| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
5. ஸிவிராஜசக்கு²தா³னபஞ்ஹோ
5. Sivirājacakkhudānapañho
5. ‘‘ப⁴ந்தே நாக³ஸேன, தும்ஹே ஏவங் ப⁴ணத² ‘ஸிவிராஜேன யாசகஸ்ஸ சக்கூ²னி தி³ன்னானி, அந்த⁴ஸ்ஸ ஸதோ புன தி³ப்³ப³சக்கூ²னி உப்பன்னானீ’தி, ஏதம்பி வசனங் ஸகஸடங் ஸனிக்³க³ஹங் ஸதோ³ஸங் ‘ஹேதுஸமுக்³கா⁴தே அஹேதுஸ்மிங் அவத்து²ஸ்மிங் நத்தி² தி³ப்³ப³சக்கு²ஸ்ஸ உப்பாதோ³’தி ஸுத்தே வுத்தங், யதி³, ப⁴ந்தே நாக³ஸேன, ஸிவிராஜேன யாசகஸ்ஸ சக்கூ²னி தி³ன்னானி, தேன ஹி ‘புன தி³ப்³ப³சக்கூ²னி உப்பன்னானீ’தி யங் வசனங், தங் மிச்சா²; யதி³ தி³ப்³ப³சக்கூ²னி உப்பன்னானி, தேன ஹி ‘ஸிவிராஜேன யாசகஸ்ஸ சக்கூ²னி தி³ன்னானீ’தி யங் வசனங், தம்பி மிச்சா². அயம்பி உப⁴தோ கோடிகோ பஞ்ஹோ க³ண்டி²தோபி க³ண்டி²தரோ வேட²தோபி வேட²தரோ க³ஹனதோபி க³ஹனதரோ, ஸோ தவானுப்பத்தோ, தத்த² ச²ந்த³மபி⁴ஜனேஹி நிப்³பா³ஹனாய பரவாதா³னங் நிக்³க³ஹாயா’’தி.
5. ‘‘Bhante nāgasena, tumhe evaṃ bhaṇatha ‘sivirājena yācakassa cakkhūni dinnāni, andhassa sato puna dibbacakkhūni uppannānī’ti, etampi vacanaṃ sakasaṭaṃ saniggahaṃ sadosaṃ ‘hetusamugghāte ahetusmiṃ avatthusmiṃ natthi dibbacakkhussa uppādo’ti sutte vuttaṃ, yadi, bhante nāgasena, sivirājena yācakassa cakkhūni dinnāni, tena hi ‘puna dibbacakkhūni uppannānī’ti yaṃ vacanaṃ, taṃ micchā; yadi dibbacakkhūni uppannāni, tena hi ‘sivirājena yācakassa cakkhūni dinnānī’ti yaṃ vacanaṃ, tampi micchā. Ayampi ubhato koṭiko pañho gaṇṭhitopi gaṇṭhitaro veṭhatopi veṭhataro gahanatopi gahanataro, so tavānuppatto, tattha chandamabhijanehi nibbāhanāya paravādānaṃ niggahāyā’’ti.
‘‘தி³ன்னானி , மஹாராஜ, ஸிவிராஜேன யாசகஸ்ஸ சக்கூ²னி, தத்த² மா விமதிங் உப்பாதே³ஹி, புன தி³ப்³பா³னி ச சக்கூ²னி உப்பன்னானி, தத்தா²பி மா விமதிங் ஜனேஹீ’’தி. ‘‘அபி நு கோ², ப⁴ந்தே நாக³ஸேன, ஹேதுஸமுக்³கா⁴தே அஹேதுஸ்மிங் அவத்து²ஸ்மிங் தி³ப்³ப³சக்கு² உப்பஜ்ஜதீ’’தி? ‘‘ந ஹி, மஹாராஜா’’தி. ‘‘கிங் பன, ப⁴ந்தே, எத்த² காரணங், யேன காரணேன ஹேதுஸமுக்³கா⁴தே அஹேதுஸ்மிங் அவத்து²ஸ்மிங் தி³ப்³ப³சக்கு² உப்பஜ்ஜதி, இங்க⁴ தாவ காரணேன மங் ஸஞ்ஞாபேஹீ’’தி?
‘‘Dinnāni , mahārāja, sivirājena yācakassa cakkhūni, tattha mā vimatiṃ uppādehi, puna dibbāni ca cakkhūni uppannāni, tatthāpi mā vimatiṃ janehī’’ti. ‘‘Api nu kho, bhante nāgasena, hetusamugghāte ahetusmiṃ avatthusmiṃ dibbacakkhu uppajjatī’’ti? ‘‘Na hi, mahārājā’’ti. ‘‘Kiṃ pana, bhante, ettha kāraṇaṃ, yena kāraṇena hetusamugghāte ahetusmiṃ avatthusmiṃ dibbacakkhu uppajjati, iṅgha tāva kāraṇena maṃ saññāpehī’’ti?
‘‘கிங் பன, மஹாராஜ, அத்தி² லோகே ஸச்சங் நாம, யேன ஸச்சவாதி³னோ ஸச்சகிரியங் கரொந்தீ’’தி? ‘‘ஆம, ப⁴ந்தே, அத்தி² லோகே ஸச்சங் நாம, ஸச்சேன, ப⁴ந்தே நாக³ஸேன, ஸச்சவாதி³னோ ஸச்சகிரியங் கத்வா தே³வங் வஸ்ஸாபெந்தி, அக்³கி³ங் நிப்³பா³பெந்தி, விஸங் படிஹனந்தி, அஞ்ஞம்பி விவித⁴ங் கத்தப்³ப³ங் கரொந்தீ’’தி. ‘‘தேன ஹி, மஹாராஜ, யுஜ்ஜதி ஸமேதி ஸிவிராஜஸ்ஸ ஸச்சப³லேன தி³ப்³ப³சக்கூ²னி உப்பன்னானீதி, ஸச்சப³லேன, மஹாராஜ, அவத்து²ஸ்மிங் தி³ப்³ப³சக்கு² உப்பஜ்ஜதி, ஸச்சங் யேவ தத்த² வத்து² ப⁴வதி தி³ப்³ப³சக்கு²ஸ்ஸ உப்பாதா³ய.
‘‘Kiṃ pana, mahārāja, atthi loke saccaṃ nāma, yena saccavādino saccakiriyaṃ karontī’’ti? ‘‘Āma, bhante, atthi loke saccaṃ nāma, saccena, bhante nāgasena, saccavādino saccakiriyaṃ katvā devaṃ vassāpenti, aggiṃ nibbāpenti, visaṃ paṭihananti, aññampi vividhaṃ kattabbaṃ karontī’’ti. ‘‘Tena hi, mahārāja, yujjati sameti sivirājassa saccabalena dibbacakkhūni uppannānīti, saccabalena, mahārāja, avatthusmiṃ dibbacakkhu uppajjati, saccaṃ yeva tattha vatthu bhavati dibbacakkhussa uppādāya.
‘‘யதா², மஹாராஜ, யே கேசி ஸத்தா ஸச்சமனுகா³யந்தி ‘மஹாமேகோ⁴ பவஸ்ஸதூ’தி, தேஸங் ஸஹ ஸச்சமனுகீ³தேன மஹாமேகோ⁴ பவஸ்ஸதி, அபி நு கோ², மஹாராஜ, அத்தி² ஆகாஸே வஸ்ஸஹேது ஸன்னிசிதோ ‘யேன ஹேதுனா மஹாமேகோ⁴ பவஸ்ஸதீ’’’தி? ‘‘ந ஹி, ப⁴ந்தே, ஸச்சங் யேவ தத்த² ஹேது ப⁴வதி மஹதோ மேக⁴ஸ்ஸ பவஸ்ஸனாயா’’தி. ‘‘ஏவமேவ கோ², மஹாராஜ, நத்தி² தஸ்ஸ பகதிஹேது, ஸச்சங் யேவெத்த² வத்து² ப⁴வதி தி³ப்³ப³சக்கு²ஸ்ஸ உப்பாதா³யாதி.
‘‘Yathā, mahārāja, ye keci sattā saccamanugāyanti ‘mahāmegho pavassatū’ti, tesaṃ saha saccamanugītena mahāmegho pavassati, api nu kho, mahārāja, atthi ākāse vassahetu sannicito ‘yena hetunā mahāmegho pavassatī’’’ti? ‘‘Na hi, bhante, saccaṃ yeva tattha hetu bhavati mahato meghassa pavassanāyā’’ti. ‘‘Evameva kho, mahārāja, natthi tassa pakatihetu, saccaṃ yevettha vatthu bhavati dibbacakkhussa uppādāyāti.
‘‘யதா² வா பன, மஹாராஜ, யே கேசி ஸத்தா ஸச்சமனுகா³யந்தி ‘ஜலிதபஜ்ஜலிதமஹாஅக்³கி³க்க²ந்தோ⁴ படினிவத்ததூ’தி, தேஸங் ஸஹ ஸச்சமனுகீ³தேன ஜலிதபஜ்ஜலிதமஹாஅக்³கி³க்க²ந்தோ⁴ க²ணேன படினிவத்ததி. அபி நு கோ², மஹாராஜ, அத்தி² தஸ்மிங் ஜலிதபஜ்ஜலிதே மஹாஅக்³கி³க்க²ந்தே⁴ ஹேது ஸன்னிசிதோ ‘யேன ஹேதுனா ஜலிதபஜ்ஜலிதமஹாஅக்³கி³க்க²ந்தோ⁴ க²ணேன படினிவத்ததீ’’தி? ‘‘ந ஹி, ப⁴ந்தே, ஸச்சங் யேவ தத்த² வத்து² ஹோதி தஸ்ஸ ஜலிதபஜ்ஜலிதஸ்ஸ மஹாஅக்³கி³க்க²ந்த⁴ஸ்ஸ க²ணேன படினிவத்தனாயா’’தி. ‘‘ஏவமேவ கோ², மஹாராஜ, நத்தி² தஸ்ஸ பகதிஹேது, ஸச்சங் யேவெத்த² வத்து² ப⁴வதி தி³ப்³ப³சக்கு²ஸ்ஸ உப்பாதா³யாதி.
‘‘Yathā vā pana, mahārāja, ye keci sattā saccamanugāyanti ‘jalitapajjalitamahāaggikkhandho paṭinivattatū’ti, tesaṃ saha saccamanugītena jalitapajjalitamahāaggikkhandho khaṇena paṭinivattati. Api nu kho, mahārāja, atthi tasmiṃ jalitapajjalite mahāaggikkhandhe hetu sannicito ‘yena hetunā jalitapajjalitamahāaggikkhandho khaṇena paṭinivattatī’’ti? ‘‘Na hi, bhante, saccaṃ yeva tattha vatthu hoti tassa jalitapajjalitassa mahāaggikkhandhassa khaṇena paṭinivattanāyā’’ti. ‘‘Evameva kho, mahārāja, natthi tassa pakatihetu, saccaṃ yevettha vatthu bhavati dibbacakkhussa uppādāyāti.
‘‘யதா² வா பன, மஹாராஜ, யே கேசி ஸத்தா ஸச்சமனுகா³யந்தி ‘விஸங் ஹலாஹலங் அக³த³ங் ப⁴வதூ’தி. தேஸங் ஸஹ ஸச்சமனுகீ³தேன விஸங் ஹலாஹலங் க²ணேன அக³த³ங் ப⁴வதி, அபி நு கோ², மஹாராஜ, அத்தி² தஸ்மிங் ஹலாஹலவிஸே ஹேது ஸன்னிசிதோ ‘யேன ஹேதுனா விஸங் ஹலாஹலங் க²ணேன அக³த³ங் ப⁴வதீ’’’தி? ‘‘ந ஹி, ப⁴ந்தே, ஸச்சங் யேவ தத்த² ஹேது ப⁴வதி விஸஸ்ஸ ஹலாஹலஸ்ஸ க²ணேன படிகா⁴தாயா’’தி. ‘‘ஏவமேவ கோ², மஹாராஜ, வினா பகதிஹேதுங் ஸச்சங் யேவெத்த² வத்து² ப⁴வதி தி³ப்³ப³சக்கு²ஸ்ஸ உப்பாதா³யாதி.
‘‘Yathā vā pana, mahārāja, ye keci sattā saccamanugāyanti ‘visaṃ halāhalaṃ agadaṃ bhavatū’ti. Tesaṃ saha saccamanugītena visaṃ halāhalaṃ khaṇena agadaṃ bhavati, api nu kho, mahārāja, atthi tasmiṃ halāhalavise hetu sannicito ‘yena hetunā visaṃ halāhalaṃ khaṇena agadaṃ bhavatī’’’ti? ‘‘Na hi, bhante, saccaṃ yeva tattha hetu bhavati visassa halāhalassa khaṇena paṭighātāyā’’ti. ‘‘Evameva kho, mahārāja, vinā pakatihetuṃ saccaṃ yevettha vatthu bhavati dibbacakkhussa uppādāyāti.
‘‘சதுன்னம்பி, மஹாராஜ, அரியஸச்சானங் படிவேதா⁴ய நத்த²ஞ்ஞங் வத்து², ஸச்சங் வத்து²ங் கத்வா சத்தாரி அரியஸச்சானி படிவிஜ்ஜ²ந்தீதி. அத்தி², மஹாராஜ, சீனவிஸயே சீனராஜா, ஸோ மஹாஸமுத்³தே³ கீளிதுகாமோ 1 சதுமாஸே சதுமாஸே ஸச்சகிரியங் கத்வா ஸஹ ரதே²ன அந்தோமஹாஸமுத்³தே³ யோஜனங் பவிஸதி, தஸ்ஸ ரத²ஸீஸஸ்ஸ புரதோ புரதோ மஹாவாரிக்க²ந்தோ⁴ படிக்கமதி, நிக்க²ந்தஸ்ஸ புன ஒத்த²ரதி, அபி நு கோ², மஹாராஜ, ஸோ மஹாஸமுத்³தோ³ ஸதே³வமனுஸ்ஸேனபி லோகேன பகதிகாயப³லேன ஸக்கா படிக்கமாபேது’’ந்தி? ‘‘அதிபரித்தகேபி, ப⁴ந்தே, தளாகே உத³கங் ந ஸக்கா ஸதே³வமனுஸ்ஸேனபி லோகேன பகதிகாயப³லேன படிக்கமாபேதுங், கிங் பன மஹாஸமுத்³தே³ உத³க’’ந்தி? ‘‘இமினாபி, மஹாராஜ, காரணேன ஸச்சப³லங் ஞாதப்³ப³ங் ‘நத்தி² தங் டா²னங், யங் ஸச்சேன ந பத்தப்³ப³’ந்தி.
‘‘Catunnampi, mahārāja, ariyasaccānaṃ paṭivedhāya natthaññaṃ vatthu, saccaṃ vatthuṃ katvā cattāri ariyasaccāni paṭivijjhantīti. Atthi, mahārāja, cīnavisaye cīnarājā, so mahāsamudde kīḷitukāmo 2 catumāse catumāse saccakiriyaṃ katvā saha rathena antomahāsamudde yojanaṃ pavisati, tassa rathasīsassa purato purato mahāvārikkhandho paṭikkamati, nikkhantassa puna ottharati, api nu kho, mahārāja, so mahāsamuddo sadevamanussenapi lokena pakatikāyabalena sakkā paṭikkamāpetu’’nti? ‘‘Atiparittakepi, bhante, taḷāke udakaṃ na sakkā sadevamanussenapi lokena pakatikāyabalena paṭikkamāpetuṃ, kiṃ pana mahāsamudde udaka’’nti? ‘‘Imināpi, mahārāja, kāraṇena saccabalaṃ ñātabbaṃ ‘natthi taṃ ṭhānaṃ, yaṃ saccena na pattabba’nti.
‘‘நக³ரே, மஹாராஜ, பாடலிபுத்தே அஸோகோ த⁴ம்மராஜா ஸனேக³மஜானபத³அமச்சப⁴டப³லமஹாமத்தேஹி பரிவுதோ க³ங்க³ங் நதி³ங் 3 நவஸலிலஸம்புண்ணங் ஸமதித்தி²கங் ஸம்ப⁴ரிதங் பஞ்சயோஜனஸதாயாமங் யோஜனபுது²லங் ஸந்த³மானங் தி³ஸ்வா அமச்சே ஏவமாஹ ‘அத்தி² கோசி, ப⁴ணே, ஸமத்தோ², யோ இமங் மஹாக³ங்க³ங் படிஸோதங் ஸந்தா³பேது’ந்தி. அமச்சா ஆஹங்ஸு ‘து³க்கரங் தே³வா’தி.
‘‘Nagare, mahārāja, pāṭaliputte asoko dhammarājā sanegamajānapadaamaccabhaṭabalamahāmattehi parivuto gaṅgaṃ nadiṃ 4 navasalilasampuṇṇaṃ samatitthikaṃ sambharitaṃ pañcayojanasatāyāmaṃ yojanaputhulaṃ sandamānaṃ disvā amacce evamāha ‘atthi koci, bhaṇe, samattho, yo imaṃ mahāgaṅgaṃ paṭisotaṃ sandāpetu’nti. Amaccā āhaṃsu ‘dukkaraṃ devā’ti.
‘‘தஸ்மிங் யேவ க³ங்கா³கூலே டி²தா ப³ந்து⁴மதீ நாம க³ணிகா அஸ்ஸோஸி ரஞ்ஞா கிர ஏவங் வுத்தங் ‘ஸக்கா நு கோ² இமங் மஹாக³ங்க³ங் படிஸோதங் ஸந்தா³பேது’ந்தி, ஸா ஏவமாஹ ‘அஹஞ்ஹி நக³ரே பாடலிபுத்தே க³ணிகா ரூபூபஜீவினீ அந்திமஜீவிகா, மம தாவ ராஜா ஸச்சகிரியங் பஸ்ஸதூ’தி. அத² ஸா ஸச்சகிரியங் அகாஸி, ஸஹ தஸ்ஸா ஸச்சகிரியாய க²ணேன ஸா மஹாக³ங்கா³ க³ளக³ளாயந்தீ படிஸோதங் ஸந்தி³த்த² மஹதோ ஜனகாயஸ்ஸ பஸ்ஸதோ.
‘‘Tasmiṃ yeva gaṅgākūle ṭhitā bandhumatī nāma gaṇikā assosi raññā kira evaṃ vuttaṃ ‘sakkā nu kho imaṃ mahāgaṅgaṃ paṭisotaṃ sandāpetu’nti, sā evamāha ‘ahañhi nagare pāṭaliputte gaṇikā rūpūpajīvinī antimajīvikā, mama tāva rājā saccakiriyaṃ passatū’ti. Atha sā saccakiriyaṃ akāsi, saha tassā saccakiriyāya khaṇena sā mahāgaṅgā gaḷagaḷāyantī paṭisotaṃ sandittha mahato janakāyassa passato.
‘‘அத² ராஜா க³ங்கா³ய ஆவட்டஊமிவேக³ஜனிதங் ஹலாஹலஸத்³த³ங் ஸுத்வா விம்ஹிதோ அச்ச²ரியப்³பு⁴தஜாதோ அமச்சே ஏவமாஹ ‘கிஸ்ஸாயங், ப⁴ணே, மஹாக³ங்கா³ படிஸோதங் ஸந்த³தீ’தி? ‘ப³ந்து⁴மதீ, மஹாராஜ, க³ணிகா தவ வசனங் ஸுத்வா ஸச்சகிரியங் அகாஸி, தஸ்ஸா ஸச்சகிரியாய மஹாக³ங்கா³ உத்³த⁴ங்முகா² ஸந்த³தீ’தி.
‘‘Atha rājā gaṅgāya āvaṭṭaūmivegajanitaṃ halāhalasaddaṃ sutvā vimhito acchariyabbhutajāto amacce evamāha ‘kissāyaṃ, bhaṇe, mahāgaṅgā paṭisotaṃ sandatī’ti? ‘Bandhumatī, mahārāja, gaṇikā tava vacanaṃ sutvā saccakiriyaṃ akāsi, tassā saccakiriyāya mahāgaṅgā uddhaṃmukhā sandatī’ti.
‘‘அத² ஸங்விக்³க³ஹத³யோ ராஜா துரிததுரிதோ ஸயங் க³ந்த்வா தங் க³ணிகங் புச்சி² ‘ஸச்சங் கிர, ஜே , தயா ஸச்சகிரியாய அயங் க³ங்கா³ படிஸோதங் ஸந்தா³பிதா’தி? ‘ஆம தே³வா’தி. ராஜா ஆஹ ‘கிங் தே தத்த² ப³லங் அத்தி², கோ வா தே வசனங் ஆதி³யதி அனும்மத்தோ, கேன த்வங் ப³லேன இமங் மஹாக³ங்க³ங் படிஸோதங் ஸந்தா³பேஸீ’தி? ஸா ஆஹ ‘ஸச்சப³லேனாஹங், மஹாராஜ, இமங் மஹாக³ங்க³ங் படிஸோதங் ஸந்தா³பேஸி’ந்தி. ராஜா ஆஹ ‘கிங் தே ஸச்சப³லங் அத்தி² சோரியா து⁴த்தியா அஸதியா சி²ன்னிகாய பாபியா பி⁴ன்னஸீலாய 5 ஹிரிஅதிக்கந்திகாய அந்த⁴ஜனபலோபி⁴காயா’தி. ‘ஸச்சங், மஹாராஜ, தாதி³ஸிகா அஹங், தாதி³ஸிகாயபி மே, மஹாராஜ, ஸச்சகிரியா அத்தி², யாயாஹங் இச்ச²மானா ஸதே³வகம்பி லோகங் பரிவத்தெய்ய’ந்தி. ராஜா ஆஹ ‘கதமா பன ஸா ஹோதி ஸச்சகிரியா, இங்க⁴ மங் ஸாவேஹீ’தி. ‘யோ மே, மஹாராஜ, த⁴னங் தே³தி க²த்தியோ வா ப்³ராஹ்மணோ வா வெஸ்ஸோ வா ஸுத்³தோ³ வா அஞ்ஞோ வா கோசி, தேஸங் ஸமகங் யேவ உபட்ட²ஹாமி, ‘‘க²த்தியோ’’தி விஸேஸோ நத்தி², ‘‘ஸுத்³தோ³’’தி அதிமஞ்ஞனா 6 நத்தி², அனுனயப்படிக⁴விப்பமுத்தா த⁴னஸ்ஸாமிகங் பரிசராமி, ஏஸா மே தே³வ ஸச்சகிரியா, யாயாஹங் இமங் மஹாக³ங்க³ங் படிஸோதங் ஸந்தா³பேஸி’ந்தி.
‘‘Atha saṃviggahadayo rājā turitaturito sayaṃ gantvā taṃ gaṇikaṃ pucchi ‘saccaṃ kira, je , tayā saccakiriyāya ayaṃ gaṅgā paṭisotaṃ sandāpitā’ti? ‘Āma devā’ti. Rājā āha ‘kiṃ te tattha balaṃ atthi, ko vā te vacanaṃ ādiyati anummatto, kena tvaṃ balena imaṃ mahāgaṅgaṃ paṭisotaṃ sandāpesī’ti? Sā āha ‘saccabalenāhaṃ, mahārāja, imaṃ mahāgaṅgaṃ paṭisotaṃ sandāpesi’nti. Rājā āha ‘kiṃ te saccabalaṃ atthi coriyā dhuttiyā asatiyā chinnikāya pāpiyā bhinnasīlāya 7 hiriatikkantikāya andhajanapalobhikāyā’ti. ‘Saccaṃ, mahārāja, tādisikā ahaṃ, tādisikāyapi me, mahārāja, saccakiriyā atthi, yāyāhaṃ icchamānā sadevakampi lokaṃ parivatteyya’nti. Rājā āha ‘katamā pana sā hoti saccakiriyā, iṅgha maṃ sāvehī’ti. ‘Yo me, mahārāja, dhanaṃ deti khattiyo vā brāhmaṇo vā vesso vā suddo vā añño vā koci, tesaṃ samakaṃ yeva upaṭṭhahāmi, ‘‘khattiyo’’ti viseso natthi, ‘‘suddo’’ti atimaññanā 8 natthi, anunayappaṭighavippamuttā dhanassāmikaṃ paricarāmi, esā me deva saccakiriyā, yāyāhaṃ imaṃ mahāgaṅgaṃ paṭisotaṃ sandāpesi’nti.
‘‘இதிபி, மஹாராஜ, ஸச்சே டி²தா ந கிஞ்சி அத்த²ங் ந விந்த³ந்தி. தி³ன்னானி ச, மஹாராஜ, ஸிவிராஜேன யாசகஸ்ஸ சக்கூ²னி , தி³ப்³ப³சக்கூ²னி ச உப்பன்னானி, தஞ்ச ஸச்சகிரியாய. யங் பன ஸுத்தே வுத்தங் ‘மங்ஸசக்கு²ஸ்மிங் நட்டே² அஹேதுஸ்மிங் அவத்து²ஸ்மிங் நத்தி² தி³ப்³ப³சக்கு²ஸ்ஸ உப்பாதோ³’தி. தங் பா⁴வனாமயங் சக்கு²ங் ஸந்தா⁴ய வுத்தங், ஏவமேதங், மஹாராஜ, தா⁴ரேஹீ’’தி. ‘‘ஸாது⁴, ப⁴ந்தே நாக³ஸேன, ஸுனிப்³பே³டி²தோ பஞ்ஹோ, ஸுனித்³தி³ட்டோ² நிக்³க³ஹோ, ஸுமத்³தி³தா பரவாதா³, ஏவமேதங் ததா² ஸம்படிச்சா²மீ’’தி.
‘‘Itipi, mahārāja, sacce ṭhitā na kiñci atthaṃ na vindanti. Dinnāni ca, mahārāja, sivirājena yācakassa cakkhūni , dibbacakkhūni ca uppannāni, tañca saccakiriyāya. Yaṃ pana sutte vuttaṃ ‘maṃsacakkhusmiṃ naṭṭhe ahetusmiṃ avatthusmiṃ natthi dibbacakkhussa uppādo’ti. Taṃ bhāvanāmayaṃ cakkhuṃ sandhāya vuttaṃ, evametaṃ, mahārāja, dhārehī’’ti. ‘‘Sādhu, bhante nāgasena, sunibbeṭhito pañho, suniddiṭṭho niggaho, sumadditā paravādā, evametaṃ tathā sampaṭicchāmī’’ti.
ஸிவிராஜசக்கு²தா³னபஞ்ஹோ பஞ்சமோ.
Sivirājacakkhudānapañho pañcamo.
Footnotes:
