| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. ஸீஸபாவனவக்³கோ³
4. Sīsapāvanavaggo
1. ஸீஸபாவனஸுத்தங்
1. Sīsapāvanasuttaṃ
1101. ஏகங் ஸமயங் ப⁴க³வா கோஸம்பி³யங் விஹரதி ஸீஸபாவனே 1. அத² கோ² ப⁴க³வா பரித்தானி ஸீஸபாபண்ணானி பாணினா க³ஹெத்வா பி⁴க்கூ² ஆமந்தேஸி – ‘‘தங் கிங் மஞ்ஞத², பி⁴க்க²வே, கதமங் நு கோ² ப³ஹுதரங் – யானி வா மயா பரித்தானி ஸீஸபாபண்ணானி பாணினா க³ஹிதானி யதி³த³ங் உபரி ஸீஸபாவனே’’தி? ‘‘அப்பமத்தகானி , ப⁴ந்தே, ப⁴க³வதா பரித்தானி ஸீஸபாபண்ணானி பாணினா க³ஹிதானி; அத² கோ² ஏதானேவ ப³ஹுதரானி யதி³த³ங் உபரி ஸீஸபாவனே’’தி. ‘‘ஏவமேவ கோ², பி⁴க்க²வே, ஏததே³வ ப³ஹுதரங் யங் வோ மயா அபி⁴ஞ்ஞாய அனக்கா²தங். கஸ்மா சேதங், பி⁴க்க²வே, மயா அனக்கா²தங்? ந ஹேதங், பி⁴க்க²வே, அத்த²ஸங்ஹிதங் நாதி³ப்³ரஹ்மசரியகங் ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்ததி; தஸ்மா தங் மயா அனக்கா²தங்’’.
1101. Ekaṃ samayaṃ bhagavā kosambiyaṃ viharati sīsapāvane 2. Atha kho bhagavā parittāni sīsapāpaṇṇāni pāṇinā gahetvā bhikkhū āmantesi – ‘‘taṃ kiṃ maññatha, bhikkhave, katamaṃ nu kho bahutaraṃ – yāni vā mayā parittāni sīsapāpaṇṇāni pāṇinā gahitāni yadidaṃ upari sīsapāvane’’ti? ‘‘Appamattakāni , bhante, bhagavatā parittāni sīsapāpaṇṇāni pāṇinā gahitāni; atha kho etāneva bahutarāni yadidaṃ upari sīsapāvane’’ti. ‘‘Evameva kho, bhikkhave, etadeva bahutaraṃ yaṃ vo mayā abhiññāya anakkhātaṃ. Kasmā cetaṃ, bhikkhave, mayā anakkhātaṃ? Na hetaṃ, bhikkhave, atthasaṃhitaṃ nādibrahmacariyakaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati; tasmā taṃ mayā anakkhātaṃ’’.
‘‘கிஞ்ச, பி⁴க்க²வே, மயா அக்கா²தங்? ‘இத³ங் து³க்க²’ந்தி, பி⁴க்க²வே, மயா அக்கா²தங், ‘அயங் து³க்க²ஸமுத³யோ’தி மயா அக்கா²தங், ‘அயங் து³க்க²னிரோதோ⁴’தி மயா அக்கா²தங், ‘அயங் து³க்க²னிரோத⁴கா³மினீ படிபதா³’தி மயா அக்கா²தங்’’.
‘‘Kiñca, bhikkhave, mayā akkhātaṃ? ‘Idaṃ dukkha’nti, bhikkhave, mayā akkhātaṃ, ‘ayaṃ dukkhasamudayo’ti mayā akkhātaṃ, ‘ayaṃ dukkhanirodho’ti mayā akkhātaṃ, ‘ayaṃ dukkhanirodhagāminī paṭipadā’ti mayā akkhātaṃ’’.
‘‘கஸ்மா சேதங், பி⁴க்க²வே, மயா அக்கா²தங்? ஏதஞ்ஹி, பி⁴க்க²வே, அத்த²ஸங்ஹிதங் ஏதங் ஆதி³ப்³ரஹ்மசரியகங் ஏதங் நிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி; தஸ்மா தங் மயா அக்கா²தங் .
‘‘Kasmā cetaṃ, bhikkhave, mayā akkhātaṃ? Etañhi, bhikkhave, atthasaṃhitaṃ etaṃ ādibrahmacariyakaṃ etaṃ nibbidāya virāgāya nirodhāya upasamāya abhiññāya sambodhāya nibbānāya saṃvattati; tasmā taṃ mayā akkhātaṃ .
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. பட²மங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஸீஸபாவனஸுத்தவண்ணனா • 1. Sīsapāvanasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. த³ண்ட³ஸுத்தவண்ணனா • 3. Daṇḍasuttavaṇṇanā
