| Library / Tipiṭaka / д̇ибидага • Tipiṭaka / милинд̣̇абан̃хабаал̣и • Milindapañhapāḷi |
5. сивирааж̇ажагкуд̣̇аанабан̃хо
5. Sivirājacakkhudānapañho
5. ‘‘бханд̇з нааг̇асзна, д̇умхз звам̣ бхан̣ат̇а ‘сивирааж̇зна яаажагасса жагкууни д̣̇иннаани, анд̇хасса сад̇о буна д̣̇иб̣б̣ажагкууни уббаннааний’д̇и, зд̇амби важанам̣ сагасадам̣ саниг̇г̇ахам̣ сад̣̇осам̣ ‘хзд̇усамуг̇гхаад̇з ахзд̇усмим̣ авад̇т̇усмим̣ над̇т̇и д̣̇иб̣б̣ажагкусса уббаад̣̇о’д̇и суд̇д̇з вуд̇д̇ам̣, яад̣̇и, бханд̇з нааг̇асзна, сивирааж̇зна яаажагасса жагкууни д̣̇иннаани, д̇зна хи ‘буна д̣̇иб̣б̣ажагкууни уббаннааний’д̇и яам̣ важанам̣, д̇ам̣ мижчаа; яад̣̇и д̣̇иб̣б̣ажагкууни уббаннаани, д̇зна хи ‘сивирааж̇зна яаажагасса жагкууни д̣̇иннааний’д̇и яам̣ важанам̣, д̇амби мижчаа. аяамби убхад̇о годиго бан̃хо г̇ан̣тид̇оби г̇ан̣тид̇аро взтад̇оби взтад̇аро г̇аханад̇оби г̇аханад̇аро, со д̇аваануббад̇д̇о, д̇ад̇т̇а чанд̣̇амабхиж̇анзхи ниб̣б̣ааханааяа бараваад̣̇аанам̣ ниг̇г̇ахааяаа’’д̇и.
5. ‘‘Bhante nāgasena, tumhe evaṃ bhaṇatha ‘sivirājena yācakassa cakkhūni dinnāni, andhassa sato puna dibbacakkhūni uppannānī’ti, etampi vacanaṃ sakasaṭaṃ saniggahaṃ sadosaṃ ‘hetusamugghāte ahetusmiṃ avatthusmiṃ natthi dibbacakkhussa uppādo’ti sutte vuttaṃ, yadi, bhante nāgasena, sivirājena yācakassa cakkhūni dinnāni, tena hi ‘puna dibbacakkhūni uppannānī’ti yaṃ vacanaṃ, taṃ micchā; yadi dibbacakkhūni uppannāni, tena hi ‘sivirājena yācakassa cakkhūni dinnānī’ti yaṃ vacanaṃ, tampi micchā. Ayampi ubhato koṭiko pañho gaṇṭhitopi gaṇṭhitaro veṭhatopi veṭhataro gahanatopi gahanataro, so tavānuppatto, tattha chandamabhijanehi nibbāhanāya paravādānaṃ niggahāyā’’ti.
‘‘д̣̇иннаани , махаарааж̇а, сивирааж̇зна яаажагасса жагкууни, д̇ад̇т̇а маа вимад̇им̣ уббаад̣̇зхи, буна д̣̇иб̣б̣аани жа жагкууни уббаннаани, д̇ад̇т̇ааби маа вимад̇им̣ ж̇анзхий’’д̇и. ‘‘аби ну ко, бханд̇з нааг̇асзна, хзд̇усамуг̇гхаад̇з ахзд̇усмим̣ авад̇т̇усмим̣ д̣̇иб̣б̣ажагку уббаж̇ж̇ад̇ий’’д̇и? ‘‘на хи, махаарааж̇аа’’д̇и. ‘‘гим̣ бана, бханд̇з, зд̇т̇а гааран̣ам̣, язна гааран̣зна хзд̇усамуг̇гхаад̇з ахзд̇усмим̣ авад̇т̇усмим̣ д̣̇иб̣б̣ажагку уббаж̇ж̇ад̇и, ин̇гха д̇аава гааран̣зна мам̣ сан̃н̃аабзхий’’д̇и?
‘‘Dinnāni , mahārāja, sivirājena yācakassa cakkhūni, tattha mā vimatiṃ uppādehi, puna dibbāni ca cakkhūni uppannāni, tatthāpi mā vimatiṃ janehī’’ti. ‘‘Api nu kho, bhante nāgasena, hetusamugghāte ahetusmiṃ avatthusmiṃ dibbacakkhu uppajjatī’’ti? ‘‘Na hi, mahārājā’’ti. ‘‘Kiṃ pana, bhante, ettha kāraṇaṃ, yena kāraṇena hetusamugghāte ahetusmiṃ avatthusmiṃ dibbacakkhu uppajjati, iṅgha tāva kāraṇena maṃ saññāpehī’’ti?
‘‘гим̣ бана, махаарааж̇а, ад̇т̇и логз сажжам̣ наама, язна сажжаваад̣̇ино сажжагирияам̣ гаронд̇ий’’д̇и? ‘‘аама, бханд̇з, ад̇т̇и логз сажжам̣ наама, сажжзна, бханд̇з нааг̇асзна, сажжаваад̣̇ино сажжагирияам̣ гад̇ваа д̣̇звам̣ вассаабзнд̇и, аг̇г̇им̣ ниб̣б̣аабзнд̇и, висам̣ бадихананд̇и, ан̃н̃амби вивид̇хам̣ гад̇д̇аб̣б̣ам̣ гаронд̇ий’’д̇и. ‘‘д̇зна хи, махаарааж̇а, яуж̇ж̇ад̇и самзд̇и сивирааж̇асса сажжаб̣алзна д̣̇иб̣б̣ажагкууни уббаннаанийд̇и, сажжаб̣алзна, махаарааж̇а, авад̇т̇усмим̣ д̣̇иб̣б̣ажагку уббаж̇ж̇ад̇и, сажжам̣ язва д̇ад̇т̇а вад̇т̇у бхавад̇и д̣̇иб̣б̣ажагкусса уббаад̣̇ааяа.
‘‘Kiṃ pana, mahārāja, atthi loke saccaṃ nāma, yena saccavādino saccakiriyaṃ karontī’’ti? ‘‘Āma, bhante, atthi loke saccaṃ nāma, saccena, bhante nāgasena, saccavādino saccakiriyaṃ katvā devaṃ vassāpenti, aggiṃ nibbāpenti, visaṃ paṭihananti, aññampi vividhaṃ kattabbaṃ karontī’’ti. ‘‘Tena hi, mahārāja, yujjati sameti sivirājassa saccabalena dibbacakkhūni uppannānīti, saccabalena, mahārāja, avatthusmiṃ dibbacakkhu uppajjati, saccaṃ yeva tattha vatthu bhavati dibbacakkhussa uppādāya.
‘‘яат̇аа, махаарааж̇а, яз гзжи сад̇д̇аа сажжамануг̇ааяанд̇и ‘махаамзгхо бавассад̇уу’д̇и, д̇зсам̣ саха сажжамануг̇ийд̇зна махаамзгхо бавассад̇и, аби ну ко, махаарааж̇а, ад̇т̇и аагаасз вассахзд̇у саннижид̇о ‘язна хзд̇унаа махаамзгхо бавассад̇ий’’’д̇и? ‘‘на хи, бханд̇з, сажжам̣ язва д̇ад̇т̇а хзд̇у бхавад̇и махад̇о мзгхасса бавассанааяаа’’д̇и. ‘‘звамзва ко, махаарааж̇а, над̇т̇и д̇асса багад̇ихзд̇у, сажжам̣ язвзд̇т̇а вад̇т̇у бхавад̇и д̣̇иб̣б̣ажагкусса уббаад̣̇ааяаад̇и.
‘‘Yathā, mahārāja, ye keci sattā saccamanugāyanti ‘mahāmegho pavassatū’ti, tesaṃ saha saccamanugītena mahāmegho pavassati, api nu kho, mahārāja, atthi ākāse vassahetu sannicito ‘yena hetunā mahāmegho pavassatī’’’ti? ‘‘Na hi, bhante, saccaṃ yeva tattha hetu bhavati mahato meghassa pavassanāyā’’ti. ‘‘Evameva kho, mahārāja, natthi tassa pakatihetu, saccaṃ yevettha vatthu bhavati dibbacakkhussa uppādāyāti.
‘‘яат̇аа ваа бана, махаарааж̇а, яз гзжи сад̇д̇аа сажжамануг̇ааяанд̇и ‘ж̇алид̇абаж̇ж̇алид̇амахаааг̇г̇игканд̇хо бадинивад̇д̇ад̇уу’д̇и, д̇зсам̣ саха сажжамануг̇ийд̇зна ж̇алид̇абаж̇ж̇алид̇амахаааг̇г̇игканд̇хо кан̣зна бадинивад̇д̇ад̇и. аби ну ко, махаарааж̇а, ад̇т̇и д̇асмим̣ ж̇алид̇абаж̇ж̇алид̇з махаааг̇г̇игканд̇хз хзд̇у саннижид̇о ‘язна хзд̇унаа ж̇алид̇абаж̇ж̇алид̇амахаааг̇г̇игканд̇хо кан̣зна бадинивад̇д̇ад̇ий’’д̇и? ‘‘на хи, бханд̇з, сажжам̣ язва д̇ад̇т̇а вад̇т̇у ход̇и д̇асса ж̇алид̇абаж̇ж̇алид̇асса махаааг̇г̇игканд̇хасса кан̣зна бадинивад̇д̇анааяаа’’д̇и. ‘‘звамзва ко, махаарааж̇а, над̇т̇и д̇асса багад̇ихзд̇у, сажжам̣ язвзд̇т̇а вад̇т̇у бхавад̇и д̣̇иб̣б̣ажагкусса уббаад̣̇ааяаад̇и.
‘‘Yathā vā pana, mahārāja, ye keci sattā saccamanugāyanti ‘jalitapajjalitamahāaggikkhandho paṭinivattatū’ti, tesaṃ saha saccamanugītena jalitapajjalitamahāaggikkhandho khaṇena paṭinivattati. Api nu kho, mahārāja, atthi tasmiṃ jalitapajjalite mahāaggikkhandhe hetu sannicito ‘yena hetunā jalitapajjalitamahāaggikkhandho khaṇena paṭinivattatī’’ti? ‘‘Na hi, bhante, saccaṃ yeva tattha vatthu hoti tassa jalitapajjalitassa mahāaggikkhandhassa khaṇena paṭinivattanāyā’’ti. ‘‘Evameva kho, mahārāja, natthi tassa pakatihetu, saccaṃ yevettha vatthu bhavati dibbacakkhussa uppādāyāti.
‘‘яат̇аа ваа бана, махаарааж̇а, яз гзжи сад̇д̇аа сажжамануг̇ааяанд̇и ‘висам̣ халаахалам̣ аг̇ад̣̇ам̣ бхавад̇уу’д̇и. д̇зсам̣ саха сажжамануг̇ийд̇зна висам̣ халаахалам̣ кан̣зна аг̇ад̣̇ам̣ бхавад̇и, аби ну ко, махаарааж̇а, ад̇т̇и д̇асмим̣ халаахалависз хзд̇у саннижид̇о ‘язна хзд̇унаа висам̣ халаахалам̣ кан̣зна аг̇ад̣̇ам̣ бхавад̇ий’’’д̇и? ‘‘на хи, бханд̇з, сажжам̣ язва д̇ад̇т̇а хзд̇у бхавад̇и висасса халаахаласса кан̣зна бадигхаад̇ааяаа’’д̇и. ‘‘звамзва ко, махаарааж̇а, винаа багад̇ихзд̇ум̣ сажжам̣ язвзд̇т̇а вад̇т̇у бхавад̇и д̣̇иб̣б̣ажагкусса уббаад̣̇ааяаад̇и.
‘‘Yathā vā pana, mahārāja, ye keci sattā saccamanugāyanti ‘visaṃ halāhalaṃ agadaṃ bhavatū’ti. Tesaṃ saha saccamanugītena visaṃ halāhalaṃ khaṇena agadaṃ bhavati, api nu kho, mahārāja, atthi tasmiṃ halāhalavise hetu sannicito ‘yena hetunā visaṃ halāhalaṃ khaṇena agadaṃ bhavatī’’’ti? ‘‘Na hi, bhante, saccaṃ yeva tattha hetu bhavati visassa halāhalassa khaṇena paṭighātāyā’’ti. ‘‘Evameva kho, mahārāja, vinā pakatihetuṃ saccaṃ yevettha vatthu bhavati dibbacakkhussa uppādāyāti.
‘‘жад̇уннамби, махаарааж̇а, арияасажжаанам̣ бадивзд̇хааяа над̇т̇ан̃н̃ам̣ вад̇т̇у, сажжам̣ вад̇т̇ум̣ гад̇ваа жад̇д̇аари арияасажжаани бадивиж̇жханд̇ийд̇и. ад̇т̇и, махаарааж̇а, жийнависаяз жийнарааж̇аа, со махаасамуд̣̇д̣̇з гийл̣ид̇угаамо 1 жад̇умаасз жад̇умаасз сажжагирияам̣ гад̇ваа саха рат̇зна анд̇омахаасамуд̣̇д̣̇з яож̇анам̣ бависад̇и, д̇асса рат̇асийсасса бурад̇о бурад̇о махаавааригканд̇хо бадиггамад̇и, нигканд̇асса буна од̇т̇арад̇и, аби ну ко, махаарааж̇а, со махаасамуд̣̇д̣̇о сад̣̇звамануссзнаби логзна багад̇игааяаб̣алзна саггаа бадиггамаабзд̇у’’нд̇и? ‘‘ад̇ибарид̇д̇агзби, бханд̇з, д̇ал̣аагз уд̣̇агам̣ на саггаа сад̣̇звамануссзнаби логзна багад̇игааяаб̣алзна бадиггамаабзд̇ум̣, гим̣ бана махаасамуд̣̇д̣̇з уд̣̇ага’’нд̇и? ‘‘иминааби, махаарааж̇а, гааран̣зна сажжаб̣алам̣ н̃аад̇аб̣б̣ам̣ ‘над̇т̇и д̇ам̣ таанам̣, яам̣ сажжзна на бад̇д̇аб̣б̣а’нд̇и.
‘‘Catunnampi, mahārāja, ariyasaccānaṃ paṭivedhāya natthaññaṃ vatthu, saccaṃ vatthuṃ katvā cattāri ariyasaccāni paṭivijjhantīti. Atthi, mahārāja, cīnavisaye cīnarājā, so mahāsamudde kīḷitukāmo 2 catumāse catumāse saccakiriyaṃ katvā saha rathena antomahāsamudde yojanaṃ pavisati, tassa rathasīsassa purato purato mahāvārikkhandho paṭikkamati, nikkhantassa puna ottharati, api nu kho, mahārāja, so mahāsamuddo sadevamanussenapi lokena pakatikāyabalena sakkā paṭikkamāpetu’’nti? ‘‘Atiparittakepi, bhante, taḷāke udakaṃ na sakkā sadevamanussenapi lokena pakatikāyabalena paṭikkamāpetuṃ, kiṃ pana mahāsamudde udaka’’nti? ‘‘Imināpi, mahārāja, kāraṇena saccabalaṃ ñātabbaṃ ‘natthi taṃ ṭhānaṃ, yaṃ saccena na pattabba’nti.
‘‘наг̇арз, махаарааж̇а, баадалибуд̇д̇з асого д̇хаммарааж̇аа санзг̇амаж̇аанабад̣̇аамажжабхадаб̣аламахаамад̇д̇зхи баривуд̇о г̇ан̇г̇ам̣ над̣̇им̣ 3 навасалиласамбун̣н̣ам̣ самад̇ид̇т̇игам̣ самбхарид̇ам̣ бан̃жаяож̇анасад̇ааяаамам̣ яож̇анабут̇улам̣ санд̣̇амаанам̣ д̣̇исваа амажжз звамааха ‘ад̇т̇и гожи, бхан̣з, самад̇т̇о, яо имам̣ махааг̇ан̇г̇ам̣ бадисод̇ам̣ санд̣̇аабзд̇у’нд̇и. амажжаа аахам̣су ‘д̣̇уггарам̣ д̣̇зваа’д̇и.
‘‘Nagare, mahārāja, pāṭaliputte asoko dhammarājā sanegamajānapadaamaccabhaṭabalamahāmattehi parivuto gaṅgaṃ nadiṃ 4 navasalilasampuṇṇaṃ samatitthikaṃ sambharitaṃ pañcayojanasatāyāmaṃ yojanaputhulaṃ sandamānaṃ disvā amacce evamāha ‘atthi koci, bhaṇe, samattho, yo imaṃ mahāgaṅgaṃ paṭisotaṃ sandāpetu’nti. Amaccā āhaṃsu ‘dukkaraṃ devā’ti.
‘‘д̇асмим̣ язва г̇ан̇г̇аагуулз тид̇аа б̣анд̇хумад̇ий наама г̇ан̣игаа ассоси ран̃н̃аа гира звам̣ вуд̇д̇ам̣ ‘саггаа ну ко имам̣ махааг̇ан̇г̇ам̣ бадисод̇ам̣ санд̣̇аабзд̇у’нд̇и, саа звамааха ‘ахан̃хи наг̇арз баадалибуд̇д̇з г̇ан̣игаа руубуубаж̇ийвиний анд̇имаж̇ийвигаа, мама д̇аава рааж̇аа сажжагирияам̣ бассад̇уу’д̇и. ат̇а саа сажжагирияам̣ агааси, саха д̇ассаа сажжагирияааяа кан̣зна саа махааг̇ан̇г̇аа г̇ал̣аг̇ал̣ааяанд̇ий бадисод̇ам̣ санд̣̇ид̇т̇а махад̇о ж̇анагааяасса бассад̇о.
‘‘Tasmiṃ yeva gaṅgākūle ṭhitā bandhumatī nāma gaṇikā assosi raññā kira evaṃ vuttaṃ ‘sakkā nu kho imaṃ mahāgaṅgaṃ paṭisotaṃ sandāpetu’nti, sā evamāha ‘ahañhi nagare pāṭaliputte gaṇikā rūpūpajīvinī antimajīvikā, mama tāva rājā saccakiriyaṃ passatū’ti. Atha sā saccakiriyaṃ akāsi, saha tassā saccakiriyāya khaṇena sā mahāgaṅgā gaḷagaḷāyantī paṭisotaṃ sandittha mahato janakāyassa passato.
‘‘ат̇а рааж̇аа г̇ан̇г̇ааяа ааваддауумивзг̇аж̇анид̇ам̣ халаахаласад̣̇д̣̇ам̣ суд̇ваа вимхид̇о ажчарияаб̣бхуд̇аж̇аад̇о амажжз звамааха ‘гиссааяам̣, бхан̣з, махааг̇ан̇г̇аа бадисод̇ам̣ санд̣̇ад̇ий’д̇и? ‘б̣анд̇хумад̇ий, махаарааж̇а, г̇ан̣игаа д̇ава важанам̣ суд̇ваа сажжагирияам̣ агааси, д̇ассаа сажжагирияааяа махааг̇ан̇г̇аа уд̣̇д̇хам̣мукаа санд̣̇ад̇ий’д̇и.
‘‘Atha rājā gaṅgāya āvaṭṭaūmivegajanitaṃ halāhalasaddaṃ sutvā vimhito acchariyabbhutajāto amacce evamāha ‘kissāyaṃ, bhaṇe, mahāgaṅgā paṭisotaṃ sandatī’ti? ‘Bandhumatī, mahārāja, gaṇikā tava vacanaṃ sutvā saccakiriyaṃ akāsi, tassā saccakiriyāya mahāgaṅgā uddhaṃmukhā sandatī’ti.
‘‘ат̇а сам̣виг̇г̇ахад̣̇аяо рааж̇аа д̇урид̇ад̇урид̇о саяам̣ г̇анд̇ваа д̇ам̣ г̇ан̣игам̣ бужчи ‘сажжам̣ гира, ж̇з , д̇аяаа сажжагирияааяа аяам̣ г̇ан̇г̇аа бадисод̇ам̣ санд̣̇аабид̇аа’д̇и? ‘аама д̣̇зваа’д̇и. рааж̇аа ааха ‘гим̣ д̇з д̇ад̇т̇а б̣алам̣ ад̇т̇и, го ваа д̇з важанам̣ аад̣̇ияад̇и ануммад̇д̇о, гзна д̇вам̣ б̣алзна имам̣ махааг̇ан̇г̇ам̣ бадисод̇ам̣ санд̣̇аабзсий’д̇и? саа ааха ‘сажжаб̣алзнаахам̣, махаарааж̇а, имам̣ махааг̇ан̇г̇ам̣ бадисод̇ам̣ санд̣̇аабзси’нд̇и. рааж̇аа ааха ‘гим̣ д̇з сажжаб̣алам̣ ад̇т̇и жорияаа д̇худ̇д̇ияаа асад̇ияаа чиннигааяа баабияаа бхиннасийлааяа 5 хириад̇игганд̇игааяа анд̇хаж̇анабалобхигааяаа’д̇и. ‘сажжам̣, махаарааж̇а, д̇аад̣̇исигаа ахам̣, д̇аад̣̇исигааяаби мз, махаарааж̇а, сажжагирияаа ад̇т̇и, яааяаахам̣ ижчамаанаа сад̣̇звагамби логам̣ баривад̇д̇зяяа’нд̇и. рааж̇аа ааха ‘гад̇амаа бана саа ход̇и сажжагирияаа, ин̇гха мам̣ саавзхий’д̇и. ‘яо мз, махаарааж̇а, д̇ханам̣ д̣̇зд̇и кад̇д̇ияо ваа б̣раахман̣о ваа взссо ваа суд̣̇д̣̇о ваа ан̃н̃о ваа гожи, д̇зсам̣ самагам̣ язва убадтахаами, ‘‘кад̇д̇ияо’’д̇и висзсо над̇т̇и, ‘‘суд̣̇д̣̇о’’д̇и ад̇иман̃н̃анаа 6 над̇т̇и, анунаяаббадигхавиббамуд̇д̇аа д̇ханассаамигам̣ барижараами, зсаа мз д̣̇зва сажжагирияаа, яааяаахам̣ имам̣ махааг̇ан̇г̇ам̣ бадисод̇ам̣ санд̣̇аабзси’нд̇и.
‘‘Atha saṃviggahadayo rājā turitaturito sayaṃ gantvā taṃ gaṇikaṃ pucchi ‘saccaṃ kira, je , tayā saccakiriyāya ayaṃ gaṅgā paṭisotaṃ sandāpitā’ti? ‘Āma devā’ti. Rājā āha ‘kiṃ te tattha balaṃ atthi, ko vā te vacanaṃ ādiyati anummatto, kena tvaṃ balena imaṃ mahāgaṅgaṃ paṭisotaṃ sandāpesī’ti? Sā āha ‘saccabalenāhaṃ, mahārāja, imaṃ mahāgaṅgaṃ paṭisotaṃ sandāpesi’nti. Rājā āha ‘kiṃ te saccabalaṃ atthi coriyā dhuttiyā asatiyā chinnikāya pāpiyā bhinnasīlāya 7 hiriatikkantikāya andhajanapalobhikāyā’ti. ‘Saccaṃ, mahārāja, tādisikā ahaṃ, tādisikāyapi me, mahārāja, saccakiriyā atthi, yāyāhaṃ icchamānā sadevakampi lokaṃ parivatteyya’nti. Rājā āha ‘katamā pana sā hoti saccakiriyā, iṅgha maṃ sāvehī’ti. ‘Yo me, mahārāja, dhanaṃ deti khattiyo vā brāhmaṇo vā vesso vā suddo vā añño vā koci, tesaṃ samakaṃ yeva upaṭṭhahāmi, ‘‘khattiyo’’ti viseso natthi, ‘‘suddo’’ti atimaññanā 8 natthi, anunayappaṭighavippamuttā dhanassāmikaṃ paricarāmi, esā me deva saccakiriyā, yāyāhaṃ imaṃ mahāgaṅgaṃ paṭisotaṃ sandāpesi’nti.
‘‘ид̇иби, махаарааж̇а, сажжз тид̇аа на гин̃жи ад̇т̇ам̣ на винд̣̇анд̇и. д̣̇иннаани жа, махаарааж̇а, сивирааж̇зна яаажагасса жагкууни , д̣̇иб̣б̣ажагкууни жа уббаннаани, д̇ан̃жа сажжагирияааяа. яам̣ бана суд̇д̇з вуд̇д̇ам̣ ‘мам̣сажагкусмим̣ надтз ахзд̇усмим̣ авад̇т̇усмим̣ над̇т̇и д̣̇иб̣б̣ажагкусса уббаад̣̇о’д̇и. д̇ам̣ бхааванаамаяам̣ жагкум̣ санд̇хааяа вуд̇д̇ам̣, звамзд̇ам̣, махаарааж̇а, д̇хаарзхий’’д̇и. ‘‘саад̇ху, бханд̇з нааг̇асзна, суниб̣б̣зтид̇о бан̃хо, сунид̣̇д̣̇идто ниг̇г̇ахо, сумад̣̇д̣̇ид̇аа бараваад̣̇аа, звамзд̇ам̣ д̇ат̇аа самбадижчаамий’’д̇и.
‘‘Itipi, mahārāja, sacce ṭhitā na kiñci atthaṃ na vindanti. Dinnāni ca, mahārāja, sivirājena yācakassa cakkhūni , dibbacakkhūni ca uppannāni, tañca saccakiriyāya. Yaṃ pana sutte vuttaṃ ‘maṃsacakkhusmiṃ naṭṭhe ahetusmiṃ avatthusmiṃ natthi dibbacakkhussa uppādo’ti. Taṃ bhāvanāmayaṃ cakkhuṃ sandhāya vuttaṃ, evametaṃ, mahārāja, dhārehī’’ti. ‘‘Sādhu, bhante nāgasena, sunibbeṭhito pañho, suniddiṭṭho niggaho, sumadditā paravādā, evametaṃ tathā sampaṭicchāmī’’ti.
сивирааж̇ажагкуд̣̇аанабан̃хо бан̃жамо.
Sivirājacakkhudānapañho pañcamo.
Footnotes:
