| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
3. адтасад̇абарияааяаваг̇г̇о
3. Aṭṭhasatapariyāyavaggo
1. сийвагасуд̇д̇аван̣н̣анаа
1. Sīvakasuttavaṇṇanā
269. д̇ад̇ияаваг̇г̇асса батамз мол̣ияасийвагод̇и сийвагод̇и д̇асса наамам̣. жуул̣аа банасса ад̇т̇и, д̇асмаа мол̣ияасийвагод̇и вужжад̇и. бариб̣б̣ааж̇агод̇и чаннабариб̣б̣ааж̇аго. бид̇д̇асамудтаанаанийд̇и бид̇д̇абажжаяаани. взд̣̇аяид̇аанийд̇и взд̣̇анаа. д̇ад̇т̇а бид̇д̇абажжаяаа д̇иссо взд̣̇анаа уббаж̇ж̇анд̇и. гат̇ам̣? згажжо хи ‘‘бид̇д̇ам̣ мз губид̇ам̣ д̣̇уж̇ж̇аанам̣ ко бана ж̇ийвид̇а’’нд̇и д̣̇аанам̣ д̣̇зд̇и, сийлам̣ самаад̣̇ияад̇и убосат̇агаммам̣ гарод̇и, звамасса гусалавзд̣̇анаа уббаж̇ж̇ад̇и. згажжо ‘‘бид̇д̇абхзсаж̇ж̇ам̣ гариссаамий’’д̇и баан̣ам̣ ханад̇и, ад̣̇иннам̣ аад̣̇ияад̇и, мусаа бхан̣ад̇и, д̣̇аса д̣̇уссийляагаммаани гарод̇и, звамасса агусалавзд̣̇анаа уббаж̇ж̇ад̇и. згажжо ‘‘зд̇д̇агзнаби мз бхзсаж̇ж̇агаран̣зна бид̇д̇ам̣ на вуубасаммад̇и, алам̣ яам̣ ход̇и. д̇ам̣ ход̇уу’’д̇и маж̇жхад̇д̇о гааяигавзд̣̇анам̣ ад̇хиваасзнд̇о нибаж̇ж̇ад̇и, звам̣ асса аб̣яаагад̇авзд̣̇анаа уббаж̇ж̇ад̇и.
269. Tatiyavaggassa paṭhame moḷiyasīvakoti sīvakoti tassa nāmaṃ. Cūḷā panassa atthi, tasmā moḷiyasīvakoti vuccati. Paribbājakoti channaparibbājako. Pittasamuṭṭhānānīti pittapaccayāni. Vedayitānīti vedanā. Tattha pittapaccayā tisso vedanā uppajjanti. Kathaṃ? Ekacco hi ‘‘pittaṃ me kupitaṃ dujjānaṃ kho pana jīvita’’nti dānaṃ deti, sīlaṃ samādiyati uposathakammaṃ karoti, evamassa kusalavedanā uppajjati. Ekacco ‘‘pittabhesajjaṃ karissāmī’’ti pāṇaṃ hanati, adinnaṃ ādiyati, musā bhaṇati, dasa dussīlyakammāni karoti, evamassa akusalavedanā uppajjati. Ekacco ‘‘ettakenapi me bhesajjakaraṇena pittaṃ na vūpasammati, alaṃ yaṃ hoti. taṃ hotū’’ti majjhatto kāyikavedanaṃ adhivāsento nipajjati, evaṃ assa abyākatavedanā uppajjati.
саамамби ко зд̇анд̇и д̇ам̣ д̇ам̣ бид̇д̇авигаарам̣ д̣̇исваа ад̇д̇анааби зд̇ам̣ взд̣̇ид̇аб̣б̣ам̣. сажжасаммад̇анд̇и бхууд̇асаммад̇ам̣. логоби хисса сарийрз саб̣алаван̣н̣ад̇аад̣̇ибид̇д̇авигаарам̣ д̣̇исваа ‘‘бид̇д̇амасса губид̇а’’нд̇и ж̇аанаад̇и. д̇асмаад̇и яасмаа сааман̃жа вид̣̇ид̇ам̣ логасса жа сажжасаммад̇ам̣ ад̇ид̇хааванд̇и, д̇асмаа. сзмхасамудтаанаад̣̇ийсуби зсзва наяо. зд̇т̇а бана саннибаад̇игаанийд̇и д̇ин̣н̣амби бид̇д̇аад̣̇ийнам̣ гобзна самудтид̇аани. уд̇убарин̣аамаж̇аанийд̇и висабхааг̇ауд̇уд̇о ж̇аад̇аани. ж̇ан̇г̇алад̣̇зсаваасийнан̃хи анубад̣̇зсз васанд̇аанам̣ висабхааг̇о уд̇у уббаж̇ж̇ад̇и, анубад̣̇зсаваасийнан̃жа ж̇ан̇г̇алад̣̇зсзд̇и звам̣ малаяасамуд̣̇д̣̇ад̇ийраад̣̇ивасзнааби уд̇увисабхааг̇ад̇аа уббаж̇ж̇ад̇иязва. д̇ад̇о ж̇аад̇аад̇и уд̇убарин̣аамаж̇аад̇аани наама.
Sāmampi kho etanti taṃ taṃ pittavikāraṃ disvā attanāpi etaṃ veditabbaṃ. Saccasammatanti bhūtasammataṃ. Lokopi hissa sarīre sabalavaṇṇatādipittavikāraṃ disvā ‘‘pittamassa kupita’’nti jānāti. Tasmāti yasmā sāmañca viditaṃ lokassa ca saccasammataṃ atidhāvanti, tasmā. Semhasamuṭṭhānādīsupi eseva nayo. Ettha pana sannipātikānīti tiṇṇampi pittādīnaṃ kopena samuṭṭhitāni. Utupariṇāmajānīti visabhāgaututo jātāni. Jaṅgaladesavāsīnañhi anupadese vasantānaṃ visabhāgo utu uppajjati, anupadesavāsīnañca jaṅgaladeseti evaṃ malayasamuddatīrādivasenāpi utuvisabhāgatā uppajjatiyeva. Tato jātāti utupariṇāmajātāni nāma.
висамабарихаараж̇аанийд̇и махаабхаараваханасуд̇хаагодданаад̣̇ид̇о ваа авзлааяа жаранд̇асса саббад̣ам̣сагуубабаад̇аад̣̇ид̇о ваа висамабарихаарад̇о ж̇аад̇аани. обаггамигаанийд̇и ‘‘аяам̣ жоро ваа баарад̣̇аариго ваа’’д̇и г̇ахзд̇ваа ж̇ан̣н̣угагаббарамуг̇г̇араад̣̇ийхи ниббот̇анаубаггамам̣ бажжаяам̣ гад̇ваа уббаннаани. зд̇ам̣ б̣ахи убаггамам̣ лабхид̇ваа гожи вуд̇д̇анаязнзва гусалам̣ гарод̇и, гожи агусалам̣, гожи ад̇хиваасзнд̇о нибаж̇ж̇ад̇и. гаммавибаагаж̇аанийд̇и гзвалам̣ гаммавибаагад̇о, ж̇аад̇аани. д̇зсуби хи уббаннзсу вуд̇д̇анаязнзва гожи гусалам̣ гарод̇и, гожи агусалам̣, гожи ад̇хиваасзнд̇о нибаж̇ж̇ад̇и. звам̣ саб̣б̣аваарзсу д̇ивид̇хаава взд̣̇анаа хонд̇и.
Visamaparihārajānīti mahābhāravahanasudhākoṭṭanādito vā avelāya carantassa sappaḍaṃsakūpapātādito vā visamaparihārato jātāni. Opakkamikānīti ‘‘ayaṃ coro vā pāradāriko vā’’ti gahetvā jaṇṇukakapparamuggarādīhi nippothanaupakkamaṃ paccayaṃ katvā uppannāni. Etaṃ bahi upakkamaṃ labhitvā koci vuttanayeneva kusalaṃ karoti, koci akusalaṃ, koci adhivāsento nipajjati. Kammavipākajānīti kevalaṃ kammavipākato, jātāni. Tesupi hi uppannesu vuttanayeneva koci kusalaṃ karoti, koci akusalaṃ, koci adhivāsento nipajjati. Evaṃ sabbavāresu tividhāva vedanā honti.
д̇ад̇т̇а буримзхи сад̇д̇ахи гааран̣зхи уббаннаа саарийригаа взд̣̇анаа саггаа бадиб̣аахид̇ум̣, гаммавибаагаж̇аанам̣ бана саб̣б̣абхзсаж̇ж̇ааниби саб̣б̣абарид̇д̇ааниби наалам̣ бадигхаад̇ааяа. имасмим̣ суд̇д̇з логавохааро наама гат̇ид̇од̇и.
Tattha purimehi sattahi kāraṇehi uppannā sārīrikā vedanā sakkā paṭibāhituṃ, kammavipākajānaṃ pana sabbabhesajjānipi sabbaparittānipi nālaṃ paṭighātāya. Imasmiṃ sutte lokavohāro nāma kathitoti.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 1. сийвагасуд̇д̇ам̣ • 1. Sīvakasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 1. сийвагасуд̇д̇аван̣н̣анаа • 1. Sīvakasuttavaṇṇanā
