| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৯. সীতিৰগ্গো
9. Sītivaggo
১. সীতিভাৰসুত্তৰণ্ণনা
1. Sītibhāvasuttavaṇṇanā
৮৫. নৰমস্স পঠমে সীতিভাৰন্তি নিব্বানং, কিলেসৰূপসমং ৰা। নিগ্গণ্হাতীতি অচ্চারদ্ধৰীরিযতাদীহি উদ্ধতং চিত্তং উদ্ধচ্চপক্খতো রক্খণৰসেন নিগ্গণ্হাতি। পগ্গণ্হাতীতি অতিসিথিলৰীরিযতাদীহি লীনং চিত্তং কোসজ্জপাততো রক্খণৰসেন পগ্গণ্হাতি। সম্পহংসেতীতি সমপ্পৰত্তচিত্তং তথাপৰত্তিযং পঞ্ঞায তোসেতি উত্তেজেতি ৰা। যদা ৰা পঞ্ঞাপযোগমন্দতায উপসমসুখানধিগমেন ৰা নিরস্সাদং চিত্তং ভাৰনায ন পক্খন্দতি, তদা জাতিআদীনি সংৰেগৰত্থূনি পচ্চৰেক্খিত্ৰা সম্পহংসেতি সমুত্তেজেতি। অজ্ঝুপেক্খতীতি যদা পন চিত্তং অলীনং অনুদ্ধতং অনিরস্সাদং আরম্মণে সমপ্পৰত্তং সম্মদেৰ ভাৰনাৰীতিং ওতিণ্ণং হোতি, তদা পগ্গহনিগ্গহসম্পহংসনেসু কিঞ্চি ব্যাপারং অকত্ৰা সমপ্পৰত্তেসু অস্সেসু সারথী ৰিয অজ্ঝুপেক্খতি, উপেক্খকোৰ হোতি। পণীতাধিমুত্তিকোতি পণীতে উত্তমে মগ্গফলে অধিমুত্তো নিন্নপোণপব্ভারো।
85. Navamassa paṭhame sītibhāvanti nibbānaṃ, kilesavūpasamaṃ vā. Niggaṇhātīti accāraddhavīriyatādīhi uddhataṃ cittaṃ uddhaccapakkhato rakkhaṇavasena niggaṇhāti. Paggaṇhātīti atisithilavīriyatādīhi līnaṃ cittaṃ kosajjapātato rakkhaṇavasena paggaṇhāti. Sampahaṃsetīti samappavattacittaṃ tathāpavattiyaṃ paññāya toseti uttejeti vā. Yadā vā paññāpayogamandatāya upasamasukhānadhigamena vā nirassādaṃ cittaṃ bhāvanāya na pakkhandati, tadā jātiādīni saṃvegavatthūni paccavekkhitvā sampahaṃseti samuttejeti. Ajjhupekkhatīti yadā pana cittaṃ alīnaṃ anuddhataṃ anirassādaṃ ārammaṇe samappavattaṃ sammadeva bhāvanāvītiṃ otiṇṇaṃ hoti, tadā paggahaniggahasampahaṃsanesu kiñci byāpāraṃ akatvā samappavattesu assesu sārathī viya ajjhupekkhati, upekkhakova hoti. Paṇītādhimuttikoti paṇīte uttame maggaphale adhimutto ninnapoṇapabbhāro.
সীতিভাৰসুত্তৰণ্ণনা নিট্ঠিতা।
Sītibhāvasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. সীতিভাৰসুত্তং • 1. Sītibhāvasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১. সীতিভাৰসুত্তৰণ্ণনা • 1. Sītibhāvasuttavaṇṇanā
