| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. অট্ঠসতপরিযাযৰগ্গো
3. Aṭṭhasatapariyāyavaggo
১. সীৰকসুত্তং
1. Sīvakasuttaṃ
২৬৯. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে। অথ খো মোল়িযসীৰকো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো মোল়িযসীৰকো পরিব্বাজকো ভগৰন্তং এতদৰোচ – ‘‘সন্তি, ভো গোতম, একে সমণব্রাহ্মণা এৰংৰাদিনো এৰংদিট্ঠিনো – ‘যং কিঞ্চাযং পুরিসপুগ্গলো পটিসংৰেদেতি সুখং ৰা দুক্খং ৰা অদুক্খমসুখং ৰা সব্বং তং পুব্বেকতহেতূ’তি। ইধ 1 ভৰং গোতমো কিমাহা’’তি?
269. Ekaṃ samayaṃ bhagavā rājagahe viharati veḷuvane kalandakanivāpe. Atha kho moḷiyasīvako paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho moḷiyasīvako paribbājako bhagavantaṃ etadavoca – ‘‘santi, bho gotama, eke samaṇabrāhmaṇā evaṃvādino evaṃdiṭṭhino – ‘yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ pubbekatahetū’ti. Idha 2 bhavaṃ gotamo kimāhā’’ti?
‘‘পিত্তসমুট্ঠানানিপি খো, সীৰক, ইধেকচ্চানি ৰেদযিতানি উপ্পজ্জন্তি। সামম্পি খো এতং, সীৰক, ৰেদিতব্বং 3 যথা পিত্তসমুট্ঠানানিপি ইধেকচ্চানি ৰেদযিতানি উপ্পজ্জন্তি; লোকস্সপি খো এতং, সীৰক, সচ্চসম্মতং যথা পিত্তসমুট্ঠানানিপি ইধেকচ্চানি ৰেদযিতানি উপ্পজ্জন্তি। তত্র, সীৰক, যে তে সমণব্রাহ্মণা এৰংৰাদিনো এৰংদিট্ঠিনো – ‘যং কিঞ্চাযং পুরিসপুগ্গলো পটিসংৰেদেতি সুখং ৰা দুক্খং ৰা অদুক্খমসুখং ৰা সব্বং তং পুব্বেকতহেতূ’তি। যঞ্চ সামং ঞাতং তঞ্চ অতিধাৰন্তি, যঞ্চ লোকে সচ্চসম্মতং তঞ্চ অতিধাৰন্তি। তস্মা তেসং সমণব্রাহ্মণানং মিচ্ছাতি ৰদামি।
‘‘Pittasamuṭṭhānānipi kho, sīvaka, idhekaccāni vedayitāni uppajjanti. Sāmampi kho etaṃ, sīvaka, veditabbaṃ 4 yathā pittasamuṭṭhānānipi idhekaccāni vedayitāni uppajjanti; lokassapi kho etaṃ, sīvaka, saccasammataṃ yathā pittasamuṭṭhānānipi idhekaccāni vedayitāni uppajjanti. Tatra, sīvaka, ye te samaṇabrāhmaṇā evaṃvādino evaṃdiṭṭhino – ‘yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ pubbekatahetū’ti. Yañca sāmaṃ ñātaṃ tañca atidhāvanti, yañca loke saccasammataṃ tañca atidhāvanti. Tasmā tesaṃ samaṇabrāhmaṇānaṃ micchāti vadāmi.
‘‘সেম্হসমুট্ঠানানিপি খো, সীৰক…পে॰… ৰাতসমুট্ঠানানিপি খো, সীৰক…পে॰… সন্নিপাতিকানিপি খো, সীৰক…পে॰… উতুপরিণামজানিপি খো, সীৰক…পে॰… ৰিসমপরিহারজানিপি খো, সীৰক…পে॰… ওপক্কমিকানিপি খো, সীৰক…পে॰… কম্মৰিপাকজানিপি খো, সীৰক, ইধেকচ্চানি ৰেদযিতানি উপ্পজ্জন্তি। সামম্পি খো এতং, সীৰক, ৰেদিতব্বং। যথা কম্মৰিপাকজানিপি ইধেকচ্চানি ৰেদযিতানি উপ্পজ্জন্তি; লোকস্সপি খো এতং, সীৰক, সচ্চসম্মতং। যথা কম্মৰিপাকজানিপি ইধেকচ্চানি ৰেদযিতানি উপ্পজ্জন্তি; তত্র, সীৰক, যে তে সমণব্রাহ্মণা এৰংৰাদিনো এৰংদিট্ঠিনো – ‘যং কিঞ্চাযং পুরিসপুগ্গলো পটিসংৰেদেতি সুখং ৰা দুক্খং ৰা অদুক্খমসুখং ৰা সব্বং তং পুব্বেকতহেতূ’তি। যঞ্চ সামং ঞাতং তঞ্চ অতিধাৰন্তি যঞ্চ লোকে সচ্চসম্মতং তঞ্চ অতিধাৰন্তি। তস্মা তেসং সমণব্রাহ্মণানং মিচ্ছাতি ৰদামীতি। এৰং ৰুত্তে, মোল়িযসীৰকো পরিব্বাজকো ভগৰন্তং এতদৰোচ – ‘অভিক্কন্তং, ভো গোতম, অভিক্কন্তং, ভো গোতম …পে॰… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’’ন্তি।
‘‘Semhasamuṭṭhānānipi kho, sīvaka…pe… vātasamuṭṭhānānipi kho, sīvaka…pe… sannipātikānipi kho, sīvaka…pe… utupariṇāmajānipi kho, sīvaka…pe… visamaparihārajānipi kho, sīvaka…pe… opakkamikānipi kho, sīvaka…pe… kammavipākajānipi kho, sīvaka, idhekaccāni vedayitāni uppajjanti. Sāmampi kho etaṃ, sīvaka, veditabbaṃ. Yathā kammavipākajānipi idhekaccāni vedayitāni uppajjanti; lokassapi kho etaṃ, sīvaka, saccasammataṃ. Yathā kammavipākajānipi idhekaccāni vedayitāni uppajjanti; tatra, sīvaka, ye te samaṇabrāhmaṇā evaṃvādino evaṃdiṭṭhino – ‘yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ pubbekatahetū’ti. Yañca sāmaṃ ñātaṃ tañca atidhāvanti yañca loke saccasammataṃ tañca atidhāvanti. Tasmā tesaṃ samaṇabrāhmaṇānaṃ micchāti vadāmīti. Evaṃ vutte, moḷiyasīvako paribbājako bhagavantaṃ etadavoca – ‘abhikkantaṃ, bho gotama, abhikkantaṃ, bho gotama …pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’’nti.
‘‘পিত্তং সেম্হঞ্চ ৰাতো চ, সন্নিপাতা উতূনি চ।
‘‘Pittaṃ semhañca vāto ca, sannipātā utūni ca;
ৰিসমং ওপক্কমিকং, কম্মৰিপাকেন অট্ঠমী’’তি॥ পঠমং।
Visamaṃ opakkamikaṃ, kammavipākena aṭṭhamī’’ti. paṭhamaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সীৰকসুত্তৰণ্ণনা • 1. Sīvakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. সীৰকসুত্তৰণ্ণনা • 1. Sīvakasuttavaṇṇanā
