| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. সীসপাৰনৰগ্গো
4. Sīsapāvanavaggo
১. সীসপাৰনসুত্তং
1. Sīsapāvanasuttaṃ
১১০১. একং সমযং ভগৰা কোসম্বিযং ৰিহরতি সীসপাৰনে 1। অথ খো ভগৰা পরিত্তানি সীসপাপণ্ণানি পাণিনা গহেত্ৰা ভিক্খূ আমন্তেসি – ‘‘তং কিং মঞ্ঞথ, ভিক্খৰে, কতমং নু খো বহুতরং – যানি ৰা মযা পরিত্তানি সীসপাপণ্ণানি পাণিনা গহিতানি যদিদং উপরি সীসপাৰনে’’তি? ‘‘অপ্পমত্তকানি , ভন্তে, ভগৰতা পরিত্তানি সীসপাপণ্ণানি পাণিনা গহিতানি; অথ খো এতানেৰ বহুতরানি যদিদং উপরি সীসপাৰনে’’তি। ‘‘এৰমেৰ খো, ভিক্খৰে, এতদেৰ বহুতরং যং ৰো মযা অভিঞ্ঞায অনক্খাতং। কস্মা চেতং, ভিক্খৰে, মযা অনক্খাতং? ন হেতং, ভিক্খৰে, অত্থসংহিতং নাদিব্রহ্মচরিযকং ন নিব্বিদায ন ৰিরাগায ন নিরোধায ন উপসমায ন অভিঞ্ঞায ন সম্বোধায ন নিব্বানায সংৰত্ততি; তস্মা তং মযা অনক্খাতং’’।
1101. Ekaṃ samayaṃ bhagavā kosambiyaṃ viharati sīsapāvane 2. Atha kho bhagavā parittāni sīsapāpaṇṇāni pāṇinā gahetvā bhikkhū āmantesi – ‘‘taṃ kiṃ maññatha, bhikkhave, katamaṃ nu kho bahutaraṃ – yāni vā mayā parittāni sīsapāpaṇṇāni pāṇinā gahitāni yadidaṃ upari sīsapāvane’’ti? ‘‘Appamattakāni , bhante, bhagavatā parittāni sīsapāpaṇṇāni pāṇinā gahitāni; atha kho etāneva bahutarāni yadidaṃ upari sīsapāvane’’ti. ‘‘Evameva kho, bhikkhave, etadeva bahutaraṃ yaṃ vo mayā abhiññāya anakkhātaṃ. Kasmā cetaṃ, bhikkhave, mayā anakkhātaṃ? Na hetaṃ, bhikkhave, atthasaṃhitaṃ nādibrahmacariyakaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati; tasmā taṃ mayā anakkhātaṃ’’.
‘‘কিঞ্চ, ভিক্খৰে, মযা অক্খাতং? ‘ইদং দুক্খ’ন্তি, ভিক্খৰে, মযা অক্খাতং, ‘অযং দুক্খসমুদযো’তি মযা অক্খাতং, ‘অযং দুক্খনিরোধো’তি মযা অক্খাতং, ‘অযং দুক্খনিরোধগামিনী পটিপদা’তি মযা অক্খাতং’’।
‘‘Kiñca, bhikkhave, mayā akkhātaṃ? ‘Idaṃ dukkha’nti, bhikkhave, mayā akkhātaṃ, ‘ayaṃ dukkhasamudayo’ti mayā akkhātaṃ, ‘ayaṃ dukkhanirodho’ti mayā akkhātaṃ, ‘ayaṃ dukkhanirodhagāminī paṭipadā’ti mayā akkhātaṃ’’.
‘‘কস্মা চেতং, ভিক্খৰে, মযা অক্খাতং? এতঞ্হি, ভিক্খৰে, অত্থসংহিতং এতং আদিব্রহ্মচরিযকং এতং নিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্ততি; তস্মা তং মযা অক্খাতং ।
‘‘Kasmā cetaṃ, bhikkhave, mayā akkhātaṃ? Etañhi, bhikkhave, atthasaṃhitaṃ etaṃ ādibrahmacariyakaṃ etaṃ nibbidāya virāgāya nirodhāya upasamāya abhiññāya sambodhāya nibbānāya saṃvattati; tasmā taṃ mayā akkhātaṃ .
‘‘তস্মাতিহ, ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। পঠমং।
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সীসপাৰনসুত্তৰণ্ণনা • 1. Sīsapāvanasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. দণ্ডসুত্তৰণ্ণনা • 3. Daṇḍasuttavaṇṇanā
