̇и д̣̇знд̇ааби самаяз д̣̇знд̇и наама. бадижчаннаа ход̇ийд̇и яам̣ бурад̇т̇имад̣̇исад̇о бхаяам̣ ааг̇ажчзяяа, яат̇аа д̇ам̣ нааг̇ажчад̇и, звам̣ бихид̇аа ход̇и. сажз хи буд̇д̇аа виббадибаннаа, ассу, маад̇аабид̇аро д̣̇ахарагаалад̇о бадтааяа ж̇аг̇г̇анаад̣̇ийхи саммаа бадибаннаа, зд̇з д̣̇аарагаа, маад̇аабид̇уунам̣ аббад̇ируубаад̇и зд̇ам̣ бхаяам̣ ааг̇ажчзяяа. буд̇д̇аа саммаа бадибаннаа, маад̇аабид̇аро виббадибаннаа, маад̇аабид̇аро буд̇д̇аанам̣ наануруубаад̇и зд̇ам̣ бхаяам̣ ааг̇ажчзяяа. убхосу виббадибаннзсу д̣̇увид̇хамби д̇ам̣ бхаяам̣ ход̇и. саммаа бадибаннзсу саб̣б̣ам̣ на ход̇и. д̇зна вуд̇д̇ам̣ – ‘‘бадижчаннаа ход̇и кзмаа аббадибхаяаа’’д̇и.
Samaye dāyajjaṃ niyyādentīti samaye dhanaṃ denti. Tattha niccasamayo kālasamayoti dve samayā. Niccasamaye denti nāma ‘‘uṭṭhāya samuṭṭhāya imaṃ gaṇhitabbaṃ gaṇha, ayaṃ te paribbayo hotu, iminā kusalaṃ karohī’’ti denti. Kālasamaye denti nāma sikhāṭhapanaāvāhavivāhādisamaye denti. Apica pacchime kāle maraṇamañce nipannassa ‘‘iminā kusalaṃ karohī’’ti dentāpi samaye denti nāma. Paṭicchannā hotīti yaṃ puratthimadisato bhayaṃ āgaccheyya, yathā taṃ nāgacchati, evaṃ pihitā hoti. Sace hi puttā vippaṭipannā, assu, mātāpitaro daharakālato paṭṭhāya jagganādīhi sammā paṭipannā, ete dārakā, mātāpitūnaṃ appatirūpāti etaṃ bhayaṃ āgaccheyya. Puttā sammā paṭipannā, mātāpitaro vippaṭipannā, mātāpitaro puttānaṃ nānurūpāti etaṃ bhayaṃ āgaccheyya. Ubhosu vippaṭipannesu duvidhampi taṃ bhayaṃ hoti. Sammā paṭipannesu sabbaṃ na hoti. Tena vuttaṃ – ‘‘paṭicchannā hoti khemā appaṭibhayā’’ti.
зван̃жа бана вад̇ваа бхаг̇аваа син̇г̇аалагам̣ зд̇ад̣̇авожа – ‘‘на ко д̇з, г̇ахабад̇ибуд̇д̇а, бид̇аа логасаммад̇ам̣ бурад̇т̇имам̣ д̣̇исам̣ намассаабзд̇и. маад̇аабид̇аро бана бурад̇т̇имад̣̇исаасад̣̇исз гад̇ваа намассаабзд̇и. аяан̃хи д̇з бид̇араа бурад̇т̇имаа д̣̇исаа агкаад̇аа, но ан̃н̃аа’’д̇и.
Evañca pana vatvā bhagavā siṅgālakaṃ etadavoca – ‘‘na kho te, gahapatiputta, pitā lokasammataṃ puratthimaṃ disaṃ namassāpeti. Mātāpitaro pana puratthimadisāsadise katvā namassāpeti. Ayañhi te pitarā puratthimā disā akkhātā, no aññā’’ti.
268. удтаанзнаад̇и аасанаа удтаанзна. анд̇зваасигзна хи аажарияам̣ д̣̇уурад̇ова ааг̇ажчанд̇ам̣ д̣̇исваа аасанаа вудтааяа бажжуг̇г̇аманам̣ гад̇ваа хад̇т̇ад̇о бхан̣д̣агам̣ г̇ахзд̇ваа аасанам̣ бан̃н̃абзд̇ваа нисийд̣̇аабзд̇ваа б̣ийж̇анабаад̣̇ад̇хованабаад̣̇амагканаани гаад̇аб̣б̣аани. д̇ам̣ санд̇хааяа вуд̇д̇ам̣ ‘‘удтаанзнаа’’д̇и. убадтаанзнаад̇и д̣̇ивасасса д̇игкад̇д̇ум̣ убадтаанаг̇аманзна. сиббуг̇г̇ахан̣агаалз бана авассагамзва г̇анд̇аб̣б̣ам̣ ход̇и. суссуусааяаад̇и сад̣̇д̣̇ахид̇ваа саванзна. асад̣̇д̣̇ахид̇ваа сун̣анд̇о хи висзсам̣ наад̇хиг̇ажчад̇и. баарижарияааяаад̇и авасзсакуд̣̇д̣̇агабаарижарияааяа. анд̇зваасигзна хи аажарияасса баад̇ова вудтааяа мукод̣̇агад̣̇анд̇агадтам̣ д̣̇ад̇ваа бхад̇д̇агижжагаалзби баанийяам̣ г̇ахзд̇ваа бажжубадтаанаад̣̇ийни гад̇ваа ванд̣̇ид̇ваа г̇анд̇аб̣б̣ам̣. гилидтавад̇т̇аад̣̇ийни д̇ховид̇аб̣б̣аани, сааяам̣ нахаанод̣̇агам̣ бажжубадтабзд̇аб̣б̣ам̣. апаасугаалз убадтаад̇аб̣б̣ам̣. баб̣б̣аж̇ид̇знаби саб̣б̣ам̣ анд̇зваасигавад̇д̇ам̣ гаад̇аб̣б̣ам̣. ид̣̇ам̣ санд̇хааяа вуд̇д̇ам̣ – ‘‘баарижарияааяаа’’д̇и. саггажжам̣ сиббабадиг̇г̇ахан̣знаад̇и саггажжам̣ бадиг̇г̇ахан̣ам̣ наама т̇огам̣ г̇ахзд̇ваа б̣ахуваарз саж̇жхааяагаран̣ам̣, згабад̣̇амби висуд̣̇д̇хамзва г̇ахзд̇аб̣б̣ам̣.
268.Uṭṭhānenāti āsanā uṭṭhānena. Antevāsikena hi ācariyaṃ dūratova āgacchantaṃ disvā āsanā vuṭṭhāya paccuggamanaṃ katvā hatthato bhaṇḍakaṃ gahetvā āsanaṃ paññapetvā nisīdāpetvā bījanapādadhovanapādamakkhanāni kātabbāni. Taṃ sandhāya vuttaṃ ‘‘uṭṭhānenā’’ti. Upaṭṭhānenāti divasassa tikkhattuṃ upaṭṭhānagamanena. Sippuggahaṇakāle pana avassakameva gantabbaṃ hoti. Sussūsāyāti saddahitvā savanena. Asaddahitvā suṇanto hi visesaṃ nādhigacchati. Pāricariyāyāti avasesakhuddakapāricariyāya. Antevāsikena hi ācariyassa pātova vuṭṭhāya mukhodakadantakaṭṭhaṃ datvā bhattakiccakālepi pānīyaṃ gahetvā paccupaṭṭhānādīni katvā vanditvā gantabbaṃ. Kiliṭṭhavatthādīni dhovitabbāni, sāyaṃ nahānodakaṃ paccupaṭṭhapetabbaṃ. Aphāsukāle upaṭṭhātabbaṃ. Pabbajitenapi sabbaṃ antevāsikavattaṃ kātabbaṃ. Idaṃ sandhāya vuttaṃ – ‘‘pāricariyāyā’’ti. Sakkaccaṃ sippapaṭiggahaṇenāti sakkaccaṃ paṭiggahaṇaṃ nāma thokaṃ gahetvā bahuvāre sajjhāyakaraṇaṃ, ekapadampi visuddhameva gahetabbaṃ.
сувинийд̇ам̣ винзнд̇ийд̇и ‘‘звам̣ д̇з нисийд̣̇ид̇аб̣б̣ам̣, звам̣ таад̇аб̣б̣ам̣, звам̣ каад̣̇ид̇аб̣б̣ам̣, звам̣ бхун̃ж̇ид̇аб̣б̣ам̣, баабамид̇д̇аа важ̇ж̇зд̇аб̣б̣аа, галяаан̣амид̇д̇аа сзвид̇аб̣б̣аа’’д̇и звам̣ аажаарам̣ сигкаабзнд̇и винзнд̇и. суг̇г̇ахид̇ам̣ г̇аахаабзнд̇ийд̇и яат̇аа суг̇г̇ахид̇ам̣ г̇ан̣хаад̇и, звам̣ ад̇т̇ан̃жа б̣яан̃ж̇анан̃жа сод̇хзд̇ваа баяог̇ам̣ д̣̇ассзд̇ваа г̇ан̣хаабзнд̇и. мид̇д̇аамажжзсу бадияаад̣̇знд̇ийд̇и ‘‘аяам̣ амхаагам̣ анд̇зваасиго б̣яад̇д̇о б̣ахуссуд̇о маяаа самасамо, зд̇ам̣ саллагкзяяаат̇аа’’д̇и звам̣ г̇ун̣ам̣ гат̇зд̇ваа мид̇д̇аамажжзсу бад̇идтабзнд̇и.
Suvinītaṃ vinentīti ‘‘evaṃ te nisīditabbaṃ, evaṃ ṭhātabbaṃ, evaṃ khāditabbaṃ, evaṃ bhuñjitabbaṃ, pāpamittā vajjetabbā, kalyāṇamittā sevitabbā’’ti evaṃ ācāraṃ sikkhāpenti vinenti. Suggahitaṃ gāhāpentīti yathā suggahitaṃ gaṇhāti, evaṃ atthañca byañjanañca sodhetvā payogaṃ dassetvā gaṇhāpenti. Mittāmaccesu paṭiyādentīti ‘‘ayaṃ amhākaṃ antevāsiko byatto bahussuto mayā samasamo, etaṃ sallakkheyyāthā’’ti evaṃ guṇaṃ kathetvā mittāmaccesu patiṭṭhapenti.
д̣̇исаасу барид̇д̇аан̣ам̣ гаронд̇ийд̇и сиббасигкаабанзнзвасса саб̣б̣ад̣̇исаасу рагкам̣ гаронд̇и. уг̇г̇ахид̇асиббо хи яам̣ яам̣ д̣̇исам̣ г̇анд̇ваа сиббам̣ д̣̇ассзд̇и, д̇ад̇т̇а д̇ад̇т̇асса лаабхасаггааро уббаж̇ж̇ад̇и. со аажариязна гад̇о наама ход̇и, г̇ун̣ам̣ гат̇знд̇обисса махааж̇ано аажарияабаад̣̇з д̇ховид̇ваа васид̇аанд̇зваасиго вад̇а аяанд̇и батамам̣ аажарияассзва г̇ун̣ам̣ гат̇знд̇и, б̣рахмалогаббамаан̣обисса лаабхо уббаж̇ж̇амаано аажарияасанд̇агова ход̇и. абижа яам̣ виж̇ж̇ам̣ бариж̇аббид̇ваа г̇ажчанд̇ам̣ адавияам̣ жораа на бассанд̇и, амануссаа ваа д̣̇ийгхаж̇аад̇иаад̣̇аяо ваа на вихзтзнд̇и, д̇ам̣ сигкаабзнд̇ааби д̣̇исаасу барид̇д̇аан̣ам̣ гаронд̇и. яам̣ ваа со д̣̇исам̣ г̇ад̇о ход̇и, д̇ад̇о ган̇кам̣ уббаад̣̇зд̇ваа ад̇д̇ано санд̇игам̣ ааг̇ад̇амануссз ‘‘зд̇иссам̣ д̣̇исааяам̣ амхаагам̣ анд̇зваасиго васад̇и, д̇асса жа маяхан̃жа имасмим̣ сиббз наанаагаран̣ам̣ над̇т̇и, г̇ажчат̇а д̇амзва бужчат̇аа’’д̇и звам̣ анд̇зваасигам̣ баг̇г̇ан̣ханд̇ааби д̇асса д̇ад̇т̇а лаабхасаггааруббад̇д̇ияаа барид̇д̇аан̣ам̣ гаронд̇и наама, бад̇идтам̣ гаронд̇ийд̇и ад̇т̇о. сзсамзд̇т̇а буриманаязнзва яож̇зд̇аб̣б̣ам̣.
Disāsu parittāṇaṃ karontīti sippasikkhāpanenevassa sabbadisāsu rakkhaṃ karonti. Uggahitasippo hi yaṃ yaṃ disaṃ gantvā sippaṃ dasseti, tattha tatthassa lābhasakkāro uppajjati. So ācariyena kato nāma hoti, guṇaṃ kathentopissa mahājano ācariyapāde dhovitvā vasitaantevāsiko vata ayanti paṭhamaṃ ācariyasseva guṇaṃ kathenti, brahmalokappamāṇopissa lābho uppajjamāno ācariyasantakova hoti. Apica yaṃ vijjaṃ parijappitvā gacchantaṃ aṭaviyaṃ corā na passanti, amanussā vā dīghajātiādayo vā na viheṭhenti, taṃ sikkhāpentāpi disāsu parittāṇaṃ karonti. Yaṃ vā so disaṃ gato hoti, tato kaṅkhaṃ uppādetvā attano santikaṃ āgatamanusse ‘‘etissaṃ disāyaṃ amhākaṃ antevāsiko vasati, tassa ca mayhañca imasmiṃ sippe nānākaraṇaṃ natthi, gacchatha tameva pucchathā’’ti evaṃ antevāsikaṃ paggaṇhantāpi tassa tattha lābhasakkāruppattiyā parittāṇaṃ karonti nāma, patiṭṭhaṃ karontīti attho. Sesamettha purimanayeneva yojetabbaṃ.
269. д̇ад̇ияад̣̇исааваарз саммаананааяаад̇и д̣̇звамаад̇з д̇иссамаад̇зд̇и звам̣ самбхаавид̇агат̇аагат̇анзна. анавамаананааяаад̇и яат̇аа д̣̇аасагаммагараад̣̇аяо бот̇зд̇ваа вихзтзд̇ваа гат̇знд̇и, звам̣ хийл̣зд̇ваа вимаанзд̇ваа агат̇анзна. анад̇ижарияааяаад̇и д̇ам̣ ад̇иггамид̇ваа б̣ахи ан̃н̃ааяа ид̇т̇ияаа сад̣̇д̇хим̣ барижаранд̇о д̇ам̣ ад̇ижарад̇и наама, д̇ат̇аа агаран̣зна. иссарияавоссаг̇г̇знаад̇и ид̇т̇ияо хи махаалад̇аасад̣̇исамби аабхаран̣ам̣ лабхид̇ваа бхад̇д̇ам̣ вижаарзд̇ум̣ алабхамаанаа гуж̇жханд̇и, гадажчум̣ хад̇т̇з табзд̇ваа д̇ава ружияаа гарохийд̇и бхад̇д̇аг̇зхз виссадтз саб̣б̣ам̣ иссарияам̣ виссадтам̣ наама ход̇и, звам̣ гаран̣знаад̇и ад̇т̇о. алан̇гаараануббад̣̇аанзнаад̇и ад̇д̇ано вибхаваануруубзна алан̇гаарад̣̇аанзна. сусам̣вихид̇агамманд̇аад̇и яааг̇убхад̇д̇абажанагаалаад̣̇ийни анад̇иггамид̇ваа д̇асса д̇асса саад̇хугам̣ гаран̣зна судту сам̣вихид̇агамманд̇аа. сан̇г̇ахид̇абариж̇анаад̇и саммаананаад̣̇ийхи жзва бахзн̣агабзсанаад̣̇ийхи жа сан̇г̇ахид̇абариж̇анаа. ид̇ха бариж̇ано наама саамигасса жзва ад̇д̇ано жа н̃аад̇иж̇ано. анад̇ижааринийд̇и саамигам̣ мун̃жид̇ваа ан̃н̃ам̣ манасааби на бад̇т̇зд̇и. самбхад̇анд̇и гасиваан̣иж̇ж̇аад̣̇ийни гад̇ваа аабхад̇ад̇ханам̣. д̣̇агкаа жа ход̇ийд̇и яааг̇убхад̇д̇асамбаад̣̇анаад̣̇ийсу чзгаа нибун̣аа ход̇и. аналасаад̇и ниггосаж̇ж̇аа. яат̇аа ан̃н̃аа гусийд̇аа нисиннадтаанз нисиннаава хонд̇и тид̇адтаанз тид̇аава, звам̣ ахуд̇ваа вибпаарид̇зна жид̇д̇зна саб̣б̣агижжаани нибпаад̣̇зд̇и. сзсамид̇хааби буриманаязнзва яож̇зд̇аб̣б̣ам̣.
269. Tatiyadisāvāre sammānanāyāti devamāte tissamāteti evaṃ sambhāvitakathākathanena. Anavamānanāyāti yathā dāsakammakarādayo pothetvā viheṭhetvā kathenti, evaṃ hīḷetvā vimānetvā akathanena. Anaticariyāyāti taṃ atikkamitvā bahi aññāya itthiyā saddhiṃ paricaranto taṃ aticarati nāma, tathā akaraṇena. Issariyavossaggenāti itthiyo hi mahālatāsadisampi ābharaṇaṃ labhitvā bhattaṃ vicāretuṃ alabhamānā kujjhanti, kaṭacchuṃ hatthe ṭhapetvā tava ruciyā karohīti bhattagehe vissaṭṭhe sabbaṃ issariyaṃ vissaṭṭhaṃ nāma hoti, evaṃ karaṇenāti attho. Alaṅkārānuppadānenāti attano vibhavānurūpena alaṅkāradānena. Susaṃvihitakammantāti yāgubhattapacanakālādīni anatikkamitvā tassa tassa sādhukaṃ karaṇena suṭṭhu saṃvihitakammantā. Saṅgahitaparijanāti sammānanādīhi ceva paheṇakapesanādīhi ca saṅgahitaparijanā. Idha parijano nāma sāmikassa ceva attano ca ñātijano. Anaticārinīti sāmikaṃ muñcitvā aññaṃ manasāpi na pattheti. Sambhatanti kasivāṇijjādīni katvā ābhatadhanaṃ. Dakkhāca hotīti yāgubhattasampādanādīsu chekā nipuṇā hoti. Analasāti nikkosajjā. Yathā aññā kusītā nisinnaṭṭhāne nisinnāva honti ṭhitaṭṭhāne ṭhitāva, evaṃ ahutvā vipphāritena cittena sabbakiccāni nipphādeti. Sesamidhāpi purimanayeneva yojetabbaṃ.
270. жад̇уд̇т̇ад̣̇исааваарз ависам̣ваад̣̇анад̇ааяаад̇и яасса яасса наамам̣ г̇ан̣хаад̇и, д̇ам̣ д̇ам̣ ависам̣ваад̣̇зд̇ваа ид̣̇амби амхаагам̣ г̇зхз ад̇т̇и, ид̣̇амби ад̇т̇и, г̇ахзд̇ваа г̇ажчаахийд̇и звам̣ ависам̣ваад̣̇зд̇ваа д̣̇аанзна. абарабаж̇аа жасса бадибууж̇знд̇ийд̇и сахааяасса буд̇д̇ад̇хийд̇аро баж̇аа наама, д̇зсам̣ бана буд̇д̇ад̇хийд̇аро жа над̇д̇убанад̇д̇агаа жа абарабаж̇аа наама. д̇з бадибууж̇знд̇и гзл̣ааяанд̇и мамааяанд̇и ман̇г̇алагаалаад̣̇ийсу д̇зсам̣ ман̇г̇алаад̣̇ийни гаронд̇и. сзсамид̇хааби буриманаязнзва взд̣̇ид̇аб̣б̣ам̣.
270. Catutthadisāvāre avisaṃvādanatāyāti yassa yassa nāmaṃ gaṇhāti, taṃ taṃ avisaṃvādetvā idampi amhākaṃ gehe atthi, idampi atthi, gahetvā gacchāhīti evaṃ avisaṃvādetvā dānena. Aparapajā cassa paṭipūjentīti sahāyassa puttadhītaro pajā nāma, tesaṃ pana puttadhītaro ca nattupanattakā ca aparapajā nāma. Te paṭipūjenti keḷāyanti mamāyanti maṅgalakālādīsu tesaṃ maṅgalādīni karonti. Sesamidhāpi purimanayeneva veditabbaṃ.
271. яат̇ааб̣алам̣ гамманд̇асам̣вид̇хаанзнаад̇и д̣̇ахарзхи гаад̇аб̣б̣ам̣ махаллагзхи, махаллагзхи ваа гаад̇аб̣б̣ам̣ д̣̇ахарзхи, ид̇т̇ийхи гаад̇аб̣б̣ам̣ бурисзхи, бурисзхи ваа гаад̇аб̣б̣ам̣ ид̇т̇ийхи агаарзд̇ваа д̇асса д̇асса б̣алаануруубзнзва гамманд̇асам̣вид̇хаанзна. бхад̇д̇авзд̇анаануббад̣̇аанзнаад̇и аяам̣ куд̣̇д̣̇агабуд̇д̇о, аяам̣ згавихаарийд̇и д̇асса д̇асса ануруубам̣ саллагкзд̇ваа бхад̇д̇ад̣̇аанзна жзва бариб̣б̣аяад̣̇аанзна жа. г̇илаанубадтаанзнаад̇и апаасугагаалз гаммам̣ агаарзд̇ваа саббааяабхзсаж̇ж̇аад̣̇ийни д̣̇ад̇ваа бадиж̇аг̇г̇анзна. ажчарияаанам̣ расаанам̣ сам̣вибхааг̇знаад̇и ажчарияз мад̇хурарасз лабхид̇ваа саяамзва акаад̣̇ид̇ваа д̇зсамби д̇ад̇о сам̣вибхааг̇агаран̣зна. самаяз воссаг̇г̇знаад̇и нижжасамаяз жа гааласамаяз жа воссаж̇ж̇анзна. нижжасамаяз воссаж̇ж̇анам̣ наама сагалад̣̇ивасам̣ гаммам̣ гаронд̇аа гиламанд̇и. д̇асмаа яат̇аа на гиламанд̇и, звам̣ взлам̣ н̃ад̇ваа виссаж̇ж̇анам̣. гааласамаяз воссаг̇г̇о наама чан̣анагкад̇д̇агийл̣аад̣̇ийсу алан̇гаарабхан̣д̣акаад̣̇анийяабхож̇анийяаад̣̇ийни д̣̇ад̇ваа виссаж̇ж̇анам̣. д̣̇иннаад̣̇ааяинод̇и жоригааяа гин̃жи аг̇ахзд̇ваа саамигзхи д̣̇иннассзва аад̣̇ааяино. сугад̇агаммагараад̇и ‘‘гим̣ зд̇асса гаммзна гад̇зна, на маяам̣ гин̃жи лабхаамаа’’д̇и ануж̇жхааяид̇ваа д̇удтахад̣̇аяаа яат̇аа д̇ам̣ гаммам̣ сугад̇ам̣ ход̇и, звам̣ гаарагаа. гид̇д̇иван̣н̣ахараад̇и барисамаж̇жхз гат̇ааяа самбад̇д̇ааяа ‘‘го амхаагам̣ саамигзхи сад̣̇исо ад̇т̇и, маяам̣ ад̇д̇ано д̣̇аасабхаавамби на ж̇аанаама, д̇зсам̣ саамигабхаавамби на ж̇аанаама, звам̣ но анугамбанд̇ий’’д̇и г̇ун̣агат̇аахаарагаа. сзсамид̇хааби буриманаязнзва яож̇зд̇аб̣б̣ам̣.
271.Yathābalaṃ kammantasaṃvidhānenāti daharehi kātabbaṃ mahallakehi, mahallakehi vā kātabbaṃ daharehi, itthīhi kātabbaṃ purisehi, purisehi vā kātabbaṃ itthīhi akāretvā tassa tassa balānurūpeneva kammantasaṃvidhānena. Bhattavetanānuppadānenāti ayaṃ khuddakaputto, ayaṃ ekavihārīti tassa tassa anurūpaṃ sallakkhetvā bhattadānena ceva paribbayadānena ca. Gilānupaṭṭhānenāti aphāsukakāle kammaṃ akāretvā sappāyabhesajjādīni datvā paṭijagganena. Acchariyānaṃ rasānaṃ saṃvibhāgenāti acchariye madhurarase labhitvā sayameva akhāditvā tesampi tato saṃvibhāgakaraṇena. Samaye vossaggenāti niccasamaye ca kālasamaye ca vossajjanena. Niccasamaye vossajjanaṃ nāma sakaladivasaṃ kammaṃ karontā kilamanti. Tasmā yathā na kilamanti, evaṃ velaṃ ñatvā vissajjanaṃ. Kālasamaye vossaggo nāma chaṇanakkhattakīḷādīsu alaṅkārabhaṇḍakhādanīyabhojanīyādīni datvā vissajjanaṃ. Dinnādāyinoti corikāya kiñci agahetvā sāmikehi dinnasseva ādāyino. Sukatakammakarāti ‘‘kiṃ etassa kammena katena, na mayaṃ kiñci labhāmā’’ti anujjhāyitvā tuṭṭhahadayā yathā taṃ kammaṃ sukataṃ hoti, evaṃ kārakā. Kittivaṇṇaharāti parisamajjhe kathāya sampattāya ‘‘ko amhākaṃ sāmikehi sadiso atthi, mayaṃ attano dāsabhāvampi na jānāma, tesaṃ sāmikabhāvampi na jānāma, evaṃ no anukampantī’’ti guṇakathāhārakā. Sesamidhāpi purimanayeneva yojetabbaṃ.
272. мзд̇д̇зна гааяагаммзнаад̇иаад̣̇ийсу мзд̇д̇ажид̇д̇ам̣ бажжубадтабзд̇ваа гад̇аани гааяагаммаад̣̇ийни мзд̇д̇аани наама вужжанд̇и. д̇ад̇т̇а бхигкуу ниманд̇зссаамийд̇и вихаараг̇аманам̣ , д̇хамагаран̣ам̣ г̇ахзд̇ваа уд̣̇агабариссааванам̣, бидтибаригаммабаад̣̇абаригаммаад̣̇игаран̣ан̃жа мзд̇д̇ам̣ гааяагаммам̣ наама. бхигкуу бин̣д̣ааяа бавидтз д̣̇исваа ‘‘саггажжам̣ яааг̇ум̣ д̣̇зт̇а, бхад̇д̇ам̣ д̣̇зт̇аа’’д̇иаад̣̇иважанан̃жзва, саад̇хугаарам̣ д̣̇ад̇ваа д̇хаммасаванан̃жа саггажжам̣ бадисант̇аарагаран̣аад̣̇ийни жа мзд̇д̇ам̣ важийгаммам̣ наама. ‘‘амхаагам̣ гулуубагад̇т̇зраа авзраа хонд̇у аб̣яаабаж̇ж̇аа’’д̇и звам̣ жинд̇анам̣ мзд̇д̇ам̣ маногаммам̣ наама. анаавадад̣̇ваарад̇ааяаад̇и абихид̇ад̣̇ваарад̇ааяа. д̇ад̇т̇а саб̣б̣ад̣̇ваараани виварид̇вааби сийлаванд̇аанам̣ ад̣̇ааяаго агаараго бихид̇ад̣̇ваароязва. саб̣б̣ад̣̇ваараани бана бид̣̇ахид̇вааби д̇зсам̣ д̣̇ааяаго гаараго вивадад̣̇ваароязва. ид̇и сийлаванд̇зсу г̇зхад̣̇ваарам̣ ааг̇ад̇зсу санд̇ам̣язва над̇т̇ийд̇и авад̇ваа д̣̇аад̇аб̣б̣ам̣. звам̣ анаавадад̣̇ваарад̇аа наама ход̇и.
272.Mettena kāyakammenātiādīsu mettacittaṃ paccupaṭṭhapetvā katāni kāyakammādīni mettāni nāma vuccanti. Tattha bhikkhū nimantessāmīti vihāragamanaṃ , dhamakaraṇaṃ gahetvā udakaparissāvanaṃ, piṭṭhiparikammapādaparikammādikaraṇañca mettaṃ kāyakammaṃ nāma. Bhikkhū piṇḍāya paviṭṭhe disvā ‘‘sakkaccaṃ yāguṃ detha, bhattaṃ dethā’’tiādivacanañceva, sādhukāraṃ datvā dhammasavanañca sakkaccaṃ paṭisanthārakaraṇādīni ca mettaṃ vacīkammaṃ nāma. ‘‘Amhākaṃ kulūpakattherā averā hontu abyāpajjā’’ti evaṃ cintanaṃ mettaṃ manokammaṃ nāma. Anāvaṭadvāratāyāti apihitadvāratāya. Tattha sabbadvārāni vivaritvāpi sīlavantānaṃ adāyako akārako pihitadvāroyeva. Sabbadvārāni pana pidahitvāpi tesaṃ dāyako kārako vivaṭadvāroyeva. Iti sīlavantesu gehadvāraṃ āgatesu santaṃyeva natthīti avatvā dātabbaṃ. Evaṃ anāvaṭadvāratā nāma hoti.
аамисаануббад̣̇аанзнаад̇и бурзбхад̇д̇ам̣ барибхун̃ж̇ид̇аб̣б̣агам̣ аамисам̣ наама, д̇асмаа сийлаванд̇аанам̣ яааг̇убхад̇д̇асамбад̣̇аанзнаад̇и ад̇т̇о. галяаан̣зна манасаа анугамбанд̇ийд̇и ‘‘саб̣б̣з сад̇д̇аа сукид̇аа хонд̇у авзраа арог̇аа аб̣яаабаж̇ж̇аа’’д̇и звам̣ хид̇апаран̣зна. абижа убадтаагаанам̣ г̇зхам̣ ан̃н̃з сийлаванд̇з саб̣рахмажаарий г̇ахзд̇ваа бависанд̇ааби галяаан̣зна жзд̇асаа анугамбанд̇и наама. суд̇ам̣ барияод̣̇аабзнд̇ийд̇и яам̣ д̇зсам̣ багад̇ияаа суд̇ам̣ ад̇т̇и, д̇асса ад̇т̇ам̣ гат̇зд̇ваа ган̇кам̣ винод̣̇знд̇и, д̇ат̇ад̇д̇ааяа ваа бадибаж̇ж̇аабзнд̇и. сзсамид̇хааби буриманаязнзва яож̇зд̇аб̣б̣ам̣.
Āmisānuppadānenāti purebhattaṃ paribhuñjitabbakaṃ āmisaṃ nāma, tasmā sīlavantānaṃ yāgubhattasampadānenāti attho. Kalyāṇena manasā anukampantīti ‘‘sabbe sattā sukhitā hontu averā arogā abyāpajjā’’ti evaṃ hitapharaṇena. Apica upaṭṭhākānaṃ gehaṃ aññe sīlavante sabrahmacārī gahetvā pavisantāpi kalyāṇena cetasā anukampanti nāma. Sutaṃ pariyodāpentīti yaṃ tesaṃ pakatiyā sutaṃ atthi, tassa atthaṃ kathetvā kaṅkhaṃ vinodenti, tathattāya vā paṭipajjāpenti. Sesamidhāpi purimanayeneva yojetabbaṃ.
273. аламад̇д̇од̇и буд̇д̇ад̣̇аарабхаран̣ам̣ гад̇ваа аг̇аарам̣ аж̇жхаавасанасамад̇т̇о. бан̣д̣ид̇од̇и д̣̇исаанамассанадтаанз бан̣д̣ид̇о худ̇ваа. сан̣ход̇и сукумад̇т̇ад̣̇ассанзна сан̣хаваажаабхан̣анзна ваа сан̣хо худ̇ваа. бадибхаанаваад̇и д̣̇исаанамассанадтаанз бадибхаанаваа худ̇ваа ниваад̇авуд̇д̇ийд̇и нийжавуд̇д̇и. ад̇т̇ад̣̇д̇ход̇и т̇амбхарахид̇о. удтаанагод̇и удтаанавийрияасамбанно. аналасод̇и ниггосаж̇ж̇о. ажчиннавуд̇д̇ийд̇и ниранд̇арагаран̣авасзна акан̣д̣авуд̇д̇и. мзд̇хаавийд̇и таануббад̇д̇ияаа бан̃н̃ааяа саманнааг̇ад̇о.
273.Alamattoti puttadārabharaṇaṃ katvā agāraṃ ajjhāvasanasamattho. Paṇḍitoti disānamassanaṭṭhāne paṇḍito hutvā. Saṇhoti sukhumatthadassanena saṇhavācābhaṇanena vā saṇho hutvā. Paṭibhānavāti disānamassanaṭṭhāne paṭibhānavā hutvā nivātavuttīti nīcavutti. Atthaddhoti thambharahito. Uṭṭhānakoti uṭṭhānavīriyasampanno. Analasoti nikkosajjo. Acchinnavuttīti nirantarakaraṇavasena akhaṇḍavutti. Medhāvīti ṭhānuppattiyā paññāya samannāgato.
сан̇г̇аахагод̇и жад̇уухи сан̇г̇ахавад̇т̇уухи сан̇г̇ахагаро. мид̇д̇агарод̇и мид̇д̇аг̇авзсано. вад̣̇ан̃н̃ууд̇и буб̣б̣агааринаа, вуд̇д̇аважанам̣ ж̇аанаад̇и. сахааяагасса гхарам̣ г̇ад̇агаалз ‘‘маяхам̣ сахааяагасса взтанам̣ д̣̇зт̇а, саадагам̣ д̣̇зт̇а, мануссаанам̣ бхад̇д̇авзд̇анам̣ д̣̇зт̇аа’’д̇и вуд̇д̇аважанамануссаранд̇о д̇асса ад̇д̇ано г̇зхам̣ ааг̇ад̇асса д̇ад̇д̇агам̣ ваа д̇ад̇о ад̇ирзгам̣ ваа бадигад̇д̇аад̇и ад̇т̇о. абижа сахааяагасса гхарам̣ г̇анд̇ваа имам̣ наама г̇ан̣хиссаамийд̇и ааг̇ад̇ам̣ сахааяагам̣ лаж̇ж̇ааяа г̇ан̣хид̇ум̣ асаггонд̇ам̣ анижчаарид̇амби д̇асса ваажам̣ н̃ад̇ваа язна ад̇т̇зна со ааг̇ад̇о, д̇ам̣ нибпаад̣̇знд̇о вад̣̇ан̃н̃уу наама. язна язна ваа бана сахааяагасса уунам̣ ход̇и, ологзд̇ваа д̇ам̣ д̇ам̣ д̣̇знд̇оби вад̣̇ан̃н̃ууязва. нзд̇аад̇и д̇ам̣ д̇ам̣ ад̇т̇ам̣ д̣̇ассзнд̇о бан̃н̃ааяа нзд̇аа. вивид̇хаани гааран̣аани д̣̇ассзнд̇о нзд̇ийд̇и винзд̇аа. бунаббунам̣ нзд̇ийд̇и анунзд̇аа.
Saṅgāhakoti catūhi saṅgahavatthūhi saṅgahakaro. Mittakaroti mittagavesano. Vadaññūti pubbakārinā, vuttavacanaṃ jānāti. Sahāyakassa gharaṃ gatakāle ‘‘mayhaṃ sahāyakassa veṭhanaṃ detha, sāṭakaṃ detha, manussānaṃ bhattavetanaṃ dethā’’ti vuttavacanamanussaranto tassa attano gehaṃ āgatassa tattakaṃ vā tato atirekaṃ vā paṭikattāti attho. Apica sahāyakassa gharaṃ gantvā imaṃ nāma gaṇhissāmīti āgataṃ sahāyakaṃ lajjāya gaṇhituṃ asakkontaṃ anicchāritampi tassa vācaṃ ñatvā yena atthena so āgato, taṃ nipphādento vadaññū nāma. Yena yena vā pana sahāyakassa ūnaṃ hoti, oloketvā taṃ taṃ dentopi vadaññūyeva. Netāti taṃ taṃ atthaṃ dassento paññāya netā. Vividhāni kāraṇāni dassento netīti vinetā. Punappunaṃ netīti anunetā.
д̇ад̇т̇а д̇ад̇т̇аад̇и д̇асмим̣ д̇асмим̣ буг̇г̇алз. рат̇ассаан̣ийва яааяад̇од̇и яат̇аа аан̣ияаа сад̇иязва рат̇о яаад̇и, асад̇и на яаад̇и, звам̣ имзсу сан̇г̇ахзсу сад̇иязва лого вад̇д̇ад̇и, асад̇и на вад̇д̇ад̇и. д̇зна вуд̇д̇ам̣ – ‘‘зд̇з ко сан̇г̇ахаа логз, рат̇ассаан̣ийва яааяад̇о’’д̇и.
Tattha tatthāti tasmiṃ tasmiṃ puggale. Rathassāṇīva yāyatoti yathā āṇiyā satiyeva ratho yāti, asati na yāti, evaṃ imesu saṅgahesu satiyeva loko vattati, asati na vattati. Tena vuttaṃ – ‘‘ete kho saṅgahā loke, rathassāṇīva yāyato’’ti.
на маад̇аа буд̇д̇агааран̣аад̇и яад̣̇и маад̇аа зд̇з сан̇г̇ахз буд̇д̇асса на гарзяяа, буд̇д̇агааран̣аа маанам̣ ваа бууж̇ам̣ ваа на лабхзяяа.
Na mātā puttakāraṇāti yadi mātā ete saṅgahe puttassa na kareyya, puttakāraṇā mānaṃ vā pūjaṃ vā na labheyya.
сан̇г̇ахаа зд̇зд̇и убаяог̇аважанз бажжад̇д̇ам̣. ‘‘сан̇г̇ахз зд̇з’’д̇и ваа баато. саммабзгканд̇ийд̇и саммаа бзгканд̇и. баасам̣саа жа бхаванд̇ийд̇и басам̣санийяаа жа бхаванд̇и.
Saṅgahā eteti upayogavacane paccattaṃ. ‘‘Saṅgahe ete’’ti vā pāṭho. Sammapekkhantīti sammā pekkhanti. Pāsaṃsā ca bhavantīti pasaṃsanīyā ca bhavanti.
274. ид̇и бхаг̇аваа яаа д̣̇исаа санд̇хааяа д̇з г̇ахабад̇ибуд̇д̇а бид̇аа ааха ‘‘д̣̇исаа намассзяяаасий’’д̇и, имаа д̇аа ча д̣̇исаа. яад̣̇и д̇вам̣ бид̇у важанам̣ гароси, имаа д̣̇исаа намассаад̇и д̣̇ассзнд̇о син̇г̇ааласса бужчааяа тад̇ваа д̣̇зсанам̣ мад̇т̇агам̣ баабзд̇ваа рааж̇аг̇ахам̣ бин̣д̣ааяа баависи . син̇г̇аалагоби саран̣зсу бад̇идтааяа жад̇д̇аалийсагодид̇ханам̣ б̣уд̣̇д̇хасаасанз вигирид̇ваа бун̃н̃агаммам̣ гад̇ваа саг̇г̇абарааяан̣о ахоси. имасмин̃жа бана суд̇д̇з яам̣ г̇ихийхи гад̇д̇аб̣б̣ам̣ гаммам̣ наама, д̇ам̣ агат̇ид̇ам̣ над̇т̇и, г̇ихивинаяо наамааяам̣ суд̇д̇анд̇о. д̇асмаа имам̣ суд̇ваа яат̇аанусидтам̣ бадибаж̇ж̇амаанасса вуд̣̇д̇хиязва баадиган̇каа, но барихаанийд̇и.
274. Iti bhagavā yā disā sandhāya te gahapatiputta pitā āha ‘‘disā namasseyyāsī’’ti, imā tā cha disā. Yadi tvaṃ pitu vacanaṃ karosi, imā disā namassāti dassento siṅgālassa pucchāya ṭhatvā desanaṃ matthakaṃ pāpetvā rājagahaṃ piṇḍāya pāvisi . Siṅgālakopi saraṇesu patiṭṭhāya cattālīsakoṭidhanaṃ buddhasāsane vikiritvā puññakammaṃ katvā saggaparāyaṇo ahosi. Imasmiñca pana sutte yaṃ gihīhi kattabbaṃ kammaṃ nāma, taṃ akathitaṃ natthi, gihivinayo nāmāyaṃ suttanto. Tasmā imaṃ sutvā yathānusiṭṭhaṃ paṭipajjamānassa vuddhiyeva pāṭikaṅkhā, no parihānīti.
суман̇г̇алавилаасинияаа д̣̇ийгханигааяадтагат̇ааяа
Sumaṅgalavilāsiniyā dīghanikāyaṭṭhakathāya
син̇г̇ааласуд̇д̇аван̣н̣анаа нидтид̇аа.
Siṅgālasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / д̣̇ийгханигааяа • Dīghanikāya / 8. син̇г̇ааласуд̇д̇ам̣ • 8. Siṅgālasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / д̣̇ийгханигааяа (дийгаа) • Dīghanikāya (ṭīkā) / 8. син̇г̇ааласуд̇д̇аван̣н̣анаа • 8. Siṅgālasuttavaṇṇanā
