| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৮. সীসুপচালাসুত্তৰণ্ণনা
8. Sīsupacālāsuttavaṇṇanā
১৬৯. সমণিসদিসাতি সমণলিঙ্গস্স ধারণেন সমণিসদিসা, কস্সচিপি পাসণ্ডস্স অরুচ্চনতো মোনমগ্গস্স অপ্পটিপজ্জনতো তৰ সমণিভাৰং নানুপস্সামীতি অধিপ্পাযো। পাসং ডেন্তীতি পাসং সজ্জেন্তি, যথা তত্থ দিট্ঠিপাসে সত্তানং চিত্তং পটিমুক্কং হোতি, এৰং সজ্জেন্তীতি অত্থো। তথাভূতা চ তে সত্তানং চিত্তে খিত্তা ৰিয হোন্তীতি আহ ‘‘চিত্তেসু দিট্ঠিপাসং খিপন্তীতি অত্থো’’তি। পাসে মোচেতীতি দিট্ঠিপাসে সত্তানং চিত্তসন্তানতো নীহরতি ধম্মসুধম্মতায। তস্মাতি পাসমোচনতো পাসণ্ডোতি ন ৰুচ্চতি। ‘‘ইতো বহিদ্ধাযেৰ পাসণ্ডা হোন্তী’’তি ৰুত্তস্স অত্থস্স নিগমনং। এৰঞ্চ কত্ৰা সব্বেপি বাহিরকসমযে সন্ধায চূল়সীহনাদসুত্তে ‘‘ছন্নৰুতি পাসণ্ডা’’তি ৰুত্তং। পসীদন্তীতি দিট্ঠিপঙ্কে সংসারপঙ্কে চ পকারেহি অগাধা ওসীদন্তি।
169.Samaṇisadisāti samaṇaliṅgassa dhāraṇena samaṇisadisā, kassacipi pāsaṇḍassa aruccanato monamaggassa appaṭipajjanato tava samaṇibhāvaṃ nānupassāmīti adhippāyo. Pāsaṃ ḍentīti pāsaṃ sajjenti, yathā tattha diṭṭhipāse sattānaṃ cittaṃ paṭimukkaṃ hoti, evaṃ sajjentīti attho. Tathābhūtā ca te sattānaṃ citte khittā viya hontīti āha ‘‘cittesu diṭṭhipāsaṃ khipantīti attho’’ti. Pāse mocetīti diṭṭhipāse sattānaṃ cittasantānato nīharati dhammasudhammatāya. Tasmāti pāsamocanato pāsaṇḍoti na vuccati. ‘‘Ito bahiddhāyeva pāsaṇḍā hontī’’ti vuttassa atthassa nigamanaṃ. Evañca katvā sabbepi bāhirakasamaye sandhāya cūḷasīhanādasutte ‘‘channavuti pāsaṇḍā’’ti vuttaṃ. Pasīdantīti diṭṭhipaṅke saṃsārapaṅke ca pakārehi agādhā osīdanti.
অভিভৰিত্ৰাতি সব্বসংকিলেসপ্পহানেন অভিভুয্য অতিক্কমিত্ৰা। অজিতোতি অজিনি অৰিজযত্তা। সব্বানি অকুসলকম্মানি কুসলকম্মানি চ খীণানি এত্থাতি সব্বকম্মক্খযো, অরহত্তং। উপধযো সম্মদেৰ খীযন্তি এত্থাতি উপধিসঙ্খযো, নিব্বানং।
Abhibhavitvāti sabbasaṃkilesappahānena abhibhuyya atikkamitvā. Ajitoti ajini avijayattā. Sabbāni akusalakammāni kusalakammāni ca khīṇāni etthāti sabbakammakkhayo, arahattaṃ. Upadhayo sammadeva khīyanti etthāti upadhisaṅkhayo, nibbānaṃ.
সীসুপচালাসুত্তৰণ্ণনা নিট্ঠিতা।
Sīsupacālāsuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. সীসুপচালাসুত্তং • 8. Sīsupacālāsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. সীসুপচালাসুত্তৰণ্ণনা • 8. Sīsupacālāsuttavaṇṇanā
