| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༢. སོལ༹སཉཱཎནིདྡེསོ
2. Soḷasañāṇaniddeso
༡༥༣. ཨིམེཧི སོལ༹སཧི ཨཱཀཱརེཧི ཨུདུཙིཏྟཾ ཙིཏྟཾ སམུདུཙིཏཾ ཙིཏྟཾ ཨེཀཏྟེ སནྟིཊྛཏི, ནཱིཝརཎེཧི ཝིསུཛ྄ཛྷཏི། ཀཏམེ ཏེ ཨེཀཏྟཱ? ནེཀྑམྨཾ ཨེཀཏྟཾ, ཨབྱཱཔཱདོ ཨེཀཏྟཾ, ཨཱལོཀསཉྙཱ ཨེཀཏྟཾ, ཨཝིཀྑེཔོ ཨེཀཏྟཾ, དྷམྨཝཝཏྠཱནཾ ཨེཀཏྟཾ, ཉཱཎཾ ཨེཀཏྟཾ, པཱམོཛྫཾ ཨེཀཏྟཾ, སབྦེཔི ཀུསལཱ དྷམྨཱ ཨེཀཏྟཱ།
153. Imehi soḷasahi ākārehi uducittaṃ cittaṃ samuducitaṃ cittaṃ ekatte santiṭṭhati, nīvaraṇehi visujjhati. Katame te ekattā? Nekkhammaṃ ekattaṃ, abyāpādo ekattaṃ, ālokasaññā ekattaṃ, avikkhepo ekattaṃ, dhammavavatthānaṃ ekattaṃ, ñāṇaṃ ekattaṃ, pāmojjaṃ ekattaṃ, sabbepi kusalā dhammā ekattā.
ནཱིཝརཎཱཏི, ཀཏམེ ཏེ ནཱིཝརཎཱ? ཀཱམཙྪནྡོ ནཱིཝརཎཾ, བྱཱཔཱདོ ནཱིཝརཎཾ, ཐིནམིདྡྷཾ ནཱིཝརཎཾ, ཨུདྡྷཙྩཀུཀྐུཙྩཾ ནཱིཝརཎཾ, ཝིཙིཀིཙྪཱ ནཱིཝརཎཾ, ཨཝིཛྫཱ ནཱིཝརཎཾ, ཨརཏི ནཱིཝརཎཾ, སབྦེཔི ཨཀུསལཱ དྷམྨཱ ནཱིཝརཎཱ།
Nīvaraṇāti, katame te nīvaraṇā? Kāmacchando nīvaraṇaṃ, byāpādo nīvaraṇaṃ, thinamiddhaṃ nīvaraṇaṃ, uddhaccakukkuccaṃ nīvaraṇaṃ, vicikicchā nīvaraṇaṃ, avijjā nīvaraṇaṃ, arati nīvaraṇaṃ, sabbepi akusalā dhammā nīvaraṇā.
ནཱིཝརཎཱཏི, ཀེནཊྛེན ནཱིཝརཎཱ? ནིཡྻཱནཱཝརཎཊྛེན ནཱིཝརཎཱ། ཀཏམེ ཏེ ནིཡྻཱནཱ? ནེཀྑམྨཾ ཨརིཡཱནཾ ནིཡྻཱནཾ། ཏེན ཙ ནེཀྑམྨེན ཨརིཡཱ ནིཡྻནྟི། ཀཱམཙྪནྡོ ནིཡྻཱནཱཝརཎཾ། ཏེན ཙ ཀཱམཙྪནྡེན ནིཝུཏཏྟཱ ནེཀྑམྨཾ ཨརིཡཱནཾ ནིཡྻཱནཾ ནཔྤཛཱནཱཏཱིཏི – ཀཱམཙྪནྡོ ནིཡྻཱནཱཝརཎཾ། ཨབྱཱཔཱདོ ཨརིཡཱནཾ ནིཡྻཱནཾ། ཏེན ཙ ཨབྱཱཔཱདེན ཨརིཡཱ ནིཡྻནྟི། བྱཱཔཱདོ ནིཡྻཱནཱཝརཎཾ། ཏེན ཙ བྱཱཔཱདེན ནིཝུཏཏྟཱ ཨབྱཱཔཱདཾ ཨརིཡཱནཾ ནིཡྻཱནཾ ནཔྤཛཱནཱཏཱིཏི – བྱཱཔཱདོ ནིཡྻཱནཱཝརཎཾ། ཨཱལོཀསཉྙཱ ཨརིཡཱནཾ ནིཡྻཱནཾ། ཏཱཡ ཙ ཨཱལོཀསཉྙཱཡ ཨརིཡཱ ནིཡྻནྟི ། ཐིནམིདྡྷཾ ནིཡྻཱནཱཝརཎཾ། ཏེན ཙ ཐིནམིདྡྷེན ནིཝུཏཏྟཱ ཨཱལོཀསཉྙཾ ཨརིཡཱནཾ ནིཡྻཱནཾ ནཔྤཛཱནཱཏཱིཏི – ཐིནམིདྡྷཾ ནིཡྻཱནཱཝརཎཾ། ཨཝིཀྑེཔོ ཨརིཡཱནཾ ནིཡྻཱནཾ། ཏེན ཙ ཨཝིཀྑེཔེན ཨརིཡཱ ནིཡྻནྟི། ཨུདྡྷཙྩཾ ནིཡྻཱནཱཝརཎཾ ། ཏེན ཙ ཨུདྡྷཙྩེན ནིཝུཏཏྟཱ ཨཝིཀྑེཔཾ ཨརིཡཱནཾ ནིཡྻཱནཾ ནཔྤཛཱནཱཏཱིཏི – ཨུདྡྷཙྩཾ ནིཡྻཱནཱཝརཎཾ། དྷམྨཝཝཏྠཱནཾ ཨརིཡཱནཾ ནིཡྻཱནཾ། ཏེན ཙ དྷམྨཝཝཏྠཱནེན ཨརིཡཱ ནིཡྻནྟི། ཝིཙིཀིཙྪཱ ནིཡྻཱནཱཝརཎཾ། ཏཱཡ ཙ ཝིཙིཀིཙྪཱཡ ནིཝུཏཏྟཱ དྷམྨཝཝཏྠཱནཾ ཨརིཡཱནཾ ནིཡྻཱནཾ ནཔྤཛཱནཱཏཱིཏི – ཝིཙིཀིཙྪཱ ནིཡྻཱནཱཝརཎཾ། ཉཱཎཾ ཨརིཡཱནཾ ནིཡྻཱནཾ། ཏེན ཙ ཉཱཎེན ཨརིཡཱ ནིཡྻནྟི། ཨཝིཛྫཱ ནིཡྻཱནཱཝརཎཾ། ཏཱཡ ཙ ཨཝིཛྫཱཡ ནིཝུཏཏྟཱ ཉཱཎཾ ཨརིཡཱནཾ ནིཡྻཱནཾ ནཔྤཛཱནཱཏཱིཏི – ཨཝིཛྫཱ ནིཡྻཱནཱཝརཎཾ། པཱམོཛྫཾ ཨརིཡཱནཾ ནིཡྻཱནཾ། ཏེན ཙ པཱམོཛྫེན ཨརིཡཱ ནིཡྻནྟི། ཨརཏི ནིཡྻཱནཱཝརཎཾ། ཏཱཡ ཙ ཨརཏིཡཱ ནིཝུཏཏྟཱ པཱམོཛྫཾ ཨརིཡཱནཾ ནིཡྻཱནཾ ནཔྤཛཱནཱཏཱིཏི – ཨརཏི ནིཡྻཱནཱཝརཎཾ། སབྦེཔི ཀུསལཱ དྷམྨཱ ཨརིཡཱནཾ ནིཡྻཱནཾ། ཏེཧི ཙ ཀུསལེཧི དྷམྨེཧི ཨརིཡཱ ནིཡྻནྟི། སབྦེཔི ཨཀུསལཱ དྷམྨཱ ནིཡྻཱནཱཝརཎཱ། ཏེཧི ཙ ཨཀུསལེཧི དྷམྨེཧི ནིཝུཏཏྟཱ ཀུསལེ དྷམྨེ ཨརིཡཱནཾ ནིཡྻཱནཾ ནཔྤཛཱནཱཏཱིཏི – སབྦེཔི ཨཀུསལཱ དྷམྨཱ ནིཡྻཱནཱཝརཎཱ། ཨིམེཧི ཙ པན ནཱིཝརཎེཧི ཝིསུདྡྷཙིཏྟསྶ སོལ༹སཝཏྠུཀཾ ཨཱནཱཔཱནསྶཏིསམཱདྷིཾ བྷཱཝཡཏོ ཁཎིཀསམོདྷཱནཱ།
Nīvaraṇāti, kenaṭṭhena nīvaraṇā? Niyyānāvaraṇaṭṭhena nīvaraṇā. Katame te niyyānā? Nekkhammaṃ ariyānaṃ niyyānaṃ. Tena ca nekkhammena ariyā niyyanti. Kāmacchando niyyānāvaraṇaṃ. Tena ca kāmacchandena nivutattā nekkhammaṃ ariyānaṃ niyyānaṃ nappajānātīti – kāmacchando niyyānāvaraṇaṃ. Abyāpādo ariyānaṃ niyyānaṃ. Tena ca abyāpādena ariyā niyyanti. Byāpādo niyyānāvaraṇaṃ. Tena ca byāpādena nivutattā abyāpādaṃ ariyānaṃ niyyānaṃ nappajānātīti – byāpādo niyyānāvaraṇaṃ. Ālokasaññā ariyānaṃ niyyānaṃ. Tāya ca ālokasaññāya ariyā niyyanti . Thinamiddhaṃ niyyānāvaraṇaṃ. Tena ca thinamiddhena nivutattā ālokasaññaṃ ariyānaṃ niyyānaṃ nappajānātīti – thinamiddhaṃ niyyānāvaraṇaṃ. Avikkhepo ariyānaṃ niyyānaṃ. Tena ca avikkhepena ariyā niyyanti. Uddhaccaṃ niyyānāvaraṇaṃ . Tena ca uddhaccena nivutattā avikkhepaṃ ariyānaṃ niyyānaṃ nappajānātīti – uddhaccaṃ niyyānāvaraṇaṃ. Dhammavavatthānaṃ ariyānaṃ niyyānaṃ. Tena ca dhammavavatthānena ariyā niyyanti. Vicikicchā niyyānāvaraṇaṃ. Tāya ca vicikicchāya nivutattā dhammavavatthānaṃ ariyānaṃ niyyānaṃ nappajānātīti – vicikicchā niyyānāvaraṇaṃ. Ñāṇaṃ ariyānaṃ niyyānaṃ. Tena ca ñāṇena ariyā niyyanti. Avijjā niyyānāvaraṇaṃ. Tāya ca avijjāya nivutattā ñāṇaṃ ariyānaṃ niyyānaṃ nappajānātīti – avijjā niyyānāvaraṇaṃ. Pāmojjaṃ ariyānaṃ niyyānaṃ. Tena ca pāmojjena ariyā niyyanti. Arati niyyānāvaraṇaṃ. Tāya ca aratiyā nivutattā pāmojjaṃ ariyānaṃ niyyānaṃ nappajānātīti – arati niyyānāvaraṇaṃ. Sabbepi kusalā dhammā ariyānaṃ niyyānaṃ. Tehi ca kusalehi dhammehi ariyā niyyanti. Sabbepi akusalā dhammā niyyānāvaraṇā. Tehi ca akusalehi dhammehi nivutattā kusale dhamme ariyānaṃ niyyānaṃ nappajānātīti – sabbepi akusalā dhammā niyyānāvaraṇā. Imehi ca pana nīvaraṇehi visuddhacittassa soḷasavatthukaṃ ānāpānassatisamādhiṃ bhāvayato khaṇikasamodhānā.
སོལ༹སཉཱཎནིདྡེསོ དུཏིཡོ།
Soḷasañāṇaniddeso dutiyo.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༢. སོལ༹སཉཱཎནིདྡེསཝཎྞནཱ • 2. Soḷasañāṇaniddesavaṇṇanā
