| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៨. សីសុបចាលាសុត្តំ
8. Sīsupacālāsuttaṃ
១៦៩. សាវត្ថិនិទានំ ។ អថ ខោ សីសុបចាលា 1 ភិក្ខុនី បុព្ពណ្ហសមយំ និវាសេត្វា …បេ.… អញ្ញតរស្មិំ រុក្ខមូលេ ទិវាវិហារំ និសីទិ។ អថ ខោ មារោ បាបិមា យេន សីសុបចាលា ភិក្ខុនី តេនុបសង្កមិ; ឧបសង្កមិត្វា សីសុបចាលំ ភិក្ខុនិំ ឯតទវោច – ‘‘កស្ស នុ ត្វំ, ភិក្ខុនិ, បាសណ្ឌំ រោចេសី’’តិ? ‘‘ន ខ្វាហំ, អាវុសោ, កស្សចិ បាសណ្ឌំ រោចេមី’’តិ។
169. Sāvatthinidānaṃ . Atha kho sīsupacālā 2 bhikkhunī pubbaṇhasamayaṃ nivāsetvā …pe… aññatarasmiṃ rukkhamūle divāvihāraṃ nisīdi. Atha kho māro pāpimā yena sīsupacālā bhikkhunī tenupasaṅkami; upasaṅkamitvā sīsupacālaṃ bhikkhuniṃ etadavoca – ‘‘kassa nu tvaṃ, bhikkhuni, pāsaṇḍaṃ rocesī’’ti? ‘‘Na khvāhaṃ, āvuso, kassaci pāsaṇḍaṃ rocemī’’ti.
‘‘កំ នុ ឧទ្ទិស្ស មុណ្ឌាសិ, សមណី វិយ ទិស្សសិ;
‘‘Kaṃ nu uddissa muṇḍāsi, samaṇī viya dissasi;
ន ច រោចេសិ បាសណ្ឌំ, កិមិវ ចរសិ មោមូហា’’តិ។
Na ca rocesi pāsaṇḍaṃ, kimiva carasi momūhā’’ti.
‘‘ឥតោ ពហិទ្ធា បាសណ្ឌា, ទិដ្ឋីសុ បសីទន្តិ តេ;
‘‘Ito bahiddhā pāsaṇḍā, diṭṭhīsu pasīdanti te;
ន តេសំ ធម្មំ រោចេមិ, តេ ធម្មស្ស អកោវិទា។
Na tesaṃ dhammaṃ rocemi, te dhammassa akovidā.
‘‘អត្ថ្ត្ថ្ថិ សក្យកុលេ ជាតោ, ពុទ្ធោ អប្បដិបុគ្គលោ;
‘‘Atthtththi sakyakule jāto, buddho appaṭipuggalo;
សព្ពាភិភូ មារនុទោ, សព្ពត្ថមបរាជិតោ។
Sabbābhibhū māranudo, sabbatthamaparājito.
‘‘សព្ពត្ថ មុត្តោ អសិតោ, សព្ពំ បស្សតិ ចក្ខុមា;
‘‘Sabbattha mutto asito, sabbaṃ passati cakkhumā;
សព្ពកម្មក្ខយំ បត្តោ, វិមុត្តោ ឧបធិសង្ខយេ;
Sabbakammakkhayaṃ patto, vimutto upadhisaṅkhaye;
សោ មយ្ហំ ភគវា សត្ថា, តស្ស រោចេមិ សាសន’’ន្តិ។
So mayhaṃ bhagavā satthā, tassa rocemi sāsana’’nti.
អថ ខោ មារោ បាបិមា ‘‘ជានាតិ មំ សីសុបចាលា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។
Atha kho māro pāpimā ‘‘jānāti maṃ sīsupacālā bhikkhunī’’ti dukkhī dummano tatthevantaradhāyīti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៨. សីសុបចាលាសុត្តវណ្ណនា • 8. Sīsupacālāsuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៨. សីសុបចាលាសុត្តវណ្ណនា • 8. Sīsupacālāsuttavaṇṇanā
