| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. அட்ட²ஸதபரியாயவக்³கோ³
3. Aṭṭhasatapariyāyavaggo
1. ஸீவகஸுத்தவண்ணனா
1. Sīvakasuttavaṇṇanā
269. ததியவக்³க³ஸ்ஸ பட²மே மோளியஸீவகோதி ஸீவகோதி தஸ்ஸ நாமங். சூளா பனஸ்ஸ அத்தி², தஸ்மா மோளியஸீவகோதி வுச்சதி. பரிப்³பா³ஜகோதி ச²ன்னபரிப்³பா³ஜகோ. பித்தஸமுட்டா²னானீதி பித்தபச்சயானி. வேத³யிதானீதி வேத³னா. தத்த² பித்தபச்சயா திஸ்ஸோ வேத³னா உப்பஜ்ஜந்தி. கத²ங்? ஏகச்சோ ஹி ‘‘பித்தங் மே குபிதங் து³ஜ்ஜானங் கோ² பன ஜீவித’’ந்தி தா³னங் தே³தி, ஸீலங் ஸமாதி³யதி உபோஸத²கம்மங் கரோதி, ஏவமஸ்ஸ குஸலவேத³னா உப்பஜ்ஜதி. ஏகச்சோ ‘‘பித்தபே⁴ஸஜ்ஜங் கரிஸ்ஸாமீ’’தி பாணங் ஹனதி, அதி³ன்னங் ஆதி³யதி, முஸா ப⁴ணதி, த³ஸ து³ஸ்ஸீல்யகம்மானி கரோதி, ஏவமஸ்ஸ அகுஸலவேத³னா உப்பஜ்ஜதி. ஏகச்சோ ‘‘எத்தகேனபி மே பே⁴ஸஜ்ஜகரணேன பித்தங் ந வூபஸம்மதி, அலங் யங் ஹோதி. தங் ஹோதூ’’தி மஜ்ஜ²த்தோ காயிகவேத³னங் அதி⁴வாஸெந்தோ நிபஜ்ஜதி, ஏவங் அஸ்ஸ அப்³யாகதவேத³னா உப்பஜ்ஜதி.
269. Tatiyavaggassa paṭhame moḷiyasīvakoti sīvakoti tassa nāmaṃ. Cūḷā panassa atthi, tasmā moḷiyasīvakoti vuccati. Paribbājakoti channaparibbājako. Pittasamuṭṭhānānīti pittapaccayāni. Vedayitānīti vedanā. Tattha pittapaccayā tisso vedanā uppajjanti. Kathaṃ? Ekacco hi ‘‘pittaṃ me kupitaṃ dujjānaṃ kho pana jīvita’’nti dānaṃ deti, sīlaṃ samādiyati uposathakammaṃ karoti, evamassa kusalavedanā uppajjati. Ekacco ‘‘pittabhesajjaṃ karissāmī’’ti pāṇaṃ hanati, adinnaṃ ādiyati, musā bhaṇati, dasa dussīlyakammāni karoti, evamassa akusalavedanā uppajjati. Ekacco ‘‘ettakenapi me bhesajjakaraṇena pittaṃ na vūpasammati, alaṃ yaṃ hoti. taṃ hotū’’ti majjhatto kāyikavedanaṃ adhivāsento nipajjati, evaṃ assa abyākatavedanā uppajjati.
ஸாமம்பி கோ² ஏதந்தி தங் தங் பித்தவிகாரங் தி³ஸ்வா அத்தனாபி ஏதங் வேதி³தப்³ப³ங். ஸச்சஸம்மதந்தி பூ⁴தஸம்மதங். லோகோபி ஹிஸ்ஸ ஸரீரே ஸப³லவண்ணதாதி³பித்தவிகாரங் தி³ஸ்வா ‘‘பித்தமஸ்ஸ குபித’’ந்தி ஜானாதி. தஸ்மாதி யஸ்மா ஸாமஞ்ச விதி³தங் லோகஸ்ஸ ச ஸச்சஸம்மதங் அதிதா⁴வந்தி, தஸ்மா. ஸெம்ஹஸமுட்டா²னாதீ³ஸுபி ஏஸேவ நயோ. எத்த² பன ஸன்னிபாதிகானீதி திண்ணம்பி பித்தாதீ³னங் கோபேன ஸமுட்டி²தானி. உதுபரிணாமஜானீதி விஸபா⁴க³உதுதோ ஜாதானி. ஜங்க³லதே³ஸவாஸீனஞ்ஹி அனுபதே³ஸே வஸந்தானங் விஸபா⁴கோ³ உது உப்பஜ்ஜதி, அனுபதே³ஸவாஸீனஞ்ச ஜங்க³லதே³ஸேதி ஏவங் மலயஸமுத்³த³தீராதி³வஸேனாபி உதுவிஸபா⁴க³தா உப்பஜ்ஜதியேவ. ததோ ஜாதாதி உதுபரிணாமஜாதானி நாம.
Sāmampi kho etanti taṃ taṃ pittavikāraṃ disvā attanāpi etaṃ veditabbaṃ. Saccasammatanti bhūtasammataṃ. Lokopi hissa sarīre sabalavaṇṇatādipittavikāraṃ disvā ‘‘pittamassa kupita’’nti jānāti. Tasmāti yasmā sāmañca viditaṃ lokassa ca saccasammataṃ atidhāvanti, tasmā. Semhasamuṭṭhānādīsupi eseva nayo. Ettha pana sannipātikānīti tiṇṇampi pittādīnaṃ kopena samuṭṭhitāni. Utupariṇāmajānīti visabhāgaututo jātāni. Jaṅgaladesavāsīnañhi anupadese vasantānaṃ visabhāgo utu uppajjati, anupadesavāsīnañca jaṅgaladeseti evaṃ malayasamuddatīrādivasenāpi utuvisabhāgatā uppajjatiyeva. Tato jātāti utupariṇāmajātāni nāma.
விஸமபரிஹாரஜானீதி மஹாபா⁴ரவஹனஸுதா⁴கொட்டனாதி³தோ வா அவேலாய சரந்தஸ்ஸ ஸப்பட³ங்ஸகூபபாதாதி³தோ வா விஸமபரிஹாரதோ ஜாதானி. ஓபக்கமிகானீதி ‘‘அயங் சோரோ வா பாரதா³ரிகோ வா’’தி க³ஹெத்வா ஜண்ணுககப்பரமுக்³க³ராதீ³ஹி நிப்போத²னஉபக்கமங் பச்சயங் கத்வா உப்பன்னானி. ஏதங் ப³ஹி உபக்கமங் லபி⁴த்வா கோசி வுத்தனயேனேவ குஸலங் கரோதி, கோசி அகுஸலங், கோசி அதி⁴வாஸெந்தோ நிபஜ்ஜதி. கம்மவிபாகஜானீதி கேவலங் கம்மவிபாகதோ, ஜாதானி. தேஸுபி ஹி உப்பன்னேஸு வுத்தனயேனேவ கோசி குஸலங் கரோதி, கோசி அகுஸலங், கோசி அதி⁴வாஸெந்தோ நிபஜ்ஜதி. ஏவங் ஸப்³ப³வாரேஸு திவிதா⁴வ வேத³னா ஹொந்தி.
Visamaparihārajānīti mahābhāravahanasudhākoṭṭanādito vā avelāya carantassa sappaḍaṃsakūpapātādito vā visamaparihārato jātāni. Opakkamikānīti ‘‘ayaṃ coro vā pāradāriko vā’’ti gahetvā jaṇṇukakapparamuggarādīhi nippothanaupakkamaṃ paccayaṃ katvā uppannāni. Etaṃ bahi upakkamaṃ labhitvā koci vuttanayeneva kusalaṃ karoti, koci akusalaṃ, koci adhivāsento nipajjati. Kammavipākajānīti kevalaṃ kammavipākato, jātāni. Tesupi hi uppannesu vuttanayeneva koci kusalaṃ karoti, koci akusalaṃ, koci adhivāsento nipajjati. Evaṃ sabbavāresu tividhāva vedanā honti.
தத்த² புரிமேஹி ஸத்தஹி காரணேஹி உப்பன்னா ஸாரீரிகா வேத³னா ஸக்கா படிபா³ஹிதுங், கம்மவிபாகஜானங் பன ஸப்³ப³பே⁴ஸஜ்ஜானிபி ஸப்³ப³பரித்தானிபி நாலங் படிகா⁴தாய. இமஸ்மிங் ஸுத்தே லோகவோஹாரோ நாம கதி²தோதி.
Tattha purimehi sattahi kāraṇehi uppannā sārīrikā vedanā sakkā paṭibāhituṃ, kammavipākajānaṃ pana sabbabhesajjānipi sabbaparittānipi nālaṃ paṭighātāya. Imasmiṃ sutte lokavohāro nāma kathitoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸீவகஸுத்தங் • 1. Sīvakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஸீவகஸுத்தவண்ணனா • 1. Sīvakasuttavaṇṇanā
