| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၃. အဋ္ဌသတပရိယာယဝဂ္ဂော
3. Aṭṭhasatapariyāyavaggo
၁. သီဝကသုတ္တဝဏ္ဏနာ
1. Sīvakasuttavaṇṇanā
၂၆၉. တတိယဝဂ္ဂသ္သ ပဌမေ မောဠိယသီဝကောတိ သီဝကောတိ တသ္သ နာမံ။ စူဠာ ပနသ္သ အတ္ထိ, တသ္မာ မောဠိယသီဝကောတိ ဝုစ္စတိ။ ပရိဗ္ဗာဇကောတိ ဆန္နပရိဗ္ဗာဇကော။ ပိတ္တသမုဋ္ဌာနာနီတိ ပိတ္တပစ္စယာနိ။ ဝေဒယိတာနီတိ ဝေဒနာ။ တတ္ထ ပိတ္တပစ္စယာ တိသ္သော ဝေဒနာ ဥပ္ပဇ္ဇန္တိ။ ကထံ? ဧကစ္စော ဟိ ‘‘ပိတ္တံ မေ ကုပိတံ ဒုဇ္ဇာနံ ခော ပန ဇီဝိတ’’န္တိ ဒာနံ ဒေတိ, သီလံ သမာဒိယတိ ဥပောသထကမ္မံ ကရောတိ, ဧဝမသ္သ ကုသလဝေဒနာ ဥပ္ပဇ္ဇတိ။ ဧကစ္စော ‘‘ပိတ္တဘေသဇ္ဇံ ကရိသ္သာမီ’’တိ ပာဏံ ဟနတိ, အဒိန္နံ အာဒိယတိ, မုသာ ဘဏတိ, ဒသ ဒုသ္သီလ္ယကမ္မာနိ ကရောတိ, ဧဝမသ္သ အကုသလဝေဒနာ ဥပ္ပဇ္ဇတိ။ ဧကစ္စော ‘‘ဧတ္တကေနပိ မေ ဘေသဇ္ဇကရဏေန ပိတ္တံ န ဝူပသမ္မတိ, အလံ ယံ ဟောတိ. တံ ဟောတူ’’တိ မဇ္ဈတ္တော ကာယိကဝေဒနံ အဓိဝာသေန္တော နိပဇ္ဇတိ, ဧဝံ အသ္သ အဗ္ယာကတဝေဒနာ ဥပ္ပဇ္ဇတိ။
269. Tatiyavaggassa paṭhame moḷiyasīvakoti sīvakoti tassa nāmaṃ. Cūḷā panassa atthi, tasmā moḷiyasīvakoti vuccati. Paribbājakoti channaparibbājako. Pittasamuṭṭhānānīti pittapaccayāni. Vedayitānīti vedanā. Tattha pittapaccayā tisso vedanā uppajjanti. Kathaṃ? Ekacco hi ‘‘pittaṃ me kupitaṃ dujjānaṃ kho pana jīvita’’nti dānaṃ deti, sīlaṃ samādiyati uposathakammaṃ karoti, evamassa kusalavedanā uppajjati. Ekacco ‘‘pittabhesajjaṃ karissāmī’’ti pāṇaṃ hanati, adinnaṃ ādiyati, musā bhaṇati, dasa dussīlyakammāni karoti, evamassa akusalavedanā uppajjati. Ekacco ‘‘ettakenapi me bhesajjakaraṇena pittaṃ na vūpasammati, alaṃ yaṃ hoti. taṃ hotū’’ti majjhatto kāyikavedanaṃ adhivāsento nipajjati, evaṃ assa abyākatavedanā uppajjati.
သာမမ္ပိ ခော ဧတန္တိ တံ တံ ပိတ္တဝိကာရံ ဒိသ္ဝာ အတ္တနာပိ ဧတံ ဝေဒိတဗ္ဗံ။ သစ္စသမ္မတန္တိ ဘူတသမ္မတံ။ လောကောပိ ဟိသ္သ သရီရေ သဗလဝဏ္ဏတာဒိပိတ္တဝိကာရံ ဒိသ္ဝာ ‘‘ပိတ္တမသ္သ ကုပိတ’’န္တိ ဇာနာတိ။ တသ္မာတိ ယသ္မာ သာမဉ္စ ဝိဒိတံ လောကသ္သ စ သစ္စသမ္မတံ အတိဓာဝန္တိ, တသ္မာ။ သေမ္ဟသမုဋ္ဌာနာဒီသုပိ ဧသေဝ နယော။ ဧတ္ထ ပန သန္နိပာတိကာနီတိ တိဏ္ဏမ္ပိ ပိတ္တာဒီနံ ကောပေန သမုဋ္ဌိတာနိ။ ဥတုပရိဏာမဇာနီတိ ဝိသဘာဂဥတုတော ဇာတာနိ။ ဇင္ဂလဒေသဝာသီနဉ္ဟိ အနုပဒေသေ ဝသန္တာနံ ဝိသဘာဂော ဥတု ဥပ္ပဇ္ဇတိ, အနုပဒေသဝာသီနဉ္စ ဇင္ဂလဒေသေတိ ဧဝံ မလယသမုဒ္ဒတီရာဒိဝသေနာပိ ဥတုဝိသဘာဂတာ ဥပ္ပဇ္ဇတိယေဝ။ တတော ဇာတာတိ ဥတုပရိဏာမဇာတာနိ နာမ။
Sāmampi kho etanti taṃ taṃ pittavikāraṃ disvā attanāpi etaṃ veditabbaṃ. Saccasammatanti bhūtasammataṃ. Lokopi hissa sarīre sabalavaṇṇatādipittavikāraṃ disvā ‘‘pittamassa kupita’’nti jānāti. Tasmāti yasmā sāmañca viditaṃ lokassa ca saccasammataṃ atidhāvanti, tasmā. Semhasamuṭṭhānādīsupi eseva nayo. Ettha pana sannipātikānīti tiṇṇampi pittādīnaṃ kopena samuṭṭhitāni. Utupariṇāmajānīti visabhāgaututo jātāni. Jaṅgaladesavāsīnañhi anupadese vasantānaṃ visabhāgo utu uppajjati, anupadesavāsīnañca jaṅgaladeseti evaṃ malayasamuddatīrādivasenāpi utuvisabhāgatā uppajjatiyeva. Tato jātāti utupariṇāmajātāni nāma.
ဝိသမပရိဟာရဇာနီတိ မဟာဘာရဝဟနသုဓာကောဋ္ဋနာဒိတော ဝာ အဝေလာယ စရန္တသ္သ သပ္ပဍံသကူပပာတာဒိတော ဝာ ဝိသမပရိဟာရတော ဇာတာနိ။ ဩပက္ကမိကာနီတိ ‘‘အယံ စောရော ဝာ ပာရဒာရိကော ဝာ’’တိ ဂဟေတ္ဝာ ဇဏ္ဏုကကပ္ပရမုဂ္ဂရာဒီဟိ နိပ္ပောထနဥပက္ကမံ ပစ္စယံ ကတ္ဝာ ဥပ္ပန္နာနိ။ ဧတံ ဗဟိ ဥပက္ကမံ လဘိတ္ဝာ ကောစိ ဝုတ္တနယေနေဝ ကုသလံ ကရောတိ, ကောစိ အကုသလံ, ကောစိ အဓိဝာသေန္တော နိပဇ္ဇတိ။ ကမ္မဝိပာကဇာနီတိ ကေဝလံ ကမ္မဝိပာကတော, ဇာတာနိ။ တေသုပိ ဟိ ဥပ္ပန္နေသု ဝုတ္တနယေနေဝ ကောစိ ကုသလံ ကရောတိ, ကောစိ အကုသလံ, ကောစိ အဓိဝာသေန္တော နိပဇ္ဇတိ။ ဧဝံ သဗ္ဗဝာရေသု တိဝိဓာဝ ဝေဒနာ ဟောန္တိ။
Visamaparihārajānīti mahābhāravahanasudhākoṭṭanādito vā avelāya carantassa sappaḍaṃsakūpapātādito vā visamaparihārato jātāni. Opakkamikānīti ‘‘ayaṃ coro vā pāradāriko vā’’ti gahetvā jaṇṇukakapparamuggarādīhi nippothanaupakkamaṃ paccayaṃ katvā uppannāni. Etaṃ bahi upakkamaṃ labhitvā koci vuttanayeneva kusalaṃ karoti, koci akusalaṃ, koci adhivāsento nipajjati. Kammavipākajānīti kevalaṃ kammavipākato, jātāni. Tesupi hi uppannesu vuttanayeneva koci kusalaṃ karoti, koci akusalaṃ, koci adhivāsento nipajjati. Evaṃ sabbavāresu tividhāva vedanā honti.
တတ္ထ ပုရိမေဟိ သတ္တဟိ ကာရဏေဟိ ဥပ္ပန္နာ သာရီရိကာ ဝေဒနာ သက္ကာ ပဋိဗာဟိတုံ, ကမ္မဝိပာကဇာနံ ပန သဗ္ဗဘေသဇ္ဇာနိပိ သဗ္ဗပရိတ္တာနိပိ နာလံ ပဋိဃာတာယ။ ဣမသ္မိံ သုတ္တေ လောကဝောဟာရော နာမ ကထိတောတိ။
Tattha purimehi sattahi kāraṇehi uppannā sārīrikā vedanā sakkā paṭibāhituṃ, kammavipākajānaṃ pana sabbabhesajjānipi sabbaparittānipi nālaṃ paṭighātāya. Imasmiṃ sutte lokavohāro nāma kathitoti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. သီဝကသုတ္တံ • 1. Sīvakasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. သီဝကသုတ္တဝဏ္ဏနာ • 1. Sīvakasuttavaṇṇanā
