| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
८. सीसुपचालासुत्तं
8. Sīsupacālāsuttaṃ
१६९. सावत्थिनिदानं । अथ खो सीसुपचाला 1 भिक्खुनी पुब्बण्हसमयं निवासेत्वा …पे॰… अञ्ञतरस्मिं रुक्खमूले दिवाविहारं निसीदि। अथ खो मारो पापिमा येन सीसुपचाला भिक्खुनी तेनुपसङ्कमि; उपसङ्कमित्वा सीसुपचालं भिक्खुनिं एतदवोच – ‘‘कस्स नु त्वं, भिक्खुनि, पासण्डं रोचेसी’’ति? ‘‘न ख्वाहं, आवुसो, कस्सचि पासण्डं रोचेमी’’ति।
169. Sāvatthinidānaṃ . Atha kho sīsupacālā 2 bhikkhunī pubbaṇhasamayaṃ nivāsetvā …pe… aññatarasmiṃ rukkhamūle divāvihāraṃ nisīdi. Atha kho māro pāpimā yena sīsupacālā bhikkhunī tenupasaṅkami; upasaṅkamitvā sīsupacālaṃ bhikkhuniṃ etadavoca – ‘‘kassa nu tvaṃ, bhikkhuni, pāsaṇḍaṃ rocesī’’ti? ‘‘Na khvāhaṃ, āvuso, kassaci pāsaṇḍaṃ rocemī’’ti.
‘‘कं नु उद्दिस्स मुण्डासि, समणी विय दिस्ससि।
‘‘Kaṃ nu uddissa muṇḍāsi, samaṇī viya dissasi;
न च रोचेसि पासण्डं, किमिव चरसि मोमूहा’’ति॥
Na ca rocesi pāsaṇḍaṃ, kimiva carasi momūhā’’ti.
‘‘इतो बहिद्धा पासण्डा, दिट्ठीसु पसीदन्ति ते।
‘‘Ito bahiddhā pāsaṇḍā, diṭṭhīsu pasīdanti te;
न तेसं धम्मं रोचेमि, ते धम्मस्स अकोविदा॥
Na tesaṃ dhammaṃ rocemi, te dhammassa akovidā.
‘‘अत्थ्त्थ्थि सक्यकुले जातो, बुद्धो अप्पटिपुग्गलो।
‘‘Atthtththi sakyakule jāto, buddho appaṭipuggalo;
सब्बाभिभू मारनुदो, सब्बत्थमपराजितो॥
Sabbābhibhū māranudo, sabbatthamaparājito.
‘‘सब्बत्थ मुत्तो असितो, सब्बं पस्सति चक्खुमा।
‘‘Sabbattha mutto asito, sabbaṃ passati cakkhumā;
सब्बकम्मक्खयं पत्तो, विमुत्तो उपधिसङ्खये।
Sabbakammakkhayaṃ patto, vimutto upadhisaṅkhaye;
सो मय्हं भगवा सत्था, तस्स रोचेमि सासन’’न्ति॥
So mayhaṃ bhagavā satthā, tassa rocemi sāsana’’nti.
अथ खो मारो पापिमा ‘‘जानाति मं सीसुपचाला भिक्खुनी’’ति दुक्खी दुम्मनो तत्थेवन्तरधायीति।
Atha kho māro pāpimā ‘‘jānāti maṃ sīsupacālā bhikkhunī’’ti dukkhī dummano tatthevantaradhāyīti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ८. सीसुपचालासुत्तवण्णना • 8. Sīsupacālāsuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ८. सीसुपचालासुत्तवण्णना • 8. Sīsupacālāsuttavaṇṇanā
