| Library / Tipiṭaka / तिपिटक • Tipiṭaka / नेत्तिप्पकरण-अट्ठकथा • Nettippakaraṇa-aṭṭhakathā |
१३. सोधनहारविभङ्गवण्णना
13. Sodhanahāravibhaṅgavaṇṇanā
४५. तत्थ कतमो सोधनो हारोति सोधनहारविभङ्गो। तत्थ भगवा पदं सोधेतीति ‘‘अविज्जाय निवुतो लोको’’ति (सु॰ नि॰ १०३९; चूळनि॰ अजितमाणवपुच्छा ५८, अजितमाणवपुच्छानिद्देस २) वदन्तो भगवा – ‘‘केनस्सु निवुतो लोको’’ति (सु॰ नि॰ १०३८; चूळनि॰ अजितमाणवपुच्छा ५७, अजितमाणवपुच्छानिद्देस १) आयस्मता अजितेन पुच्छावसेन वुत्तं पदं सोधेति नाम, तदत्थस्स विस्सज्जनतो। नो च आरम्भन्ति न ताव आरम्भं सोधेति, ञातुं इच्छितस्स अत्थस्स अपरियोसितत्ता। सुद्धो आरम्भोति ञातुं इच्छितस्स अत्थस्स पबोधितत्ता सोधितो आरम्भोति अत्थो। अञ्ञाणपक्खन्दानं द्वेळ्हकजातानं वा पुच्छनकाले पुच्छितानं पुच्छाविसयो अविजटं महागहनं विय महादुग्गं विय च अन्धकारं अविभूतं होति। यदा च भगवता पण्डितेहि वा भगवतो सावकेहि अपदे पदं दस्सेन्तेहि निज्जटं निगुम्बं कत्वा पञ्हे विस्सज्जिते महता गन्धहत्थिना अभिभवित्वा ओभग्गपदालितो गहनप्पदेसो विय विगतन्धकारो विभूतो उपट्ठहमानो विसोधितो नाम होति।
45.Tattha katamo sodhano hāroti sodhanahāravibhaṅgo. Tattha bhagavā padaṃ sodhetīti ‘‘avijjāya nivuto loko’’ti (su. ni. 1039; cūḷani. ajitamāṇavapucchā 58, ajitamāṇavapucchāniddesa 2) vadanto bhagavā – ‘‘kenassu nivuto loko’’ti (su. ni. 1038; cūḷani. ajitamāṇavapucchā 57, ajitamāṇavapucchāniddesa 1) āyasmatā ajitena pucchāvasena vuttaṃ padaṃ sodheti nāma, tadatthassa vissajjanato. No ca ārambhanti na tāva ārambhaṃ sodheti, ñātuṃ icchitassa atthassa apariyositattā. Suddho ārambhoti ñātuṃ icchitassa atthassa pabodhitattā sodhito ārambhoti attho. Aññāṇapakkhandānaṃ dveḷhakajātānaṃ vā pucchanakāle pucchitānaṃ pucchāvisayo avijaṭaṃ mahāgahanaṃ viya mahāduggaṃ viya ca andhakāraṃ avibhūtaṃ hoti. Yadā ca bhagavatā paṇḍitehi vā bhagavato sāvakehi apade padaṃ dassentehi nijjaṭaṃ nigumbaṃ katvā pañhe vissajjite mahatā gandhahatthinā abhibhavitvā obhaggapadālito gahanappadeso viya vigatandhakāro vibhūto upaṭṭhahamāno visodhito nāma hoti.
सोधनहारविभङ्गवण्णना निट्ठिता।
Sodhanahāravibhaṅgavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / नेत्तिप्पकरणपाळि • Nettippakaraṇapāḷi / १३. सोधनहारविभङ्गो • 13. Sodhanahāravibhaṅgo
टीका • Tīkā / सुत्तपिटक (टीका) • Suttapiṭaka (ṭīkā) / खुद्दकनिकाय (टीका) • Khuddakanikāya (ṭīkā) / नेत्तिप्पकरण-टीका • Nettippakaraṇa-ṭīkā / १३. सोधनहारविभङ्गवण्णना • 13. Sodhanahāravibhaṅgavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / खुद्दकनिकाय (टीका) • Khuddakanikāya (ṭīkā) / नेत्तिविभाविनी • Nettivibhāvinī / १३. सोधनहारविभङ्गविभावना • 13. Sodhanahāravibhaṅgavibhāvanā
