| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༡. སོལ༹སཔཉྙཱནིདྡེསོ
1. Soḷasapaññāniddeso
༤. པཉྙཱཔཊིལཱབྷཱཡ སཾཝཏྟནྟཱིཏི ཀཏམོ པཉྙཱཔཊིལཱབྷོ? ཙཏུནྣཾ མགྒཉཱཎཱནཾ, ཙཏུནྣཾ ཕལཉཱཎཱནཾ, ཙཏུནྣཾ པཊིསམྦྷིདཱཉཱཎཱནཾ, ཚནྣཾ ཨབྷིཉྙཱཉཱཎཱནཾ, ཏེསཏྟཏཱིནཾ ཉཱཎཱནཾ, སཏྟསཏྟཏཱིནཾ ཉཱཎཱནཾ ལཱབྷོ པཊིལཱབྷོ པཏྟི སམྤཏྟི ཕསྶནཱ 1 སཙྪིཀིརིཡཱ ཨུཔསམྤདཱ། པཉྙཱཔཊིལཱབྷཱཡ སཾཝཏྟནྟཱིཏི – ཨཡཾ པཉྙཱ པཊིལཱབྷོ།
4.Paññāpaṭilābhāya saṃvattantīti katamo paññāpaṭilābho? Catunnaṃ maggañāṇānaṃ, catunnaṃ phalañāṇānaṃ, catunnaṃ paṭisambhidāñāṇānaṃ, channaṃ abhiññāñāṇānaṃ, tesattatīnaṃ ñāṇānaṃ, sattasattatīnaṃ ñāṇānaṃ lābho paṭilābho patti sampatti phassanā 2 sacchikiriyā upasampadā. Paññāpaṭilābhāya saṃvattantīti – ayaṃ paññā paṭilābho.
པཉྙཱབུདྡྷིཡཱ སཾཝཏྟནྟཱིཏི ཀཏམཱ པཉྙཱབུདྡྷི? སཏྟནྣཉྩ སེཀྑཱནཾ པུཐུཛྫནཀལྱཱཎཀསྶ ཙ པཉྙཱ ཝཌྜྷཏི, ཨརཧཏོ པཉྙཱ ཝཌྜྷཏི། ཝཌྜྷིཏཝཌྜྷནཱ པཉྙཱབུདྡྷིཡཱ སཾཝཏྟནྟཱིཏི – ཨཡཾ པཉྙཱབུདྡྷི།
Paññābuddhiyāsaṃvattantīti katamā paññābuddhi? Sattannañca sekkhānaṃ puthujjanakalyāṇakassa ca paññā vaḍḍhati, arahato paññā vaḍḍhati. Vaḍḍhitavaḍḍhanā paññābuddhiyā saṃvattantīti – ayaṃ paññābuddhi.
པཉྙཱཝེཔུལླཱཡ སཾཝཏྟནྟཱིཏི ཀཏམཾ པཉྙཱཝེཔུལླཾ? སཏྟནྣཾ སེཀྑཱནཾ པུཐུཛྫནཀལྱཱཎཀསྶ ཙ པཉྙཱཝེཔུལླཾ གཙྪཏི། ཨརཧཏོ པཉྙཱ ཝེཔུལླགཏཱ པཉྙཱཝེཔུལླཱཡ སཾཝཏྟནྟཱིཏི – ཨིདཾ པཉྙཱཝེཔུལླཾ།
Paññāvepullāya saṃvattantīti katamaṃ paññāvepullaṃ? Sattannaṃ sekkhānaṃ puthujjanakalyāṇakassa ca paññāvepullaṃ gacchati. Arahato paññā vepullagatā paññāvepullāya saṃvattantīti – idaṃ paññāvepullaṃ.
མཧཱཔཉྙཏཱཡ སཾཝཏྟནྟཱིཏི ཀཏམཱ མཧཱཔཉྙཱ? མཧནྟེ ཨཏྠེ པརིགྒཎྷཱཏཱིཏི – མཧཱཔཉྙཱ། མཧནྟེ དྷམྨེ པརིགྒཎྷཱཏཱིཏི – མཧཱཔཉྙཱ། མཧནྟཱ ནིརུཏྟིཡོ པརིགྒཎྷཱཏཱིཏི – མཧཱཔཉྙཱ། མཧནྟཱནི པཊིབྷཱནཱནི པརིགྒཎྷཱཏཱིཏི – མཧཱཔཉྙཱ། མཧནྟེ སཱིལཀྑནྡྷེ པརིགྒཎྷཱཏཱིཏི – མཧཱཔཉྙཱ། མཧནྟེ སམཱདྷིཀྑནྡྷེ པརིགྒཎྷཱཏཱིཏི – མཧཱཔཉྙཱ། མཧནྟེ པཉྙཱཀྑནྡྷེ པརིགྒཎྷཱཏཱིཏི – མཧཱཔཉྙཱ། མཧནྟེ ཝིམུཏྟིཀྑནྡྷེ པརིགྒཎྷཱཏཱིཏི – མཧཱཔཉྙཱ ། མཧནྟེ ཝིམུཏྟིཉཱཎདསྶནཀྑནྡྷེ པརིགྒཎྷཱཏཱིཏི – མཧཱཔཉྙཱ། མཧནྟཱནི ཋཱནཱཊྛཱནཱནི པརིགྒཎྷཱཏཱིཏི – མཧཱཔཉྙཱ། མཧནྟཱ ཝིཧཱརསམཱཔཏྟིཡོ པརིགྒཎྷཱཏཱིཏི – མཧཱཔཉྙཱ། མཧནྟཱནི ཨརིཡསཙྩཱནི པརིགྒཎྷཱཏཱིཏི – མཧཱཔཉྙཱ། མཧནྟེ སཏིཔཊྛཱནེ པརིགྒཎྷཱཏཱིཏི – མཧཱཔཉྙཱ། མཧནྟེ སམྨཔྤདྷཱནེ པརིགྒཎྷཱཏཱིཏི – མཧཱཔཉྙཱ། མཧནྟེ ཨིདྡྷིཔཱདེ པརིགྒཎྷཱཏཱིཏི – མཧཱཔཉྙཱ། མཧནྟཱནི ཨིནྡྲིཡཱནི པརིགྒཎྷཱཏཱིཏི – མཧཱཔཉྙཱ། མཧནྟཱནི བལཱནི པརིགྒཎྷཱཏཱིཏི – མཧཱཔཉྙཱ། མཧནྟེ བོཛ྄ཛྷངྒེ པརིགྒཎྷཱཏཱིཏི – མཧཱཔཉྙཱ། མཧནྟཾ ཨརིཡམགྒཾ 3 པརིགྒཎྷཱཏཱིཏི – མཧཱཔཉྙཱ། མཧནྟཱནི སཱམཉྙཕལཱནི པརིགྒཎྷཱཏཱིཏི – མཧཱཔཉྙཱ། མཧནྟཱ ཨབྷིཉྙཱཡོ 4 པརིགྒཎྷཱཏཱིཏི – མཧཱཔཉྙཱ། མཧནྟཾ པརམཏྠཾ ནིབྦཱནཾ པརིགྒཎྷཱཏཱིཏི – མཧཱཔཉྙཱ། མཧཱཔཉྙཏཱཡ སཾཝཏྟནྟཱིཏི – ཨཡཾ མཧཱཔཉྙཱ།
Mahāpaññatāya saṃvattantīti katamā mahāpaññā? Mahante atthe pariggaṇhātīti – mahāpaññā. Mahante dhamme pariggaṇhātīti – mahāpaññā. Mahantā niruttiyo pariggaṇhātīti – mahāpaññā. Mahantāni paṭibhānāni pariggaṇhātīti – mahāpaññā. Mahante sīlakkhandhe pariggaṇhātīti – mahāpaññā. Mahante samādhikkhandhe pariggaṇhātīti – mahāpaññā. Mahante paññākkhandhe pariggaṇhātīti – mahāpaññā. Mahante vimuttikkhandhe pariggaṇhātīti – mahāpaññā . Mahante vimuttiñāṇadassanakkhandhe pariggaṇhātīti – mahāpaññā. Mahantāni ṭhānāṭṭhānāni pariggaṇhātīti – mahāpaññā. Mahantā vihārasamāpattiyo pariggaṇhātīti – mahāpaññā. Mahantāni ariyasaccāni pariggaṇhātīti – mahāpaññā. Mahante satipaṭṭhāne pariggaṇhātīti – mahāpaññā. Mahante sammappadhāne pariggaṇhātīti – mahāpaññā. Mahante iddhipāde pariggaṇhātīti – mahāpaññā. Mahantāni indriyāni pariggaṇhātīti – mahāpaññā. Mahantāni balāni pariggaṇhātīti – mahāpaññā. Mahante bojjhaṅge pariggaṇhātīti – mahāpaññā. Mahantaṃ ariyamaggaṃ 5 pariggaṇhātīti – mahāpaññā. Mahantāni sāmaññaphalāni pariggaṇhātīti – mahāpaññā. Mahantā abhiññāyo 6 pariggaṇhātīti – mahāpaññā. Mahantaṃ paramatthaṃ nibbānaṃ pariggaṇhātīti – mahāpaññā. Mahāpaññatāya saṃvattantīti – ayaṃ mahāpaññā.
པུཐུཔཉྙཏཱཡ སཾཝཏྟནྟཱིཏི ཀཏམཱ པུཐུཔཉྙཱ? པུཐུནཱནཱཁནྡྷེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱདྷཱཏཱུསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཨཱཡཏནེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཔཊིཙྩསམུཔྤཱདེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱསུཉྙཏམནུཔལབྦྷེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཨཏྠེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱདྷམྨེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱནིརུཏྟཱིསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཔཊིབྷཱནེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱསཱིལཀྑནྡྷེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱསམཱདྷིཀྑནྡྷེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཔཉྙཱཀྑནྡྷེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཝིམུཏྟིཀྑནྡྷེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཝིམུཏྟིཉཱཎདསྶནཀྑནྡྷེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཋཱནཱཊྛཱནེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཝིཧཱརསམཱཔཏྟཱིསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཨརིཡསཙྩེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱསཏིཔཊྛཱནེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱསམྨཔྤདྷཱནེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཨིདྡྷིཔཱདེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཨིནྡྲིཡེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱབལེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱབོཛ྄ཛྷངྒེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཨརིཡམགྒེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱསཱམཉྙཕལེསུ ཉཱཎཾ པཝཏྟཏཱིཏི – པུཐུཔཉྙཱ། པུཐུནཱནཱཨབྷིཉྙཱསུ ཉཱཎཾ པཝཏྟཏཱིཏི – པུཐུཔཉྙཱ། པུཐུཛྫནསཱདྷཱརཎེ དྷམྨེ ཨཏིཀྐམྨ 7 པརམཏྠེ ནིབྦཱནེ ཉཱཎཾ པཝཏྟཏཱིཏི – པུཐུཔཉྙཱ། པུཐུཔཉྙཏཱཡ སཾཝཏྟནྟཱིཏི – ཨཡཾ པུཐུཔཉྙཱ།
Puthupaññatāya saṃvattantīti katamā puthupaññā? Puthunānākhandhesu ñāṇaṃ pavattatīti – puthupaññā. Puthunānādhātūsu ñāṇaṃ pavattatīti – puthupaññā. Puthunānāāyatanesu ñāṇaṃ pavattatīti – puthupaññā. Puthunānāpaṭiccasamuppādesu ñāṇaṃ pavattatīti – puthupaññā. Puthunānāsuññatamanupalabbhesu ñāṇaṃ pavattatīti – puthupaññā. Puthunānāatthesu ñāṇaṃ pavattatīti – puthupaññā. Puthunānādhammesu ñāṇaṃ pavattatīti – puthupaññā. Puthunānāniruttīsu ñāṇaṃ pavattatīti – puthupaññā. Puthunānāpaṭibhānesu ñāṇaṃ pavattatīti – puthupaññā. Puthunānāsīlakkhandhesu ñāṇaṃ pavattatīti – puthupaññā. Puthunānāsamādhikkhandhesu ñāṇaṃ pavattatīti – puthupaññā. Puthunānāpaññākkhandhesu ñāṇaṃ pavattatīti – puthupaññā. Puthunānāvimuttikkhandhesu ñāṇaṃ pavattatīti – puthupaññā. Puthunānāvimuttiñāṇadassanakkhandhesu ñāṇaṃ pavattatīti – puthupaññā. Puthunānāṭhānāṭṭhānesu ñāṇaṃ pavattatīti – puthupaññā. Puthunānāvihārasamāpattīsu ñāṇaṃ pavattatīti – puthupaññā. Puthunānāariyasaccesu ñāṇaṃ pavattatīti – puthupaññā. Puthunānāsatipaṭṭhānesu ñāṇaṃ pavattatīti – puthupaññā. Puthunānāsammappadhānesu ñāṇaṃ pavattatīti – puthupaññā. Puthunānāiddhipādesu ñāṇaṃ pavattatīti – puthupaññā. Puthunānāindriyesu ñāṇaṃ pavattatīti – puthupaññā. Puthunānābalesu ñāṇaṃ pavattatīti – puthupaññā. Puthunānābojjhaṅgesu ñāṇaṃ pavattatīti – puthupaññā. Puthunānāariyamaggesu ñāṇaṃ pavattatīti – puthupaññā. Puthunānāsāmaññaphalesu ñāṇaṃ pavattatīti – puthupaññā. Puthunānāabhiññāsu ñāṇaṃ pavattatīti – puthupaññā. Puthujjanasādhāraṇe dhamme atikkamma 8 paramatthe nibbāne ñāṇaṃ pavattatīti – puthupaññā. Puthupaññatāya saṃvattantīti – ayaṃ puthupaññā.
ཝིཔུལཔཉྙཏཱཡ སཾཝཏྟནྟཱིཏི ཀཏམཱ ཝིཔུལཔཉྙཱ? ཝིཔུལེ ཨཏྠེ པརིགྒཎྷཱཏཱིཏི – ཝིཔུལཔཉྙཱ། ཝིཔུལེ དྷམྨེ པརིགྒཎྷཱཏཱིཏི – ཝིཔུལཔཉྙཱ། ཝིཔུལཱ ནིརུཏྟིཡོ པརིགྒཎྷཱཏཱིཏི – ཝིཔུལཔཉྙཱ། ཝིཔུལཱནི པཊིབྷཱནཱནི པརིགྒཎྷཱཏཱིཏི – ཝིཔུལཔཉྙཱ། ཝིཔུལེ སཱིལཀྑནྡྷེ པརིགྒཎྷཱཏཱིཏི – ཝིཔུལཔཉྙཱ། ཝིཔུལེ སམཱདྷིཀྑནྡྷེ པརིགྒཎྷཱཏཱིཏི – ཝིཔུལཔཉྙཱ། ཝིཔུལེ པཉྙཱཀྑནྡྷེ པརིགྒཎྷཱཏཱིཏི – ཝིཔུལཔཉྙཱ། ཝིཔུལེ ཝིམུཏྟིཀྑནྡྷེ པརིགྒཎྷཱཏཱིཏི – ཝིཔུལཔཉྙཱ། ཝིཔུལེ ཝིམུཏྟིཉཱཎདསྶནཀྑནྡྷེ པརིགྒཎྷཱཏཱིཏི – ཝིཔུལཔཉྙཱ། ཝིཔུལཱནི ཋཱནཱཊྛཱནཱནི པརིགྒཎྷཱཏཱིཏི – ཝིཔུལཔཉྙཱ། ཝིཔུལཱ ཝིཧཱརསམཱཔཏྟིཡོ པརིགྒཎྷཱཏཱིཏི – ཝིཔུལཔཉྙཱ། ཝིཔུལཱནི ཨརིཡསཙྩཱནི པརིགྒཎྷཱཏཱིཏི – ཝིཔུལཔཉྙཱ། ཝིཔུལེ སཏིཔཊྛཱནེ པརིགྒཎྷཱཏཱིཏི – ཝིཔུལཔཉྙཱ། ཝིཔུལེ སམྨཔྤདྷཱནེ པརིགྒཎྷཱཏཱིཏི – ཝིཔུལཔཉྙཱ། ཝིཔུལེ ཨིདྡྷིཔཱདེ པརིགྒཎྷཱཏཱིཏི – ཝིཔུལཔཉྙཱ། ཝིཔུལཱནི ཨིནྡྲིཡཱནི པརིགྒཎྷཱཏཱིཏི – ཝིཔུལཔཉྙཱ། ཝིཔུལཱནི བལཱནི པརིགྒཎྷཱཏཱིཏི – ཝིཔུལཔཉྙཱ། ཝིཔུལེ བོཛ྄ཛྷངྒེ པརིགྒཎྷཱཏཱིཏི – ཝིཔུལཔཉྙཱ། ཝིཔུལེ ཨརིཡམགྒེ པརིགྒཎྷཱཏཱིཏི – ཝིཔུལཔཉྙཱ། ཝིཔུལཱནི སཱམཉྙཕལཱནི པརིགྒཎྷཱཏཱིཏི – ཝིཔུལཔཉྙཱ། ཝིཔུལཱ ཨབྷིཉྙཱཡོ པརིགྒཎྷཱཏཱིཏི – ཝིཔུལཔཉྙཱ། ཝིཔུལཾ པརམཏྠཾ ནིབྦཱནཾ པརིགྒཎྷཱཏཱིཏི – ཝིཔུལཔཉྙཱ། ཝིཔུལཔཉྙཏཱཡ སཾཝཏྟནྟཱིཏི – ཨཡཾ ཝིཔུལཔཉྙཱ།
Vipulapaññatāyasaṃvattantīti katamā vipulapaññā? Vipule atthe pariggaṇhātīti – vipulapaññā. Vipule dhamme pariggaṇhātīti – vipulapaññā. Vipulā niruttiyo pariggaṇhātīti – vipulapaññā. Vipulāni paṭibhānāni pariggaṇhātīti – vipulapaññā. Vipule sīlakkhandhe pariggaṇhātīti – vipulapaññā. Vipule samādhikkhandhe pariggaṇhātīti – vipulapaññā. Vipule paññākkhandhe pariggaṇhātīti – vipulapaññā. Vipule vimuttikkhandhe pariggaṇhātīti – vipulapaññā. Vipule vimuttiñāṇadassanakkhandhe pariggaṇhātīti – vipulapaññā. Vipulāni ṭhānāṭṭhānāni pariggaṇhātīti – vipulapaññā. Vipulā vihārasamāpattiyo pariggaṇhātīti – vipulapaññā. Vipulāni ariyasaccāni pariggaṇhātīti – vipulapaññā. Vipule satipaṭṭhāne pariggaṇhātīti – vipulapaññā. Vipule sammappadhāne pariggaṇhātīti – vipulapaññā. Vipule iddhipāde pariggaṇhātīti – vipulapaññā. Vipulāni indriyāni pariggaṇhātīti – vipulapaññā. Vipulāni balāni pariggaṇhātīti – vipulapaññā. Vipule bojjhaṅge pariggaṇhātīti – vipulapaññā. Vipule ariyamagge pariggaṇhātīti – vipulapaññā. Vipulāni sāmaññaphalāni pariggaṇhātīti – vipulapaññā. Vipulā abhiññāyo pariggaṇhātīti – vipulapaññā. Vipulaṃ paramatthaṃ nibbānaṃ pariggaṇhātīti – vipulapaññā. Vipulapaññatāya saṃvattantīti – ayaṃ vipulapaññā.
གམྦྷཱིརཔཉྙཏཱཡ སཾཝཏྟནྟཱིཏི ཀཏམཱ གམྦྷཱིརཔཉྙཱ? གམྦྷཱིརེསུ ཁནྡྷེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརཱསུ དྷཱཏཱུསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ ཨཱཡཏནེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ པཊིཙྩསམུཔྤཱདེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ སུཉྙཏམནུཔལབྦྷེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ ཨཏྠེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ དྷམྨེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརཱསུ ནིརུཏྟཱིསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ པཊིབྷཱནེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ སཱིལཀྑནྡྷེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ སམཱདྷིཀྑནྡྷེསུ ཉཱཎཾ པཝཏྟཏཱིཏི – གམྦྷཱིརཔཉྙཱ ། གམྦྷཱིརེསུ པཉྙཱཀྑནྡྷེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ ཝིམུཏྟིཀྑནྡྷེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ ཝིམུཏྟིཉཱཎདསྶནཀྑནྡྷེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ ཋཱནཱཊྛཱནེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརཱསུ ཝིཧཱརསམཱཔཏྟཱིསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ ཨརིཡསཙྩེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ སཏིཔཊྛཱནེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ སམྨཔྤདྷཱནེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ ཨིདྡྷིཔཱདེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ ཨིནྡྲིཡེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ བལེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ བོཛ྄ཛྷངྒེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ ཨརིཡམགྒེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེསུ སཱམཉྙཕལེསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརཱསུ ཨབྷིཉྙཱསུ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརེ པརམཏྠེ ནིབྦཱནེ ཉཱཎཾ པཝཏྟཏཱིཏི – གམྦྷཱིརཔཉྙཱ། གམྦྷཱིརཔཉྙཏཱཡ སཾཝཏྟནྟཱིཏི – ཨཡཾ གམྦྷཱིརཔཉྙཱ།
Gambhīrapaññatāya saṃvattantīti katamā gambhīrapaññā? Gambhīresu khandhesu ñāṇaṃ pavattatīti – gambhīrapaññā. Gambhīrāsu dhātūsu ñāṇaṃ pavattatīti – gambhīrapaññā. Gambhīresu āyatanesu ñāṇaṃ pavattatīti – gambhīrapaññā. Gambhīresu paṭiccasamuppādesu ñāṇaṃ pavattatīti – gambhīrapaññā. Gambhīresu suññatamanupalabbhesu ñāṇaṃ pavattatīti – gambhīrapaññā. Gambhīresu atthesu ñāṇaṃ pavattatīti – gambhīrapaññā. Gambhīresu dhammesu ñāṇaṃ pavattatīti – gambhīrapaññā. Gambhīrāsu niruttīsu ñāṇaṃ pavattatīti – gambhīrapaññā. Gambhīresu paṭibhānesu ñāṇaṃ pavattatīti – gambhīrapaññā. Gambhīresu sīlakkhandhesu ñāṇaṃ pavattatīti – gambhīrapaññā. Gambhīresu samādhikkhandhesu ñāṇaṃ pavattatīti – gambhīrapaññā . Gambhīresu paññākkhandhesu ñāṇaṃ pavattatīti – gambhīrapaññā. Gambhīresu vimuttikkhandhesu ñāṇaṃ pavattatīti – gambhīrapaññā. Gambhīresu vimuttiñāṇadassanakkhandhesu ñāṇaṃ pavattatīti – gambhīrapaññā. Gambhīresu ṭhānāṭṭhānesu ñāṇaṃ pavattatīti – gambhīrapaññā. Gambhīrāsu vihārasamāpattīsu ñāṇaṃ pavattatīti – gambhīrapaññā. Gambhīresu ariyasaccesu ñāṇaṃ pavattatīti – gambhīrapaññā. Gambhīresu satipaṭṭhānesu ñāṇaṃ pavattatīti – gambhīrapaññā. Gambhīresu sammappadhānesu ñāṇaṃ pavattatīti – gambhīrapaññā. Gambhīresu iddhipādesu ñāṇaṃ pavattatīti – gambhīrapaññā. Gambhīresu indriyesu ñāṇaṃ pavattatīti – gambhīrapaññā. Gambhīresu balesu ñāṇaṃ pavattatīti – gambhīrapaññā. Gambhīresu bojjhaṅgesu ñāṇaṃ pavattatīti – gambhīrapaññā. Gambhīresu ariyamaggesu ñāṇaṃ pavattatīti – gambhīrapaññā. Gambhīresu sāmaññaphalesu ñāṇaṃ pavattatīti – gambhīrapaññā. Gambhīrāsu abhiññāsu ñāṇaṃ pavattatīti – gambhīrapaññā. Gambhīre paramatthe nibbāne ñāṇaṃ pavattatīti – gambhīrapaññā. Gambhīrapaññatāya saṃvattantīti – ayaṃ gambhīrapaññā.
ཨསཱམནྟཔཉྙཏཱཡ སཾཝཏྟནྟཱིཏི ཀཏམཱ ཨསཱམནྟཔཉྙཱ? ཡསྶ པུགྒལསྶ ཨཏྠཝཝཏྠཱནཏོ ཨཏྠཔཊིསམྦྷིདཱ ཨདྷིགཏཱ ཧོཏི སཙྪིཀཏཱ ཕསྶིཏཱ པཉྙཱཡ, དྷམྨཝཝཏྠཱནཏོ དྷམྨཔཊིསམྦྷིདཱ ཨདྷིགཏཱ ཧོཏི སཙྪིཀཏཱ ཕསྶིཏཱ པཉྙཱཡ, ནིརུཏྟིཝཝཏྠཱནཏོ ནིརུཏྟིཔཊིསམྦྷིདཱ ཨདྷིགཏཱ ཧོཏི སཙྪིཀཏཱ ཕསྶིཏཱ པཉྙཱཡ, པཊིབྷཱནཝཝཏྠཱནཏོ པཊིབྷཱནཔཊིསམྦྷིདཱ ཨདྷིགཏཱ ཧོཏི སཙྪིཀཏཱ ཕསྶིཏཱ པཉྙཱཡ, ཏསྶ ཨཏྠེ ཙ དྷམྨེ ཙ ནིརུཏྟིཡཱ ཙ པཊིབྷཱནེ ཙ ན ཨཉྙོ ཀོཙི སཀྐོཏི ཨབྷིསམྦྷཝིཏུཾ། ཨནབྷིསམྦྷཝནཱིཡོ ཙ སོ ཨཉྙེཧཱིཏི – ཨསཱམནྟཔཉྙོ།
Asāmantapaññatāya saṃvattantīti katamā asāmantapaññā? Yassa puggalassa atthavavatthānato atthapaṭisambhidā adhigatā hoti sacchikatā phassitā paññāya, dhammavavatthānato dhammapaṭisambhidā adhigatā hoti sacchikatā phassitā paññāya, niruttivavatthānato niruttipaṭisambhidā adhigatā hoti sacchikatā phassitā paññāya, paṭibhānavavatthānato paṭibhānapaṭisambhidā adhigatā hoti sacchikatā phassitā paññāya, tassa atthe ca dhamme ca niruttiyā ca paṭibhāne ca na añño koci sakkoti abhisambhavituṃ. Anabhisambhavanīyo ca so aññehīti – asāmantapañño.
པུཐུཛྫནཀལྱཱཎཀསྶ པཉྙཱ ཨཊྛམཀསྶ པཉྙཱཡ དཱུརེ ཝིདཱུརེ སུཝིདཱུརེ ན སནྟིཀེ ན སཱམནྟཱ། པུཐུཛྫནཀལྱཱཎཀཾ ཨུཔཱདཱཡ ཨཊྛམཀོ ཨསཱམནྟཔཉྙོ། ཨཊྛམཀསྶ པཉྙཱ སོཏཱཔནྣསྶ པཉྙཱཡ དཱུརེ ཝིདཱུརེ སུཝིདཱུརེ ན སནྟིཀེ ན སཱམནྟཱ། ཨཊྛམཀཾ ཨུཔཱདཱཡ སོཏཱཔནྣོ ཨསཱམནྟཔཉྙོ། སོཏཱཔནྣསྶ པཉྙཱ སཀདཱགཱམིསྶ པཉྙཱཡ དཱུརེ ཝིདཱུརེ སུཝིདཱུརེ ན སནྟིཀེ ན སཱམནྟཱ། སོཏཱཔནྣཾ ཨུཔཱདཱཡ སཀདཱགཱམི ཨསཱམནྟཔཉྙོ། སཀདཱགཱམིསྶ པཉྙཱ ཨནཱགཱམིསྶ པཉྙཱཡ དཱུརེ ཝིདཱུརེ སུཝིདཱུརེ ན སནྟིཀེ ན སཱམནྟཱ། སཀདཱགཱམིཾ ཨུཔཱདཱཡ ཨནཱགཱམཱི ཨསཱམནྟཔཉྙོ། ཨནཱགཱམིསྶ པཉྙཱ ཨརཧཏོ པཉྙཱཡ དཱུརེ ཝིདཱུརེ སུཝིདཱུརེ ན སནྟིཀེ ན སཱམནྟཱ། ཨནཱགཱམིཾ ཨུཔཱདཱཡ ཨརཧཱ ཨསཱམནྟཔཉྙོ། ཨརཧཏོ པཉྙཱ པཙྩེཀསམྦུདྡྷསྶ 9 པཉྙཱཡ དཱུརེ ཝིདཱུརེ སུཝིདཱུརེ ན སནྟིཀེ ན སཱམནྟཱ། ཨརཧནྟཾ ཨུཔཱདཱཡ པཙྩེཀབུདྡྷོ ཨསཱམནྟཔཉྙོ། པཙྩེཀབུདྡྷཉྩ སདེཝཀཉྩ ལོཀཾ ཨུཔཱདཱཡ ཏཐཱགཏོ ཨརཧཾ སམྨཱསམྦུདྡྷོ ཨགྒོ ཨསཱམནྟཔཉྙོ།
Puthujjanakalyāṇakassa paññā aṭṭhamakassa paññāya dūre vidūre suvidūre na santike na sāmantā. Puthujjanakalyāṇakaṃ upādāya aṭṭhamako asāmantapañño. Aṭṭhamakassa paññā sotāpannassa paññāya dūre vidūre suvidūre na santike na sāmantā. Aṭṭhamakaṃ upādāya sotāpanno asāmantapañño. Sotāpannassa paññā sakadāgāmissa paññāya dūre vidūre suvidūre na santike na sāmantā. Sotāpannaṃ upādāya sakadāgāmi asāmantapañño. Sakadāgāmissa paññā anāgāmissa paññāya dūre vidūre suvidūre na santike na sāmantā. Sakadāgāmiṃ upādāya anāgāmī asāmantapañño. Anāgāmissa paññā arahato paññāya dūre vidūre suvidūre na santike na sāmantā. Anāgāmiṃ upādāya arahā asāmantapañño. Arahato paññā paccekasambuddhassa 10 paññāya dūre vidūre suvidūre na santike na sāmantā. Arahantaṃ upādāya paccekabuddho asāmantapañño. Paccekabuddhañca sadevakañca lokaṃ upādāya tathāgato arahaṃ sammāsambuddho aggo asāmantapañño.
༥. པཉྙཱཔབྷེདཀུསལོ པབྷིནྣཉཱཎོ ཨདྷིགཏཔྤཊིསམྦྷིདོ ཙཏུཝེསཱརཛྫཔྤཏྟོ དསབལདྷཱརཱི པུརིསཱསབྷོ པུརིསསཱིཧོ པུརིསནཱགོ པུརིསཱཛཉྙོ པུརིསདྷོརཡ྄ཧོ ཨནནྟཉཱཎོ ཨནནྟཏེཛོ ཨནནྟཡསོ ཨཌྜྷོ མཧདྡྷནོ དྷནཝཱ ནེཏཱ ཝིནེཏཱ ཨནུནེཏཱ པཉྙཱཔེཏཱ ནིཛ྄ཛྷཱཔེཏཱ པེཀྑེཏཱ པསཱདེཏཱ། སོ ཧི བྷགཝཱ ཨནུཔྤནྣསྶ མགྒསྶ ཨུཔྤཱདེཏཱ, ཨསཉྫཱཏསྶ མགྒསྶ སཉྫནེཏཱ 11, ཨནཀྑཱཏསྶ མགྒསྶ ཨཀྑཱཏཱ, མགྒཉྙཱུ མགྒཝིདཱུ མགྒཀོཝིདོ མགྒཱནུགཱམཱི 12 ཙ པནསྶ ཨེཏརཧི སཱཝཀཱ ཝིཧརནྟི པཙྪཱ སམནྣཱགཏཱ།
5. Paññāpabhedakusalo pabhinnañāṇo adhigatappaṭisambhido catuvesārajjappatto dasabaladhārī purisāsabho purisasīho purisanāgo purisājañño purisadhorayho anantañāṇo anantatejo anantayaso aḍḍho mahaddhano dhanavā netā vinetā anunetā paññāpetā nijjhāpetā pekkhetā pasādetā. So hi bhagavā anuppannassa maggassa uppādetā, asañjātassa maggassa sañjanetā 13, anakkhātassa maggassa akkhātā, maggaññū maggavidū maggakovido maggānugāmī 14 ca panassa etarahi sāvakā viharanti pacchā samannāgatā.
སོ ཧི བྷགཝཱ ཛཱནཾ ཛཱནཱཏི, པསྶཾ པསྶཏི, ཙཀྑུབྷཱུཏོ ཉཱཎབྷཱུཏོ དྷམྨབྷཱུཏོ བྲཧྨབྷཱུཏོ ཝཏྟཱ པཝཏྟཱ ཨཏྠསྶ ནིནྣེཏཱ ཨམཏསྶ དཱཏཱ དྷམྨསྶཱམཱི ཏཐཱགཏོ། ནཏྠི ཏསྶ བྷགཝཏོ ཨཉྙཱཏཾ ཨདིཊྛཾ ཨཝིདིཏཾ ཨསཙྪིཀཏཾ ཨཕསྶིཏཾ པཉྙཱཡ། ཨཏཱིཏཾ ཨནཱགཏཾ པཙྩུཔྤནྣཾ 15 ཨུཔཱདཱཡ སབྦེ དྷམྨཱ སབྦཱཀཱརེན བུདྡྷསྶ བྷགཝཏོ ཉཱཎམུཁེ ཨཱཔཱཐཾ ཨཱགཙྪནྟི། ཡཾ ཀིཉྩི ནེཡྻཾ ནཱམ ཨཏྠི ཏཾ སབྦཾ ཛཱནིཏབྦཾ 16། ཨཏྟཏྠོ ཝཱ པརཏྠོ ཝཱ ཨུབྷཡཏྠོ ཝཱ དིཊྛདྷམྨིཀོ ཝཱ ཨཏྠོ སམྤརཱཡིཀོ ཝཱ ཨཏྠོ ཨུཏྟཱནོ ཝཱ ཨཏྠོ གམྦྷཱིརོ ཝཱ ཨཏྠོ གཱུལ༹ྷོ ཝཱ ཨཏྠོ པཊིཙྪནྣོ ཝཱ ཨཏྠོ ནེཡྻོ ཝཱ ཨཏྠོ ནཱིཏོ ཝཱ ཨཏྠོ ཨནཝཛྫོ ཝཱ ཨཏྠོ ནིཀྐིལེསོ ཝཱ ཨཏྠོ ཝོདཱནོ ཝཱ ཨཏྠོ པརམཏྠོ ཝཱ ཨཏྠོ, སབྦཾ ཏཾ ཨནྟོབུདྡྷཉཱཎེ པརིཝཏྟཏི།
So hi bhagavā jānaṃ jānāti, passaṃ passati, cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammassāmī tathāgato. Natthi tassa bhagavato aññātaṃ adiṭṭhaṃ aviditaṃ asacchikataṃ aphassitaṃ paññāya. Atītaṃ anāgataṃ paccuppannaṃ 17 upādāya sabbe dhammā sabbākārena buddhassa bhagavato ñāṇamukhe āpāthaṃ āgacchanti. Yaṃ kiñci neyyaṃ nāma atthi taṃ sabbaṃ jānitabbaṃ 18. Attattho vā parattho vā ubhayattho vā diṭṭhadhammiko vā attho samparāyiko vā attho uttāno vā attho gambhīro vā attho gūḷho vā attho paṭicchanno vā attho neyyo vā attho nīto vā attho anavajjo vā attho nikkileso vā attho vodāno vā attho paramattho vā attho, sabbaṃ taṃ antobuddhañāṇe parivattati.
སབྦཾ ཀཱཡཀམྨཾ བུདྡྷསྶ བྷགཝཏོ ཉཱཎཱནུཔརིཝཏྟི ། སབྦཾ ཝཙཱིཀམྨཾ བུདྡྷསྶ བྷགཝཏོ ཉཱཎཱནུཔརིཝཏྟི། སབྦཾ མནོཀམྨཾ བུདྡྷསྶ བྷགཝཏོ ཉཱཎཱནུཔརིཝཏྟི། ཨཏཱིཏེ བུདྡྷསྶ བྷགཝཏོ ཨཔྤཊིཧཏཾ ཉཱཎཾ། ཨནཱགཏེ བུདྡྷསྶ བྷགཝཏོ ཨཔྤཊིཧཏཾ ཉཱཎཾ། པཙྩུཔྤནྣེ བུདྡྷསྶ བྷགཝཏོ ཨཔྤཊིཧཏཾ ཉཱཎཾ། ཡཱཝཏཀཾ ནེཡྻཾ ཏཱཝཏཀཾ ཉཱཎཾ, ཡཱཝཏཀཾ ཉཱཎཾ ཏཱཝཏཀཾ ནེཡྻཾ། ནེཡྻཔརིཡནྟིཀཾ ཉཱཎཾ, ཉཱཎཔརིཡནྟིཀཾ ནེཡྻཾ། ནེཡྻཾ ཨཏིཀྐམིཏྭཱ ཉཱཎཾ ནཔྤཝཏྟཏི། ཉཱཎཾ ཨཏིཀྐམིཏྭཱ ནེཡྻཔཐོ ནཏྠི། ཨཉྙམཉྙཔརིཡནྟཊྛཱཡིནོ ཏེ དྷམྨཱ། ཡཐཱ དྭིནྣཾ སམུགྒཔཊལཱནཾ སམྨཱ ཕུསིཏཱནཾ 19 ཧེཊྛིམཾ སམུགྒཔཊལཾ ཨུཔརིམཾ ནཱཏིཝཏྟཏི, ཨུཔརིམཾ སམུགྒཔཊལཾ ཧེཊྛིམཾ ནཱཏིཝཏྟཏི, ཨཉྙམཉྙཔརིཡནྟཊྛཱཡིནོ; ཨེཝམེཝ བུདྡྷསྶ བྷགཝཏོ ནེཡྻཉྩ ཉཱཎཉྩ ཨཉྙམཉྙཔརིཡནྟཊྛཱཡིནོ། ཡཱཝཏཀཾ ནེཡྻཾ ཏཱཝཏཀཾ ཉཱཎཾ, ཡཱཝཏཀཾ ཉཱཎཾ ཏཱཝཏཀཾ ནེཡྻཾ། ནེཡྻཔརིཡནྟིཀཾ ཉཱཎཾ, ཉཱཎཔརིཡནྟིཀཾ ནེཡྻཾ། ནེཡྻཾ ཨཏིཀྐམིཏྭཱ ཉཱཎཾ ནཔྤཝཏྟཏི། ཉཱཎཾ ཨཏིཀྐམིཏྭཱ ནེཡྻཔཐོ ནཏྠི། ཨཉྙམཉྙཔརིཡནྟཊྛཱཡིནོ ཏེ དྷམྨཱ། སབྦདྷམྨེསུ བུདྡྷསྶ བྷགཝཏོ ཉཱཎཾ པཝཏྟཏི།
Sabbaṃ kāyakammaṃ buddhassa bhagavato ñāṇānuparivatti . Sabbaṃ vacīkammaṃ buddhassa bhagavato ñāṇānuparivatti. Sabbaṃ manokammaṃ buddhassa bhagavato ñāṇānuparivatti. Atīte buddhassa bhagavato appaṭihataṃ ñāṇaṃ. Anāgate buddhassa bhagavato appaṭihataṃ ñāṇaṃ. Paccuppanne buddhassa bhagavato appaṭihataṃ ñāṇaṃ. Yāvatakaṃ neyyaṃ tāvatakaṃ ñāṇaṃ, yāvatakaṃ ñāṇaṃ tāvatakaṃ neyyaṃ. Neyyapariyantikaṃ ñāṇaṃ, ñāṇapariyantikaṃ neyyaṃ. Neyyaṃ atikkamitvā ñāṇaṃ nappavattati. Ñāṇaṃ atikkamitvā neyyapatho natthi. Aññamaññapariyantaṭṭhāyino te dhammā. Yathā dvinnaṃ samuggapaṭalānaṃ sammā phusitānaṃ 20 heṭṭhimaṃ samuggapaṭalaṃ uparimaṃ nātivattati, uparimaṃ samuggapaṭalaṃ heṭṭhimaṃ nātivattati, aññamaññapariyantaṭṭhāyino; evameva buddhassa bhagavato neyyañca ñāṇañca aññamaññapariyantaṭṭhāyino. Yāvatakaṃ neyyaṃ tāvatakaṃ ñāṇaṃ, yāvatakaṃ ñāṇaṃ tāvatakaṃ neyyaṃ. Neyyapariyantikaṃ ñāṇaṃ, ñāṇapariyantikaṃ neyyaṃ. Neyyaṃ atikkamitvā ñāṇaṃ nappavattati. Ñāṇaṃ atikkamitvā neyyapatho natthi. Aññamaññapariyantaṭṭhāyino te dhammā. Sabbadhammesu buddhassa bhagavato ñāṇaṃ pavattati.
སབྦེ དྷམྨཱ བུདྡྷསྶ བྷགཝཏོ ཨཱཝཛྫནཔྤཊིབདྡྷཱ ཨཱཀངྑཔྤཊིབདྡྷཱ མནསིཀཱརཔྤཊིབདྡྷཱ ཙིཏྟུཔྤཱདཔྤཊིབདྡྷཱ། སབྦསཏྟེསུ བུདྡྷསྶ བྷགཝཏོ ཉཱཎཾ པཝཏྟཏི། སབྦེསཾ སཏྟཱནཾ བུདྡྷོ ཨཱསཡཾ ཛཱནཱཏི, ཨནུསཡཾ ཛཱནཱཏི, ཙརིཏཾ 21 ཛཱནཱཏི, ཨདྷིམུཏྟིཾ ཛཱནཱཏི ། ཨཔྤརཛཀྑེ མཧཱརཛཀྑེ ཏིཀྑིནྡྲིཡེ མུདིནྡྲིཡེ སྭཱཀཱརེ དྭཱཀཱརེ སུཝིཉྙཱཔཡེ དུཝིཉྙཱཔཡེ བྷབྦཱབྷབྦེ སཏྟེ པཛཱནཱཏི། སདེཝཀོ ལོཀོ སམཱརཀོ སབྲཧྨཀོ སསྶམཎབྲཱཧྨཎཱི པཛཱ སདེཝམནུསྶཱ ཨནྟོབུདྡྷཉཱཎེ པརིཝཏྟཏི།
Sabbe dhammā buddhassa bhagavato āvajjanappaṭibaddhā ākaṅkhappaṭibaddhā manasikārappaṭibaddhā cittuppādappaṭibaddhā. Sabbasattesu buddhassa bhagavato ñāṇaṃ pavattati. Sabbesaṃ sattānaṃ buddho āsayaṃ jānāti, anusayaṃ jānāti, caritaṃ 22 jānāti, adhimuttiṃ jānāti . Apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye bhabbābhabbe satte pajānāti. Sadevako loko samārako sabrahmako sassamaṇabrāhmaṇī pajā sadevamanussā antobuddhañāṇe parivattati.
ཡཐཱ ཡེ ཀེཙི མཙྪཀཙྪཔཱ, ཨནྟམསོ ཏིམིཏིམིངྒལཾ ཨུཔཱདཱཡ, ཨནྟོམཧཱསམུདྡེ པརིཝཏྟནྟི, ཨེཝམེཝཾ སདེཝཀོ ལོཀོ སམཱརཀོ སབྲཧྨཀོ སསྶམཎབྲཱཧྨཎཱི པཛཱ སདེཝམནུསྶཱ ཨནྟོབུདྡྷཉཱཎེ པརིཝཏྟཏི། ཡཐཱ ཡེ ཀེཙི པཀྑིནོ, ཨནྟམསོ གརུལ༹ཾ ཝེནཏེཡྻཾ ཨུཔཱདཱཡ, ཨཱཀཱསསྶ པདེསེ པརིཝཏྟནྟི; ཨེཝམེཝ ཡེཔི ཏེ སཱརིཔུཏྟསམཱ པཉྙཱཡ ཏེཔི བུདྡྷཉཱཎསྶ པདེསེ པརིཝཏྟནྟི། བུདྡྷཉཱཎཾ དེཝམནུསྶཱནཾ པཉྙཾ ཕརིཏྭཱ ཨཏིགྷཾསིཏྭཱ ཏིཊྛཏི། ཡེཔི ཏེ ཁཏྟིཡཔཎྜིཏཱ བྲཱཧྨཎཔཎྜིཏཱ གཧཔཏིཔཎྜིཏཱ སམཎཔཎྜིཏཱ ནིཔུཎཱ ཀཏཔརཔྤཝཱདཱ ཝཱལཝེདྷིརཱུཔཱ ཝོབྷིནྡནྟཱ 23 མཉྙེ ཙརནྟི པཉྙཱགཏེན དིཊྛིགཏཱནི, ཏེ པཉྷཾ ཨབྷིསངྑརིཏྭཱ ཨབྷིསངྑརིཏྭཱ ཏཐཱགཏཾ ཨུཔསངྐམིཏྭཱ པུཙྪནྟི གཱུལ༹ྷཱནི ཙ པཊིཙྪནྣཱནི ཙ, ཀཐིཏཱ ཝིསཛྫིཏཱ ཙ ཏེ པཉྷཱ བྷགཝཏཱ ཧོནྟི ནིདྡིཊྛཀཱརཎཱ 24། ཨུཔཀྑིཏྟཀཱ ཙ ཏེ བྷགཝཏོ སམྤཛྫནྟི། ཨཐ ཁོ བྷགཝཱ ཏཏྠ ཨཏིརོཙཏི ཡདིདཾ པཉྙཱཡཱཏི། ཨགྒོ ཨསཱམནྟཔཉྙོ, ཨསཱམནྟཔཉྙཏཱཡ སཾཝཏྟནྟཱིཏི – ཨཡཾ ཨསཱམནྟཔཉྙཱ།
Yathā ye keci macchakacchapā, antamaso timitimiṅgalaṃ upādāya, antomahāsamudde parivattanti, evamevaṃ sadevako loko samārako sabrahmako sassamaṇabrāhmaṇī pajā sadevamanussā antobuddhañāṇe parivattati. Yathā ye keci pakkhino, antamaso garuḷaṃ venateyyaṃ upādāya, ākāsassa padese parivattanti; evameva yepi te sāriputtasamā paññāya tepi buddhañāṇassa padese parivattanti. Buddhañāṇaṃ devamanussānaṃ paññaṃ pharitvā atighaṃsitvā tiṭṭhati. Yepi te khattiyapaṇḍitā brāhmaṇapaṇḍitā gahapatipaṇḍitā samaṇapaṇḍitā nipuṇā kataparappavādā vālavedhirūpā vobhindantā 25 maññe caranti paññāgatena diṭṭhigatāni, te pañhaṃ abhisaṅkharitvā abhisaṅkharitvā tathāgataṃ upasaṅkamitvā pucchanti gūḷhāni ca paṭicchannāni ca, kathitā visajjitā ca te pañhā bhagavatā honti niddiṭṭhakāraṇā 26. Upakkhittakā ca te bhagavato sampajjanti. Atha kho bhagavā tattha atirocati yadidaṃ paññāyāti. Aggo asāmantapañño, asāmantapaññatāya saṃvattantīti – ayaṃ asāmantapaññā.
༦. བྷཱུརིཔཉྙཏཱཡ སཾཝཏྟནྟཱིཏི ཀཏམཱ བྷཱུརིཔཉྙཱ? རཱགཾ ཨབྷིབྷུཡྻཏཱིཏི – བྷཱུརིཔཉྙཱ། ཨབྷིབྷཝིཏཱཏི – བྷཱུརིཔཉྙཱ། དོསཾ ཨབྷིབྷུཡྻཏཱིཏི – བྷཱུརིཔཉྙཱ། ཨབྷིབྷཝིཏཱཏི – བྷཱུརིཔཉྙཱ། མོཧཾ ཨབྷིབྷུཡྻཏཱིཏི – བྷཱུརིཔཉྙཱ། ཨབྷིབྷཝིཏཱཏི – བྷཱུརིཔཉྙཱ། ཀོདྷཾ…པེ॰… ཨུཔནཱཧཾ … མཀྑཾ… པལཱ༹སཾ… ཨིསྶཾ… མཙྪརིཡཾ… མཱཡཾ… སཱཋེཡྻཾ… ཐམྦྷཾ… སཱརམྦྷཾ… མཱནཾ… ཨཏིམཱནཾ… མདཾ… པམཱདཾ… སབྦེ ཀིལེསེ… སབྦེ དུཙྩརིཏེ… སབྦེ ཨབྷིསངྑཱརེ…པེ॰… སབྦེ བྷཝགཱམིཀམྨེ ཨབྷིབྷུཡྻཏཱིཏི – བྷཱུརིཔཉྙཱ། ཨབྷིབྷཝིཏཱཏི – བྷཱུརིཔཉྙཱ། རཱགོ ཨརི། ཏཾ ཨརིཾ མདྡནིཔཉྙཱཏི – བྷཱུརིཔཉྙཱ། དོསོ ཨརི། ཏཾ ཨརིཾ མདྡནིཔཉྙཱཏི – བྷཱུརིཔཉྙཱ། མོཧོ ཨརི། ཏཾ ཨརིཾ མདྡནིཔཉྙཱཏི – བྷཱུརིཔཉྙཱ། ཀོདྷོ…པེ॰… ཨུཔནཱཧོ… མཀྑོ… པལཱ༹སོ… ཨིསྶཱ… མཙྪརིཡཾ… མཱཡཱ… སཱཋེཡྻཾ… ཐམྦྷོ… སཱརམྦྷོ… མཱནོ… ཨཏིམཱནོ… མདོ… པམཱདོ… སབྦེ ཀིལེསཱ… སབྦེ དུཙྩརིཏཱ… སབྦེ ཨབྷིསངྑཱརཱ…པེ॰… སབྦེ བྷཝགཱམིཀམྨཱ ཨརི། ཏཾ ཨརིཾ མདྡནིཔཉྙཱཏི – བྷཱུརིཔཉྙཱ། བྷཱུརི ཝུཙྩཏི པཐཝཱི 27། ཏཱཡ པཐཝིསམཱཡ ཝིཏྠཏཱཡ ཝིཔུལཱཡ པཉྙཱཡ སམནྣཱགཏོཏི – བྷཱུརིཔཉྙཱ། ཨཔི ཙ, པཉྙཱཡ མེཏཾ ཨདྷིཝཙནཾ། བྷཱུརི མེདྷཱ པརིཎཱཡིཀཱཏི – བྷཱུརིཔཉྙཱ། བྷཱུརིཔཉྙཏཱཡ སཾཝཏྟནྟཱིཏི – ཨཡཾ བྷཱུརིཔཉྙཱ།
6.Bhūripaññatāyasaṃvattantīti katamā bhūripaññā? Rāgaṃ abhibhuyyatīti – bhūripaññā. Abhibhavitāti – bhūripaññā. Dosaṃ abhibhuyyatīti – bhūripaññā. Abhibhavitāti – bhūripaññā. Mohaṃ abhibhuyyatīti – bhūripaññā. Abhibhavitāti – bhūripaññā. Kodhaṃ…pe… upanāhaṃ … makkhaṃ… paḷāsaṃ… issaṃ… macchariyaṃ… māyaṃ… sāṭheyyaṃ… thambhaṃ… sārambhaṃ… mānaṃ… atimānaṃ… madaṃ… pamādaṃ… sabbe kilese… sabbe duccarite… sabbe abhisaṅkhāre…pe… sabbe bhavagāmikamme abhibhuyyatīti – bhūripaññā. Abhibhavitāti – bhūripaññā. Rāgo ari. Taṃ ariṃ maddanipaññāti – bhūripaññā. Doso ari. Taṃ ariṃ maddanipaññāti – bhūripaññā. Moho ari. Taṃ ariṃ maddanipaññāti – bhūripaññā. Kodho…pe… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe abhisaṅkhārā…pe… sabbe bhavagāmikammā ari. Taṃ ariṃ maddanipaññāti – bhūripaññā. Bhūri vuccati pathavī 28. Tāya pathavisamāya vitthatāya vipulāya paññāya samannāgatoti – bhūripaññā. Api ca, paññāya metaṃ adhivacanaṃ. Bhūri medhā pariṇāyikāti – bhūripaññā. Bhūripaññatāya saṃvattantīti – ayaṃ bhūripaññā.
པཉྙཱབཱཧུལླཱཡ སཾཝཏྟནྟཱིཏི ཀཏམཾ པཉྙཱབཱཧུལླཾ? ཨིདྷེཀཙྩོ པཉྙཱགརུཀོ ཧོཏི པཉྙཱཙརིཏོ པཉྙཱསཡོ པཉྙཱདྷིམུཏྟོ པཉྙཱདྷཛོ པཉྙཱཀེཏུ པཉྙཱདྷིཔཏེཡྻོ ཝིཙཡབཧུལོ པཝིཙཡབཧུལོ ཨོཀྑཱཡནབཧུལོ སམོཀྑཱཡནབཧུལོ 29 སམྤེཀྑཱཡནདྷམྨོ ཝིབྷཱུཏཝིཧཱརཱི ཏཙྩརིཏོ ཏགྒརུཀོ ཏབྦཧུལོ ཏནྣིནྣོ ཏཔྤོཎོ ཏཔྤབྦྷཱརོ ཏདདྷིམུཏྟོ ཏདདྷིཔཏེཡྻོ། ཡཐཱ གཎགརུཀོ ཝུཙྩཏི ‘‘གཎབཱཧུལིཀོ’’ཏི, ཙཱིཝརགརུཀོ ཝུཙྩཏི ‘‘ཙཱིཝརབཱཧུལིཀོ’’ཏི, པཏྟགརུཀོ ཝུཙྩཏི ‘‘པཏྟབཱཧུལིཀོ’’ཏི, སེནཱསནགརུཀོ ཝུཙྩཏི ‘‘སེནཱསནབཱཧུལིཀོ’’ཏི; ཨེཝམེཝཾ ཨིདྷེཀཙྩོ པཉྙཱ གརུཀོ ཧོཏི པཉྙཱཙརིཏོ པཉྙཱསཡོ པཉྙཱདྷིམུཏྟོ པཉྙཱདྷཛོ པཉྙཱཀེཏུ པཉྙཱདྷིཔཏེཡྻོ ཝིཙཡབཧུལོ པཝིཙཡབཧུལོ ཨོཀྑཱཡནབཧུལོ སམོཀྑཱཡནབཧུལོ སམྤེཀྑཱཡནདྷམྨོ ཝིབྷཱུཏཝིཧཱརཱི ཏཙྩརིཏོ ཏགྒརུཀོ ཏབྦཧུལོ ཏནྣིནྣོ ཏཔྤོཎོ ཏཔྤབྦྷཱརོ ཏདདྷིམུཏྟོ ཏདདྷིཔཏེཡྻོ། པཉྙཱབཱཧུལླཱཡ སཾཝཏྟནྟཱིཏི – ཨིདཾ པཉྙཱབཱཧུལླཾ།
Paññābāhullāyasaṃvattantīti katamaṃ paññābāhullaṃ? Idhekacco paññāgaruko hoti paññācarito paññāsayo paññādhimutto paññādhajo paññāketu paññādhipateyyo vicayabahulo pavicayabahulo okkhāyanabahulo samokkhāyanabahulo 30 sampekkhāyanadhammo vibhūtavihārī taccarito taggaruko tabbahulo tanninno tappoṇo tappabbhāro tadadhimutto tadadhipateyyo. Yathā gaṇagaruko vuccati ‘‘gaṇabāhuliko’’ti, cīvaragaruko vuccati ‘‘cīvarabāhuliko’’ti, pattagaruko vuccati ‘‘pattabāhuliko’’ti, senāsanagaruko vuccati ‘‘senāsanabāhuliko’’ti; evamevaṃ idhekacco paññā garuko hoti paññācarito paññāsayo paññādhimutto paññādhajo paññāketu paññādhipateyyo vicayabahulo pavicayabahulo okkhāyanabahulo samokkhāyanabahulo sampekkhāyanadhammo vibhūtavihārī taccarito taggaruko tabbahulo tanninno tappoṇo tappabbhāro tadadhimutto tadadhipateyyo. Paññābāhullāya saṃvattantīti – idaṃ paññābāhullaṃ.
སཱིགྷཔཉྙཏཱཡ སཾཝཏྟནྟཱིཏི ཀཏམཱ སཱིགྷཔཉྙཱ? སཱིགྷཾ སཱིགྷཾ སཱིལཱནི པརིཔཱུརེཏཱིཏི – སཱིགྷཔཉྙཱ། སཱིགྷཾ སཱིགྷཾ ཨིནྡྲིཡསཾཝརཾ པརིཔཱུརེཏཱིཏི – སཱིགྷཔཉྙཱ། སཱིགྷཾ སཱིགྷཾ བྷོཛནེ མཏྟཉྙུཏཾ པརིཔཱུརེཏཱིཏི – སཱིགྷཔཉྙཱ། སཱིགྷཾ སཱིགྷཾ ཛཱགརིཡཱནུཡོགཾ པརིཔཱུརེཏཱིཏི – སཱིགྷཔཉྙཱ། སཱིགྷཾ སཱིགྷཾ སཱིལཀྑནྡྷཾ པརིཔཱུརེཏཱིཏི – སཱིགྷཔཉྙཱ། སཱིགྷཾ སཱིགྷཾ སམཱདྷིཀྑནྡྷཾ པརིཔཱུརེཏཱིཏི – སཱིགྷཔཉྙཱ། སཱིགྷཾ སཱིགྷཾ པཉྙཱཀྑནྡྷཾ པརིཔཱུརེཏཱིཏི – སཱིགྷཔཉྙཱ ། སཱིགྷཾ སཱིགྷཾ ཝིམུཏྟིཀྑནྡྷཾ པརིཔཱུརེཏཱིཏི – སཱིགྷཔཉྙཱ། སཱིགྷཾ སཱིགྷཾ ཝིམུཏྟིཉཱཎདསྶནཀྑནྡྷཾ པརིཔཱུརེཏཱིཏི – སཱིགྷཔཉྙཱ། སཱིགྷཾ སཱིགྷཾ ཋཱནཱཊྛཱནཱནི པཊིཝིཛ྄ཛྷཏཱིཏི – སཱིགྷཔཉྙཱ། སཱིགྷཾ སཱིགྷཾ ཝིཧཱརསམཱཔཏྟིཡོ པརིཔཱུརེཏཱིཏི – སཱིགྷཔཉྙཱ། སཱིགྷཾ སཱིགྷཾ ཨརིཡསཙྩཱནི པཊིཝིཛ྄ཛྷཏཱིཏི – སཱིགྷཔཉྙཱ། སཱིགྷཾ སཱིགྷཾ སཏིཔཊྛཱནེ བྷཱཝེཏཱིཏི – སཱིགྷཔཉྙཱ། སཱིགྷཾ སཱིགྷཾ སམྨཔྤདྷཱནེ བྷཱཝེཏཱིཏི – སཱིགྷཔཉྙཱ། སཱིགྷཾ སཱིགྷཾ ཨིདྡྷིཔཱདེ བྷཱཝེཏཱིཏི – སཱིགྷཔཉྙཱ། སཱིགྷཾ སཱིགྷཾ ཨིནྡྲིཡཱནི བྷཱཝེཏཱིཏི – སཱིགྷཔཉྙཱ། སཱིགྷཾ སཱིགྷཾ བལཱནི བྷཱཝེཏཱིཏི – སཱིགྷཔཉྙཱ། སཱིགྷཾ སཱིགྷཾ བོཛ྄ཛྷངྒེ བྷཱཝེཏཱིཏི – སཱིགྷཔཉྙཱ། སཱིགྷཾ སཱིགྷཾ ཨརིཡམགྒཾ བྷཱཝེཏཱིཏི – སཱིགྷཔཉྙཱ། སཱིགྷཾ སཱིགྷཾ སཱམཉྙཕལཱནི སཙྪིཀརོཏཱིཏི – སཱིགྷཔཉྙཱ། སཱིགྷཾ སཱིགྷཾ ཨབྷིཉྙཱཡོ པཊིཝིཛ྄ཛྷཏཱིཏི – སཱིགྷཔཉྙཱ། སཱིགྷཾ སཱིགྷཾ པརམཏྠཾ ནིབྦཱནཾ སཙྪིཀརོཏཱིཏི – སཱིགྷཔཉྙཱ། སཱིགྷཔཉྙཏཱཡ སཾཝཏྟནྟཱིཏི – ཨཡཾ སཱིགྷཔཉྙཱ།
Sīghapaññatāya saṃvattantīti katamā sīghapaññā? Sīghaṃ sīghaṃ sīlāni paripūretīti – sīghapaññā. Sīghaṃ sīghaṃ indriyasaṃvaraṃ paripūretīti – sīghapaññā. Sīghaṃ sīghaṃ bhojane mattaññutaṃ paripūretīti – sīghapaññā. Sīghaṃ sīghaṃ jāgariyānuyogaṃ paripūretīti – sīghapaññā. Sīghaṃ sīghaṃ sīlakkhandhaṃ paripūretīti – sīghapaññā. Sīghaṃ sīghaṃ samādhikkhandhaṃ paripūretīti – sīghapaññā. Sīghaṃ sīghaṃ paññākkhandhaṃ paripūretīti – sīghapaññā . Sīghaṃ sīghaṃ vimuttikkhandhaṃ paripūretīti – sīghapaññā. Sīghaṃ sīghaṃ vimuttiñāṇadassanakkhandhaṃ paripūretīti – sīghapaññā. Sīghaṃ sīghaṃ ṭhānāṭṭhānāni paṭivijjhatīti – sīghapaññā. Sīghaṃ sīghaṃ vihārasamāpattiyo paripūretīti – sīghapaññā. Sīghaṃ sīghaṃ ariyasaccāni paṭivijjhatīti – sīghapaññā. Sīghaṃ sīghaṃ satipaṭṭhāne bhāvetīti – sīghapaññā. Sīghaṃ sīghaṃ sammappadhāne bhāvetīti – sīghapaññā. Sīghaṃ sīghaṃ iddhipāde bhāvetīti – sīghapaññā. Sīghaṃ sīghaṃ indriyāni bhāvetīti – sīghapaññā. Sīghaṃ sīghaṃ balāni bhāvetīti – sīghapaññā. Sīghaṃ sīghaṃ bojjhaṅge bhāvetīti – sīghapaññā. Sīghaṃ sīghaṃ ariyamaggaṃ bhāvetīti – sīghapaññā. Sīghaṃ sīghaṃ sāmaññaphalāni sacchikarotīti – sīghapaññā. Sīghaṃ sīghaṃ abhiññāyo paṭivijjhatīti – sīghapaññā. Sīghaṃ sīghaṃ paramatthaṃ nibbānaṃ sacchikarotīti – sīghapaññā. Sīghapaññatāya saṃvattantīti – ayaṃ sīghapaññā.
ལཧུཔཉྙཏཱཡ སཾཝཏྟནྟཱིཏི ཀཏམཱ ལཧུཔཉྙཱ? ལཧུཾ ལཧུཾ སཱིལཱནི པརིཔཱུརེཏཱིཏི – ལཧུཔཉྙཱ། ལཧུཾ ལཧུཾ ཨིནྡྲིཡསཾཝརཾ པརིཔཱུརེཏཱིཏི – ལཧུཔཉྙཱ། ལཧུཾ ལཧུཾ བྷོཛནེ མཏྟཉྙུཏཾ པརིཔཱུརེཏཱིཏི – ལཧུཔཉྙཱ། ལཧུཾ ལཧུཾ ཛཱགརིཡཱནུཡོགཾ པརིཔཱུརེཏཱིཏི – ལཧུཔཉྙཱ། ལཧུཾ ལཧུཾ སཱིལཀྑནྡྷཾ …པེ॰… སམཱདྷིཀྑནྡྷཾ … པཉྙཱཀྑནྡྷཾ… ཝིམུཏྟིཀྑནྡྷཾ… ཝིམུཏྟིཉཱཎདསྶནཀྑནྡྷཾ པརིཔཱུརེཏཱིཏི – ལཧུཔཉྙཱ། ལཧུཾ ལཧུཾ ཋཱནཱཊྛཱནཱནི པཊིཝིཛ྄ཛྷཏཱིཏི – ལཧུཔཉྙཱ། ལཧུཾ ལཧུཾ ཝིཧཱརསམཱཔཏྟིཡོ པརིཔཱུརེཏཱིཏི – ལཧུཔཉྙཱ། ལཧུཾ ལཧུཾ ཨརིཡསཙྩཱནི པཊིཝིཛ྄ཛྷཏཱིཏི – ལཧུཔཉྙཱ། ལཧུཾ ལཧུཾ སཏིཔཊྛཱནེ བྷཱཝེཏཱིཏི – ལཧུཔཉྙཱ། ལཧུཾ ལཧུཾ སམྨཔྤདྷཱནེ བྷཱཝེཏཱིཏི – ལཧུཔཉྙཱ། ལཧུཾ ལཧུཾ ཨིདྡྷིཔཱདེ བྷཱཝེཏཱིཏི – ལཧུཔཉྙཱ། ལཧུཾ ལཧུཾ ཨིནྡྲིཡཱནི བྷཱཝེཏཱིཏི – ལཧུཔཉྙཱ། ལཧུཾ ལཧུཾ བལཱནི བྷཱཝེཏཱིཏི – ལཧུཔཉྙཱ། ལཧུཾ ལཧུཾ བོཛ྄ཛྷངྒེ བྷཱཝེཏཱིཏི – ལཧུཔཉྙཱ། ལཧུཾ ལཧུཾ ཨརིཡམགྒཾ བྷཱཝེཏཱིཏི – ལཧུཔཉྙཱ། ལཧུཾ ལཧུཾ སཱམཉྙཕལཱནི སཙྪིཀརོཏཱིཏི – ལཧུཔཉྙཱ། ལཧུཾ ལཧུཾ ཨབྷིཉྙཱཡོ པཊིཝིཛ྄ཛྷཏཱིཏི – ལཧུཔཉྙཱ། ལཧུཾ ལཧུཾ པརམཏྠཾ ནིབྦཱནཾ སཙྪིཀརོཏཱིཏི – ལཧུཔཉྙཱ། ལཧུཔཉྙཏཱཡ སཾཝཏྟནྟཱིཏི – ཨཡཾ ལཧུཔཉྙཱ།
Lahupaññatāya saṃvattantīti katamā lahupaññā? Lahuṃ lahuṃ sīlāni paripūretīti – lahupaññā. Lahuṃ lahuṃ indriyasaṃvaraṃ paripūretīti – lahupaññā. Lahuṃ lahuṃ bhojane mattaññutaṃ paripūretīti – lahupaññā. Lahuṃ lahuṃ jāgariyānuyogaṃ paripūretīti – lahupaññā. Lahuṃ lahuṃ sīlakkhandhaṃ …pe… samādhikkhandhaṃ … paññākkhandhaṃ… vimuttikkhandhaṃ… vimuttiñāṇadassanakkhandhaṃ paripūretīti – lahupaññā. Lahuṃ lahuṃ ṭhānāṭṭhānāni paṭivijjhatīti – lahupaññā. Lahuṃ lahuṃ vihārasamāpattiyo paripūretīti – lahupaññā. Lahuṃ lahuṃ ariyasaccāni paṭivijjhatīti – lahupaññā. Lahuṃ lahuṃ satipaṭṭhāne bhāvetīti – lahupaññā. Lahuṃ lahuṃ sammappadhāne bhāvetīti – lahupaññā. Lahuṃ lahuṃ iddhipāde bhāvetīti – lahupaññā. Lahuṃ lahuṃ indriyāni bhāvetīti – lahupaññā. Lahuṃ lahuṃ balāni bhāvetīti – lahupaññā. Lahuṃ lahuṃ bojjhaṅge bhāvetīti – lahupaññā. Lahuṃ lahuṃ ariyamaggaṃ bhāvetīti – lahupaññā. Lahuṃ lahuṃ sāmaññaphalāni sacchikarotīti – lahupaññā. Lahuṃ lahuṃ abhiññāyo paṭivijjhatīti – lahupaññā. Lahuṃ lahuṃ paramatthaṃ nibbānaṃ sacchikarotīti – lahupaññā. Lahupaññatāya saṃvattantīti – ayaṃ lahupaññā.
ཧཱསཔཉྙཏཱཡ སཾཝཏྟནྟཱིཏི ཀཏམཱ ཧཱསཔཉྙཱ? ཨིདྷེཀཙྩོ ཧཱསབཧུལོ ཝེདབཧུལོ ཏུཊྛིབཧུལོ པཱམོཛྫབཧུལོ སཱིལཱནི པརིཔཱུརེཏཱིཏི – ཧཱསཔཉྙཱ། ཧཱསབཧུལོ ཝེདབཧུལོ ཏུཊྛིབཧུལོ པཱམོཛྫབཧུལོ ཨིནྡྲིཡསཾཝརཾ པརིཔཱུརེཏཱིཏི – ཧཱསཔཉྙཱ། ཧཱསབཧུལོ ཝེདབཧུལོ ཏུཊྛིབཧུལོ པཱམོཛྫབཧུལོ བྷོཛནེ མཏྟཉྙུཏཾ པརིཔཱུརེཏཱིཏི – ཧཱསཔཉྙཱ། ཧཱསབཧུལོ ཝེདབཧུལོ ཏུཊྛིབཧུལོ པཱམོཛྫབཧུལོ ཛཱགརིཡཱནུཡོགཾ པརིཔཱུརེཏཱིཏི – ཧཱསཔཉྙཱ། ཧཱསབཧུལོ ཝེདབཧུལོ ཏུཊྛིབཧུལོ པཱམོཛྫབཧུལོ སཱིལཀྑནྡྷཾ…པེ॰… སམཱདྷིཀྑནྡྷཾ… པཉྙཱཀྑནྡྷཾ… ཝིམུཏྟིཀྑནྡྷཾ… ཝིམུཏྟིཉཱཎདསྶནཀྑནྡྷཾ པརིཔཱུརེཏཱིཏི…པེ॰… ཋཱནཱཊྛཱནཱནི པཊིཝིཛ྄ཛྷཏཱིཏི… ཝིཧཱརསམཱཔཏྟིཡོ པརིཔཱུརེཏཱིཏི … ཨརིཡསཙྩཱནི པཊིཝིཛ྄ཛྷཏཱིཏི… སཏིཔཊྛཱནེ བྷཱཝེཏཱིཏི… སམྨཔྤདྷཱནེ བྷཱཝེཏཱིཏི… ཨིདྡྷིཔཱདེ བྷཱཝེཏཱིཏི… ཨིནྡྲིཡཱནི བྷཱཝེཏཱིཏི… བལཱནི བྷཱཝེཏཱིཏི… བོཛ྄ཛྷངྒེ བྷཱཝེཏཱིཏི … ཨརིཡམགྒཾ བྷཱཝེཏཱིཏི…པེ॰… སཱམཉྙཕལཱནི སཙྪིཀརོཏཱིཏི – ཧཱསཔཉྙཱ། ཧཱསབཧུལོ ཝེདབཧུལོ ཏུཊྛིབཧུལོ པཱམོཛྫབཧུལོ ཨབྷིཉྙཱཡོ པཊིཝིཛ྄ཛྷཏཱིཏི – ཧཱསཔཉྙཱ། ཧཱསབཧུལོ ཝེདབཧུལོ ཏུཊྛིབཧུལོ པཱམོཛྫབཧུལོ པརམཏྠཾ ནིབྦཱནཾ སཙྪིཀརོཏཱིཏི – ཧཱསཔཉྙཱ། ཧཱསཔཉྙཏཱཡ སཾཝཏྟནྟཱིཏི – ཨཡཾ ཧཱསཔཉྙཱ།
Hāsapaññatāya saṃvattantīti katamā hāsapaññā? Idhekacco hāsabahulo vedabahulo tuṭṭhibahulo pāmojjabahulo sīlāni paripūretīti – hāsapaññā. Hāsabahulo vedabahulo tuṭṭhibahulo pāmojjabahulo indriyasaṃvaraṃ paripūretīti – hāsapaññā. Hāsabahulo vedabahulo tuṭṭhibahulo pāmojjabahulo bhojane mattaññutaṃ paripūretīti – hāsapaññā. Hāsabahulo vedabahulo tuṭṭhibahulo pāmojjabahulo jāgariyānuyogaṃ paripūretīti – hāsapaññā. Hāsabahulo vedabahulo tuṭṭhibahulo pāmojjabahulo sīlakkhandhaṃ…pe… samādhikkhandhaṃ… paññākkhandhaṃ… vimuttikkhandhaṃ… vimuttiñāṇadassanakkhandhaṃ paripūretīti…pe… ṭhānāṭṭhānāni paṭivijjhatīti… vihārasamāpattiyo paripūretīti … ariyasaccāni paṭivijjhatīti… satipaṭṭhāne bhāvetīti… sammappadhāne bhāvetīti… iddhipāde bhāvetīti… indriyāni bhāvetīti… balāni bhāvetīti… bojjhaṅge bhāvetīti … ariyamaggaṃ bhāvetīti…pe… sāmaññaphalāni sacchikarotīti – hāsapaññā. Hāsabahulo vedabahulo tuṭṭhibahulo pāmojjabahulo abhiññāyo paṭivijjhatīti – hāsapaññā. Hāsabahulo vedabahulo tuṭṭhibahulo pāmojjabahulo paramatthaṃ nibbānaṃ sacchikarotīti – hāsapaññā. Hāsapaññatāya saṃvattantīti – ayaṃ hāsapaññā.
༧. ཛཝནཔཉྙཏཱཡ སཾཝཏྟནྟཱིཏི ཀཏམཱ ཛཝནཔཉྙཱ? ཡཾ ཀིཉྩི རཱུཔཾ ཨཏཱིཏཱནཱགཏཔཙྩུཔྤནྣཾ ཨཛ྄ཛྷཏྟཾ ཝཱ བཧིདྡྷཱ ཝཱ ཨོལཱ༹རིཀཾ ཝཱ སུཁུམཾ ཝཱ ཧཱིནཾ ཝཱ པཎཱིཏཾ ཝཱ ཡཾ དཱུརེ སནྟིཀེ ཝཱ, སབྦཾ རཱུཔཾ ཨནིཙྩཏོ ཁིཔྤཾ ཛཝཏཱིཏི – ཛཝནཔཉྙཱ། དུཀྑཏོ ཁིཔྤཾ ཛཝཏཱིཏི – ཛཝནཔཉྙཱ། ཨནཏྟཏོ ཁིཔྤཾ ཛཝཏཱིཏི – ཛཝནཔཉྙཱ། ཡཱ ཀཱཙི ཝེདནཱ…པེ॰… ཡཱ ཀཱཙི སཉྙཱ… ཡེ ཀེཙི སངྑཱརཱ… ཡཾ ཀིཉྩི ཝིཉྙཱཎཾ ཨཏཱིཏཱནཱགཏཔཙྩུཔྤནྣཾ ཨཛ྄ཛྷཏྟཾ ཝཱ བཧིདྡྷཱ ཝཱ ཨོལཱ༹རིཀཾ ཝཱ སུཁུམཾ ཝཱ ཧཱིནཾ ཝཱ པཎཱིཏཾ ཝཱ ཡཾ དཱུརེ སནྟིཀེ ཝཱ, སབྦཾ ཝིཉྙཱཎཾ ཨནིཙྩཏོ ཁིཔྤཾ ཛཝཏཱིཏི – ཛཝནཔཉྙཱ། དུཀྑཏོ ཁིཔྤཾ ཛཝཏཱིཏི – ཛཝནཔཉྙཱ། ཨནཏྟཏོ ཁིཔྤཾ ཛཝཏཱིཏི – ཛཝནཔཉྙཱ། ཙཀྑུ…པེ॰… ཛརཱམརཎཾ ཨཏཱིཏཱནཱགཏཔཙྩུཔྤནྣཾ ཨནིཙྩཏོ ཁིཔྤཾ ཛཝཏཱིཏི – ཛཝནཔཉྙཱ། དུཀྑཏོ ཁིཔྤཾ ཛཝཏཱིཏི – ཛཝནཔཉྙཱ ། ཨནཏྟཏོ ཁིཔྤཾ ཛཝཏཱིཏི – ཛཝནཔཉྙཱ།
7.Javanapaññatāya saṃvattantīti katamā javanapaññā? Yaṃ kiñci rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ rūpaṃ aniccato khippaṃ javatīti – javanapaññā. Dukkhato khippaṃ javatīti – javanapaññā. Anattato khippaṃ javatīti – javanapaññā. Yā kāci vedanā…pe… yā kāci saññā… ye keci saṅkhārā… yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ viññāṇaṃ aniccato khippaṃ javatīti – javanapaññā. Dukkhato khippaṃ javatīti – javanapaññā. Anattato khippaṃ javatīti – javanapaññā. Cakkhu…pe… jarāmaraṇaṃ atītānāgatapaccuppannaṃ aniccato khippaṃ javatīti – javanapaññā. Dukkhato khippaṃ javatīti – javanapaññā . Anattato khippaṃ javatīti – javanapaññā.
རཱུཔཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ ཁཡཊྛེན དུཀྑཾ བྷཡཊྛེན ཨནཏྟཱ ཨསཱརཀཊྛེནཱཏི ཏུལཡིཏྭཱ ཏཱིརཡིཏྭཱ ཝིབྷཱཝཡིཏྭཱ ཝིབྷཱུཏཾ ཀཏྭཱ རཱུཔནིརོདྷེ ནིབྦཱནེ ཁིཔྤཾ ཛཝཏཱིཏི – ཛཝནཔཉྙཱ། ཝེདནཱ…པེ॰… སཉྙཱ… སངྑཱརཱ… ཝིཉྙཱཎཾ… ཙཀྑུ…པེ॰… ཛརཱམརཎཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ ཁཡཊྛེན དུཀྑཾ བྷཡཊྛེན ཨནཏྟཱ ཨསཱརཀཊྛེནཱཏི ཏུལཡིཏྭཱ ཏཱིརཡིཏྭཱ ཝིབྷཱཝཡིཏྭཱ ཝིབྷཱུཏཾ ཀཏྭཱ ཛརཱམརཎནིརོདྷེ 31 ནིབྦཱནེ ཁིཔྤཾ ཛཝཏཱིཏི – ཛཝནཔཉྙཱ།
Rūpaṃ atītānāgatapaccuppannaṃ aniccaṃ khayaṭṭhena dukkhaṃ bhayaṭṭhena anattā asārakaṭṭhenāti tulayitvā tīrayitvā vibhāvayitvā vibhūtaṃ katvā rūpanirodhe nibbāne khippaṃ javatīti – javanapaññā. Vedanā…pe… saññā… saṅkhārā… viññāṇaṃ… cakkhu…pe… jarāmaraṇaṃ atītānāgatapaccuppannaṃ aniccaṃ khayaṭṭhena dukkhaṃ bhayaṭṭhena anattā asārakaṭṭhenāti tulayitvā tīrayitvā vibhāvayitvā vibhūtaṃ katvā jarāmaraṇanirodhe 32 nibbāne khippaṃ javatīti – javanapaññā.
རཱུཔཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ སངྑཏཾ པཊིཙྩསམུཔྤནྣཾ ཁཡདྷམྨཾ ཝཡདྷམྨཾ ཝིརཱགདྷམྨཾ ནིརོདྷདྷམྨནྟི ཏུལཡིཏྭཱ ཏཱིརཡིཏྭཱ ཝིབྷཱཝཡིཏྭཱ ཝིབྷཱུཏཾ ཀཏྭཱ རཱུཔནིརོདྷེ ནིབྦཱནེ ཁིཔྤཾ ཛཝཏཱིཏི – ཛཝནཔཉྙཱ། ཝེདནཱ…པེ॰… སཉྙཱ… སངྑཱརཱ… ཝིཉྙཱཎཾ… ཙཀྑུ…པེ॰… ཛརཱམརཎཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ སངྑཏཾ པཊིཙྩསམུཔྤནྣཾ ཁཡདྷམྨཾ ཝཡདྷམྨཾ ཝིརཱགདྷམྨཾ ནིརོདྷདྷམྨནྟི ཏུལཡིཏྭཱ ཏཱིརཡིཏྭཱ ཝིབྷཱཝཡིཏྭཱ ཝིབྷཱུཏཾ ཀཏྭཱ ཛརཱམརཎནིརོདྷེ ནིབྦཱནེ ཁིཔྤཾ ཛཝཏཱིཏི – ཛཝནཔཉྙཱ། ཛཝནཔཉྙཏཱཡ སཾཝཏྟནྟཱིཏི – ཨཡཾ ཛཝནཔཉྙཱ།
Rūpaṃ atītānāgatapaccuppannaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammanti tulayitvā tīrayitvā vibhāvayitvā vibhūtaṃ katvā rūpanirodhe nibbāne khippaṃ javatīti – javanapaññā. Vedanā…pe… saññā… saṅkhārā… viññāṇaṃ… cakkhu…pe… jarāmaraṇaṃ atītānāgatapaccuppannaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammanti tulayitvā tīrayitvā vibhāvayitvā vibhūtaṃ katvā jarāmaraṇanirodhe nibbāne khippaṃ javatīti – javanapaññā. Javanapaññatāya saṃvattantīti – ayaṃ javanapaññā.
ཏིཀྑཔཉྙཏཱཡ སཾཝཏྟནྟཱིཏི ཀཏམཱ ཏིཀྑཔཉྙཱ? ཁིཔྤཾ ཀིལེསེ ཚིནྡཏཱིཏི – ཏིཀྑཔཉྙཱ། ཨུཔྤནྣཾ ཀཱམཝིཏཀྐཾ ནཱདྷིཝཱསེཏི པཛཧཏི ཝིནོདེཏི བྱནྟཱིཀརོཏི 33 ཨནབྷཱཝཾ གམེཏཱིཏི – ཏིཀྑཔཉྙཱ། ཨུཔྤནྣཾ བྱཱཔཱདཝིཏཀྐཾ ནཱདྷིཝཱསེཏི པཛཧཏི ཝིནོདེཏི བྱནྟཱིཀརོཏི ཨནབྷཱཝཾ གམེཏཱིཏི – ཏིཀྑཔཉྙཱ། ཨུཔྤནྣཾ ཝིཧིཾསཱཝིཏཀྐཾ ནཱདྷིཝཱསེཏི…པེ॰… ཨུཔྤནྣུཔྤནྣེ པཱཔཀེ ཨཀུསལེ དྷམྨེ ནཱདྷིཝཱསེཏི པཛཧཏི ཝིནོདེཏི བྱནྟཱིཀརོཏི ཨནབྷཱཝཾ གམེཏཱིཏི – ཏིཀྑཔཉྙཱ། ཨུཔྤནྣཾ རཱགཾ ནཱདྷིཝཱསེཏི པཛཧཏི ཝིནོདེཏི བྱནྟཱིཀརོཏི ཨནབྷཱཝཾ གམེཏཱིཏི – ཏིཀྑཔཉྙཱ། ཨུཔྤནྣཾ དོསཾ…པེ॰… ཨུཔྤནྣཾ མོཧཾ … ཨུཔྤནྣཾ ཀོདྷཾ… ཨུཔྤནྣཾ ཨུཔནཱཧཾ… མཀྑཾ… པལཱ༹སཾ… ཨིསྶཾ… མཙྪརིཡཾ… མཱཡཾ… སཱཋེཡྻཾ… ཐམྦྷཾ… སཱརམྦྷཾ… མཱནཾ… ཨཏིམཱནཾ… མདཾ… པམཱདཾ… སབྦེ ཀིལེསེ… སབྦེ དུཙྩརིཏེ… སབྦེ ཨབྷིསངྑཱརེ…པེ॰… སབྦེ བྷཝགཱམིཀམྨེ ནཱདྷིཝཱསེཏི པཛཧཏི ཝིནོདེཏི བྱནྟཱིཀརོཏི ཨནབྷཱཝཾ གམེཏཱིཏི – ཏིཀྑཔཉྙཱ། ཨེཀསྨིཾ ཨཱསནེ ཙཏྟཱརོ ཙ ཨརིཡམགྒཱ ཙཏྟཱརི ཙ སཱམཉྙཕལཱནི ཙཏསྶོ པཊིསམྦྷིདཱཡོ ཚ ཨབྷིཉྙཱཡོ ཨདྷིགཏཱ ཧོནྟི སཙྪིཀཏཱ ཕསྶིཏཱ པཉྙཱཡཱཏི – ཏིཀྑཔཉྙཱ། ཏིཀྑཔཉྙཏཱཡ སཾཝཏྟནྟཱིཏི – ཨཡཾ ཏིཀྑཔཉྙཱ།
Tikkhapaññatāya saṃvattantīti katamā tikkhapaññā? Khippaṃ kilese chindatīti – tikkhapaññā. Uppannaṃ kāmavitakkaṃ nādhivāseti pajahati vinodeti byantīkaroti 34 anabhāvaṃ gametīti – tikkhapaññā. Uppannaṃ byāpādavitakkaṃ nādhivāseti pajahati vinodeti byantīkaroti anabhāvaṃ gametīti – tikkhapaññā. Uppannaṃ vihiṃsāvitakkaṃ nādhivāseti…pe… uppannuppanne pāpake akusale dhamme nādhivāseti pajahati vinodeti byantīkaroti anabhāvaṃ gametīti – tikkhapaññā. Uppannaṃ rāgaṃ nādhivāseti pajahati vinodeti byantīkaroti anabhāvaṃ gametīti – tikkhapaññā. Uppannaṃ dosaṃ…pe… uppannaṃ mohaṃ … uppannaṃ kodhaṃ… uppannaṃ upanāhaṃ… makkhaṃ… paḷāsaṃ… issaṃ… macchariyaṃ… māyaṃ… sāṭheyyaṃ… thambhaṃ… sārambhaṃ… mānaṃ… atimānaṃ… madaṃ… pamādaṃ… sabbe kilese… sabbe duccarite… sabbe abhisaṅkhāre…pe… sabbe bhavagāmikamme nādhivāseti pajahati vinodeti byantīkaroti anabhāvaṃ gametīti – tikkhapaññā. Ekasmiṃ āsane cattāro ca ariyamaggā cattāri ca sāmaññaphalāni catasso paṭisambhidāyo cha abhiññāyo adhigatā honti sacchikatā phassitā paññāyāti – tikkhapaññā. Tikkhapaññatāya saṃvattantīti – ayaṃ tikkhapaññā.
ནིབྦེདྷིཀཔཉྙཏཱཡ སཾཝཏྟནྟཱིཏི ཀཏམཱ ནིབྦེདྷིཀཔཉྙཱ? ཨིདྷེཀཙྩོ སབྦསངྑཱརེསུ ཨུབྦེགབཧུལོ ཧོཏི ཨུཏྟཱསབཧུལོ ཨུཀྐཎྛནབཧུལོ ཨརཏིབཧུལོ ཨནབྷིརཏིབཧུལོ། བཧིམུཁོ ན རམཏི སབྦསངྑཱརེསུ། ཨནིབྦིདྡྷཔུབྦཾ ཨཔྤདཱལིཏཔུབྦཾ ལོབྷཀྑནྡྷཾ ནིབྦིཛ྄ཛྷཏི པདཱལེཏཱིཏི – ནིབྦེདྷིཀཔཉྙཱ། ཨནིབྦིདྡྷཔུབྦཾ ཨཔྤདཱལིཏཔུབྦཾ དོསཀྑནྡྷཾ ནིབྦིཛ྄ཛྷཏི པདཱལེཏཱིཏི – ནིབྦེདྷིཀཔཉྙཱ། ཨནིབྦིདྡྷཔུབྦཾ ཨཔྤདཱལིཏཔུབྦཾ མོཧཀྑནྡྷཾ ནིབྦིཛ྄ཛྷཏི པདཱལེཏཱིཏི – ནིབྦེདྷིཀཔཉྙཱ ། ཨནིབྦིདྡྷཔུབྦཾ ཨཔྤདཱལིཏཔུབྦཾ ཀོདྷཾ…པེ॰… ཨུཔནཱཧཾ… མཀྑཾ… པལཱ༹སཾ… ཨིསྶཾ… མཙྪརིཡཾ… མཱཡཾ… སཱཋེཡྻཾ… ཐམྦྷཾ… སཱརམྦྷཾ… མཱནཾ… ཨཏིམཱནཾ… མདཾ… པམཱདཾ… སབྦེ ཀིལེསེ… སབྦེ དུཙྩརིཏེ… སབྦེ ཨབྷིསངྑཱརེ…པེ॰… སབྦེ བྷཝགཱམིཀམྨེ ནིབྦིཛ྄ཛྷཏི པདཱལེཏཱིཏི – ནིབྦེདྷིཀཔཉྙཱ། ནིབྦེདྷིཀཔཉྙཏཱཡ སཾཝཏྟནྟཱིཏི – ཨཡཾ ནིབྦེདྷིཀཔཉྙཱ།
Nibbedhikapaññatāya saṃvattantīti katamā nibbedhikapaññā? Idhekacco sabbasaṅkhāresu ubbegabahulo hoti uttāsabahulo ukkaṇṭhanabahulo aratibahulo anabhiratibahulo. Bahimukho na ramati sabbasaṅkhāresu. Anibbiddhapubbaṃ appadālitapubbaṃ lobhakkhandhaṃ nibbijjhati padāletīti – nibbedhikapaññā. Anibbiddhapubbaṃ appadālitapubbaṃ dosakkhandhaṃ nibbijjhati padāletīti – nibbedhikapaññā. Anibbiddhapubbaṃ appadālitapubbaṃ mohakkhandhaṃ nibbijjhati padāletīti – nibbedhikapaññā . Anibbiddhapubbaṃ appadālitapubbaṃ kodhaṃ…pe… upanāhaṃ… makkhaṃ… paḷāsaṃ… issaṃ… macchariyaṃ… māyaṃ… sāṭheyyaṃ… thambhaṃ… sārambhaṃ… mānaṃ… atimānaṃ… madaṃ… pamādaṃ… sabbe kilese… sabbe duccarite… sabbe abhisaṅkhāre…pe… sabbe bhavagāmikamme nibbijjhati padāletīti – nibbedhikapaññā. Nibbedhikapaññatāya saṃvattantīti – ayaṃ nibbedhikapaññā.
ཨིམཱ སོལ༹ས པཉྙཱཡོ། ཨིམཱཧི སོལ༹སཧི པཉྙཱཧི སམནྣཱགཏོ པུགྒལོ པཊིསམྦྷིདཔྤཏྟོ།
Imā soḷasa paññāyo. Imāhi soḷasahi paññāhi samannāgato puggalo paṭisambhidappatto.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༡. སོལ༹སཔཉྙཱནིདྡེསཝཎྞནཱ • 1. Soḷasapaññāniddesavaṇṇanā
