| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
১৩. সিরিমণ্ডত্থেরগাথাৰণ্ণনা
13. Sirimaṇḍattheragāthāvaṇṇanā
ছন্নমতিৰস্সতীতিআদিকা আযস্মতো সিরিমণ্ডত্থেরস্স গাথা। কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনিত্ৰা ইমস্মিং বুদ্ধুপ্পাদে সংসুমারগিরে ব্রাহ্মণকুলে নিব্বত্তিত্ৰা সিরিমণ্ডোতি লদ্ধনামো ৰযপ্পত্তো ভেসকলাৰনে ভগৰতি ৰিহরন্তে সত্থারং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা লদ্ধূপসম্পদো সমণধম্মং করোন্তো একস্মিং উপোসথদিৰসে পাতিমোক্খুদ্দেসট্ঠানে নিসিন্নো নিদানুদ্দেসস্স পরিযোসানে ‘‘আৰিকতা হিস্স ফাসু হোতী’’তি (মহাৰ॰ ১৩৪) পাল়িযা অত্থং উপধারেন্তো আপন্নং আপত্তিং অনাৰিকত্ৰা পটিচ্ছাদেন্তো উপরূপরি আপত্তিযো আপজ্জতি, তেনস্স ন ফাসু হোতি, আৰিকত্ৰা পন যথাধম্মং পটিকরোন্তস্স ফাসু হোতীতি ইমমত্থং মনসি কত্ৰা ‘‘অহো সত্থু সাসনং সুৰিসুদ্ধ’’ন্তি লদ্ধপ্পসাদো তথা উপ্পন্নং পীতিং ৰিক্খম্ভেত্ৰা ৰিপস্সনং ৰড্ঢেত্ৰা অরহত্তং পত্ৰা অত্তনো পটিপত্তিং পচ্চৰেক্খিত্ৰা পসন্নমানসো ভিক্খূনং ওৰাদং দেন্তো –
Channamativassatītiādikā āyasmato sirimaṇḍattherassa gāthā. Kā uppatti? Ayampi purimabuddhesu katādhikāro tattha tattha bhave puññāni upacinitvā imasmiṃ buddhuppāde saṃsumāragire brāhmaṇakule nibbattitvā sirimaṇḍoti laddhanāmo vayappatto bhesakalāvane bhagavati viharante satthāraṃ upasaṅkamitvā dhammaṃ sutvā paṭiladdhasaddho pabbajitvā laddhūpasampado samaṇadhammaṃ karonto ekasmiṃ uposathadivase pātimokkhuddesaṭṭhāne nisinno nidānuddesassa pariyosāne ‘‘āvikatā hissa phāsu hotī’’ti (mahāva. 134) pāḷiyā atthaṃ upadhārento āpannaṃ āpattiṃ anāvikatvā paṭicchādento uparūpari āpattiyo āpajjati, tenassa na phāsu hoti, āvikatvā pana yathādhammaṃ paṭikarontassa phāsu hotīti imamatthaṃ manasi katvā ‘‘aho satthu sāsanaṃ suvisuddha’’nti laddhappasādo tathā uppannaṃ pītiṃ vikkhambhetvā vipassanaṃ vaḍḍhetvā arahattaṃ patvā attano paṭipattiṃ paccavekkhitvā pasannamānaso bhikkhūnaṃ ovādaṃ dento –
৪৪৭.
447.
‘‘ছন্নমতিৰস্সতি, ৰিৰটং নাতিৰস্সতি।
‘‘Channamativassati, vivaṭaṃ nātivassati;
তস্মা ছন্নং ৰিৰরেথ, এৰং তং নাতিৰস্সতি॥
Tasmā channaṃ vivaretha, evaṃ taṃ nātivassati.
৪৪৮.
448.
‘‘মচ্চুনাব্ভাহতো লোকো, জরায পরিৰারিতো।
‘‘Maccunābbhāhato loko, jarāya parivārito;
তণ্হাসল্লেন ওতিণ্ণো, ইচ্ছাধূপাযিতো সদা॥ (সং॰ নি॰ ১.৬৬)।
Taṇhāsallena otiṇṇo, icchādhūpāyito sadā. (saṃ. ni. 1.66);
৪৪৯.
449.
‘‘মচ্চুনাব্ভাহতো লোকো, পরিক্খিত্তো জরায চ।
‘‘Maccunābbhāhato loko, parikkhitto jarāya ca;
হঞ্ঞতি নিচ্চমত্তাণো, পত্তদণ্ডোৰ তক্করো॥
Haññati niccamattāṇo, pattadaṇḍova takkaro.
৪৫০.
450.
‘‘আগচ্ছন্তগ্গিখন্ধাৰ, মচ্চু ব্যাধি জরা তযো।
‘‘Āgacchantaggikhandhāva, maccu byādhi jarā tayo;
পচ্চুগ্গন্তুং বলং নত্থি, জৰো নত্থি পলাযিতুং॥
Paccuggantuṃ balaṃ natthi, javo natthi palāyituṃ.
৪৫১.
451.
‘‘অমোঘং দিৰসং কযিরা, অপ্পেন বহুকেন ৰা।
‘‘Amoghaṃ divasaṃ kayirā, appena bahukena vā;
যং যং ৰিজহতে রত্তিং, তদূনং তস্স জীৰিতং॥
Yaṃ yaṃ vijahate rattiṃ, tadūnaṃ tassa jīvitaṃ.
৪৫২.
452.
‘‘চরতো তিট্ঠতো ৰাপি, আসীনসযনস্স ৰা।
‘‘Carato tiṭṭhato vāpi, āsīnasayanassa vā;
উপেতি চরিমা রত্তি, ন তে কালো পমজ্জিতু’’ন্তি॥ –
Upeti carimā ratti, na te kālo pamajjitu’’nti. –
ইমা গাথা অভাসি।
Imā gāthā abhāsi.
তত্থ ছন্নন্তি ছাদিতং যথাভূতং অৰিৰটং অপ্পকাসিতং দুচ্চরিতং। অতিৰস্সতীতি আপত্তিৰস্সঞ্চেৰ কিলেসৰস্সঞ্চ অতিৰিয ৰস্সতি। আপত্তিযা হি ছাদনং অলজ্জিভাৰাদিনা তাদিসোৰ, ছাদনেন ততো অঞ্ঞথাৰ পুনপি তথারূপং ততো ৰা পাপিট্ঠতরং আপত্তিং আপজ্জেয্যাতি ছাদনং ৰস্সনস্স কারণং ৰুত্তং। ৰিৰটন্তি পকাসিতং অপ্পটিচ্ছন্নং। নাতিৰস্সতীতি এত্থ অতীতি উপসগ্গমত্তং, ন ৰস্সতীতি অত্থো। অৰস্সনঞ্চেত্থ ৰুত্তৰিপরিযাযেন ৰেদিতব্বং চিত্তসন্তানস্স ৰিসোধিতত্তা। তস্মাতি ৰুত্তমেৰত্থং কারণভাৰেন পচ্চামসতি, ছন্নস্স দুচ্চরিতস্স আপত্তিৰস্সাদীনং অতিৰস্সনতো ৰিৰটস্স চ অৰস্সনতোতি অত্থো। ছন্নং ৰিৰরেথাতি পুথুজ্জনভাৰেন ছাদনাধিপ্পাযে উপ্পন্নেপি তং অননুৰত্তিত্ৰা ৰিৰরেথ আৰিকরেয্য, যথাধম্মং পটিকরেয্য। এৰন্তি ৰিৰরণেন যথাধম্মং পটিপত্তিযা। তন্তি তং ছন্নং দুচ্চরিতং। নাতিৰস্সতি আপত্তিৰস্সং কিলেসৰস্সঞ্চ ন ৰস্সতি, সুদ্ধন্তে পুগ্গলং পতিট্ঠপেতীতি অত্থো।
Tattha channanti chāditaṃ yathābhūtaṃ avivaṭaṃ appakāsitaṃ duccaritaṃ. Ativassatīti āpattivassañceva kilesavassañca ativiya vassati. Āpattiyā hi chādanaṃ alajjibhāvādinā tādisova, chādanena tato aññathāva punapi tathārūpaṃ tato vā pāpiṭṭhataraṃ āpattiṃ āpajjeyyāti chādanaṃ vassanassa kāraṇaṃ vuttaṃ. Vivaṭanti pakāsitaṃ appaṭicchannaṃ. Nātivassatīti ettha atīti upasaggamattaṃ, na vassatīti attho. Avassanañcettha vuttavipariyāyena veditabbaṃ cittasantānassa visodhitattā. Tasmāti vuttamevatthaṃ kāraṇabhāvena paccāmasati, channassa duccaritassa āpattivassādīnaṃ ativassanato vivaṭassa ca avassanatoti attho. Channaṃ vivarethāti puthujjanabhāvena chādanādhippāye uppannepi taṃ ananuvattitvā vivaretha āvikareyya, yathādhammaṃ paṭikareyya. Evanti vivaraṇena yathādhammaṃ paṭipattiyā. Tanti taṃ channaṃ duccaritaṃ. Nātivassati āpattivassaṃ kilesavassañca na vassati, suddhante puggalaṃ patiṭṭhapetīti attho.
ইদানি ‘‘একংসেন সীঘংযেৰ চ অত্তা সোধেতব্বো, অপ্পমাদো কাতব্বো’’তি তস্স কারণং সংৰেগৰত্থুং দস্সেন্তো ‘‘মচ্চুনাব্ভাহতো লোকো’’তিআদিমাহ। তত্থ মচ্চুনাব্ভাহতো লোকোতি অযং সব্বোপি সত্তলোকো চোরো ৰিয চোরঘাতকেন, সব্বৰট্টনিপাতিনা মচ্চুনা মরণেন অভিহতো, ন তস্স হত্থতো মুচ্চতি। জরায পরিৰারিতোতি অযং লোকো উপ্পাদতো উদ্ধং মরণূপনযনরসায জরায পরিৰারিতো অজ্ঝোত্থটো, জরাসঙ্ঘাতপরিমুক্কোতি অত্থো। তণ্হাসল্লেন ওতিণ্ণোতি সরীরস্স অন্তো নিমুগ্গেন ৰিসপীতখুরপ্পেন ৰিয উপাদানলক্খণেন তণ্হাসঙ্খাতেন সল্লেন ওতিণ্ণো হদযব্ভন্তরে ওগাল়্হো। তণ্হা হি পীল়াজননতো অন্তো তুদনতো দুরুদ্ধারতো চ ‘‘সল্লো’’তি ৰুচ্চতি। ইচ্ছাধূপাযিতোতি আরম্মণাভিপত্থনলক্খণায ইচ্ছায সন্তাপিতো। তং ৰিসযং ইচ্ছন্তো হি পুগ্গলো যদিচ্ছিতং ৰিসযং লভন্তো ৰা অলভন্তো ৰা তায এৰ অনুদহনলক্খণায ইচ্ছায সন্তত্তো পরিল়াহপ্পত্তো হোতি। সদাতি সব্বকালং, ইদঞ্চ পদং সব্বপদেসু যোজেতব্বং।
Idāni ‘‘ekaṃsena sīghaṃyeva ca attā sodhetabbo, appamādo kātabbo’’ti tassa kāraṇaṃ saṃvegavatthuṃ dassento ‘‘maccunābbhāhato loko’’tiādimāha. Tattha maccunābbhāhato lokoti ayaṃ sabbopi sattaloko coro viya coraghātakena, sabbavaṭṭanipātinā maccunā maraṇena abhihato, na tassa hatthato muccati. Jarāya parivāritoti ayaṃ loko uppādato uddhaṃ maraṇūpanayanarasāya jarāya parivārito ajjhotthaṭo, jarāsaṅghātaparimukkoti attho. Taṇhāsallena otiṇṇoti sarīrassa anto nimuggena visapītakhurappena viya upādānalakkhaṇena taṇhāsaṅkhātena sallena otiṇṇo hadayabbhantare ogāḷho. Taṇhā hi pīḷājananato anto tudanato duruddhārato ca ‘‘sallo’’ti vuccati. Icchādhūpāyitoti ārammaṇābhipatthanalakkhaṇāya icchāya santāpito. Taṃ visayaṃ icchanto hi puggalo yadicchitaṃ visayaṃ labhanto vā alabhanto vā tāya eva anudahanalakkhaṇāya icchāya santatto pariḷāhappatto hoti. Sadāti sabbakālaṃ, idañca padaṃ sabbapadesu yojetabbaṃ.
পরিক্খিত্তো জরায চাতি ন কেৰলং মচ্চুনা অব্ভাহতোযেৰ, অথ খো জরায চ পরিক্খিত্তো। জরায সমৰরুদ্ধো জরাপাকারপরিক্খিত্তো, ন তং সমতিক্কমতীতি অত্থো। হঞ্ঞতি নিচ্চমত্তাণোতি অতাণো অসরণো হুত্ৰা নিচ্চকালং জরামরণেহি হঞ্ঞতি ৰিবাধীযতি। যথা কিং? পত্তদণ্ডোৰ তক্করো যথা তক্করো চোরো কতাপরাধো ৰজ্ঝপ্পত্তো অতাণো রাজাণায হঞ্ঞতি, এৰমযং লোকো জরামরণেহীতি দস্সেতি।
Parikkhitto jarāya cāti na kevalaṃ maccunā abbhāhatoyeva, atha kho jarāya ca parikkhitto. Jarāya samavaruddho jarāpākāraparikkhitto, na taṃ samatikkamatīti attho. Haññati niccamattāṇoti atāṇo asaraṇo hutvā niccakālaṃ jarāmaraṇehi haññati vibādhīyati. Yathā kiṃ? Pattadaṇḍova takkaro yathā takkaro coro katāparādho vajjhappatto atāṇo rājāṇāya haññati, evamayaṃ loko jarāmaraṇehīti dasseti.
আগচ্ছন্তগ্গিখন্ধাৰাতি মহাৰনে ডয্হমানে তং অভিভৰন্তা মহন্তা অগ্গিক্খন্ধা ৰিয মচ্চু ব্যাধি জরাতি ইমে তযো অনুদহনট্ঠেন অগ্গিক্খন্ধা ইমং সত্তলোকং অভিভৰন্তা আগচ্ছন্তি , তেসং পন পটিবলো হুত্ৰা পচ্চুগ্গন্তুং অভিভৰিতুং বলং উস্সাহো নত্থি, ইমস্স লোকস্স, জৰো নত্থি পলাযিতুং জৰন্তেসু, অজ্ঝোত্থরন্তেসু। যত্থ তে নাভিভৰন্তি, পিট্ঠিং দস্সেত্ৰা ততো পলাযিতুম্পি ইমস্স লোকস্স জঙ্ঘাজৰো নত্থি, এৰং অত্তনা অসমত্থো মাযাদীহি উপাযেহি অপ্পটিকারে তিৰিধে বলৰতি পচ্চামিত্তে নিচ্চুপট্ঠিতে কিং কাতব্বন্তি চে? অমোঘং দিৰসং কযিরা, অপ্পেন বহুকেন ৰাতি অপ্পেন অন্তমসো গদ্দূহনমত্তম্পি কালং পৰত্তিতেন বহুকেন ৰা সকলং অহোরত্তং পৰত্তিতেন ৰিপস্সনামনসিকারেন অমোঘং অৰঞ্ঝং দিৰসং করেয্য, যস্মা যং যং ৰিজহতে রত্তিং, তদূনং তস্স জীৰিতং অযং সত্তো যং যং রত্তিং ৰিজহতি নাসেতি খেপেতি, তদূনং তেন ঊনং তস্স সত্তস্স জীৰিতং হোতি। এতেন রত্তিক্খযো নাম জীৰিতক্খযো তস্স অনিৰত্তনতোতি দস্সেতি। তেনাহ –
Āgacchantaggikhandhāvāti mahāvane ḍayhamāne taṃ abhibhavantā mahantā aggikkhandhā viya maccu byādhi jarāti ime tayo anudahanaṭṭhena aggikkhandhā imaṃ sattalokaṃ abhibhavantā āgacchanti , tesaṃ pana paṭibalo hutvā paccuggantuṃ abhibhavituṃ balaṃ ussāho natthi, imassa lokassa, javo natthi palāyituṃ javantesu, ajjhottharantesu. Yattha te nābhibhavanti, piṭṭhiṃ dassetvā tato palāyitumpi imassa lokassa jaṅghājavo natthi, evaṃ attanā asamattho māyādīhi upāyehi appaṭikāre tividhe balavati paccāmitte niccupaṭṭhite kiṃ kātabbanti ce? Amoghaṃdivasaṃ kayirā, appena bahukena vāti appena antamaso gaddūhanamattampi kālaṃ pavattitena bahukena vā sakalaṃ ahorattaṃ pavattitena vipassanāmanasikārena amoghaṃ avañjhaṃ divasaṃ kareyya, yasmā yaṃ yaṃ vijahate rattiṃ, tadūnaṃ tassa jīvitaṃ ayaṃ satto yaṃ yaṃ rattiṃ vijahati nāseti khepeti, tadūnaṃ tena ūnaṃ tassa sattassa jīvitaṃ hoti. Etena rattikkhayo nāma jīvitakkhayo tassa anivattanatoti dasseti. Tenāha –
‘‘যমেকরত্তিং পঠমং, গব্ভে ৰসতি মাণৰো।
‘‘Yamekarattiṃ paṭhamaṃ, gabbhe vasati māṇavo;
অব্ভুট্ঠিতোৰ সো যাতি, স গচ্ছং ন নিৰত্ততী’’তি॥ (জা॰ ১.১৫.৩৬৩)।
Abbhuṭṭhitova so yāti, sa gacchaṃ na nivattatī’’ti. (jā. 1.15.363);
ন কেৰলং রত্তিৰসেনেৰ, অথ খো ইরিযাপথৰসেনাপি জীৰিতক্খযো উপধারেতব্বোতি আহ ‘‘চরতো’’তিআদি। চরতোতি গচ্ছন্তস্স। তিট্ঠতোতি ঠিতং কপ্পেন্তস্স। আসীনসযনস্স ৰাতি আসীনস্স সযনস্স ৰা, নিসিন্নস্স নিপজ্জন্তস্স ৰাতি অত্থো। ‘‘আসীদন’’ন্তিপি পঠন্তি, তত্থ সামিঅত্থে উপযোগৰচনং দট্ঠব্বং। উপেতি চরিমা রত্তীতি চরিমকচিত্তসহিতা রত্তি উপগচ্ছতি, রত্তিগ্গহণঞ্চেত্থ দেসনাসীসমত্তং। গমনাদীসু যেন কেনচি ইরিযাপথেন সমঙ্গীভূতস্স চরিমকালোযেৰ, তেনেৰস্স ইরিযাপথক্খণা জীৰিতং খেপেত্ৰা এৰ গচ্ছন্তি, তস্মা ন তে কালো পমজ্জিতুং নাযং তুয্হং পমাদং আপজ্জিতুং কালো ‘‘ইমস্মিং নাম কালে মরণং ন হোতী’’তি অৰিদিতত্তা। ৰুত্তং হি –
Na kevalaṃ rattivaseneva, atha kho iriyāpathavasenāpi jīvitakkhayo upadhāretabboti āha ‘‘carato’’tiādi. Caratoti gacchantassa. Tiṭṭhatoti ṭhitaṃ kappentassa. Āsīnasayanassa vāti āsīnassa sayanassa vā, nisinnassa nipajjantassa vāti attho. ‘‘Āsīdana’’ntipi paṭhanti, tattha sāmiatthe upayogavacanaṃ daṭṭhabbaṃ. Upeti carimā rattīti carimakacittasahitā ratti upagacchati, rattiggahaṇañcettha desanāsīsamattaṃ. Gamanādīsu yena kenaci iriyāpathena samaṅgībhūtassa carimakāloyeva, tenevassa iriyāpathakkhaṇā jīvitaṃ khepetvā eva gacchanti, tasmā na te kālo pamajjituṃ nāyaṃ tuyhaṃ pamādaṃ āpajjituṃ kālo ‘‘imasmiṃ nāma kāle maraṇaṃ na hotī’’ti aviditattā. Vuttaṃ hi –
‘‘অনিমিত্তমনঞ্ঞাতং, মচ্চানং ইধ জীৰিতং।
‘‘Animittamanaññātaṃ, maccānaṃ idha jīvitaṃ;
কসিরঞ্চ পরিত্তঞ্চ, তঞ্চ দুক্খেন সংযুত’’ন্তি॥ (সু॰ নি॰ ৫৭৯)।
Kasirañca parittañca, tañca dukkhena saṃyuta’’nti. (su. ni. 579);
তস্মা এৰং অত্তানং ওৰদিত্ৰা অপ্পমত্তেন তীসু সিক্খাসু অনুযোগো কাতব্বোতি অধিপ্পাযো।
Tasmā evaṃ attānaṃ ovaditvā appamattena tīsu sikkhāsu anuyogo kātabboti adhippāyo.
সিরিমণ্ডত্থেরগাথাৰণ্ণনা নিট্ঠিতা।
Sirimaṇḍattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ১৩. সিরিমণ্ডত্থেরগাথা • 13. Sirimaṇḍattheragāthā
