| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೪. ಸೀಸಪಾವನವಗ್ಗೋ
4. Sīsapāvanavaggo
೧. ಸೀಸಪಾವನಸುತ್ತಂ
1. Sīsapāvanasuttaṃ
೧೧೦೧. ಏಕಂ ಸಮಯಂ ಭಗವಾ ಕೋಸಮ್ಬಿಯಂ ವಿಹರತಿ ಸೀಸಪಾವನೇ 1। ಅಥ ಖೋ ಭಗವಾ ಪರಿತ್ತಾನಿ ಸೀಸಪಾಪಣ್ಣಾನಿ ಪಾಣಿನಾ ಗಹೇತ್ವಾ ಭಿಕ್ಖೂ ಆಮನ್ತೇಸಿ – ‘‘ತಂ ಕಿಂ ಮಞ್ಞಥ, ಭಿಕ್ಖವೇ, ಕತಮಂ ನು ಖೋ ಬಹುತರಂ – ಯಾನಿ ವಾ ಮಯಾ ಪರಿತ್ತಾನಿ ಸೀಸಪಾಪಣ್ಣಾನಿ ಪಾಣಿನಾ ಗಹಿತಾನಿ ಯದಿದಂ ಉಪರಿ ಸೀಸಪಾವನೇ’’ತಿ? ‘‘ಅಪ್ಪಮತ್ತಕಾನಿ , ಭನ್ತೇ, ಭಗವತಾ ಪರಿತ್ತಾನಿ ಸೀಸಪಾಪಣ್ಣಾನಿ ಪಾಣಿನಾ ಗಹಿತಾನಿ; ಅಥ ಖೋ ಏತಾನೇವ ಬಹುತರಾನಿ ಯದಿದಂ ಉಪರಿ ಸೀಸಪಾವನೇ’’ತಿ। ‘‘ಏವಮೇವ ಖೋ, ಭಿಕ್ಖವೇ, ಏತದೇವ ಬಹುತರಂ ಯಂ ವೋ ಮಯಾ ಅಭಿಞ್ಞಾಯ ಅನಕ್ಖಾತಂ। ಕಸ್ಮಾ ಚೇತಂ, ಭಿಕ್ಖವೇ, ಮಯಾ ಅನಕ್ಖಾತಂ? ನ ಹೇತಂ, ಭಿಕ್ಖವೇ, ಅತ್ಥಸಂಹಿತಂ ನಾದಿಬ್ರಹ್ಮಚರಿಯಕಂ ನ ನಿಬ್ಬಿದಾಯ ನ ವಿರಾಗಾಯ ನ ನಿರೋಧಾಯ ನ ಉಪಸಮಾಯ ನ ಅಭಿಞ್ಞಾಯ ನ ಸಮ್ಬೋಧಾಯ ನ ನಿಬ್ಬಾನಾಯ ಸಂವತ್ತತಿ; ತಸ್ಮಾ ತಂ ಮಯಾ ಅನಕ್ಖಾತಂ’’।
1101. Ekaṃ samayaṃ bhagavā kosambiyaṃ viharati sīsapāvane 2. Atha kho bhagavā parittāni sīsapāpaṇṇāni pāṇinā gahetvā bhikkhū āmantesi – ‘‘taṃ kiṃ maññatha, bhikkhave, katamaṃ nu kho bahutaraṃ – yāni vā mayā parittāni sīsapāpaṇṇāni pāṇinā gahitāni yadidaṃ upari sīsapāvane’’ti? ‘‘Appamattakāni , bhante, bhagavatā parittāni sīsapāpaṇṇāni pāṇinā gahitāni; atha kho etāneva bahutarāni yadidaṃ upari sīsapāvane’’ti. ‘‘Evameva kho, bhikkhave, etadeva bahutaraṃ yaṃ vo mayā abhiññāya anakkhātaṃ. Kasmā cetaṃ, bhikkhave, mayā anakkhātaṃ? Na hetaṃ, bhikkhave, atthasaṃhitaṃ nādibrahmacariyakaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati; tasmā taṃ mayā anakkhātaṃ’’.
‘‘ಕಿಞ್ಚ, ಭಿಕ್ಖವೇ, ಮಯಾ ಅಕ್ಖಾತಂ? ‘ಇದಂ ದುಕ್ಖ’ನ್ತಿ, ಭಿಕ್ಖವೇ, ಮಯಾ ಅಕ್ಖಾತಂ, ‘ಅಯಂ ದುಕ್ಖಸಮುದಯೋ’ತಿ ಮಯಾ ಅಕ್ಖಾತಂ, ‘ಅಯಂ ದುಕ್ಖನಿರೋಧೋ’ತಿ ಮಯಾ ಅಕ್ಖಾತಂ, ‘ಅಯಂ ದುಕ್ಖನಿರೋಧಗಾಮಿನೀ ಪಟಿಪದಾ’ತಿ ಮಯಾ ಅಕ್ಖಾತಂ’’।
‘‘Kiñca, bhikkhave, mayā akkhātaṃ? ‘Idaṃ dukkha’nti, bhikkhave, mayā akkhātaṃ, ‘ayaṃ dukkhasamudayo’ti mayā akkhātaṃ, ‘ayaṃ dukkhanirodho’ti mayā akkhātaṃ, ‘ayaṃ dukkhanirodhagāminī paṭipadā’ti mayā akkhātaṃ’’.
‘‘ಕಸ್ಮಾ ಚೇತಂ, ಭಿಕ್ಖವೇ, ಮಯಾ ಅಕ್ಖಾತಂ? ಏತಞ್ಹಿ, ಭಿಕ್ಖವೇ, ಅತ್ಥಸಂಹಿತಂ ಏತಂ ಆದಿಬ್ರಹ್ಮಚರಿಯಕಂ ಏತಂ ನಿಬ್ಬಿದಾಯ ವಿರಾಗಾಯ ನಿರೋಧಾಯ ಉಪಸಮಾಯ ಅಭಿಞ್ಞಾಯ ಸಮ್ಬೋಧಾಯ ನಿಬ್ಬಾನಾಯ ಸಂವತ್ತತಿ; ತಸ್ಮಾ ತಂ ಮಯಾ ಅಕ್ಖಾತಂ ।
‘‘Kasmā cetaṃ, bhikkhave, mayā akkhātaṃ? Etañhi, bhikkhave, atthasaṃhitaṃ etaṃ ādibrahmacariyakaṃ etaṃ nibbidāya virāgāya nirodhāya upasamāya abhiññāya sambodhāya nibbānāya saṃvattati; tasmā taṃ mayā akkhātaṃ .
‘‘ತಸ್ಮಾತಿಹ, ಭಿಕ್ಖವೇ, ‘ಇದಂ ದುಕ್ಖ’ನ್ತಿ ಯೋಗೋ ಕರಣೀಯೋ…ಪೇ॰… ‘ಅಯಂ ದುಕ್ಖನಿರೋಧಗಾಮಿನೀ ಪಟಿಪದಾ’ತಿ ಯೋಗೋ ಕರಣೀಯೋ’’ತಿ। ಪಠಮಂ।
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Paṭhamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧. ಸೀಸಪಾವನಸುತ್ತವಣ್ಣನಾ • 1. Sīsapāvanasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೩. ದಣ್ಡಸುತ್ತವಣ್ಣನಾ • 3. Daṇḍasuttavaṇṇanā
