| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
८. सीसुपचालासुत्तवण्णना
8. Sīsupacālāsuttavaṇṇanā
१६९. समणिसदिसाति समणलिङ्गस्स धारणेन समणिसदिसा, कस्सचिपि पासण्डस्स अरुच्चनतो मोनमग्गस्स अप्पटिपज्जनतो तव समणिभावं नानुपस्सामीति अधिप्पायो। पासं डेन्तीति पासं सज्जेन्ति, यथा तत्थ दिट्ठिपासे सत्तानं चित्तं पटिमुक्कं होति, एवं सज्जेन्तीति अत्थो। तथाभूता च ते सत्तानं चित्ते खित्ता विय होन्तीति आह ‘‘चित्तेसु दिट्ठिपासं खिपन्तीति अत्थो’’ति। पासे मोचेतीति दिट्ठिपासे सत्तानं चित्तसन्तानतो नीहरति धम्मसुधम्मताय। तस्माति पासमोचनतो पासण्डोति न वुच्चति। ‘‘इतो बहिद्धायेव पासण्डा होन्ती’’ति वुत्तस्स अत्थस्स निगमनं। एवञ्च कत्वा सब्बेपि बाहिरकसमये सन्धाय चूळसीहनादसुत्ते ‘‘छन्नवुति पासण्डा’’ति वुत्तं। पसीदन्तीति दिट्ठिपङ्के संसारपङ्के च पकारेहि अगाधा ओसीदन्ति।
169.Samaṇisadisāti samaṇaliṅgassa dhāraṇena samaṇisadisā, kassacipi pāsaṇḍassa aruccanato monamaggassa appaṭipajjanato tava samaṇibhāvaṃ nānupassāmīti adhippāyo. Pāsaṃ ḍentīti pāsaṃ sajjenti, yathā tattha diṭṭhipāse sattānaṃ cittaṃ paṭimukkaṃ hoti, evaṃ sajjentīti attho. Tathābhūtā ca te sattānaṃ citte khittā viya hontīti āha ‘‘cittesu diṭṭhipāsaṃ khipantīti attho’’ti. Pāse mocetīti diṭṭhipāse sattānaṃ cittasantānato nīharati dhammasudhammatāya. Tasmāti pāsamocanato pāsaṇḍoti na vuccati. ‘‘Ito bahiddhāyeva pāsaṇḍā hontī’’ti vuttassa atthassa nigamanaṃ. Evañca katvā sabbepi bāhirakasamaye sandhāya cūḷasīhanādasutte ‘‘channavuti pāsaṇḍā’’ti vuttaṃ. Pasīdantīti diṭṭhipaṅke saṃsārapaṅke ca pakārehi agādhā osīdanti.
अभिभवित्वाति सब्बसंकिलेसप्पहानेन अभिभुय्य अतिक्कमित्वा। अजितोति अजिनि अविजयत्ता। सब्बानि अकुसलकम्मानि कुसलकम्मानि च खीणानि एत्थाति सब्बकम्मक्खयो, अरहत्तं। उपधयो सम्मदेव खीयन्ति एत्थाति उपधिसङ्खयो, निब्बानं।
Abhibhavitvāti sabbasaṃkilesappahānena abhibhuyya atikkamitvā. Ajitoti ajini avijayattā. Sabbāni akusalakammāni kusalakammāni ca khīṇāni etthāti sabbakammakkhayo, arahattaṃ. Upadhayo sammadeva khīyanti etthāti upadhisaṅkhayo, nibbānaṃ.
सीसुपचालासुत्तवण्णना निट्ठिता।
Sīsupacālāsuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ८. सीसुपचालासुत्तं • 8. Sīsupacālāsuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ८. सीसुपचालासुत्तवण्णना • 8. Sīsupacālāsuttavaṇṇanā
