| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
2. ஸோளஸஞாணனித்³தே³ஸோ
2. Soḷasañāṇaniddeso
153. இமேஹி ஸோளஸஹி ஆகாரேஹி உது³சித்தங் சித்தங் ஸமுது³சிதங் சித்தங் ஏகத்தே ஸந்திட்ட²தி, நீவரணேஹி விஸுஜ்ஜ²தி. கதமே தே ஏகத்தா? நெக்க²ம்மங் ஏகத்தங், அப்³யாபாதோ³ ஏகத்தங், ஆலோகஸஞ்ஞா ஏகத்தங், அவிக்கே²போ ஏகத்தங், த⁴ம்மவவத்தா²னங் ஏகத்தங், ஞாணங் ஏகத்தங், பாமோஜ்ஜங் ஏகத்தங், ஸப்³பே³பி குஸலா த⁴ம்மா ஏகத்தா.
153. Imehi soḷasahi ākārehi uducittaṃ cittaṃ samuducitaṃ cittaṃ ekatte santiṭṭhati, nīvaraṇehi visujjhati. Katame te ekattā? Nekkhammaṃ ekattaṃ, abyāpādo ekattaṃ, ālokasaññā ekattaṃ, avikkhepo ekattaṃ, dhammavavatthānaṃ ekattaṃ, ñāṇaṃ ekattaṃ, pāmojjaṃ ekattaṃ, sabbepi kusalā dhammā ekattā.
நீவரணாதி, கதமே தே நீவரணா? காமச்ச²ந்தோ³ நீவரணங், ப்³யாபாதோ³ நீவரணங், தி²னமித்³த⁴ங் நீவரணங், உத்³த⁴ச்சகுக்குச்சங் நீவரணங், விசிகிச்சா² நீவரணங், அவிஜ்ஜா நீவரணங், அரதி நீவரணங், ஸப்³பே³பி அகுஸலா த⁴ம்மா நீவரணா.
Nīvaraṇāti, katame te nīvaraṇā? Kāmacchando nīvaraṇaṃ, byāpādo nīvaraṇaṃ, thinamiddhaṃ nīvaraṇaṃ, uddhaccakukkuccaṃ nīvaraṇaṃ, vicikicchā nīvaraṇaṃ, avijjā nīvaraṇaṃ, arati nīvaraṇaṃ, sabbepi akusalā dhammā nīvaraṇā.
நீவரணாதி, கேனட்டே²ன நீவரணா? நிய்யானாவரணட்டே²ன நீவரணா. கதமே தே நிய்யானா? நெக்க²ம்மங் அரியானங் நிய்யானங். தேன ச நெக்க²ம்மேன அரியா நிய்யந்தி. காமச்ச²ந்தோ³ நிய்யானாவரணங். தேன ச காமச்ச²ந்தே³ன நிவுதத்தா நெக்க²ம்மங் அரியானங் நிய்யானங் நப்பஜானாதீதி – காமச்ச²ந்தோ³ நிய்யானாவரணங். அப்³யாபாதோ³ அரியானங் நிய்யானங். தேன ச அப்³யாபாதே³ன அரியா நிய்யந்தி. ப்³யாபாதோ³ நிய்யானாவரணங். தேன ச ப்³யாபாதே³ன நிவுதத்தா அப்³யாபாத³ங் அரியானங் நிய்யானங் நப்பஜானாதீதி – ப்³யாபாதோ³ நிய்யானாவரணங். ஆலோகஸஞ்ஞா அரியானங் நிய்யானங். தாய ச ஆலோகஸஞ்ஞாய அரியா நிய்யந்தி . தி²னமித்³த⁴ங் நிய்யானாவரணங். தேன ச தி²னமித்³தே⁴ன நிவுதத்தா ஆலோகஸஞ்ஞங் அரியானங் நிய்யானங் நப்பஜானாதீதி – தி²னமித்³த⁴ங் நிய்யானாவரணங். அவிக்கே²போ அரியானங் நிய்யானங். தேன ச அவிக்கே²பேன அரியா நிய்யந்தி. உத்³த⁴ச்சங் நிய்யானாவரணங் . தேன ச உத்³த⁴ச்சேன நிவுதத்தா அவிக்கே²பங் அரியானங் நிய்யானங் நப்பஜானாதீதி – உத்³த⁴ச்சங் நிய்யானாவரணங். த⁴ம்மவவத்தா²னங் அரியானங் நிய்யானங். தேன ச த⁴ம்மவவத்தா²னேன அரியா நிய்யந்தி. விசிகிச்சா² நிய்யானாவரணங். தாய ச விசிகிச்சா²ய நிவுதத்தா த⁴ம்மவவத்தா²னங் அரியானங் நிய்யானங் நப்பஜானாதீதி – விசிகிச்சா² நிய்யானாவரணங். ஞாணங் அரியானங் நிய்யானங். தேன ச ஞாணேன அரியா நிய்யந்தி. அவிஜ்ஜா நிய்யானாவரணங். தாய ச அவிஜ்ஜாய நிவுதத்தா ஞாணங் அரியானங் நிய்யானங் நப்பஜானாதீதி – அவிஜ்ஜா நிய்யானாவரணங். பாமோஜ்ஜங் அரியானங் நிய்யானங். தேன ச பாமோஜ்ஜேன அரியா நிய்யந்தி. அரதி நிய்யானாவரணங். தாய ச அரதியா நிவுதத்தா பாமோஜ்ஜங் அரியானங் நிய்யானங் நப்பஜானாதீதி – அரதி நிய்யானாவரணங். ஸப்³பே³பி குஸலா த⁴ம்மா அரியானங் நிய்யானங். தேஹி ச குஸலேஹி த⁴ம்மேஹி அரியா நிய்யந்தி. ஸப்³பே³பி அகுஸலா த⁴ம்மா நிய்யானாவரணா. தேஹி ச அகுஸலேஹி த⁴ம்மேஹி நிவுதத்தா குஸலே த⁴ம்மே அரியானங் நிய்யானங் நப்பஜானாதீதி – ஸப்³பே³பி அகுஸலா த⁴ம்மா நிய்யானாவரணா. இமேஹி ச பன நீவரணேஹி விஸுத்³த⁴சித்தஸ்ஸ ஸோளஸவத்து²கங் ஆனாபானஸ்ஸதிஸமாதி⁴ங் பா⁴வயதோ க²ணிகஸமோதா⁴னா.
Nīvaraṇāti, kenaṭṭhena nīvaraṇā? Niyyānāvaraṇaṭṭhena nīvaraṇā. Katame te niyyānā? Nekkhammaṃ ariyānaṃ niyyānaṃ. Tena ca nekkhammena ariyā niyyanti. Kāmacchando niyyānāvaraṇaṃ. Tena ca kāmacchandena nivutattā nekkhammaṃ ariyānaṃ niyyānaṃ nappajānātīti – kāmacchando niyyānāvaraṇaṃ. Abyāpādo ariyānaṃ niyyānaṃ. Tena ca abyāpādena ariyā niyyanti. Byāpādo niyyānāvaraṇaṃ. Tena ca byāpādena nivutattā abyāpādaṃ ariyānaṃ niyyānaṃ nappajānātīti – byāpādo niyyānāvaraṇaṃ. Ālokasaññā ariyānaṃ niyyānaṃ. Tāya ca ālokasaññāya ariyā niyyanti . Thinamiddhaṃ niyyānāvaraṇaṃ. Tena ca thinamiddhena nivutattā ālokasaññaṃ ariyānaṃ niyyānaṃ nappajānātīti – thinamiddhaṃ niyyānāvaraṇaṃ. Avikkhepo ariyānaṃ niyyānaṃ. Tena ca avikkhepena ariyā niyyanti. Uddhaccaṃ niyyānāvaraṇaṃ . Tena ca uddhaccena nivutattā avikkhepaṃ ariyānaṃ niyyānaṃ nappajānātīti – uddhaccaṃ niyyānāvaraṇaṃ. Dhammavavatthānaṃ ariyānaṃ niyyānaṃ. Tena ca dhammavavatthānena ariyā niyyanti. Vicikicchā niyyānāvaraṇaṃ. Tāya ca vicikicchāya nivutattā dhammavavatthānaṃ ariyānaṃ niyyānaṃ nappajānātīti – vicikicchā niyyānāvaraṇaṃ. Ñāṇaṃ ariyānaṃ niyyānaṃ. Tena ca ñāṇena ariyā niyyanti. Avijjā niyyānāvaraṇaṃ. Tāya ca avijjāya nivutattā ñāṇaṃ ariyānaṃ niyyānaṃ nappajānātīti – avijjā niyyānāvaraṇaṃ. Pāmojjaṃ ariyānaṃ niyyānaṃ. Tena ca pāmojjena ariyā niyyanti. Arati niyyānāvaraṇaṃ. Tāya ca aratiyā nivutattā pāmojjaṃ ariyānaṃ niyyānaṃ nappajānātīti – arati niyyānāvaraṇaṃ. Sabbepi kusalā dhammā ariyānaṃ niyyānaṃ. Tehi ca kusalehi dhammehi ariyā niyyanti. Sabbepi akusalā dhammā niyyānāvaraṇā. Tehi ca akusalehi dhammehi nivutattā kusale dhamme ariyānaṃ niyyānaṃ nappajānātīti – sabbepi akusalā dhammā niyyānāvaraṇā. Imehi ca pana nīvaraṇehi visuddhacittassa soḷasavatthukaṃ ānāpānassatisamādhiṃ bhāvayato khaṇikasamodhānā.
ஸோளஸஞாணனித்³தே³ஸோ து³தியோ.
Soḷasañāṇaniddeso dutiyo.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 2. ஸோளஸஞாணனித்³தே³ஸவண்ணனா • 2. Soḷasañāṇaniddesavaṇṇanā
