| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. සීසපාවනවග්‌ගො
4. Sīsapāvanavaggo
1. සීසපාවනසුත්‌තං
1. Sīsapāvanasuttaṃ
1101. එකං සමයං භගවා කොසම්‌බියං විහරති සීසපාවනෙ 1. අථ ඛො භගවා පරිත්‌තානි සීසපාපණ්‌ණානි පාණිනා ගහෙත්‌වා භික්‌ඛූ ආමන්‌තෙසි – ‘‘තං කිං මඤ්‌ඤථ, භික්‌ඛවෙ, කතමං නු ඛො බහුතරං – යානි වා මයා පරිත්‌තානි සීසපාපණ්‌ණානි පාණිනා ගහිතානි යදිදං උපරි සීසපාවනෙ’’ති? ‘‘අප්‌පමත්‌තකානි , භන්‌තෙ, භගවතා පරිත්‌තානි සීසපාපණ්‌ණානි පාණිනා ගහිතානි; අථ ඛො එතානෙව බහුතරානි යදිදං උපරි සීසපාවනෙ’’ති. ‘‘එවමෙව ඛො, භික්‌ඛවෙ, එතදෙව බහුතරං යං වො මයා අභිඤ්‌ඤාය අනක්‌ඛාතං. කස්‌මා චෙතං, භික්‌ඛවෙ, මයා අනක්‌ඛාතං? න හෙතං, භික්‌ඛවෙ, අත්‌ථසංහිතං නාදිබ්‍රහ්‌මචරියකං න නිබ්‌බිදාය න විරාගාය න නිරොධාය න උපසමාය න අභිඤ්‌ඤාය න සම්‌බොධාය න නිබ්‌බානාය සංවත්‌තති; තස්‌මා තං මයා අනක්‌ඛාතං’’.
1101. Ekaṃ samayaṃ bhagavā kosambiyaṃ viharati sīsapāvane 2. Atha kho bhagavā parittāni sīsapāpaṇṇāni pāṇinā gahetvā bhikkhū āmantesi – ‘‘taṃ kiṃ maññatha, bhikkhave, katamaṃ nu kho bahutaraṃ – yāni vā mayā parittāni sīsapāpaṇṇāni pāṇinā gahitāni yadidaṃ upari sīsapāvane’’ti? ‘‘Appamattakāni , bhante, bhagavatā parittāni sīsapāpaṇṇāni pāṇinā gahitāni; atha kho etāneva bahutarāni yadidaṃ upari sīsapāvane’’ti. ‘‘Evameva kho, bhikkhave, etadeva bahutaraṃ yaṃ vo mayā abhiññāya anakkhātaṃ. Kasmā cetaṃ, bhikkhave, mayā anakkhātaṃ? Na hetaṃ, bhikkhave, atthasaṃhitaṃ nādibrahmacariyakaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati; tasmā taṃ mayā anakkhātaṃ’’.
‘‘කිඤ්‌ච, භික්‌ඛවෙ, මයා අක්‌ඛාතං? ‘ඉදං දුක්‌ඛ’න්‌ති, භික්‌ඛවෙ, මයා අක්‌ඛාතං, ‘අයං දුක්‌ඛසමුදයො’ති මයා අක්‌ඛාතං, ‘අයං දුක්‌ඛනිරොධො’ති මයා අක්‌ඛාතං, ‘අයං දුක්‌ඛනිරොධගාමිනී පටිපදා’ති මයා අක්‌ඛාතං’’.
‘‘Kiñca, bhikkhave, mayā akkhātaṃ? ‘Idaṃ dukkha’nti, bhikkhave, mayā akkhātaṃ, ‘ayaṃ dukkhasamudayo’ti mayā akkhātaṃ, ‘ayaṃ dukkhanirodho’ti mayā akkhātaṃ, ‘ayaṃ dukkhanirodhagāminī paṭipadā’ti mayā akkhātaṃ’’.
‘‘කස්‌මා චෙතං, භික්‌ඛවෙ, මයා අක්‌ඛාතං? එතඤ්‌හි, භික්‌ඛවෙ, අත්‌ථසංහිතං එතං ආදිබ්‍රහ්‌මචරියකං එතං නිබ්‌බිදාය විරාගාය නිරොධාය උපසමාය අභිඤ්‌ඤාය සම්‌බොධාය නිබ්‌බානාය සංවත්‌තති; තස්‌මා තං මයා අක්‌ඛාතං .
‘‘Kasmā cetaṃ, bhikkhave, mayā akkhātaṃ? Etañhi, bhikkhave, atthasaṃhitaṃ etaṃ ādibrahmacariyakaṃ etaṃ nibbidāya virāgāya nirodhāya upasamāya abhiññāya sambodhāya nibbānāya saṃvattati; tasmā taṃ mayā akkhātaṃ .
‘‘තස්‌මාතිහ, භික්‌ඛවෙ, ‘ඉදං දුක්‌ඛ’න්‌ති යොගො කරණීයො…පෙ.… ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. පඨමං.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. සීසපාවනසුත්‌තවණ්‌ණනා • 1. Sīsapāvanasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. දණ්‌ඩසුත්‌තවණ්‌ණනා • 3. Daṇḍasuttavaṇṇanā
