| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. අට්‌ඨසතපරියායවග්‌ගො
3. Aṭṭhasatapariyāyavaggo
1. සීවකසුත්‌තං
1. Sīvakasuttaṃ
269. එකං සමයං භගවා රාජගහෙ විහරති වෙළුවනෙ කලන්‌දකනිවාපෙ. අථ ඛො මොළියසීවකො පරිබ්‌බාජකො යෙන භගවා තෙනුපසඞ්‌කමි; උපසඞ්‌කමිත්‌වා භගවතා සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො මොළියසීවකො පරිබ්‌බාජකො භගවන්‌තං එතදවොච – ‘‘සන්‌ති, භො ගොතම, එකෙ සමණබ්‍රාහ්‌මණා එවංවාදිනො එවංදිට්‌ඨිනො – ‘යං කිඤ්‌චායං පුරිසපුග්‌ගලො පටිසංවෙදෙති සුඛං වා දුක්‌ඛං වා අදුක්‌ඛමසුඛං වා සබ්‌බං තං පුබ්‌බෙකතහෙතූ’ති. ඉධ 1 භවං ගොතමො කිමාහා’’ති?
269. Ekaṃ samayaṃ bhagavā rājagahe viharati veḷuvane kalandakanivāpe. Atha kho moḷiyasīvako paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho moḷiyasīvako paribbājako bhagavantaṃ etadavoca – ‘‘santi, bho gotama, eke samaṇabrāhmaṇā evaṃvādino evaṃdiṭṭhino – ‘yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ pubbekatahetū’ti. Idha 2 bhavaṃ gotamo kimāhā’’ti?
‘‘පිත්‌තසමුට්‌ඨානානිපි ඛො, සීවක, ඉධෙකච්‌චානි වෙදයිතානි උප්‌පජ්‌ජන්‌ති. සාමම්‌පි ඛො එතං, සීවක, වෙදිතබ්‌බං 3 යථා පිත්‌තසමුට්‌ඨානානිපි ඉධෙකච්‌චානි වෙදයිතානි උප්‌පජ්‌ජන්‌ති; ලොකස්‌සපි ඛො එතං, සීවක, සච්‌චසම්‌මතං යථා පිත්‌තසමුට්‌ඨානානිපි ඉධෙකච්‌චානි වෙදයිතානි උප්‌පජ්‌ජන්‌ති. තත්‍ර, සීවක, යෙ තෙ සමණබ්‍රාහ්‌මණා එවංවාදිනො එවංදිට්‌ඨිනො – ‘යං කිඤ්‌චායං පුරිසපුග්‌ගලො පටිසංවෙදෙති සුඛං වා දුක්‌ඛං වා අදුක්‌ඛමසුඛං වා සබ්‌බං තං පුබ්‌බෙකතහෙතූ’ති. යඤ්‌ච සාමං ඤාතං තඤ්‌ච අතිධාවන්‌ති, යඤ්‌ච ලොකෙ සච්‌චසම්‌මතං තඤ්‌ච අතිධාවන්‌ති. තස්‌මා තෙසං සමණබ්‍රාහ්‌මණානං මිච්‌ඡාති වදාමි.
‘‘Pittasamuṭṭhānānipi kho, sīvaka, idhekaccāni vedayitāni uppajjanti. Sāmampi kho etaṃ, sīvaka, veditabbaṃ 4 yathā pittasamuṭṭhānānipi idhekaccāni vedayitāni uppajjanti; lokassapi kho etaṃ, sīvaka, saccasammataṃ yathā pittasamuṭṭhānānipi idhekaccāni vedayitāni uppajjanti. Tatra, sīvaka, ye te samaṇabrāhmaṇā evaṃvādino evaṃdiṭṭhino – ‘yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ pubbekatahetū’ti. Yañca sāmaṃ ñātaṃ tañca atidhāvanti, yañca loke saccasammataṃ tañca atidhāvanti. Tasmā tesaṃ samaṇabrāhmaṇānaṃ micchāti vadāmi.
‘‘සෙම්‌හසමුට්‌ඨානානිපි ඛො, සීවක…පෙ.… වාතසමුට්‌ඨානානිපි ඛො, සීවක…පෙ.… සන්‌නිපාතිකානිපි ඛො, සීවක…පෙ.… උතුපරිණාමජානිපි ඛො, සීවක…පෙ.… විසමපරිහාරජානිපි ඛො, සීවක…පෙ.… ඔපක්‌කමිකානිපි ඛො, සීවක…පෙ.… කම්‌මවිපාකජානිපි ඛො, සීවක, ඉධෙකච්‌චානි වෙදයිතානි උප්‌පජ්‌ජන්‌ති. සාමම්‌පි ඛො එතං, සීවක, වෙදිතබ්‌බං. යථා කම්‌මවිපාකජානිපි ඉධෙකච්‌චානි වෙදයිතානි උප්‌පජ්‌ජන්‌ති; ලොකස්‌සපි ඛො එතං, සීවක, සච්‌චසම්‌මතං. යථා කම්‌මවිපාකජානිපි ඉධෙකච්‌චානි වෙදයිතානි උප්‌පජ්‌ජන්‌ති; තත්‍ර, සීවක, යෙ තෙ සමණබ්‍රාහ්‌මණා එවංවාදිනො එවංදිට්‌ඨිනො – ‘යං කිඤ්‌චායං පුරිසපුග්‌ගලො පටිසංවෙදෙති සුඛං වා දුක්‌ඛං වා අදුක්‌ඛමසුඛං වා සබ්‌බං තං පුබ්‌බෙකතහෙතූ’ති. යඤ්‌ච සාමං ඤාතං තඤ්‌ච අතිධාවන්‌ති යඤ්‌ච ලොකෙ සච්‌චසම්‌මතං තඤ්‌ච අතිධාවන්‌ති. තස්‌මා තෙසං සමණබ්‍රාහ්‌මණානං මිච්‌ඡාති වදාමීති. එවං වුත්‌තෙ, මොළියසීවකො පරිබ්‌බාජකො භගවන්‌තං එතදවොච – ‘අභික්‌කන්‌තං, භො ගොතම, අභික්‌කන්‌තං, භො ගොතම …පෙ.… උපාසකං මං භවං ගොතමො ධාරෙතු අජ්‌ජතග්‌ගෙ පාණුපෙතං සරණං ගත’’’න්‌ති.
‘‘Semhasamuṭṭhānānipi kho, sīvaka…pe… vātasamuṭṭhānānipi kho, sīvaka…pe… sannipātikānipi kho, sīvaka…pe… utupariṇāmajānipi kho, sīvaka…pe… visamaparihārajānipi kho, sīvaka…pe… opakkamikānipi kho, sīvaka…pe… kammavipākajānipi kho, sīvaka, idhekaccāni vedayitāni uppajjanti. Sāmampi kho etaṃ, sīvaka, veditabbaṃ. Yathā kammavipākajānipi idhekaccāni vedayitāni uppajjanti; lokassapi kho etaṃ, sīvaka, saccasammataṃ. Yathā kammavipākajānipi idhekaccāni vedayitāni uppajjanti; tatra, sīvaka, ye te samaṇabrāhmaṇā evaṃvādino evaṃdiṭṭhino – ‘yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ pubbekatahetū’ti. Yañca sāmaṃ ñātaṃ tañca atidhāvanti yañca loke saccasammataṃ tañca atidhāvanti. Tasmā tesaṃ samaṇabrāhmaṇānaṃ micchāti vadāmīti. Evaṃ vutte, moḷiyasīvako paribbājako bhagavantaṃ etadavoca – ‘abhikkantaṃ, bho gotama, abhikkantaṃ, bho gotama …pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’’nti.
‘‘පිත්‌තං සෙම්‌හඤ්‌ච වාතො ච, සන්‌නිපාතා උතූනි ච;
‘‘Pittaṃ semhañca vāto ca, sannipātā utūni ca;
විසමං ඔපක්‌කමිකං, කම්‌මවිපාකෙන අට්‌ඨමී’’ති. පඨමං;
Visamaṃ opakkamikaṃ, kammavipākena aṭṭhamī’’ti. paṭhamaṃ;
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. සීවකසුත්‌තවණ්‌ණනා • 1. Sīvakasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. සීවකසුත්‌තවණ්‌ණනා • 1. Sīvakasuttavaṇṇanā
