| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. ஸோஅத்தாஸுத்தங்
3. Soattāsuttaṃ
208. ஸாவத்தி²னிதா³னங். ‘‘கிஸ்மிங் நு கோ², பி⁴க்க²வே, ஸதி, கிங் உபாதா³ய, கிங் அபி⁴னிவிஸ்ஸ ஏவங் தி³ட்டி² உப்பஜ்ஜதி – ‘ஸோ அத்தா, ஸோ லோகோ, ஸோ பேச்ச ப⁴விஸ்ஸாமி நிச்சோ து⁴வோ ஸஸ்ஸதோ அவிபரிணாமத⁴ம்மோ’’’தி? ப⁴க³வங்மூலகா நோ, ப⁴ந்தே, த⁴ம்மா…பே॰….
208. Sāvatthinidānaṃ. ‘‘Kismiṃ nu kho, bhikkhave, sati, kiṃ upādāya, kiṃ abhinivissa evaṃ diṭṭhi uppajjati – ‘so attā, so loko, so pecca bhavissāmi nicco dhuvo sassato avipariṇāmadhammo’’’ti? Bhagavaṃmūlakā no, bhante, dhammā…pe….
‘‘ரூபே கோ², பி⁴க்க²வே, ஸதி, ரூபங் உபாதா³ய, ரூபங் அபி⁴னிவிஸ்ஸ ஏவங் தி³ட்டி² உப்பஜ்ஜதி – ‘ஸோ அத்தா, ஸோ லோகோ, ஸோ பேச்ச ப⁴விஸ்ஸாமி நிச்சோ து⁴வோ ஸஸ்ஸதோ அவிபரிணாமத⁴ம்மோ’தி . வேத³னாய ஸதி…பே॰… ஸஞ்ஞாய ஸதி… ஸங்கா²ரேஸு ஸதி… விஞ்ஞாணே ஸதி, விஞ்ஞாணங் உபாதா³ய, விஞ்ஞாணங் அபி⁴னிவிஸ்ஸ ஏவங் தி³ட்டி² உப்பஜ்ஜதி – ‘ஸோ அத்தா, ஸோ லோகோ, ஸோ பேச்ச ப⁴விஸ்ஸாமி நிச்சோ து⁴வோ ஸஸ்ஸதோ அவிபரிணாமத⁴ம்மோ’’’தி.
‘‘Rūpe kho, bhikkhave, sati, rūpaṃ upādāya, rūpaṃ abhinivissa evaṃ diṭṭhi uppajjati – ‘so attā, so loko, so pecca bhavissāmi nicco dhuvo sassato avipariṇāmadhammo’ti . Vedanāya sati…pe… saññāya sati… saṅkhāresu sati… viññāṇe sati, viññāṇaṃ upādāya, viññāṇaṃ abhinivissa evaṃ diṭṭhi uppajjati – ‘so attā, so loko, so pecca bhavissāmi nicco dhuvo sassato avipariṇāmadhammo’’’ti.
‘‘தங் கிங் மஞ்ஞத², பி⁴க்க²வே, ரூபங் நிச்சங் வா அனிச்சங் வா’’தி? ‘‘அனிச்சங் ப⁴ந்தே’’…பே॰… அபி நு தங் அனுபாதா³ய ஏவங் தி³ட்டி² உப்பஜ்ஜெய்ய – ‘ஸோ அத்தா…பே॰… அவிபரிணாமத⁴ம்மோ’தி? ‘‘நோ ஹேதங், ப⁴ந்தே’’. ‘‘வேத³னா… ஸஞ்ஞா… ஸங்கா²ரா… விஞ்ஞாணங் நிச்சங் வா அனிச்சங் வா’’தி? ‘‘அனிச்சங் ப⁴ந்தே…பே॰… அபி நு தங் அனுபாதா³ய ஏவங் தி³ட்டி² உப்பஜ்ஜெய்ய – ‘ஸோ அத்தா…பே॰… அவிபரிணாமத⁴ம்மோ’’’தி? ‘‘நோ ஹேதங், ப⁴ந்தே’’. ‘‘யம்பித³ங் தி³ட்ட²ங் ஸுதங் முதங் விஞ்ஞாதங் பத்தங் பரியேஸிதங் அனுவிசரிதங் மனஸா தம்பி நிச்சங் வா அனிச்சங் வா’’தி? ‘‘அனிச்சங், ப⁴ந்தே…பே॰… அபி நு தங் அனுபாதா³ய ஏவங் தி³ட்டி² உப்பஜ்ஜெய்ய – ‘ஸோ அத்தா, ஸோ லோகோ, ஸோ பேச்ச ப⁴விஸ்ஸாமி நிச்சோ து⁴வோ ஸஸ்ஸதோ அவிபரிணாமத⁴ம்மோ’’’தி? ‘‘நோ ஹேதங், ப⁴ந்தே’’.
‘‘Taṃ kiṃ maññatha, bhikkhave, rūpaṃ niccaṃ vā aniccaṃ vā’’ti? ‘‘Aniccaṃ bhante’’…pe… api nu taṃ anupādāya evaṃ diṭṭhi uppajjeyya – ‘so attā…pe… avipariṇāmadhammo’ti? ‘‘No hetaṃ, bhante’’. ‘‘Vedanā… saññā… saṅkhārā… viññāṇaṃ niccaṃ vā aniccaṃ vā’’ti? ‘‘Aniccaṃ bhante…pe… api nu taṃ anupādāya evaṃ diṭṭhi uppajjeyya – ‘so attā…pe… avipariṇāmadhammo’’’ti? ‘‘No hetaṃ, bhante’’. ‘‘Yampidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tampi niccaṃ vā aniccaṃ vā’’ti? ‘‘Aniccaṃ, bhante…pe… api nu taṃ anupādāya evaṃ diṭṭhi uppajjeyya – ‘so attā, so loko, so pecca bhavissāmi nicco dhuvo sassato avipariṇāmadhammo’’’ti? ‘‘No hetaṃ, bhante’’.
‘‘யதோ கோ², பி⁴க்க²வே, அரியஸாவகஸ்ஸ இமேஸு ச டா²னேஸு கங்கா² பஹீனா ஹோதி, து³க்கே²பிஸ்ஸ கங்கா² பஹீனா ஹோதி…பே॰… து³க்க²னிரோத⁴கா³மினியா படிபதா³யபிஸ்ஸ கங்கா² பஹீனா ஹோதி – அயங் வுச்சதி, பி⁴க்க²வே, அரியஸாவகோ ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயனோ’’தி. ததியங்.
‘‘Yato kho, bhikkhave, ariyasāvakassa imesu ca ṭhānesu kaṅkhā pahīnā hoti, dukkhepissa kaṅkhā pahīnā hoti…pe… dukkhanirodhagāminiyā paṭipadāyapissa kaṅkhā pahīnā hoti – ayaṃ vuccati, bhikkhave, ariyasāvako sotāpanno avinipātadhammo niyato sambodhiparāyano’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2-4. ஏதங்மமஸுத்தாதி³வண்ணனா • 2-4. Etaṃmamasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2-4. ஏதங்மமஸுத்தாதி³வண்ணனா • 2-4. Etaṃmamasuttādivaṇṇanā
