| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๖. โสขุมฺมสุตฺตวณฺณนา
6. Sokhummasuttavaṇṇanā
๑๖. ฉเฎฺฐ โสขุมฺมานีติ สุขุมลกฺขณปฎิวิชฺฌนกานิ ญาณานิฯ รูปโสขุเมฺมน สมนฺนาคโต โหตีติ รูเป สณฺหสุขุมลกฺขณปริคฺคาหเกน ญาเณน สมนฺนาคโต โหติฯ ปรเมนาติ อุตฺตเมนฯ เตน จ รูปโสขุเมฺมนาติ เตน ยาว อนุโลมภาวํ ปเตฺตน สุขุมลกฺขณปริคฺคาหกญาเณนฯ น สมนุปสฺสตีติ นตฺถิภาเวเนว น ปสฺสติฯ น ปเตฺถตีติ นตฺถิภาเวเนว น ปเตฺถติฯ เวทนาโสขุมฺมาทีสุปิ เอเสว นโยฯ
16. Chaṭṭhe sokhummānīti sukhumalakkhaṇapaṭivijjhanakāni ñāṇāni. Rūpasokhummena samannāgato hotīti rūpe saṇhasukhumalakkhaṇapariggāhakena ñāṇena samannāgato hoti. Paramenāti uttamena. Tena ca rūpasokhummenāti tena yāva anulomabhāvaṃ pattena sukhumalakkhaṇapariggāhakañāṇena. Na samanupassatīti natthibhāveneva na passati. Na patthetīti natthibhāveneva na pattheti. Vedanāsokhummādīsupi eseva nayo.
รูปโสขุมฺมตํ ญตฺวาติ รูปกฺขนฺธสฺส สณฺหสุขุมลกฺขณปริคฺคาหเกน ญาเณน สุขุมตํ ชานิตฺวาฯ เวทนานญฺจ สมฺภวนฺติ เวทนากฺขนฺธสฺส จ ปภวํ ชานิตฺวาฯ สญฺญา ยโต สมุเทตีติ ยสฺมา การณา สญฺญากฺขโนฺธ สมุเทติ นิพฺพตฺตติ, ตญฺจ ชานิตฺวาฯ อตฺถํ คจฺฉติ ยตฺถ จาติ ยสฺมิํ ฐาเน นิรุชฺฌติ, ตญฺจ ชานิตฺวาฯ สงฺขาเร ปรโต ญตฺวาติ สงฺขารกฺขนฺธํ อนิจฺจตาย ลุชฺชนภาเวน ปรโต ชานิตฺวาฯ อิมินา หิ ปเทน อนิจฺจานุปสฺสนา กถิตาฯ ทุกฺขโต โน จ อตฺตโตติ อิมินา ทุกฺขานตฺตานุปสฺสนาฯ สโนฺตติ กิเลสสนฺตตาย สโนฺตฯ สนฺติปเท รโตติ นิพฺพาเน รโตฯ อิติ สุตฺตเนฺต จตูสุ ฐาเนสุ วิปสฺสนาว กถิตา, คาถาสุ โลกุตฺตรธโมฺมปีติฯ
Rūpasokhummataṃ ñatvāti rūpakkhandhassa saṇhasukhumalakkhaṇapariggāhakena ñāṇena sukhumataṃ jānitvā. Vedanānañca sambhavanti vedanākkhandhassa ca pabhavaṃ jānitvā. Saññā yato samudetīti yasmā kāraṇā saññākkhandho samudeti nibbattati, tañca jānitvā. Atthaṃgacchati yattha cāti yasmiṃ ṭhāne nirujjhati, tañca jānitvā. Saṅkhāre parato ñatvāti saṅkhārakkhandhaṃ aniccatāya lujjanabhāvena parato jānitvā. Iminā hi padena aniccānupassanā kathitā. Dukkhato no ca attatoti iminā dukkhānattānupassanā. Santoti kilesasantatāya santo. Santipade ratoti nibbāne rato. Iti suttante catūsu ṭhānesu vipassanāva kathitā, gāthāsu lokuttaradhammopīti.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๖. โสขุมฺมสุตฺตํ • 6. Sokhummasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๖. โสขุมฺมสุตฺตวณฺณนา • 6. Sokhummasuttavaṇṇanā
