| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. සිවථිකසුත්‌තං
9. Sivathikasuttaṃ
249. ‘‘පඤ්‌චිමෙ, භික්‌ඛවෙ, ආදීනවා සිවථිකාය 1. කතමෙ පඤ්‌ච? අසුචි, දුග්‌ගන්‌ධා, සප්‌පටිභයා, වාළානං අමනුස්‌සානං ආවාසො, බහුනො ජනස්‌ස ආරොදනා – ඉමෙ ඛො, භික්‌ඛවෙ, පඤ්‌ච ආදීනවා සිවථිකාය.
249. ‘‘Pañcime, bhikkhave, ādīnavā sivathikāya 2. Katame pañca? Asuci, duggandhā, sappaṭibhayā, vāḷānaṃ amanussānaṃ āvāso, bahuno janassa ārodanā – ime kho, bhikkhave, pañca ādīnavā sivathikāya.
‘‘එවමෙවං ඛො, භික්‌ඛවෙ, පඤ්‌චිමෙ ආදීනවා සිවථිකූපමෙ පුග්‌ගලෙ. කතමෙ පඤ්‌ච? ඉධ , භික්‌ඛවෙ, එකච්‌චො පුග්‌ගලො අසුචිනා කායකම්‌මෙන සමන්‌නාගතො හොති; අසුචිනා වචීකම්‌මෙන සමන්‌නාගතො හොති; අසුචිනා මනොකම්‌මෙන සමන්‌නාගතො හොති. ඉදමස්‌ස අසුචිතාය වදාමි. සෙය්‍යථාපි සා, භික්‌ඛවෙ, සිවථිකා අසුචි; තථූපමාහං, භික්‌ඛවෙ, ඉමං පුග්‌ගලං වදාමි.
‘‘Evamevaṃ kho, bhikkhave, pañcime ādīnavā sivathikūpame puggale. Katame pañca? Idha , bhikkhave, ekacco puggalo asucinā kāyakammena samannāgato hoti; asucinā vacīkammena samannāgato hoti; asucinā manokammena samannāgato hoti. Idamassa asucitāya vadāmi. Seyyathāpi sā, bhikkhave, sivathikā asuci; tathūpamāhaṃ, bhikkhave, imaṃ puggalaṃ vadāmi.
‘‘තස්‌ස අසුචිනා කායකම්‌මෙන සමන්‌නාගතස්‌ස, අසුචිනා වචීකම්‌මෙන සමන්‌නාගතස්‌ස, අසුචිනා මනොකම්‌මෙන සමන්‌නාගතස්‌ස පාපකො කිත්‌තිසද්‌දො අබ්‌භුග්‌ගච්‌ඡති. ඉදමස්‌ස දුග්‌ගන්‌ධතාය වදාමි. සෙය්‍යථාපි සා, භික්‌ඛවෙ, සිවථිකා දුග්‌ගන්‌ධා; තථූපමාහං, භික්‌ඛවෙ, ඉමං පුග්‌ගලං වදාමි.
‘‘Tassa asucinā kāyakammena samannāgatassa, asucinā vacīkammena samannāgatassa, asucinā manokammena samannāgatassa pāpako kittisaddo abbhuggacchati. Idamassa duggandhatāya vadāmi. Seyyathāpi sā, bhikkhave, sivathikā duggandhā; tathūpamāhaṃ, bhikkhave, imaṃ puggalaṃ vadāmi.
‘‘තමෙනං අසුචිනා කායකම්‌මෙන සමන්‌නාගතං, අසුචිනා වචීකම්‌මෙන සමන්‌නාගතං, අසුචිනා මනොකම්‌මෙන සමන්‌නාගතං පෙසලා සබ්‍රහ්‌මචාරී ආරකා පරිවජ්‌ජන්‌ති. ඉදමස්‌ස සප්‌පටිභයස්‌මිං වදාමි. සෙය්‍යථාපි සා, භික්‌ඛවෙ, සිවථිකා සප්‌පටිභයා; තථූපමාහං, භික්‌ඛවෙ, ඉමං පුග්‌ගලං වදාමි.
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī ārakā parivajjanti. Idamassa sappaṭibhayasmiṃ vadāmi. Seyyathāpi sā, bhikkhave, sivathikā sappaṭibhayā; tathūpamāhaṃ, bhikkhave, imaṃ puggalaṃ vadāmi.
‘‘සො අසුචිනා කායකම්‌මෙන සමන්‌නාගතො, අසුචිනා වචීකම්‌මෙන සමන්‌නාගතො , අසුචිනා මනොකම්‌මෙන සමන්‌නාගතො සභාගෙහි පුග්‌ගලෙහි සද්‌ධිං සංවසති. ඉදමස්‌ස වාළාවාසස්‌මිං වදාමි. සෙය්‍යථාපි සා , භික්‌ඛවෙ, සිවථිකා වාළානං අමනුස්‌සානං ආවාසො; තථූපමාහං, භික්‌ඛවෙ, ඉමං පුග්‌ගලං වදාමි.
‘‘So asucinā kāyakammena samannāgato, asucinā vacīkammena samannāgato , asucinā manokammena samannāgato sabhāgehi puggalehi saddhiṃ saṃvasati. Idamassa vāḷāvāsasmiṃ vadāmi. Seyyathāpi sā , bhikkhave, sivathikā vāḷānaṃ amanussānaṃ āvāso; tathūpamāhaṃ, bhikkhave, imaṃ puggalaṃ vadāmi.
‘‘තමෙනං අසුචිනා කායකම්‌මෙන සමන්‌නාගතං, අසුචිනා වචීකම්‌මෙන සමන්‌නාගතං, අසුචිනා මනොකම්‌මෙන සමන්‌නාගතං පෙසලා සබ්‍රහ්‌මචාරී දිස්‌වා ඛීයධම්‌මං 3 ආපජ්‌ජන්‌ති – ‘අහො වත නො දුක්‌ඛං යෙ මයං එවරූපෙහි පුග්‌ගලෙහි සද්‌ධිං සංවසාමා’ති! ඉදමස්‌ස ආරොදනාය වදාමි. සෙය්‍යථාපි සා, භික්‌ඛවෙ, සිවථිකා බහුනො ජනස්‌ස ආරොදනා; තථූපමාහං, භික්‌ඛවෙ, ඉමං පුග්‌ගලං වදාමි. ඉමෙ ඛො, භික්‌ඛවෙ, පඤ්‌ච ආදීනවා සිවථිකූපමෙ පුග්‌ගලෙ’’ති. නවමං.
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī disvā khīyadhammaṃ 4 āpajjanti – ‘aho vata no dukkhaṃ ye mayaṃ evarūpehi puggalehi saddhiṃ saṃvasāmā’ti! Idamassa ārodanāya vadāmi. Seyyathāpi sā, bhikkhave, sivathikā bahuno janassa ārodanā; tathūpamāhaṃ, bhikkhave, imaṃ puggalaṃ vadāmi. Ime kho, bhikkhave, pañca ādīnavā sivathikūpame puggale’’ti. Navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. සිවථිකසුත්‌තවණ්‌ණනා • 9. Sivathikasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. පඨමදීඝචාරිකසුත්‌තාදිවණ්‌ණනා • 1-10. Paṭhamadīghacārikasuttādivaṇṇanā
