| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩. অট্ঠসতপরিযাযৰগ্গো
3. Aṭṭhasatapariyāyavaggo
১. সীৰকসুত্তৰণ্ণনা
1. Sīvakasuttavaṇṇanā
২৬৯. চূল়া পন অস্স মহতী অত্থি সৰিসেসা, তস্মা ‘‘মোল়িযসীৰকো’’তি ৰুচ্চতি। ছন্নপরিব্বাজকোতি কম্বলাদিনা কোপীনপটিচ্ছাদকপরিব্বাজকো। পিত্তপচ্চযানীতি পিত্তহেতুকানি । ‘‘তিস্সো ৰেদনা’’তি ৰত্ৰা তাসং সম্ভৰং দস্সেতুং ‘‘কথ’’ন্তিআদি ৰুত্তং। কুসলৰেদনা উপ্পজ্জতি পিত্তপচ্চযা। পিত্তভেসজ্জং করিস্সামীতি ভেসজ্জসম্ভরণত্থঞ্চেৰ তদত্থং আমিসকিঞ্জক্খসম্ভরণত্থঞ্চ পাণং হনতীতি যোজনা। মজ্ঝত্তো ভেসজ্জকরণে উদাসীনো।
269. Cūḷā pana assa mahatī atthi savisesā, tasmā ‘‘moḷiyasīvako’’ti vuccati. Channaparibbājakoti kambalādinā kopīnapaṭicchādakaparibbājako. Pittapaccayānīti pittahetukāni . ‘‘Tisso vedanā’’ti vatvā tāsaṃ sambhavaṃ dassetuṃ ‘‘katha’’ntiādi vuttaṃ. Kusalavedanā uppajjati pittapaccayā. Pittabhesajjaṃ karissāmīti bhesajjasambharaṇatthañceva tadatthaṃ āmisakiñjakkhasambharaṇatthañca pāṇaṃ hanatīti yojanā. Majjhatto bhesajjakaraṇe udāsīno.
তস্মাতি যস্মা পিত্তাদিপচ্চযহেতুকন্তি অত্তনো চ লোকস্স চ পচ্চক্খং অতিধাৰন্তি যে সমণা ৰা ব্রাহ্মণা ৰা, তস্মা তেসং মিচ্ছা। পিত্তাদীনং তিণ্ণম্পি সমোধানসন্নিপাতে জাতানি সন্নিপাতিকানি। পুরিমউতুনো ৰিসদিসো উতুৰিপরিণামোতি আহ ‘‘ৰিসভাগউতুতো জাতানী’’তি । অনুদকো থদ্ধলূখভূমিৰিভাগো জঙ্গলদেসো, ৰুত্তৰিপরিযাযেন অনুপদেসো ৰেদিতব্বো। মলযং হিমসীতবহুলো, ইতরো উণ্হবহুলো।
Tasmāti yasmā pittādipaccayahetukanti attano ca lokassa ca paccakkhaṃ atidhāvanti ye samaṇā vā brāhmaṇā vā, tasmā tesaṃ micchā. Pittādīnaṃ tiṇṇampi samodhānasannipāte jātāni sannipātikāni. Purimautuno visadiso utuvipariṇāmoti āha ‘‘visabhāgaututo jātānī’’ti . Anudako thaddhalūkhabhūmivibhāgo jaṅgaladeso, vuttavipariyāyena anupadeso veditabbo. Malayaṃ himasītabahulo, itaro uṇhabahulo.
অত্তনো পকতিচরিযানং ৰিসমং কাযস্স পরিহরণৰসেন, জাতানি পন অসয্হসহনঅদেসঅকালচরণাদিনা ৰেদিতব্বানীতি আহ ‘‘মহাভারৰহনা’’তিআদি। পরস্স উপক্কমতো নিব্বত্তানি ওপক্কমিকানীতি আহ – ‘‘অযং চোরো ৰা’’তিআদি। কেৰলন্তি বাহিরপচ্চযং অনপেক্খিত্ৰা কেৰলং তেনেৰ। তেনাহ ‘‘কম্মৰিপাকতোৰ জাতানী’’তি। সক্কা পটিবাহিতুং পতীকারেন। লোকৰোহারো নাম কথিতো পিত্তসমুট্ঠানাদিসমঞ্ঞায লোকসিদ্ধত্তা। কামং সরীরসন্নিস্সিতা ৰেদনা কম্মনিব্বত্তাৰ, তস্সা পন পচ্চুপ্পন্নপচ্চযৰসেন এৰমযং লোকৰোহারোতি ৰুত্তঞ্চেৰ গহেত্ৰা পরৰাদপটিসেধো কতোতি দট্ঠব্বং।
Attano pakaticariyānaṃ visamaṃ kāyassa pariharaṇavasena, jātāni pana asayhasahanaadesaakālacaraṇādinā veditabbānīti āha ‘‘mahābhāravahanā’’tiādi. Parassa upakkamato nibbattāni opakkamikānīti āha – ‘‘ayaṃ coro vā’’tiādi. Kevalanti bāhirapaccayaṃ anapekkhitvā kevalaṃ teneva. Tenāha ‘‘kammavipākatova jātānī’’ti. Sakkā paṭibāhituṃ patīkārena. Lokavohāro nāma kathito pittasamuṭṭhānādisamaññāya lokasiddhattā. Kāmaṃ sarīrasannissitā vedanā kammanibbattāva, tassā pana paccuppannapaccayavasena evamayaṃ lokavohāroti vuttañceva gahetvā paravādapaṭisedho katoti daṭṭhabbaṃ.
সীৰকসুত্তৰণ্ণনা নিট্ঠিতা।
Sīvakasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. সীৰকসুত্তং • 1. Sīvakasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সীৰকসুত্তৰণ্ণনা • 1. Sīvakasuttavaṇṇanā
