| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၂. သောဠသဉာဏနိဒ္ဒေသော
2. Soḷasañāṇaniddeso
၁၅၃. ဣမေဟိ သောဠသဟိ အာကာရေဟိ ဥဒုစိတ္တံ စိတ္တံ သမုဒုစိတံ စိတ္တံ ဧကတ္တေ သန္တိဋ္ဌတိ, နီဝရဏေဟိ ဝိသုဇ္ဈတိ။ ကတမေ တေ ဧကတ္တာ? နေက္ခမ္မံ ဧကတ္တံ, အဗ္ယာပာဒော ဧကတ္တံ, အာလောကသညာ ဧကတ္တံ, အဝိက္ခေပော ဧကတ္တံ, ဓမ္မဝဝတ္ထာနံ ဧကတ္တံ, ဉာဏံ ဧကတ္တံ, ပာမောဇ္ဇံ ဧကတ္တံ, သဗ္ဗေပိ ကုသလာ ဓမ္မာ ဧကတ္တာ။
153. Imehi soḷasahi ākārehi uducittaṃ cittaṃ samuducitaṃ cittaṃ ekatte santiṭṭhati, nīvaraṇehi visujjhati. Katame te ekattā? Nekkhammaṃ ekattaṃ, abyāpādo ekattaṃ, ālokasaññā ekattaṃ, avikkhepo ekattaṃ, dhammavavatthānaṃ ekattaṃ, ñāṇaṃ ekattaṃ, pāmojjaṃ ekattaṃ, sabbepi kusalā dhammā ekattā.
နီဝရဏာတိ, ကတမေ တေ နီဝရဏာ? ကာမစ္ဆန္ဒော နီဝရဏံ, ဗ္ယာပာဒော နီဝရဏံ, ထိနမိဒ္ဓံ နီဝရဏံ, ဥဒ္ဓစ္စကုက္ကုစ္စံ နီဝရဏံ, ဝိစိကိစ္ဆာ နီဝရဏံ, အဝိဇ္ဇာ နီဝရဏံ, အရတိ နီဝရဏံ, သဗ္ဗေပိ အကုသလာ ဓမ္မာ နီဝရဏာ။
Nīvaraṇāti, katame te nīvaraṇā? Kāmacchando nīvaraṇaṃ, byāpādo nīvaraṇaṃ, thinamiddhaṃ nīvaraṇaṃ, uddhaccakukkuccaṃ nīvaraṇaṃ, vicikicchā nīvaraṇaṃ, avijjā nīvaraṇaṃ, arati nīvaraṇaṃ, sabbepi akusalā dhammā nīvaraṇā.
နီဝရဏာတိ, ကေနဋ္ဌေန နီဝရဏာ? နိယ္ယာနာဝရဏဋ္ဌေန နီဝရဏာ။ ကတမေ တေ နိယ္ယာနာ? နေက္ခမ္မံ အရိယာနံ နိယ္ယာနံ။ တေန စ နေက္ခမ္မေန အရိယာ နိယ္ယန္တိ။ ကာမစ္ဆန္ဒော နိယ္ယာနာဝရဏံ။ တေန စ ကာမစ္ဆန္ဒေန နိဝုတတ္တာ နေက္ခမ္မံ အရိယာနံ နိယ္ယာနံ နပ္ပဇာနာတီတိ – ကာမစ္ဆန္ဒော နိယ္ယာနာဝရဏံ။ အဗ္ယာပာဒော အရိယာနံ နိယ္ယာနံ။ တေန စ အဗ္ယာပာဒေန အရိယာ နိယ္ယန္တိ။ ဗ္ယာပာဒော နိယ္ယာနာဝရဏံ။ တေန စ ဗ္ယာပာဒေန နိဝုတတ္တာ အဗ္ယာပာဒံ အရိယာနံ နိယ္ယာနံ နပ္ပဇာနာတီတိ – ဗ္ယာပာဒော နိယ္ယာနာဝရဏံ။ အာလောကသညာ အရိယာနံ နိယ္ယာနံ။ တာယ စ အာလောကသညာယ အရိယာ နိယ္ယန္တိ ။ ထိနမိဒ္ဓံ နိယ္ယာနာဝရဏံ။ တေန စ ထိနမိဒ္ဓေန နိဝုတတ္တာ အာလောကသညံ အရိယာနံ နိယ္ယာနံ နပ္ပဇာနာတီတိ – ထိနမိဒ္ဓံ နိယ္ယာနာဝရဏံ။ အဝိက္ခေပော အရိယာနံ နိယ္ယာနံ။ တေန စ အဝိက္ခေပေန အရိယာ နိယ္ယန္တိ။ ဥဒ္ဓစ္စံ နိယ္ယာနာဝရဏံ ။ တေန စ ဥဒ္ဓစ္စေန နိဝုတတ္တာ အဝိက္ခေပံ အရိယာနံ နိယ္ယာနံ နပ္ပဇာနာတီတိ – ဥဒ္ဓစ္စံ နိယ္ယာနာဝရဏံ။ ဓမ္မဝဝတ္ထာနံ အရိယာနံ နိယ္ယာနံ။ တေန စ ဓမ္မဝဝတ္ထာနေန အရိယာ နိယ္ယန္တိ။ ဝိစိကိစ္ဆာ နိယ္ယာနာဝရဏံ။ တာယ စ ဝိစိကိစ္ဆာယ နိဝုတတ္တာ ဓမ္မဝဝတ္ထာနံ အရိယာနံ နိယ္ယာနံ နပ္ပဇာနာတီတိ – ဝိစိကိစ္ဆာ နိယ္ယာနာဝရဏံ။ ဉာဏံ အရိယာနံ နိယ္ယာနံ။ တေန စ ဉာဏေန အရိယာ နိယ္ယန္တိ။ အဝိဇ္ဇာ နိယ္ယာနာဝရဏံ။ တာယ စ အဝိဇ္ဇာယ နိဝုတတ္တာ ဉာဏံ အရိယာနံ နိယ္ယာနံ နပ္ပဇာနာတီတိ – အဝိဇ္ဇာ နိယ္ယာနာဝရဏံ။ ပာမောဇ္ဇံ အရိယာနံ နိယ္ယာနံ။ တေန စ ပာမောဇ္ဇေန အရိယာ နိယ္ယန္တိ။ အရတိ နိယ္ယာနာဝရဏံ။ တာယ စ အရတိယာ နိဝုတတ္တာ ပာမောဇ္ဇံ အရိယာနံ နိယ္ယာနံ နပ္ပဇာနာတီတိ – အရတိ နိယ္ယာနာဝရဏံ။ သဗ္ဗေပိ ကုသလာ ဓမ္မာ အရိယာနံ နိယ္ယာနံ။ တေဟိ စ ကုသလေဟိ ဓမ္မေဟိ အရိယာ နိယ္ယန္တိ။ သဗ္ဗေပိ အကုသလာ ဓမ္မာ နိယ္ယာနာဝရဏာ။ တေဟိ စ အကုသလေဟိ ဓမ္မေဟိ နိဝုတတ္တာ ကုသလေ ဓမ္မေ အရိယာနံ နိယ္ယာနံ နပ္ပဇာနာတီတိ – သဗ္ဗေပိ အကုသလာ ဓမ္မာ နိယ္ယာနာဝရဏာ။ ဣမေဟိ စ ပန နီဝရဏေဟိ ဝိသုဒ္ဓစိတ္တသ္သ သောဠသဝတ္ထုကံ အာနာပာနသ္သတိသမာဓိံ ဘာဝယတော ခဏိကသမောဓာနာ။
Nīvaraṇāti, kenaṭṭhena nīvaraṇā? Niyyānāvaraṇaṭṭhena nīvaraṇā. Katame te niyyānā? Nekkhammaṃ ariyānaṃ niyyānaṃ. Tena ca nekkhammena ariyā niyyanti. Kāmacchando niyyānāvaraṇaṃ. Tena ca kāmacchandena nivutattā nekkhammaṃ ariyānaṃ niyyānaṃ nappajānātīti – kāmacchando niyyānāvaraṇaṃ. Abyāpādo ariyānaṃ niyyānaṃ. Tena ca abyāpādena ariyā niyyanti. Byāpādo niyyānāvaraṇaṃ. Tena ca byāpādena nivutattā abyāpādaṃ ariyānaṃ niyyānaṃ nappajānātīti – byāpādo niyyānāvaraṇaṃ. Ālokasaññā ariyānaṃ niyyānaṃ. Tāya ca ālokasaññāya ariyā niyyanti . Thinamiddhaṃ niyyānāvaraṇaṃ. Tena ca thinamiddhena nivutattā ālokasaññaṃ ariyānaṃ niyyānaṃ nappajānātīti – thinamiddhaṃ niyyānāvaraṇaṃ. Avikkhepo ariyānaṃ niyyānaṃ. Tena ca avikkhepena ariyā niyyanti. Uddhaccaṃ niyyānāvaraṇaṃ . Tena ca uddhaccena nivutattā avikkhepaṃ ariyānaṃ niyyānaṃ nappajānātīti – uddhaccaṃ niyyānāvaraṇaṃ. Dhammavavatthānaṃ ariyānaṃ niyyānaṃ. Tena ca dhammavavatthānena ariyā niyyanti. Vicikicchā niyyānāvaraṇaṃ. Tāya ca vicikicchāya nivutattā dhammavavatthānaṃ ariyānaṃ niyyānaṃ nappajānātīti – vicikicchā niyyānāvaraṇaṃ. Ñāṇaṃ ariyānaṃ niyyānaṃ. Tena ca ñāṇena ariyā niyyanti. Avijjā niyyānāvaraṇaṃ. Tāya ca avijjāya nivutattā ñāṇaṃ ariyānaṃ niyyānaṃ nappajānātīti – avijjā niyyānāvaraṇaṃ. Pāmojjaṃ ariyānaṃ niyyānaṃ. Tena ca pāmojjena ariyā niyyanti. Arati niyyānāvaraṇaṃ. Tāya ca aratiyā nivutattā pāmojjaṃ ariyānaṃ niyyānaṃ nappajānātīti – arati niyyānāvaraṇaṃ. Sabbepi kusalā dhammā ariyānaṃ niyyānaṃ. Tehi ca kusalehi dhammehi ariyā niyyanti. Sabbepi akusalā dhammā niyyānāvaraṇā. Tehi ca akusalehi dhammehi nivutattā kusale dhamme ariyānaṃ niyyānaṃ nappajānātīti – sabbepi akusalā dhammā niyyānāvaraṇā. Imehi ca pana nīvaraṇehi visuddhacittassa soḷasavatthukaṃ ānāpānassatisamādhiṃ bhāvayato khaṇikasamodhānā.
သောဠသဉာဏနိဒ္ဒေသော ဒုတိယော။
Soḷasañāṇaniddeso dutiyo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၂. သောဠသဉာဏနိဒ္ဒေသဝဏ္ဏနာ • 2. Soḷasañāṇaniddesavaṇṇanā
