| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
২. সিরিমিত্তত্থেরগাথাৰণ্ণনা
2. Sirimittattheragāthāvaṇṇanā
অক্কোধনোতিআদিকা আযস্মতো সিরিমিত্তত্থেরস্স গাথা। কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা ইমস্মিং বুদ্ধুপ্পাদে রাজগহে মহদ্ধনকুটুম্বিকস্স পুত্তো হুত্ৰা নিব্বত্তি, সিরিমিত্তোতি লদ্ধনামো। তস্স কির মাতা সিরিগুত্তস্স ভগিনী। তস্স ৰত্থু ধম্মপদৰণ্ণনাযং (ধ॰ প॰ অট্ঠ॰ ১.গরহদিন্নৰত্থু) আগতমেৰ। সো সিরিগুত্তস্স ভাগিনেয্যো সিরিমিত্তো ৰযপ্পত্তো সত্থু ধনপালদমনে লদ্ধপ্পসাদো পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তং পত্তো। একদিৰসং পাতিমোক্খং উদ্দিসিতুং আসনং অভিরুহিত্ৰা চিত্তবীজনিং গহেত্ৰা নিসিন্নো ভিক্খূনং ধম্মং কথেসি। কথেন্তো চ উল়ারতরে গুণে ৰিভজিত্ৰা দস্সেন্তো –
Akkodhanotiādikā āyasmato sirimittattherassa gāthā. Kā uppatti? Ayampi purimabuddhesu katādhikāro tattha tattha bhave vivaṭṭūpanissayaṃ kusalaṃ upacinitvā imasmiṃ buddhuppāde rājagahe mahaddhanakuṭumbikassa putto hutvā nibbatti, sirimittoti laddhanāmo. Tassa kira mātā siriguttassa bhaginī. Tassa vatthu dhammapadavaṇṇanāyaṃ (dha. pa. aṭṭha. 1.garahadinnavatthu) āgatameva. So siriguttassa bhāgineyyo sirimitto vayappatto satthu dhanapāladamane laddhappasādo pabbajitvā vipassanāya kammaṃ karonto nacirasseva arahattaṃ patto. Ekadivasaṃ pātimokkhaṃ uddisituṃ āsanaṃ abhiruhitvā cittabījaniṃ gahetvā nisinno bhikkhūnaṃ dhammaṃ kathesi. Kathento ca uḷāratare guṇe vibhajitvā dassento –
৫০২.
502.
‘‘অক্কোধনোনুপনাহী, অমাযো রিত্তপেসুণো।
‘‘Akkodhanonupanāhī, amāyo rittapesuṇo;
স ৰে তাদিসকো ভিক্খু, এৰং পেচ্চ ন সোচতি॥
Sa ve tādisako bhikkhu, evaṃ pecca na socati.
৫০৩.
503.
‘‘অক্কোধনোনুপনাহী, অমাযো রিত্তপেসুণো।
‘‘Akkodhanonupanāhī, amāyo rittapesuṇo;
গুত্তদ্ৰারো সদা ভিক্খু, এৰং পেচ্চ ন সোচতি॥
Guttadvāro sadā bhikkhu, evaṃ pecca na socati.
৫০৪.
504.
‘‘অক্কোধনোনুপনাহী, অমাযো রিত্তপেসুণো।
‘‘Akkodhanonupanāhī, amāyo rittapesuṇo;
কল্যাণসীলো সো ভিক্খু, এৰং পেচ্চ ন সোচতি॥
Kalyāṇasīlo so bhikkhu, evaṃ pecca na socati.
৫০৫.
505.
‘‘অক্কোধনোনুপনাহী, অমাযো রিত্তপেসুণো।
‘‘Akkodhanonupanāhī, amāyo rittapesuṇo;
কল্যাণমিত্তো সো ভিক্খু, এৰং পেচ্চ ন সোচতি॥
Kalyāṇamitto so bhikkhu, evaṃ pecca na socati.
৫০৬.
506.
‘‘অক্কোধনোনুপনাহী, অমাযো রিত্তপেসুণো।
‘‘Akkodhanonupanāhī, amāyo rittapesuṇo;
কল্যাণপঞ্ঞো সো ভিক্খু, এৰং পেচ্চ ন সোচতি॥
Kalyāṇapañño so bhikkhu, evaṃ pecca na socati.
৫০৭.
507.
‘‘যস্স সদ্ধা তথাগতে, অচলা সুপ্পতিট্ঠিতা।
‘‘Yassa saddhā tathāgate, acalā suppatiṭṭhitā;
সীলঞ্চ যস্স কল্যাণং, অরিযকন্তং পসংসিতং॥
Sīlañca yassa kalyāṇaṃ, ariyakantaṃ pasaṃsitaṃ.
৫০৮.
508.
‘‘সঙ্ঘে পসাদো যস্সত্থি, উজুভূতঞ্চ দস্সনং।
‘‘Saṅghe pasādo yassatthi, ujubhūtañca dassanaṃ;
অদলিদ্দোতি তং আহু, অমোঘং তস্স জীৰিতং॥
Adaliddoti taṃ āhu, amoghaṃ tassa jīvitaṃ.
৫০৯.
509.
‘‘তস্মা সদ্ধঞ্চ সীলঞ্চ, পসাদং ধম্মদস্সনং।
‘‘Tasmā saddhañca sīlañca, pasādaṃ dhammadassanaṃ;
অনুযুঞ্জেথ মেধাৰী, সরং বুদ্ধান সাসন’’ন্তি॥ – ইমা গাথা অভাসি।
Anuyuñjetha medhāvī, saraṃ buddhāna sāsana’’nti. – imā gāthā abhāsi;
তত্থ অক্কোধনোতি অকুজ্ঝনসীলো। উপট্ঠিতে হি কোধুপ্পত্তিনিমিত্তে অধিৰাসনখন্তিযং ঠত্ৰা কোপস্স অনুপ্পাদকো। অনুপনাহীতি ন উপনাহকো, পরেহি কতং অপরাধং পটিচ্চ ‘‘অক্কোচ্ছি মং অৰধি মং, অজিনি মং অহাসি মে’’তিআদিনা (ধ॰ প॰ ৩; মহাৰ॰ ৪৬৪; ম॰ নি॰ ৩.২৩৭) কোধস্স অনুপনয্হনসীলো। সন্তদোসপটিচ্ছাদনলক্খণায মাযায অভাৰতো অমাযো। পিসুণৰাচাৰিরহিততো রিত্তপেসুণো, স ৰে তাদিসকো ভিক্খূতি সো তথারূপো তথাজাতিকো যথাৰুত্তগুণসমন্নাগতো ভিক্খু । এৰং যথাৰুত্তপটিপত্তিযা পেচ্চ পরলোকে ন সোচতি সোকনিমিত্তস্স অভাৰতো। চক্খুদ্ৰারাদযো কাযদ্ৰারাদযো চ গুত্তা পিহিতা সংৰুতা এতস্সাতি গুত্তদ্ৰারো। কল্যাণসীলোতি সুন্দরসীলো সুৰিসুদ্ধসীলো। কল্যাণমিত্তোতি –
Tattha akkodhanoti akujjhanasīlo. Upaṭṭhite hi kodhuppattinimitte adhivāsanakhantiyaṃ ṭhatvā kopassa anuppādako. Anupanāhīti na upanāhako, parehi kataṃ aparādhaṃ paṭicca ‘‘akkocchi maṃ avadhi maṃ, ajini maṃ ahāsi me’’tiādinā (dha. pa. 3; mahāva. 464; ma. ni. 3.237) kodhassa anupanayhanasīlo. Santadosapaṭicchādanalakkhaṇāya māyāya abhāvato amāyo. Pisuṇavācāvirahitato rittapesuṇo, sa ve tādisako bhikkhūti so tathārūpo tathājātiko yathāvuttaguṇasamannāgato bhikkhu . Evaṃ yathāvuttapaṭipattiyā pecca paraloke na socati sokanimittassa abhāvato. Cakkhudvārādayo kāyadvārādayo ca guttā pihitā saṃvutā etassāti guttadvāro. Kalyāṇasīloti sundarasīlo suvisuddhasīlo. Kalyāṇamittoti –
‘‘পিযো গরুভাৰনিযো, ৰত্তা চ ৰচনক্খমো।
‘‘Piyo garubhāvaniyo, vattā ca vacanakkhamo;
গম্ভীরঞ্চ কথং কত্তা, নো চট্ঠানে নিযোজযে’’তি॥ (অ॰ নি॰ ৭.৩৭) –
Gambhīrañca kathaṃ kattā, no caṭṭhāne niyojaye’’ti. (a. ni. 7.37) –
এৰং ৰিভাৰিতলক্খণো কল্যাণমিত্তো এতস্সাতি কল্যাণমিত্তো। কল্যাণপঞ্ঞোতি সুন্দরপঞ্ঞো। যদিপি পঞ্ঞা নাম অসুন্দরা নত্থি, নিয্যানিকায পন পঞ্ঞায ৰসেন এৰং ৰুত্তং
Evaṃ vibhāvitalakkhaṇo kalyāṇamitto etassāti kalyāṇamitto. Kalyāṇapaññoti sundarapañño. Yadipi paññā nāma asundarā natthi, niyyānikāya pana paññāya vasena evaṃ vuttaṃ
এৰমেত্থ কোধাদীনং ৰিক্খম্ভনৰসেন সমুচ্ছেদৰসেন চ অক্কোধনাদিমুখেন, পুগ্গলাধিট্ঠানায গাথায সম্মাপটিপত্তিং দস্সেত্ৰা ইদানি নিপ্ফত্তিতলোকুত্তরসদ্ধাদিকে উদ্ধরিত্ৰা পুগ্গলাধিট্ঠানায এৰ গাথায সম্মাপটিপত্তিং দস্সেন্তো ‘‘যস্স সদ্ধা’’তিআদিমাহ। তস্সত্থো – যস্স পুগ্গলস্স তথাগতে সম্মাসম্বুদ্ধে ‘‘ইতিপি সো ভগৰা’’তিআদিনযপ্পৰত্তা মগ্গেনাগতসদ্ধা, ততো এৰ অচলা অৰিকম্পা সুট্ঠু পতিট্ঠিতা। ‘‘অত্থী’’তি, পদং আনেত্ৰা সম্বন্ধিতব্বং। অরিযকন্তন্তি অরিযানং কন্তং পিযাযিতং ভৰন্তরেপি অৰিজহনতো। পসংসিতন্তি বুদ্ধাদীহি পসট্ঠং, ৰণ্ণিতং থোমিতং অত্থীতি যোজনা। তং পনেতং সীলং গহট্ঠসীলং পব্বজিতসীলন্তি দুৰিধং। তত্থ গহট্ঠসীলং নাম পঞ্চসিক্খাপদসীলং, যং গহট্ঠেন রক্খিতুং সক্কা। পব্বজিতসীলং নাম দসসিক্খাপদসীলং উপাদায সব্বং চতুপারিসুদ্ধিসীলং, তযিদং সব্বম্পি অখণ্ডাদিভাৰেন অপরামট্ঠতায ‘‘কল্যাণ’’ন্তি ৰেদিতব্বং।
Evamettha kodhādīnaṃ vikkhambhanavasena samucchedavasena ca akkodhanādimukhena, puggalādhiṭṭhānāya gāthāya sammāpaṭipattiṃ dassetvā idāni nipphattitalokuttarasaddhādike uddharitvā puggalādhiṭṭhānāya eva gāthāya sammāpaṭipattiṃ dassento ‘‘yassa saddhā’’tiādimāha. Tassattho – yassa puggalassa tathāgate sammāsambuddhe ‘‘itipi so bhagavā’’tiādinayappavattā maggenāgatasaddhā, tato eva acalā avikampā suṭṭhu patiṭṭhitā. ‘‘Atthī’’ti, padaṃ ānetvā sambandhitabbaṃ. Ariyakantanti ariyānaṃ kantaṃ piyāyitaṃ bhavantarepi avijahanato. Pasaṃsitanti buddhādīhi pasaṭṭhaṃ, vaṇṇitaṃ thomitaṃ atthīti yojanā. Taṃ panetaṃ sīlaṃ gahaṭṭhasīlaṃ pabbajitasīlanti duvidhaṃ. Tattha gahaṭṭhasīlaṃ nāma pañcasikkhāpadasīlaṃ, yaṃ gahaṭṭhena rakkhituṃ sakkā. Pabbajitasīlaṃ nāma dasasikkhāpadasīlaṃ upādāya sabbaṃ catupārisuddhisīlaṃ, tayidaṃ sabbampi akhaṇḍādibhāvena aparāmaṭṭhatāya ‘‘kalyāṇa’’nti veditabbaṃ.
সঙ্ঘে পসাদো যস্সত্থীতি ‘‘সুপ্পটিপন্নো ভগৰতো সাৰকসঙ্ঘো’’তিআদিনা অরিযসঙ্ঘে পসাদো সদ্ধা যস্স পুগ্গলস্স অত্থি অচলো সুপ্পতিট্ঠিতোতি আনেত্ৰা যোজেতব্বং। উজুভূতঞ্চ দস্সনন্তি দিট্ঠিৰঙ্কাভাৰতো কিলেসৰঙ্কাভাৰতো চ উজুভূতং। অকুটিলং অজিম্হং কম্মস্সকতাদস্সনঞ্চেৰ সপ্পচ্চযনামরূপদস্সনঞ্চাতি দুৰিধম্পি দস্সনং যস্স অত্থি অচলং সুপ্পতিট্ঠিতন্তি যোজনা। অদলিদ্দোতি তং আহু সদ্ধাধনং, সীলধনং, সুতধনং, চাগধনং, পঞ্ঞাধনন্তি ইমেসং সুৰিসুদ্ধানং ধনানং অত্থিতায ‘‘অদলিদ্দো’’তি তং তাদিসং পুগ্গলং বুদ্ধাদযো অরিযা আহু। অমোঘং তস্স জীৰিতং তস্স তথারূপস্স জীৰিতং দিট্ঠধম্মিকাদিঅত্থাধিগমেন অমোঘং অৰঞ্ঝং সফলমেৰাতি আহূতি অত্থো।
Saṅghe pasādo yassatthīti ‘‘suppaṭipanno bhagavato sāvakasaṅgho’’tiādinā ariyasaṅghe pasādo saddhā yassa puggalassa atthi acalo suppatiṭṭhitoti ānetvā yojetabbaṃ. Ujubhūtañca dassananti diṭṭhivaṅkābhāvato kilesavaṅkābhāvato ca ujubhūtaṃ. Akuṭilaṃ ajimhaṃ kammassakatādassanañceva sappaccayanāmarūpadassanañcāti duvidhampi dassanaṃ yassa atthi acalaṃ suppatiṭṭhitanti yojanā. Adaliddoti taṃ āhu saddhādhanaṃ, sīladhanaṃ, sutadhanaṃ, cāgadhanaṃ, paññādhananti imesaṃ suvisuddhānaṃ dhanānaṃ atthitāya ‘‘adaliddo’’ti taṃ tādisaṃ puggalaṃ buddhādayo ariyā āhu. Amoghaṃ tassa jīvitaṃ tassa tathārūpassa jīvitaṃ diṭṭhadhammikādiatthādhigamena amoghaṃ avañjhaṃ saphalamevāti āhūti attho.
তস্মাতি , যস্মা যথাৰুত্তসদ্ধাদিগুণসমন্নাগতো পুগ্গলো ‘‘অদলিদ্দো অমোঘজীৰিতো’’তি ৰুচ্চতি, তস্মা অহম্পি তথারূপো ভৰেয্যন্তি। সদ্ধঞ্চ…পে॰… সাসনন্তি ‘‘সব্বপাপস্স অকরণ’’ন্তিআদিনা (ধ॰ প॰ ১৮৩; দী॰ নি॰ ২.৯০) ৰুত্তং বুদ্ধানং সাসনং অনুস্সরন্তো কুলপুত্তো ৰুত্তপ্পভেদং সদ্ধঞ্চেৰ সীলঞ্চ ধম্মদস্সনহেতুকং ধম্মে সুনিচ্ছযা ৰিমোক্খভূতং পসাদঞ্চ অনুযুঞ্জেয্য ৰড্ঢেয্যাতি।
Tasmāti , yasmā yathāvuttasaddhādiguṇasamannāgato puggalo ‘‘adaliddo amoghajīvito’’ti vuccati, tasmā ahampi tathārūpo bhaveyyanti. Saddhañca…pe… sāsananti ‘‘sabbapāpassa akaraṇa’’ntiādinā (dha. pa. 183; dī. ni. 2.90) vuttaṃ buddhānaṃ sāsanaṃ anussaranto kulaputto vuttappabhedaṃ saddhañceva sīlañca dhammadassanahetukaṃ dhamme sunicchayā vimokkhabhūtaṃ pasādañca anuyuñjeyya vaḍḍheyyāti.
এৰং থেরো ভিক্খূনং ধম্মদেসনামুখেন অত্তনি ৰিজ্জমানে গুণে পকাসেন্তো অঞ্ঞং ব্যাকাসি।
Evaṃ thero bhikkhūnaṃ dhammadesanāmukhena attani vijjamāne guṇe pakāsento aññaṃ byākāsi.
সিরিমিত্তত্থেরগাথাৰণ্ণনা নিট্ঠিতা।
Sirimittattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ২. সিরিমিত্তত্থেরগাথা • 2. Sirimittattheragāthā
