| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๘. สีสุปจาลาสุตฺตํ
8. Sīsupacālāsuttaṃ
๑๖๙. สาวตฺถินิทานํ ฯ อถ โข สีสุปจาลา 1 ภิกฺขุนี ปุพฺพณฺหสมยํ นิวาเสตฺวา …เป.… อญฺญตรสฺมิํ รุกฺขมูเล ทิวาวิหารํ นิสีทิฯ อถ โข มาโร ปาปิมา เยน สีสุปจาลา ภิกฺขุนี เตนุปสงฺกมิ; อุปสงฺกมิตฺวา สีสุปจาลํ ภิกฺขุนิํ เอตทโวจ – ‘‘กสฺส นุ ตฺวํ, ภิกฺขุนิ, ปาสณฺฑํ โรเจสี’’ติ? ‘‘น ขฺวาหํ, อาวุโส, กสฺสจิ ปาสณฺฑํ โรเจมี’’ติฯ
169. Sāvatthinidānaṃ . Atha kho sīsupacālā 2 bhikkhunī pubbaṇhasamayaṃ nivāsetvā …pe… aññatarasmiṃ rukkhamūle divāvihāraṃ nisīdi. Atha kho māro pāpimā yena sīsupacālā bhikkhunī tenupasaṅkami; upasaṅkamitvā sīsupacālaṃ bhikkhuniṃ etadavoca – ‘‘kassa nu tvaṃ, bhikkhuni, pāsaṇḍaṃ rocesī’’ti? ‘‘Na khvāhaṃ, āvuso, kassaci pāsaṇḍaṃ rocemī’’ti.
‘‘กํ นุ อุทฺทิสฺส มุณฺฑาสิ, สมณี วิย ทิสฺสสิ;
‘‘Kaṃ nu uddissa muṇḍāsi, samaṇī viya dissasi;
น จ โรเจสิ ปาสณฺฑํ, กิมิว จรสิ โมมูหา’’ติฯ
Na ca rocesi pāsaṇḍaṃ, kimiva carasi momūhā’’ti.
‘‘อิโต พหิทฺธา ปาสณฺฑา, ทิฎฺฐีสุ ปสีทนฺติ เต;
‘‘Ito bahiddhā pāsaṇḍā, diṭṭhīsu pasīdanti te;
น เตสํ ธมฺมํ โรเจมิ, เต ธมฺมสฺส อโกวิทาฯ
Na tesaṃ dhammaṃ rocemi, te dhammassa akovidā.
‘‘อตฺถฺตฺถฺถิ สกฺยกุเล ชาโต, พุโทฺธ อปฺปฎิปุคฺคโล;
‘‘Atthtththi sakyakule jāto, buddho appaṭipuggalo;
สพฺพาภิภู มารนุโท, สพฺพตฺถมปราชิโตฯ
Sabbābhibhū māranudo, sabbatthamaparājito.
‘‘สพฺพตฺถ มุโตฺต อสิโต, สพฺพํ ปสฺสติ จกฺขุมา;
‘‘Sabbattha mutto asito, sabbaṃ passati cakkhumā;
สพฺพกมฺมกฺขยํ ปโตฺต, วิมุโตฺต อุปธิสงฺขเย;
Sabbakammakkhayaṃ patto, vimutto upadhisaṅkhaye;
โส มยฺหํ ภควา สตฺถา, ตสฺส โรเจมิ สาสน’’นฺติฯ
So mayhaṃ bhagavā satthā, tassa rocemi sāsana’’nti.
อถ โข มาโร ปาปิมา ‘‘ชานาติ มํ สีสุปจาลา ภิกฺขุนี’’ติ ทุกฺขี ทุมฺมโน ตเตฺถวนฺตรธายีติฯ
Atha kho māro pāpimā ‘‘jānāti maṃ sīsupacālā bhikkhunī’’ti dukkhī dummano tatthevantaradhāyīti.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๘. สีสุปจาลาสุตฺตวณฺณนา • 8. Sīsupacālāsuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๘. สีสุปจาลาสุตฺตวณฺณนา • 8. Sīsupacālāsuttavaṇṇanā
