| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၈. သီသုပစာလာသုတ္တဝဏ္ဏနာ
8. Sīsupacālāsuttavaṇṇanā
၁၆၉. သမဏိသဒိသာတိ သမဏလိင္ဂသ္သ ဓာရဏေန သမဏိသဒိသာ, ကသ္သစိပိ ပာသဏ္ဍသ္သ အရုစ္စနတော မောနမဂ္ဂသ္သ အပ္ပဋိပဇ္ဇနတော တဝ သမဏိဘာဝံ နာနုပသ္သာမီတိ အဓိပ္ပာယော။ ပာသံ ဍေန္တီတိ ပာသံ သဇ္ဇေန္တိ, ယထာ တတ္ထ ဒိဋ္ဌိပာသေ သတ္တာနံ စိတ္တံ ပဋိမုက္ကံ ဟောတိ, ဧဝံ သဇ္ဇေန္တီတိ အတ္ထော။ တထာဘူတာ စ တေ သတ္တာနံ စိတ္တေ ခိတ္တာ ဝိယ ဟောန္တီတိ အာဟ ‘‘စိတ္တေသု ဒိဋ္ဌိပာသံ ခိပန္တီတိ အတ္ထော’’တိ။ ပာသေ မောစေတီတိ ဒိဋ္ဌိပာသေ သတ္တာနံ စိတ္တသန္တာနတော နီဟရတိ ဓမ္မသုဓမ္မတာယ။ တသ္မာတိ ပာသမောစနတော ပာသဏ္ဍောတိ န ဝုစ္စတိ။ ‘‘ဣတော ဗဟိဒ္ဓာယေဝ ပာသဏ္ဍာ ဟောန္တီ’’တိ ဝုတ္တသ္သ အတ္ထသ္သ နိဂမနံ။ ဧဝဉ္စ ကတ္ဝာ သဗ္ဗေပိ ဗာဟိရကသမယေ သန္ဓာယ စူဠသီဟနာဒသုတ္တေ ‘‘ဆန္နဝုတိ ပာသဏ္ဍာ’’တိ ဝုတ္တံ။ ပသီဒန္တီတိ ဒိဋ္ဌိပင္ကေ သံသာရပင္ကေ စ ပကာရေဟိ အဂာဓာ ဩသီဒန္တိ။
169.Samaṇisadisāti samaṇaliṅgassa dhāraṇena samaṇisadisā, kassacipi pāsaṇḍassa aruccanato monamaggassa appaṭipajjanato tava samaṇibhāvaṃ nānupassāmīti adhippāyo. Pāsaṃ ḍentīti pāsaṃ sajjenti, yathā tattha diṭṭhipāse sattānaṃ cittaṃ paṭimukkaṃ hoti, evaṃ sajjentīti attho. Tathābhūtā ca te sattānaṃ citte khittā viya hontīti āha ‘‘cittesu diṭṭhipāsaṃ khipantīti attho’’ti. Pāse mocetīti diṭṭhipāse sattānaṃ cittasantānato nīharati dhammasudhammatāya. Tasmāti pāsamocanato pāsaṇḍoti na vuccati. ‘‘Ito bahiddhāyeva pāsaṇḍā hontī’’ti vuttassa atthassa nigamanaṃ. Evañca katvā sabbepi bāhirakasamaye sandhāya cūḷasīhanādasutte ‘‘channavuti pāsaṇḍā’’ti vuttaṃ. Pasīdantīti diṭṭhipaṅke saṃsārapaṅke ca pakārehi agādhā osīdanti.
အဘိဘဝိတ္ဝာတိ သဗ္ဗသံကိလေသပ္ပဟာနေန အဘိဘုယ္ယ အတိက္ကမိတ္ဝာ။ အဇိတောတိ အဇိနိ အဝိဇယတ္တာ။ သဗ္ဗာနိ အကုသလကမ္မာနိ ကုသလကမ္မာနိ စ ခီဏာနိ ဧတ္ထာတိ သဗ္ဗကမ္မက္ခယော, အရဟတ္တံ။ ဥပဓယော သမ္မဒေဝ ခီယန္တိ ဧတ္ထာတိ ဥပဓိသင္ခယော, နိဗ္ဗာနံ။
Abhibhavitvāti sabbasaṃkilesappahānena abhibhuyya atikkamitvā. Ajitoti ajini avijayattā. Sabbāni akusalakammāni kusalakammāni ca khīṇāni etthāti sabbakammakkhayo, arahattaṃ. Upadhayo sammadeva khīyanti etthāti upadhisaṅkhayo, nibbānaṃ.
သီသုပစာလာသုတ္တဝဏ္ဏနာ နိဋ္ဌိတာ။
Sīsupacālāsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. သီသုပစာလာသုတ္တံ • 8. Sīsupacālāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. သီသုပစာလာသုတ္တဝဏ္ဏနာ • 8. Sīsupacālāsuttavaṇṇanā
