| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
2. ஸோளஸஞாணனித்³தே³ஸவண்ணனா
2. Soḷasañāṇaniddesavaṇṇanā
153. ஸோளஸஹி ஆகாரேஹீதி உப⁴யபக்க²வஸேன வுத்தேஹி ஸோளஸஹி ஞாணகொட்டா²ஸேஹி. உது³சிதங் சித்தங் ஸமுது³சிதந்தி உபசாரபூ⁴மியங் சித்தங் உத்³த⁴ங் உசிதங், ஸம்மா உத்³த⁴ங் உசிதங், உபரூபரி கதபரிசயங் ஸம்மா உபரூபரி கதபரிசயந்தி அத்தோ². உது³ஜிதங் சித்தங் ஸமுது³ஜிதந்திபி பாடோ². உபரிபா⁴வாய ஜிதங், உபரிபா⁴வகரேஹி வா ஞாணேஹி ஜிதங் உது³ஜிதங். ஸமுது³ஜிதந்தி ஸமா உபரிபா⁴வாய, உபரிபா⁴வகரேஹி வா ஞாணேஹி ஜிதங். ஸமாதி செத்த² விஸமபா⁴வபடிக்கே²போ. இமஸ்மிங் பாடே² உ, து³-இதி த்³வே த்³வே உபஸக்³கா³ ஹொந்தி. உரூஜிதங் சித்தங் ஸம்மாரூஜிதந்திபி பாடோ². எத்தா²பி ஜிதத்தோ²யேவ. உரூ அரூதி இத³ங் பன நிபாதமத்தமேவாதி வத³ந்தி. வீணோபமட்ட²கதா²ய தஜ்ஜிதங் ஸுதஜ்ஜிதந்தி ச அத்தோ² வுத்தோ, ஸோ இத⁴ ந யுஜ்ஜதி. ஏகத்தே ஸந்திட்ட²தீதி உபசாரபூ⁴மியங் தாவ நானாரம்மணவிக்கே²பாபா⁴வேன ஏகத்தே பதிட்டா²தி. நிய்யானாவரணட்டே²ன நீவரணாதி எத்த² அரதிபி ஸப்³பே³பி அகுஸலா ஆவரணட்டே²ன நீவரணாதி வுத்தா. நிய்யானாவரணட்டே²னாதி நிய்யானானங் ஆக³மனமக்³க³பித³ஹனட்டே²ன. நிய்யானவாரணட்டே²னாதிபி பாடோ², நிய்யானானங் படிக்கே²பனட்டே²னாதி அத்தோ². நெக்க²ம்மங் அரியானங் நிய்யானந்தி மக்³க³ட்டா²னங் அரியானங் நிய்யானஸங்கா²தஸ்ஸ அரியமக்³க³ஸ்ஸ ஹேதுத்தா ப²லூபசாரேன அரியானங் நிய்யானங். தேன ச ஹேதுபூ⁴தேன மக்³க³க்க²ணே அரியா நிய்யந்தி நிக³ச்ச²ந்தி. கேசி பன ‘‘நிய்யானந்தி மக்³கோ³’’தி வத³ந்தி. இத⁴ உபசாரஸ்ஸ அதி⁴ப்பேதத்தா மக்³க³க்க²ணே ச ஆலோகஸஞ்ஞாய ஸப்³ப³குஸலத⁴ம்மானஞ்ச அபா⁴வா தங் ந யுஜ்ஜதி. நிவுதத்தாதி படிச்ச²ன்னத்தா. நப்பஜானாதீதி புக்³க³லவஸேன வுத்தங்.
153.Soḷasahiākārehīti ubhayapakkhavasena vuttehi soḷasahi ñāṇakoṭṭhāsehi. Uducitaṃ cittaṃ samuducitanti upacārabhūmiyaṃ cittaṃ uddhaṃ ucitaṃ, sammā uddhaṃ ucitaṃ, uparūpari kataparicayaṃ sammā uparūpari kataparicayanti attho. Udujitaṃ cittaṃ samudujitantipi pāṭho. Uparibhāvāya jitaṃ, uparibhāvakarehi vā ñāṇehi jitaṃ udujitaṃ. Samudujitanti samā uparibhāvāya, uparibhāvakarehi vā ñāṇehi jitaṃ. Samāti cettha visamabhāvapaṭikkhepo. Imasmiṃ pāṭhe u, du-iti dve dve upasaggā honti. Urūjitaṃ cittaṃ sammārūjitantipi pāṭho. Etthāpi jitatthoyeva. Urū arūti idaṃ pana nipātamattamevāti vadanti. Vīṇopamaṭṭhakathāya tajjitaṃ sutajjitanti ca attho vutto, so idha na yujjati. Ekatte santiṭṭhatīti upacārabhūmiyaṃ tāva nānārammaṇavikkhepābhāvena ekatte patiṭṭhāti. Niyyānāvaraṇaṭṭhena nīvaraṇāti ettha aratipi sabbepi akusalā āvaraṇaṭṭhena nīvaraṇāti vuttā. Niyyānāvaraṇaṭṭhenāti niyyānānaṃ āgamanamaggapidahanaṭṭhena. Niyyānavāraṇaṭṭhenātipi pāṭho, niyyānānaṃ paṭikkhepanaṭṭhenāti attho. Nekkhammaṃ ariyānaṃ niyyānanti maggaṭṭhānaṃ ariyānaṃ niyyānasaṅkhātassa ariyamaggassa hetuttā phalūpacārena ariyānaṃ niyyānaṃ. Tena ca hetubhūtena maggakkhaṇe ariyā niyyanti nigacchanti. Keci pana ‘‘niyyānanti maggo’’ti vadanti. Idha upacārassa adhippetattā maggakkhaṇe ca ālokasaññāya sabbakusaladhammānañca abhāvā taṃ na yujjati. Nivutattāti paṭicchannattā. Nappajānātīti puggalavasena vuttaṃ.
விஸுத்³த⁴சித்தஸ்ஸாதி உபசாரபூ⁴மியங்யேவ. க²ணிகஸமோதா⁴னாதி சித்தக்க²ணே சித்தக்க²ணே உப்பஜ்ஜனதோ க²ணோ ஏதேஸங் அத்தீ²தி க²ணிகா, உபக்கிலேஸா, க²ணிகானங் ஸமோதா⁴னோ ஸமாக³மோ பப³ந்தோ⁴ க²ணிகஸமோதா⁴னோ. தஸ்மா க²ணிகஸமோதா⁴னா, உப்பஜ்ஜமானா உபக்கிலேஸா க²ணிகப்பப³ந்த⁴வஸேன க²ணிகபரம்பராவஸேன உப்பஜ்ஜந்தி, ந ஏகசித்தக்க²ணவஸேனாதி வுத்தங் ஹோதி.
Visuddhacittassāti upacārabhūmiyaṃyeva. Khaṇikasamodhānāti cittakkhaṇe cittakkhaṇe uppajjanato khaṇo etesaṃ atthīti khaṇikā, upakkilesā, khaṇikānaṃ samodhāno samāgamo pabandho khaṇikasamodhāno. Tasmā khaṇikasamodhānā, uppajjamānā upakkilesā khaṇikappabandhavasena khaṇikaparamparāvasena uppajjanti, na ekacittakkhaṇavasenāti vuttaṃ hoti.
ஸோளஸஞாணனித்³தே³ஸவண்ணனா நிட்டி²தா.
Soḷasañāṇaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 2. ஸோளஸஞாணனித்³தே³ஸோ • 2. Soḷasañāṇaniddeso
