| Library / Tipiṭaka / තිපිටක • Tipiṭaka / උදානපාළි • Udānapāḷi |
9. සිප්‌පසුත්‌තං
9. Sippasuttaṃ
29. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන සම්‌බහුලානං භික්‌ඛූනං පච්‌ඡාභත්‌තං පිණ්‌ඩපාතපටික්‌කන්‌තානං මණ්‌ඩලමාළෙ සන්‌නිසින්‌නානං සන්‌නිපතිතානං අයමන්‌තරාකථා උදපාදි – ‘‘කො නු ඛො, ආවුසො, සිප්‌පං ජානාති? කො කිං සිප්‌පං සික්‌ඛි? කතරං සිප්‌පං සිප්‌පානං අග්‌ග’’න්‌ති?
29. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi – ‘‘ko nu kho, āvuso, sippaṃ jānāti? Ko kiṃ sippaṃ sikkhi? Kataraṃ sippaṃ sippānaṃ agga’’nti?
තත්‌ථෙකච්‌චෙ එවමාහංසු – ‘‘හත්‌ථිසිප්‌පං සිප්‌පානං අග්‌ග’’න්‌ති. එකච්‌චෙ එවමාහංසු – ‘‘අස්‌සසිප්‌පං සිප්‌පානං අග්‌ග’’න්‌ති. එකච්‌චෙ එවමාහංසු – ‘‘රථසිප්‌පං සිප්‌පානං අග්‌ග’’න්‌ති. එකච්‌චෙ එවමාහංසු – ‘‘ධනුසිප්‌පං සිප්‌පානං අග්‌ග’’න්‌ති. එකච්‌චෙ එවමාහංසු – ‘‘ථරුසිප්‌පං සිප්‌පානං අග්‌ග’’න්‌ති. එකච්‌චෙ එවමාහංසු – ‘‘මුද්‌දාසිප්‌පං සිප්‌පානං අග්‌ග’’න්‌ති. එකච්‌චෙ එවමාහංසු – ‘‘ගණනාසිප්‌පං සිප්‌පානං අග්‌ග’’න්‌ති. එකච්‌චෙ එවමාහංසු – ‘‘සඞ්‌ඛානසිප්‌පං සිප්‌පානං අග්‌ග’’න්‌ති. එකච්‌චෙ එවමාහංසු – ‘‘ලෙඛාසිප්‌පං සිප්‌පානං අග්‌ග’’න්‌ති. එකච්‌චෙ එවමාහංසු – ‘‘කාවෙය්‍යසිප්‌පං 1 සිප්‌පානං අග්‌ග’’න්‌ති. එකච්‌චෙ එවමාහංසු – ‘‘ලොකායතසිප්‌පං සිප්‌පානං අග්‌ග’’න්‌ති. එකච්‌චෙ එවමාහංසු – ‘‘ඛත්‌තවිජ්‌ජාසිප්‌පං සිප්‌පානං අග්‌ග’’න්‌ති. අයඤ්‌චරහි තෙසං භික්‌ඛූනං අන්‌තරාකථා හොති විප්‌පකතා.
Tatthekacce evamāhaṃsu – ‘‘hatthisippaṃ sippānaṃ agga’’nti. Ekacce evamāhaṃsu – ‘‘assasippaṃ sippānaṃ agga’’nti. Ekacce evamāhaṃsu – ‘‘rathasippaṃ sippānaṃ agga’’nti. Ekacce evamāhaṃsu – ‘‘dhanusippaṃ sippānaṃ agga’’nti. Ekacce evamāhaṃsu – ‘‘tharusippaṃ sippānaṃ agga’’nti. Ekacce evamāhaṃsu – ‘‘muddāsippaṃ sippānaṃ agga’’nti. Ekacce evamāhaṃsu – ‘‘gaṇanāsippaṃ sippānaṃ agga’’nti. Ekacce evamāhaṃsu – ‘‘saṅkhānasippaṃ sippānaṃ agga’’nti. Ekacce evamāhaṃsu – ‘‘lekhāsippaṃ sippānaṃ agga’’nti. Ekacce evamāhaṃsu – ‘‘kāveyyasippaṃ 2 sippānaṃ agga’’nti. Ekacce evamāhaṃsu – ‘‘lokāyatasippaṃ sippānaṃ agga’’nti. Ekacce evamāhaṃsu – ‘‘khattavijjāsippaṃ sippānaṃ agga’’nti. Ayañcarahi tesaṃ bhikkhūnaṃ antarākathā hoti vippakatā.
අථ ඛො භගවා සායන්‌හසමයං පටිසල්‌ලානා වුට්‌ඨිතො යෙන මණ්‌ඩලමාළො තෙනුපසඞ්‌කමි; උපසඞ්‌කමිත්‌වා පඤ්‌ඤත්‌තෙ ආසනෙ නිසීදි. නිසජ්‌ජ ඛො භගවා භික්‌ඛූ ආමන්‌තෙසි – ‘‘කාය නුත්‌ථ, භික්‌ඛවෙ, එතරහි කථාය සන්‌නිසින්‌නා, කා ච පන වො අන්‌තරාකථා විප්‌පකතා’’ති?
Atha kho bhagavā sāyanhasamayaṃ paṭisallānā vuṭṭhito yena maṇḍalamāḷo tenupasaṅkami; upasaṅkamitvā paññatte āsane nisīdi. Nisajja kho bhagavā bhikkhū āmantesi – ‘‘kāya nuttha, bhikkhave, etarahi kathāya sannisinnā, kā ca pana vo antarākathā vippakatā’’ti?
‘‘ඉධ, භන්‌තෙ, අම්‌හාකං පච්‌ඡාභත්‌තං පිණ්‌ඩපාතපටික්‌කන්‌තානං මණ්‌ඩලමාළෙ සන්‌නිසින්‌නානං අයමන්‌තරාකථා උදපාදි – ‘කො නු ඛො, ආවුසො, සිප්‌පං ජානාති? කො කිං සිප්‌පං සික්‌ඛි? කතරං සිප්‌පං සිප්‌පානං අග්‌ග’න්‌ති?
‘‘Idha, bhante, amhākaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ ayamantarākathā udapādi – ‘ko nu kho, āvuso, sippaṃ jānāti? Ko kiṃ sippaṃ sikkhi? Kataraṃ sippaṃ sippānaṃ agga’nti?
‘‘තත්‌ථෙකච්‌චෙ එවමාහංසු – ‘හත්‌ථිසිප්‌පං සිප්‌පානං අග්‌ග’න්‌ති. එකච්‌චෙ එවමාහංසු – ‘අස්‌සසිප්‌පං සිප්‌පානං අග්‌ග’න්‌ති; එකච්‌චෙ එවමාහංසු – ‘රථසිප්‌පං සිප්‌පානං අග්‌ග’න්‌ති; එකච්‌චෙ එවමාහංසු – ‘ධනුසිප්‌පං සිප්‌පානං අග්‌ග’න්‌ති; එකච්‌චෙ එවමාහංසු – ‘ථරුසිප්‌පං සිප්‌පානං අග්‌ග’න්‌ති, එකච්‌චෙ එවමාහංසු – ‘මුද්‌දාසිප්‌පං සිප්‌පානං අග්‌ග’න්‌ති එකච්‌චෙ එවමාහංසු – ‘ගණනාසිප්‌පං සිප්‌පානං අග්‌ග’න්‌ති; එකච්‌චෙ එවමාහංසු – ‘සඞ්‌ඛානසිප්‌පං සිප්‌පානං අග්‌ග’න්‌ති; එකච්‌චෙ එවමාහංසු – ‘ලෙඛාසිප්‌පං සිප්‌පානං අග්‌ග’න්‌ති; එකච්‌චෙ එවමාහංසු – ‘කාවෙය්‍යසිප්‌පං සිප්‌පානං අග්‌ග’න්‌ති; එකච්‌චෙ එවමාහංසු – ‘ලොකායතසිප්‌පං සිප්‌පානං අග්‌ග’න්‌ති; එකච්‌චෙ එවමාහංසු – ‘ඛත්‌තවිජ්‌ජාසිප්‌පං සිප්‌පානං අග්‌ග’න්‌ති. අයං ඛො නො, භන්‌තෙ, අන්‌තරාකථා හොති විප්‌පකතා, අථ භගවා අනුප්‌පත්‌තො’’ති.
‘‘Tatthekacce evamāhaṃsu – ‘hatthisippaṃ sippānaṃ agga’nti. Ekacce evamāhaṃsu – ‘assasippaṃ sippānaṃ agga’nti; ekacce evamāhaṃsu – ‘rathasippaṃ sippānaṃ agga’nti; ekacce evamāhaṃsu – ‘dhanusippaṃ sippānaṃ agga’nti; ekacce evamāhaṃsu – ‘tharusippaṃ sippānaṃ agga’nti, ekacce evamāhaṃsu – ‘muddāsippaṃ sippānaṃ agga’nti ekacce evamāhaṃsu – ‘gaṇanāsippaṃ sippānaṃ agga’nti; ekacce evamāhaṃsu – ‘saṅkhānasippaṃ sippānaṃ agga’nti; ekacce evamāhaṃsu – ‘lekhāsippaṃ sippānaṃ agga’nti; ekacce evamāhaṃsu – ‘kāveyyasippaṃ sippānaṃ agga’nti; ekacce evamāhaṃsu – ‘lokāyatasippaṃ sippānaṃ agga’nti; ekacce evamāhaṃsu – ‘khattavijjāsippaṃ sippānaṃ agga’nti. Ayaṃ kho no, bhante, antarākathā hoti vippakatā, atha bhagavā anuppatto’’ti.
‘‘න ඛ්‌වෙතං, භික්‌ඛවෙ, තුම්‌හාකං පතිරූපං කුලපුත්‌තානං සද්‌ධා අගාරස්‌මා අනගාරියං පබ්‌බජිතානං යං තුම්‌හෙ එවරූපිං කථං කථෙය්‍යාථ. සන්‌නිපතිතානං වො, භික්‌ඛවෙ, ද්‌වයං කරණීයං – ධම්‌මී වා කථා අරියො වා තුණ්‌හීභාවො’’ති.
‘‘Na khvetaṃ, bhikkhave, tumhākaṃ patirūpaṃ kulaputtānaṃ saddhā agārasmā anagāriyaṃ pabbajitānaṃ yaṃ tumhe evarūpiṃ kathaṃ katheyyātha. Sannipatitānaṃ vo, bhikkhave, dvayaṃ karaṇīyaṃ – dhammī vā kathā ariyo vā tuṇhībhāvo’’ti.
අථ ඛො භගවා එතමත්‌ථං විදිත්‌වා තායං වෙලායං ඉමං උදානං උදානෙසි –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘අසිප්‌පජීවී ලහු අත්‌ථකාමො,
‘‘Asippajīvī lahu atthakāmo,
යතින්‌ද්‍රියො සබ්‌බධි විප්‌පමුත්‌තො;
Yatindriyo sabbadhi vippamutto;
අනොකසාරී අමමො නිරාසො,
Anokasārī amamo nirāso,
හිත්‌වා මානං එකචරො ස භික්‌ඛූ’’ති. නවමං;
Hitvā mānaṃ ekacaro sa bhikkhū’’ti. navamaṃ;
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / උදාන-අට්‌ඨකථා • Udāna-aṭṭhakathā / 9. සිප්‌පසුත්‌තවණ්‌ණනා • 9. Sippasuttavaṇṇanā
