| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
6. සොඛුම්‌මසුත්‌තවණ්‌ණනා
6. Sokhummasuttavaṇṇanā
16. ඡට්‌ඨෙ සොඛුම්‌මානීති සුඛුමලක්‌ඛණපටිවිජ්‌ඣනකානි ඤාණානි. රූපසොඛුම්‌මෙන සමන්‌නාගතො හොතීති රූපෙ සණ්‌හසුඛුමලක්‌ඛණපරිග්‌ගාහකෙන ඤාණෙන සමන්‌නාගතො හොති. පරමෙනාති උත්‌තමෙන. තෙන ච රූපසොඛුම්‌මෙනාති තෙන යාව අනුලොමභාවං පත්‌තෙන සුඛුමලක්‌ඛණපරිග්‌ගාහකඤාණෙන. න සමනුපස්‌සතීති නත්‌ථිභාවෙනෙව න පස්‌සති. න පත්‌ථෙතීති නත්‌ථිභාවෙනෙව න පත්‌ථෙති. වෙදනාසොඛුම්‌මාදීසුපි එසෙව නයො.
16. Chaṭṭhe sokhummānīti sukhumalakkhaṇapaṭivijjhanakāni ñāṇāni. Rūpasokhummena samannāgato hotīti rūpe saṇhasukhumalakkhaṇapariggāhakena ñāṇena samannāgato hoti. Paramenāti uttamena. Tena ca rūpasokhummenāti tena yāva anulomabhāvaṃ pattena sukhumalakkhaṇapariggāhakañāṇena. Na samanupassatīti natthibhāveneva na passati. Na patthetīti natthibhāveneva na pattheti. Vedanāsokhummādīsupi eseva nayo.
රූපසොඛුම්‌මතං ඤත්‌වාති රූපක්‌ඛන්‌ධස්‌ස සණ්‌හසුඛුමලක්‌ඛණපරිග්‌ගාහකෙන ඤාණෙන සුඛුමතං ජානිත්‌වා. වෙදනානඤ්‌ච සම්‌භවන්‌ති වෙදනාක්‌ඛන්‌ධස්‌ස ච පභවං ජානිත්‌වා. සඤ්‌ඤා යතො සමුදෙතීති යස්‌මා කාරණා සඤ්‌ඤාක්‌ඛන්‌ධො සමුදෙති නිබ්‌බත්‌තති, තඤ්‌ච ජානිත්‌වා. අත්‌ථං ගච්‌ඡති යත්‌ථ චාති යස්‌මිං ඨානෙ නිරුජ්‌ඣති, තඤ්‌ච ජානිත්‌වා. සඞ්‌ඛාරෙ පරතො ඤත්‌වාති සඞ්‌ඛාරක්‌ඛන්‌ධං අනිච්‌චතාය ලුජ්‌ජනභාවෙන පරතො ජානිත්‌වා. ඉමිනා හි පදෙන අනිච්‌චානුපස්‌සනා කථිතා. දුක්‌ඛතො නො ච අත්‌තතොති ඉමිනා දුක්‌ඛානත්‌තානුපස්‌සනා. සන්‌තොති කිලෙසසන්‌තතාය සන්‌තො. සන්‌තිපදෙ රතොති නිබ්‌බානෙ රතො. ඉති සුත්‌තන්‌තෙ චතූසු ඨානෙසු විපස්‌සනාව කථිතා, ගාථාසු ලොකුත්‌තරධම්‌මොපීති.
Rūpasokhummataṃ ñatvāti rūpakkhandhassa saṇhasukhumalakkhaṇapariggāhakena ñāṇena sukhumataṃ jānitvā. Vedanānañca sambhavanti vedanākkhandhassa ca pabhavaṃ jānitvā. Saññā yato samudetīti yasmā kāraṇā saññākkhandho samudeti nibbattati, tañca jānitvā. Atthaṃgacchati yattha cāti yasmiṃ ṭhāne nirujjhati, tañca jānitvā. Saṅkhāre parato ñatvāti saṅkhārakkhandhaṃ aniccatāya lujjanabhāvena parato jānitvā. Iminā hi padena aniccānupassanā kathitā. Dukkhato no ca attatoti iminā dukkhānattānupassanā. Santoti kilesasantatāya santo. Santipade ratoti nibbāne rato. Iti suttante catūsu ṭhānesu vipassanāva kathitā, gāthāsu lokuttaradhammopīti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 6. සොඛුම්‌මසුත්‌තං • 6. Sokhummasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6. සොඛුම්‌මසුත්‌තවණ්‌ණනා • 6. Sokhummasuttavaṇṇanā
