| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൯. സിവഥികസുത്തം
9. Sivathikasuttaṃ
൨൪൯. ‘‘പഞ്ചിമേ, ഭിക്ഖവേ, ആദീനവാ സിവഥികായ 1. കതമേ പഞ്ച? അസുചി, ദുഗ്ഗന്ധാ, സപ്പടിഭയാ, വാളാനം അമനുസ്സാനം ആവാസോ, ബഹുനോ ജനസ്സ ആരോദനാ – ഇമേ ഖോ, ഭിക്ഖവേ, പഞ്ച ആദീനവാ സിവഥികായ.
249. ‘‘Pañcime, bhikkhave, ādīnavā sivathikāya 2. Katame pañca? Asuci, duggandhā, sappaṭibhayā, vāḷānaṃ amanussānaṃ āvāso, bahuno janassa ārodanā – ime kho, bhikkhave, pañca ādīnavā sivathikāya.
‘‘ഏവമേവം ഖോ, ഭിക്ഖവേ, പഞ്ചിമേ ആദീനവാ സിവഥികൂപമേ പുഗ്ഗലേ. കതമേ പഞ്ച? ഇധ , ഭിക്ഖവേ, ഏകച്ചോ പുഗ്ഗലോ അസുചിനാ കായകമ്മേന സമന്നാഗതോ ഹോതി; അസുചിനാ വചീകമ്മേന സമന്നാഗതോ ഹോതി; അസുചിനാ മനോകമ്മേന സമന്നാഗതോ ഹോതി. ഇദമസ്സ അസുചിതായ വദാമി. സേയ്യഥാപി സാ, ഭിക്ഖവേ, സിവഥികാ അസുചി; തഥൂപമാഹം, ഭിക്ഖവേ, ഇമം പുഗ്ഗലം വദാമി.
‘‘Evamevaṃ kho, bhikkhave, pañcime ādīnavā sivathikūpame puggale. Katame pañca? Idha , bhikkhave, ekacco puggalo asucinā kāyakammena samannāgato hoti; asucinā vacīkammena samannāgato hoti; asucinā manokammena samannāgato hoti. Idamassa asucitāya vadāmi. Seyyathāpi sā, bhikkhave, sivathikā asuci; tathūpamāhaṃ, bhikkhave, imaṃ puggalaṃ vadāmi.
‘‘തസ്സ അസുചിനാ കായകമ്മേന സമന്നാഗതസ്സ, അസുചിനാ വചീകമ്മേന സമന്നാഗതസ്സ, അസുചിനാ മനോകമ്മേന സമന്നാഗതസ്സ പാപകോ കിത്തിസദ്ദോ അബ്ഭുഗ്ഗച്ഛതി. ഇദമസ്സ ദുഗ്ഗന്ധതായ വദാമി. സേയ്യഥാപി സാ, ഭിക്ഖവേ, സിവഥികാ ദുഗ്ഗന്ധാ; തഥൂപമാഹം, ഭിക്ഖവേ, ഇമം പുഗ്ഗലം വദാമി.
‘‘Tassa asucinā kāyakammena samannāgatassa, asucinā vacīkammena samannāgatassa, asucinā manokammena samannāgatassa pāpako kittisaddo abbhuggacchati. Idamassa duggandhatāya vadāmi. Seyyathāpi sā, bhikkhave, sivathikā duggandhā; tathūpamāhaṃ, bhikkhave, imaṃ puggalaṃ vadāmi.
‘‘തമേനം അസുചിനാ കായകമ്മേന സമന്നാഗതം, അസുചിനാ വചീകമ്മേന സമന്നാഗതം, അസുചിനാ മനോകമ്മേന സമന്നാഗതം പേസലാ സബ്രഹ്മചാരീ ആരകാ പരിവജ്ജന്തി. ഇദമസ്സ സപ്പടിഭയസ്മിം വദാമി. സേയ്യഥാപി സാ, ഭിക്ഖവേ, സിവഥികാ സപ്പടിഭയാ; തഥൂപമാഹം, ഭിക്ഖവേ, ഇമം പുഗ്ഗലം വദാമി.
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī ārakā parivajjanti. Idamassa sappaṭibhayasmiṃ vadāmi. Seyyathāpi sā, bhikkhave, sivathikā sappaṭibhayā; tathūpamāhaṃ, bhikkhave, imaṃ puggalaṃ vadāmi.
‘‘സോ അസുചിനാ കായകമ്മേന സമന്നാഗതോ, അസുചിനാ വചീകമ്മേന സമന്നാഗതോ , അസുചിനാ മനോകമ്മേന സമന്നാഗതോ സഭാഗേഹി പുഗ്ഗലേഹി സദ്ധിം സംവസതി. ഇദമസ്സ വാളാവാസസ്മിം വദാമി. സേയ്യഥാപി സാ , ഭിക്ഖവേ, സിവഥികാ വാളാനം അമനുസ്സാനം ആവാസോ; തഥൂപമാഹം, ഭിക്ഖവേ, ഇമം പുഗ്ഗലം വദാമി.
‘‘So asucinā kāyakammena samannāgato, asucinā vacīkammena samannāgato , asucinā manokammena samannāgato sabhāgehi puggalehi saddhiṃ saṃvasati. Idamassa vāḷāvāsasmiṃ vadāmi. Seyyathāpi sā , bhikkhave, sivathikā vāḷānaṃ amanussānaṃ āvāso; tathūpamāhaṃ, bhikkhave, imaṃ puggalaṃ vadāmi.
‘‘തമേനം അസുചിനാ കായകമ്മേന സമന്നാഗതം, അസുചിനാ വചീകമ്മേന സമന്നാഗതം, അസുചിനാ മനോകമ്മേന സമന്നാഗതം പേസലാ സബ്രഹ്മചാരീ ദിസ്വാ ഖീയധമ്മം 3 ആപജ്ജന്തി – ‘അഹോ വത നോ ദുക്ഖം യേ മയം ഏവരൂപേഹി പുഗ്ഗലേഹി സദ്ധിം സംവസാമാ’തി! ഇദമസ്സ ആരോദനായ വദാമി. സേയ്യഥാപി സാ, ഭിക്ഖവേ, സിവഥികാ ബഹുനോ ജനസ്സ ആരോദനാ; തഥൂപമാഹം, ഭിക്ഖവേ, ഇമം പുഗ്ഗലം വദാമി. ഇമേ ഖോ, ഭിക്ഖവേ, പഞ്ച ആദീനവാ സിവഥികൂപമേ പുഗ്ഗലേ’’തി. നവമം.
‘‘Tamenaṃ asucinā kāyakammena samannāgataṃ, asucinā vacīkammena samannāgataṃ, asucinā manokammena samannāgataṃ pesalā sabrahmacārī disvā khīyadhammaṃ 4 āpajjanti – ‘aho vata no dukkhaṃ ye mayaṃ evarūpehi puggalehi saddhiṃ saṃvasāmā’ti! Idamassa ārodanāya vadāmi. Seyyathāpi sā, bhikkhave, sivathikā bahuno janassa ārodanā; tathūpamāhaṃ, bhikkhave, imaṃ puggalaṃ vadāmi. Ime kho, bhikkhave, pañca ādīnavā sivathikūpame puggale’’ti. Navamaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൯. സിവഥികസുത്തവണ്ണനാ • 9. Sivathikasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൧-൧൦. പഠമദീഘചാരികസുത്താദിവണ്ണനാ • 1-10. Paṭhamadīghacārikasuttādivaṇṇanā
