| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༩. སིཝཐིཀསུཏྟཾ
9. Sivathikasuttaṃ
༢༤༩. ‘‘པཉྩིམེ, བྷིཀྑཝེ, ཨཱདཱིནཝཱ སིཝཐིཀཱཡ 1། ཀཏམེ པཉྩ? ཨསུཙི, དུགྒནྡྷཱ, སཔྤཊིབྷཡཱ, ཝཱལཱ༹ནཾ ཨམནུསྶཱནཾ ཨཱཝཱསོ, བཧུནོ ཛནསྶ ཨཱརོདནཱ – ཨིམེ ཁོ, བྷིཀྑཝེ, པཉྩ ཨཱདཱིནཝཱ སིཝཐིཀཱཡ།
249. ‘‘Pañcime, bhikkhave, ādīnavā sivathikāya 2. Katame pañca? Asuci, duggandhā, sappaṭibhayā, vāḷānaṃ amanussānaṃ āvāso, bahuno janassa ārodanā – ime kho, bhikkhave, pañca ādīnavā sivathikāya.
‘‘ཨེཝམེཝཾ ཁོ, བྷིཀྑཝེ, པཉྩིམེ ཨཱདཱིནཝཱ སིཝཐིཀཱུཔམེ པུགྒལེ། ཀཏམེ པཉྩ? ཨིདྷ , བྷིཀྑཝེ, ཨེཀཙྩོ པུགྒལོ ཨསུཙིནཱ ཀཱཡཀམྨེན སམནྣཱགཏོ ཧོཏི; ཨསུཙིནཱ ཝཙཱིཀམྨེན སམནྣཱགཏོ ཧོཏི; ཨསུཙིནཱ མནོཀམྨེན སམནྣཱགཏོ ཧོཏི། ཨིདམསྶ ཨསུཙིཏཱཡ ཝདཱམི། སེཡྻཐཱཔི སཱ, བྷིཀྑཝེ, སིཝཐིཀཱ ཨསུཙི; ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི།
‘‘Evamevaṃ kho, bhikkhave, pañcime ādīnavā sivathikūpame puggale. Katame pañca? Idha , bhikkhave, ekacco puggalo asucinā kāyakammena samannāgato hoti; asucinā vacīkammena samannāgato hoti; asucinā manokammena samannāgato hoti. Idamassa asucitāya vadāmi. Seyyathāpi sā, bhikkhave, sivathikā asuci; tathūpamāhaṃ, bhikkhave, imaṃ puggalaṃ vadāmi.
‘‘ཏསྶ ཨསུཙིནཱ ཀཱཡཀམྨེན སམནྣཱགཏསྶ, ཨསུཙིནཱ ཝཙཱིཀམྨེན སམནྣཱགཏསྶ, ཨསུཙིནཱ མནོཀམྨེན སམནྣཱགཏསྶ པཱཔཀོ ཀིཏྟིསདྡོ ཨབྦྷུགྒཙྪཏི། ཨིདམསྶ དུགྒནྡྷཏཱཡ ཝདཱམི། སེཡྻཐཱཔི སཱ, བྷིཀྑཝེ, སིཝཐིཀཱ དུགྒནྡྷཱ; ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི།
‘‘Tassa asucinā kāyakammena samannāgatassa, asucinā vacīkammena samannāgatassa, asucinā manokammena samannāgatassa pāpako kittisaddo abbhuggacchati. Idamassa duggandhatāya vadāmi. Seyyathāpi sā, bhikkhave, sivathikā duggandhā; tathūpamāhaṃ, bhikkhave, imaṃ puggalaṃ vadāmi.
‘‘ཏམེནཾ ཨསུཙིནཱ ཀཱཡཀམྨེན སམནྣཱགཏཾ, ཨསུཙིནཱ ཝཙཱིཀམྨེན སམནྣཱགཏཾ, ཨསུཙིནཱ མནོཀམྨེན སམནྣཱགཏཾ པེསལཱ སབྲཧྨཙཱརཱི ཨཱརཀཱ པརིཝཛྫནྟི། ཨིདམསྶ སཔྤཊིབྷཡསྨིཾ ཝདཱམི། སེཡྻཐཱཔི སཱ, བྷིཀྑཝེ, སིཝཐིཀཱ སཔྤཊིབྷཡཱ; ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི།
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī ārakā parivajjanti. Idamassa sappaṭibhayasmiṃ vadāmi. Seyyathāpi sā, bhikkhave, sivathikā sappaṭibhayā; tathūpamāhaṃ, bhikkhave, imaṃ puggalaṃ vadāmi.
‘‘སོ ཨསུཙིནཱ ཀཱཡཀམྨེན སམནྣཱགཏོ, ཨསུཙིནཱ ཝཙཱིཀམྨེན སམནྣཱགཏོ , ཨསུཙིནཱ མནོཀམྨེན སམནྣཱགཏོ སབྷཱགེཧི པུགྒལེཧི སདྡྷིཾ སཾཝསཏི། ཨིདམསྶ ཝཱལཱ༹ཝཱསསྨིཾ ཝདཱམི། སེཡྻཐཱཔི སཱ , བྷིཀྑཝེ, སིཝཐིཀཱ ཝཱལཱ༹ནཾ ཨམནུསྶཱནཾ ཨཱཝཱསོ; ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི།
‘‘So asucinā kāyakammena samannāgato, asucinā vacīkammena samannāgato , asucinā manokammena samannāgato sabhāgehi puggalehi saddhiṃ saṃvasati. Idamassa vāḷāvāsasmiṃ vadāmi. Seyyathāpi sā , bhikkhave, sivathikā vāḷānaṃ amanussānaṃ āvāso; tathūpamāhaṃ, bhikkhave, imaṃ puggalaṃ vadāmi.
‘‘ཏམེནཾ ཨསུཙིནཱ ཀཱཡཀམྨེན སམནྣཱགཏཾ, ཨསུཙིནཱ ཝཙཱིཀམྨེན སམནྣཱགཏཾ, ཨསུཙིནཱ མནོཀམྨེན སམནྣཱགཏཾ པེསལཱ སབྲཧྨཙཱརཱི དིསྭཱ ཁཱིཡདྷམྨཾ 3 ཨཱཔཛྫནྟི – ‘ཨཧོ ཝཏ ནོ དུཀྑཾ ཡེ མཡཾ ཨེཝརཱུཔེཧི པུགྒལེཧི སདྡྷིཾ སཾཝསཱམཱ’ཏི! ཨིདམསྶ ཨཱརོདནཱཡ ཝདཱམི། སེཡྻཐཱཔི སཱ, བྷིཀྑཝེ, སིཝཐིཀཱ བཧུནོ ཛནསྶ ཨཱརོདནཱ; ཏཐཱུཔམཱཧཾ, བྷིཀྑཝེ, ཨིམཾ པུགྒལཾ ཝདཱམི། ཨིམེ ཁོ, བྷིཀྑཝེ, པཉྩ ཨཱདཱིནཝཱ སིཝཐིཀཱུཔམེ པུགྒལེ’’ཏི། ནཝམཾ།
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī disvā khīyadhammaṃ 4 āpajjanti – ‘aho vata no dukkhaṃ ye mayaṃ evarūpehi puggalehi saddhiṃ saṃvasāmā’ti! Idamassa ārodanāya vadāmi. Seyyathāpi sā, bhikkhave, sivathikā bahuno janassa ārodanā; tathūpamāhaṃ, bhikkhave, imaṃ puggalaṃ vadāmi. Ime kho, bhikkhave, pañca ādīnavā sivathikūpame puggale’’ti. Navamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༩. སིཝཐིཀསུཏྟཝཎྞནཱ • 9. Sivathikasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༡༠. པཋམདཱིགྷཙཱརིཀསུཏྟཱདིཝཎྞནཱ • 1-10. Paṭhamadīghacārikasuttādivaṇṇanā
