| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৯. সিৰথিকসুত্তং
9. Sivathikasuttaṃ
২৪৯. ‘‘পঞ্চিমে, ভিক্খৰে, আদীনৰা সিৰথিকায 1। কতমে পঞ্চ? অসুচি, দুগ্গন্ধা, সপ্পটিভযা, ৰাল়ানং অমনুস্সানং আৰাসো, বহুনো জনস্স আরোদনা – ইমে খো, ভিক্খৰে, পঞ্চ আদীনৰা সিৰথিকায।
249. ‘‘Pañcime, bhikkhave, ādīnavā sivathikāya 2. Katame pañca? Asuci, duggandhā, sappaṭibhayā, vāḷānaṃ amanussānaṃ āvāso, bahuno janassa ārodanā – ime kho, bhikkhave, pañca ādīnavā sivathikāya.
‘‘এৰমেৰং খো, ভিক্খৰে, পঞ্চিমে আদীনৰা সিৰথিকূপমে পুগ্গলে। কতমে পঞ্চ? ইধ , ভিক্খৰে, একচ্চো পুগ্গলো অসুচিনা কাযকম্মেন সমন্নাগতো হোতি; অসুচিনা ৰচীকম্মেন সমন্নাগতো হোতি; অসুচিনা মনোকম্মেন সমন্নাগতো হোতি। ইদমস্স অসুচিতায ৰদামি। সেয্যথাপি সা, ভিক্খৰে, সিৰথিকা অসুচি; তথূপমাহং, ভিক্খৰে, ইমং পুগ্গলং ৰদামি।
‘‘Evamevaṃ kho, bhikkhave, pañcime ādīnavā sivathikūpame puggale. Katame pañca? Idha , bhikkhave, ekacco puggalo asucinā kāyakammena samannāgato hoti; asucinā vacīkammena samannāgato hoti; asucinā manokammena samannāgato hoti. Idamassa asucitāya vadāmi. Seyyathāpi sā, bhikkhave, sivathikā asuci; tathūpamāhaṃ, bhikkhave, imaṃ puggalaṃ vadāmi.
‘‘তস্স অসুচিনা কাযকম্মেন সমন্নাগতস্স, অসুচিনা ৰচীকম্মেন সমন্নাগতস্স, অসুচিনা মনোকম্মেন সমন্নাগতস্স পাপকো কিত্তিসদ্দো অব্ভুগ্গচ্ছতি। ইদমস্স দুগ্গন্ধতায ৰদামি। সেয্যথাপি সা, ভিক্খৰে, সিৰথিকা দুগ্গন্ধা; তথূপমাহং, ভিক্খৰে, ইমং পুগ্গলং ৰদামি।
‘‘Tassa asucinā kāyakammena samannāgatassa, asucinā vacīkammena samannāgatassa, asucinā manokammena samannāgatassa pāpako kittisaddo abbhuggacchati. Idamassa duggandhatāya vadāmi. Seyyathāpi sā, bhikkhave, sivathikā duggandhā; tathūpamāhaṃ, bhikkhave, imaṃ puggalaṃ vadāmi.
‘‘তমেনং অসুচিনা কাযকম্মেন সমন্নাগতং, অসুচিনা ৰচীকম্মেন সমন্নাগতং, অসুচিনা মনোকম্মেন সমন্নাগতং পেসলা সব্রহ্মচারী আরকা পরিৰজ্জন্তি। ইদমস্স সপ্পটিভযস্মিং ৰদামি। সেয্যথাপি সা, ভিক্খৰে, সিৰথিকা সপ্পটিভযা; তথূপমাহং, ভিক্খৰে, ইমং পুগ্গলং ৰদামি।
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī ārakā parivajjanti. Idamassa sappaṭibhayasmiṃ vadāmi. Seyyathāpi sā, bhikkhave, sivathikā sappaṭibhayā; tathūpamāhaṃ, bhikkhave, imaṃ puggalaṃ vadāmi.
‘‘সো অসুচিনা কাযকম্মেন সমন্নাগতো, অসুচিনা ৰচীকম্মেন সমন্নাগতো , অসুচিনা মনোকম্মেন সমন্নাগতো সভাগেহি পুগ্গলেহি সদ্ধিং সংৰসতি। ইদমস্স ৰাল়াৰাসস্মিং ৰদামি। সেয্যথাপি সা , ভিক্খৰে, সিৰথিকা ৰাল়ানং অমনুস্সানং আৰাসো; তথূপমাহং, ভিক্খৰে, ইমং পুগ্গলং ৰদামি।
‘‘So asucinā kāyakammena samannāgato, asucinā vacīkammena samannāgato , asucinā manokammena samannāgato sabhāgehi puggalehi saddhiṃ saṃvasati. Idamassa vāḷāvāsasmiṃ vadāmi. Seyyathāpi sā , bhikkhave, sivathikā vāḷānaṃ amanussānaṃ āvāso; tathūpamāhaṃ, bhikkhave, imaṃ puggalaṃ vadāmi.
‘‘তমেনং অসুচিনা কাযকম্মেন সমন্নাগতং, অসুচিনা ৰচীকম্মেন সমন্নাগতং, অসুচিনা মনোকম্মেন সমন্নাগতং পেসলা সব্রহ্মচারী দিস্ৰা খীযধম্মং 3 আপজ্জন্তি – ‘অহো ৰত নো দুক্খং যে মযং এৰরূপেহি পুগ্গলেহি সদ্ধিং সংৰসামা’তি! ইদমস্স আরোদনায ৰদামি। সেয্যথাপি সা, ভিক্খৰে, সিৰথিকা বহুনো জনস্স আরোদনা; তথূপমাহং, ভিক্খৰে, ইমং পুগ্গলং ৰদামি। ইমে খো, ভিক্খৰে, পঞ্চ আদীনৰা সিৰথিকূপমে পুগ্গলে’’তি। নৰমং।
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī disvā khīyadhammaṃ 4 āpajjanti – ‘aho vata no dukkhaṃ ye mayaṃ evarūpehi puggalehi saddhiṃ saṃvasāmā’ti! Idamassa ārodanāya vadāmi. Seyyathāpi sā, bhikkhave, sivathikā bahuno janassa ārodanā; tathūpamāhaṃ, bhikkhave, imaṃ puggalaṃ vadāmi. Ime kho, bhikkhave, pañca ādīnavā sivathikūpame puggale’’ti. Navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৯. সিৰথিকসুত্তৰণ্ণনা • 9. Sivathikasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-১০. পঠমদীঘচারিকসুত্তাদিৰণ্ণনা • 1-10. Paṭhamadīghacārikasuttādivaṇṇanā
