| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༩. སཱིཏིཝགྒོ
9. Sītivaggo
༡. སཱིཏིབྷཱཝསུཏྟཝཎྞནཱ
1. Sītibhāvasuttavaṇṇanā
༨༥. ནཝམསྶ པཋམེ སཱིཏིབྷཱཝནྟི ནིབྦཱནཾ, ཀིལེསཝཱུཔསམཾ ཝཱ། ནིགྒཎྷཱཏཱིཏི ཨཙྩཱརདྡྷཝཱིརིཡཏཱདཱིཧི ཨུདྡྷཏཾ ཙིཏྟཾ ཨུདྡྷཙྩཔཀྑཏོ རཀྑཎཝསེན ནིགྒཎྷཱཏི། པགྒཎྷཱཏཱིཏི ཨཏིསིཐིལཝཱིརིཡཏཱདཱིཧི ལཱིནཾ ཙིཏྟཾ ཀོསཛྫཔཱཏཏོ རཀྑཎཝསེན པགྒཎྷཱཏི། སམྤཧཾསེཏཱིཏི སམཔྤཝཏྟཙིཏྟཾ ཏཐཱཔཝཏྟིཡཾ པཉྙཱཡ ཏོསེཏི ཨུཏྟེཛེཏི ཝཱ། ཡདཱ ཝཱ པཉྙཱཔཡོགམནྡཏཱཡ ཨུཔསམསུཁཱནདྷིགམེན ཝཱ ནིརསྶཱདཾ ཙིཏྟཾ བྷཱཝནཱཡ ན པཀྑནྡཏི, ཏདཱ ཛཱཏིཨཱདཱིནི སཾཝེགཝཏྠཱུནི པཙྩཝེཀྑིཏྭཱ སམྤཧཾསེཏི སམུཏྟེཛེཏི། ཨཛ྄ཛྷུཔེཀྑཏཱིཏི ཡདཱ པན ཙིཏྟཾ ཨལཱིནཾ ཨནུདྡྷཏཾ ཨནིརསྶཱདཾ ཨཱརམྨཎེ སམཔྤཝཏྟཾ སམྨདེཝ བྷཱཝནཱཝཱིཏིཾ ཨོཏིཎྞཾ ཧོཏི, ཏདཱ པགྒཧནིགྒཧསམྤཧཾསནེསུ ཀིཉྩི བྱཱཔཱརཾ ཨཀཏྭཱ སམཔྤཝཏྟེསུ ཨསྶེསུ སཱརཐཱི ཝིཡ ཨཛ྄ཛྷུཔེཀྑཏི, ཨུཔེཀྑཀོཝ ཧོཏི། པཎཱིཏཱདྷིམུཏྟིཀོཏི པཎཱིཏེ ཨུཏྟམེ མགྒཕལེ ཨདྷིམུཏྟོ ནིནྣཔོཎཔབྦྷཱརོ།
85. Navamassa paṭhame sītibhāvanti nibbānaṃ, kilesavūpasamaṃ vā. Niggaṇhātīti accāraddhavīriyatādīhi uddhataṃ cittaṃ uddhaccapakkhato rakkhaṇavasena niggaṇhāti. Paggaṇhātīti atisithilavīriyatādīhi līnaṃ cittaṃ kosajjapātato rakkhaṇavasena paggaṇhāti. Sampahaṃsetīti samappavattacittaṃ tathāpavattiyaṃ paññāya toseti uttejeti vā. Yadā vā paññāpayogamandatāya upasamasukhānadhigamena vā nirassādaṃ cittaṃ bhāvanāya na pakkhandati, tadā jātiādīni saṃvegavatthūni paccavekkhitvā sampahaṃseti samuttejeti. Ajjhupekkhatīti yadā pana cittaṃ alīnaṃ anuddhataṃ anirassādaṃ ārammaṇe samappavattaṃ sammadeva bhāvanāvītiṃ otiṇṇaṃ hoti, tadā paggahaniggahasampahaṃsanesu kiñci byāpāraṃ akatvā samappavattesu assesu sārathī viya ajjhupekkhati, upekkhakova hoti. Paṇītādhimuttikoti paṇīte uttame maggaphale adhimutto ninnapoṇapabbhāro.
སཱིཏིབྷཱཝསུཏྟཝཎྞནཱ ནིཊྛིཏཱ།
Sītibhāvasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡. སཱིཏིབྷཱཝསུཏྟཾ • 1. Sītibhāvasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡. སཱིཏིབྷཱཝསུཏྟཝཎྞནཱ • 1. Sītibhāvasuttavaṇṇanā
