| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. ஸீதிவக்³கோ³
9. Sītivaggo
1. ஸீதிபா⁴வஸுத்தவண்ணனா
1. Sītibhāvasuttavaṇṇanā
85. நவமஸ்ஸ பட²மே ஸீதிபா⁴வந்தி நிப்³பா³னங், கிலேஸவூபஸமங் வா. நிக்³க³ண்ஹாதீதி அச்சாரத்³த⁴வீரியதாதீ³ஹி உத்³த⁴தங் சித்தங் உத்³த⁴ச்சபக்க²தோ ரக்க²ணவஸேன நிக்³க³ண்ஹாதி. பக்³க³ண்ஹாதீதி அதிஸிதி²லவீரியதாதீ³ஹி லீனங் சித்தங் கோஸஜ்ஜபாததோ ரக்க²ணவஸேன பக்³க³ண்ஹாதி. ஸம்பஹங்ஸேதீதி ஸமப்பவத்தசித்தங் ததா²பவத்தியங் பஞ்ஞாய தோஸேதி உத்தேஜேதி வா. யதா³ வா பஞ்ஞாபயோக³மந்த³தாய உபஸமஸுகா²னதி⁴க³மேன வா நிரஸ்ஸாத³ங் சித்தங் பா⁴வனாய ந பக்க²ந்த³தி, ததா³ ஜாதிஆதீ³னி ஸங்வேக³வத்தூ²னி பச்சவெக்கி²த்வா ஸம்பஹங்ஸேதி ஸமுத்தேஜேதி. அஜ்ஜு²பெக்க²தீதி யதா³ பன சித்தங் அலீனங் அனுத்³த⁴தங் அனிரஸ்ஸாத³ங் ஆரம்மணே ஸமப்பவத்தங் ஸம்மதே³வ பா⁴வனாவீதிங் ஓதிண்ணங் ஹோதி, ததா³ பக்³க³ஹனிக்³க³ஹஸம்பஹங்ஸனேஸு கிஞ்சி ப்³யாபாரங் அகத்வா ஸமப்பவத்தேஸு அஸ்ஸேஸு ஸாரதீ² விய அஜ்ஜு²பெக்க²தி, உபெக்க²கோவ ஹோதி. பணீதாதி⁴முத்திகோதி பணீதே உத்தமே மக்³க³ப²லே அதி⁴முத்தோ நின்னபோணபப்³பா⁴ரோ.
85. Navamassa paṭhame sītibhāvanti nibbānaṃ, kilesavūpasamaṃ vā. Niggaṇhātīti accāraddhavīriyatādīhi uddhataṃ cittaṃ uddhaccapakkhato rakkhaṇavasena niggaṇhāti. Paggaṇhātīti atisithilavīriyatādīhi līnaṃ cittaṃ kosajjapātato rakkhaṇavasena paggaṇhāti. Sampahaṃsetīti samappavattacittaṃ tathāpavattiyaṃ paññāya toseti uttejeti vā. Yadā vā paññāpayogamandatāya upasamasukhānadhigamena vā nirassādaṃ cittaṃ bhāvanāya na pakkhandati, tadā jātiādīni saṃvegavatthūni paccavekkhitvā sampahaṃseti samuttejeti. Ajjhupekkhatīti yadā pana cittaṃ alīnaṃ anuddhataṃ anirassādaṃ ārammaṇe samappavattaṃ sammadeva bhāvanāvītiṃ otiṇṇaṃ hoti, tadā paggahaniggahasampahaṃsanesu kiñci byāpāraṃ akatvā samappavattesu assesu sārathī viya ajjhupekkhati, upekkhakova hoti. Paṇītādhimuttikoti paṇīte uttame maggaphale adhimutto ninnapoṇapabbhāro.
ஸீதிபா⁴வஸுத்தவண்ணனா நிட்டி²தா.
Sītibhāvasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ஸீதிபா⁴வஸுத்தங் • 1. Sītibhāvasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. ஸீதிபா⁴வஸுத்தவண்ணனா • 1. Sītibhāvasuttavaṇṇanā
