| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
8. සීසුපචාලාසුත්‌තවණ්‌ණනා
8. Sīsupacālāsuttavaṇṇanā
169. සමණිසදිසාති සමණලිඞ්‌ගස්‌ස ධාරණෙන සමණිසදිසා, කස්‌සචිපි පාසණ්‌ඩස්‌ස අරුච්‌චනතො මොනමග්‌ගස්‌ස අප්‌පටිපජ්‌ජනතො තව සමණිභාවං නානුපස්‌සාමීති අධිප්‌පායො. පාසං ඩෙන්‌තීති පාසං සජ්‌ජෙන්‌ති, යථා තත්‌ථ දිට්‌ඨිපාසෙ සත්‌තානං චිත්‌තං පටිමුක්‌කං හොති, එවං සජ්‌ජෙන්‌තීති අත්‌ථො. තථාභූතා ච තෙ සත්‌තානං චිත්‌තෙ ඛිත්‌තා විය හොන්‌තීති ආහ ‘‘චිත්‌තෙසු දිට්‌ඨිපාසං ඛිපන්‌තීති අත්‌ථො’’ති. පාසෙ මොචෙතීති දිට්‌ඨිපාසෙ සත්‌තානං චිත්‌තසන්‌තානතො නීහරති ධම්‌මසුධම්‌මතාය. තස්‌මාති පාසමොචනතො පාසණ්‌ඩොති න වුච්‌චති. ‘‘ඉතො බහිද්‌ධායෙව පාසණ්‌ඩා හොන්‌තී’’ති වුත්‌තස්‌ස අත්‌ථස්‌ස නිගමනං. එවඤ්‌ච කත්‌වා සබ්‌බෙපි බාහිරකසමයෙ සන්‌ධාය චූළසීහනාදසුත්‌තෙ ‘‘ඡන්‌නවුති පාසණ්‌ඩා’’ති වුත්‌තං. පසීදන්‌තීති දිට්‌ඨිපඞ්‌කෙ සංසාරපඞ්‌කෙ ච පකාරෙහි අගාධා ඔසීදන්‌ති.
169.Samaṇisadisāti samaṇaliṅgassa dhāraṇena samaṇisadisā, kassacipi pāsaṇḍassa aruccanato monamaggassa appaṭipajjanato tava samaṇibhāvaṃ nānupassāmīti adhippāyo. Pāsaṃ ḍentīti pāsaṃ sajjenti, yathā tattha diṭṭhipāse sattānaṃ cittaṃ paṭimukkaṃ hoti, evaṃ sajjentīti attho. Tathābhūtā ca te sattānaṃ citte khittā viya hontīti āha ‘‘cittesu diṭṭhipāsaṃ khipantīti attho’’ti. Pāse mocetīti diṭṭhipāse sattānaṃ cittasantānato nīharati dhammasudhammatāya. Tasmāti pāsamocanato pāsaṇḍoti na vuccati. ‘‘Ito bahiddhāyeva pāsaṇḍā hontī’’ti vuttassa atthassa nigamanaṃ. Evañca katvā sabbepi bāhirakasamaye sandhāya cūḷasīhanādasutte ‘‘channavuti pāsaṇḍā’’ti vuttaṃ. Pasīdantīti diṭṭhipaṅke saṃsārapaṅke ca pakārehi agādhā osīdanti.
අභිභවිත්‌වාති සබ්‌බසංකිලෙසප්‌පහානෙන අභිභුය්‍ය අතික්‌කමිත්‌වා. අජිතොති අජිනි අවිජයත්‌තා. සබ්‌බානි අකුසලකම්‌මානි කුසලකම්‌මානි ච ඛීණානි එත්‌ථාති සබ්‌බකම්‌මක්‌ඛයො, අරහත්‌තං. උපධයො සම්‌මදෙව ඛීයන්‌ති එත්‌ථාති උපධිසඞ්‌ඛයො, නිබ්‌බානං.
Abhibhavitvāti sabbasaṃkilesappahānena abhibhuyya atikkamitvā. Ajitoti ajini avijayattā. Sabbāni akusalakammāni kusalakammāni ca khīṇāni etthāti sabbakammakkhayo, arahattaṃ. Upadhayo sammadeva khīyanti etthāti upadhisaṅkhayo, nibbānaṃ.
සීසුපචාලාසුත්‌තවණ්‌ණනා නිට්‌ඨිතා.
Sīsupacālāsuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 8. සීසුපචාලාසුත්‌තං • 8. Sīsupacālāsuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. සීසුපචාලාසුත්‌තවණ්‌ණනා • 8. Sīsupacālāsuttavaṇṇanā
