| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೮. ಸೋಭಿತಬುದ್ಧವಂಸೋ
8. Sobhitabuddhavaṃso
೧.
1.
ರೇವತಸ್ಸ ಅಪರೇನ, ಸೋಭಿತೋ ನಾಮ ನಾಯಕೋ।
Revatassa aparena, sobhito nāma nāyako;
ಸಮಾಹಿತೋ ಸನ್ತಚಿತ್ತೋ, ಅಸಮೋ ಅಪ್ಪಟಿಪುಗ್ಗಲೋ॥
Samāhito santacitto, asamo appaṭipuggalo.
೨.
2.
ಸೋ ಜಿನೋ ಸಕಗೇಹಮ್ಹಿ, ಮಾನಸಂ ವಿನಿವತ್ತಯಿ।
So jino sakagehamhi, mānasaṃ vinivattayi;
ಪತ್ವಾನ ಕೇವಲಂ ಬೋಧಿಂ, ಧಮ್ಮಚಕ್ಕಂ ಪವತ್ತಯಿ॥
Patvāna kevalaṃ bodhiṃ, dhammacakkaṃ pavattayi.
೩.
3.
ಯಾವ ಹೇಟ್ಠಾ ಅವೀಚಿತೋ, ಭವಗ್ಗಾ ಚಾಪಿ ಉದ್ಧತೋ।
Yāva heṭṭhā avīcito, bhavaggā cāpi uddhato;
ಏತ್ಥನ್ತರೇ ಏಕಪರಿಸಾ, ಅಹೋಸಿ ಧಮ್ಮದೇಸನೇ॥
Etthantare ekaparisā, ahosi dhammadesane.
೪.
4.
ತಾಯ ಪರಿಸಾಯ ಸಮ್ಬುದ್ಧೋ, ಧಮ್ಮಚಕ್ಕಂ ಪವತ್ತಯಿ।
Tāya parisāya sambuddho, dhammacakkaṃ pavattayi;
ಗಣನಾಯ ನ ವತ್ತಬ್ಬೋ, ಪಠಮಾಭಿಸಮಯೋ ಅಹು॥
Gaṇanāya na vattabbo, paṭhamābhisamayo ahu.
೫.
5.
ತತೋ ಪರಮ್ಪಿ ದೇಸೇನ್ತೇ, ಮರೂನಞ್ಚ ಸಮಾಗಮೇ।
Tato parampi desente, marūnañca samāgame;
ನವುತಿಕೋಟಿಸಹಸ್ಸಾನಂ, ದುತಿಯಾಭಿಸಮಯೋ ಅಹು॥
Navutikoṭisahassānaṃ, dutiyābhisamayo ahu.
೬.
6.
ಪುನಾಪರಂ ರಾಜಪುತ್ತೋ, ಜಯಸೇನೋ ನಾಮ ಖತ್ತಿಯೋ।
Punāparaṃ rājaputto, jayaseno nāma khattiyo;
ಆರಾಮಂ ರೋಪಯಿತ್ವಾನ, ಬುದ್ಧೇ ನಿಯ್ಯಾದಯೀ ತದಾ॥
Ārāmaṃ ropayitvāna, buddhe niyyādayī tadā.
೭.
7.
ತಸ್ಸ ಯಾಗಂ ಪಕಿತ್ತೇನ್ತೋ, ಧಮ್ಮಂ ದೇಸೇಸಿ ಚಕ್ಖುಮಾ।
Tassa yāgaṃ pakittento, dhammaṃ desesi cakkhumā;
ತದಾ ಕೋಟಿಸಹಸ್ಸಾನಂ, ತತಿಯಾಭಿಸಮಯೋ ಅಹು॥
Tadā koṭisahassānaṃ, tatiyābhisamayo ahu.
೮.
8.
ಸನ್ನಿಪಾತಾ ತಯೋ ಆಸುಂ, ಸೋಭಿತಸ್ಸ ಮಹೇಸಿನೋ।
Sannipātā tayo āsuṃ, sobhitassa mahesino;
ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ॥
Khīṇāsavānaṃ vimalānaṃ, santacittāna tādinaṃ.
೯.
9.
ಉಗ್ಗತೋ ನಾಮ ಸೋ ರಾಜಾ, ದಾನಂ ದೇತಿ ನರುತ್ತಮೇ।
Uggato nāma so rājā, dānaṃ deti naruttame;
೧೦.
10.
ತದಾ ನವುತಿಕೋಟೀನಂ, ದುತಿಯೋ ಆಸಿ ಸಮಾಗಮೋ॥
Tadā navutikoṭīnaṃ, dutiyo āsi samāgamo.
೧೧.
11.
ದೇವಲೋಕೇ ವಸಿತ್ವಾನ, ಯದಾ ಓರೋಹತೀ ಜಿನೋ।
Devaloke vasitvāna, yadā orohatī jino;
ತದಾ ಅಸೀತಿಕೋಟೀನಂ, ತತಿಯೋ ಆಸಿ ಸಮಾಗಮೋ॥
Tadā asītikoṭīnaṃ, tatiyo āsi samāgamo.
೧೨.
12.
ಅಹಂ ತೇನ ಸಮಯೇನ, ಸುಜಾತೋ ನಾಮ ಬ್ರಾಹ್ಮಣೋ।
Ahaṃ tena samayena, sujāto nāma brāhmaṇo;
ತದಾ ಸಸಾವಕಂ ಬುದ್ಧಂ, ಅನ್ನಪಾನೇನ ತಪ್ಪಯಿಂ॥
Tadā sasāvakaṃ buddhaṃ, annapānena tappayiṃ.
೧೩.
13.
ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಸೋಭಿತೋ ಲೋಕನಾಯಕೋ।
Sopi maṃ buddho byākāsi, sobhito lokanāyako;
‘‘ಅಪರಿಮೇಯ್ಯಿತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Aparimeyyito kappe, ayaṃ buddho bhavissati.
೧೪.
14.
‘‘ಪಧಾನಂ ಪದಹಿತ್ವಾನ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Padhānaṃ padahitvāna…pe… hessāma sammukhā imaṃ’’.
೧೫.
15.
ತಸ್ಸಾಪಿ ವಚನಂ ಸುತ್ವಾ, ಹಟ್ಠೋ ಸಂವಿಗ್ಗಮಾನಸೋ।
Tassāpi vacanaṃ sutvā, haṭṭho saṃviggamānaso;
ತಮೇವತ್ಥಮನುಪ್ಪತ್ತಿಯಾ, ಉಗ್ಗಂ ಧಿತಿಮಕಾಸಹಂ॥
Tamevatthamanuppattiyā, uggaṃ dhitimakāsahaṃ.
೧೬.
16.
ಸುಧಮ್ಮಂ ನಾಮ ನಗರಂ, ಸುಧಮ್ಮೋ ನಾಮ ಖತ್ತಿಯೋ।
Sudhammaṃ nāma nagaraṃ, sudhammo nāma khattiyo;
ಸುಧಮ್ಮಾ ನಾಮ ಜನಿಕಾ, ಸೋಭಿತಸ್ಸ ಮಹೇಸಿನೋ॥
Sudhammā nāma janikā, sobhitassa mahesino.
೧೭.
17.
ನವವಸ್ಸಸಹಸ್ಸಾನಿ , ಅಗಾರಂ ಅಜ್ಝ ಸೋ ವಸಿ।
Navavassasahassāni , agāraṃ ajjha so vasi;
ಕುಮುದೋ ನಾಳಿನೋ ಪದುಮೋ, ತಯೋ ಪಾಸಾದಮುತ್ತಮಾ॥
Kumudo nāḷino padumo, tayo pāsādamuttamā.
೧೮.
18.
ಸತ್ತತಿಂಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Sattatiṃsasahassāni, nāriyo samalaṅkatā;
೧೯.
19.
ನಿಮಿತ್ತೇ ಚತುರೋ ದಿಸ್ವಾ, ಪಾಸಾದೇನಾಭಿನಿಕ್ಖಮಿ।
Nimitte caturo disvā, pāsādenābhinikkhami;
ಸತ್ತಾಹಂ ಪಧಾನಚಾರಂ, ಚರಿತ್ವಾ ಪುರಿಸುತ್ತಮೋ॥
Sattāhaṃ padhānacāraṃ, caritvā purisuttamo.
೨೦.
20.
ಬ್ರಹ್ಮುನಾ ಯಾಚಿತೋ ಸನ್ತೋ, ಸೋಭಿತೋ ಲೋಕನಾಯಕೋ।
Brahmunā yācito santo, sobhito lokanāyako;
ವತ್ತಿ ಚಕ್ಕಂ ಮಹಾವೀರೋ, ಸುಧಮ್ಮುಯ್ಯಾನಮುತ್ತಮೇ॥
Vatti cakkaṃ mahāvīro, sudhammuyyānamuttame.
೨೧.
21.
ಅಸಮೋ ಚ ಸುನೇತ್ತೋ ಚ, ಅಹೇಸುಂ ಅಗ್ಗಸಾವಕಾ।
Asamo ca sunetto ca, ahesuṃ aggasāvakā;
ಅನೋಮೋ ನಾಮುಪಟ್ಠಾಕೋ, ಸೋಭಿತಸ್ಸ ಮಹೇಸಿನೋ॥
Anomo nāmupaṭṭhāko, sobhitassa mahesino.
೨೨.
22.
ನಕುಲಾ ಚ ಸುಜಾತಾ ಚ, ಅಹೇಸುಂ ಅಗ್ಗಸಾವಿಕಾ।
Nakulā ca sujātā ca, ahesuṃ aggasāvikā;
ಬುಜ್ಝಮಾನೋ ಚ ಸೋ ಬುದ್ಧೋ, ನಾಗಮೂಲೇ ಅಬುಜ್ಝಥ॥
Bujjhamāno ca so buddho, nāgamūle abujjhatha.
೨೩.
23.
ರಮ್ಮೋ ಚೇವ ಸುದತ್ತೋ ಚ, ಅಹೇಸುಂ ಅಗ್ಗುಪಟ್ಠಕಾ।
Rammo ceva sudatto ca, ahesuṃ aggupaṭṭhakā;
ನಕುಲಾ ಚೇವ ಚಿತ್ತಾ ಚ, ಅಹೇಸುಂ ಅಗ್ಗುಪಟ್ಠಿಕಾ॥
Nakulā ceva cittā ca, ahesuṃ aggupaṭṭhikā.
೨೪.
24.
ಅಟ್ಠಪಣ್ಣಾಸರತನಂ, ಅಚ್ಚುಗ್ಗತೋ ಮಹಾಮುನಿ।
Aṭṭhapaṇṇāsaratanaṃ, accuggato mahāmuni;
ಓಭಾಸೇತಿ ದಿಸಾ ಸಬ್ಬಾ, ಸತರಂಸೀವ ಉಗ್ಗತೋ॥
Obhāseti disā sabbā, sataraṃsīva uggato.
೨೫.
25.
ಯಥಾ ಸುಫುಲ್ಲಂ ಪವನಂ, ನಾನಾಗನ್ಧೇಹಿ ಧೂಪಿತಂ।
Yathā suphullaṃ pavanaṃ, nānāgandhehi dhūpitaṃ;
ತಥೇವ ತಸ್ಸ ಪಾವಚನಂ, ಸೀಲಗನ್ಧೇಹಿ ಧೂಪಿತಂ॥
Tatheva tassa pāvacanaṃ, sīlagandhehi dhūpitaṃ.
೨೬.
26.
ಯಥಾಪಿ ಸಾಗರೋ ನಾಮ, ದಸ್ಸನೇನ ಅತಪ್ಪಿಯೋ।
Yathāpi sāgaro nāma, dassanena atappiyo;
ತಥೇವ ತಸ್ಸ ಪಾವಚನಂ, ಸವಣೇನ ಅತಪ್ಪಿಯಂ॥
Tatheva tassa pāvacanaṃ, savaṇena atappiyaṃ.
೨೭.
27.
ನವುತಿವಸ್ಸಸಹಸ್ಸಾನಿ , ಆಯು ವಿಜ್ಜತಿ ತಾವದೇ।
Navutivassasahassāni , āyu vijjati tāvade;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥
Tāvatā tiṭṭhamāno so, tāresi janataṃ bahuṃ.
೨೮.
28.
ಓವಾದಂ ಅನುಸಿಟ್ಠಿಞ್ಚ, ದತ್ವಾನ ಸೇಸಕೇ ಜನೇ।
Ovādaṃ anusiṭṭhiñca, datvāna sesake jane;
ಹುತಾಸನೋವ ತಾಪೇತ್ವಾ, ನಿಬ್ಬುತೋ ಸೋ ಸಸಾವಕೋ॥
Hutāsanova tāpetvā, nibbuto so sasāvako.
೨೯.
29.
ಸೋ ಚ ಬುದ್ಧೋ ಅಸಮಸಮೋ, ತೇಪಿ ಸಾವಕಾ ಬಲಪ್ಪತ್ತಾ।
So ca buddho asamasamo, tepi sāvakā balappattā;
ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ॥
Sabbaṃ tamantarahitaṃ, nanu rittā sabbasaṅkhārā.
೩೦.
30.
ಸೋಭಿತೋ ವರಸಮ್ಬುದ್ಧೋ, ಸೀಹಾರಾಮಮ್ಹಿ ನಿಬ್ಬುತೋ।
Sobhito varasambuddho, sīhārāmamhi nibbuto;
ಧಾತುವಿತ್ಥಾರಿಕಂ ಆಸಿ, ತೇಸು ತೇಸು ಪದೇಸತೋತಿ॥
Dhātuvitthārikaṃ āsi, tesu tesu padesatoti.
ಸೋಭಿತಸ್ಸ ಭಗವತೋ ವಂಸೋ ಛಟ್ಠೋ।
Sobhitassa bhagavato vaṃso chaṭṭho.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೮. ಸೋಭಿತಬುದ್ಧವಂಸವಣ್ಣನಾ • 8. Sobhitabuddhavaṃsavaṇṇanā
