| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೮. ಸೀಸುಪಚಾಲಾಸುತ್ತವಣ್ಣನಾ
8. Sīsupacālāsuttavaṇṇanā
೧೬೯. ಸಮಣಿಸದಿಸಾತಿ ಸಮಣಲಿಙ್ಗಸ್ಸ ಧಾರಣೇನ ಸಮಣಿಸದಿಸಾ, ಕಸ್ಸಚಿಪಿ ಪಾಸಣ್ಡಸ್ಸ ಅರುಚ್ಚನತೋ ಮೋನಮಗ್ಗಸ್ಸ ಅಪ್ಪಟಿಪಜ್ಜನತೋ ತವ ಸಮಣಿಭಾವಂ ನಾನುಪಸ್ಸಾಮೀತಿ ಅಧಿಪ್ಪಾಯೋ। ಪಾಸಂ ಡೇನ್ತೀತಿ ಪಾಸಂ ಸಜ್ಜೇನ್ತಿ, ಯಥಾ ತತ್ಥ ದಿಟ್ಠಿಪಾಸೇ ಸತ್ತಾನಂ ಚಿತ್ತಂ ಪಟಿಮುಕ್ಕಂ ಹೋತಿ, ಏವಂ ಸಜ್ಜೇನ್ತೀತಿ ಅತ್ಥೋ। ತಥಾಭೂತಾ ಚ ತೇ ಸತ್ತಾನಂ ಚಿತ್ತೇ ಖಿತ್ತಾ ವಿಯ ಹೋನ್ತೀತಿ ಆಹ ‘‘ಚಿತ್ತೇಸು ದಿಟ್ಠಿಪಾಸಂ ಖಿಪನ್ತೀತಿ ಅತ್ಥೋ’’ತಿ। ಪಾಸೇ ಮೋಚೇತೀತಿ ದಿಟ್ಠಿಪಾಸೇ ಸತ್ತಾನಂ ಚಿತ್ತಸನ್ತಾನತೋ ನೀಹರತಿ ಧಮ್ಮಸುಧಮ್ಮತಾಯ। ತಸ್ಮಾತಿ ಪಾಸಮೋಚನತೋ ಪಾಸಣ್ಡೋತಿ ನ ವುಚ್ಚತಿ। ‘‘ಇತೋ ಬಹಿದ್ಧಾಯೇವ ಪಾಸಣ್ಡಾ ಹೋನ್ತೀ’’ತಿ ವುತ್ತಸ್ಸ ಅತ್ಥಸ್ಸ ನಿಗಮನಂ। ಏವಞ್ಚ ಕತ್ವಾ ಸಬ್ಬೇಪಿ ಬಾಹಿರಕಸಮಯೇ ಸನ್ಧಾಯ ಚೂಳಸೀಹನಾದಸುತ್ತೇ ‘‘ಛನ್ನವುತಿ ಪಾಸಣ್ಡಾ’’ತಿ ವುತ್ತಂ। ಪಸೀದನ್ತೀತಿ ದಿಟ್ಠಿಪಙ್ಕೇ ಸಂಸಾರಪಙ್ಕೇ ಚ ಪಕಾರೇಹಿ ಅಗಾಧಾ ಓಸೀದನ್ತಿ।
169.Samaṇisadisāti samaṇaliṅgassa dhāraṇena samaṇisadisā, kassacipi pāsaṇḍassa aruccanato monamaggassa appaṭipajjanato tava samaṇibhāvaṃ nānupassāmīti adhippāyo. Pāsaṃ ḍentīti pāsaṃ sajjenti, yathā tattha diṭṭhipāse sattānaṃ cittaṃ paṭimukkaṃ hoti, evaṃ sajjentīti attho. Tathābhūtā ca te sattānaṃ citte khittā viya hontīti āha ‘‘cittesu diṭṭhipāsaṃ khipantīti attho’’ti. Pāse mocetīti diṭṭhipāse sattānaṃ cittasantānato nīharati dhammasudhammatāya. Tasmāti pāsamocanato pāsaṇḍoti na vuccati. ‘‘Ito bahiddhāyeva pāsaṇḍā hontī’’ti vuttassa atthassa nigamanaṃ. Evañca katvā sabbepi bāhirakasamaye sandhāya cūḷasīhanādasutte ‘‘channavuti pāsaṇḍā’’ti vuttaṃ. Pasīdantīti diṭṭhipaṅke saṃsārapaṅke ca pakārehi agādhā osīdanti.
ಅಭಿಭವಿತ್ವಾತಿ ಸಬ್ಬಸಂಕಿಲೇಸಪ್ಪಹಾನೇನ ಅಭಿಭುಯ್ಯ ಅತಿಕ್ಕಮಿತ್ವಾ। ಅಜಿತೋತಿ ಅಜಿನಿ ಅವಿಜಯತ್ತಾ। ಸಬ್ಬಾನಿ ಅಕುಸಲಕಮ್ಮಾನಿ ಕುಸಲಕಮ್ಮಾನಿ ಚ ಖೀಣಾನಿ ಏತ್ಥಾತಿ ಸಬ್ಬಕಮ್ಮಕ್ಖಯೋ, ಅರಹತ್ತಂ। ಉಪಧಯೋ ಸಮ್ಮದೇವ ಖೀಯನ್ತಿ ಏತ್ಥಾತಿ ಉಪಧಿಸಙ್ಖಯೋ, ನಿಬ್ಬಾನಂ।
Abhibhavitvāti sabbasaṃkilesappahānena abhibhuyya atikkamitvā. Ajitoti ajini avijayattā. Sabbāni akusalakammāni kusalakammāni ca khīṇāni etthāti sabbakammakkhayo, arahattaṃ. Upadhayo sammadeva khīyanti etthāti upadhisaṅkhayo, nibbānaṃ.
ಸೀಸುಪಚಾಲಾಸುತ್ತವಣ್ಣನಾ ನಿಟ್ಠಿತಾ।
Sīsupacālāsuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೮. ಸೀಸುಪಚಾಲಾಸುತ್ತಂ • 8. Sīsupacālāsuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೮. ಸೀಸುಪಚಾಲಾಸುತ್ತವಣ್ಣನಾ • 8. Sīsupacālāsuttavaṇṇanā
