| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၉. သိဝထိကသုတ္တံ
9. Sivathikasuttaṃ
၂၄၉. ‘‘ပဉ္စိမေ, ဘိက္ခဝေ, အာဒီနဝာ သိဝထိကာယ 1။ ကတမေ ပဉ္စ? အသုစိ, ဒုဂ္ဂန္ဓာ, သပ္ပဋိဘယာ, ဝာဠာနံ အမနုသ္သာနံ အာဝာသော, ဗဟုနော ဇနသ္သ အာရောဒနာ – ဣမေ ခော, ဘိက္ခဝေ, ပဉ္စ အာဒီနဝာ သိဝထိကာယ။
249. ‘‘Pañcime, bhikkhave, ādīnavā sivathikāya 2. Katame pañca? Asuci, duggandhā, sappaṭibhayā, vāḷānaṃ amanussānaṃ āvāso, bahuno janassa ārodanā – ime kho, bhikkhave, pañca ādīnavā sivathikāya.
‘‘ဧဝမေဝံ ခော, ဘိက္ခဝေ, ပဉ္စိမေ အာဒီနဝာ သိဝထိကူပမေ ပုဂ္ဂလေ။ ကတမေ ပဉ္စ? ဣဓ , ဘိက္ခဝေ, ဧကစ္စော ပုဂ္ဂလော အသုစိနာ ကာယကမ္မေန သမန္နာဂတော ဟောတိ; အသုစိနာ ဝစီကမ္မေန သမန္နာဂတော ဟောတိ; အသုစိနာ မနောကမ္မေန သမန္နာဂတော ဟောတိ။ ဣဒမသ္သ အသုစိတာယ ဝဒာမိ။ သေယ္ယထာပိ သာ, ဘိက္ခဝေ, သိဝထိကာ အသုစိ; တထူပမာဟံ, ဘိက္ခဝေ, ဣမံ ပုဂ္ဂလံ ဝဒာမိ။
‘‘Evamevaṃ kho, bhikkhave, pañcime ādīnavā sivathikūpame puggale. Katame pañca? Idha , bhikkhave, ekacco puggalo asucinā kāyakammena samannāgato hoti; asucinā vacīkammena samannāgato hoti; asucinā manokammena samannāgato hoti. Idamassa asucitāya vadāmi. Seyyathāpi sā, bhikkhave, sivathikā asuci; tathūpamāhaṃ, bhikkhave, imaṃ puggalaṃ vadāmi.
‘‘တသ္သ အသုစိနာ ကာယကမ္မေန သမန္နာဂတသ္သ, အသုစိနာ ဝစီကမ္မေန သမန္နာဂတသ္သ, အသုစိနာ မနောကမ္မေန သမန္နာဂတသ္သ ပာပကော ကိတ္တိသဒ္ဒော အဗ္ဘုဂ္ဂစ္ဆတိ။ ဣဒမသ္သ ဒုဂ္ဂန္ဓတာယ ဝဒာမိ။ သေယ္ယထာပိ သာ, ဘိက္ခဝေ, သိဝထိကာ ဒုဂ္ဂန္ဓာ; တထူပမာဟံ, ဘိက္ခဝေ, ဣမံ ပုဂ္ဂလံ ဝဒာမိ။
‘‘Tassa asucinā kāyakammena samannāgatassa, asucinā vacīkammena samannāgatassa, asucinā manokammena samannāgatassa pāpako kittisaddo abbhuggacchati. Idamassa duggandhatāya vadāmi. Seyyathāpi sā, bhikkhave, sivathikā duggandhā; tathūpamāhaṃ, bhikkhave, imaṃ puggalaṃ vadāmi.
‘‘တမေနံ အသုစိနာ ကာယကမ္မေန သမန္နာဂတံ, အသုစိနာ ဝစီကမ္မေန သမန္နာဂတံ, အသုစိနာ မနောကမ္မေန သမန္နာဂတံ ပေသလာ သဗ္ရဟ္မစာရီ အာရကာ ပရိဝဇ္ဇန္တိ။ ဣဒမသ္သ သပ္ပဋိဘယသ္မိံ ဝဒာမိ။ သေယ္ယထာပိ သာ, ဘိက္ခဝေ, သိဝထိကာ သပ္ပဋိဘယာ; တထူပမာဟံ, ဘိက္ခဝေ, ဣမံ ပုဂ္ဂလံ ဝဒာမိ။
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī ārakā parivajjanti. Idamassa sappaṭibhayasmiṃ vadāmi. Seyyathāpi sā, bhikkhave, sivathikā sappaṭibhayā; tathūpamāhaṃ, bhikkhave, imaṃ puggalaṃ vadāmi.
‘‘သော အသုစိနာ ကာယကမ္မေန သမန္နာဂတော, အသုစိနာ ဝစီကမ္မေန သမန္နာဂတော , အသုစိနာ မနောကမ္မေန သမန္နာဂတော သဘာဂေဟိ ပုဂ္ဂလေဟိ သဒ္ဓိံ သံဝသတိ။ ဣဒမသ္သ ဝာဠာဝာသသ္မိံ ဝဒာမိ။ သေယ္ယထာပိ သာ , ဘိက္ခဝေ, သိဝထိကာ ဝာဠာနံ အမနုသ္သာနံ အာဝာသော; တထူပမာဟံ, ဘိက္ခဝေ, ဣမံ ပုဂ္ဂလံ ဝဒာမိ။
‘‘So asucinā kāyakammena samannāgato, asucinā vacīkammena samannāgato , asucinā manokammena samannāgato sabhāgehi puggalehi saddhiṃ saṃvasati. Idamassa vāḷāvāsasmiṃ vadāmi. Seyyathāpi sā , bhikkhave, sivathikā vāḷānaṃ amanussānaṃ āvāso; tathūpamāhaṃ, bhikkhave, imaṃ puggalaṃ vadāmi.
‘‘တမေနံ အသုစိနာ ကာယကမ္မေန သမန္နာဂတံ, အသုစိနာ ဝစီကမ္မေန သမန္နာဂတံ, အသုစိနာ မနောကမ္မေန သမန္နာဂတံ ပေသလာ သဗ္ရဟ္မစာရီ ဒိသ္ဝာ ခီယဓမ္မံ 3 အာပဇ္ဇန္တိ – ‘အဟော ဝတ နော ဒုက္ခံ ယေ မယံ ဧဝရူပေဟိ ပုဂ္ဂလေဟိ သဒ္ဓိံ သံဝသာမာ’တိ! ဣဒမသ္သ အာရောဒနာယ ဝဒာမိ။ သေယ္ယထာပိ သာ, ဘိက္ခဝေ, သိဝထိကာ ဗဟုနော ဇနသ္သ အာရောဒနာ; တထူပမာဟံ, ဘိက္ခဝေ, ဣမံ ပုဂ္ဂလံ ဝဒာမိ။ ဣမေ ခော, ဘိက္ခဝေ, ပဉ္စ အာဒီနဝာ သိဝထိကူပမေ ပုဂ္ဂလေ’’တိ။ နဝမံ။
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī disvā khīyadhammaṃ 4 āpajjanti – ‘aho vata no dukkhaṃ ye mayaṃ evarūpehi puggalehi saddhiṃ saṃvasāmā’ti! Idamassa ārodanāya vadāmi. Seyyathāpi sā, bhikkhave, sivathikā bahuno janassa ārodanā; tathūpamāhaṃ, bhikkhave, imaṃ puggalaṃ vadāmi. Ime kho, bhikkhave, pañca ādīnavā sivathikūpame puggale’’ti. Navamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၉. သိဝထိကသုတ္တဝဏ္ဏနာ • 9. Sivathikasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၁၀. ပဌမဒီဃစာရိကသုတ္တာဒိဝဏ္ဏနာ • 1-10. Paṭhamadīghacārikasuttādivaṇṇanā
