| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៣. អដ្ឋសតបរិយាយវគ្គោ
3. Aṭṭhasatapariyāyavaggo
១. សីវកសុត្តវណ្ណនា
1. Sīvakasuttavaṇṇanā
២៦៩. ចូឡា បន អស្ស មហតី អត្ថិ សវិសេសា, តស្មា ‘‘មោឡិយសីវកោ’’តិ វុច្ចតិ។ ឆន្នបរិព្ពាជកោតិ កម្ពលាទិនា កោបីនបដិច្ឆាទកបរិព្ពាជកោ។ បិត្តបច្ចយានីតិ បិត្តហេតុកានិ ។ ‘‘តិស្សោ វេទនា’’តិ វត្វា តាសំ សម្ភវំ ទស្សេតុំ ‘‘កថ’’ន្តិអាទិ វុត្តំ។ កុសលវេទនា ឧប្បជ្ជតិ បិត្តបច្ចយា។ បិត្តភេសជ្ជំ ករិស្សាមីតិ ភេសជ្ជសម្ភរណត្ថញ្ចេវ តទត្ថំ អាមិសកិញ្ជក្ខសម្ភរណត្ថញ្ច បាណំ ហនតីតិ យោជនា។ មជ្ឈត្តោ ភេសជ្ជករណេ ឧទាសីនោ។
269. Cūḷā pana assa mahatī atthi savisesā, tasmā ‘‘moḷiyasīvako’’ti vuccati. Channaparibbājakoti kambalādinā kopīnapaṭicchādakaparibbājako. Pittapaccayānīti pittahetukāni . ‘‘Tisso vedanā’’ti vatvā tāsaṃ sambhavaṃ dassetuṃ ‘‘katha’’ntiādi vuttaṃ. Kusalavedanā uppajjati pittapaccayā. Pittabhesajjaṃ karissāmīti bhesajjasambharaṇatthañceva tadatthaṃ āmisakiñjakkhasambharaṇatthañca pāṇaṃ hanatīti yojanā. Majjhatto bhesajjakaraṇe udāsīno.
តស្មាតិ យស្មា បិត្តាទិបច្ចយហេតុកន្តិ អត្តនោ ច លោកស្ស ច បច្ចក្ខំ អតិធាវន្តិ យេ សមណា វា ព្រាហ្មណា វា, តស្មា តេសំ មិច្ឆា។ បិត្តាទីនំ តិណ្ណម្បិ សមោធានសន្និបាតេ ជាតានិ សន្និបាតិកានិ។ បុរិមឧតុនោ វិសទិសោ ឧតុវិបរិណាមោតិ អាហ ‘‘វិសភាគឧតុតោ ជាតានី’’តិ ។ អនុទកោ ថទ្ធលូខភូមិវិភាគោ ជង្គលទេសោ, វុត្តវិបរិយាយេន អនុបទេសោ វេទិតព្ពោ។ មលយំ ហិមសីតពហុលោ, ឥតរោ ឧណ្ហពហុលោ។
Tasmāti yasmā pittādipaccayahetukanti attano ca lokassa ca paccakkhaṃ atidhāvanti ye samaṇā vā brāhmaṇā vā, tasmā tesaṃ micchā. Pittādīnaṃ tiṇṇampi samodhānasannipāte jātāni sannipātikāni. Purimautuno visadiso utuvipariṇāmoti āha ‘‘visabhāgaututo jātānī’’ti . Anudako thaddhalūkhabhūmivibhāgo jaṅgaladeso, vuttavipariyāyena anupadeso veditabbo. Malayaṃ himasītabahulo, itaro uṇhabahulo.
អត្តនោ បកតិចរិយានំ វិសមំ កាយស្ស បរិហរណវសេន, ជាតានិ បន អសយ្ហសហនអទេសអកាលចរណាទិនា វេទិតព្ពានីតិ អាហ ‘‘មហាភារវហនា’’តិអាទិ។ បរស្ស ឧបក្កមតោ និព្ពត្តានិ ឱបក្កមិកានីតិ អាហ – ‘‘អយំ ចោរោ វា’’តិអាទិ។ កេវលន្តិ ពាហិរបច្ចយំ អនបេក្ខិត្វា កេវលំ តេនេវ។ តេនាហ ‘‘កម្មវិបាកតោវ ជាតានី’’តិ។ សក្កា បដិពាហិតុំ បតីការេន។ លោកវោហារោ នាម កថិតោ បិត្តសមុដ្ឋានាទិសមញ្ញាយ លោកសិទ្ធត្តា។ កាមំ សរីរសន្និស្សិតា វេទនា កម្មនិព្ពត្តាវ, តស្សា បន បច្ចុប្បន្នបច្ចយវសេន ឯវមយំ លោកវោហារោតិ វុត្តញ្ចេវ គហេត្វា បរវាទបដិសេធោ កតោតិ ទដ្ឋព្ពំ។
Attano pakaticariyānaṃ visamaṃ kāyassa pariharaṇavasena, jātāni pana asayhasahanaadesaakālacaraṇādinā veditabbānīti āha ‘‘mahābhāravahanā’’tiādi. Parassa upakkamato nibbattāni opakkamikānīti āha – ‘‘ayaṃ coro vā’’tiādi. Kevalanti bāhirapaccayaṃ anapekkhitvā kevalaṃ teneva. Tenāha ‘‘kammavipākatova jātānī’’ti. Sakkā paṭibāhituṃ patīkārena. Lokavohāro nāma kathito pittasamuṭṭhānādisamaññāya lokasiddhattā. Kāmaṃ sarīrasannissitā vedanā kammanibbattāva, tassā pana paccuppannapaccayavasena evamayaṃ lokavohāroti vuttañceva gahetvā paravādapaṭisedho katoti daṭṭhabbaṃ.
សីវកសុត្តវណ្ណនា និដ្ឋិតា។
Sīvakasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. សីវកសុត្តំ • 1. Sīvakasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. សីវកសុត្តវណ្ណនា • 1. Sīvakasuttavaṇṇanā
