| Library / Tipiṭaka / திபிடக • Tipiṭaka / நெத்திப்பகரண-அட்ட²கதா² • Nettippakaraṇa-aṭṭhakathā |
13. ஸோத⁴னஹாரவிப⁴ங்க³வண்ணனா
13. Sodhanahāravibhaṅgavaṇṇanā
45. தத்த² கதமோ ஸோத⁴னோ ஹாரோதி ஸோத⁴னஹாரவிப⁴ங்கோ³. தத்த² ப⁴க³வா பத³ங் ஸோதே⁴தீதி ‘‘அவிஜ்ஜாய நிவுதோ லோகோ’’தி (ஸு॰ நி॰ 1039; சூளனி॰ அஜிதமாணவபுச்சா² 58, அஜிதமாணவபுச்சா²னித்³தே³ஸ 2) வத³ந்தோ ப⁴க³வா – ‘‘கேனஸ்ஸு நிவுதோ லோகோ’’தி (ஸு॰ நி॰ 1038; சூளனி॰ அஜிதமாணவபுச்சா² 57, அஜிதமாணவபுச்சா²னித்³தே³ஸ 1) ஆயஸ்மதா அஜிதேன புச்சா²வஸேன வுத்தங் பத³ங் ஸோதே⁴தி நாம, தத³த்த²ஸ்ஸ விஸ்ஸஜ்ஜனதோ. நோ ச ஆரம்ப⁴ந்தி ந தாவ ஆரம்ப⁴ங் ஸோதே⁴தி, ஞாதுங் இச்சி²தஸ்ஸ அத்த²ஸ்ஸ அபரியோஸிதத்தா. ஸுத்³தோ⁴ ஆரம்போ⁴தி ஞாதுங் இச்சி²தஸ்ஸ அத்த²ஸ்ஸ பபோ³தி⁴தத்தா ஸோதி⁴தோ ஆரம்போ⁴தி அத்தோ². அஞ்ஞாணபக்க²ந்தா³னங் த்³வெள்ஹகஜாதானங் வா புச்ச²னகாலே புச்சி²தானங் புச்சா²விஸயோ அவிஜடங் மஹாக³ஹனங் விய மஹாது³க்³க³ங் விய ச அந்த⁴காரங் அவிபூ⁴தங் ஹோதி. யதா³ ச ப⁴க³வதா பண்டி³தேஹி வா ப⁴க³வதோ ஸாவகேஹி அபதே³ பத³ங் த³ஸ்ஸெந்தேஹி நிஜ்ஜடங் நிகு³ம்ப³ங் கத்வா பஞ்ஹே விஸ்ஸஜ்ஜிதே மஹதா க³ந்த⁴ஹத்தி²னா அபி⁴ப⁴வித்வா ஓப⁴க்³க³பதா³லிதோ க³ஹனப்பதே³ஸோ விய விக³தந்த⁴காரோ விபூ⁴தோ உபட்ட²ஹமானோ விஸோதி⁴தோ நாம ஹோதி.
45.Tattha katamo sodhano hāroti sodhanahāravibhaṅgo. Tattha bhagavā padaṃ sodhetīti ‘‘avijjāya nivuto loko’’ti (su. ni. 1039; cūḷani. ajitamāṇavapucchā 58, ajitamāṇavapucchāniddesa 2) vadanto bhagavā – ‘‘kenassu nivuto loko’’ti (su. ni. 1038; cūḷani. ajitamāṇavapucchā 57, ajitamāṇavapucchāniddesa 1) āyasmatā ajitena pucchāvasena vuttaṃ padaṃ sodheti nāma, tadatthassa vissajjanato. No ca ārambhanti na tāva ārambhaṃ sodheti, ñātuṃ icchitassa atthassa apariyositattā. Suddho ārambhoti ñātuṃ icchitassa atthassa pabodhitattā sodhito ārambhoti attho. Aññāṇapakkhandānaṃ dveḷhakajātānaṃ vā pucchanakāle pucchitānaṃ pucchāvisayo avijaṭaṃ mahāgahanaṃ viya mahāduggaṃ viya ca andhakāraṃ avibhūtaṃ hoti. Yadā ca bhagavatā paṇḍitehi vā bhagavato sāvakehi apade padaṃ dassentehi nijjaṭaṃ nigumbaṃ katvā pañhe vissajjite mahatā gandhahatthinā abhibhavitvā obhaggapadālito gahanappadeso viya vigatandhakāro vibhūto upaṭṭhahamāno visodhito nāma hoti.
ஸோத⁴னஹாரவிப⁴ங்க³வண்ணனா நிட்டி²தா.
Sodhanahāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 13. ஸோத⁴னஹாரவிப⁴ங்கோ³ • 13. Sodhanahāravibhaṅgo
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 13. ஸோத⁴னஹாரவிப⁴ங்க³வண்ணனா • 13. Sodhanahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 13. ஸோத⁴னஹாரவிப⁴ங்க³விபா⁴வனா • 13. Sodhanahāravibhaṅgavibhāvanā
